1. Onkalamwenyo yoye oya li ya tya ngiini manga inoo tameka okukonakona Ombiimbeli?

 ONKALAMWENYO yoye oya li ya tya ngiini manga inoo tameka okukonakona Ombiimbeli nOonzapo dhaJehova? Oyendji yomutse katu hole nokuli okudhiladhila kombinga yasho. Etaloko lyetu nosho wo eihumbato lyetu otashi vulika lya li lya nwethwa mo kuuyuni mbuka. Ngele osho, ‘katwa li tu na etegameno noka twa li tu na Kalunga.’ (Ef. 2:12) Ihe sho twa konakona Ombiimbeli onkalamwenyo yetu oya lunduluka.

2. Oshike wi ilongo konima sho wa tameke okukonakona Ombiimbeli?

² Sho wa konakona Ombiimbeli, owa mono kutya owu na Tate gwoye gwomegulu, Jehova, ngoka e ku hole noonkondo. Owa li wa mono wo kutya opo wu mu opalele nowu ninge oshitopolwa shuukwanegumbo we, owa pumbwa okuninga omalunduluko omanene monkalamwenyo yoye nokulundulula okudhiladhila kwoye. Owa li wu na okwiilonga okukaleka onkalamwenyo yoye metsokumwe nomithikampango dhe. — Ef. 5:3-5.

3. Shi ikolelela kAakolossa 3:9, 10, Jehova okwa hala tu ninge shike, notatu ka kundathana shike moshitopolwa shika?

³ Omushiti gwetu naTate gwetu gwomegulu, Jehova, oku na uuthemba wokutokola nkene iilyo yuukwanegumbo we yi na okwiihumbata. Okwa hala wo tu ninge oonkambadhala tu ‘ihule omuntu gwetu omukulu pamwe nomikalo dhe,’ * manga inaatu ninginithwa. (Lesha Aakolossa 3:9, 10.) Oshitopolwa shika otashi ka kwathela mboka ya hala okuninginithwa ya yamukule omapulo gatatu taga landula: (1) ‘Omuntu gwetu omukulu’ oshike? (2) Omolwashike Jehova a hala tu ihule omuntu gwetu omukulu? (3) Ongiini tatu vulu oku shi ninga? Kwaamboka twa ninginithwa nale, oshitopolwa shika otashi ke tu kwathela tu yande okwiihumbata nenge okudhiladhila ngaashi nale.

4. Omuntu ngoka ha pangelwa ‘kuuntu we uukulu’ ohi ihumbata ngiini?

⁴ Omuntu ngoka ha pangelwa ‘kuuntu we uukulu,’ olundji ohi ihumbata noha dhiladhila panyama. Otashi vulika a kale i ihole mwene, ha geye mbala, ihaa pandula, ye oku na uuntsa. Otashi vulika wo a kale e hole okutala omathano giipala, oomuvi tadhi ulike eihumbato lya nyata nenge elongithonkondo. Kapu na omalimbililo kutya oku na omaukwatya gamwe omawanawa, notashi vulika ha kala e uvite e na ondjo omolwiinima mbyoka ha popi nenge ha ningi. Ihe iha kala naanaa e na ehalo a lundulule okudhiladhila kwe nenge eihumbato lye. — Gal. 5:19-21; 2 Tim. 3:2-5.

5. Etaloko lini li li pandjele twa pumbwa okukala tu na, ngele tashi ya pokwiihula omuntu gwetu omukulu? (Iil. 3:19)

⁵ Atuheni inatu gwanenena, onkene kapu na nando ogumwe gwomutse ta vulu okuyanda thiluthilu omadhiladhilo nenge omahalo ga puka. Omathimbo gamwe otashi vulika tu ninge sha nenge tu popye sha shoka lwanima tashi ke tu ningitha tu ipe uusama. (Jer. 17:9; Jak. 3:2) Ihe ngele otwi ihula omuntu gwetu omukulu, itatu ka pangelwa we keihumbato lya nyata nenge tu ka kale tu na omaukwatya ngoka Jehova e tonde. Kungawo, otwa zala omuntu omupe. — Jes. 55:7; lesha Iilonga 3:19.

6. Omolwashike Jehova he tu ladhipike tu ethe po okudhiladhila kwa puka nosho wo eihumbato lya nyata lyuuntu wetu uukulu?

⁶ Jehova ohe tu ladhipike tu ethe po okudhiladhila kwa puka nosho wo eihumbato lya nyata molwaashoka oku tu hole noonkondo nokwa hala tu nyanyukilwe onkalamwenyo. (Jes. 48:17, 18) Oku shi kutya mboka hayi iyetha ya pangelwe komahalo ga puka ohayi iyetele owala omaupyakadhi nosho wo yalwe. Ohashi mu uvitha nayi noonkondo oku tu mona tatu iyetele omaupyakadhi nosho wo yalwe.

7. Shi ikolelela kAaroma 12:1, 2, atuheni otu na okuninga etokolo lini?

⁷ Ookuume ketu yamwe nosho wo aakwanezimo otashi vulika petameko ya kale taye tu sheke sho tatu kambadhala okuninga omalunduluko monkalamwenyo yetu. (1 Pet. 4:3, 4) Otashi vulika wo ye tu lombwele kutya otwa manguluka okuninga kehe shoka twa hala nosho wo kutya katu na okweetha yalwe ye tu lombwele shoka tu na okuninga. Ihe mboka haya tindi okuvulika komithikampango dhaJehova kaye na emanguluko lyashili. Paushili wo wene, aantu mboka oyi  iyetha ya nwethwe mo nenge ya zulwe kuuyuni mbuka tawu pangelwa kuSatana. (Lesha Aaroma 12:1, 2.) Atuheni otu na okuninga etokolo. Mbela otatu ka tsikila okukala twa zala omuntu gwetu omukulu, ngoka uukwatya we neihumbato lye lya nwethwa mo kuulunde nokuuyuni waSatana, nenge otatu ka etha Jehova e tu zule tu kale aantu ye li hwepo? — Jes. 64:8.

8. Oshike tashi vulu oku tu kwathela tu ethe po okudhiladhila kwa puka nosho wo eihumbato lya nyata?

⁸ Jehova oku shi kutya otashi ke tu pula ethimbo noonkambadhala dha mana mo, opo tu ethe po okudhiladhila kwa puka nosho wo eihumbato lya nyata. (Eps. 103:13, 14) Nonando ongawo, okupitila mOohapu dhe, mombepo ye ondjapuki nomehangano lye, Jehova ohe tu pe uunongo, oonkondo nekwatho ndyoka twa pumbwa tu ninge omalunduluko. Kapu na omalimbililo kutya owa mona nkene e ku kwathela. Ngashingeyi natu ka kundathaneni kombinga yiinima mbyoka to vulu okuninga wu ihule lela omuntu omukulu, opo wu kale wa gwana okuninginithwa.

9. Oohapu dhaKalunga otadhi vulu oku ku kwathela wu ninge shike?

⁹ Longitha Ombiimbeli wu ikonakone nawa. Oohapu dhaKalunga odha fa esipili, oshoka otadhi vulu oku ku kwathela wu konakone omukalo moka ho dhiladhila, ho popi nosho wo eihumbato lyoye. (Jak. 1:22-25) Ngoka ha konakona nangoye Ombiimbeli nosho wo ooitaali yalwe mboka ya pyokoka otaya vulu oku ku pa omayele tage ku kwathele. Pashiholelwa, otaya vulu okulongitha Omanyolo ye ku kwathele wu mone mpoka to shi enditha nawa naampoka wa pumbwa okuninga omalunduluko. Otaya vulu oku ku ulukila nkene to vulu okumona uuyelele wa kankamena kOmbiimbeli, mboka tawu popi kombinga yankene to vulu okweetha po eihumbato lya nyata. Shimwe ishewe, Jehova okwi ilongekidha aluhe oku ku kwathela. Oye e shi nawa nkene e na oku ku kwathela noha kala wo e shi shoka shi li momutima gwoye. (Omayel. 14:10; 15:11) Onkee ano, kala wu na ondjigilile yokugalikana kuye nokukonakona Oohapu dhe kehe esiku.

10. Oshike wi ilonga moshimoniwa shomumwatate Elie?

¹⁰ Kala wa tompwa kutya omithikampango dhaJehova odho dhingi. Kehe shoka Jehova he tu lombwele tu ninge otashi vulu oku tu etela uuwanawa. Mboka hayi iyutha komithikampango dhe ohaya kala yi isimaneka, ye na onkalamwenyo tayi ti sha, noye na enyanyu lyashili. (Eps. 19:7-11) Mepingathano naashono, mboka ihaayi iyutha komithikampango dhaJehova ohaya adhika kiilanduliko iiwinayi mbyoka hayi etithwa kokupangelwa kuuhalu wopantu. Ndhindhilika shoka omulumentu gumwe gwedhina Elie a ti kombinga yokwaavulika komithikampango dhaKalunga. Okwa putudhwa kaavali ye hole Jehova. Ihe sho a li omugundjuka, Elie okwa tameke okweendathana nookuume ya puka. Okwa tameke okulongitha iingangamithi, okuya momilalo nokuyaka. Elie okwa ti kutya okuza mpono okwa tameke okukala omugeyintu noku hole elongithonkondo. Okwe shi zimine a ti: “Paushili wo wene, onda li handi ningi iinima ayihe mbyoka nda longwa kutya Omukriste ke na okuninga.” Nonando ongawo, Elie ka li a dhimbwa shoka i ilongo manga a li omugundjuka. Mokweendela ko kwethimbo, okwa tameke okukonakona Ombiimbeli ishewe. Okwa longo nuudhiginini a ethe po omikalondjigilile dhe dha nyata, nokwa ninginithwa mo 2000. Okuvulika komithikampango dhaJehova okwe mu etele uuwanawa wuni? Omumwatate Elie okwa ti: “Ngashingeyi ondi na ombili yopamadhiladhilo neiyuvo lya yela.” * Ngaashi oshimoniwa shoka tashi shi ulike, mboka haya tindi okuvulika komithikampango dhaJehova ohayi iyetele owala omaupyakadhi. Nonando ongawo, Jehova oha kala aluhe i ilongekidha oku ya kwathela ya ninge omalunduluko.

11. Jehova oku tonde shike?

 ¹¹ Ilonga okukala wu tonde shoka Jehova e tonde. (Eps. 97:10) Ombiimbeli otayi ti kutya Jehova oku tonde “omeho ge na uuntsa, elaka lyiifundja, iikaha tayi tilehi ombinzi yaa na ondjo.” (Omayel. 6:16, 17) Oku tonde wo “aadhipagi naagwaaleki.” (Eps. 5:6) Jehova oku tonde noonkondo iikala mbyoka, nomolwaashono pethimbo lyaNoa a hanagula po aakolokoshi ayehe, molwaashoka oya li ya udhitha evi alihe niilonga yawo iiwinayi. (Gen. 6:13) Natu tale wo koshiholelwa shilwe. Jehova okwa li a popi okupitila momuhunganeki Maleaki kutya oku tonde mboka haya teya ondjokana miineya. Kalunga iha taamba ko oku mu longela kwawo, note ke ya pangula omolwoshinima shoka. — Mal. 2:13-16; Heb. 13:4.

12. ‘Okutonda shaa shoka oshiwinayi’ osha hala okutya shike?

¹² Jehova okwa hala tu ‘tonde shaa shoka oshiwinayi.’ (Rom. 12:9) Oshitya ‘tonda’ otashi ti okukala kuu hole oshinima shontumba nandonando, nowe shi nyanyala. Dhiladhila owala kutya oto ka kala wu uvite ngiini ngele owa lombwelwa wu lye iikulya ya ola. Okudhiladhila kombinga yasho otashi vulika nokuli shi ku ningithe wu kale wu uvite wa fa to hala okukunga. Natse osho tu na okukala tu uvite ngaaka ngele otwi iyadha tatu dhiladhila tu ninge sha shoka Jehova e tonde.

13. Omolwashike tu na okukotokela okudhiladhila kwetu?

¹³ Kotokela okudhiladhila kwoye. Omadhiladhilo getu ohaga nwetha mo oonkatu dhetu. Nomolwaashono Jesus e tu lombwela tu yande omadhiladhilo ngoka taga vulu oku tu ningitha tu yone sha kwata miiti. (Mat. 5:21, 22, 28, 29) Otwa halelela okwoopalela Tate yetu gwomegulu. Onkene osha simanenena tu ekelehi nziya kehe edhiladhilo lya puka ndyoka tashi vulika li iyakele mutse.

14. Oohapu dhetu ohadhi holola shike, nomapulo geni twa pumbwa okuyamukula?

¹⁴ Kotokela okupopya kwoye. Jesus okwa ti: “Shoka tashi piti mokana, otashi zi momwenyo.” (Mat. 15:18) Odhoshili kutya oohapu dhetu ohadhi holola kutya tse aantu ya tya ngiini. Onkene ipula omapulo taga landula: ‘Mbela ohandi yanda ngaa okupopya iifundja, nonando ngele onda popi oshili otashi vulika shi etele ndje uupyakadhi? Ngele onda hokana nenge nda hokanwa, mbela ohandi yanda ngaa okudhana nomaiyuvo gaamboka yuukashikekookantu wa yooloka ko kuwandje? Mbela ohandi yanda ngaa okupopya oohapu dha nyata thiluthilu? Ngele onda uvithwa nayi kugumwe, mbela ohandi popi ngaa naye nombili?’ Okudhiladhila nawa komapulo ngoka otaku ke ku kwathela. Oohapu dhoye otadhi vulu okufaathanithwa noombandi dhohema. Ngele oombandi  ndhono owe dhi patulula, opo owala to ka vula okwiihula ohema ndjoka nuupu. Sha faathana, ngele owa ningi ashihe shoka to vulu wu ethe po okuula aantu nayi, okufundja nokupopya oohapu dha nyata, oto ke shi mona oshipu okwiihula omuntu omukulu.

15. Okwaalela omuntu gwetu omukulu “komuti gwomahepeko” otashi ti shike?

¹⁵ Kala wu na ehalo lyokukatuka oonkatu. Omuyapostoli Paulus okwa longitha ethaneko lyontumba e tu longe kutya otu na okukala twi itula mo sho tatu ningi omalunduluko monkalamwenyo yetu. Okwa nyola kutya otu na okwaalela omuntu gwetu omukulu “komuti gwomahepeko.” (Rom. 6:6, NW) Niitya yimwe, otwa pumbwa okulandula oshiholelwa shaKristus. Otwa hala okweetha po thiluthilu iikala nosho wo omikalondjigilile ndhoka Jehova e tonde. Ngele osho twa ningi, otatu ka kala tu na eiyuvo lya yela netegameno lyoku ka kala nomwenyo sigo aluhe. (Joh. 17:3; 1 Pet. 3:21) Dhimbulukwa kutya Jehova ke na esiku a lundulule omithikampango dhe dhi kale ngaashi twa hala. Pehala lyaashono, otse twa pumbwa okuninga omalunduluko nokwiiyutha komithikampango dhe. — Jes. 1:16-18; 55:9.

16. Omolwashike wu na okukala wa tokola toko okutsikila okukondjitha omahalo ga puka?

¹⁶ Tsikila okukondjitha omahalo ga puka. Nokuli nokonima ngele wa ninginithwa, owa pumbwa okutsikila okukondjitha omahalo ga puka. Tala koshimoniwa shomulumentu gwedhina Maurício. Sho a li omugundjuka, okwa tameke okukala eshenge. Mokweendela ko kwethimbo, okwa tsakanene nOonzapo dhaJehova, e ta tameke okukonakona Ombiimbeli. Konima sho a ningi omalunduluko monkalamwenyo ye, okwa ninginithwa mo 2002. Nonando Maurício ngashingeyi okwa kala ta longele Jehova uule womimvo, okwa ti: “Odhoshili kutya omathimbo gamwe ohandi kondjitha omahalo ga puka.” Nonando ongawo, ihe etha shoka shi mu teye omukumo. Pehala lyaashono, okwa ti: “Ohashi tsu ndje omukumo sho ndi shi kutya sho ihaandi igandja komahalo ngono, ohashi nyanyudha Jehova.” *

17. Oshimoniwa shaNabiha oshe ku tsa ngiini omukumo?

¹⁷ Kala ho galikana Jehova e ku kwathele, e to ikolelele mombepo ye ondjapuki, ihe hamoonkondo dhoye mwene. (Gal. 5:22; Fil. 4:6) Otwa pumbwa okulonga nuudhiginini ngele otwa hala lela okwiihula omuntu gwetu omukulu nokaatu mu zale we. Natu tale koshimoniwa shomukiintu gwedhina Nabiha. Tate gwe okwe mu thigi po sho owala a li e na omimvo hamano. Okwa ti: “Shoka  osha li lela hashi kala shi uvitithe ndje nayi.” Sho a koko, Nabiha okwa tameke okukala ha geye mbala. Okwa tameke okulanditha iingangamithi e ta kwatwa po nokwa kala mondholongo uule womimvo dhontumba. Oonzapo ndhoka dha li hadhi talele po ondholongo moka a li odha tameke okukonakona Ombiimbeli naye. Nabiha okwa tameke okuninga omalunduluko omanene. Okwa ti: “Osha li oshipu okweetha po omikalondjigilile dhimwe omiwinayi. Ihe osha li oshidhigu kungame okweetha po okuhila omakaya.” Nabiha okwa kala ta kondjo e ga ethe po uule womumvo nasha, nomokweendela ko kwethimbo okwa vulu oku ga etha po. Okwe shi ende ngiini? Okwa ti: “Komeho gaayihe, okugalikana kuJehova pandjigilile oko kwa kwathele ndje ndi ga ethe po.” Ngashingeyi oha lombwele yalwe ta ti: “Ondi na einekelo kutya ngele ngame onda vula okuninga omalunduluko opo ndi nyanyudhe Jehova, kehe gumwe ota vulu oku shi ninga!” *

18. Shi ikolelela kAakorinto yotango 6:9-11, oyendji yomaapiya yaJehova oya vula okuninga shike?

¹⁸ Methelemumvo lyotango, yamwe yomaalumentu naakiintu mboka Jehova a li a hogolola ya ka pangele pamwe naKristus oya li haya ningi iinima iiwinayi manga inee ya hogolola. Pashiholelwa, yamwe oya li aahondeli, omashenge, nayamwe oya li haya yaka. Ihe kekwatho lyombepo ondjapuki yaKalunga, oya vulu okuninga omalunduluko. (Lesha 1 Aakorinto 6:9-11.) Sha faathana kunena, Ombiimbeli oya kwathela aantu omamiliyona ya lundulule oonkalamwenyo dhawo. * Aantu mboka nayo oya vula okweetha po omikalondjigilile inaadhi yogoka ndhoka dha li omidhigu kuyo okweetha po. Oshiholelwa shawo otashi ulike kutya nangoye oto vulu okuninga omalunduluko e to etha po omikalondjigilile inaadhi yogoka, opo wu kale wa gwana okuninginithwa.

19. Oshitopolwa tashi landula otashi ka kundathana kombinga yashike?

¹⁹ Kakele owala kokulonga nuudhiginini yi ihule omuntu omukulu, mboka ya hala okuninginithwa oye na wo okulonga nuudhiginini ya zale omuntu omupe. Oshitopolwa tashi landula otashi ka kundathana kombinga yankene tatu vulu oku shi ninga nankene yalwe taya vulu oku tu kwathela.