1. Oshike unene hashi nwetha mo uukwatya wetu?

 KUTYA nduno opo twa ninginithwa nenge otwa ninginithwa pwa pita omimvo odhindji, atuheni otwa hala okukala tu na uukwatya mboka Jehova e hole. Opo tu kaleni tu na uukwatya mboka, otu na okukala hatu pangele okudhiladhila kwetu. Omolwashike mbela? Omolwaashoka okudhiladhila kwetu okwo unene haku nwetha mo uukwatya wetu. Ngele otwa kala aluhe hatu dhiladhila kombinga yankene tu na okugwanitha po omahalo getu, otatu ka popya nokuninga iinima iiwinayi. (Ef. 4:17-19) Mepingathano naashono, ngele otwa kala hatu dhiladhila kiinima mbyoka iiwanawa, otatu ka kala hatu popi nohatu katuka momukalo ngoka tagu nyanyudha Tate yetu, Jehova. — Gal. 5:16.

2. Omapulo geni tatu ka kundathana moshitopolwa shika?

² Ngaashi sha popiwa moshitopolwa sha tetekele, itatu vulu okukeelela omadhiladhilo omawinayi gi iyakele mutse. Ihe otatu vulu okuhogolola kaatu ninge shoka tatu dhiladhila. Manga inaatu ninginithwa, otwa pumbwa okweetha po okupopya nokuninga iinima mbyoka Jehova e tonde. Ndjoka oyo onkatu yotango noyo ya simanenena ngele tashi ya pokwiihula omuntu gwetu omukulu. Nonando ongawo, opo tu nyanyudhe Jehova shili, otu na wo okuvulika kelombwelo ndyoka tali ti: ‘Zaleni omuntu omupe.’ (Kol. 3:10) Moshitopolwa shika otatu ka yamukula omapulo taga landula: “Omuntu omupe” oshike? Ongiini tatu vulu okuzala omuntu omupe nokutsikila okukala twe mu zala?

3. Shi ikolelela kAagalati 5:22, 23, “omuntu omupe” oshike, nohatu ulike ngiini kutya otwe mu zala?

³ Omuntu ngoka a zala “omuntu omupe,” oha holele omaukwatya gaJehova. Ngele omuntu okwa zala omuntu omupe oha  ulike iiyimati yombepo yaKalunga, noha etha ombepo ndjoka yi nwethe mo omadhiladhilo ge, omaiyuvo noonkatu dhe. (Lesha Aagalati 5:22, 23.) Pashiholelwa, oku hole Jehova nosho wo oshigwana She. (Mat. 22:36-39) Omuntu ngoka oha kala wo a nyanyukwa nonando oti idhidhimikile uudhigu. (Jak. 1:2-4) Oku li omukondjeli gwombili. (Mat. 5:9) Ohi idhidhimikile yalwe noha ungaunga nayo nohenda. (Kol. 3:13) Oku hole shoka oshiwanawa nohe shi ningi. (Luk. 6:35) Ohe shi ulike miilonga ye kutya oku na eitaalo lya kola muTate gwe gwomegulu. (Jak. 2:18) Oha kala a ngungumana uuna a geyithwa kuyalwe noha ulike eipangelo uuna ta makelwa. — 1 Kor. 9:25, 27; Tit. 3:2.

4. Opo tu zale omuntu omupe, otatu vulu ngaa okukokeka uukwatya mboka wa popiwa mAagalati 5:22, 23 koowuumwe? Shi yelitha.

⁴ Opo tu zale omuntu omupe, otwa pumbwa okukokeka uukwatya awuhe mboka wa tumbulwa mAagalati 5:22, 23 nosho wo moovelise dhilwe mOmbiimbeli. * Uukwatya mbuka inawu fa oonguwo ndhoka hatu ningi twa zala yimwe tango, e tatu zala nawa onkwawo. Nokuli owundji womuukwatya mboka owa faathana nuukwatya wulwe. Pashiholelwa, ngele owu hole shili omushiinda shoye, oto ke mu idhidhimikila noto ka ungaunga naye nohenda. Opo wu kale wo omuntu e li nawa shili, owu na okukala wu na olukeno nosho wo eipangelo.

5. Osha hala okutya shike okukala ‘tu na omadhiladhilo gaKristus,’ nomolwashike tu na okwiilonga kombinga yonkalamwenyo yaJesus? (1 Aakorinto 2:16)

⁵ Lesha 1 Aakorinto 2:16. Opo tu zale omuntu omupe, otwa pumbwa okukala ‘tu na omadhiladhilo gaKristus.’ Niitya yimwe, otu na okwiilonga okudhiladhila ngaashi Jesus noku mu holela. Jesus okwa li ha ulike iiyimati yombepo yaKalunga thiluthilu. Ngaashi owala esipili hali ulike omuntu ngaashi e li, Jesus naye oha ulike uukwatya waJehova wu li ngaashi wu li. (Heb. 1:3) Ngele otwa kala hatu dhiladhila ngaashi Jesus, otatu ka ihumbata ngaashi ye notatu ka ulika lela uukwatya wa fa we. — Fil. 2:5.

6. Iinima yini tu na okukaleka momadhiladhilo sho tatu kambadhala okuzala omuntu omupe?

⁶ Otatu vulu ngaa okulandula oshiholelwa shaJesus? Otashi vulika tu tye: ‘Jesus okwa gwanenena. Itandi vulu okukala nde mu fa thiluthilu!’ Ngele osho ho kala wu uvite ngawo, dhimbulukwa iinima mbika: Shotango,  owa shitwa wu kale wa fa Jehova naJesus. Onkee oto vulu okuhogolola wu ya holele, noto vulu lela oku shi ninga nonando hathiluthilu. (Gen. 1:26) Oshitiyali, ombepo ondjapuki yaKalunga ndjoka yi na oonkondo meshito alihe, otayi vulu lela oku ku kwathela wu ninge iinima mbyoka itoo vulu okuninga koonkondo dhoye mwene. Oshititatu, Jehova ina tegelela wu ulike iiyimati yombepo ye ndjoka thiluthilu pethimbo ndika. Okwa tulila po aantu mboka ye na etegameno lyoku ka kala nomwenyo sigo aluhe kombanda yevi ethimbo lyomimvo 1 000 ya ka adhe egwaneneno. (Eh. 20:1-3) Ihe ngashingeyi Jehova okwa hala owala tu ninge ngaashi tatu vulu nokukala twi inekela muye e tu kwathele.

7. Otatu ka kundathana shike ngashingeyi?

⁷ Ongiini tatu vulu okuholela Jesus? Natu ka kundathaneni paufupi uukwatya une mboka hawu imikwa kombepo yaKalunga. Otatu ke wu ilonga koowumwe noowumwe tu mone nkene Jesus a li e wu ulike. Sho tatu shi ningi, otatu ka tala wo komapulo gamwe ngoka taga vulu oku tu kwathela tu mone kutya otatu shi enditha ngiini mokuzala omuntu omupe.

8. Jesus okwa li a ulike ngiini ohole?

⁸ Molwaashoka Jesus okwa li e hole Jehova noonkondo, okwa li a ningi omaiyambo a longe ehalo Lye nokwa gandja omwenyo gwe omolwetu. (Joh. 14:31; 15:13) Okwa li a ulike kutya oku hole aantu noonkondo momukalo moka a li hi ihumbata sho a li kombanda yevi. Esiku kehe okwa li ha kala e na olukeno nomunahenda nonando aantu yamwe oya li haye mu pataneke. Shoka sha simanenena, okwa li ha longo aantu kombinga yUukwaniilwa waKalunga. (Luk. 4:43, 44) Jesus okwa li wo a ulike kutya oku hole Jehova nosho wo aantu, sho i iyamba nehalo ewanawa a monithwe iihuna noku dhipagwe kaalunde. Kungawo, okwe tu pa ompito yoku ka mona omwenyo gwaaluhe.

9. Ongiini tatu vulu okuulika ohole ngaashi Jesus?

⁹ Otwi iyapulila Tate yetu gwomegulu, Jehova, e tatu ninginithwa, molwaashoka otu mu hole. Onkee ano, ngaashi Jesus, otu na okuulika kutya otu hole Jehova momukalo moka hatu ungaunga naantu. Omuyapostoli Johannes okwa nyola a ti: ‘Itatu vulu okukala tu hole Kalunga, ngoka kaatu mu wete, ngele katu hole omuntu mukwetu ngoka tu mu wete.’ (1 Joh. 4:20) Otatu vulu okwiipula tatu ti: ‘Ondi hole ngaa shili aantu? Ohandi ungaunga ngaa naantu nolukeno, nuuna tayi ihumbatele ndje nayi? Mbela ohole ohayi inyengitha ndje ngaa ndi longithe ethimbo lyandje niiniwe yandje ndi kwathele yalwe yi ilonge kombinga yaJehova? Ohandi shi ningi ngaa nonando aantu oyendji ihaya pandula ndje nenge haya pataneke ndje? Mbela itandi vulu okukonga omikalo moka tandi vulu okulongitha ethimbo olindji miilonga yokuninga aantu aalongwa?’ — Ef. 5:15, 16.

10. Ongiini Jesus a li omukondjeli gwombili?

¹⁰ Jesus okwa li omulumentu omunambili, nenge tu tye ha kondjele ombili. Sho aantu yamwe ya li ye mu ningile uuwinayi, ka li e ya galulile uuwinayi. Ihe okwa li a ningi oshindji shi vulithe pwaashoka. Okwa li ha katuka oonkatu a pange ombili nayalwe nokwa li ha ladhipike yalwe ya ninge sha faathana. Pashiholelwa, okwa li e ya longo kutya oye na okupanga ombili nayalwe ngele oya hala Jehova a taambe ko oku mu longela kwawo. (Mat. 5:9, 23, 24) Okwa li wo a kwathele aayapostoli ye lwiikando, ye ethe po okunyenyeta kombinga yaangoka omukuluntu mokati kawo, nenge tu tye a simana e vule yakwawo. — Luk. 9:46-48; 22:24-27.

11. Ongiini tatu vulu okukala aakondjeli yombili?

¹¹ Opo tu kale aakondjeli yombili, otwa pumbwa okuninga oshindji kaashi shi owala okuyanda okweetitha eipumomumwe. Otwa pumbwa  okukala hatu katuka oonkatu tu pange ombili nayalwe nokuladhipika wo ooitaali ooyakwetu ya kale haya pongolola po oontamanana pokati kawo nayalwe. (Fil. 4:2, 3; Jak. 3:17, 18) Otatu vulu okwiipula omapulo taga landula: ‘Ondi na ngaa ehalo lyokuninga kehe shoka tandi vulu ndi pange ombili nayalwe? Uuna nda uvithwa nayi komumwatate nenge komumwameme, mbela ohandi mu kwatele onkone? Mbela ohandi kala nda tegelela ngoka twa ningathana naye oye a katuke onkatu tu pange ombili, nenge ongaye handi katuka onkatu tango nonando hangame ndi na epuko? Ngele tashi wapa, ohandi ladhipike ngaa mboka ye na oontamana pokati kawo ya pange ombili?’

12. Jesus okwa li a ungaunga ngiini naantu nombili?

¹² Jesus okwa li omunambili. (Mat. 11:28-30) Okwa li ha ungaunga naantu nombili moku ya kenukila nuuna a li moonkalo oondhigu. Pashiholelwa, sho omukiintu gumwe Omukaanani e mu pula a aludhe okamwana, petameko Jesus okwa tindi okuninga shoka omukiintu ngoka e mu pula a ninge, ihe sho a ulike eitaalo enene, okwa aludha okamwana nombili. (Mat. 15:22-28) Nonando Jesus okwa li omunambili, ka li ha yanda okugandja omayele nokuli nokwaamboka e hole. Pashiholelwa, sho Petrus a li a kambadhala oku mu teya omukumo a longe ehalo lyaJehova, Jesus okwe mu ganda komeho gaalongwa ooyakwawo. (Mark. 8:32, 33) Shoka okwe shi ningi, hanelalakano lyokusitha Petrus ohoni, ihe okwa li a hala oku mu dheula nokulondodha aalongwa ooyakwawo kaaya kale ye na uuntsa. Kapu na omalimbililo kutya shoka osha li sha sitha Petrus ohoni, ihe oshe mu etele wo uuwanawa.

13. Ongiini tatu vulu okuungaunga naantu nombili?

¹³ Omathimbo gamwe otashi vulika wu kale wa pumbwa okuulukila olukeno mboka wu hole moku ya pa omayele. Ngele to shi ningi, holela Jesus mokugandja omayele ga kankamena kOohapu dhaKalunga. Shi ninga nolukeno. Kala wi itaala kutya oya hala okuninga shoka shi li mondjila, nosho wo kutya mboka ye hole Jehova noye ku hole wo, otaya ka taamba ko omayele gopahole ngoka to ya pe. Ipula omapulo taga landula: ‘Mbela ondi na ngaa uulaadhi wokupopya nagumwe ngoka ndi hole uuna nda mona ta ningi sha sha puka? Ngele onda pumbwa okugandja omayele, ohandi popi ngaa nombili, nenge onomagandambadhi? Ohandi gandja omayele nelalakano lyashike? Mbela ohandi ga gandja molwaashoka ndi uvite tandi ningilwa nayi nenge omolwaashoka nda hala okukwathela omuntu ngoka?’

14. Jesus okwa li a ulike ngiini uuwanawa?

¹⁴ Jesus ke shi owala shoka oshiwanawa, ihe ohe shi ningi wo. Jesus oku hole He, onkene oha ningi aluhe shoka shi li mondjila nohe shi ningi neinyengotompelo ewanawa. Omuntu ngoka ha ulike uukwatya wuuwanawa oha kongo aluhe oompito a kwathele yalwe nohe ya longele uuwanawa. Inashi gwana owala okukala tu shi shoka shi li mondjila, ihe otu na wo oku shi ninga neinyengotompelo ewanawa. Gumwe otashi vulika a pule ta ti: ‘Otashi vulika ngaa omuntu a ninge oshinima oshiwanawa neinyengotompelo lya puka?’ Eeno, otashi vulika. Pashiholelwa, Jesus okwa li a popi kombinga yaamboka ya li haya gandja omagano koohepele, ihe onelalakano lyokwiiyulika. Nonando okugandja kwawo ka kwa li kwa puka, Jehova ka li e ku panda. — Mat. 6:1-4.

15. Ongiini tatu vulu okukala aantu ye li nawa lela?

¹⁵ Otatu vulu okukala aantu ye li nawa lela ngele ohatu ningi iinima iiwanawa neinyengotompelo ewanawa. Onkee oto vulu okwiipula omapulo taga landula: ‘Ngele ondi shi kutya oshinima shi li mondjila ndi na okuninga oshini, ohandi shi ningi ngaa? Ohandi ningi iinima iiwanawa neinyengotompelo lyashike?’

16. Oshike tu na okuninga esiku kehe, nomolwashike?

¹⁶ Inatu thika pehulithodhiladhilo kutya sho twa ninginithwa otwa zala omuntu omupe thiluthilu noinatu pumbwa we okulonga nuudhiginini tu kale twe mu zala. Otwa pumbwa okukaleka onguwo yetu ndjoka ompe yopathaneko nombwanawa monkalo yi li nawa. Omukalo gumwe moka tatu vulu oku shi ninga, omokukonga oompito tu ulike uukwatya wombepo yaKalunga esiku kehe. Omolwashike mbela? Omolwaashoka Jehova oKalunga ngoka ha katuka oonkatu, nombepo ye oyi na oonkondo. (Gen. 1:2) Onkee ano, uukwatya awuhe mboka hawu imikwa kombepo ye otawu vulu nowu na oku tu inyengitha tu katuke oonkatu. Pashiholelwa, omulongwa Jakob okwa nyola a ti: ‘Eitaalo lyaa na iilonga, olya sa.’ (Jak. 2:26) Shoka osha faathana wo nomaukwatya nenge niiyimati yilwe yombepo yaKalunga. Ethimbo kehe tatu ulike uukwatya mboka, otashi ulike kutya ombepo ye otayi tu kwathele.

17. Otu na okwiinyenga ngiini ngele otwa ndopa okuulika uukwatya wombepo yaKalunga?

¹⁷ Nokuli nAakriste mboka ya ninginithwa pwa pita omimvo odhindji, omathimbo gamwe ohaya ndopa okuulika uukwatya wombepo yaKalunga. Ihe shoka sha simana, okukala ihaatu si uunye. Natu tale kethaneko ndika: Ngele owa tuula ohema yoye ndjoka wu hole, mbela oto ke yi ekelahi owala nziyanziya? Aawe. Otashi vulika wu yi hondje nawa ngele otashi wapa, noto ka kala lela ho yi kwata nawa shi vulithe shito. Sha faathana, ngele pompito yimwe oho ndopa okuungaunga nagumwe nohenda, neidhidhimiko nenge pahole, ino teka omukumo. Ngele owa kala ho gandja ombili tashi zi komutima, oto ka kala wu na ishewe ombili nomuntu ngoka, noto ka kala wu na ekwatathano ewanawa naye. Kala wo wa tokola toko wu ka ninge shoka oshiwanawa shi vulithe pwaashoka monakuyiwa.

18. Otatu vulu okukala tu na uushili wuni?

¹⁸ Inatu pandula tuu sho Jesus e tu tulila po oshiholelwa oshiwanawa! Ngele otwa kala hatu mu holele mwaashoka tatu dhiladhila, otashi ka kala oshipu kutse tu ihumbate ngaashi ye. Ngele otwa kala hatu ihumbata ngaashi Jesus, otashi ka kala oshipu kutse tu zale omuntu omupe. Moshitopolwa shika, otwa konakona owala uukwatya une wombepo ondjapuki yaKalunga. Oshi li nawa wu longithe ishewe ethimbo wu konakone iiyimati yilwe yombepo yaKalunga nokutala kutya oto shi enditha ngiini. MEmbo lyokukonga uuyelele lyOonzapo dhaJehova omu na omusholondondo gwiitopolwa tayi popi kombinga yaashoka. Tala kohi yoshipalanyolo “Onkalamwenyo yopaKriste” opo nduno e to yi pokapalanyolo “Iiyimati yombepo.” Kala wu na uushili kutya ngele owa ningi ngaashi to vulu, Jehova ote ke ku kwathela wu zale omuntu omupe nowu kale we mu zala.