1. Aantu oyendji uuna ye ya pokugongala kwetu oshikando shotango, ohaya ndhindhilike po shike ? (Tala wo ethano.)

 DHILADHILA ando aaihokani yamwe ye ya kokugongala pOshinyanga shUukwaniilwa shOonzapo dhaJehova oshikando shotango. Oya kala ya kuminwa lela omukalo moka ya yakulwa nombili nosho wo kohole ndjoka ya mono mokati kaamwatate naamwameme. Sho taya shuna kegumbo konima yokugongala, omukulukadhi okwa lombwele omusamane gwe ta ti, ‘Oonzapo dhaJehova odha yooloka ko lela kaantu yalwe mboka nda tsakaneka. Onda tyapula lela okukala pamwe nadho.’

2. Omolwashike yamwe ya etha po okulongela Jehova?

² Ohole ndjoka yi li mokati kaamboka ye li megongalo lyopaKriste oyi ikalekelwa lela. Odhoshili kutya Oonzapo dhaJehova nadho ohadhi ningi omapuko. (1 Joh. 1:8) Onkee sho tatu tsikile okutseyathana naamboka ye li megongalo, otashi vulika wo tu mone lela omapuko gawo. (Rom. 3:23) Shiyemateka, yamwe oya etha okwaagwanenena kwayalwe ku ya ningithe ya ethe po okulongela Jehova.

3. Oshike hashi ndhindhilikitha mo aalanduli yaJesus yashili? (Johannes 13:34, 35)

³ Tala ishewe kenyolo lyenenedhiladhilo lyoshitopolwa shika. (Lesha Johannes 13:34, 35.) Oshike hashi ndhindhilikitha mo aalanduli yaKristus yashili? Ohole, ihe kashi shi egwaneneno. Ndhindhilika wo kutya Jesus ina tya: ‘Oto ka dhimbulula kutya one aalongwa yandje.’ Ihe okwa ti: “Aantu ayehe otaa ka dhimbulula kutya one aalongwa yandje.” Kungawo, Jesus okwe shi ulike kutya aalanduli ye hayo owala ya li taye ke shi dhimbulula mo kutya aalanduli yaKristus ohaya ulukilathana ohole yokwaaihola mwene. Ihe naamboka wo  kaaye li megongalo lyopaKriste, oya li taye ke shi ndhindhilika mo.

4. Yamwe otashi vulika ya hala okutseya shike kombinga yAakriste yashili?

⁴ Aantu yamwe mboka kaaye shi Oonzapo dhaJehova otashi vulika yi ipule taya ti: ‘Ongiini ohole hayi ndhindhilikitha mo aalanduli yashili yaJesus? Ongiini Jesus a li a ulukile aayapostoli ye ohole? Ongiini tatu vulu okulandula oshiholelwa she kunena?’ Oshi li nawa Oonzapo dhi dhiladhile komayamukulo gomapulo ngoka. Okuninga ngaaka otashi vulika shi tu kwathele tu ulike ohole shi vulithe nale, unene tuu ngele tashi ya pokuungaunga nokwaahagwanenena kwayalwe. — Ef. 5:2.

5. Yelitha oohapu dhaJesus ndhoka dhi li muJohannes 15:12, 13.

⁵ Jesus okwa li e shi yelitha sha yela kutya aalanduli ye, oya li taya ka ulukilathana ohole momukalo gwi ikalekelwa. (Lesha Johannes 15:12, 13.) Ndhindhilika shoka e ya lombwele. Okwa ti: “Holathaneni, ngaashi naanaa ngame ndi mu hole.” Shoka osha hala okutya ngiini? Jesus okwa tsikile nokuyelitha kutya ndjika ohole yokwiiyamba, ohole ndjoka hayi inyengitha Omukriste a se pehala lyomwiitaali omukwawo ngele osha pumbiwa. b

6. Oohapu dhaKalunga otadhi tsu ngiini omuthindo kutya ohole oya simana?

⁶ Oohapu dhaKalunga otadhi tu longo kutya ohole oya simanenena. Pashiholelwa, aantu oyendji oye hole oovelise ndhika dhOmbiimbeli ndhoka tadhi ti: “Kalunga oye ohole.” (1 Joh. 4:8) “Hola mukweni ngaashi ngoye wi ihole mwene.” (Mat. 22:39) “Ohole ohayi siikile omayono ogendji.” (1 Pet. 4:8) “Ohole itayi hulu po.” (1 Kor. 13:8) Oovelise ndhika nosho wo dhilwe, otadhi shi yelitha nawa kutya osha simana noonkondo okuulika uukwatya mbuka uuwanawa.

7. Omolwashike Satana itaa vulu okulonga aantu ya kale ye holathane nokukala ya hangana?

 ⁷ Aantu oyendji ohaya pula taya ti: ‘Otandi vulu ngiini okumona kutya elongelokalunga lyashili olini? Omalongelokalunga agehe ohaga ti kutya ohaga longo oshili, ihe kehe limwe ohali longo aantu iinima ya yoolokathana kombinga yaKalunga.’ Satana okwa tota po omalongelokalunga ogendji giifundja, naashoka ohashi shi ningitha oshidhigu kaantu ya mone kutya elongelokalunga lyashili olini. Ihe ke na siku a hanganithe aantu muuyuni, opo ayehe ya kale ye holathane. Jehova oye owala ta vulu oku shi ninga. Shoka otu shi shi, molwaashono ohole yashili ohayi zi kuJehova. Aantu mboka ye na ombepo yaJehova noya yambekwa kuye, oyo owala haya ulukilathana ohole yashili. (1 Joh. 4:7) Nomolwaashono Jesus a ti kutya ohole yokwaaihola mwene, oyo ya li tayi ka ndhindhilikitha mo aalanduli ye yashili.

8-9. Aantu oyendji ohaya gumwa ngiini kohole ndjoka haya mono mokati kOonzapo dhaJehova?

⁸ Ngaashi Jesus e shi hunganeka, aantu oyendji oya ndhindhilika mo aalanduli ye yashili, omolwohole yashili ndjoka ye na mokati kawo. Pashiholelwa, omulumentu gwedhina Ian ota dhimbulukwa oshigongi shoshitopolwa mpoka a li a kala oshikando shotango, shoka sha li sha ningilwa mokapale komaudhano ke li popepi negumbo lye. Konima yoomwedhi dhontumba, manga oshigongi shoka inaashi ningilwa mo, Ian okwa li ha yi mo a ka tale uudhano. Okwa ti: “Eihumbato lyaantu mboka ya li koshigongi shoshitopolwa, olya yooloka ko thiluthilu keihumbato lyaantu mboka ya li ye ya okutala uudhano. Oonzapo odha li aantu aanambili noya zala nawa, naanona yawo oya li taya ihumbata nawa.” Okwa gwedha ko a ti: “Komeho gaayihe, aantu mbaka oya li yu uvite ya gwanenwa noye na ombili — oshinima shoka nda li nda halelela okukala ndi na monkalamwenyo yandje. Itandi dhimbulukwa nando oshipopiwa shimwe shomwaambyoka ya gandjelwe esiku ndyoka. Ihe shoka tandi dhimbulukwa, eihumbato lyOonzapo.” c Eihumbato ndyoka, otali ulike lela kutya otu na ohole yashili mokati ketu. Molwaashoka otu hole aamwatate naamwameme, ohatu ungaunga nayo nolukeno nonesimaneko.

⁹ Omumwatate gwedhina John naye osho a li e uvite ngaaka, sho e ya kokugongala oshikando shotango. Okwa ti: “Onda li nda kumwa noonkondo, molwaashoka aantu ayehe oya li ye na uukuume . . . nangame. Oya li aantu aawanawa nonda li tandi dhiladhila kutya ihaya ningi omapuko. Ohole yawo yashili, oya li ya tompa ndje kutya onda mona elongelokalunga lyashili.” d Omathimbo nomathimbo iimoniwa mbika nosho wo yilwe oyindji, ohayi ulike kutya oshigwana shaKalunga Aakriste yashili.

10. Uunake unene tu na okuulika ohole yopaKriste? (Tala wo enyolo lyopevi.)

¹⁰ Ngaashi sha popiwa petameko, ooitaali ooyakwetu ayehe inaya gwanenena. Omathimbo gamwe, aamwatate naamwameme otaya ka popya nenge ya ninge iinima mbyoka tayi tu uvitha nayi. e (Jak. 3:2) Poompito ndhono ngawo, opo unene hatu kala tu na ompito yokuulika ohole yopaKriste momukalo moka hatu inyenge. Shi na ko nasha naashoka, oshike tatu vulu okwiilonga koshiholelwa shono Jesus e tu tulila po? — Joh. 13:15.

11. Omaukwatya geni omawinayi Jakob naJohannes ya li ya ulike? (Tala wo ethano.)

¹¹ Jesus ka li a tegelela aalanduli ye ya kale ya gwanenena. Pehala lyaashono, okwa li e ya kwathele pahole ya lundulule omaukwatya gawo omawinayi, opo ya kale ya hokiwa kuJehova. Pompito yimwe, aayapostoli yaali, Jakob naJohannes, oya li ye ya pamwe nayina kuJesus, yina e te mu pula a pe oyana oondondo dhopombanda mUukwaniilwa. (Mat. 20:20, 21) Jakob naJohannes oya li ye na uuntsa noya li yu ulike kutya oya hala okukala ya simana ye vule yalwe. — Omayel. 16:18.

12. Mbela Jakob naJohannes oyo owala ya li ya ulike omaukwatya omawinayi? Shi yelitha.

¹² Jakob naJohannes hayo owala ya li ya ulike omaukwatya omawinayi pompito ndjoka. Ndhindhilika nkene aayapostoli yalwe ya li yi inyenge. Ombiimbeli otayi ti: “Aalongwa mbeyaka omulongo sho ye dhi uvu, oya geyele aamwayinathana mboka yaali.” (Mat. 20:24) Otashi vulika Jakob, Johannes nosho wo aalongwa yalwe, ya li yi iyula omalaka ga honga. Aalongwa yalwe otashi vulika ya li ya popi ya ti: ‘Sho tamu tala one oolye mu pule mu pewe oondondo dhopombanda mUukwaniilwa waKalunga? Hane owala mwa longa nuudhiginini pamwe naJesus. Natse otwa gwana owala okupewa omauthembahenda gi ikalekelwa  ngaashi ne!’ Kutya nduno aalongwa mboka oya li ya dhiladhila nenge ya popi shike, pompito ndjoka oya li ya dhimbwa okuulika ohole nolukeno mokati kawo.

13. Jesus okwa li i inyenge ngiini, sho aayapostoli ye ya ningi omapuko? (Mateus 20:25-28)

¹³ Jesus okwa li a ungaunga ngiini nonkalo ndjoka? Ka li a geye nando. Ina popya nokuli kutya ota ka konga po aayapostoli yamwe mboka ye li nawa, aalumentu mboka ye na eifupipiko enene, mboka aluhe taya ka ungaunga nayakwawo nohole. Pehala lyaashono, Jesus okwa li a popi nayo neidhidhimiko, molwaashoka okwa li e shi kutya oya hala okulonga shoka shi li mondjila. (Lesha Mateus 20:25-28.) Okwa tsikile okuungaunga nayo momukalo gwopahole, nokuli nonando shoka hasho sha li oshikando shotango nenge shahugunina, ya li ya nyenyeta kombinga yaangoka omunene mokati kawo. — Mark. 9:34; Luk. 22:24.

14. Aayapostoli yaJesus oya putukila momudhingoloko gwa tya ngiini?

¹⁴ Kapu na omalimbililo kutya Jesus okwa li a dhiladhila keputuko lyaayapostoli ye. (Joh. 2:24, 25) Oya li ya putukila momudhingoloko mono aawiliki yomalongelokalunga ya li haya longo aantu kutya aantu mboka ye na oondondo dhopombanda oyo owala ya simana. (Mat. 23:6) Aawiliki yelongelokalunga lyOshijuda, oya li yi ishi uuyuki. f (Luk. 18:9-12) Jesus okwa li e shi kutya etaloko li li ngaaka olya li tali ka guma etaloko lyaayapostoli nkene yi itala ko yo yene nosho wo yalwe. (Omayel. 19:11) Jesus ka li a tegelela aalongwa ye ya kale ihaaya ningi omapuko nokwa li e yi idhidhimikile uuna ye ga ningi. Okwa li e shi kutya oye na omitima omiwanawa. Onkee okwa li e ya kwathele neidhidhimiko ya kale lela aaifupipiki noya ulukilathane ohole, pehala lyokukala aluhe taya kambadhala okulalakanena oondondo.

15. Oshike tatu vulu okwiilonga kushoka sha li sha holoka pokati kaJakob, Johannes nosho wo naalongwa ooyakwawo?

¹⁵ Otatu vulu okwiilonga mo oshindji moshiningwanima shoka sha li sha kwatela mo Jakob naJohannes. Oya li ya puka sho ya pula oondondo dha simana mUukwaniilwa. Ihe aayapostoli ooyakwawo nayo wo oya li ya puka, sho ya etha onkalo ndjoka yi yone po uukumwe mokati kawo. Nonando ongawo, Jesus okwa li a ungaunga naayapostoli ayehe 12 momukalo gwombili nogwopahole. Shika otashi tu longo shike? Shoka sha simana kashi shi owala shoka aantu haya ningi, ihe nankene wo hatu inyenge, uuna ya ningi omapuko. Oshike tashi vulu oku tu kwathela? Uuna twa geyithwa komwiitaali omukwetu, otatu vulu okwiipula ngeyi: ‘Omolwashike shoka a ninga hashi geyitha ndje noonkondo? Mbela ohashi holola uukwatya uuwinayi mboka nda pumbwa okulongela ko? Mbela omuntu ngoka a uvitha ndje nayi ota kondjo nuupyakadhi wontumba? Kutya nduno ondi na etompelo ewanawa lyokukala nda geya, mbela itandi vulu owala oku mu ulukila ohole noku mu dhimina po?’ Uuna tatu ulukile yalwe ohole, ohatu ulike kutya tse aalanduli yashili yaJesus.

16. Oshike ishewe tatu vulu okwiilonga koshiholelwa shaJesus?

¹⁶ Oshiholelwa shaJesus otashi tu longo wo tu kambadhale okuuva ko ooitaali ooyakwetu. (Omayel. 20:5) Odhoshili kutya Jesus  okwa li ha vulu okulesha omitima, omanga tse ihatu vulu. Ihe otatu vulu okwiidhidhimikila aamwatate naamwameme, uuna ye tu uvitha nayi. (Ef. 4:1, 2; 1 Pet. 3:8) Ngele otwe ya tseya nawa, otashi ka kala oshipu oku shi ninga. Natu tale koshiholelwa.

17. Sho omutonatelishikandjo gumwe a kambadhala okutseya nawa omwiitaali omukwawo, oshe mu etele uuwanawa wuni?

¹⁷ Omutonatelishikandjo gumwe ngoka ha longele kuuzilo waAfrika, ota dhimbulukwa omumwatate gumwe ngono a li e wete kutya ke na omikalo. Omutonatelishikandjo ngoka okwa li i inyenge ngiini? Okwa ti: “Pehala lyokuyanda omumwatate ngoka, onda tokola oku mu tseya nawa.” Sho omutonatelishikandjo ngoka a kala ha kala nomumwatate ngoka, okwi ilongo kombinga yankene a putudhwa nankene eputuko lye lya nwetha mo omukalo moka a li ha ungaunga nayalwe. Omutonatelishikandjo okwa tsikile ko a ti: “Sho nde shi mono kutya osha li oshidhigu komumwatate ngoka a ninge omalunduluko ngoka a li a hala okuninga, opo a kale ha longele kumwe nayalwe nosho wo komalunduluko ngoka a ninga, onda tameke okukala ndi mu hole. Otwa panga uukuume wopothingo.” Osha yela kutya uuna twa kambadhala okuuva ko aamwatate naamwameme, olundji ohatu shi mono oshipu okuya ulukila ohole.

18. Omapulo geni tatu vulu okwiipula ngele otu uvithwa nayi komwiitaali omukwetu? (Omayeletumbulo 26:20)

¹⁸ Omathimbo gamwe otashi vulika tu kale tu uvite kutya otwa pumbwa okupopya nomwiitaali omukwetu ngoka e tu uvitha nayi. Ihe tango otashi ka kala shi li nawa, ngele tatu ipula omapulo ngaashi: ‘Mbela ondi shi ngaa ashihe shoka sha kwatelwa mo?’ (Omayel. 18:13) ‘Mbela otashi vulika inee shi ninga nelalakano lyokuuvitha ndje nayi?’ (Omuuv. 7:20) ‘Mbela nangame epuko lya tya ngeyi onde li ningile?’ (Omuuv. 7:21, 22) ‘Mbela ngele onda kambadhala okupopya naye otashi ka hwameka owala omulilo?’ (Lesha Omayeletumbulo 26:20.) Ngele otwa kutha ethimbo tu dhiladhile komapulo ga tya ngaaka, otashi vulika ohole yetu yokuhola omumwatate yi tu inyengithe tu shi mwenene.

19. Owa tokola toko okuninga shike?

¹⁹ Oonzapo dhaJehova ohadhi ulike kutya odhi li aalanduli yaJesus yashili, sho hadhi ulukilathana ohole. Kehe gumwe gwomutse paumwene, oha ulike kutya ye omulanduli lela gwaJesus, mokuulukila aamwahe ohole yokwaaihola mwene, nonando ohaya ningi omapuko. Mokuninga ngawo, otashi vulika tu kwathele yalwe ya ndhindhilike mo elongelokalunga lyashili, noye tu wayimine mokulongela Jehova, Kalunga kohole. Natu kale twa tokola toko okutsikila okuulika ohole ndjoka hayi ndhindhilikitha mo Aakriste yashili.