1. Aavali oya halela shike oyana?

 AAVALI, otu shi kutya omwa hala okukwathela oyana yeni ya tseye Jehova noya kale ye mu hole. Ihe Kalunga iha monika. Ongiini nduno tamu vulu oku ya kwathela ya tseye kutya oku li Omuntu gwolela noya hedhe popepi naye? — Jak. 4:8.

2. Ongiini aavali taya vulu okulonga oyana kombinga yomaukwatya gaJehova?

² Omukalo gwa simana moka aavali taya vulu okukwathela oyana ya hedhe popepi naJehova, okukonakona nayo Ombiimbeli. (2 Tim. 3:14-17) Ihe Ombiimbeli otayi popi wo omukalo gulwe moka aanona taya vulu okwiilonga kombinga yaJehova. Membo lyOmayeletumbulo, omwa popiwa omusamane gumwe ta dhimbulukitha omwanamati kaa kanithe nando momeho ge omaukwatya gaJehova, ngoka ga hololwa meshito. (Omayel. 3:19-21) Otatu ka tala omikalo dhimwe moka aavali taya vulu okulongitha eshito, ya kwathele oyana yi ilonge kombinga yomaukwatya gaJehova.

3. Ekwatho lini aavali ye na okupa oyana?

³ Ombiimbeli otayi ti kutya Kalunga ‘nando iha monika, aantu otaa vulu oku mu koneka miinima mbyoka e yi shiti.’ (Rom. 1:20) Aavali otashi vulika mu hole okukala pondje naanona yeni. Longitheni ethimbo ndyoka mu ya kwathele ya mone ekwatathano ndyoka li li pokati ‘kiinima mbyoka Jehova a shita’ nomaukwatya ge omawanawa. Shi na ko nasha naashoka, natu ka taleni kwaashoka aavali taya vulu okwiilonga komukalo ngoka Jesus a li a longo aantu.

4. Jesus okwa li a longitha ngiini eshito a longe aalongwa ye? (Luk. 12:24, 27-30)

⁴ Ndhindhilika nkene Jesus a li a longitha eshito a longe aantu.  Oshikando shimwe, okwa li a lombwele aalongwa ye ya tale komakola nokoongala. (Lesha Lukas 12:24, 27-30.) Jesus okwa li ta vulu okutumbula oshinamwenyo kehe nenge oshimeno, ihe okwa tumbula ondhila nongala, iinima mbyoka aalongwa ye ya li ye shi nawa. Aalongwa mboka otashi vulika ya li ye wete omakola taga tuka mombanda noongala dha sheneka melundu. Mbela owa fa wu wete Jesus ta ulike kiinima mbyoka sho ta popi? Okwa li ishewe a ningi shike konima sho a popi iiholelwa mbyoka? Okwa longo aalongwa ye oshiilongomwa sha simana kombinga yaHe gwomegulu kutya oha gandja, ye omunalukeno. Jehova ota vulu okupalutha nokuzaleka aapiya ye, ngaashi ha ningile omakola noongala dhomelundu.

5. Iiholelwa yini yomeshito aavali taya vulu okulongitha ya longe okamwana kombinga yaJehova?

⁵ Aavali, otamu ka holela ngaa omukalo gwaJesus, sho tamu longo aanona yeni? Oto vulu okulombwela okamwoye kombinga yoshinima shomeshito shoka wu hole, ngaashi oshinamwenyo nenge oshimeno. Sho to lombwele okamwoye kombinga yoshinima shoka, ka yelithila kutya otashi tu longo shike kombinga yaJehova. Opo nduno, oto vulu okupula okamwoye kombinga yoshinamwenyo nenge yoshimeno shoka ke hole. Ngele owa popi kombinga yoshinima shoka ke hole, otashi vulika ka pulakene neitulomo, sho to ka lombwele kombinga yomaukwatya gaJehova.

6. Oshike tatu vulu okwiilonga koshiholelwa shoka twa tulilwa po kuyina yaChristopher?

⁶ Mbela aavali oye na okulongitha ethimbo olindji mokuninga omapekapeko gokondandalunde kombinga yoshinamwenyo nenge yoshimeno shontumba manga inaaya kundathana noyana, shoka tashi ya longo kombinga yaJehova? Hasho nando. Jesus ine tu pa eyelitho ele kombinga yankene omakola haga li nenge kombinga yankene oongala hadhi koko. Nokuli nonando okamwoye oke hole okwiilonga kombinga yiinima mbyoka Jehova a shita, omathimbo gamwe onawa wu popye owala oshinima shi li paunathangwa nenge wu pule epulo ndyoka tali ka kwathele ka uve ko oshitsa shoka wa hala oku ka longa. Ndhindhilika shoka omumwatate Christopher ta dhimbulukwa sho a li okanona. Okwa ti: “Meme okwa li ha popi iinima ya nathangwa e tu kwathele tu kale twa lenga iinima yomeshito mbyoka ye tu dhingoloka. Pashiholelwa, uuna twa li popepi noondundu, okwa li ha vulu okutya: ‘Taleni koondundu ndhoka oonene notadhi monika nawa! Jehova ke shi tuu omukumithi?’ Nenge uuna twa li komunkulofuta, okwa li ha vulu okutya: ‘Taleni nkene omakuthikuthi ngoka ge na oonkondo! Kalunga ke shi tuu omunankondo?’” Christopher okwa ti: “Omatyokosha ngoka ge li paunathangwa, ihe oge na lela eityo, oga li ge tu ningitha tu dhiladhile muule.”

7. Ongiini to vulu okudheula aamwoye ya dhiladhile keshito?

⁷ Sho aamwoye taya ende taya koko, oto vulu oku ya dheula ya kale haya dhiladhila olundji kombinga yeshito nokwiilonga kombinga yaJehova. Oto vulu wo okupopya kombinga yoshinima shimwe shoka Jehova a shita, e to pula aamwoye epulo ndika kutya, “Oshinima shika otashi ku longo shike kombinga yaJehova?” Otashi vulika wu kale wa kumwa nowa nyanyukwa, uuna wa uvu shoka aamwoye taya dhiladhila. — Mat. 21:16.

8. Ompito yini aavali Aaisraeli ya li haya kala ye na, sho taya ende “mepola”?

⁸ Aavali Aaisraeli oya li ya lombwelwa ya longe oyana iipango yaJehova, sho taya ende “mepola.” (Deut. 11:19) Omapola ngoka oga li ga taakana miitopolwa yokomikunda muIsraeli. Omwa li hamu vulu okumonika iinamwenyo yomaludhi gi ili nogi ili, oondhila nosho wo oongala. Uuna omaukwanegumbo gAaisraeli taga ende momapola, aavali oya li haya kala ye na ompito yokupopya noyana kombinga yiinima mbyoka Jehova  a shita. Aavali, nane otashi vulika mu na oompito dha fa ndhoka, ndhoka tamu vulu okulongitha mu longe aanona yeni kombinga yeshito. Tala aavali yamwe nkene ye shi ninga.

9. Oshike to vulu okwiilonga kuPunitha nokuKatya?

⁹ Omukulukadhi gwedhina Punitha ngoka ha zi moshilando oshinene, moIndia, okwa ti: “Uuna twa ka talela po aakwanezimo yetu komikunda, ohatu shi tala ko shi li ompito ombwanawa yokukwathela aanona yetu yi ilonge kombinga yeshito lyaJehova ekumithi. Ohandi kala ndi uvite kutya aamwandje ohaya uvu ko nawa eshito, uuna ye li kokule nomapandaanda ngoka ga udha aantu nosho wo oohauto.” Aavali, aanona yeni otashi vulika kaaya ka dhimbwe nando ethimbo ndyoka mwa kala nayo mehala ewanawa. Katya, omumwameme gwokoMoldova, okwa ti: “Oshinima shoka ihaandi dhimbwa nando sho nda li okanona, oosho twa li hatu kala pamwe naavali yandje komukunda. Onde ya pandula unene, sho ya longa ndje okuza kuunona okukala handi nongonona iinima mbyoka Jehova a shita nokukala ndi mu wetele meshito lye.”

10. Aavali otaya vulu okuninga shike ngele ohaye shi mono oshidhigu okuya momalweendo, ya ze mo moshilando shawo? (Tala oshimpungu “ Ekwatho kaavali.”)

¹⁰ Ongiini nduno ngele oshidhigu kungoye okuya molweendo wu ye komukunda? Amol, ngoka naye ha zi moIndia okwa ti: “Mpoka handi zi, aavali ohaya longo oowili odhindji, nolweendo lwokuya komikunda ohalu vulu okukala lu na ondilo. Nonando ongawo, oto vulu okutala eshito lyaJehova nokupopya kombinga yomaukwatya ge, uuna wu li moparka onshona nenge wu li mewalanda lyetungo pombanda.” Ngele owa tala nuukeka momudhingoloko gwegumbo lyoye, otashi vulika wu mone mo iinima oyindji yomeshito mbyoka to vulu okuulukila aamwoye. (Eps. 104:24) Otashi vulika wu mone mo uudhila, uupuka, iimeno niinima yilwe oyindji. Karina, gwokoNdowishi okwa ti: “Meme oku hole oongala, onkee sho nda li okanona, okwa li ha ulike koongala oombwanawa, uuna twa yi tu ka ende pamwe.” Aavali, otamu vulu wo okulongitha uuvidio owundji niileshomwa yehangano  lyetu mbyoka tayi popi kombinga yeshito, mu longe aanona yeni. Kutya nduno omu li peni, otamu vulu okukwathela aanona yeni ya nongonone shoka Kalunga a shita. Ngashingeyi natu ka taleni komaukwatya gamwe gaJehova ngoka tamu vulu okuulukila aanona yeni.

11. Aavali otaya vulu ngiini okukwathela oyana ya mone kutya Jehova omunahole?

¹¹ Aavali opo mu kwathele aanona yeni ya mone kutya Jehova omunahole, otamu vulu okupopya kombinga yankene iinamwenyo oyindji hayi sile oshimpwiyu pahole uunimona wayo. (Mat. 23:37) Otamu vulu wo okupopya kombinga yiinima iiwanawa ya yoolokathana mbyoka hatu nyanyukilwa noonkondo meshito. Karina, ngoka a popiwa metetekelo okwa ti: “Sho twa li hatu ka enda, meme okwa li ha ladhipike ndje ndi mwene po, e tandi nongonona nkene ongala kehe ya yooloka ko koonkwawo nankene eopalo lyayo tali ulike kutya Jehova omunahole. Ngashingeyi nonando opwa pita omimvo, natango ohandi nongonona oongala nohandi mono nkene omalwaala gadho, nankene omutungilo kehe gwongala gwa yooloka ko komikwawo, tagu ulike kutya Jehova omunahole. Oongala ohadhi dhimbulukitha ndje natango kutya Jehova oku tu hole noonkondo.”

12. Ongiini aavali taya vulu okukwathela aanona yawo ya mone kutya Kalunga omunongo? (Episalomi 139:14) (Tala wo ethano.)

¹² Kwathela aamwoye ya mone uunongo waKalunga. Jehova oye omunandunge a shiga ko e tu vule. (Rom. 11:33) Pashiholelwa, oto vulu okulombwela okamwoye nkene omeya haga ningi iikogo, nankene iikogo mbyoka hayi ende nuupu okuza pehala limwe ya uka pehala ekwawo. (Job 38:36, 37) Oto vulu wo oku ka lombwela nkene omalutu getu ga shitwa momukalo omukumithi. (Lesha Episalomi 139:14.) Tala kunkene omusamane gwedhina Vladimir a ningi ngaaka. Okwa ti: “Esiku limwe, okamwanamati ketu oki ihata po nombasikela yako, e taki iyehameke. Konima yomasiku omashona, oshilalo shako osha polo. Ngame nomukulukadhi gwandje otwe ka yelithile kutya Jehova okwa shita oosele dhetu dhomolutu hadhi vulu okwiitungulula dho dhene. Otwe ka lombwele kutya iinima mbyoka ya ningwa kaantu ihayi vulu okwiitungulula yoyene. Pashiholelwa, ngele ohauto oya mono oshiponga, ihayi vulu okwiipangela yo yene. Oshimoniwa shika osha kwathele okamwanamati ketu ka uve ko kutya Jehova omunongo.”

13. Aavali otaya vulu ngiini okukwathela oyana ya mone kutya Kalunga oku na oonkondo? (Jesaja 40:26)

 ¹³ Jehova ohe tu lombwele tu tale kegulu nokudhiladhila kunkene oonkondo dhe oonkumithi hadhi kaleke oonyothi adhihe pomahala. (Lesha Jesaja 40:26.) Oto vulu okuladhipika aamwoye ya tale kegulu nokudhiladhila kwaashoka ye wete. Ndhindhilika kwaashoka, Tingting, omumwameme gwokoTaiwan ta dhimbulukwa sho a li okanona. Okwa ti: “Oshikando shimwe otwa yi nameme tu ka yunge ontanda notwa li twa vulu okumona oonyothi kegulu uusiku, molwaashoka pehala mpoka twa li kapwa li pu na omalamba ngaashi mondoolopa. Pethimbo ndyoka opo nda li tandi ipula kombinga yokuthiminikwa koomakula nonda li nda limbililwa ngele otandi vulu ngaa okutsikila okulongela Jehova nuudhiginini. Meme okwa ladhipike ndje ndi dhiladhile kombinga yoonkondo ndhoka Jehova a longitha, a shite oonyothi adhihe nokudhimbulukwa kutya Ota vulu okulongitha oonkondo ndhoka, a kwathele ndje ndi idhidhimikile eshongo kehe. Konima sho nda nongonona eshito molweendo ndoka, osha li sha inyengitha ndje ndi tseye Jehova nawa nosha ningitha ndje ndi kale nda tokola toko oku mu longela.”

14. Ongiini aavali taya vulu okulongitha eshito ya kwathele oyana ya mone kutya Jehova oKalunga omunyanyukwi?

¹⁴ Iinima mbyoka Jehova a shita otayi ulike kutya ye omunyanyukwi nokwa hala natse tu kale twa nyanyukwa. Aanongononi oya mona kutya iinamwenyo oyindji ohayi dhana, mwa kwatelwa uudhila noohi. (Job 40:20) Mbela owa mona ngaa nale aamwoye taya yolo, sho ya tala oshinamwenyo tashi dhana? Tashi vulika ya mono okambishi taka dhana nokatanga koongodhi nenge uumbwena tawu dhana. Oshikando tashi landula, sho aamwoye taya yolo sho ya tala oshinamwenyo tashi dhana, omolwashike itoo ya dhimbulukitha kutya ohatu longele Kalunga omunyanyukwi? — 1 Tim. 1:11, NW.

15. Oshike tashi vulu okukwathela aavali ya uve kutya oyana otaya ipula nashike? (Omayeletumbulo 20:5) (Tala wo ethano.)

¹⁵ Omathimbo gamwe aavali ohashi vulika ye shi mone oshidhigu okukwathela oyana ya popye  omaupyakadhi gawo. Ngele onkalo yoye osho yi li ngawo, otashi vulika mu kale mwa pumbwa okukwathela aanona yeni ya popye omadhiladhilo gawo. (Lesha Omayeletumbulo 20:5.) Aavali yamwe ohaye shi mono oshipu okuninga ngaaka, uuna taya tala eshito pamwe noyana. Omolwashike mbela? Etompelo limwe olyo kutya uuna taye shi ningi pamwe, ihapu kala omapiyaganeko ogendji. Omusamane gumwe gwokoTaiwan, Masahiko okwa popi etompelo lilwe a ti: “Uuna twa ka enda naanona yetu koondundu nenge komunkulofuta, aanona ohaya kala ye uvite ya manguluka lela. Kungawo ohatu shi mono oshipu tu ya kwathele ya popye shoka shi li momadhiladhilo gawo.” Katya, ngoka a popiwa metetekelo okwa ti: “Ngele osikola ya piti mo, meme okwa li ha fala ndje koparka ombwanawa. Kehala ndyoka lya mwena nawa onda li handi shi mono oshipu oku mu lombwela shoka sha ningwa kosikola nenge shoka tandi ipula nasho.”

16. Omaukwanegumbo otaga vulu ngiini okuthuwa po nokunyanyukilwa pamwe, uuna taga tala eshito lyaJehova?

¹⁶ Omaukwanegumbo otaga vulu okuthuwa po nokunyanyukilwa pamwe, sho taga tala eshito lyaJehova. Oshinima shoka otashi ya kwathele ya kale ye holathane lela. Ombiimbeli otayi ti kutya opu na ‘ethimbo lyokuyola’ nosho wo ‘ethimbo lyokudhana.’ (Omuuv. 3:1, 4) Jehova okwa shitila kevi omahala omawanawa hoka tatu vulu okuya tu ka ninge iinima mbyoka tu hole. Omaukwanegumbo ogendji oge hole okuya komahala giinamwenyo, komikunda, koondundu, nenge komunkulofuta. Aanona yamwe oye hole okutondoka nokudhana moparka, okutala iinamwenyo, nenge okumbwinda momulonga, metale, nenge mefuta. Opu na oompito oombwanawa lela ndhoka tatu vulu okulongitha, tu nyanyukilwe iinima mbyoka Jehova a shita ye tu dhingoloka.

17. Omolwashike aavali ye na okukwathela oyana ya kale haya nyanyukilwa eshito lyaKalunga?

¹⁷ Muuyuni uupe waKalunga, aavali naanona otaya ka nyanyukilwa eshito lyaJehova shi vulithe punkene haye shi ningi kunena. Pethimbo ndyoka itatu ka kala hatu tila iinamwenyo; niinamwenyo itayi ka kala hayi tu tila. (Jes. 11:6-9) Otatu ka nyanyukilwa sigo aluhe iinima mbyoka Jehova a shita. (Eps. 22:26) Ihe aavali kaye na okutegelela sigo ethimbo ndyoka, opo ya kwathele oyana ya tameke okukala haya nyanyukilwa eshito. Sho tamu longitha eshito mu longe aanona yeni kombinga yaJehova, otashi vulika nayo ya ka tse kumwe naashoka omukwaniilwa David a popi a ti: “Omuwa; kaku na ngo ta longo ngaashi ho longo.” — Eps. 86:8.