1-2. Olundji oshike hashi ningwa po uuna aantu taya ninginithwa, noshike wu na okutala kusho?

 MBELA owa monene nale ongundu yaantu mboka taya ka ninginithwa? Oho uvu momawi gawo kutya oya tompwa sho taya yamukula omapulo gaali ngoka haya pulwa manga inaaya ninginithwa. Oho mono yaandjawo nookuume kawo nkene ye ya nyanyukilwa. Sho aaninginithwa mboka taya zi kohi yomeya, oho uvu aantu taya hakele omake noho mono nkene ya nyanyukwa miipala yawo. Konyala oshiwike kehe, aantu omayuvi ohayi iyapulile Jehova Kalunga e taya ninginithwa ya ninge Oonzapo dhe.

² Ongiini kombinga yoye? Ngele oto dhiladhila okuninginithwa, owu li omuntu a ikalekelwa lela muuyuni mbuka wa kolokosha, molwaashoka oto “kongo Kalunga.” (OB-1954) (Eps. 14:1, 2) Oshitopolwa shika ongoye sha nuninwa kutya nduno owu li omugundjuka nenge omukokele. Ihe natse mboka twa ninginithwa nale, otwa hala okukoleka etokolotoko lyetu lyokulongela Jehova sigo aluhe. Onkee ano, natu ka kundathaneni pamwe omatompelo gatatu gomomatompelo ogendji kutya omolwashike twa hala okulongela Jehova.

3. Omolwashike aapiya yaJehova ye hole oshili nuuyuuki? (Eps. 119:128, 163)

³ Jehova okwa li a lombwele oshigwana she shi kale shi ‘hole oshili.’ (Sak. 8:19) Jesus okwa ladhipika aalanduli ye ya lalakanene uuyuuki. (Mat. 5:6) Shika otashi ti kutya omuntu okwa pumbwa okukala e na ehalo lela lyokulonga shoka sha uka, oshiwanawa nosha yogoka momeho gaKalunga. Mbela owu hole oshili nuuyuuki? Otu na uushili kutya owu yi hole. Owu tonde iifundja naashihe shoka sha puka nosho wo uukolokoshi. (Lesha Episalomi 119:128, 163.) Omuntu ngoka ha fundju oha holele omupangeli guuyuni mbuka, Satana. (Joh. 8:44; 12:31) Elalakano  limwe lyaSatana olyo okupopila muuwinayi edhina eyapuki lyaJehova Kalunga. Satana okwa kala ta taandeleke iifundja kombinga yaKalunga okuza puunashipotha we muEden. Okwa kambadhala okuningitha aantu ya dhiladhile kutya Jehova Omuleli i ihole mwene noke shi omuyuuki ngoka inaa halela aantu shoka oshiwanawa. (Gen. 3:1, 4, 5) Iifundja yaSatana kombinga yaJehova otayi tsikile okuningitha aantu ye Mu dhiladhilile muuwinayi. Uuna aantu ya hogolola okukala kaaye ‘hole oshili,’ Satana ohe ya nwetha mo ya ninge iinima ayihe mbyoka kaayi li pauyuuki noya ninge iinima iiwinayi. — Rom. 1:25-31.

4. Jehova okwa ulike ngiini kutya oye “Kalunga omudhiginini” nenge koshili? (Tala wo ethano.)

⁴ Jehova ‘oKalunga omudhiginini’ nenge koshili, noha longo aantu mboka ye mu hole oshili. (Eps. 31:5) Mokuninga ngawo, ohe ya kwathele, opo kaaya ningililwe mo we kiifundja yaSatana. Jehova oha longo wo aapiya ye ya kale aanashili naayuuki. Oshinima shoka ohashi ya kwathele ya kale yi isimaneka yo yene noye na ombili yokomwenyo. (Omayel. 13:5, 6) Mbela shoka okwe shi ku ningila ngaa sho wa konakona Ombiimbeli? Owi ilonga kutya oondjila dhaJehova odho dhingi kaantu ayehe nokungoye paumwene. (Eps. 77:13) Onkee ano, owa hala okuninga shoka Kalunga ta ti osha uka. (Mat. 6:33) Owa hala okupopila oshili nokuulika kutya shoka Satana a popya kombinga yaKalunga ketu, Jehova, kashi shi shoshili. Shoka oto vulu oku shi ninga ngiini?

5. Ongiini to vulu okuyambidhidha oshili nuuyuuki?

⁵ Oto vulu okukala nonkalamwenyo momukalo ngoka tagu ulike kutya oho tondo iifundja yaSatana noto yambidhidha oshili. Oto vulu okuulika kutya owa hala Jehova a kale Omuleli gwoye nonokutya owa hala okuninga shoka ta ti kutya osha uka. Shoka ongiini to vulu oku shi ninga? Iyapulila Jehova okupitila megalikano, opo nduno to shi ulike montaneho kutya owe mu iyapulila okupitila mokuninginithwa. Ohole yokuhola oshili nuuyuuki oyi na oonkondo oku ku inyengitha wu ninge etokolo lyokuninginithwa.

6. Episalomi 45:4 otali ku pe omatompelo geni gokukala wu hole Jesus Kristus?

⁶ Omolwashike wu hole Jesus Kristus? Ndhindhilika omatompelo gamwe omawanawa taga adhika mEpisalomi 45:4. (Lesha.) Jesus oku hole oshili, eifupipiko nuuyuuki. Ngele owu hole oshili nuuyuuki, oshi uvitiwe ko kutya owu  hole wo Jesus Kristus. Dhiladhila kunkene Jesus a li a popile nuulaadhi shoka shoshili nosha uka. (Joh. 18:37) Ihe nonando ongawo, ongiini Jesus ha humitha komeho eifupipiko?

7. Oshike ho mono oshiwanawa kombinga yeifupipiko lyaJesus?

⁷ Jesus oha humitha komeho eifupipiko okupitila moshiholelwa she. Pashiholelwa, oha gandja esimano alihe kuHe, ihe hakuye mwene nando. (Mark. 10:17, 18; Joh. 5:19) Eifupipiko lyaJesus ohali ku ningitha wu kale wu uvite ngiini? Mbela ihali ku inyengitha wu kale wu hole Omwana gwaKalunga noku mu landula? Osha yela kutya ohali ku inyengitha wu shi ninge. Omolwashike Jesus omwiifupipiki? Omolwaashoka oku hole noha holele He, ngoka omwiifupipiki. (Eps. 18:35; Heb. 1:3) Mbela ino nanenwa kuJesus, ngoka ha holele thiluthilu uukwatya waJehova?

8. Omolwashike tu hole Jesus e li Omukwaniilwa gwetu?

⁸ Otu hole Jesus e li Omukwaniilwa gwetu, molwaashoka oku li Omuleli a dhenga mbanda. Jehova oye mwene a dheula Omwana nokwe mu langeke po a kale omuleli gwetu. (Jes. 50:4, 5) Dhiladhila wo kohole yeiyambo mwene ndjoka Jesus a li a ulike. (Joh. 13:1) Jesus e li Omukwaniilwa gwoye, okwa gwana lela okukala e holike kungoye. Okwa li a yelitha kutya mboka ye mu hole shili, ano mboka ha ithana ookuume ke, ohaya ulike ohole ndjoka mokuvulika kiipango ye. (Joh. 14:15; 15:14, 15) Kashi li tuu uuthembahenda uunene okukala kuume kOmwana gwaJehova!

9. Eninginitho lyAakriste olya faathana ngiini nolyaKristus?

⁹ Shimwe shomiipango mbyoka Jesus a gandja, osho kutya aalanduli ye ya ninginithwe. (Mat. 28:19, 20) Jesus okwe tu tulila po oshiholelwa moshinima shoka. Ihe eninginitho lye naandyoka lyaalanduli ye, oga yoolokathana momikalo dhontumba. (Tala oshimpungu “ Nkene eninginitho lyaJesus nolyaalanduli ye ga yoolokathana.”) Ihe omaninginitho ngoka oga faathana wo momikalo dhilwe. Jesus sho a li a ninginithwa, okwi igandja a longe ehalo lyaHe. (Heb. 10:7) Sha faathana, aalanduli yaKristus ohaya ninginithwa, shi li euliko lyomontaneho kutya oyi iyapulila Jehova Kalunga. Ngashingeyi, oshinima shoka hashi kala sha simanenena monkalamwenyo yawo, okulonga ehalo lyaKalunga, ihe halyawo yene. Onkee ohaya landula oshiholelwa shOmuwiliki gwawo.

10. Omolwashike ohole yokuhola Jesus yi na oku ku inyengitha wu ninginithwe?

¹⁰ Owi itaala kutya Jesus Omwana gwaKalunga, omuvalwa awike nowa nyanyukwa, sho e li Omukwaniilwa ngoka Kalunga a langeka po e tu lele. Owu shi kutya Jesus omwiifupipiki noha holele He thiluthilu. Owi ilonga kutya okwa paluthile aasindjala, okwa hekelekele mboka ya teka omukumo nokwa li nokuli a aludha aavu. (Mat. 14:14-21) Owa mona nkene ha wilike egongalo lye kunena. (Mat. 23:10) Owu shi wo kutya ota ka ninga oshindji shi vulithe mpoka monakuyiwa e li Omukwaniilwa gwUukwaniilwa waKalunga. Ongiini to vulu okuulika kutya owu mu hole? Omokulandula oshiholelwa she. (Joh. 14:21) Oshinima shimwe shotango shoka to vulu okuninga wu landule oshiholelwa she okwiiyapulila Jehova e to ninginithwa.

11. Sho to tala etompelo lya simanenena lyokuninginithwa olini, nomolwashike to tile ngawo?

¹¹ Etompelo lya simanenena lyokuninginithwa olini? Jesus okwa li a popi kutya oshipango oshinenenene shaKalunga oshini, a ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe.” (Mark. 12:30) Mbela oohapu ndhoka otadhi holola ngaa kutya owu hole Kalunga shi thike peni?

12. Omolwashike wu hole Jehova? (Tala wo ethano.)

 ¹² Opu na omatompelo ogendji noonkondo gokuhola Jehova. Pashiholelwa, ngashingeyi owu uvite ko kutya oye “oluthithiya lwomwenyo” nosho wo kutya oye Omugandji ‘gwoshipewa kehe oshiwanawa nomagano kehe ga gwana ga pwa.’ (Eps. 36:9; Jak. 1:17) Oshinima kehe oshiwanawa shoka ho nyanyukilwa, oho shi pewa kuKalunga ngoka ha gandja nehalo ewanawa nomunahole.

13. Omolwashike ekuliloyambo li li omagano ga dhenga mbanda?

¹³ Ekulilo omagano ga dhenga mbanda twe ga pewa kuJehova. Omolwashike tatu vulu okutya ngawo? Tala kekwatathano ndyoka li li pokati kaJehova nOmwana. Jesus okwa ti: “Tate oku hole ndje” nokwa ti wo kutya “ondi hole Tate.” (Joh. 10:17; 14:31) Ekwatathano ndyoka li li pokati kawo olya li lya kolo noonkondo, sho ya kala pamwe uule womimvo omabiliyona. (Omayel. 8:22, 23, 30) Ngashingeyi dhiladhila owala kuuwehame mboka Kalunga a li e uvite, sho a etha Omwana a mone iihuna noku se. Jehova oku hole aantu noonkondo nangoye wa kwatelwa mo. Okwa li nokuli e na ehalo lyokugandja Omwana omuholike e li eyambo, opo ngoye nayalwe mu vule oku ka kala nomwenyo sigo aluhe. (Joh. 3:16; Gal. 2:20) Ndika olyo etompelo lya dhenga mbanda tu na lyokukala tu hole Kalunga.

14. Elalakano dhingi lini to vulu okuhogolola monkalamwenyo yoye?

¹⁴ Ohole yoye yokuhola Jehova oya koko, molwaashoka owi ilongo oshindji kombinga ye. Osha yela kutya owa hala okuhedha popepi  naye ngashingeyi nosigo aluhe. Naashoka oto vulu oku shi ninga. Ohe ku ladhipike nombili wu nyanyudhe omutima gwe. (Omayel. 23:15, 16) Shoka ito vulu oku shi ninga owala moohapu, ihe nomiilonga wo. Eihumbato lyoye otali ka ulika kutya owu hole shili Jehova. (1 Joh. 5:3) Ndyoka olyo elalakano dhingi to vulu okuhogolola monkalamwenyo yoye.

15. Ongiini to vulu okuulika kutya owu hole Jehova?

¹⁵ Ongiini to vulu okuulika kutya owu hole Jehova? Shotango, oho ningi egalikano li ikalekelwa moka ho iyapulile Kalunga awike kashili. (Eps. 40:8) Opo nduno, eiyapulo ndyoka lyopaumwene oho li ulike montaneho okupitila meninginitho. Ngaashi twe shi kundathana petameko lyoshitopolwa shika, eninginitho oli li ompito hayi nyanyudha noya simana monkalamwenyo yoye. Oho tameke okukala nonkalamwenyo ompe, iho kala we kungoye mwene, ihe oho kalele Jehova. (Rom. 14:8; 1 Pet. 4:1, 2) Etokolo ndyoka otashi vulika li monike enene oku li ninga, lyo enene tuu shili. Ihe ohali ku egululile ompito wu kale nonkalamwenyo ya dhenga mbanda. Ngiini mbela?

16. Episalomi 41:12 otayi ulike kutya Jehova ota ka ningila shike mboka haye mu longele monkalamwenyo yawo?

¹⁶ Jehova oye Omuntu ngoka a shiga ko mokugandja. Kashi na nduno mbudhi kutya oho mu pe shike, ye ote ke ku pa aluhe oshindji shi vulithe pwaashoka we mu pa. (Mark. 10:29, 30) Ote ku pe onkalamwenyo ombwanawa notayi ti sha, nokuli nongashingeyi muuyuni mbuka wa kolokosha. Naashoka etameko owala lyonkalamwenyo ndjoka. Olweendo ndoka halu tameke peninginitho lyoye, kalu na ehulilo. Oto vulu okutsikila okulongela Tate gwoye omunahole sigo aluhe. Ohole ndjoka yi li pokati koye naHo otayi ka tsikila okukola, noto ka kala nomwenyo sigo aluhe. — Lesha Episalomi 41:12.

17. Oshike to vulu okupa Jehova shoka kee na nale?

¹⁷ Uuna wa katuka onkatu yokwiiyapulila Jehova nokuninginithwa, owu na uuthembahenda wokugandja sha shi na lela ongushu kuHo. Okwe ku pa oshinima kehe oshiwanawa, ompito kehe yenyanyu, ndjoka inoo mona nando onale. Ngoye oto vulu oku mu pa shike? Oto vulu oku pa Mwene gwegulu nevi oshinima shoka kee na nando onale, ano oku mu longela nehalo  ewanawa nonuudhiginini. (Job 1:8; 41:11; Omayel. 27:11) Ngoka ogwo omukalo gwa dhenga mbanda to vulu okulongitha onkalamwenyo yoye. Nokaapu na omalimbililo, ohole yoye yokuhola Jehova oyo etompelo lya dhenga mbanda lyokuninginithwa.

18. Omapulo geni tashi vulika wu ipule?

¹⁸ ‘Mbela siku limwe ono ka ninginithwa ngaa?’ Ongoye awike to vulu okuyamukula epulo ndyoka. Ihe otashi vulika shi ku kwathele ngele wi ipula ngeyi, ‘Omolwashike ndi na okutegelela?’ (Iil. 8:36) Dhimbulukwa omatompelo gatatu ngoka twa kundathana. Lyotango, owu hole oshili nuuyuuki. Ipula ngeyi, ‘Mbela onda hala oku ka mona esiku ndyoka uuna aantu ayehe taya popi oshili notaya longo shoka shu uka?’ Etiyali, owu hole Jesus Kristus. Ipula wo ngeyi, ‘Mbela onda hala Omwana gwaKalunga a kale Omukwaniilwa gwandje nondi landule oshiholelwa she?’ Etitatu, shoka sha simanenena, owu hole Jehova. Ipula wo ngeyi, ‘Mbela onda hala okunyanyudha omutima gwaJehova moku mu longela e li Kalunga kandje?’ Ngele omayamukulo goye komapulo ngoka oeeno, omolwashike itoo ninginithwa? Omolwashike wu na okutegelela? — Iil. 16:33.

19. Omolwashike kuu na okukakadhala okuninginithwa? Shi thaneka. (Johannes 4:34)

¹⁹ Ngele oto kakadhala okuninginithwa, tala kethaneko ndyoka lya li lya longithwa kuJesus. (Lesha Johannes 4:34.) Ndhindhilika kutya Jesus okwa yelekanitha okulonga ehalo lyaHe niikulya. Omolwashike mbela? Omolwaashoka iikulya iiwanawa kutse. Jesus okwa li e shi kutya kehe shoka Jehova he tu pula tu ninge otashi tu etele uuwanawa. Jehova ina hala tu ninge nando osha, shoka tashi tu etele uupyakadhi. Mbela Jehova okwa hala ngaa wu ninginithwe? Okwa hala. (Iil. 2:38) Onkee oto vulu okukala wu na omukumo kutya ngele owa vulika koshipango shokuninginithwa, otashi ke ku etela uuwanawa. Ngele iho kakadhala okulya iikulya tayi tokola elaka, omolwashike wu na okukakadhala okuninginithwa?

20. Oshike tatu ka kundathana moshitopolwa tashi landula?

²⁰ Omolwashike wu na okutegelela? Aantu oyendji otashi vulika ya yamukule ngeyi, “Inandi gwana natango okuninginithwa.” Uushili owo kutya etokolo lyokwiiyapulila Jehova nokuninginithwa olyo etokolo lya simanenena ndyoka inoo ninga nando onale. Onkee ano ohashi pula ethimbo, okudhiladhila nuukeka nokuninga oonkambadhala dha mana mo, opo wu kale wa gwana. Ihe ngele owa halelela okuninginithwa, oshike to vulu okuninga ngashingeyi opo wu kale wa gwana okuninginithwa? Otatu ka tala eyamukulo lyepulo ndyoka moshitopolwa tashi landula.