1-2. Ngele ino gwana natango okuninginithwa, omolwashike kuu na okuteka omukumo? (Tala ethano lyokombanda.)

 NGELE owa hala okuninginithwa, owi itulila po elalakano lya dhenga mbanda. Mbela shoka owi ilongekidha oku shi ninga ngashingeyi? Ngele owu wete kutya owa gwana, naakuluntugongalo otaye shi zimine, ino kakadhala okuninginithwa oshikando tashi landula. Jehova ote ke ku laleka nuuyamba, sho to mu longele monkalamwenyo yoye.

² Mepingathano naashono, mbela owa lombwelwa kugumwe kutya owa pumbwa okuninga ehumokomeho, opo wu vule okuninginithwa? Nenge ongoye mwene we shi imonena? Ngele osho, ino teka omukumo. Oto vulu okuninga ehumokomeho, opo wu adhe elalakano ndyoka lya simana, kutya nduno owu li omugundjuka nenge omukokele.

3. Elenga lyokuEtiopia olya li lya pula shike Filippus, naashoka ohashi pendutha epulo lini? (Iilonga 8:36, 38)

³ Lesha Iilonga 8:36, 38. Elenga limwe lyokuEtiopia olya li lya pula Filippus, omuuvithi gwevaangeli, lya ti: “Oshike ando tashi imbi ndje, ndi [“ninginithwe,” NW]?” Omulumentu ngoka Omuetiopia okwa li a hala okuninginithwa. Ihe mbela okwa li ngaa a gwana shili okukatuka onkatu ndjoka ya simana?

4. Ongiini elenga lyokuEtiopia lya li lya ulike kutya olya tokola toko okutsikila okwiilonga oshindji?

⁴ Omulumentu gwokuEtiopia okwa “yile kuJerusalem a ka galikane Kalunga.” (Iil. 8:27) Onkee ano, oku na okukala a li a itedhululithwa, e ta ningi gweitaalo lyOshijuda. Kapu na omalimbililo kutya okwa li a ilongo kombinga yaJehova momanyolo omayapuki gomOmanyolo gOshihebeli. Nando ongawo, okwa li a halelela okwiilonga oshindji. Filippus sho a tsakanene nelenga ndyoka mondjila, okwa adha nokuli tali ningi shike? Olya li tali  lesha ondhingambo yomuhunganeki Jesaja. (Iil. 8:28) Iinima mbyoka lya li tali lesha oya li oshili yomuule yomOohapu dhaKalunga. Elenga ndyoka kalya li lya gwanenwa owala koshili yopetameko yomOmbiimbeli, ihe olya li lya hala okutsikila okwiilonga.

5. Omulumentu gwokuEtiopia okwa li a ningi shike naashoka i ilongo?

⁵ Omulumentu ngono okwa li elenga lya simana muuwa waKandake, omukwaniilwa omukiintu gwaEtiopia. Okwa li ‘omudhiginini gweliko lyomukwaniilwa ngoka omukiintu.’ (Iil. 8:27) Onkee ano, omulumentu ngoka oku na okukala a li ha kala i ipyakidhila niinakugwanithwa oyindji. Ihe okwa li a kutha ethimbo a ka longele Jehova. Ka li owala a gwanenwa kokwiilonga oshili, ihe okwa li a tula miilonga shoka i ilongo. Onkee okwa li i idhenge ondjila okuza kuEtiopia, e ta yi a ka longele Jehova kotempeli kuJerusalem. Olweendo ndoka olu na okukala lwa li lwa pula ethimbo ele noshimaliwa. Ihe omulumentu ngono okwa li a hala oku ka longela Jehova, kashi na nduno mbudhi kutya otashi pula shike.

6-7. Ongiini ohole yomulumentu Omuetiopia yokuhola Jehova ya tsikile okukola?

⁶ Omulumentu ngoka Omuetiopia okwa li i ilongo iinima yimwe ya simanenena kuFilippus, mwa kwatelwa kutya Jesus oye Mesiasa. (Iil. 8:34, 35) Elenga ndika lya simana olya li lya nyanyukwa lela, sho li ilongo kombinga yaashoka Jesus e li ningila. Olya li lya ningi po shike konima sho li ilongo iinima mbyoka? Olya li tali vulu okukala pondondo yalyo, ano li li omulumentu a simanekwa, a itedhululithwa e ta ningi gweitaalo lyOshijuda. Ihe pehala lyaashono, ohole yalyo yokuhola Jehova nOmwana oya koko. Olya li li inyengithwa li ninge etokolo lya simana, li ninginithwe noli ninge omulanduli gwaJesus Kristus. Filippus sho a mono kutya oli ilongekidha, okwe li ninginitha.

⁷ Ngele owa landula oshiholelwa shomulumentu Omuetiopia, nangoye oto vulu okukala wa gwana okuninginithwa. Oto vulu wo okupopya nomukumo kutya ‘oshike tashi imbi ndje ndi ninginithwe?’ Natu taleni nkene to vulu okuninga iinima ya faathana naambyoka ya ningwa komulumentu Omuetiopia. Okwa tsikile okwiilonga, e ta tula miilonga shoka i ilonga nohole ye yokuhola Kalunga oya tsikile okukola.

8. Johannes 17:3 ote ku lombwele wu ninge shike?

⁸ Lesha Johannes 17:3. Mbela oohapu dhaJesus ndhika odhe ku kwathela wu tokole okukonakona Ombiimbeli? Oyendji yomutse odhe tu kwathela. Ihe mbela oohapu ndhono itadhi tu lombwele wo tu tsikile okwiilonga? Eeno, osho tadhi tu lombwele. Itatu ke etha po nando ‘okutseya Kalunga awike kashili.’ (Omuuv. 3:11) Otatu tsikile okwiilonga kombinga ye sigo aluhe. Ngele otwa tsikile oku shi ninga otatu ka hedha popepyeelela naJehova. — Eps. 73:28.

9. Otwa pumbwa okuninga shike konima ngele twa ilongo omalongo gopetameko gomOmbiimbeli?

 ⁹ Uuna twa tameke okwiilonga kombinga yaJehova, ohatu ilongo owala, omalongo gomOmbiimbeli gopetameko. Montumwafo ndjoka omuyapostoli Paulus a nyolele Aahebeli, okwa li a popi omalongo gopetameko ge li “iilongwa yopetameko.” Ka li a dhina “iilongwa yopetameko,” ihe okwa li e yi yelekanitha nomahini gokuyamwa kokahanona. (Heb. 5:12; 6:1) Okwa li a ladhipike Aakriste ayehe kaayi ilonge owala omalongo gopetameko, ihe oyi ilonge wo iinima yomuule yomOohapu dhaKalunga. Mbela owu na ngaa ehalo lyokwiilonga iinima mbyoka? Mbela owu na ehalo lyokutsikila okukokeka ontseyo yoye nokwiilonga kombinga yaJehova nomalalakano ge?

10. Omolwashike yamwe haye shi mono oshidhigu okukonakona?

¹⁰ Ihe oyendji yomutse ohatu shi mono oshidhigu okukonakona. Ngoye owu ku uvitile ngiini? Mbela sho wa li mosikola owa li wi ilongo okulesha nokukonakona nawa? Mbela owa li ngaa wu hole okukonakona nowa li wu uvite kutya oho ilongo oshindji uuna we shi ningi? Nenge owa li wa thiki pehulithodhiladhilo kutya iho shi enditha nawa ngele tashi ya pokwiilonga? Ngele osho, hangoye awike. Nonando ongawo, Jehova ota vulu oku ku kwathela. Okwa gwanenena noye e li Omulongi a dhenga mbanda.

11. Jehova ohu ulike ngiini kutya oye “Omulongi Omunenenene”?

¹¹ Jehova ohi iyithana ye mwene “Omulongi Omunenenene.” (Jes. 30:20, 21) Oku li Omulongi ha idhidhimike, omunambili noku na olukeno. Oha tala kuuwanawa waamboka tayi ilongo kombinga ye. (Eps. 130:3) Shimwe ishewe, ina tegelela tu ninge oshindji shi vulithe pwaashoka tatu vulu okuninga. Dhimbulukwa kutya oye a shita uuluyi woye mboka wu li omagano ga dhenga mbanda. (Eps. 139:14) Otwa shitwa tu na ehalo lyokwiilonga. Omushiti gwetu okwa hala tu tsikile okwiilonga sigo aluhe nokukala tu na ohole. Onkee ano, oshi li pandunge tu kale twa sa ‘enota’ lyoshili yopaMbiimbeli ngashingeyi. (1 Pet. 2:2) Itulila po omalalakano ngoka to vulu okwaadha nokudhiginina okulesha Ombiimbeli pandjigilile. (Jos. 1:8) Kekwatho lyaJehova, oto ka kala wu hole okulesha nokwiilonga oshindji kombinga ye.

12. Omolwashike tu na okukonakona onkalamwenyo yaJesus nuukalele we?

¹² Kala ho longitha ethimbo pandjigilile, wu tedhatedhe kombinga yonkalamwenyo yaJesus nuukalele we. Osha simana noonkondo tu landule thiluthilu oshiholelwa shaJesus, ngele otwa hala okulongela Jehova pomathimbo ngaka omadhigu. (1 Pet. 2:21) Jesus okwa li a lombwele aalongwa ye kutya otaye ki iyadha momashongo. (Luk. 14:27, 28) Ihe nando ongawo, okwa li e na omukumo kutya aalanduli ye yashili, otaya ka pondola ngaashi ye. (Joh. 16:33) Konakona onkalamwenyo yaJesus, e to itulile po omalalakano goku mu holela monkalamwenyo yoye yesiku kehe.

13. Oshike wu na okukala to pula Jehova, nomolwashike?

¹³ Inashi gwana okukala owala wu na ontseyo. Owa pumbwa ontseyo, opo wu vule okwiilonga oshindji kombinga yaJehova nokukokeka omaukwatya ngaashi, ohole yoku mu hola noku mu itaala. (1 Kor. 8:1-3) Sho to tsikile okwiilonga, kala nokupula Jehova e ku kwathele wu kale neitaalo lya kola. (Luk. 17:5) Oha yamukula nehalo ewanawa omagalikano ga tya ngawo. Eitaalo lyashili lya kankamena kontseyo yashili yokutseya Kalunga ketu, otali ku kwathele wu ninge ehumokomeho. — Jak. 2:26.

14. Omuyapostoli Petrus okwa tsu omuthindo ngiini nkene sha simana okutula miilonga shono tatu ilongo? (Tala wo ethano.)

¹⁴ Omuyapostoli Petrus okwa li a tsu omuthindo nkene sha simana kaalanduli yaKristus  ya tsikile okutula miilonga shoka taya ilongo. Okwa popi ehokololo limwe lyomOmbiimbeli kombinga yaNoa. Jehova okwa li a lombwele Noa kutya ota ka hanagula po uuyuni wa kolokosha wopethimbo ndyoka neyelu. Noa naanegumbo lye kaya li taya ka hupithwa ngele owala ya li ye shi kutya otaku ya eyelu. Ndhindhilika kutya Petrus okwa popi kombinga yethimbo ndyoka lya tetekele eyelu nosho wo “pomasiku ngoka Noa a tungu onguluwato.” (1 Pet. 3:20) Odhoshili kutya Noa naanegumbo lye oya li ya tula miilonga shono ya lombwelwa kuKalunga mokutunga onguluwato, ano ombautu onenenene. (Heb. 11:7) Petrus okwa yelekanitha shono Noa a ningi neninginitho, sho a nyola a ti: “Omeya ngaka ogo efano tali ulike [“eninginitho,” NW] ndyoka tali mu hupitha ngashingeyi.” (1 Pet. 3:2) Onkee otatu vulu okuyelekanitha iilonga mbyoka to longo ngashingeyi wi ilongekidhile eninginitho niilonga mbyoka Noa naanegumbo lye ya li ya longo uule womimvo, sho taya tungu onguluwato. Iilonga yini wa pumbwa okulonga, opo wu kale wa gwana okuninginithwa?

15. Ongiini tatu vulu okuulika kutya otwa itedhulula shili?

¹⁵ Oshinima shimwe shoka tu na okuninga tango, osho okwiiyela ombedhi thiluthilu. (Iil. 2:37, 38) Ngele otwa iyela lela ombedhi otatu ka ninga omalunduluko golela. Mbela owa etha po okulonga iilonga mbyoka tayi yemateke Jehova, ngaashi eihumbato lya nyata, okuhila omakaya, nenge okutukana nenge okulongitha nayi elaka? (1 Kor. 6:9, 10; 2 Kor. 7:1; Ef. 4:29) Ngele ino shi ninga natango, tsikila okukambadhala okuninga omalunduluko. Popya nomuntu ngoka ha konakona nangoye Ombiimbeli nenge wu pule aakuluntugongalo, ye ku kwathele noye ku pe omayele. Ngele owu li omugundjuka nowu li natango megumbo lyaavali yoye, tsikila oku ya pula ye ku kwathele wu ethe po eihumbato kehe ewinayi, ndyoka tashi vulika li ku imbe wu ninginithwe.

16. Oshike tu na okuninga ngele otwa hala okulongela Jehova pandjigilile?

¹⁶ Osha simana okulongela Jehova pandjigilile. Shono osha kwatela mo okuya kokugongala nokukutha ombinga muko. (Heb. 10:24, 25) Shimwe ishewe, ngele owa tameke okukala wa gwana okuya muukalele, shilipaleka kutya oho shi ningi pandjigilile. Ngele owa kala ho kutha ombinga miilonga yokuuvitha, oto ka kala wu yi hole. (2 Tim. 4:5) Ngele owu li omugundjuka  noho zi natango megumbo lyaavali yoye, ipula ngeyi: ‘Mbela aavali yandje oye na aluhe okudhimbulukitha ndje ndi ye kokugongala nenge miilonga yokuuvitha? Nenge ohandi shi ningi ngaa kungame mwene?’ Ngele owa kala ho ningi iinima mbyono kungoye mwene, oto ulike kutya owu na eitaalo nosho wo kutya owu hole Jehova Kalunga nowe mu pandula. Mbyoka “iilonga yometilokalunga,” (NW) omagano ngoka ho pe Jehova. (2 Pet. 3:11; Heb. 13:15) Omagano agehe ngoka hatu gandja kuJehova nehalo ewanawa noitaatu thiminikwa, ohaga nyanyudha Kalunga ketu. (Yelekanitha 2 Aakorinto 9:7.) Ohatu ningi iinima mbyoka, molwaashoka ohashi tu nyanyudha, uuna twa pe Jehova shoka sha dhenga mbanda.

17-18. Uukwatya wuni wa simanenena tawu ku kwathele wu ninge ehumokomeho, opo wu ninginithwe, nomolwashike? (Omayeletumbulo 3:3-6)

¹⁷ Sho to tsikile okuninga ehumokomeho, opo wu ninginithwe, oto ki iyadha momashongo. Aantu yamwe otashi vulika ya kale taye ku sheke omolweitaalo lyoye epe. Otashi vulika nokuli ye ku pataneke nenge ye ku hepeke. (2 Tim. 3:12) Sho to ningi oonkambadhala opo wu ethe po okuninga oshinima shoka wu wete kutya osha puka, otashi vulika omathimbo gamwe ho iyadha to shi ningi natango. Nenge otashi vulika wu uvite itoo vulu okwiidhidhimika, wa yemata, molwaashoka wu wete wa fa elalakano lyoye itoo li adha. Oshike mbela tashi vulu oku ku kwathela wu idhidhimike? Uukwatya wa simanenena, ano ohole yokuhola Jehova.

¹⁸ Ohole yoye yokuhola Jehova oyo uukwatya uuwanawa, ano uukwatya wa dhenga mbanda mboka wu na. (Lesha Omayeletumbulo 3:3-6.) Ngele ohole yoye yokuhola Kalunga oya kola, otayi vulu oku ku kwathela wu idhidhimikile omashongo nomupondo monkalamwenyo. Nongele owu na uukwatya mbuka, ito ka etha nando okulongela Jehova, uuna pwa holoka omaupyakadhi. Ombiimbeli olundji ohayi popi kutya Jehova oku hole aapiya ye. Shoka otashi ulike kutya ke na esiku a thige po aapiya ye nenge a kale kee ya hole we. (Eps. 100:5) Owa shitwa oshifetha shaKalunga. (Gen. 1:26) Ongiini nduno to vulu okuulika ohole ndjoka?

19. Ongiini to vulu okukoleka olupandu lwoye lwiinima ayihe mbyono Jehova e ku ningila? (Aagalati 2:20)

¹⁹ Tameka nolupandu. (1 Tes. 5:18) Esiku kehe ipula ngeyi: ‘Jehova oku ulukila ndje ngiini ohole?’ Opo nduno, pandula Jehova momagalikano goye, to popi iinima yokondandalunde mbyoka e ku ningila. Ndhindhilika kutya Jehova  ohe ku ningile iinima iiwanawa paumwene, molwaashoka e ku hole, ngaashi owala omuyapostoli Paulus naye a li a ndhindhilike kutya Jehova oku mu hole. (Lesha Aagalati 2:20.) Ipula ngeyi: ‘Mbela onda hala oku mu ulukila kutya ondi mu hole wo?’ Ohole yokuhola Jehova otayi ke ku kwathela wu tsikile okukondjitha omamakelo nokwiidhidhimikila omashongo nomupondo. Otayi ke ku inyengitha wu tsikile okulongela Jehova pandjigilile, to ulukile Ho kutya owu mu hole esiku kehe.

20. Oshike sha kwatelwa mokwiiyapulila Jehova, nomolwashike etokolo ndyoka lya simana?

²⁰ Mokweendela ko kwethimbo, ohole yoye yokuhola Jehova otayi ke ku inyengitha wu galikane egalikano li ikalekelwa. Oto ki iyapulila Kalunga. Dhimbulukwa kutya uuna wi iyapulile Jehova, oto kala wu na etegameno lya dhenga mbanda. Oto vulu okuninga gwe sigo aluhe. Uuna wi iyapulile Jehova, owu uvaneka kutya oto ke mu longela sigo aluhe, momathimbo omawanawa nomawinayi. Euvaneko ndyoka ito ke li ningulula nando. Odhoshili kutya uuna tatu iyapulile Jehova otatu ningi etokolo lya kwata miiti. Natu tale kwaashino: Oto ka ninga omatokolo ogendji monkalamwenyo yoye, gamwe omawanawa noonkondo, ihe itaga ka kala nando omawanawa ge vulithe pwaandyoka lyokwiiyapulila Jehova. (Eps. 50:14) Satana ota ka kambadhala okunkundipaleka ohole yoye yokuhola Ho gwomegulu, opo kuu kale we omudhiginini kuJehova. Ino etha nando Satana e ku sinde! (Job 27:5) Ohole yoye ya kola yokuhola Jehova otayi ke ku kwathela wu kale omudhiginini kuye. Oto ka hedha lela popepi naHo gwomegulu.

21. Omolwashike tatu vulu okutya eninginitho kali shi ehulilo, ihe etameko?

²¹ Konima ngele wi iyapulile Jehova, popya naakuluntugongalo yomegongalo lyeni, kombinga yokukatuka onkatu ya simanenena ya landula ko yeninginitho. Ihe dhimbulukwa aluhe kutya eninginitho halyo ehulilo, ihe etameko. Etameko lyonkalamwenyo yokulongela Jehova sigo aluhe. Onkee koleka ohole yoye yokuhola Ho ngashingeyi. Itulila po omalalakano, opo ohole yoye yi vule okukoka esiku nesiku. Ngele owa ningi ngawo, otashi ke ku inyengitha wu ninginithwe. Esiku lyokuninginithwa kwoye otali ka kala esiku lya dhenga mbanda. Ihe ndyoka etameko owala. Ohole yoye yokuhola Jehova nOmwana nayi tsikile okukoka sigo aluhe.