1. Omaiyuvo geni tashi vulika aapiya yamwe yaJehova aadhiginini haya kala taya kondjo nago?

 OTASHI hekeleke okutseya kutya Jehova okwa hokwa oshigwana she ashihe. Ombiimbeli oya ti: “Omuwa okwa hokwa aantu ye.” (Eps. 149:4) Ihe nando ongawo, omathimbo gamwe yamwe ohaya kala ya teka omukumo, tashi vulika taya ipula kutya, ‘Mbela Jehova okwa hokwa ndje ngaa?’ Aalongeli yaJehova yopethimbo lyOmbiimbeli, nayo oya li taya kondjo nomadhiladhilo ga tya ngawo. — 1 Sam. 1:6-10; Job 29:2, 4; Eps. 51:11.

2. Oolye ya hokiwa kuJehova?

² Ombiimbeli oye shi popya sha yela kutya aantu inaaya gwanenena, otaya vulu okukala ya hokiwa kuJehova. Ngiini mbela? Omokukala twa itaala Jesus Kristus nokuninginithwa. (Joh. 3:16) Komukalo gwa tya ngawo, ohatu ulike kutya otwa iyela ombedhi omolwoondjo dhetu, notwa ninga euvaneko kuKalunga kutya otatu ka longa ehalo lye. (Iil. 2:38; 3:19) Jehova oha kala a nyanyukwa, uuna tatu katuka oonkatu tu koleke ekwatathano lyetu naye. Ngele otwa ningi ngaashi tatu vulu, tu kale metsokumwe neiyapulo lyetu, Jehova ota kala e tu hokwa e te tu tala ko tu li ookuume ke kopothingo. — Eps. 25:14.

3. Oshike tatu ka kundathana moshitopolwa shika?

³ Omolwashike yamwe tashi vulika omathimbo gamwe haya kala ye uvite kutya Kalunga ine ya hokwa? Jehova oha ulike ngiini kutya okwe tu hokwa? Ongiini Omukriste ta vulu okukoleka einekelo lye kutya Kalunga okwe mu hokwa?

YAMWE OTATHI VULIKA YA KALE YE UVITE KUTYA JEHOVA INE YA HOKWA

4-5. Nonando otu uvite kaatu na oshilonga, oshike tatu vulu okukala tu na uushili musho?

⁴ Oyendji yomutse otwa kala nokukondja nomaiyuvo gokukala tu uvite kaatu na oshilonga, okuza kuunona wetu. (Eps. 88: 15) Omumwatate gwedhina Adrián okwa ti: “Onda kala aluhe ndi uvite kaandi na oshilonga. Sho nda li okamatyona otandi dhimbulukwa tandi galikana kutya yaandjetu otaya ka kala mOparadisa. Ihe kanda li ndi na uushili kutya ngame onda gwana okukala mo. Tony, ngoka a putukila megumbo lyaavali ye kaaye shi Oonzapo, okwa ti: “Aavali yandje kaye na siku ya lombwelele ndje kutya oye hole ndje, nenge kutya oye uvite uuntsa omolwandje. Shoka osha li sha ningitha ndje ndi kale ndi uvite kutya ihandi ningi sha tashi vulu oku ya nyanyudha.”

⁵ Omathimbo gamwe ngele ohatu kala tatu kondjo nomaiyuvo gokukala tu uvite kaatu na oshilonga, otatu vulu okudhimbulukwa kutya Jehova oye e tu nanena kuye. (Joh. 6:44) Oha mono uuwanawa mutse, mboka ihaatu vulu okumona, noku shi nawa omitima dhetu. (1 Sam. 16:7; 2 Ondjal. 6:30) Onkee otatu vulu oku mu inekela, uuna ta ti kutya otu na ongushu kuye. — 1 Joh. 3:19, 20.

6. Omuyapostoli Paulus okwa li e uvitile ngiini omayono ge gomonakuziwa?

⁶ Manga inaatu ilonga oshili, yamwe yomutse otwa li twa ningi iinima mbyoka tashi vulika hatu kala natango tu uvite tu na ondjo muyo. (1 Pet. 4:3) Nokuli nAakriste aadhiginini ohaya kondjo niikala mbyoka. Mbela nangoye omathimbo gamwe oho kala wu uvite kutya Jehova ita vulu oku ku dhimina po? Ngele osho ho kala wu uvite ngawo, otashi vulu oku ku hekeleka okutseya kutya aapiya yaJehova aadhiginini nayo oya kondja nomaiyuvo ga tya ngawo. Pashiholelwa, omuyapostoli Paulus okwa li ha kala e uvite e li omuntu omukweyi, uuna ta tedhatedha kokwaagwanenena kwe. (Rom. 7:24) Odhoshili kutya Paulus okwa li a iyele ombedhi e ta ninginithwa. Shimwe ishewe, okwa li a popi kombinga ye mwene kutya oku “vulike kaayapostoli ayehe” noku li omulunde “omunene.” — 1 Kor. 15:9; 1 Tim. 1:15.

7. Oshike tu na okudhimbulukwa shi na ko nasha nomayono getu gomonakuziwa?

⁷ Tate yetu gwomegulu oku uvaneka oku tu dhimina po. (Eps. 86:5) Ngele otwa iyele shili ombedhi omolwomayono getu, otatu vulu okwiinekela kutya shoka Jehova a popya oshoshili, note ke tu dhimina po. — Kol. 2:13.

8-9. Ongiini tatu vulu okusinda omaiyuvo kutya katu na nando esiku tu nyanyudhe Jehova?

⁸ Atuheni otwa hala okulongela Jehova pakuudha ngaashi tashi vulika. Ihe nando ongawo, yamwe ohaya kala ye uvite kutya itaya vulu nando okulonga sha gwana, opo ya kale ya hokiwa kuJehova. Omumwameme gwedhina Amanda okwa ti: “Onda li handi dhiladhila kutya okupa Jehova shoka oshiwanawa otashi ti kutya ondi na okukala aluhe handi ningi oshindji. Onkene olundji onda li nda kambadhala okuninga oshindji shi vulithe pwaashoka tandi vulu. Uuna inaandi shi ninga, ohandi kala tandi dhiladhila kutya Jehova okwa yematela ndje, ngaashi ngame mwene nda iyematela.”

⁹ Ongiini tatu vulu okusinda omaiyuvo kutya katu na siku tu ninge sha, shoka tashi nyanyudha Jehova? Dhimbulukwa kutya Jehova oku na ondjele. Ihe tu pula nando shoka itaatu vulu okuninga. Oha pandula kehe shoka tatu mu ningile, shampa owala tatu ningi ngaashi tatu vulu. Shimwe ishewe, natu dhiladhileni kiiholelwa yomOmbiimbeli yaamboka ya li ya longele Jehova nomutima aguhe. Dhiladhila kuPaulus. Okwa li a longo nuudhiginini uule womimvo, a ende ookilometa omayuvi nokwa toto omagongalo ogendji. Ihe sho oonkalo dha li itaadhi mu pitika a kuthe ombinga miilonga yokuuvitha, mbela Jehova okwa kala kee mu hole we? Hasho nando. Okwa li a tsikile okuninga ngaashi ta vulu, na Jehova nokwe mu yambeke. (Iil. 28:30, 31) Sha faathana, shoka  tatu vulu okupa Jehova otashi vulu okulunduluka. Ihe shoka sha simana kuye osho kutya omolwashike tatu mu longele. Natu taleni komikalo dhimwe moka Jehova ha ulike kutya oku tu hole.

JEHOVA OHA ULIKE NGIINI KUTYA OKWE TU HOKWA?

10. Ongiini tatu vulu okuuva Jehova ta ti kutya oku tu hole? (Johannes 16:27)

¹⁰ Okupitila mOmbiimbeli. Jehova oku hole okuulukila mboka e hole noonkondo kutya okwe ya hokwa. Omanyolo oge shi popya lwiikando iyali, sho Jehova a li a lombwele Jesus kutya ye Omwana omuholike e mu hokwa. (Mat. 3:17; 17:5) Mbela owa hala okuuva Jehova te ku lombwele kutya okwe ku hokwa? Jehova iha popi natse okuza megulu, ihe oha popi natse okupitila mOohapu dhe. Ohatu vulu ‘okuuva’ ewi lye tali ti kutya okwe tu hokwa, uuna tatu lesha oohapu dhaJesus mOmavaangeli. (Lesha Johannes 16:27.) Jesus okwa li a holele omaukwatya gaHe thiluthilu. Onkee ano uuna tatu lesha kutya Jesus okwa li a lombwele aalanduli ye inaaya gwanenena, ihe aadhiginini, kutya okwe ya hokwa, otatu vulu okukala twa fa tu wete Jehova te tu lombwele oohapu ndhoka. — Joh. 15:9, 15.

11. Omolwashike uuna twa taalela omaupyakadhi, itaashi ti kutya Jehova ine tu hokwa we? (Jakob 1:12)

¹¹ Okupitila miilonga ye. Jehova okwa halelela oku tu kwathela moku tu gwanithila po oompumbwe dhetu. Omathimbo gamwe, Jehova otashi vulika a ethe tu mone iihuna, ngaashi omuyuuki Job a li e shi ningilwa. (Job 1:8-11) Uuna tu li momashongo itashi ti kutya Jehova ine tu hokwa we. Pehala lyaashono, omashongo ohage tu pe ompito tu ulike kutya ohole yetu yokuhola Kalunga oyi thike peni nosho wo einekelo lyetu muye. (Lesha Jakob 1:12.) Otatu ka mona kutya oku tu hole nohe tu ambidhidha, sho te tu kwathele tu idhidhimike.

12. Oshike tatu vulu okwiilonga koshimoniwa shaDmitrii?

¹² Natu ka taleni koshimoniwa shomumwatate Dmitrii, ngoka ha zi moAsia. Okwa li a kanitha iilonga ye, nokwa kala uule woomwedhi odhindji kee na iilonga. Onkee ano okwa li a tokola a tamunune mo uukalele we, naashoka osha li sha ulike kutya okwa inekela muJehova. Opwa li pwa piti oomwedhi odhindji, noka li natango a mona iilonga. Opo nduno okwa kwatwa kuuvu wa kwata miiti, mboka we mu ningi a kale ihaa piti mo mondunda. Okwa tameke  okudhiladhila kutya ke shi we omusamane e li nawa, nokwa li a ipula ngele Jehova okwe mu hokwa ngaa we. Opo nduno ongulohi yimwe okamwanakadhona oka pilinta ombapila yi na oohapu ndhoka tadhi adhika muJesaja 30:15, tadhi ti: “Otamu kala mu na oonkondo e tamu hupithwa.” Oke yi eta kuye, e taka ti: “Tate, uuna wu uvite nayi, oto vulu okudhimbulukwa enyolo ndika.” Dmitrii okwe shi zimine kutya oku na okupandula Jehova, sho yaandjawo ye na natango iikulya ya gwana, oonguwo nehala lyokukala. Okwa ti: “Shoka nda pumbwa okuninga, okukala nda ngungumana, nokutsikila okukala nda inekela muKalunga.” Ngele owa taalela eshongo lya fa ndyoka, oto vulu okukala wa inekela kutya Jehova, ote ku sile oshimpwiyu note ke ku kwathela wu idhidhimike.

13. Oolye Jehova ha longitha a ulike kutya okwe tu hokwa, nohe shi ningi ngiini?

¹³ Okupitila maalongelikalunga ooyakwetu. Jehova oha longitha aamwatate naamwameme a ulike kutya oku tu hole. Pashiholelwa, ota vulu okwiinyengitha yalwe ye tu ladhipike, uuna twe shi pumbwa. Omumwameme gumwe gwokoAsia oshinima shoka okwa li e shi ningilwa, sho a li a gwililwa po noonkondo. Okwa kanitha iilonga ye nokwa kwatwa kuuvu wa kwata miiti. Opo nduno omusamane gwe okwa li a yono eyono lya kwata miiti, e ta kuthwa oshinakugwanithwa shuukuluntugongalo. Omumwameme ngoka okwa ti: “Kanda li ndi shi kutya omolwashike shika sha ningwa. Onda li tandi dhiladhila kutya ngiika onda ninga sha, sha puka, nonokutya Jehova ina hokwa ndje we.” Omumwameme ngoka okwa li a pula Jehova e mu shilipaleke kutya okwe mu hokwa. Okwa li e shi ningi ngiini? Okwa ti: “Aakuluntugongalo oya popi nangame, taya shilipaleke ndje kutya Jehova oku hole ndje.” Lwanima okwa pula ishewe Jehova e mu kwathele.  Okwa ti: “Esiku olyo tuu ndyoka onda li nda mono ontumwafo ya za kooitaali ooyakwetu yomegongalo lyetu. Sho nda li tandi lesha oohapu dhawo tadhi hekeleke, onda li ndi uvite kutya Jehova okwa yamukula ndje.” Odhoshili kutya Jehova olundji oha ulike kutya okwe tu hokwa okupitila moohapu dhayalwe. — Eps. 10:17.

14. Omomukalo gulwe guni Jehova ha ulike kutya okwe tu hokwa?

¹⁴ Jehova oha ulike wo kutya okwe tu hokwa mokulongitha ooitaali ooyakwetu ye tu pe omayele, uuna twe ga pumbwa. Methelemumvo lyotango Jehova okwa li a longitha omuyapostoli Paulus a nyolele ooitaali ooyakwawo oontumwafo 14 dha nwethwa mo. Mudho omwa li omayele gokolela nogopahole. Omolwashike Jehova a li a nwetha mo Paulus a nyole omayele ga tya ngawo? Jehova oku li Tate omwaanawa noha gandja eputudho ‘koyana mboka a hokwa.’ (Omayel. 3:11, 12) Onkee ano uuna twa pewa omayele ga kankamena kOmbiimbeli, otatu vulu oku ga tala ko ge li euliko kutya Kalunga okwe tu hokwa, ihe ine tu geela. (Heb. 12:6) Oshike ishewe tashi ulike kutya Jehova okwe tu hokwa?

OMIKALO DHILWE NDHOKA TADHI ULIKE KUTYA JEHOVA OKWE TU HOKWA

15. Oolye Jehova ha pe ombepo ye ondjapuki, nomolwashike tatu vulu okukala tu na einekelo mwaashoka?

¹⁵ Jehova oha gandja ombepo ye ondjapuki kwaamboka a hokwa. (Mat. 12:18) Otatu vulu okwiipula tatu ti: ‘Mbela ohandi ulike ngaa gamwe gomomaukwatya giiyimati yombepo ondjapuki monkalamwenyo yandje?’ Mbela owa ndhindhilika ngaa kutya oho idhidhimikile yalwe shi vulithe nale manga inoo tseya Jehova? Sho to ilongo okuulika iiyimati yombepo ondjapuki yaKalunga, oto ka kala wu shi iwetele kutya Jehova okwe ku hokwa. — Tala oshimpungu “ Iiyimati yombepo oyo . . . ”

16. Oolye Jehova ha longitha ya uvithe onkundana ombwanawa, naashoka ohashi ku uvitha ngiini? (1 Aatessalonika 2:4)

¹⁶ Jehova okwa inekelela onkundana ombwanawa mboka a hokwa. (Lesha 1 Aatessalonika 2:4.) Ndhindhilika nkene omumwameme Jocelyn a li a mono uuwanawa mokuuvithila yalwe onkundana ombwanawa. Esiku limwe Jocelyn okwa penduka e niwe kepolimano. Okwa ti: “Onda li ndi uvite kaandi na oonkondo nokaandi na oshilonga. Onda li omukokolindjila, nesiku ndyoka onda li ndi na okuya  miilonga yokuuvitha. Onkee onda li nda galikana e tandi yi muukalele.” Ongula ndjoka Jocelyn okwa tsakanene naMary, omukiintu e li nawa, nokwa taamba ko ekonakonombiimbeli. Konima yoomwedhi dhontumba, Mary okwa ti kutya okwa adhika ta galikana Kalunga e mu kwathele, sho Jocelyn a konkola pomweelo gwaandjawo. Sho Jocelyn a tedhatedha koshimoniwa shika, okwa ti: “Onda li ndi uvite nda fa Jehova ta lombwele ndje ta ti, ‘Onde ku hokwa.’” Odhoshili kutya hakehe gumwe ha inyenge nawa ketumwalaka ndyoka hatu uvitha. Ihe otatu vulu okukala nuushili kutya ohashi nyanyudha Jehova, uuna tatu ningi oonkambadhala tu uvithile aantu onkundana ombwanawa.

17. Oshike to ilongo kwaashoka sha popiwa kuVicky kombinga yekuliloyambo? (Episalomi 5:12)

¹⁷ Jehova oha longitha ongushu yekuliloyambo, opo mboka a hokwa ya mone mo uuwanawa. (1 Tim. 2:5, 6) Ihe ongiini ngele momitima dhetu otatu dhiladhila kutya Jehova ine tu hokwa, nokuli nando otwa itaala mekuliloyambo notwa ninginithwa? Dhimbulukwa kutya itatu vulu aluhe okukala twa inekela omaiyuvo getu yene, ihe otatu vulu okukala twa inekela muJehova. Okwa tala ko mboka ya itaala mekuliloyambo ye li aayuuki koshipala she, nokwa uvaneka oku ya laleka nuuyamba. (Lesha Episalomi 5:12; Rom. 3:26) Okutedhatedha kekuliloyambo okwa li kwa kwathele Vicky. Esiku limwe, konima sho a dhiladhila muule kombinga yekuliloyambo okwa ti: ‘Jehova okwa kala a idhidhimikila ndje uule wethimbo. . . . Ihe onda li nda fa tandi mu lombwele tandi ti, ‘Ito vulu okukala wu hole omuntu e li ngeyi. Eyambo lyOmumwoye itali vulu okudhima po oondjo dhandje.’” Sho a tedhatedhe komagano gekuliloyambo okwa tameke okukala e uvite kutya Jehova oku mu hole. Natse otatu vulu okukala tu uvite kutya Jehova oku tu hole nokwe tu hokwa, sho tatu tedhatedha kekuliloyambo.

18. Oshike tatu vulu okukala tu na uushili musho ngele otwa tsikile okukala tu hole Tate yetu gwomegulu?

¹⁸ Nonando otashi vulika tu kambadhale nuudhiginini okutula miilonga omaetopo ngoka ga popiwa metetekelo, omathimbo gamwe otashi vulika tu teke omukumo nokwiipula ngele Jehova okwe tu hokwa ngaa. Ngele shoka oshe ku ningilwa, dhimbulukwa kutya Jehova okwa hokwa “mboka ye mu hole.” (Jak. 1:12) Onkee ano tsikila okuhedha popi naJehova nokutala omikalo adhihe moka ha ulike kutya okwe ku hokwa. Dhimbulukwa aluhe kutya Jehova “ke li kokule nomuntu nando ogumwe.” — Iil. 17:27.