1. Omalalekonuuyamba gamwe geni hatu nyanyukilwa, molwaashoka tu li oshitopolwa shehangano lyaJehova?

 OTWA lalekwa shili nuuyamba sho tu li oshitopolwa shehangano lyaJehova momasiku ngaka gahugunina omadhigu. Sho oonkalo dhuuyuni mbuka tadhi ende tadhi nayipala, Jehova okwe tu pa uukwanegumbo wopambepo wa hangana waamwatate naamwameme. (Eps. 133:1) Ohe tu kwathele tu kale tu na ekwatathano lya kola. (Ef. 5:33–6:1) Ohe tu pe oondunge nuunongo mboka twa pumbwa, opo tu kale tu na ombili yashili yokomutima.

2. Oshike twa pumbwa okuninga, nomolwashike?

² Ihe nando ongawo, otwa pumbwa okulonga twa mana mo, tu tsikile okulongela Jehova nuudhiginini. Omolwashike mbela? Omolwaashoka omathimbo gamwe otashi vulika tu uvithwe nayi kokwaagwanenena kwayalwe. Otashi vulika wo tu kale tu uvite twa teka omukumo, uuna twa ningi omapuko, unene tuu ngele omapuko ga tya ngawo ohatu ga endulula. Otwa pumbwa okukala aadhiginini miilonga yaJehova, (1) uuna omwiitaali omukwetu e tu uvitha nayi, (2) uuna kuume ketu kopandjokana e tu yemateka nosho wo (3) uuna tu uvite twa teka omukumo, molwaashoka twa ninga omapuko. Moshitopolwa shika, otatu ka kundathana oonkalo ndhoka kooyimwe nooyimwe. Otatu ka kundathana wo shoka tatu vulu okwiilonga komuntu omudhiginini gwopethimbo lyOmbiimbeli.

IDHIDHIMIKA, UUNA OMWIITAALI OMUKWENI E KU UVITHA NAYI

3. Eshongo lini oshigwana shaJehova hashi taalele?

³ Eshongo. Aakriste yamwe ooyakwetu oye na omaukwatya hage tu kenyaneke. Yalwe otashi vulika ya ninge sha tashi tu uvitha nayi, nenge ya ungaunge natse momukalo kaagu li nawa.  Mboka haya kwatele komeho ohashi vulika ya ninge omapuko. Omaupyakadhi ngoka otashi vulika ga ningithe yalwe ya kale ya limbililwa ehangano lyaKalunga. Pehala lyokutsikila okulongela Kalunga “epepe nepepe,” pamwe naamwatate naamwameme, ohashi vulika ya ethe po okweendathana naamboka ye ya uvitha nayi, nenge nokuli ya ethe po okuya kokugongala. (Sef. 3:9) Mbela shono oshi li ngaa pandunge? Natu taleni shoka tatu vulu okwiilonga kugumwe ngoka a popiwa mOmbiimbeli, ngoka a li a taalela uupyakadhi wa faathana naamboka.

4. Omashongo geni omuyapostoli Paulus a li a taalele?

⁴ Oshiholelwa shopaMbiimbeli. Omuyapostoli Paulus okwa li e shi kutya Aakriste ooyakwawo nayo inaya gwanenena. Pashiholelwa, yamwe megongalo sho ya tsakanene naye, oya li inaaya itaala ngele oku li ngaa omulongwa. (Iil. 9:26) Lwanima, yamwe oya li ya popi iinima iiwinayi kombinga ye, opo ya ningithe yalwe ya kale inaaye mu inekela we. (2 Kor. 10:10) Paulus okwa li a mono omukuluntugongalo gumwe ta ningi etokolo lya puka, ndyoka tashi vulika li pundukithe yalwe. (Gal. 2:11, 12) Gumwe gwomookuume kaPaulus kopothingo, Markus, okwa li e mu yemateke nayi. (Iil. 15:37, 38) Paulus okwa li ta vulu okweetha oonkalo adhihe ndhoka dhi mu ningithe a tinde okweenda pamwe naamboka ye mu uvitha nayi. Ihe nando ongawo, okwa tsikile okukala e na etaloko ewanawa li na ko nasha naamwatate naamwameme, e ta kala nokulongela Jehova nuudhiginini. Oshike sha li sha kwathele Paulus a idhidhimike?

5. Oshike sha li sha kwathele Paulus a kale popepi naamwatate naamwameme? (Aakolossa 3:13, 14) (Tala wo ethano.)

⁵ Paulus okwa li e hole aamwatate naamwameme. Ohole yaPaulus yokuhola yalwe oya li ye mu kwathele kaa gandje eitulomo kokwaagwanenena kwawo, ihe okomaukwatya gawo omawanawa. Ohole ye oya li wo ye mu kwathele a ninge shoka a nyola, shoka tashi adhika mAakolossa 3:13, 14. (Lesha.) Tala nkene Paulus a li e shi ningi, shi na ko nasha naMarkus. Nonando Markus okwa li a thigi po Paulus pethimbo lyolweendo lwawo lwotango lwuutumwa, Paulus ina kala e mu geela. Lwanima, sho Paulus a nyolele egongalo lyokuKolossa ontumwafo yopahole, okwa li a pandula Markus ngoka e li omulongi pamwe naye a simana, sho a ti kutya okwa kala ‘ekwatho enene kuye.’ (Kol. 4:10, 11) Sho a li mondholongo muRoma, Paulus okwa li a pula kondandalunde Markus e ye e mu kwathele. (2 Tim. 4:11) Osha yela kutya Paulus okwa li ha dhimine po aamwahe. Oshike tatu ilongo kuPaulus?

6-7. Ongiini tatu vulu okwiidhidhimika mokuulukila ohole aamwatate naamwameme, nonando inaya gwanenena? (1 Johannes 4:7)

⁶ Oshiilongomwa. Jehova okwa hala tu kale  hatu idhidhimike mokuulukila ohole aamwatate naamwameme. (Lesha 1 Johannes 4:7.) Ngele gumwe oha nyengwa okuulika uukwatya wontumba wopaKriste, otatu vulu okukala tu na einekelo kutya ina hala oku tu uvitha nayi, ihe oha kambadhala okuninga shoka Jehova a ti oshi li mondjila. (Omayel. 12:18) Kalunga oku hole aapiya ye aadhiginini, nonando ohaya ningi omapuko. Nokuli nando ohatu ningi omapuko, oha tsikile okukala kuume ketu noiha kala e tu geela. Inashi simana tuu kutse okuholela Tate yetu ngoka ha dhimine po! — Ef. 4:32–5:1.

⁷ Dhimbulukwa kutya sho ehulilo tali ende tali hedha popepi, otwa pumbwa okukala tu na ekwatathano naamwatate naamwameme. Otashi vulika nokuli omahepeko ge ki indjipale. Otashi vulika nokuli tu ki iyadhe tu li mondholongo omolweitaalo lyetu. Ngele shono oshe tu ningilwa, otatu ka kala twa pumbwa aamwatate naamwameme shi vulithe nale. (Omayel. 17:17) Tala shoka sha li sha ningilwa Josep, a omukuluntugongalo gwokoSpania. Ye naamwatate yamwe oya li ya tulwa mondholongo omolwokwaanombinga kwawo. Okwa ti: “Mondholongo osha li oshipu noonkondo okuningilwa nayi komwiitaali omukweni, molwaashoka omu li aluhe pamwe. Otwa li tu na okukala hatu idhidhimikilathana nohatu dhiminathana po nehalo ewanawa. Shoka osha li she tu kwathele tu kale twa hangana notwa gamenwa. Otwa li tu li mumwe naantu mboka ihaaya longele Jehova. Pompito yimwe, oshikaha shandje osha li sha ehamekwa kusha nokanda li tandi vulu oku shi longitha. Ihe gumwe gwomaamwatate okwa li a yogo oonguwo dhandje nokusila ndje oshimpwiyu momikalo dhilwe. Onda li nda ulukilwa ohole yashili, sho nda li nde yi pumbwa.” Kashi li tuu nawa tu kale hatu kandula po omaupyakadhi pokati ketu nayalwe manga taku tiwa nena!

IDHIDHIMIKA, UUNA KUUME KOYE KOPANDJOKANA E KU YEMATEKA

8. Eshongo lini aaihokani haya kala ye na?

⁸ Eshongo. Oondjokana adhihe odhi na omaupyakadhi. Ombiimbeli oye shi popya sha yela kutya aantu mboka ya hokana otaya ka kala ye li muudhigu wonkalamwenyo. (1 Kor. 7:28) Omolwashike mbela? Omolwaashoka ondjokana ohayi tula pamwe aantu yaali inaaya gwanenena, kehe gumwe e na omaukwatya ge gi ili, shoka e hole naashoka kee hole. Ookuume kopandjokana otashi vulika ya za momaputuko ga yoolokathana. Mokweendela ko kwethimbo, otashi vulika ya ulukilathane omaukwatya ngoka ya li inaaya ndhindhilika sho ya li taya endelathana. Iinima ayihe yoludhi ndono ohayi etitha omaipumo mumwe. Otashi vulika ya kale taya paathana uusama omolwomaupyakadhi ngoka ye na mondjokana, nokuli nonando ayehe oya ninga epuko noye na owala okulongela kumwe, ye ga kandule po. Otashi vulika nokuli ya tameke okumona kutya oya pumbwa okutopoka, nenge okuhengathana. Ihe mbela okutopoka oko ekandulopo lyuupyakadhi? b Natu ka taleni koshiholelwa shagumwe ngoka a li a idhidhimikile uudhigu uunene mondjokana.

9. Eshongo lini Abigal a li a taalela?

⁹ Oshiholelwa shopaMbiimbeli. Abigal okwa li a hokanwa kuNabal ngoka Ombiimbeli tayi ti kutya okwa li egoya noinaa pwa nawa. (1 Sam. 25:3) Otashi vulika sha li oshidhigu kuAbigal okukala pamwe nomulumentu a tya ngawo. Mbela Abigal okwa li ta vulu okukonga po omukalo gwokuthiga po ondjokana ye? Ompito oya li ye ya po sho David, omukwaniilwa gwaIsraeli gwomonakuyiwa, e ya okudhipaga omusamane  gwe, ngoka a li e mu tuku pamwe naalumentu ye. (1 Sam. 25:9-13) Abigal okwa li ta vulu okufadhuka po, a pe David ompito yokugwanitha po elalakano lye. Ihe ine shi ninga, pehala lyaashono okwa li a tompo David a ethe Nabal a kale nomwenyo. (1 Sam. 25:23-27) Oshike tashi vulika sha li she mu inyengitha?

10. Oshike tashi vulika sha li sha inyengitha Abigal a idhidhimikile ondjokana yi na omaupyakadhi?

¹⁰ Abigal okwa li e hole Jehova nokwa simaneka omithikampango dhe dhi na ko nasha nondjokana. Kapu na omalimbililo kutya okwa li e shi shoka Kalunga a lombwela Adam naEva, sho a dhiki po ondjokana yotango. (Gen. 2:24) Abigal okwa li e shi kutya Jehova okwa tala ko ondjokana yi li elongekidho eyapuki. Okwa li a hala okunyanyudha Kalunga, naashoka osha li she mu inyengitha a ninge shaa shoka ta vulu, a hupithe yaandjawo, mwa kwatelwa omusamane gwe. Okwa li a katuka meendelelo a kelele David kaa dhipage Nabal. Okwa li wo e na ehalo lyokupula edhiminopo omolwepuko ndyoka lya ningwa komusamane gwe. Odhoshili kutya Jehova okwa li e hole omukiintu nguka ependa noka li i ihole mwene. Oshike shoka aakiintu naasamane taya vulu okwiilonga koshiholelwa shaAbigal?

11. (a) Jehova okwa tegelela aaihokani ya ninge shike? (Aaefeso 5:33) (b) Oshike wa ilonga mwaashoka Carmen a li a ningi? (Tala wo ethano.)

¹¹ Oshiilongomwa. Jehova okwa ti kutya aaihokani oye na okusimaneka ondjokana nokuli nuuna ookuume kawo kopandjokana shi li oshidhigu okukala pamwe nayo. Kalunga oha kala a nyanyukwa, uuna e wete aaihokani taya longo nuudhiginini, opo ya kandule po omaupyakadhi gawo nokuulukilathana ohole nesimaneko. (Lesha Aaefeso 5:33.) Natu taleni koshiholewa shaCarmen. Konima yomimvo hamano okuza sho ya hokana, Carmen okwa tameke okukonakona nOonzapo dhaJehova, nolwanima okwa ninginithwa. Carmen okwa ti: “Omusamane gwandje ka li a hokwa etokolo ndyoka nda ninga. Ka li e shi hokwa sho tandi longele Jehova. Okwa li ha tuku ndje, nokutilitha ndje kutya ota thigi ndje po.” Ihe nando ongawo, Carmen okwa dhiginine ondjokana ye. Okwa kala uule womimvo 50 ta longo nuudhiginini, opo a kale e hole omusamane gwe nokwe mu simaneka. Okwa gwedha a ti: “Sho omimvo tadhi ende tadhi ka dhilongela, onda li ndu uvu ko nkene omusamane gwandje e uvite, nonda popi naye momukalo gwombili. Molwaashoka onda li ndi shi kutya ondjokana ondjapuki kuJehova, onda ningi shaa shoka tandi vulu, opo ndi yi kaleke po. Kanda li nda kambadhala okuthiga po omusamane gwandje, molwaashoka ondi hole Jehova.” c Uuna mondjokana yeni mwa holoka uupyakadhi, oto vulu okwiinekela kutya Jehova ote ke ku ambidhidha note ku kwatha wu idhidhimike.

 IDHIDHIMIKA UUNA WA IYEMATEKA MWENE

12. Eshongo lini tashi vulika tu taalele, ngele otwa yono eyono lya kwata miiti?

¹² Eshongo. Ohashi vulika tu kale tu uvite twa teka omukumo ngele otwa yona eyono lya kwata miiti. Ombiimbeli oye shi tsa omuthindo kutya omayono getu otaga vulu oku tu thiga ‘nomutima gwa teyagulwa nogwa nyanyagulwa.’ (Eps. 51:17, OB-1954) Omumwatate gumwe gwedhina Robert okwa li a longo nuudhiginini uule womimvo, opo a kale a gwana okulangekwa po e li omuyakuligongalo. Ihe nonando ongawo, okwa li a yono eyono lya kwata miiti, nokwa mono kutya okwa kengelela Jehova. Okwa ti: “Sho nda dhimbulula shoka nda ninga, eiyuvo lyandje olya kala nokunyenyetela ndje noonkondo. Onda kala nda fa ndi uvite tandi ehama mepunda. Onda li nda lili nonda galikana kuJehova. Otandi dhimbulukwa sho nda li tandi dhiladhila kutya Kalunga ke na we esiku na ka pulakene kungame. Otashi kwatha we shike a pulakene kungame ngele onde mu uvitha nayi?” Ngele otwa igandja keyono, otashi vulika tu kale twa isa uunye, molwaashoka omutima gwetu gwa nyanyagulwa, ogwa itaala kutya Jehova ke na ko we nasha natse. (Eps. 38:4) Ngele shoka oshe ku ningilwa, tala koshiholelwa shomuntu gumwe omudhiginini, a popiwa mOmbiimbeli, ngoka a li a idhidhimike sho ta longele Jehova, nonando okwa li a yona eyono lya kwata miiti.

13. Eyono lini omuyapostoli Petrus a li a yono, nomapuko galwe geni a li a ningi?

¹³ Oshiholelwa shopaMbiimbeli. Uusiku wa tetekele eso lyaJesus, Petrus okwa li a ningi omapuko ogendji ngoka ga li ge mu ningitha a yone eyono lya kwata miiti. Tango, Petrus okwa li a tompwa noonkondo nokwa itadha kutya ota ka kala omudhiginini, nokuli nando aayapostoli yalwe oya thige po Jesus. (Mark. 14:27-29) Oshitiyali, sho Petrus a li meyana lyaGetsemane, okwa li a nyengwa lwiikando okukala a tonata. (Mark. 14:32, 37-41) Opo nduno Petrus okwa thigi po Jesus, sho a mono engathithi lyaantu. (Mark. 14:50) Hugunina, Petrus okwa idhimbike Jesus iikando itatu, nokwa li ta gana nokuli ta popi iifundja. (Mark. 14:66-71) Petrus okwa li a inyenge ngiini, sho a mono kutya okwa yona eyono lya kwata miiti? Okwa ihata pevi e ta lili, tashi vulika molwaashoka a li e uvite a dhengwa pomutima molweyono lye. (Mark. 14:72) Dhiladhila owala kuuwehame mboka Petrus a li e uvite konima yoowili dhontumba, sho kuume ke Jesus a li ta hepekwa. Petrus okwa li e na okukala e uvite kee na oshilonga.

14. Oshike sha li sha kwathele Petrus a idhidhimike, sho ta longele Jehova? (Tala lyokombanda.)

¹⁴ Petrus okwa li a vulu okwiidhidhimika, mokulongela Jehova omolwomatompelo gi ili nogi ili. Ka li a iyoolola ko kaamwahe, ihe okwa yi kuyo, nosha yela kutya okwa li a hekelekwa kuyo. (Luk. 24:33) Shimwe ishewe, Jesus omuyumudhwa  okwa li a ihololele Petrus, tashi vulika molwaashoka a li a hala oku mu tsa omukumo. (Luk. 24:34; 1 Kor. 15:5) Lwanima, pehala lyokunyenyetela Petrus molwomapuko ngoka a li a ningi, Jesus okwa li a lombwele kuume ke kutya ote ke mu pa iinakugwanithwa iinene. (Joh. 21:15-17) Petrus okwa li e shi kutya okwa yona eyono lya kwata miiti, ihe okwa tsikile okuninga shoka shi li mondjila. Omolwashike mbela? Omolwaashoka okwa li a tompwa kutya Omulongi gwe, Jesus, oku mu hole natango. Aamwahe oya li ya tsikile oku mu ambidhidha. Oshike tatu vulu okwiilonga koshiholelwa shaPetrus?

15. Jehova okwa hala tu kale twa tompwa kushike? (Episalomi 86:5; Aaroma 8:38, 39) (Tala wo ethano.)

¹⁵ Oshiilongomwa. Jehova okwa hala tu kale twa tompwa kutya oku tu hole noku na ehalo oku tu dhimina po. (Lesha Episalomi 86:5; Aaroma 8:38, 39.) Uuna twa yono ohatu kala tu uvite tu na ondjo. Shoka oshi li mondjila nosha uka. Ihe katu na okudhiladhila kutya Jehova ke tu hole we noite tu dhimine po. Pehala lyaashono otu na okukonga ekwatho meendelelo. Robert ngoka a popiwa metetekelo okwa ti: “Onda li nda yono, molwaashoka onda li nda inekela moonkondo dhandje mwene dhokusinda emakelo.” Okwa li a mono kutya okwa pumbwa okupopya naakuluntugongalo. Okwa ti: “Sho nda popi nayo, nziya onda kala ndi uvite kutya Jehova oku hole ndje. Onda kala ndi uvite kutya aakuluntugongalo nayo oye hole ndje. Oya kwathele ndje ndi itaale kutya Jehova ina thiga ndje po.” Natse otatu vulu okukala twa tompwa kutya Jehova oku tu hole noonkondo nohe tu dhimine po, uuna twa iyele ombedhi, twa kongo ekwatho ndyoka twa pumbwa nokukambadhala twa mana mo kaatu li endulule. (1 Joh. 1:8, 9) Shoka ohashi tu kwathele kaatu ethe po okulongela Jehova, nokuli nuuna twa ninga omapuko.

16. Omolwashike wa tokola toko okukala to idhidhimike, sho to longele Jehova?

¹⁶ Jehova okwa pandula noonkondo oonkambadhala dhetu dhoku mu longela momasiku ngaka omadhigu. Kekwatho lyaJehova otatu vulu okwiidhidhimika, nonando otwa yemata. Otatu vulu okukokeka ohole yokuhola aamwatate naamwameme noku ya dhimina po, nokuli nando oye tu uvitha nayi. Otatu vulu okuulika kutya otu hole Kalunga shi thike peni nokusimaneka ondjokana, mokuninga kehe shimwe shoka tatu vulu okuninga, tu kandule po omaupyakadhi agehe ngoka taga vulu okuholoka mondjokana yetu. Ngele otwa yono, otatu vulu okukonga ekwatho kuJehova, okutaamba ko ohole ye nedhiminopo e tatu tsikile noku mu longela. Otatu vulu okukala nuushili kutya ote ke tu laleka nuuyamba ngele ‘inatu vulwa okulonga uuwanawa.’ — Gal. 6:9.