1-2. Omuntu oku na okuninga shike, manga inaa ninginithwa?

 MOMUKOKOMOKO gwomimvo ntano dha ka pita, aantu ye vulithe pemiliyona, oya li ya ninginithwa ya kale Oonzapo dhaJehova. Oyendji yomaantu mboka oya longwa oshili “okuza kuunona wawo,” ngaashi omulongwa gwomethelemumvo lyotango, Timoteus. (2 Tim. 3:14, 15) Yalwe oya ilonga kombinga yaJehova sho ye li aakuluntu, yo yalwe oosho ye li aakokele. Omimvo dhaka pita, omukiintu gumwe, ngoka a li a konakona Ombiimbeli nOonzapo dhaJehova, okwa ninginithwa sho e na omimvo 97.

² Ngele ngoye oto konakona Ombiimbeli, nenge wa putudhwa kaavali Oonzapo, mbela oto dhiladhila kombinga yeninginitho? Ngele osho, shoka oshi shi okupandulwa. Ihe manga inoo ninginithwa, owa pumbwa okwiiyapulila Jehova. Oshitopolwa shika otashi yelitha kutya eiyapulo olya kwatela mo shike. Otashi ke ku kwathela wo wu mone kutya omolwashike kuu na okutila okwiiyapulila Jehova nokuninginithwa, uuna wi ilongekidha oku shi ninga.

OKWIIYAPULILA JEHOVA OTASHI TI SHIKE?

3. Gandja iiholelwa yopaMbiimbeli yaantu mboka ya li ya iyapulile Jehova.

³ PaMbiimbeli, oshitya okuyapula otashi ti okwiitulila oshinima, omolwelalakano eyapuki. Aaisraeli oya li oshigwana sha yapulilwa Jehova. Ihe aantu yamwe yomoshigwana shoka oya li ya yapulilwa Jehova momukalo gwa ikalekelwa. Pashiholelwa, Aaron okwa li ha zala “endhindhiliko eyapuki lyeyapulo,” ano epapa lyoshingoli tali adhima, lya tulwa komeho gegala lye. Epapa ndyoka lyoshingoli olya li tali ulike kutya okwa hogololwa a longele Jehova momukalo gwa ikalekelwa, ano e li omuyambi omukuluntu. (Lev. 8:9) Aanasiri oya li wo ya iyapulila  Jehova momukalo gwa ikalekelwa. Oshitya Omunasiri shoka sha za koshitya shOshihebeli nazir,ʹ otashi ti “Omuntu a ikalekelwa,” nenge “a yapulwa.” Aanasiri oya li ye na okuvulika koompango dha ikalekelwa, ndhoka ya tulilwa po, dha nyolwa mOmpango yaMoses. — Num. 6:2-8.

4. (a) Ngele wa iyapulile Jehova, oshike hashi kala elalakano lyoye lya simanenena? (b) ‘Okwiihupula mwene’ otashi ti shike? (Tala wo ethano.)

⁴ Uuna wa iyapulile Jehova, owa tokola okukala omulongwa gwaJesus Kristus nokutala ko okulonga ehalo lyaJehova ku li oshinima sha simanenena monkalamwenyo yoye. Eiyapulo lyopaKriste otali ti shike kungoye? Jesus okwa ti: “Kehe ngoka a hala okulandula ndje, na ihupule ye mwene.” (Mat. 16:24) Uutumbulilo wOshigreka mboka wa tolokwa “na ihupule ye mwene” otawu vulu wo okutolokwa “ke na okwiikalela ye mwene.” Wu li omupiya gwaJehova e mu iyapulila, owa pumbwa okutinda kehe shimwe shoka shi li ompinge nehalo lye. (2 Kor. 5:14, 15) Shoka osha kwatela mo okutinda “iilonga yuuhalu wopantu,” ngaashi ohole yiipala. (Gal. 5:19-21; 1 Kor. 6:18) Mbela okuvulika komalombwelo ngoka otaku ningi onkalamwenyo yoye yi kale ondhigu? Hasho nando, ngele owu hole Jehova nowa tompwa kutya oompango dhe odhi li po omoluuwanawa woye. (Eps. 119:97; Jes. 48:17, 18) Omumwatate gwedhina Nicholas okwa ti: “Oto vulu okutala ko omithikampango dhaJehova dha fa iitenda yondholongo, mbyoka tayi ku imbi wu ninge shoka wa hala okuninga, nenge dha fa iitenda yokagunda konime, mbyoka tayi ku gamene kuu li ke po.”

5. (a) Omuntu oha iyapulile ngiini Jehova? (b) Eyooloko lini li li pokati kokwiiyapulila Jehova nokuninginithwa? (Tala wo ethano.)

⁵ Oho iyapulile Jehova ngiini? Oho mu uvanekele megalikano kutya oye awike to ka longela, nonokutya oto ka pititha komeho okulonga ehalo lye monkalamwenyo yoye. Opo nduno oho uvanekele Jehova kutya oto ka tsikila okukala wu mu hole “nomutima gwoye  aguhe, nomwenyo gwoye aguhe, nomadhiladhilo goye agehe nosho wo noonkondo dhoye adhihe.” (Mark. 12:30) Eiyapulo lyoye oshinima shopaumwene, hashi kala pokati koye naJehova. Mepingathano naashoka, eninginitho ohali ningwa montaneho, shoka tashi ulukile yalwe kutya owa iyapulila Jehova. Eiyapulo olyo euvaneko lya kwata miiti, na Jehova okwa tegelela wu kale metsokumwe nalyo, ngaashi owala nangoye osho wa hala okuninga. — Omuuv. 5:4, 5.

OMOLWASHIKE WU NA OKWIIYAPULILA JEHOVA?

6. Oshike hashi inyengitha omuntu a iyapulile Jehova?

⁶ Etompelo lya simanenena kutya omolwashike wu na okwiiyapulila Jehova, olyo kutya owu mu hole. Ohole yoye inayi ikolelela owala komaiyuvo. Ihe oya kankamena ‘kontseyo’ yashili nosho wo ‘koondunge,’ ano kutya iinima mbyoka wa ilonga kombinga yaJehova oyo ya ningitha ohole yoye yoku mu hola yi koke. (Kol. 1:9) Okukonakona Omanyolo okwe ku kwathele wu kale wa tompwa kutya (1) Jehova omuntu gwolela, (2) kutya Ombiimbeli Oohapu dhe dha nwethwa mo nosho wo kutya (3) oha longitha ehangano lye a gwanithe po ehalo lye.

7. Oshike tu na okuninga manga inaatu iyapulila Kalunga?

⁷ Mboka ya iyapulila Jehova oye na okukala ye shi omalongo gopetameko gomOohapu dhaKalunga nokukala metsokumwe nomithikampango dhe. Ohaya ningi ngaashi taya vulu ya lombwele yalwe kombinga yaashoka ya ilonga. (Mat. 28:19, 20) Ohole yawo yokuhola Jehova oya kola noya hala owala oku mu longela oye awike. Mbela nangoye osho ho ningi? Ngele owa kala wu na ohole ya tya ngawo,  ito ka tala ko eiyapulo neninginitho li li oshinima shoka to shi ningi owala molwaashoka wa hala okunyanyudha ngoka te ku longo, nenge aavali yoye, nenge to shi ningi owala molwaashoka ookuume koye nayo osho taya ningi.

8. Ongiini olupandu halu ku kwathele wu ninge etokolo lyokwiiyapulila Jehova? (Episalomi 116:12-14)

⁸ Ngele owa dhiladhila kwaashihe shoka Jehova e ku ningila, oto ka kala we mu pandula nowa hala oku mu iyapulila. (Lesha Episalomi 116:12-14.) Ombiimbeli oya ti kutya Jehova oye Omugandji ‘gwoshipewa kehe oshiwanawa nomagano kehe ga gwana ga pwa.’ (Jak. 1:17) Eyambo lyOmwana gwe, Jesus, olyo limwe lyomomagano ngoka ga dhenga mbanda. Dhiladhila kunkene omagano ngoka omakumithi. Ekuliloyambo olye shi ningitha tashi wapa wu kale wu na ekwatathano lyopothingo naJehova. Okwe ku pa wo etegameno lyokukala nomwenyo sigo aluhe. (1 Joh. 4:9, 10, 19) Okwiiyapulila kwoye Jehova oku li omukalo gwokuulika olupandu omolwohole ya dhenga mbanda ndjoka e ku ulukila nosho wo omalalekonuuyamba galwe ngoka e ku pa. (Deut. 16:17; 2 Kor. 5:15) Olupandu lwa tya ngawo olwa tsuwa omuthindo moshileshwa 46, oshitsa 4, membo Kala nonkalamwenyo ombwanawa sigo aluhe, moka mu na wo okavidio ke na oshipalanyolo, Gandja omagano kuKalunga.

OWA ILONGEKIDHA NGAA OKWIIYAPULILA JEHOVA NOKUNINGINITHWA?

9. Omolwashike omuntu inaa pumbwa okukala e uvite ta thiminikwa a iyapulile Jehova?

⁹ Otashi vulika wu uvite kutya ino gwana okwiiyapulila Jehova nokuninginithwa. Otashi vulika wa pumbwa natango okuninga omalunduluko gontumba monkalamwenyo yoye, opo wu kale metsokumwe nomithikampango dhaJehova, nenge tashi vulika wa pumbwa ethimbo olindji wu koleke eitaalo lyoye. (Kol. 2:6, 7) Haakonakoni ayehe haya ningi ehumokomeho mbala, na haagundjuka ayehe haya kala ya ilongekidha okwiiyapulila Jehova nokuninginithwa pomimvo dha faathana. Kambadhala okuuva ko kutya omalunduluko geni wa pumbwa okuninga, noino iyelekanitha nayalwe. — Gal. 6:4, 5.

10. Oshike to vulu okuninga ngele owa thiki pehulithodhiladhilo kutya ino gwana natango okwiiyapulila Jehova nokuninginithwa? (Tala wo oshimpungu “ Kaagundjuka mboka ya putukila moshili.”)

¹⁰ Nokuli ngele owu wete kutya ino ilongekidha natango okwiiyapulila Jehova, tsikila okukaleka elalakano ndyoka momadhiladhilo. Pula Jehova megalikano e ku kwathele wu ninge omalunduluko ngoka wa pumbwa okuninga monkalamwenyo yoye. (Fil. 2:13; 3:16) Oto vulu okukala nuushili kutya ota ka uva egalikano lyoye, note ke ku yamukula. — 1 Joh. 5:14.

OMOLWASHIKE YAMWE HAYA KAKADHALA OKWIIYAPULILA JEHOVA NOKUNINGINITHWA?

11. Jehova ote ke tu kwathela ngiini tu kale aadhiginini kuye?

¹¹ Yamwe mboka ya ilongekidha okwiiyapulila Jehova nokuninginithwa, natango otaya kakadhala oku shi ninga. Otashi vulika haya ipula kutya: ‘Ongiini ngele konima yokuninginithwa onda ningi epuko lya kwata miiti e tandi kondwa?’ Ngele owu na uumbanda wa tya ngawo, kala nuushili kutya Jehova ote ke ku pa kehe shoka wa pumbwa, wu ‘vule okukala ngashika Omuwa a hala wu kale, nokulonga aluhe shoka she mu opalela.’ (Kol. 1:10) Ote ke ku pa wo oonkondo, wu ninge shoka sha uka. Shoka okwe shi ulika nale kutya ota vulu oku shi ninga, sho a kwathele oyendji ya ninge shoka sha uka. (1 Kor. 10:13) Ndyoka olyo limwe lyomomatompelo kutya omolwashike aantu owala aashona haya kondwa mo megongalo lyopaKriste. Jehova oha kwathele oshigwana she shi kale oshidhiginini.

12. Ongiini tatu vulu okuyanda okuyona omayono ga kwata miiti?

 ¹² Omuntu kehe inaa gwanenena oha makelwa a ninge shoka sha puka. (Jak. 1:14) Ihe nando ongawo, owu na okuhogolola kutya oshike to ka ninga po, uuna to makelwa. Uushili owo kutya ongoye wu na uuthemba wokuhogolola kutya owa hala okukala nonkalamwenyo ya tya ngiini. Nonando aantu yamwe ohaya ti kutya itatu vulu okupangela omahalo getu ga puka, shoka otatu vulu oku shi ninga. Nokuli nando oto makelwa, oto vulu okutokola kuu ninge shoka oshiwinayi. Shoka tashi vulu oku ku kwathela wu ninge ngawo, okugalikana esiku kehe. Itulila po wo elalakano lyokukala ho konakona Oohapu dhaKalunga. Kala ho kala pokugongala kwopaKriste. Kala ho lombwele yalwe kombinga yeitaalo lyoye. Ngele owa kala aluhe ho ningi iinima mbyoka, otashi ke ku kwathela wu kale metsokumwe neiyapulo lyoye. Ino dhimbwa nando kutya Jehova ote ke ku kwathela wu shi ninge. — Gal. 5:16.

13. Josef okwe tu tulila po oshiholelwa oshiwanawa shini?

¹³ Otashi ka kala oshipu kungoye okukala omudhiginini kuJehova, ngele owa tokola manga kuyele shoka to ka ninga, uuna to makelwa. Ombiimbeli oye tu lombwela kombinga yaantu oyendji, mboka ya li ya ningi ngawo, nonando nayo oya li aantu inaaya gwanenena. Pashiholelwa, omukulukadhi gwaPotifar okwa li a kambadhala lwiikando okuhongolola Josef. Ihe Josef ka li a limbililwa kutya na ninge po shike. Ombiimbeli oye tu lombwela kutya “Josef okwa tindi” nokwa ti: “Ondi longe ngiini uuwinayi u thike mpono, ndi yone kuKalunga?” (Gen. 39:8-10) Osha yela kutya Josef okwa li e shi kutya ota ka ninga po shike ngele okwa makelwa, nokuli manga omukiintu ngoka inee mu makela. Shoka oshe shi ningitha oshipu kuye okuninga shoka sha uka, sho a li ta makelwa.

14. Ongiini tatu vulu okwiilonga okutinda okuninga shoka sha puka?

¹⁴ Ongiini to vulu okuulika kutya owa tokola toko okuninga shoka sha uka, ngaashi Josef? Oto vulu okutokola ngashingeyi shoka to ka ninga po, uuna to makelwa. Ilonga okutinda meendelelo okuninga iinima mbyoka Jehova e tonde, nokuli nokukala itoo dhiladhila kuyo. (Eps. 97:10; 119:165) Kungawo ito ka yona, uuna to makelwa. Oto ka kala nale wu shi kutya oshike wu na okuninga po.

15. Ongiini omuntu ta vulu okuulika kutya ota ‘kongo’ Jehova a mana mo? (Aahebeli 11:6)

 ¹⁵ Otashi vulika wu shi kutya owa mona oshili, nonokutya owa hala okulongela Jehova nomutima gwoye aguhe, ihe opu na sha natango tashi ku imbi wu mu iyapulile nowu ninginithwe. Oto vulu okuninga ngaashi omukwaniilwa David a li a ningi. Oto vulu okupula Jehova to ti: “Konakona ndje, Kalunga, ngoye u tseye omutima gwandje; tala ndje, u dhimbulule omadhiladhilo gandje. Tala ndje, ngele ndi li mondjila ndjoka yu uka kekano, u endithile ndje mondjila yaaluhe.” (Eps. 139:23, 24) Jehova oha laleke nuuyamba “mboka taye mu kongo.” Ngele owa itulile po elalakano lyokwiiyapulila Jehova nokuninginithwa, oto mu ulukile kutya owa hala oku shi ninga. — Lesha Aahebeli 11:6.

TSIKILA OKUHEDHA POPEPI NAJEHOVA

16-17. Jehova oha nanene ngiini kuye, mboka ya putukila moshili? (Johannes 6:44)

¹⁶ Jesus okwa ti kutya aalongwa ye, Jehova oye he ya nana. (Lesha Johannes 6:44.) Dhiladhila kombinga yankene shoka oshikumithi, nonokutya otashi ti shike kungoye. Jehova oha mono sha oshiwanawa momuntu kehe ngoka ta nanene kuye. Omuntu kehe ohe mu tala ko kutya oye e mu “hogolola.” (Deut. 7:6) Nangoye osho wo he ku tala ko ngawo.

¹⁷ Otashi vulika wu li omugundjuka, a putudhilwa moshili. Otashi vulika wu kale wu uvite kutya oto longele owala Jehova, molwaashoka aavali yoye nayo osho taya ningi. Ihe nando ongawo, Ombiimbeli otayi ti: “Hedheni kuKalunga, ye nota hedha kune.” (Jak. 4:8; 1 Ondjal. 28:9) Ngele owa hedha popepi naJehova, naye ota ka hedha wo popepi nangoye. Jehova ihe ku tala ko wu li owala oshitopolwa shongundu yaapiya ye. Oha hilile omuntu kehe kuye, nokuli naangoka a putukila moshili. Ngele owa hedha popepi naJehova, naye ota ka hedha kungoye, ngaashi sha popiwa muJakob 4:8. — Yelekanitha 2 Aatessalonika 2:13.

18. Oshike tatu ka kundathana moshitopolwa tashi landula ko? (Episalomi 40:8)

¹⁸ Ngele owa iyapulile Jehova e to ninginithwa, kungawo oto holele Jesus. Okwa li a igandja nehalo ewanawa kuHe, a longe kehe shimwe shoka e mu lombwela a longe. (Lesha Episalomi 40:8; Heb. 10:7) Moshitopolwa tashi landula, otatu ka kundathana shoka tashi ke ku kwathela wu tsikile okulongela Jehova nuudhiginini, konima sho wa ninginithwa.