1-3. (a) Omalunduluko geni tashi vulika ga kale omadhigu kutse okuninga konima ngele twa ninginithwa? (b) Ngele otwa mono kutya kashi shi oshipu okuninga omalunduluko ngaashi twa li twa tegelela, omapulo geni tashi vulika twi ipule? (Tala omathano gopetameko.)

UULE woomimvo odhindji, Kevin okwa kala ha ndombola, ha hili omakaya, ha nu sha pitilila noha longitha iingangamithi. ^[1] (Tala enyolo lyopevi.) Konima yethimbo okwi ilongo kombinga yaJehova nokwa li a hala a ninge kuume ke. Ihe opo e shi ninge, okwa li e na okuninga omalunduluko monkalamwenyo ye. Okwa li a vulu okuninga omalunduluko kekwatho lyaJehova nosho wo okupitila mOohapu dhe, Ombiimbeli. — Aahebeli 4:12.

² Konima sho Kevin a ninginithwa, okwa li natango a pumbwa okuhwepopaleka omaukwatya ge, opo a kale Omukriste e li nawa. (Aaefeso 4:31, 32) Pashiholelwa, okwa li ha geye mbala. Okwa li lela a kumwa sho a mono nkene sha li oshidhigu kuye okwiilonga okupangela ongeyo ye. Kevin okwa ti kutya osha li  oshipu kuye okweetha po iinima iiwinayi mbyoka a li ha ningi manga inaa ninginithwa, ihe osha li oshidhigu kuye okupangela ongeyo ye. Nonando ongawo, okwa li a vulu okuninga omalunduluko mokupula Jehova e mu kwathele nomokukonakona Ombiimbeli nuukeka.

³ Manga inaatu ninginithwa, otundji otwa li twa ningi omalunduluko, opo tu kale metsokumwe naashoka Ombiimbeli tayi tu lombwele. Nonando ongawo, otwa dhimbulula kutya opu na natango omalunduluko ngoka twa pumbwa okuninga, opo tu kala twa fa Jehova naKristus. (Aaefeso 5:1, 2; 1 Petrus 2:21) Pashiholelwa, otashi vulika twa dhimbulula kutya otu hole okungungutula unene nenge tu hole okuhokola nokupopila yalwe muuwinayi. Omathimbo gamwe otashi vulika tu kale twa tila kutya yalwe otaya dhiladhila ngiini kombinga yetu, sho tashi tu ningitha tu ninge iinima ya puka. Otashi vulika twa kambadhala omimvo odhindji tu ninge omalunduluko, ihe natango inapu ya elunduluko. Onkene, otashi vulika tu ipule kutya: ‘Omolwashike oshidhigu okuninga omalunduluko nomiinima iishona? Oshike ndi na okuninga, ndi tule miilonga shoka Ombiimbeli tayi ti, opo ndi tsikile okuhwepopaleka omaukwatya gandje?’  

4. Omolwashike itaatu vulu okunyanyudha Jehova mukehe shimwe tatu ningi?

⁴ Otu hole Jehova, notwa halelela oku mu nyanyudha. Mupyamunene, ihatu mu nyanyudha aluhe, molwaashoka inatu gwanenena. Olundji ohatu kala tu uvite ngaashi omuyapostoli Paulus, ngoka a ti: “Nonando mungame omu na ehalo okulonga uuwanawa, itandi shi vulu.” — Aaroma 7:18; Jakob 3:2.

5. Omalunduluko geni twa ninga manga inaatu ninginithwa, ihe omaunkundi geni tashi vulika tu na okukondjitha natango?

⁵ Manga inaatu ninga iilyo yegongalo, otwa li tu na okweetha po iinima mbyoka Jehova e tonde. (1 Aakorinto 6:9, 10) Nonando otwe yi etha po, natango inatu gwanenena. (Aakolossa 3:9, 10) Ohatu iyadha natango tatu ningi omapuko, nonando otwa ninginithwa uule womimvo odhindji. Omathimbo nomathimbo, otashi vulika tu kale tu na omahalo nomadhiladhilo ga puka nenge tashi vulika tu mone oshidhigu okweetha po iikala iiwinayi. Otashi vulika tu na okutsikila okukondjitha uunkundi owo tuu mboka uule womimvo odhindji.

6, 7. (a) Oshike she shi ningi tashi wapa tu ninge ookuume kaJehova, nonando inatu gwanenena? (b) Omolwashike tu na okupula aluhe Jehova e tu dhimine po?

⁶ Nonando inatu gwanenena, otatu vulu okulongela Jehova nokukala ookuume ke. Kala aluhe ho dhimbulukwa kutya oshe ende ngiini, opo wu ninge kuume ke. Oye a mono sha tango oshiwanawa mungoye e ta kala a hala wu mu tseye. (Johannes 6:44) Okwa li e shi shi kutya oho ningi omapuko nowu na omaunkundi nosho wo kutya oto ka tsikila okuninga omapuko. Nonando ongawo, Jehova okwa kala ngaa a hala wu ninge kuume ke.

⁷ Jehova okwa kala e tu hole noonkondo, nomolwaashono e tu pe omagano gondilo. Okwa tumu Omwana, Jesus, kombanda yevi, opo a gandje omwenyo gwe gu ninge iikulila omolwoondjo dhetu. (Johannes 3:16) Ngele otwa ningi epuko, otatu vulu okupula Jehova e tu dhimine po. Omolwekulilo, otatu vulu okukala nuushili kutya ote ke tu dhimina po, notatu ka tsikila okukala ookuume ke. (Aaroma 7:24, 25; 1 Johannes 2:1, 2) Natu dhimbulukwe kutya Jesus okwa sile aalunde mboka tayi itedhulula. Nonando otu wete shoka twa ninga oshiwinayi  noonkondo, katu na nando okweetha po okugalikana Jehova e tu dhimine po. Ngele ihatu mu pula e tu dhimine po, otashi ka kala owala sha fa inaatu hala okuyoga iikaha yetu uuna ya kaka. Inatu pandula tuu sho Jehova e shi ningi tashi wapa tu ninge ookuume ke, nonando inatu gwanenena! — Lesha 1 Timoteus 1:15.

8. Omolwashike kaatu na okwiipwililikila omaunkundi getu?

⁸ Uushili owo kutya katu na okukala hatu ipwililikile omapuko getu nenge tu kale hatu ningi omaipopilo. Jehova okwe tu lombwela kutya okwa hala ookuume ke ya kale ya tya ngiini. (Episalomi 15:1-5) Onkee ano, ngele otwa hala okuhedha popepyeelela naye, otu na okutsikila oku mu holela nokuholela wo Omwana. Otu na wo okuninga oonkambadhala tu pangele omahalo ga puka, notashi vulika nokuli tu manguluke ko kugamwe gomugo. Kashi na nduno mbudhi kutya otwa ninginithwa pwa pita ethimbo li thike peni, otu na okutsikila okuhwepopaleka omaukwatya getu. — 2 Aakorinto 13:11.

9. Otu shi shi ngiini kutya otatu vulu okutsikila okuzala omuntu omupe?

⁹ Omuyapostoli Paulus okwa lombwele Aakriste ta ti: “Ihuleni omuntu gweni omukulu ngoka mwe mu landula nale, ngoka hi iyono po ye mwene mokwiifundjaleka nuuhalu we. Omitima dheni nomadhiladhilo geni naga shituluke lela, ga ninge omape. Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.” (Aaefeso 4:22-24) Shino otashi ti kutya otu na okuninga oonkambadhala, opo tu lundulule notu “zaleni omuntu omupe.” Kashi na nduno mbudhi kutya otwa kala tatu longele Jehova uule wethimbo li thike peni, otatu vulu okukala tatu ilongo oshindji kombinga yomaukwatya ge. Ombiimbeli otayi vulu oku tu kwathela tu tsikile okuhwepopaleka omaukwatya getu, opo tu kale lela twa fa Jehova.

10. Oshike twa pumbwa okuninga, opo tu tsikile okuninga omalunduluko kekwatho lyOmbiimbeli, nomapulo geni tashi vulika twi ipule?

¹⁰ Atuhe otwa hala okulandula shoka Ombiimbeli tayi ti. Ihe otwa pumbwa okulonga nuudhiginini, ngele otwa hala okutsikila okuninga omalunduluko. Omolwashike twa pumbwa okuninga oonkambadhala ndhoka? Mbela Jehova ita vulu oku shi ninga oshipu kutse, opo tu longe shoka shi li mondjila?

11-13. Omolwashike Jehova a tegelela tu ninge oonkambadhala tu sinde omaunkundi getu?

¹¹ Uuna tatu dhiladhila kewangandjo nakehe shoka shi li ko, katu na omalimbililo kutya Jehova oku na oonkondo okuninga kehe shimwe. Pashiholelwa, okwa shita etango li na oonkondo oonene. Osekonde kehe, etango ohali gandja uuyelele nuupyu. Ihe otwa pumbwa owala oonkondo oonshona dhetango, opo tu kale nomwenyo kombanda yevi. (Episalomi 74:16; Jesaja 40:26) Jehova oha gandja wo oonkondo kaapiya ye kombanda yevi uuna ye dhi pumbwa.  (Jesaja 40:29) Osha yela kutya, ando Jehova okwa li a hala, ando okwa vulu oku shi ninga oshipu lela kutse tu kondjithe uunkundi wetu notu ethe po omahalo omawinayi. Omolwashike ihee shi ningi oshipu kutse tu sinde omahalo ga puka?

¹² Jehova okwe tu pa emanguluko lyokuninga omatokolo. Ohe etha tu hogolole tse yene ngele otwa hala okuvulika kuye nenge hasho. Ngele otwa hogolola tu vulike kuye nokulonga nuudhiginini tu longe ehalo lye, otatu ku ulika kutya otu mu hole notwa hala oku mu nyanyudha. Satana okwa ti kutya Jehova ke na uuthemba wokupangela aantu. Onkee ano, uuna tatu vulika kuJehova, otatu ulike kutya otwa hala oye a kale Omupangeli gwetu. Otatu vulu okukala nuushili kutya Tate yetu omunahole okwa lenga oonkambadhala ndhoka tatu ningi, opo tu vulike kuye. (Job 2:3-5; Omayeletumbulo 27:11) Ngele otwa longo nuudhiginini tu kondjithe omaunkundi getu nonando kashi shi oshipu, otatu ka kala aadhiginini kuJehova. Otatu ku ulika wo kutya otwa hala oye a kale Omupangeli gwetu.

¹³ Jehova ohe tu lombwele kutya otu na okulonga nuudhiginini tu holele omaukwatya ge. (Aakolossa 3:12; lesha 2 Petrus 1:5-7.) Okwa hala wo tu longe nuudhiginini, opo tu pangele shoka hatu dhiladhila. (Aaroma 8:5; 12:9) Ohatu kala twa nyanyukwa noonkondo, uuna twa longa nuudhiginini e tatu ningi elunduluko lyontumba.

14, 15. Oshike tu na okuninga, opo tu kokeke omaukwatya ngoka Jehova e hole? (Tala oshimpungu “ Ombiimbeli negalikano ohayi lundulula aantu.”)

¹⁴ Oshike tu na okuninga, opo tu kokeke omaukwatya ngoka Jehova e hole? Otwa pumbwa okweetha Jehova e tu wilike,  pehala lyokuninga owala omatokolo kutse yene. Aaroma 12:2 otayi ti: “Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” Opo tu mone shoka Jehova a hala, otwa pumbwa okwiinekela ekwatho ndyoka he tu pe. Otu na okulesha Ombiimbeli esiku kehe, okutedhatedha kwaashoka tatu lesha nokupula Jehova e tu pe ombepo ye ondjapuki. (Lukas 11:13; Aagalati 5:22, 23) Jehova ote ke tu kwathela tu tseye shoka tashi mu nyanyudha, notatu ki ilonga wo okukala hatu dhiladhila ngaashi ye. Ngele otwa kala hatu dhiladhila ngaashi Jehova, shoka hatu dhiladhila, hatu popi nohatu ningi otashi ke mu nyanyudha. Otatu ki ilonga wo nkene tu na okukondjitha omaunkundi getu. Ihe nonando ongawo, otatu ka tsikila ngaa oku ga kondjitha. — Omayeletumbulo 4:23.

¹⁵ Kakele kokulesha Ombiimbeli esiku kehe, otwa pumbwa oku yi konakona pamwe niileshomwa ngaashi: Oshungolangelo no-Awake! Iitopolwa oyindji yomiifo mbika otayi tu longo nkene tatu vulu okuholela omaukwatya gaJehova nankene tu na okukondjitha omaunkundi getu. Otatu vulu okumona mo iitopolwa nenge omanyolo ngoka taga vulu oku tu kwathela. Otatu vulu okundhindhilika omanyolo niitopolwa mbyoka, opo tu kale tatu yi lesha ethimbo nethimbo.

16. Omolwashike kaatu na okusholola ngele inatu vula okuninga omalunduluko ngaashi twa li twa dhiladhila?

¹⁶ Ohashi pula lela ethimbo, opo tu  ilonge nkene tu na okuholela omaukwatya gaJehova. Ngele owu wete inoo ninga naanaa omalunduluko ogendji ngaashi wa li wa dhiladhila, ino sholola. Petameko otashi vulika wa pumbwa okulonga nuudhiginini wu ninge shoka Ombiimbeli tayi ti. Otu na okudhiladhila nokwiihumbata ngaashi Jehova a hala. Ngele otwe shi ningi otashi ka kala oshipu kutse okudhiladhila ngaashi Jehova ha dhiladhila nokulonga shoka shu uka. — Episalomi 37:31; Omayeletumbulo 23:12; Aagalati 5:16, 17.  

17. Ngele otwa kala aadhiginini kuJehova, otatu ka nyanyukilwa onakuyiwa ya tya ngiini?

¹⁷ Otwa tegelela ethimbo ndyoka tatu ka kala twa gwanenena naasho tatu ka longela Jehova sigo aluhe. Pethimbo ndyoka itatu ka kondjitha uunkundi washa, notashi ka kala oshipu kutse okuholela Jehova. Ihe nongashingeyi otatu vulu okulongela Jehova, molwaashoka okwe tu pa omagano gekulilo. Nonando inatu gwanenena, otatu vulu oku mu nyanyudha ngele otwa tsikile okulonga nuudhiginini, opo tu ninge omalunduluko notu landule shoka e tu longa mOmbiimbeli.

18, 19. Otu shi shi ngiini kutya Ombiimbeli otayi vulu oku tu kwathela tu tsikile okulundulula onkalamwenyo yetu?

¹⁸ Kevin okwa li a ningi ngaashi ta vulu a pangele ongeyo ye. Okwa kala ha tedhatedha kwaashoka i ilongo mOmbiimbeli nokwa longo nuudhiginini a ninge omalunduluko. Okwa landula wo omayele ngoka a pewa kAakriste ooyakwawo. Nonando osha pula Kevin oomvula odhindji, opo a lundulule iikala ye, konima yethimbo okwa ningi omuyakuligongalo. Uule womimvo omilongo mbali dha ka pita, okwa kala ta longo e li omukuluntugongalo. Ihe sigo onena, oku shi shi kutya okwa pumbwa okutsikila okukondjitha omaunkundi ge.

¹⁹ Ngaashi Kevin, natse otatu vulu okutsikila okuhwepopaleka omaukwatya getu. Ngele otwe shi ningi, otatu ka tsikila okuhedha popepyeelela naJehova. (Episalomi 25:14) Ngele otwa ningi ngaashi tatu vulu tu ninge omalunduluko, opo tu nyanyudhe Jehova, ote ke tu kwathela tu pondole. Natu kale wo tu shi kutya Ombiimbeli otayi vulu oku tu kwathela tu ninge omalunduluko monkalamwenyo yetu. — Episalomi 34:8.