MOMUMVO 1910 nasha, aavali yandje mboka ya li ya kala moTbilisi, Georgia, oya tembukile koKanada. Oya kala megumbo eshona li li menkolo lyofaalama popepi naPelly, moSaskatchewan, muuninginino waKanada. Onda valwa mo 1928, otwa valwa tu li yahamano, ngaye onkelo. Tate okwa si ku na oomwedhi hamano ndi valwe, na meme okwa si manga ndi li okahanona. Konima yethimbo, omumwamemekadhona gwosheeli, Lucy, okwa si sho e na omimvo 17. Omumwayina gwameme gwomulumentu, Nick, okwe tu kutha po e ke tu sile oshimpwiyu.

Esiku limwe sho nda li okanona opo taki ilongo okweenda, yaandjetu oya mono tandi hili okakambe okatsezi momushila. Oya li ya tila kutya pamwe otaka thanga ndje, e tayi igidha ndje ndi ke ethe, ihe inandi uva po sha. Onda li nde ya pilamene nokanda li ndi yu uvite sho tayi igidha. Lagwenene, okakambe inake ehameka ndje, esiku ndyoka olyo esiku yaayetu ya mono kutya ngaye ombolo.

Kuume kandje gumwe gwaandjetu okwa ti kutya otandi vulu okukala handi longwa pamwe noombolo dhilwe. Onkee ano, tatekulu Nick okwa nyolitha ndje mosikola yoombolo ndjoka yi li moSaskatoon, Saskatchewan. Onda falwa kehala lilwe hapu endwa oowili dhontumba okuza paayetu, molwaashoka onda li ndi na owala omimvo ntano, onda li handi tila okweenda po ongame awike. Onda li handi vulu owala okutalela po yaayetu pomafudho omanene nomashona. Konima yethimbo ondi ilongo elaka lyokuudhika nonda kala handi dhana pamwe nuunona uukwetu.

Mo 1939, gumwe gwomaamwamemekadhona aakuluntu, Marion, okwa hokanwa kuBill Danylchuck, noye tu kutha po, tse nomumwamemekadhona, Frances, ye ke tu tekule. Oyo yotango maandjetu ya li ya kwatathana nOonzapo dhaJehova. Pethimbo lyefudho, oya kala haya ningi ngaashi taya vulu ya  kundathane nangame shoka yi ilongo mOmbiimbeli. Uushili owo kutya kasha li oshipu okupopya nayo, molwaashono kaya li ye shi elaka lyokuudhika. Ihe oya li ye wete kutya ondi hole iinima yopambepo. Onda li ndi wete kutya opu na etsokumwe pokati kaashoka taya ningi naashoka Ombiimbeli tayi ti, onkee onda kala handi yi nayo sho taye ku uvitha. Konima yethimbo efupi, onda kala nda hala okuninginithwa, mu 5 Septemba 1941, Bill okwa ninginitha ndje mondoloma yu udha omeya ga tekwa moshikweyo. Oga li omatalala noonkondo.

Mo 1946 sho nda shuna kegumbo pokufu, otwa li twa yi koshigongi oshinene koCleveland, Ohio, moAmerika. Esiku lyotango lyoshigongi, omumwamemekadhona okwa kala ta nyolele ndje iitsa ya simana, opo ndi landule nawa opolohalama. Mesiku etiyali lyoshigongi, onda li nda tuntukwa sho ndu uvu kutya poshigongi opu na ongundu yelaka lyookuudhika tayi tolokelwa. Onda li nda nyanyukwa sho te tyapula oshigongi naasho ndu uvite ko oshili yOmbiimbeli nawanawa.

Pethimbo ndyoka, Iita Iitiyali yUuyuni oya adhika owala opo ya hulu nombepo yuukwashigwana oya li ya lunda pombanda. Koshigongi onda zi ko nda tokola okupopila eitaalo lyandje kosikola. Onkee ano, onde etha po okusalutila epandela nokwiimba melaka lyokuudhika eimbilo lyopashigwana. Onde etha po wo okukutha ombinga mokudhana omafudho nomomalwiimbo gongeleka. Aalongisikola kaya li ye shi nyanyukilwa noya kambadhala okutilitha ndje nokufundja ndje, ndi lundulule omadhiladhilo gandje. Shika oshe eta epiyagano enene mokati kaanasikola ooyakwetu, ihe osha pe ndje oompito dhokugandja uunzapo. Aanasikola ooyakwetu ngaashi: Larry Androsoff, Norman Dittrick naEmil Schneider, konima yethimbo oya taamba ko oshili notaya longele Jehova nuudhiginini sigo okunena.

Uuna tandi talele po kiilando yilwe, ohandi ningi aluhe oonkambadhala ndi uvithile oombolo dhamo. Pashiholelwa, moMontreal, mehala moka hamu gongala oombolo, onda li ndu uvithile Eddie Taeger, omumati omugundjuka ngoka a li gwomongenga yontumba. Sigo oosho a si omumvo gwa zi ko okwa kala megongalo lyelaka lyokuudhika moLaval, Quebec. Onda li wo nda tsakanene nomugundjuka, Juan Ardanez, ngoka e hole okuninga omapekapeko ngaashi Aaberea, mboka ya li haya konakona Omanyolo, ya tale ngele shono tashi popiwa oshoshili tuu. (Iil. 17:10, 11) Naye wo okwe ya moshili nokwa kala ta longo nuudhiginini e li omukuluntugongalo moOttawa, moOntario sigo eso lye.

Mo 1950 onda tembukile koVancouver. Nonando onda li ndi hole okuuvithila oombolo, itandi dhimbwa sho nda li ndu uvithile mepandaanda omukiintu ngoka kee shi ombolo gwedhina Chris Spicer. Okwi inyolitha a kale ha mono iifo nokwa li a hala ndi mone omusamane gwe, Gary. Onkee, onde ya talele po megumbo lyawo, notwa kundathana nayo ethimbo ele,  tandi longitha omukalo gwokunyola. Shono osho owala oshikando twa li twa tsakanene, notwe ki imona owala konima yoomvula dhontumba, sho ya dhimbulula ndje mongundu yaantu poshigongi moToronto, Ontario. Gary okwa li ta ninginithwa esiku ndyoka. Oshimoniwa shoka oshihokithi osha dhimbulukitha ndje kutya osha simama okutsikila okuuvitha, molwaashoka katu shi kutya uunake nopeni oshili tayi ka mena omidhi.

Konima yethimbo onda shuna koSaskatoon. Onda tsakanene ko nomukulukadhi ngoka a pula ndje ndi konakone Ombiimbeli nuumwanakadhona uukwana uumbolo, Jean naJoan Rothenberger, mboka twa li hatu sikola posikola yimwe nawo. Inapu pita ethimbo ele, uukadhona mboka owa tameke okukundathana naanasikola ooyakwawo shoka wi ilonga. Muule wokathimbo, yatano yomongundu yawo oya ningi Oonzapo dhaJehova. Gumwe gwomuyo okwa li Eunice Colin. Oshikando shotango nda tsakanene naEunice oosho nda li momumvo gwandje gwahugunina kosikola yoombolo. Pethimbo mpoka okwa pe ndje okapambu kokaleke e ta pula ndje ngele otatu vulu okuninga ookuume. Konima yethimbo okwa ka ninga omuntu a simana monkalamwenyo yandje, ano omukulukadhi gwandje.

Sho yina a mono kutya ota konakona Ombiimbeli, okwa lombwele omukuluntusikola e mu shololithe. Okwe mu kutha nokuli iileshomwa ye ya kankamena kOmbiimbeli. Ihe Eunice okwa li a tokola okukala a kakatela uudhiginini we kuJehova. Sho a li a hala okuninginithwa, aakuluntu ye oye mu lombwele ya ti: “Ngele owa ningi Onzapo yaJehova, oto zi mo megumbo lyetu.” Sho Eunice e na omimvo 17, okwa zi mo megumbo, nuukwanegumbo wumwe wOonzapo dhomoshitopolwa shawo, owa kala tawu mu sile oshimpwiyu. Okwa tsikile nekonakono lye nokonima yethimbo okwa ninginithwa. Sho twa hokana mo 1960, aavali ye inaye ya ko kohango yetu. Sho omimvo tadhi piti po, oya kala ye tu simaneka omolweitaalo lyetu nomolwomukalo moka twa putudha aanona yetu.

Tu li aavali oombolo, otwa putudha aanona yetu yaheyali kaaye shi oombolo. Shino osha li eshongo kutse, ihe nonando ongawo, otwa ningi oonkambadhala tu ya longe elaka lyokuudhika, opo tu vule okukala hatu popi nayo nawa tse tu ya longe oshili. Aamwatate naamwameme megongalo oya li ekwatho enene kutse. Pashiholelwa, omuvali gumwe okwa li e tu nyolele okambapila te tu lombwele kutya omumati gwetu gumwe okwa popi sha oshiwinayi mOshinyanga shUukwaniilwa. Otwa li tu ungaunga nonkalo ndjoka momukalo omwaanawa. Yane yomaamwandjemati, James, Jerry, Nicholas naSteven otaya longele Jehova nuudhiginini pamwe naakulukadhi yawo noyana. Ayehe yane oye li aakuluntugongalo. Oshikwawo, Nicholas nomukadhi, Deborah, ohaya kwathele okutoloka elaka lyookuudhika moshitayimbelewa shaBritain, omanga Steven nomukadhi, Shannan, haya toloka elaka lyookuudhika moshitayimbelewa shaAmerika.

Manga ku na omwedhi gumwe tu dhane oshituthidhimbuluko shohango yetu oshiti-40, Eunice okwa si kokankela. Okwa li e na lela omukumo pethimbo mpoka a li monkalo ondhigu. Eitaalo lye meyumuko olya li lye mu kwathele a kale e na oonkondo. Onda tegelela esiku ndyoka tandi ke mu mona natango.

MuFebuluali 2012 ondi ihata po e tandi teka monto, nosha li sha yela kutya onda pumbwa ekwatho. Onkee ano, onda tembukile kegumbo lyomumwandjemati gumwe nomukulukadhi gwe. Ngashingeyi otu li megongalo Calgary lyelaka lyokuudhika moka tandi tsikile natango ndi li omukuluntugongalo. Shika osha li oshikando shandje shotango tandi kala megongalo lyelaka lyokuudhika. Dhiladhila owala, nda kala megongalo lyOshiingilisa omimvo adhihe ndhoka okuza tuu mo 1946, mbela uupambepo wandje owa li ngiini? Jehova okwa gwanitha po euvaneko lye lyokusila oshimpwiyu aanona mboka kaaye na oohe. (Eps. 10:14) Onda pandula koonkambadhala dhaantu ayehe mboka ya li ye shi elaka lyookuudhika, sho ya kwathele ndje okunyolela ndje iitsa ya simana, okwiilonga elaka lyokuudhika nokutolokela ndje.

Uushili owo kutya opwa li omathimbo gamwe ngoka nda li handi kala ndu uvite tandi ningilwa nayi, nonda li nda hala okusholola, molwaashoka kanda li ndu uvite ko shoka tashi popiwa. Onda li wo he kala ndi wete sha fa oompumbwe dhoombolo kaadhi uvitiwe ko. Ihe pethimbo mpoka onda li nda dhiladhila koohapu dhaPetrus ndhoka a li a lombwele Jesus a ti: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe.” (Joh. 6:66-68) Ngaashi aamwatate naamwameme yalwe oyendji mboka oombolo dhopethimbo lyandje, ondi ilongo okukala ndi na eidhidhimiko. Onda kala ndi inekela muJehova nomehangano lye, nonda mono mo uuwanawa mokuninga ngawo. Ngashingeyi ondi na uuyamba wiikulya yopambepo melaka lyandje mwene nohandi nyanyukilwa eendathano naamwatate naamwameme pokugongala nopiigongi melaka lyokuudhika lyOshiamerika. Ondi na onkalamwenyo yi na enyanyu noya yambekwa miilonga yaJehova, Kalunga ketu omunene.