1. Omolwashike tashi vulika yamwe kaaye hole okukonakona Ombiimbeli paumwene?

KUNENA, aantu oya pumbwa okulonga nuudhiginini, opo yi imonene omboloto. Aamwatate oyendji ohaya longo oowili odhindji, opo ya gwanithe po oompumbwe dhomaukwanegumbo gawo. Yalwe oyendji ohaya ende iinano iile okuya kiilonga nokugaluka ko. Oyendji ohaya longo iilonga iidhigu yokomake, opo yi ikwathele. Pehulilo lyesiku, aamwatate naamwameme mboka haya longo nuudhiginini, ohaya kala ya vulwa! Shoka ohashi ya ningitha ya kale itaaya vulu okukonakona Ombiimbeli paumwene.

2. Oho konakona Oohapu dhaKalunga ethimbo peni?

² Uushili owo kutya otu na okukonga ethimbo tu konakone Oohapu dhaKalunga niileshomwa yetu, twi itula mo. Otatu vulu owala okukala tu na ekwatathano ewanawa naJehova noku ka mona omwenyo gwaaluhe, ngele osho twa kala hatu ningi ngawo. (1 Tim. 4:15) Yamwe ohaya penduka aluhe ongula onene ya konakone, oshoka omadhiladhilo gawo ohaga kala ga ngungumana nomegumbo ohamu kala mwa mwena nawa. Yalwe ohaya konakona nokutedhatedha Oohapu dhaKalunga, pehulilo lyesiku.

3-4. Omalunduluko geni ga ningwa shi na ko nasha niileshomwa yetu, nomolwashike?

³ Osha yela kutya nangoye oto shi zimine kutya osha simana okwiitulila po ethimbo lyokukonakona. Mbela oshike tu na okukonakona? Otashi vulika wu tye: ‘Opu na uuyelele owundji unene wa pumbwa okuleshwa. Ohandi shi mono oshidhigu oku wu lesha awuhe.’ Odhoshili kutya aamwatate yamwe ohaya vulu okulesha uuyelele awuhe nokutala uuvidio awuhe wopaMbiimbeli, ihe yamwe ohaye shi mono oshidhigu. Olutuwiliki olu shi oshinima  shoka. Omolwetompelo ndyono, olwa tokola okungambeka iileshomwa mbyoka halu tu pe, kutya nduno oyo mbyoka hayi pilintwa nenge mbyoka yi li kointaneta.

⁴ Pashiholelwa, ihapu nyanyangidhwa we embo Yearbook of Jehovah’s Witnesses, molwaashoka iimoniwa oyindji tayi tsu omukumo, ohayi kala kepandja lyetu lyokointaneta, jw.org nokopolohalama yetu yotiivii JW ndjoka hayi piti omwedhi kehe. Oshungolangelo yomomapya no-Awake!, ngashingeyi ohayi piti owala lutatu momumvo. Omalunduluko ngaka inaga ningwa, opo ando tu vule okulongitha ethimbo olindji miinima yopaumwene. Oga ningwa, opo tu vule okukala tu na ethimbo lyokuninga “iinima mbyoka yi na oshilonga.” (Fil. 1:10) Natu ka kundathaneni nkene to vulu okutokola kutya oshike lela shi na oshilonga nankene to vulu okumona uuwanawa, mokukonakona Ombiimbeli paumwene.

5-6. Iileshomwa yini tu na okushilipaleka kutya otwe yi konakona nuukeka?

⁵ Omalalakano geni tatu vulu okwiitulila po? Otu na okukala hatu konakona Oohapu dhaKalunga esiku kehe. Oovelise ndhoka hatu konakona kokugongala kwomokati koshiwike ngashingeyi odha shonopekwa, opo tu kale tu na ethimbo olindji lyokutedhatedha kudho nokuninga omapekapeko. Elalakano lyetu kali shi owala okumana ko okulesha oovelise adhihe, ihe otu ethe wo etumwalaka lyOmbiimbeli li gume omitima dhetu notu hedhe popepi naJehova. — Eps. 19:14.

⁶ Oshike ishewe tu na okukonakona nuukeka? Otwa hala tu kale hatu ilongekidha Oshungolangelo yokukonakonwa, Ekonakonombiimbeli lyEgongalo nosho wo iinima yilwe mbyoka hayi konakonwa kokugongala kwomokati koshiwike. Otu na wo okukala aluhe hatu lesha kehe Oshungolangelo no-Awake!

7. Mbela otu na okuteka omukumo, ngele ihatu vulu okulesha nokutala uuyelele awuhe mboka wu li kepandja lyetu lyokointaneta nokopolohalama yotiivii JW?

⁷ Otashi vulika wu tye: ‘Shoka oshi li nawa, ihe ongiini kombinga yiitopolwa nuuvidio mboka hawu kala kepandja lyetu lyokointaneta, jw.org nokopolohalama yotiivii JW? Oku na uuyelele owundji!’ Natu taleni kethaneko ndika: Natu tye nduno morestolanda yontumba omu na iikulya ya yoolokathana. Aalandi itaya vulu okulya iikulya ayihe mbyoka yi li mo. Onkene ohaya hogolola po owala yimwe. Sha faathana, ngele iho vulu okulesha nokutala uuyelele awuhe mboka wu li kepandja lyetu lyokointaneta, ino teka omukumo. Lesha nokutala mbyoka to vulu. Ngashingeyi natu ka kundathaneni kutya okukonakona okwa kwatela mo shike naashoka tatu vulu okuninga, opo tu mone mo uuwanawa.

8. Oshike wu na okuninga, uuna to konakona Oshungolangelo, nongiini oku shi ninga taku vulu oku ku etela uuwanawa?

⁸ Okukonakona otaku ti okulesha oshinima shontumba wi itula mo nonelalakano lyokwiilonga mo sha. Kaku shi owala okulesha to endelele nokutenda omayamukulo. Pashiholelwa, uuna to ilongekidha Oshungolangelo yokukonakonwa, tango lesha elalakano lyoshitopolwa ndyoka li li petameko. Okuza mpono, lesha oshipalanyolo shoshitopolwa, uupalanyolo uushona nomapulo geendululo. Opo nduno, lesha oshitopolwa to ende kashona nonuukeka. Gandja eitulomo ketumbulo kehe li li petameko lyokatendo, oshoka otali ku kwathele wu mone kutya okatendo otaka popi kombinga yashike. Olundji etumbulo lyotango mokatendo, ohali ku ulukile kutya oshike tashi kundathanwa mokatendo. Sho to lesha oshitopolwa, tala nkene okatendo kehe taka ambidhidha okapalanyolo nosho wo oshipalanyolo shoshitopolwa. Ndhindhilika iitya mbyoka kuu shi nawa nomautumbulilo ngoka wa hala okuuva ko nawa moku ka ninga omapekapeko.

9. (a) Omolwashike nongiini tu na okugandja eitulomo komanyolo, unene tuu sho tatu konakona Oshungolangelo? (b) Ngaashi sha popiwa muJosua 1:8, oshike ishewe tu na okuninga kakele kokulesha omanyolo?

 ⁹ Okukonakona Oshungolangelo ohaku tu kwathele tu uve ko Ombiimbeli. Onkene gandja eitulomo komanyolo, unene tuu ngoka taga ka leshwa, sho Oshungolangelo tayi ka kundathanwa megongalo. Ndhindhilika nkene iitya nenge omautumbulilo ngoka ge li momanyolo, taga ambidhidha enenedhiladhilo lyokatendo. Shimwe ishewe, kutha ethimbo wu tedhatedhe komanyolo ngoka wa lesha nankene to vulu oku ga tula miilonga monkalamwenyo yoye. — Lesha Josua 1:8.

10. Shi ikolelela kAahebeli 5:14, omolwashike aavali ye na okulongitha ethimbo lyontumba pekonakonombiimbeli lyuukwanegumbo, ya longe oyana nkene ye na okukonakona nokuninga omapekapeko?

¹⁰ Odhoshili kutya aavali ohaya kala ya hala oyana ya tyapule Elongelokalunga lyUukwanegumbo oshiwike kehe. Nonando aavali ohaya kala ye na momadhiladhilo shoka tashi ka kundathanwa po, inaya pumbwa okukala ye uvite kutya oye na okulongekidha iinima yi ikalekelwa notayi nyanyudha kehe ethimbo. Ngele uukwanegumbo otawu tala opolohalama yotiivii JW pElongelokalunga lyUukwanegumbo ndjoka hayi piti omwedhi kehe nenge tawu ningi sha shilwe shi ikalekelwa, ngaashi okuninga oproyeka yontumba pamwe, pashiholelwa yokutunga onguluwato yaNoa, osha simana wo aanona ya longwe nkene ye na okukonakona. Pashiholelwa, aanona oye na okwiilonga nkene ye na okwiilongekidhila omakugongala nenge nkene ye na okuninga omapekapeko kombinga yaashoka tashi vulika ya pulwa kosikola. (Lesha Aahebeli 5:14.) Ngele omathimbo gamwe kegumbo ohaya konakona iinima ya kankamena kOmbiimbeli, otashi ka kala oshipu kuyo ya gandje eitulomo kwaambyoka tayi kundathanwa pokugongala nopiigongi iishona niinene, mbyoka tashi vulika aluhe yi kale inaayi kwatela mo uuvidio. Odhoshili kutya aanona oye na okukonakona uule wethimbo lya eleka, shi ikolelela komimvo dhawo nokiikala yawo.

11. Omolwashike sha simana tu longe aakonakonimbiimbeli yetu nkene ye na okukonakona muule paumwene?

¹¹ Aakonakonimbiimbeli yetu nayo oya pumbwa wo okwiilonga nkene ye na okukonakona. Sho opo taya tameke okukonakona Ombiimbeli, ohatu kala twa nyanyukwa okumona nkene yi ilongekidhila ekonakonombiimbeli lyawo nenge okugongala, uuna ya tenda omayamukulo. Ihe otwa pumbwa oku ya longa nkene ye na okuninga omapekapeko nankene ye na okukonakona Ombiimbeli muule. Kungawo, uuna ya adhika komaupyakadhi, otaya ka vula okukonga uuyelele mboka tawu ya kwathele, mokuninga omapekapeko miileshomwa yetu kuyo yene, pehala lyokutondokela kuyalwe megongalo.

12. Omalalakano geni twa pumbwa okukala tu na, uuna tatu konakona?

¹² Ngele ku hole okukonakona, otashi vulika wu dhiladhile kutya ito vulu okunyanyukilwa oku shi ninga. Ihe oto vulu. Oto vulu okutameka okukonakona uule wethimbo efupi, nomokweendela ko kwethimbo, to gwedha ko kethimbo lyoye. Kala wu shi kutya oto konakonene shike. Odhoshili kutya elalakano lyetu lya simanenena, okuhedha popepi naJehova. Otatu vulu wo okukonakona nziya kombinga yepulo ndjoka twa pulwa komuntu gwontumba nenge tu ninge omapekapeko kombinga yuupyakadhi mboka tu na.

13. (a) Popya oonkatu ndhoka omugundjuka ta vulu okukatuka a yelithile yalwe kosikola eitaalo lye. (b) Ongiini to vulu fokutula miilonga omayele ngoka ge li mAakolossa 4:6?

¹³ Pashiholelwa, mbela ngoye omugundjuka natango wu li mosikola? Aalongwa yomongundu yeni otashi vulika ayehe ya kale yi itaala melongo lyoevolusi. Otashi vulika wu kale wa hala wu ya lombwele kombinga yaashoka Ombiimbeli tayi ti, ihe otashi vulika wu kale wu uvite kutya ito vulu oku shi ninga. Onkee ano, shika otashi pula wu ninge ekonakono lyomuule. Oto vulu okukala wu na omatompelo gaali goku shi ninga: (1) okukala wa tompwa lela kutya Kalunga oye a shita iinima ayihe (2) okwiilonga nkene wu na okupopila oshili yOmbiimbeli. (Rom. 1:20; 1 Pet. 3:15) Tango oto vulu okwiipula to ti: ‘Omatompelo geni aalongwa yomongundu yetu haya gandja, uuna taya popile oevolusi?’ Opo nduno, ninga omapekapeko nuukeka miileshomwa yetu kombinga yelongo lyoevolusi. Otashi vulika wu ka mone kutya okupopila eitaalo lyoye kaku shi okudhigu, ngaashi wa li to dhiladhila. Aantu oyendji oyi itaala moevolusi, molwaashoka ya lombwelwa kugumwe ngoka ya simaneka kutya oyoshili. Ngele owa mono po oshitsa shimwe nenge iyali, otashi vulika wu ka gandje eyamukulo tali mbilipaleke kwaangoka a hala okutseya oshili. — Lesha Aakolossa 4:6.

14-16. (a) Oshike to vulu okuninga, opo wu ilonge oshindji kombinga yemboMbiimbeli ndyoka kuu shi nawa? (b) Omanyolo ngoka ge etwa mo, otage ku kwathele ngiini wu uve ko nawa uuyelele kombinga yembo lyaAmos? (Tala wo oshimpungu “ Ombiimbeli nayi kale tayi ti sha kungoye.”)

¹⁴ Natu tye nduno pokugongala kwetu taku landula, otatu ka kundathana limwe lyomomamboMbiimbeli omafupi, ngoka taga popi kombinga yomahunganeko. Oshinima shotango shoka to vulu okuninga, okukokeka ehalo lyoye lyokutseya oshindji kombinga yaashoka omuhunganeki ngoka a nyola. Ongiini to vulu oku shi ninga?

¹⁵ Shotango, ipula to ti: ‘Oshike ndi shi kombinga yomunyoli gwembo ndika? Oye lye, okwa li ha zi peni nokwa li ha longo shike?’ Eputuko lye, otali vulu oku tu kwathela tu uve ko kutya omolwashike a longitha iitya nenge omathaneko gontumba. Sho to lesha Ombiimbeli, tala kuutumbulilo mboka tawu ulike kutya omunyoli ngoka okwa li omuntu a tya ngiini.

¹⁶ Oshitiyali, okutseya kutya embo lyontumba olya nyolwa uunake, oshi li ekwatho enene. Oto vulu oku shi ninga mokutala oshimpungu “Table of the Books of the Bible” shi li konima yOmbiimbeli yo-New World Translation of the Holy Scriptures. Oto vulu wo okutala moshimpungu shaahunganeki naakwaniilwa, mokambo Ekwatho kungoye wu ilonge Oohapu dhaKalunga, pepandja 14-17. Ngele emboMbiimbeli ndyoka to konakona otali popi kombinga yomahunganeko, oshi li nawa wu mone nkene oonkalo dha li pethimbo tali nyolwa. Omuhunganeki ngoka okwa li a hala aantu ya ethe po iikala nenge iilonga yawo iiwinayi yini? Okwa li ko pethimbo limwe noolye? Opo wu mone uuyelele awuhe, otashi vulika wa pumbwa okutala ishewe momambo galwe gOmbiimbeli. Pashiholelwa, ngele owa hala okuuva ko nawa kutya oshike sha li sha ningwa pethimbo lyomuhunganeki Amos, oto ka mona uuwanawa, ngele owa tala oovelise dhimwe ndhoka  dha pambathana naAmos 1:1, membo lyAakwaniilwa aatiyali nomOndjalulo ontiyali. Shimwe ishewe, oto vulu okutala membo lyaHosea, ngoka tashi vulika naye a li ko pethimbo limwe naAmos. Omambo agehe ngoka otage ke ku pa uuyelele kombinga yethimbo ndyoka Amos a li ko. — 2 Aak. 14:25-28; 2 Ondjal. 26:1-15; Hos. 1:1-11; Amos 1:1.

17-18. Longitha iiholelwa mbyoka yi li li muutendo nenge shoye mwene, wu yelithe kutya omolwashike okukonenena uuyelele uushona, taku vulu okuningitha ekonakonombiimbeli lyopaumwene li kale ehokithi.

¹⁷ Uuna to lesha Ombiimbeli, onawa wu kale wu na lela ehalo lyokwiilonga oshindji. Pashiholelwa, natu tye nduno oto lesha ontopolwa 12 yehunganeko lyaSakaria, ndjoka tayi popi kombinga yeso lyaMesiasa. (Sak. 12:10) Sho we ya povelise 12, owa lesha mo “ezimo lya za muNatan” tali ka lila oosa dhaMesiasa. Pehala lyokweenda po owala piitya mbyoka, oto vulu okumwena po, e to ipula to ti: ‘Ezimo lya za muNatan olya kwatathana ngiini naMesiasa? Mbela opu na omukalo gwontumba tandi vulu okulongitha ndi mone uuyelele wa gwedhwa po?’ Opo nduno, owa tokola wu shi konakone muule. Owa mono kutya enyolo ndyoka lya pambathana naSakaria 12:12, oSamuel omutiyali 5:13, 14, moka mwa popiwa kutya Natan okwa li omwanamati gwomukwaniilwa David. Enyolo limwe lya pambathana novelise ndjoka, oLukas 3:23, 31, ndhoka tadhi holola kutya Jesus okwa za mezimo lyaNatan, hekulululwa yaMaria. (Tala “omuna gwaJosef yaEli,” uuyelele wokukonakonwa wa kankamena kuLukas 3:23.) Okuza mpono, owa tameke okukala wa hala okuuva oshindji! Owa kala wu shi kutya Jesus okwa hunganekwa a li ta ka za mezimo lyaDavid. (Mat. 22:42) Ihe David okwa li e na oyanamati ye vulithe 20. Mbela shoka itashi kumitha, sho Sakaria a popi kombinga yezimo lyaNatan kondandalunde kutya oli na etompelo lyokulila oosa dhaJesus?

 ¹⁸ Natu taleni koshiholelwa shilwe. Montopolwa yotango yaLukas, otatu lesha mo kutya omuyengeli Gabriel okwa li a talele po Maria, e te mu lombwele uuyelele wu na ko nasha nokanona hoka a li ta ka vala. Okwa ti: “Oye ta ningi omunene e ti ithanwa Omuna gwaKalunga gwokombandambanda. Omuwa Kalunga ote mu ningi omukwaniilwa ongaashi he David. Oye ta ningi omukwaniilwa gwoluvalo lwaJakob sigo aluhe.” (Luk. 1:32, 33) Otashi vulika tu kale tu na egamo lyokugandja owala eitulomo koshitopolwa shotango shetumwalaka lyaGabriel, shoka tashi ti kutya Jesus ote ki ithanwa “Omuna gwaKalunga gwokombandambanda.” Ihe Gabriel okwa li wo a hunganeke kutya Jesus ota ka ‘ninga omukwaniilwa.’ Onkee ano, ohatu ipula nkene Maria a li a tala ko oohapu ndhoka dha popiwa kuGabriel. Mbela okwa li e dhi tala ko kutya otadhi ti Jesus ota ka pingena po omukwaniilwa Herodes nenge gumwe gwomwaamboka ya li taya ka pingena po Herodes? Andola Jesus okwa ningile omukwaniilwa, ando Maria oye a ningi yina yomukwaniilwa, nuukwanegumbo we andola owa ka kala hawu zi mombala. Nonando ongawo, mOmbiimbeli inamu nyolwa nando kutya Maria okwa li a lombwele Gabriel oohapu dha tya ngaaka nenge kutya Maria okwa li a pula a pewe ondondo mUukwaniilwa, ngaashi aalongwa yaJesus yaali ya li ye shi ningi. (Mat. 20:20-23) Uuyelele mbuka otawu tu kwathele tu mone kutya Maria okwa li lela omukiintu omwiifupipiki!

19-20. Ngaashi sha popiwa muJakob 1:22-25 nosho wo 4:8, uuna tatu konakona, omalalakano getu oge na okukala geni?

¹⁹ Natu dhimbulukwe kutya elalakano lyetu lya simanenena lyokulesha Oohapu dhaKalunga niileshomwa yetu, okuhedha popepi naJehova. Otwa hala wo okumona kutya ‘otwa tya ngiini’ nosho wo omalunduluko ngoka twa pumbwa okuninga, opo tu nyanyudhe Kalunga. (Lesha Jakob 1:22-25; 4:8.) Petameko lyekonakono kehe, otu na okupula Jehova e tu pe ombepo ye ondjapuki. Otu na oku mu indila e tu kwathele tu mone mo uuwanawa mwaashoka tatu konakona notwi itale ko ngaashi ye he tu tala ko.

²⁰ Atuheni natu kaleni ngaashi aapiya yaKalunga mboka ya popiwa komupisalomi, a ti: “Ohaa nyanyukilwa okuvulika kompango yOmuwa nohaye yi ilongo omutenya nuusiku. . . . Ashihe shoka taye shi longo otashi eta eyambeko.” — Eps. 1:2, 3.