1. Otatu vulu okukala nuushili kombinga yiinima iyali yini?

JEHOVA KALUNGA oku hole oshigwana she. Oku shi hole nota tsikile okukala e shi hole. Oku hole wo uuyuuki. (Eps. 33:5) Onkee ano, otatu vulu okukala tu na uushili kombinga yiinima iyali: (1) Ohashi uvitha nayi Jehova, uuna a tala aapiya ye taya ungaungiwa nayo kaashi li pauyuuki. (2) Okwa uvaneka kutya aapiya ye itaya ka ungaungiwa nayo nayi sigo aluhe nonokutya ota ka geela mboka haye ya ningile okwaanuuyuuki. Moshitopolwa shotango shomiitopolwa * mbika, otwi ilonga kutya Ompango ndjoka Kalunga a li a pe Aaisraeli okupitila muMoses, oya li ya kankamena kohole. Oya li ya humitha komeho uuyuuki, ano okuningila uuyuuki aantu ayehe, nokuli naamboka itaaya vulu okwiipopila. (Deut. 10:18) Ompango ndjoka oya ulika kutya Jehova oku na ko nasha lela naapiya ye.

2. Omapulo geni tatu ka yamukula?

² Ompango yaMoses oya hulile mo 33 E.N., sho egongalo lyopaKriste lya totwa po. Mbela Aakriste oya li itaaya ka mona mo uuwanawa mompango ndjoka ompe ya kankamena kohole notayi humitha komeho uuyuuki? Hasho nando! Aakriste oya pewa ompango ompe. Moshitopolwa shika, otatu ka kundathana kutya ompango ndjoka oyini. Opo nduno, otatu ka yamukula omapulo ngaka: Omolwashike tatu vulu okutya ompango ndjika oya kankamena kohole? Omolwashike tatu vulu okutya otayi humitha komeho uuyuuki? Kohi yompango ndjika, mboka ye na oonkondopangelo oye na okuungaunga nayalwe ngiini?

3. Oshike sha kwatelwa ‘mompango yaKristus’ ndjoka ya popiwa mAagalati 6:2?

³ Lesha Aagalati 6:2. Aakriste oye li kohi ‘yompango yaKristus.’ Jesus ina nyolela aalanduli ye omusholondondo gwoompango, ihe okwe ya pe omayele, omalombwelo nosho wo omakotampango ge ya wilike. “Ompango yaKristus” oya kwatela mo ashihe shoka Jesus a longo aantu. Opo wu uve ko ompango ndjika, tala kwaashoka tashi landula.

4-5. Omomikalo dhini Jesus a li a longo aantu, nokwa li e shi ningi ethimbo lini?

⁴ Jesus okwa li a longo aantu momikalo dhini? Shotango, okwa li a longo aantu okupitila mwaashoka a popi. Oohapu dhe odha li dhi na oonkondo, molwaashoka okwa li a popi oshili kombinga yaKalunga, okwa li a longo kutya eityo lyashili lyonkalamwenyo olini nokwa li a popi Uukwaniilwa waKalunga kutya owo owala wu li ekandulopo lyomaupyakadhi gaantu agehe. (Luk. 24:19) Jesus okwa li wo a longo aantu okupitila miilonga ye. Okwa li a ulukile aalanduli ye nkene ye na okukala, okupitila moshiholelwa she. — Joh. 13:15.

⁵ Ethimbo lini Jesus a li a longo aantu? Opethimbo lyuukalele we kombanda yevi. (Mat. 4:23) Okwa li wo a longo aalanduli ye konima owala sho a yumudhwa. Pashiholelwa, okwa li i ihololele ongundu yaalongwa ye, tashi vulika ye vulithe po 500, e te ya lombwele ya ‘ninge aantu aalongwa.’ (Mat. 28:19, 20; 1 Kor. 15:6) E li omutse gwegongalo, Jesus okwa tsikile okulonga aalongwa ye konima sho a shuna megulu. Pashiholelwa, lwopomumvo 96 E.N., Kristus okwa li a wilike omuyapostoli Johannes a tse omukumo Aakriste aagwayekwa noku ya pe omayele. — Kol. 1:18; Eh. 1:1.

6-7. (a) Omalongo gaJesus oga nyolwa peni? (b) Ohatu vulika ngiini kompango yaKristus?

⁶ Omalongo gaJesus oga nyolwa peni? MOmavaangeli gane omu na iinima oyindji mbyoka Jesus a popi nokwa ningi, sho a li kombanda yevi. Omanyolo gopaKriste gOshigreka agehe, otage tu kwathele tu uve ko nkene Jesus ha tala ko iinima, oshoka oga nyolwa kaalumentu mboka ya li ya wilikwa kombepo ondjapuki noya li ye na “omadhiladhilo gaKristus.” — 1 Kor. 2:16.

⁷ Iiyilongomwa: Omalongo gaJesus otage tu kwathele monkalamwenyo yetu ayihe. Onkee ano, ompango yaKristus ohayi tu wilike mukehe shoka tatu ningi megumbo, kiilonga, kosikola  nomegongalo. Ompango ndjika ohatu yi ilongo, mokulesha Omanyolo gopaKriste gOshigreka nokutedhatedha kugo. Ohatu vulika kompango ndjika, mokukaleka onkalamwenyo yetu metsokumwe nomalongo, nomalombwelo nosho wo nomakotampango ngoka ge li mOmanyolo ngoka. Uuna tatu vulika kompango yaKristus, otatu vulika kuKalunga ketu omunahole, Jehova, ngoka oye Onzo yaashihe shoka Jesus a longo. — Joh. 8:28.

8. Ompango yaKristus oya kankamena kushike?

⁸ Aantu mboka ye li megumbo lya tungilwa kekankameno lya kola, ohaya kala ye uvite ya gamenwa. Sha faathana, mboka haya vulika kompango ombwanawa ndjoka ya kankamena kekankameno lya kola, ohaya kala ye uvite ya gamenwa. Ompango yaKristus oya kankamena kekankameno lya kola, ano kohole. Omolwashike tatu tile ngawo?

9-10. Iiholelwa yini tayi ulike kutya Jesus okwa li i inyengithwa kohole, nongiini tatu vulu oku mu holela?

⁹ Shotango, Jesus okwa li i inyengithwa kohole mukehe shimwe shoka a li a ningi. Olukeno nenge ohenda, ohayi ulike kutya omuntu oku na ohole. Jesus okwa li i inyengithwa kolukeno a longe ongundu yaantu, a aludhe aavu, a paluthe mboka ya sa ondjala noku yumudhe aasi. (Mat. 14:14; 15:32-38; Mark. 6:34; Luk. 7:11-15) Nonando okuninga iinima mbyoka okwa li kwe mu pula ethimbo noonkondo dhe, Jesus okwa li a pititha oompumbwe dhayalwe komeho yoompumbwe dhe. Shoka sha dhenga mbanda, Jesus okwa ulike ohole onene, sho e tu sile. — Joh. 15:13.

¹⁰ Iiyilongomwa: Otatu vulu okuholela Jesus, mokupititha oompumbwe dhayalwe komeho yoompumbwe dhetu. Otatu vulu wo oku mu holela, mokukala tu uvitile aantu yomoshitopolwa shetu olukeno. Uuna tatu inyengithwa kolukeno tu uvithile aantu notu ya longe onkundana ombwanawa, kungawo otatu vulika kompango yaKristus.

11-12. (a) Oshike tashi ulike kutya Jehova oku na ko nasha lela natse? (b) Ongiini tatu vulu okuholela ohole yaJehova?

¹¹ Oshitiyali, Jesus okwa li a ulike ohole yaHe. Pethimbo a li ta uvitha, okwa ulike nkene Jehova e na ko nasha lela naapiya ye. Shimwe shomiinima mbyoka a li a longo aantu, ongaashi: Kehe gumwe gwomutse oku na ondilo nongushu momeho gaTate yetu gwomegulu. (Mat. 10:31) Jehova oha kala a nyanyukwa noonkondo okutaamba ko onzi ndjoka ya li ya kana, e tayi iyele ombedhi nokugalukila kegongalo. (Luk. 15:7, 10) Jehova okwa ulike kutya oku tu hole, sho a gandja Omwana e tu kulile. — Joh. 3:16.

¹² Iiyilongomwa: Ongiini tatu vulu okuholela ohole yaJehova? (Ef. 5:1, 2) Ohatu tala ko aamwatate naamwameme ye na ongushu nondilo, nohatu taamba ko nomaako agehe ‘onzi ndjoka ya li ya kana’ e tayi galukile kuJehova. (Eps. 119:176) Ohatu ulike kutya otu hole aamwatate naamwameme, mokulongitha ethimbo lyetu noonkondo dhetu, tu ya kwathele. (1 Joh. 3:17) Uuna tatu ungaunga nayalwe momukalo gwopahole, otatu vulika kompango yaKristus.

13-14. (a) Ngaashi sha popiwa muJohannes 13:34, 35, Jesus okwa lombwela aalanduli ye ya ulike shike, nomolwashike shi li oshipango oshipe? (b) Ohatu vulika ngiini koshipango shoka?

¹³ Oshititatu, Jesus okwa lombwele aalanduli ye ya kale ye na ohole yokwiiyamba. (Lesha Johannes 13:34, 35.) Oshipango shaJesus shokuhola aamwatate naamwameme ngaashi Jesus e tu hole, oshipe. Omolwashike? Omolwaashoka otashi tu pula tu ulike ohole momukalo ngoka kaagwa li gwa tegelelwa kohi yOmpango ndjoka Kalunga a li a pe Aaisraeli. Shoka otashi tu pula tu kale tu na ohole yokwiiyamba. * Otu na okukala tu hole aamwatate naamwameme shi vulithe nokuli putse yene. Natu kale tu ya hole sigo  oposhitsa shokusa pehala lyawo, ngaashi Jesus e shi tu ningila.

¹⁴ Iiyilongomwa: Ongiini tatu vulu okuvulika koshipango oshipe? Omokwiiyamba, opo tu kwathele aamwatate naamwameme. Itatu ke yi iyambela owala miinima iinene ngaashi okusa pehala lyawo, ihe nomiinima wo iishona. Pashiholelwa, uuna tatu ningi oonkambadhala tu faalele omumwatate nenge omumwameme omukokele kokugongala, nenge uuna tatu yamba po shoka tu hole, opo tu nyanyudhe gulwe, nenge uuna tatu yamba po ethimbo lyetu lyefudho lyiilonga, opo tu ka kwathele mboka ya dhengwa kiiponga yopaunshitwe, otatu vulika kompango yaKristus. Ohatu kwathele wo mokukaleka egongalo lyetu li kale ehala moka kehe gumwe ta vulu okukala e uvite a gamenwa.

15-17. (a) Oonkatu dhaJesus odha ulike kutya okwa tala ko ngiini uuyuuki? (b) Ongiini tatu vulu okuholela Jesus?

¹⁵ Uutumbulilo “uuyuuki” mboka wa longithwa mOmbiimbeli, otawu ti kutya okuninga shoka Kalunga ta ti osha uka noku shi ninga nopwaa na okatongo. Omolwashike tatu vulu okutya ompango yaKristus ohayi humitha komeho uuyuuki?

¹⁶ Shotango, tala nkene oonkatu dhaJesus dha ulike kutya okwa tala ko ngiini uuyuuki. Pethimbo lye, aawiliki yelongelokalunga lyOshijuda oya li ye tonde mboka kaaye shi Aajuda, oya li ya dhina Aajuda mboka inaaya longwa nosho wo aakiintu. Nonando ongawo, Jesus okwa li ha ungaunga naantu ayehe nawa noka li he ya ningi okatongo. Mboka ya li kaaye shi Aajuda noyi itaala muye, okwa li e ya taamba ko. (Mat. 8:5-10, 13) Okwa li a uvithile aantu ayehe nopwaa na okatongo, aayamba noohepele. (Mat. 11:5; Luk. 19:2, 9) Ka li nando ha ungaunga naakiintu nonyanya. Pehala lyaashono, okwa li e ya simaneka noha ungaunga nayo nombili, mwa kwatelwa mboka ya li ya talika ko yaa na oshilonga. — Luk. 7:37-39, 44-50.

¹⁷ Iiyilongomwa: Otatu vulu okuholela Jesus, mokuungaunga nayalwe kaatu na okatongo nokuuvithila ayehe mboka ye na ehalo lyoku tu pulakena, kashi na nduno mbudhi kutya aayamba, oohepele nenge oyelongelokalunga lini. Aalumentu Aakriste ohaye mu holele, mokuungaunga naakiintu nesimaneko. Uuna tatu ningi ngawo, otatu vulika kompango yaKristus.

18-19. Jesus okwa longo aantu shike kombinga yuuyuuki, notatu ilongo mo shike?

¹⁸ Oshitiyali, tala shoka Jesus a li a longo kombinga yuuyuuki. Okwa li a longo aalanduli ye omakotampango ngoka ga li tage ke ya kwathela ya ungaunge nawa nayalwe. Pashiholelwa, dhiladhila kombinga yekotampango lyaJesus lya tseyika nawa. (Mat. 7:12) Odhoshili kutya atuheni otwa hala okuungaungiwa natse nawa. Onkee ano, otu na okuungaunga nayalwe nawa. Ngele otwe shi ningi, otashi vulika shi ke yi inyengithe ya ungaunge wo natse nawa. Ihe ongiini ngele otwa ungaungiwa natse kaashi li pauyuuki? Jesus okwa li wo a longo aalanduli ye ya kale ye na einekelo kutya Jehova ota ka ‘uthila aahogololwa uuyuuki mboka haye mu ithana omutenya nuusiku.’ (Luk. 18:6, 7) Oohapu ndhoka odhi li euvaneko kutya Kalunga ketu omuyuuki, oku wete omashongo ngoka hatu kala twa taalela momasiku ngaka gahugunina, nota ka ukitha iinima pethimbo lye lyo opala. — 2 Tes. 1:6.

¹⁹ Iiyilongomwa: Ngele otwa kala tatu vulika komakotampango ngoka Jesus a longo, otage ke tu kwathela tu ungaunge nayalwe pauyuuki. Ngele otwa ningilwa okwaanuuyuuki muuyuni mbuka waSatana, otatu vulu okuhekelekwa mokutseya kutya Jehova ote ke tu uthila uuyuuki we.

20-21. (a) Mboka ye na oonkondopangelo oye na okuungaunga ngiini nayalwe? (b) Omusamane ota vulu ngiini okuulika ohole yokwiiyamba, noku na okuungaunga ngiini noyana?

²⁰ Metsokumwe nompango yaKristus, mboka ye na oonkondopangelo oye na okuungaunga  ngiini nayalwe? Molwaashoka ohole oyo ekankameno lyompango ndjoka, mboka ye na oonkondopangelo oye na okuungaunga naamboka ye li kohi yetonatelo lyawo pahole nonesimaneko. Oye na okudhimbulukwa kutya Kristus okwa hala tu ulike ohole mukehe shoka tatu ningi.

²¹ Muukwanegumbo. Omusamane oku na okukala e hole omukulukadhi gwe “ngashika Kristus e hole egongalo.” (Ef. 5:25, 28, 29) Omusamane oku na okuholela ohole yokwiiyamba yaKristus, mokupititha komeho oompumbwe dhomukulukadhi gwe. Aalumentu yamwe otashi vulika haye shi mono oshidhigu okuulika ohole ndjoka, molwaashoka otashi vulika ya za meputuko moka okuungaunga nawa nayalwe kwa talika ko inaaku simana. Otashi vulika shi kale oshidhigu kuyo okweetha po iikala mbyoka iiwinayi, ihe oye na okuninga omalunduluko, opo ya vulike kompango yaKristus. Omusamane ngoka ha ulike ohole yokwiiyamba, oha kala a simanekwa komukulukadhi gwe. Omusamane ngoka e hole oyana shili, ke na esiku a popye nenge a ninge oshinima shoka tashi ya ehameke. (Ef. 4:31) Pehala lyaashono, ohe ya ulukile ohole momukalo ngoka tagu ya ningitha ya kale ye uvite ya gamenwa. Omusamane a tya ngawo, oha kala e holike nokwi inekelwa koyana.

22. Ngaashi sha popiwa muPetrus gwotango 5:1-3, “oonzi” odhalye, nodhi na okuungaungiwa nadho ngiini?

²² Megongalo. Aakuluntugongalo oye na okudhimbulukwa kutya “oonzi” kadhi shi dhawo. (Joh. 10:16; lesha 1 Petrus 5:1-3.) Uutumbulilo ‘oshigunda shoka mwe shi pewa kuKalunga,’ ‘ehalo ewanawa’ nosho wo “mboka ya tulwa metonatelo lyeni,” otawu dhimbulukitha aakuluntugongalo kutya oonzi odhaJehova. Jehova okwa hala oonzi dhe dhi ungaungiwe nadho pahole nonolukeno. (1 Tes. 2:7, 8) Aakuluntugongalo mboka haya gwanitha po oshinakugwanithwa shawo pahole ye li aasita yoonzi dhe, Jehova oha kala e ya hokwa. Ohaya kala wo ye holike noya simanekwa kaamwatate naamwameme.

23-24. (a) Onkandangala yini aakuluntugongalo haya dhana, uuna taya ungaunga nomayono ga kwata miiti? (b) Uuna taya ungaunga nomayono ngoka, oye na okukaleka shike momadhiladhilo?

 ²³ Onkandangala yini aakuluntugongalo haya dhana, uuna taya ungaunga nomayono ga kwata miiti? Onkandangala ndjoka oya yooloka ko kwaandjoka ya li hayi dhanwa kaatokolihapu nokaakuluntu mboka ya li kohi yOmpango ndjoka Kalunga a li a pe Aaisraeli. Kohi yOmpango ndjoka, aalumentu mboka ya li ya langekwa po, kaya li owala haya ungaunga niinima mbyoka ya pambathana nokulongela Jehova, ihe oniinima yilwe wo. Ihe kohi yompango yaKristus, aakuluntugongalo ohaya ungaunga owala nomayono ngoka ge na ko nasha nokulongela Jehova. Oya ndhindhilika kutya aakwanepangelo oya pewa oshinakugwanithwa kuKalunga shokuungaunga niipotha yi na ko nasha naakwashigwana nosho wo naalongi yomiyonena. Shoka osha kwatela mo oku ya pa egeelo, ngaashi oku ya futitha nenge oku ya tula mondholongo. — Rom. 13:1-4.

²⁴ Aakuluntugongalo ohaya ungaunga ngiini naangoka a yona e yono lya kwata miiti? Ohaya longitha Omanyolo ya konakone oshinima shoka, opo nawa ya ninge etokolo. Ohaya kaleke momadhiladhilo kutya ohole oyo ekankameno lyompango yaKristus. Ohole ohayi inyengitha aakuluntugongalo ya tale kutya: Oya pumbwa okuninga shike, opo ya kwathele kehe gumwe megongalo ngoka a gumwa keyono ndyoka? Shi na ko nasha naangoka a yona, ohole ohayi inyengitha aakuluntugongalo ya tale komapulo ngaka: Mbela okwi iyela ngaa ombedhi? Mbela otatu vulu oku mu kwathela a kale ishewe e na ekwatathano ewanawa naJehova?

25. Oshike tatu ka kundathana moshitopolwa tashi landula?

²⁵ Inatu pandula tuu sho tu li kohi yompango yaKristus! Uuna kehe gumwe gwomutse ta longo nuudhiginini a vulike kompango ndjoka, ohatu ningitha egongalo li kale ehala moka kehe gumwe ta vulu okukala e uvite e holike, a lengwa nokwa gamenwa. Nonando ongawo, otu li muuyuni moka “aakolokoshi” taya humu komeho “muuwinayi.” (2 Tim. 3:13) Onkee ano, natu kale twa tonata. Ongiini egongalo lyopaKriste tali vulu okuulika uuyuuki waKalunga, uuna tali ungaunga nokuhepekwa kwaanona pamilalo? Epulo ndyoka otali ka yamukulwa moshitopolwa tashi landula.