1-2. (a) Oshiholelwa shini tashi ulike kutya aantu oya valwa nompumbwe yokuhekelekwa noyokuhekeleka yalwe? (b) Aanona yamwe ohaya ehamekwa ngiini?

AANTU oya valwa ye na ompumbwe yokuhekelekwa noyokuhekeleka yalwe. Pashiholelwa, uuna okanona taka dhana e taki ihata po nokuninga oshilalo mongolo, otashi vulika ka matukile kuyina nenge kuhe, taka lili. Aavali itaya vulu okwaaludha oshilalo shako, ihe otaya vulu oku ka hekeleka. Otashi vulika ye ka pule kutya oka ningwa shike, ye ka mwenithe, ya popye nako nombili, ye ka ulukile ohole mokutula po omuti poshilalo nenge ya mange po. Nziya konima yaashono, okanona ohaka mwena notashi vulika ka tsikile okudhana. Mokweendela ko kwethimbo, oshilalo ohashi ka aluka.

² Omathimbo gamwe, aanona ohaye ehamekwa momikalo omiwinayi dha yoolokathana. Pashiholelwa, yamwe oya hepekwa pamilalo. Okanona otaka vulu okuhepekwa pamilalo lumwe nenge iikando oyindji, uule womimvo. Kutya nduno oka hepekwa iikando ingapi, ohaka tsikile okukala ke uvite nayi pamadhiladhilo uule wethimbo nenge nokuli onkalamwenyo yako ayihe. Poompito dhimwe, ngoka e ka hepeka oha kwatwa e ta geelwa. Pudhilwe, ohashi vulika a kale a fa itaa geelwa. Nokuli nonando oku geelwe, okanona hoka ohaka tsikile okumona iihuna, tashi vulika sigo omuukuluntu.

3. Ngaashi sha popiwa mAakorinto aatiyali 1:3, 4, ehalo lyaJehova olini, nomapulo geni tatu ka kundathana?

³ Ngele opu na Omukriste ngoka a li a hepekwa pamilalo pethimbo okanona, ihe natango sho a koka ota kondjo nuuwehame wopamaiyuvo, oshike tashi vulu oku mu kwathela? (Lesha 2 Aakorinto 1:3, 4.) Osha yela kutya oshi li ehalo lyaKalunga oonzi dhe dhi ulukilwe ohole nodhi hekelekwe. Onkee ano, natu ka taleni komapulo gatatu: (1) Omolwashike mboka ya hepekwa pamilalo pethimbo aanona, ya pumbwa ehekeleko? (2) Oolye taya vulu oku ya  pa ehekeleko ndyoka ya pumbwa? (3) Ongiini tatu vulu oku ya hekeleka nomupondo?

4-5. (a) Omolwashike sha simana okutseya kutya aanona oya yooloka ko kaakuluntu? (b) Uuna okanona ka hepekwa pamilalo, ohashi gumu ngiini einekelo lyako muyalwe?

⁴ Aantu yamwe mboka ya hepekwa pamilalo sho ya li aanona, natango otashi vulika ya pumbwa okuhekelekwa, nonando opwa pita omimvo odhindji. Omolwashike? Opo tu shi uve ko, otu na okudhimbulukwa kutya aanona oya yooloka ko lela kaakuluntu. Olundji, okuhepekwa pamilalo ohaku gumu okanona momukalo gwa yooloka ko kwaangoka omukuluntu hi inyenge, uuna a ningwa nayi. Natu ka taleni kiiholelwa tayi landula.

⁵ Aanona oya pumbwa okukala ye na ekwatathano lyopothingo naamboka ye ya putudha notaye ya sile oshimpwiyu, nokukala ye ya inekela. Ekwatathano ewanawa ndyoka, ohali ningitha aanona ya kale ye uvite ya gamenwa noku ya kwathela ya kale yi inekela mboka ye ya hole. (Eps. 22:9) Shiyemateka, olundji aanona ohaya hepekwa pamilalo maandjawo, kaakwanezimo nosho wo kookuume kaantu yaandjawo. Shoka ohashi ya ningitha kaaya kale yi inekela aantu yalwe, nokuli nokonima yomimvo.

6. Omolwashike ehepeko lyopamilalo enyanyalithi nohali ehameke?

⁶ Aanona ihaya vulu okwiigamena, nonokutya ehepeko lyopamilalo enyanyalithi nolya nika oshiponga. Okuthiminikila aanona momilalo manga ethimbo lyawo inaali thika, ohashi ya ehameke noonkondo. Aanona ngele ya hepekwa pamilalo, ohashi ya ningitha ya kale ye na etaloko lya puka li na ko nasha nadho, nayo yene nenge naamboka ya hala okupanga uukuume nayo.

7. (a) Omolwashike nakuhepeka okanona pamilalo hashi kala oshipu kuye oku ka heka, notashi vulika e shi ninge momukalo guni? (b) Iifundja mbyono ohayi ningitha okanona ki itale ko ngiini?

⁷ Aanona inaya koka pamadhiladhilo nokaye shi okunongela nokuyanda oonkalo ndhoka dha nika oshiponga. (1 Kor. 13:11) Onkee ano, oshipu komuntu e ya heke. Oonakuhepeka aanona pamilalo ohaya lombwele aanona iifundja ya kwata miiti. Iifundja mbyoka ongaashi kutya ombedhi oyokanona, naku ka hepeka ke na okupopiwa, kapu na ngoka te ke ka pulakena nenge ta ka kala e na ko nasha naashoka ka ningilwa nosho wo kutya omilalo pokati komukuluntu nokanona euliko lyohole yashili. Iifundja mbyoka ohayi pukitha okanona, nohake ke yi dhimbulula mo owala konima yomimvo odhindji. Okanona hoka otashi vulika ka kale ki itala ko ka nyatekwa nonokutya kake na okuulukilwa ohole nenge okuhekelekwa.

8. Omolwashike tatu vulu okukala tu na einekelo kutya Jehova ota vulu okuhekeleka mboka ya hepekwa pamilalo?

⁸ Itashi kumitha sho ehepeko lyopamilalo hali ningitha mboka ye li ningilwa ya kale ye uvite nayi uule womimvo. Omuyonena nguno kagu shi tuu omwiinayi noonkondo! Ehepeko lyopamilalo ndyoka li li apuhe, oli li uumbangi kutya otu li momasiku gahugunina, moka mu na aantu oyendji “yaa na olukeno” nomu na ‘aakolokoshi naafudhime taa tsikile ko muuwinayi.’ (2 Tim. 3:1-5, 13) Omakoto gaSatana omawinayi noonkondo, nohashi yemateke uuna aantu taya ningi iinima mbyoka tayi nyanyudha Omuhindadhi. Nonando ongawo, Jehova omunankondo e vule Satana naamboka haya longo ehalo lye. Omakoto gaSatana oku ga shi. Otatu vulu okukala nuushili kutya Jehova oku wete okumona iihuna kwetu nota vulu oku tu pa ehekeleko ndyoka twa pumbwa. Oshi li elalekonuuyamba okulongela “Kalunga, ngoka kuye haku zi ekwatho alihe. Oye ngoka he tu kwatha muudhigu wetu auhe, opo tu vule wo okukwatha mboka ye li momaudhigu gi ili nogi ili. Ekwatho ndika olyo ndyoka, tse yene twa kwathwa nalyo kuKalunga.” (2 Kor. 1:3, 4) Jehova oha longitha oolye ya hekeleke mboka ya hepekwa pamilalo?

9. Shi ikolelela koohapu dhomukwaniilwa David ndhoka dhi li mEpisalomi 27:10, Jehova ota ka ningila shike mboka inaaya kala haya gamenwa kaavali yawo?

⁹ Mboka ya kala ihaaya gamenwa kaavali yawo nenge ya hepekwa kaantu yopopepi nayo, oyo unene ya pumbwa ehekeleko. Omupisalomi David okwa li e shi kutya kuJehova oko haku zi ehekeleko alihe notwa pumbwa okukala twe mu inekela. (Lesha Episalomi 27:10.) David okwa li e na einekelo kutya Jehova oha taamba ko mboka haya ningwa nayi kaakwanezimo yawo. Jehova ohe shi ningi ngiini? Oha longitha aapiya ye aadhiginini. Ooitaali ooyakwetu oye li aamwayina yetu. Pashiholelwa, Jesus okwa popi mboka ya li ye mu wayimine mokulongela Jehova, ye li aamwayina aalumentu, aamwayina aakiintu nosho wo ooyina. — Mat. 12:48-50.

10. Omuyapostoli Paulus okwa li a popi shike kombinga yiilonga ye e li omukuluntugongalo?

¹⁰ Natu taleni koshiholelwa shankene aamwatate naamwameme megongalo, taya vulu okukala ye li aamwayina yetu. Omuyapostoli Paulus okwa li omukuluntugongalo omudhiginini noha sile egongalo oshimpwiyu. Okwa li oshiholelwa oshiwanawa, nokwa li nokuli a nwethwa mo a ladhipike yalwe ye mu holele ngaashi ye a li ta holele Kristus. (1 Kor. 11:1) Ndhindhilika shoka Paulus a popi oshikando shimwe kombinga yiilonga ye e li omukuluntugongalo. Okwa ti: “Otwa kala mokati keni nombili, ngaashi yina ta sile oyana oshimpwiyu.” (1 Tes. 2:7) Kunena, aakuluntugongalo aadhiginini nayo otaya vulu okulongitha oohapu dhombili nodhohenda, uuna taya hekeleke yalwe.

11. Oshike tashi ulike kutya aakuluntugongalo hayo owala taya vulu okuhekeleka mboka ya hepekwa pamilalo?

¹¹ Mbela aakuluntugongalo oyo owala taya vulu okuhekeleka mboka ya hepekwa pamilalo? Hasho nando. Atuheni otu na oshinakugwanithwa ‘shokutalalekathana.’ (1 Tes. 4:18) Aamwameme mboka ya pyokoka pambepo oyo unene taya vulu okukala ekwatho enene kaamwameme mboka ya pumbwa ehekeleko. Onkee ano, otashi opalele sho Jehova Kalunga i ifaathanitha nomukulukadhi ngoka ha hekeleke omwana. (Jes. 66:13) MOmbiimbeli omu na wo iiholelwa yaakiintu mboka ya li ya hekeleke mboka ya gwililwa po. (Job 42:11) Ohashi nyanyudha Jehova, uuna e wete aamwameme megongalo kunena  taya hekeleke aamwameme ooyakwawo, mboka taya kondjo nuuwehame wopamaiyuvo. Poompito dhimwe, aakuluntugongalo ohashi vulika ya pule omumwameme gwontumba ngoka a pyokoka pambepo, ngele ota vulu okukwathela omumwameme ngoka. *

12. Otu na okuyanda okuninga shike?

¹² Odhoshili kutya ohatu kambadhala kaatu idhope miinima yopaumwene yOmukriste omukwetu, mbyoka inaa hala yi tseyike. (1 Tes. 4:11) Oshike nduno tatu vulu okuningila mboka ya pumbwa noya hala okukwathelwa nokuhekelekwa? Natu ka taleni komikalo ntano dhopaMbiimbeli, ndhoka tatu vulu okulongitha tu ya hekeleke.

13. Ngaashi sha popiwa mAakwaniilwa yotango 19:5-8, omuyengeli gwaJehova okwa li ningile shike Elia, nongiini tatu vulu oku mu holela?

¹³ Gandja ekwatho tali longo. Sho omuhunganeki Elia a li a yi ontuku mboka ya hala oku mu dhipaga, okwa li a teka omukumo noonkondo, e ta kala a hala okusa. Jehova okwa li e mu tumine omuyengeli omunankondo. Omuyengeli ngoka okwa li a pe Elia ekwatho ndyoka a li a pumbwa. Okwa li e mu pe oshikwiila nomeya noku mu ladhipika a lye. (Lesha 1 Aakwaniilwa 19:5-8.) Ehokololo ndyoka otali tu longo oshili ya simana kutya omathimbo gamwe okanima okashona hoka tatu ningile gumwe, otaka vulu oku mu kwathela lela. Otatu vulu okuulika kutya otu hole notu na ko nasha nomumwatate nenge nomumwameme ngoka a teka omukumo, moku mu ningila iinima ngaashi oku mu telekela, oku mu pa omagano nenge oku mu nyolela okakalata. Ngele otu uvite kutya itatu vulu okukundathana naye nkene e uvite, otatu vulu oku mu kwathela mokuninga iinima mbyoka.

14. Oshike tatu vulu okwiilonga mehokololo lyaElia?

¹⁴ Kwathela mboka ya gwililwa po, ya kale ye uvite ya gamenwa noya manguluka. Mehokololo lyaElia otatu vulu okwiilonga mo sha shilwe. Jehova okwa li a pe omuhunganeki ngoka ekwatho ndyoka a pumbwa, opo a ye kondundu Horeb. Otashi vulika Elia a li e uvite a gamenwa, sho a li kehala ndyoka li li kokule, hoka Jehova a li a ningi ehangano noshigwana she monakuziwa. Otashi vulika a li e uvite kutya okwa ya kokule naamboka ya li ya hala oku mu dhipaga. Oshike tatu vulu okwiilonga moshiholelwa shika? Ngele otwa hala okuhekeleka mboka ya hepekwa pamilalo, otashi vulika twa pumbwa tango oku ya kwathela ya kale ye uvite ya gamenwa. Pashiholelwa, aakuluntugongalo oye na okukaleka momadhiladhilo kutya omumwameme ngoka a gwililwa po, otashi vulika a kale e uvite a gamenwa nokwa manguluka, ngele oya popi naye e li megumbo pehala lyokupopya naye kOshinyanga shUukwaniilwa. Gulwe otashi vulika a kale e uvite a manguluka okupopya nayo kOshinyanga shUukwaniilwa.

15-16. Okukala omupulakeni omwaanawa, okwa kwatela mo shike?

¹⁵ Kala omupulakeni omwaanawa. Ombiimbeli oye tu pa omayele ngoka taga ti: “Kehe gumwe na kale ha pulakene mbala, ihe ohi ikwata mokupopya.” (Jak. 1:19) Mbela otu li aapulakeni aawanawa? Otashi vulika tu dhiladhile kutya okukala omupulakeni omwaanawa, okukala owala twa mwena twa tala ngoka ta popi. Ihe okwa kwatela mo oshindji. Pashiholelwa, hugunina Elia okwa li a mbumbulile Jehova omutima gwe, na Jehova okwa li e mu pulakene. Jehova okwa li e shi mono kutya Elia okwa tila, oku uvite uuwike nota dhiladhila kutya ashihe shoka a longa, osima yowala. Jehova okwe mu kwathele pahole a sinde omadhiladhilo ngoka. Okwa ulike lela kutya okwa li a pulakena lela kuElia. — 1 Aak. 19:9-11, 15-18.

¹⁶ Uuna tatu pulakene komumwatate nenge komumwameme, ongiini tatu vulu okuulika ondjaalela nosho wo olukeno, iinima mbyoka yi  li euliko lyohole? Omathimbo gamwe, oohapu dhetu dha hogololekeka nodhopahole, otashi vulika dhi ulike nkene tu uvite. Otashi vulika wu tye: “Ombili unene kwaashoka she ku ningilwa! Okanona kake na okuungaungiwa nako momukalo ngoka!” Oto vulu okupula epulo limwe nenge gaali, opo wu shilipaleke kutya owu uvite ko shoka kuume koye ngoka a gwililwa po te ku lombwele. Oto vulu oku mu pula to ti: “Ito vulu okuyelithila ndje shoka wa hala okutya?” nenge “Sho wa ti ngawo, onda thiki pehulithodhiladhilo kutya . . . . Ondi li ngaa mondjila?” Omikalo ndhoka dhokupula dhi li pahole, otadhi vulu okushilipaleka omuntu kutya owe mu pulakena shili noto kambadhala okuuva ko shoka te ku lombwele. — 1 Kor. 13:4, 7.

17. Omolwashike tu na okukala aaidhidhimiki nohatu “ikwata mokupopya”?

¹⁷ Otu na okukala wo hatu “ikwata mokupopya.” Uuna omwiitaali omukweni ta popi, ino mu ya melaka wu mu pe omayele nenge wu pukulule okudhiladhila kwe. Kala omwiidhidhimiki! Sho Elia pehulilo a mbumbulile Jehova omutima gwe, okwa li a gwililwa po nokwa popi a yemata noonkondo. Lwanima sho Jehova a nkondopaleke eitaalo lyaElia, Elia okwe mu mbumbulile ishewe omutima gwe, a popi oohapu dha faathana. (1 Aak. 19:9, 10, 13, 14) Shika otashi tu longo shike? Otashi tu longo kutya omathimbo gamwe, mboka ya gwililwa po, oya pumbwa oku tu mbumbulila omitima dhawo lwiikando. Onkee ano, otwa pumbwa okukala hatu pulakene neidhidhimiko, ngaashi Jehova. Pehala lyokukambadhala oku ya lombwela nkene ye na okukandula po omaupyakadhi gawo, natu ya yaalele noku ya ulukila olukeno. — 1 Pet. 3:8.

18. Ongiini omagalikano getu taga vulu okuhekeleka mboka ya gwililwa po?

¹⁸ Galikana tashi zi komutima pamwe naangoka a ningilwa omuyonena. Mboka ya gwililwa po, otashi vulika shi kale oshidhigu kuyo ya galikane. Omuntu otashi vulika a kale e uvite inaa gwana okupopya naJehova. Ngele otwa hala okuhekeleka omuntu ngoka, otatu vulu okugalikana pamwe naye, tatu popi edhina lye. Otatu vulu okulombwela Jehova megalikano kutya  omuntu ngoka oku holike kutse shi thike peni nosho wo kegongalo. Otatu vulu wo okupula Jehova a hekeleke onzi ye ndjoka yi na ondilo noku yi kwathele yi kale ya ngungumana. Omagalikano ga tya ngawo, otaga vulu okuhekeleka lela. — Jak. 5:16.

19. Oshike tashi vulu oku tu kwathela tu ilongekidhile okuhekeleka omuntu?

¹⁹ Hogolola oohapu ndhoka tadhi aludha notadhi hekeleke. Kala ho dhiladhila tango manga inoo popya. Oohapu inaadhi dhiladhilwa nawa, otadhi vulu okweehameka, ihe ndhoka dhombili, otadhi vulu okwaaludha. (Omayel. 12:18) Onkee ano, galikana Jehova e ku kwathele wu popye oohapu dhombili, tadhi hekeleke notadhi talaleke. Dhimbulukwa kutya omukalo gwa dhenga mbanda gwokuhekeleka omuntu, okulongitha omanyolo okuza mOmbiimbeli. — Heb. 4:12.

20. Yamwe mboka ya hepekwa pamilalo monakuziwa, ohaya dhiladhila ngiini, notwa hala oku ya dhimbulukitha shike?

²⁰ Yamwe mboka ya hepekwa pamilalo monakuziwa, otashi vulika ya kale ya tompwa kutya oya nyata, kaye na oshilonga, kaye holike nenge nokuli ya kale ye uvite inaaya gwana okukala ye holike. Kayi shi tuu iifundja iinyanyalithi! Onkene longitha Omanyolo wu ya dhimbulukithe kutya Jehova oku ya hole noonkondo. (Tala oshimpungu “ Ehekeleko okuza mOmanyolo.”) Dhimbulukwa nkene omuyengeli a li a nkondopaleke omuhunganeki Daniel, sho a li e uvite kee na oonkondo nokwa gwililwa po. Jehova okwa li a hala omulumentu ngoka a tseye kutya oku na ongushu momeho ge. (Dan. 10:2, 11, 19) Sha faathana, aamwatate naamwameme mboka ya gwililwa po, oye na ongushu momeho gaJehova.

21. Oshike tashi ka ningilwa ayehe mboka haya longo uuwinayi nopwaahe na okwiiyela ombedhi, ihe atuheni ngashingeyi otu na okutokola okuninga shike?

²¹ Uuna tatu hekeleke yalwe, otatu ya dhimbulukitha kutya oye holike kuJehova. Natu dhimbulukwe wo kutya Jehova, oKalunga omuyuuki. Jehova oku shi omuntu kehe ngoka a hepekwa pamilalo. Oha mono ayihe, noita ka etha inaa geela aalongi yomiyonena mboka inaayi iyela ombedhi. (Num. 14:18) Onkee ano, ngashingeyi natu ninge ngaashi tatu vulu, tu ulukile ohole mboka ya hepekwa pamilalo. Shimwe ishewe, otashi hekeleke okutseya kutya Jehova ota ka aludha thiluthilu ayehe mboka ya hepekwa kuSatana nokuuyuni we. Masiku, iinima ayihe mbika tayi yemateke, otatu ke yi dhimbwa. — Jes. 65:17.