1-3. (a) Shi ikolelela kEpisalomi 5:4-6, Jehova oha kala e uvitile ngiini uukolokoshi? (b) Omolwashike tatu vulu okutya ehepeko lyaanona oli li ompinge ‘nompango yaKristus’?

JEHOVA KALUNGA oku tonde uukolokoshi woludhi kehe. (Lesha Episalomi 5:4-6.) Oku tonde lela ehepeko lyaanona lyopamilalo, ndyoka li li omuyonena omunyanyalithi! Tu li Oonzapo dhe, ohatu mu holele. Onkee natse otu tonde ehepeko lyaanona lyopamilalo noihatu li idhidhimikile nomegongalo lyapaKriste. — Rom. 12:9; Heb. 12:15, 16.

² Ehepeko kehe lyaanona lyopamilalo, oli li ompinge ‘nompango yaKristus.’ (Gal. 6:2) Omolwashike tatu tile ngawo? Ngaashi twi ilongo moshitopolwa sha tetekele, ompango yaKristus, ano kehe shoka a longa aantu okupitila moohapu nomiilonga ye, oya kankamena kohole nohayi humitha komeho uuyuuki. Molwaashoka Aakriste yashili ohaya wilikwa kompango ndjoka, ohaya ungaunga naanona momukalo ngoka hagu ya ningitha ya kale ye uvite ya gamenwa noye holike shili. Ehepeko lyaanona lyopamilalo oshinima shokwiihola mwene nokashi li pauyuuki, nohashi ningitha aanona ya kale ye uvite inaaya gamenwa nokaye holike.

³ Shiyemateka, ehepeko lyaanona pamilalo oshinima shoka tashi dhana onkandangala muuyuni awuhe, nosha guma wo Aakriste yashili. Omolwashike? Omolwaashoka “aakolokoshi naafudhime” oyendji, nayamwe otashi vulika ya kambadhale okuya megongalo. (2 Tim. 3:13) Shimwe ishewe, yamwe mboka ya li oshitopolwa shegongalo, oyi iyethele momahalo gopanyama e taya hepeke aanona pamilalo. Natu ka kundathaneni kutya omolwashike okuhepeka aanona, ku li eyono lya kwata miiti. Opo nduno, otatu ka kundathana nkene aakuluntugongalo  haya ungaunga nomayono ngoka ga kwata miiti, mwa kwatelwa ehepeko lyaanona pamilalo. Otatu ka kundathana wo nkene aavali taya vulu okugamena oyana. *

4-5. Omolwashike ehepeko lyaanona pamilalo, li li eyono hali ehameke ngoka e li ningilwa?

⁴ Okuhepeka aanona, oshinima shoka hashi gumu aantu ethimbo ele. Ohashi gumu mboka ye shi ningilwa naamboka haye ya tonatele, ano yaandjawo nosho wo aamwatate naamwameme. Okuhepeka aanona, eyono lya kwata miiti.

⁵ Eyono hali ehameke ngoka e li ningilwa. * Okuhepeka aanona pamilalo, eyono hali ehameke nohali etele yalwe okumona iihuna. Ngaashi tatu ke shi kundathana moshitopolwa tashi landula, omuntu ngoka ha hepeke aanona osho naanaa ha ningi ngaaka, ano he ehameke aanona momukalo omunyanyalithi. Oha ningitha okanona kaaka kale we ke mu inekela noihaka kala we ke uvite ke li megameno. Aanona oya pumbwa okukala ya gamenwa, opo kaaya ningilwe oshinima shoka oshiwinayi. Aanona mboka ya ninga iihakanwa, oya pumbwa okuhekelekwa nokukwathelwa. — 1 Tes. 5:14.

6-7. Omolwashike eyono lyokuhepeka aanona hali nyateke egongalo noli li ompinge nompango yoshilongo?

⁶ Eyono tali nyateke egongalo. Uuna gumwe megongalo a monika ondjo yehepeko lyaanona, oha shekitha egongalo. (Mat. 5:16; 1 Pet. 2:12) Kashi li pandunge okupopya kutya egongalo lyopaKriste ohali pitike ehepeko lyaanona, oshoka Aakriste oyendjiyendji aadhiginini, otaya kambadhala “okukondjela eitaalo.” (Jud. 3) Ihatu etha mokati ketu mu kale aantu mboka taya yono nopwaa na okwiiyela ombedhi nosho wo mboka haya shekitha edhina ewanawa lyegongalo.

⁷ Eyono kompango yoshilongo. Aakriste oye na ‘okuvulika kaapangeli mboka taye ya pangele.’ (Rom. 13:1) Ohatu ulike kutya ohatu vulika kaapangeli mboka, mokuvulika koompango dhoshilongo. Ngele gumwe megongalo okwa monika ondjo yokutaaguluka ompango yoshilongo, ngaashi okuhepeka aanona, kungawo okwa yona kaapangeli. (Yelekanitha Iilonga 25:8.) Nonando aakuluntugongalo kaye na uuthemba wokugeela mboka taya yono ompango yoshilongo, ihaya keelele nakuhepeka aanona kaa geelwe kaapangeli. (Rom. 13:4) Omuyoni oha teya shoka a kuna. — Gal. 6:7.

8. Jehova okwa tala ko ngiini omayono ngoka haga ningilwa aantu?

⁸ Komeho gaayihe, okuhepeka aanona pamilalo eyono kuKalunga. (Eps. 51:4) Uuna omuntu ta yono komuntu omukwawo, oha yono wo kuJehova. Tala koshiholelwa shoka shi li mOmpango ndjoka Kalunga a li a pe Aaisraeli. Ompango oya li ya ti kutya omuntu ngoka ta kengelele omukwawo, okwa li ta “yono kOmuwa.” (Lev. 6:2-4) Osha yela kutya omuntu ngoka e li oshitopolwa shegongalo ha hepeke okanona, oshinima shoka hashi ningitha okanona ka kale ke uvite inaaka gamenwa, ota yono kuKalunga. Omuntu ngoka oha shekitha edhina lyaJehova. Omolwetompelo ndyoka, ehepeko lyaanona pamilalo otwe li tala ko kutya eyono enyanyalithi kuKalunga nokatu na oku li popila.

9. Uuyelele wuni wopaMbiimbeli ehangano lyaJehova lya kala nokugandja uule womimvo, nomolwashike?

⁹ Uule womimvo, ehangano lyaJehova olya  kala tali gandja uuyelele owundji wopaMbiimbeli, kombinga yehepeko lyaanona. Pashiholelwa, iitopolwa yimwe yi li mOoshungolangelo nomoo-Awake!, oya popya kombinga yankene mboka ya hepekwa pamilalo taya vulu okuungaunga neyeme ndyoka ye na. Oya popya wo nkene aavali taya vulu okugamena oyana. Aakuluntugongalo oya pewa edheulo lyopaMbiimbeli kombinga yankene ye na okuungaunga neyono lyokuhepeka aanona. Ehangano otali tsikile nokutalulula omikalo ndhoka omagongalo haga longitha, ga ungaunge neyono ndyoka. Omolwashike? Opo li shilipaleke kutya eyono ndyoka olya ungaungiwa nalyo metsokumwe nompango yaKristus.

10-12. (a) Uuna aakuluntugongalo taya ungaunga neyono lya kwata miiti, ohaya kaleke shike momadhiladhilo, nelalakano lyawo olyashike? (b) Shi ikolelela kuJakob 5:14, 15, aakuluntugongalo ohaya kambadhala okuninga shike?

¹⁰ Uuna aakuluntugongalo taya ungaunga nomayono ga kwata miiti, ohaya kaleke momadhiladhilo kutya ompango yaKristus, oya kwatela mo okuungaunga noshigunda pahole nosho wo okuninga shoka shi li mondjila nopauyuuki momeho gaKalunga. Omolwoshinima shono, oye na okudhiladhila nuukeka kombinga yiinima yontumba, uuna ya uvu kutya opu na gumwe a yona sha kwata miiti. Shoka sha simanenena aakuluntugongalo hayi ipula nasho, okusimanekitha edhina lyaKalunga noku li kaleka lya yela. (Lev. 22:31, 32; Mat. 6:9) Ohaya kala wo tayi ipula lela kombinga yekwatathano ndyoka aamwatate naamwameme ye na naJehova, noya hala okukwathela mboka ya ninga iihakanwa yomiyonena.

¹¹ Shimwe ishewe, ngele ngoka a yona oku li oshitopolwa shegongalo, aakuluntugongalo ohaya kambadhala oku mu kwathela a kale ishewe e na ekwatathano ewanawa naJehova. (Lesha Jakob 5:14, 15.) Omukriste ngoka hi iyethele momahalo ga puka e ta yono eyono lya kwata miiti, ote ehama pambepo. Shoka osha hala okutya, ke na we ekwatathano ewanawa naJehova. * Monkalo ndjoka, aakuluntugongalo oyo owala taya vulu oku mu panga. Ohaya kambadhala okukwathela ‘omuvu [pompito ndjika, ngoka a yona] a kale e na ishewe uundjolowele.’ Omayele gopaMbiimbeli ngoka taye mu pe, otaga vulu oku mu kwathela a kale ishewe e na ekwatathano ewanawa naKalunga, ihe shika otashi wapa owala, ngele okwi iyela shili ombedhi. — Iil. 3:19; 2 Kor. 2:5-10.

¹² Osha yela kutya aakuluntugongalo oye na oshinakugwanithwa sha kwata miiti. Oye na ko nasha lela noshigunda shoka ye shi inekelelwa kuKalunga. (1 Pet. 5:1-3) Oya hala aamwatate naamwameme ya kale ye uvite ya gamenwa megongalo. Omolwetompelo ndyoka, ohaya katuka nziya, uuna ya uvu kutya gumwe okwa yona eyono lya kwata miiti, mwa kwatelwa ehepeko lyaanona. Natu tale komapulo ngoka ge li petameko  lyokatendo 13,  15 no  17.

13-14. Aakuluntugongalo ohaya vulika ngaa koompango dhi na ko nasha nokulopota ehepeko lyaanona kaapangeli? Shi yelitha.

 ¹³ Mbela aakuluntugongalo ohaya vulika ngaa koompango dhoshilongo dhi na ko nasha nokulopota kaapangeli ehepeko lyaanona lyopamilalo? Eeno. Miilongo yimwe moka mu na oompango ndhoka, aakuluntugongalo ohaya kambadhala ya vulike kudho. (Rom. 13:1) Oompango ndhoka kadhi li ompinge nompango yaKalunga. (Iil. 5:28, 29) Onkee ano, uuna aakuluntugongalo ya lombwelwa kutya opu na gumwe a hepeka okanona, ohaya katuka nziya ya konge ekwatho koshitayimbelewa, opo shi ya kwathele shi na ko nasha noku shi lopota kaapangeli.

 ¹⁴ Aakuluntugongalo ohaya shilipaleke mboka ya ningilwa omuyonena, aavali yawo nayalwe mboka ye na uumbangi washo kutya oye na uuthemba woku ke shi lopota kaapangeli. Ongiini ngele omuntu ngoka a lopotwa oku li oshitopolwa shegongalo, noshinima shoka a ninga osha tseyika momudhingoloko? Mbela Omukriste ngoka e mu lopota oku na okukala e uvite kutya okwa nyatekitha edhina lyaKalunga? Aawe. Omuyoni oye e li nyatekitha.

15-16. (a) Shi ikolelela kuTimoteus gwotango 5:19, omolwashike hapu kala pwa pumbiwa oonzapo dhi li ngaa mbali, manga aakuluntugongalo inaaya ninga okomitiye yopampangu? (b) Aakuluntugongalo ohaya ningi po shike, uuna gumwe megongalo ta tamanekelwa ehepeko lyaanona?

 ¹⁵ Ngele tashi ya megongalo, omolwashike aakuluntugongalo haya kala ya pumbwa ngaa oonzapo nando mbali, manga inaaya ninga okomitiye yopampangu? Omolwaashono Ombiimbeli otayi ti kutya oshitegelelwa shoka oshi li pauyuuki. Ngele omuyoni okwa ti kutya shoka ta tamanekelwa ine shi ninga, opwa pumbwa oonzapo mbali dhi shi koleke kutya okwe shi ninga manga aakuluntugongalo inaaya ninga okomitiye yopampangu. (Deut. 19:15; Mat. 18:16; lesha 1 Timoteus 5:19.) Mbela shika otashi ti kutya manga oshinima shoka inaashi lopotelwa aapangeli, tango opwa pumbwa oonzapo mbali? Hasho dha li. Aakuluntugongalo nenge yalwe inaya pumbwa okukala ye na oonzapo mbali, opo ando ya lopote nawa omuyonena gwontumba.

¹⁶ Uuna aakuluntugongalo ya mono kutya gumwe megongalo ota tamanekelwa ehepeko lyokanona, ohaya kambadhala ya vulike koompango dhoshilongo, dhi na ko nasha nokulopota oshinima shoka. Ohaya ya tala wo kutya Ombiimbeli otayi ti ngiini kombinga yasho. Ngele omuyoni oti ipatana, aakuluntugongalo ohaya pula pu kale oonzapo mbali, ndhoka tadhi koleke kutya okwe shi ninga. Ngele opwa kala pu na aantu yaali, ngoka e shi lopota naangoka te shi koleke, aakuluntugongalo ohaya ningi okomitiye yopampangu. * Ngele kapu na onzapo ontiyali ndjoka tayi shi koleke, itashi ti kutya ngoka e shi lopota ina popya oshili. Nonando kapu na oonzapo mbali ndhoka tadhi koleke kutya omuntu okwa hepeka okanona pamilalo, aakuluntugongalo ohaya mono kutya otashi vulika pwa ningwa eyono lya kwata miiti, ndyoka hali ehameke yalwe noonkondo. Ohaya tsikile okukwathela mboka ye ehamekwa. Shimwe ishewe, aakuluntugongalo ohaya tsikile okukala ya kotokela ngoka ta fekelwa kutya okwa hepeka okanona pamilalo, opo ya gamene egongalo. — Iil. 20:28.

17-18. Yelitha kutya okomitiye yopampangu ohayi ningi shike.

 ¹⁷ Oshike hashi ningwa po kokomitiye yopampangu? Uutumbulilo “yopampangu” itawu ti kutya aakuluntugongalo ohaya tokola kutya omuyoni oku na okugeelwa kaapangeli, sho a taaguluka ompango. Ihayi idhopo miinima yopaveta, ihe ohaya ethele oshinima shono momake gaapangeli. (Rom. 13:2-4; Tit. 3:1) Ohaya tokola ngele omuntu ngoka ota vulu okutsikila okukala oshilyo shegongalo nenge hasho.

¹⁸ Mokomitiye yopampangu, aakuluntugongalo ohaya ungaunga owala niinima mbyoka ya kwatela mo ekwatathano lyomuntu naKalunga nosho wo nooitaali ooyakwawo. Ohaya wilikwa kOmbiimbeli, ya tale ngele omuyoni okwi iyela ombedhi nenge hasho. Ngele ini iyela ombedhi, oha kondwa nohashi tseyithilwa egongalo. (1 Kor. 5:11-13) Ngele okwi iyela ombedhi, otashi vulika kaa kondwe. Nonando ongawo, aakuluntugongalo otaye ke mu lombwela kutya otashi vulika itaa ka pitikwa a pewe iinakugwanithwa megongalo uule womimvo nenge  onkalamwenyo ye ayihe. Shi na ko nasha nonkalonawa yaanona, aakuluntugongalo otashi vulika ya londodhe aavali yawo ya kale ye ya takamitha, uuna oyana ye li popepi nomuntu ngoka. Uuna aakuluntugongalo taya londodha aavali, ohaye shi ningi nuukeka, noihaye ya lombwele kutya omuntu ngoka okwa hepeka oolye.

19-22. Aavali otaya vulu okuninga shike ya gamene aanona yawo? (Tala ethano lyokombanda.)

¹⁹ Olye e na oshinakugwanithwa shokugamena aanona kaaye ehamekwe? Aavali. * Aavali, aanona yeni oye li “omagano ga za kOmuwa.” (Eps. 127:3) Oshi li oshinakugwanithwa sheni mwe shi pewa kuJehova, mu ya gamene. Oshike tamu vulu okuninga mu gamene aanona yeni kaaya hepekwe?

²⁰ Shotango, ilonga kutya ehepeko olya kwatela mo shike. Ilonga kombinga yaamboka haya hepeke aanona pamilalo nosho wo omikalo ndhoka haya longitha, opo ye ya heke. Kotokela oonkalo nenge aantu mboka ya nika oshiponga. (Omayel. 22:3; 24:3) Dhimbulukwa kutya poompito odhindji, nakuhepeka okanona oha kala omuntu ngoka e shiwike nawa kuko noke mu inekela.

²¹ Oshitiyali, kaleni hamu popi naanona yeni mwa mangulukilathana. (Deut. 6:6, 7) Shoka osha kwatela mo okukala omupulakeni omwaanawa. (Jak. 1:19) Dhimbulukwa kutya aanona mboka ya hepekwa pamilalo, ohaya kala ya tila oku shi popya. Ohaya kala ya tila kutya itaye ki itaalwa nenge tashi vulika ya ningilwa omatilitho kwaangoka e ya hepeka kaaye shi popye. Ngele owa mono kutya opu na sha sha puka, ya pula omapulo momukalo gwombili, e to pulakene neidhidhimiko shoka taye ku lombwele.

²² Oshititatu, longa aamwoye. Kundathana nayo kombinga yuuyelele wu na ko nasha nomilalo, mboka wo opalela omimvo dhawo. Ya longa shoka ye na okutya nokuninga, uuna gumwe ta kambadhala oku ya guma momukalo tagu limbilike. Longitha uuyelele mboka twa pewa kehangano lyaJehova wu na ko nasha nankene aanona ye na okugamenwa. — Tala oshimpungu “ Ilonga mwene nosho wo aamwoye.”

23. Ehepeko lyaanona lyopamilalo otwe li tala ko ngiini, nepulo lini tali ka yamukulwa moshitopolwa tashi landula?

²³ Tu li Oonzapo dhaJehova, otwa tala ko ehepeko lyaanona lyopamilalo li li eyono enyanyalithi noshinima sha kwata miiti. Molwaashoka ohatu wilikwa kompango yaKristus, ihatu popile aalongi yomiyonena kaaya geelwe. Ngashingeyi oshike tatu vulu okuninga po, tu kwathele mboka ya hepekwa pamilalo? Epulo ndyoka otali ka yamukulwa moshitopolwa tashi landula.