1-2. Yelitha kutya omolwashike omakotampango gomOmbiimbeli haga tameke okukala ga simana lela uuna oonkalo dhetu dha lunduluka.

 MESIKU lyohango yawo, ombushiki nomufuko ohaya pewa oshipopiwa shi ikolelela kOmbiimbeli tashi popi kombinga yondjokana. Omakotampango ngoka haga gandjwa moshipopiwa shoka ihaga kala omape kuyo. Ihe okuza esiku ndyoka, uuyelele mboka ohawu tameke okukala wa simana lela kuyo. Omolwashike mbela? Omolwaashoka otaye ke wu tula miilonga monkalamwenyo yawo ye li aaihokani.

² Shoka osha faathana uuna aaihokani Aakriste ya ningi aavali. Muule womimvo, oya kala haya uvu iipopiwa yimwe tayi popi kombinga yokuputudha aanona. Ihe ngashingeyi omakotampango ngoka ya kala haya uvu miipopiwa mbyoka otaga ti sha lela kuyo shi vulithe nale. Omolwashike? Omolwashoka ngashingeyi oye na okanona kawo yene hoka ye na okuputudha. Mboka kawu shi tuu uuthembahenda uunene! Uushili owo kutya, oonkalo dhetu ohadhi vulu okulunduluka, shoka hashi ningitha omanyolo gamwe ga tameke okukala ga simana lela kutse. Ndyoka olyo etompelo limwe kutya omolwashike aalongeli yaJehova haya lesha Omanyolo mOmbiimbeli nohaya tedhatedha kugo okukalamwenyo ‘kwawo akuhe.’ — Deut. 17:19.

3. Oshike tatu ka kundathana moshitopolwa shika?

³ Aavali, omu na oshinakugwanithwa oshinene shoka Omukriste ta vulu okukala e na shokulonga aanona yeni kombinga yaJehova. Ihe omwa hala okuninga oshindji shi vulithe owala poku ya longa oshili kombinga yaKalunga. Omwa hala okukwathela aanona yeni ya kale ye mu hole noonkondo. Oshike tamu vulu okuninga mu kwathele aanona yeni ya kale ye hole Jehova? Moshitopolwa shika, otatu ka kundathana omakotampango gane gomOmbiimbeli  ngoka taga vulu oku mu kwathela mu li aavali. (2 Tim. 3:16) Otatu ka tala wo nkene aavali yamwe Aakriste ya mona uuwanawa sho ya tula omayele ngoka gomOmbiimbeli miilonga.

4. Ekotampango limwe lini tali vulu okukwathela aavali ya kwathele oyana ya kale ye hole Jehova nomitima dhawo adhihe? (Jakob 1:5)

⁴ Ekotampango 1: Konga ewiliko lyaJehova. Pula Jehova e ku pe owino ndjoka wa pumbwa wu kwathele aamwoye ya tameke okukala ye mu hole. (Lesha Jakob 1:5.) Oye Omuntu a dhenga mbanda ta vulu oku ku pa omayele. Opu na omatompelo gontumba kutya omolwashike tatu tile ngawo. Tala kugaali gomugo. Lyotango, Jehova oye omuvali ngoka e na owino ya shiga ko. (Eps. 36:9) Etiyali, omayele gopandunge ngoka ha gandja ohage tu etele aluhe uuwanawa. — Jes. 48:17.

5. (a) Ehangano lyaJehova ohali gandja shike li kwathele aavali? (b) Ngaashi sha ulikwa mokavidio, owi ilongo shike kunkene omumwatate nomumwameme Amorim ya putudha oyana?

⁵ Okupitila mOohapu dhe nosho wo mehangano lye, Jehova oha gandja uuyelele owundji wa kankamena kOmbiimbeli mboka tawu vulu oku mu kwathela mu putudhe aanona yeni ya kale ye hole Jehova. (Mat. 24:45) Pashiholelwa, otamu vulu okumona omayele ogendji tage mu kwathele miitopolwa yi li kohi yoshipalanyolo “Help for the Family,” mbyoka ya li hayi piti uule womimvo moshifo Penduka mo! nongashingeyi oyi li kepandja lyetu lyokointaneta, jw.org. Shimwe ishewe, uuvidio owundji mboka wu li kepandja ndyoka owu na omapulapulo niinyandwa mbyoka tayi vulu okukwathela aavali ya tule omayele gaJehova miilonga sho taya putudha oyana. * — Omayel. 2:4-6.

6. Omumwatate gumwe oku uvite ngiini kombinga yewiliko ndyoka ye nomukadhi haya mono okuza kehangano lyaJehova?

⁶ Aavali oyendji oya popya kutya oya pandula noonkondo ekwatho ndyoka Jehova e ya pa okupitila mehangano lye. Omumwatate Joe okwa ti: “Okuputudhila aanona yatatu moshili kaku shi okupu. Ngame nanekulu lyandje ohatu galikana aluhe kuJehova e tu kwathele. Nolundji otwe shi ndhindhilika kutya ohatu mono oshitopolwa nenge okavidio kontumba ka piti naanaa pethimbo lyo opala, hoka ke tu kwathele  tu ungaunge nonkalo yontumba moka twa li. Otwa kala aluhe hatu pula ekwatho kuJehova.” Joe nomukadhi oya mona kutya iitopolwa nuuvidio mboka ohayi kwathele aanona yawo ya hedhe popepi naJehova.

7. Omolwashike aavali ye na okuninga ngaashi taya vulu ya tule po oshiholelwa oshiwanawa? (Aaroma 2:21)

⁷ Ekotampango 2: Kala oshiholelwa oshiwanawa. Aanona ohaya kala ya tala nawa aavali yawo, nolundji ohaye ya holele. Odhoshili kutya kapu na omuvali a gwanenena. (Rom. 3:23) Ihe nonando ongawo, aavali aanandunge ohaya ningi ngaashi taya vulu ya tulile po oyana oshiholelwa oshiwanawa. (Lesha Aaroma 2:21.) Omusamane gumwe okwa popi kombinga yaanona a ti: “Oya fa omafulafula ngoka haga nina po ke shimwe.” Okwa gwedha ko a ti: “Ohaye tu lombwele uuna ihaatu ningi shoka hatu ya longo.” Onkee ngele otwa hala aanona yetu ya kale ye hole Jehova, ohole yetu yoku mu hola oya pumbwa okukala ya kola noyi iwetikile.

8-9. Owi ilongo shike kwaashoka sha popiwa kuAndrew naEmma?

⁸ Opu na omikalo odhindji moka aavali taya vulu okulonga oyana ya kale ye hole Jehova. Andrew, omumati gwomimvo 17 okwa ti: “Aavali yandje oya kala aluhe haya lombwele ndje kutya okugalikana oshinima sha simana. Ongulohi kehe, tate okwa li ha galikana nangame, nonando onda galikana nale paumwene. Oya li aluhe haya dhimbulukitha ndje taya ti: ‘Oto vulu okugalikana kuJehova iikando oyindji ngaashi wa hala.’ Sho ya kala haya popi ngawo, egalikano olya tameke okukala oshinima sha simana lela kungame. Ngashingeyi oshipu kungame okugalikana nokukala ndi uvite kutya Jehova oTate ngoka e hole ndje.” Aavali, dhimbulukweni aluhe kutya ohole yeni yokuhola Jehova otayi vulu okukwathela oyana yeni nayo ya kale ye mu hole.

⁹ Natu taleni ishewe koshiholelwa shaEmma. Sho he a thigi po uukwanegumbo wawo, okwa li a thigile yina oongunga odhindji noonkondo. Emma okwa ti: “Opwa li iikando oyindji Meme a li kee na oshimaliwa sha gwana, ihe okwa li aluhe ha popi nkene Jehova ha sile oshimpwiyu aapiya ye. Onda li handi kala ndi shi wete kutya oshinima shoka okwe shi itaala. Meme okwa li ha tula miilonga shoka a li ha longo ndje.” Oshiilongomwa oshini? Aavali otaya vulu okulonga oyana okupitila moshiholelwa shawo, nonando oye li moonkalo oondhigu. — Gal. 6:9.

10. Aavali oyendji Aaisraeli oya li ye na oompito dhini odhindji dhokupopya noyana? (Deuteronomium 6:6, 7)

¹⁰ Ekotampango 3: Kala ho popi naamwoye pandjigilile. Jehova okwa li a lombwele Aaisraeli ya kale haya longo oyana kombinga ye pandjigilile. (Lesha Deuteronomium 6:6, 7.) Aavali mboka oya li ye na oompito odhindji momukokomoko gwesiku ya popye noyana noku ya longa ya kale ye hole Jehova nomitima dhawo adhihe. Pashiholelwa, okamati okagundjuka oka li haka vulu okukala nahe oowili odhindji, ta ke mu kwathele nokukuna nenge nokututa mo iilikolomwa mepya. Okamwayinakadhona oka li haka vulu okukala nayina esiku alihe megumbo ta ke mu kwathele nokuhondja, nokutunga nokulonga iilonga yilwe yomegumbo. Sho aavali mboka naanona yawo taya longo pamwe, oya li haya vulu okupopya kombinga yiinima oyindji ya simana. Pashiholelwa, oya li haya vulu okupopya kombinga yuukwatya waJehova wuuwanawa nokombinga yankene ta kwathele uukwanegumbo wawo.

11. Aavali Aakriste oye na ompito yimwe yini yokupopya noyana?

¹¹ Onkalo kunena inayi fa we yonale. Miilongo oyindji, aavali naanona ihaya vulu okukala pamwe momukokomoko gwesiku. Aavali mboka otashi vulika ya kale ye li kiilonga, omanga aanona yawo tashi vulika ye li kosikola. Omolwoshinima shoka, aavali oye na okukambadhala ya mone ompito yokupopya noyana. (Ef. 5:15, 16; Fil. 1:10) Elongelokalunga lyuukwanegumbo  olyo limwe lyomoompito ndhoka. Omumwatate gumwe omugundjuka Alexander okwa ti: “Tate oha ningi aluhe elongekidho lyelongelokalunga lyuukwanegumbo, noiha pitike nando osha shi tu imbe okuli ninga pamwe. Konima yekonakono ndyoka ohatu popi kombinga yoshinima kehe sha simana.”

12. Omutse gwuukwanegumbo ogu na okukaleka shike momadhiladhilo pelongelokalunga lyuukwanegumbo?

¹² Ngele owu li omutse gwuukwanegumbo, oshike to vulu okuninga opo elongelokalunga lyeni lyuukwanegumbo li kale ehokithi kaanona yeni? Otamu vulu okukonakona nayo embo lyetu ewanawa epe, Kala nonkalamwenyo ombwanawa sigo aluhe. Sho tamu li konakona, otamu ka mona ompito ombwanawa lela mu ninge oonkundathana tadhi ti sha. Owa hala aanona yeni ya popye ya manguluka kombinga yaashoka tayi ipula nasho, onkee ino longitha ompito ndjoka wu ya pe uusama nenge wu ya gande. Kambadhala wo kuu geye ngele aanona yeni oya popi oshinima shoka kaashi li metsokumwe nomakotampango gomOmbiimbeli. Pehala lyaashono, kala wa pandula sho ya popi oshili kombinga yomaiyuvo gawo, e to ya ladhipike ya kale haye shi ningi ya manguluka. Oto vulu owala okukwathela nawa aamwoye ngele owu shi kutya oye uvite lela ngiini.

13. Aavali otaya vulu okulonga oyana ya hedhe popepi naJehova poompito dhilwe dhini?

¹³ Aavali, kaleni hamu kongo oompito momukokomoko gwesiku mu kwathele aanona yeni ya hedhe popepi naJehova. Inamu pumbwa owala oku ya longa kombinga yaKalunga ketu omunahole uuna tamu konakona nayo. Ndhindhilika shoka omuvalakadhi gumwe Lisa a ti: “Otwa longitha kehe shimwe momudhingoloko gwetu tu longe aanona yetu kombinga yaJehova. Pashiholelwa, ngele ombwa yetu oya ningi oshinima oshiyolithi, ohatu ya lombwele kutya shoka otashi ulike kutya Jehova oKalunga omunyanyukwi nokwe tu shita hatu vulu okunyanyukilwa iinima.”

14. Omolwashike sha simana aavali ya kwathele oyana ya hogolole ookuume pandunge? (Omayeletumbulo 13:20)

¹⁴ Ekotampango 4: Kwatheleni aanona yeni ya hogolole ookuume aawanawa. Oohapu dhaKalunga otadhi shi popi sha yela kutya ookuume otaya vulu oku tu nwetha mo nawa nenge nayi. (Lesha Omayeletumbulo 13:20.) Aavali, ookuume kaanona yeni omu ya shi ngaa? Omwa tsakanena ngaa nayo nando onale nokukala ethimbo  nayo? Oshike tamu vulu okuninga mu kwathele aanona yeni ya pange uukuume naamboka ye hole Jehova? (1 Kor. 15:33) Otamu vulu oku ya kwathela ya mone ookuume aawanawa ngele omwa kala hamu hiya aantu mboka ye na ekwatathano ewanawa naJehova kaandjeni, mu ninge iinima yontumba pamwe nayo nosho wo naanona yeni. — Eps. 119:63.

15. Oshike aavali taya vulu okuninga ya kwathele oyana ya mone ookuume aawanawa?

¹⁵ Natu taleni koshimoniwa shomumwatate Tony. Okwa popi shoka ye nomukadhi ya ninga ya kwathele oyana ya mone ookuume aawanawa, a ti: “Momukokomoko gwomimvo, ngame nanekulu lyandje otwa kala hatu hiya aamwatate naamwameme yomimvo noyomomaputuko ga yoolokathana kaandjetu. Ohatu li pamwe nayo nokuninga ekonakonombiimbeli pamwe nayo. Ndjika oyo ompito ombwanawa lela yokutseya mboka ye hole nohaya longele Jehova nenyanyu. Otwa yambekwa lela sho twa mono ompito yokukala naatonatelishikandjo, naatumwa nosho wo nayalwe maandjetu. Iimoniwa yawo nosho wo ombepo yawo yeiyambo oya guma noonkondo aanona yetu noye ya kwathela ya hedhe popepi naJehova.” Aavali, kaleni mwa tokola toko okukwathela aanona yeni ya mone ookuume aawanawa.

16. Etaloko lini aavali taya vulu okukala ye na ngele omwanamati nenge omwanakadhona gwawo ota ti kutya ina hala okulongela Jehova?

¹⁶ Ongiini nduno ngele omwa ninga ngaashi tamu vulu, ihe kamwe komaanona yeni ohaka ti kutya inaka hala okulongela Jehova? Inamu thika pehulithodhiladhilo kutya inamu longa oshilonga sheni mu li aavali. Jehova okwe tu peni atuheni, mwa kwatelwa naanona yeni emanguluko lyokuninga omatokolo, emanguluko lyokuhogolola ngele otatu longele Kalunga nenge hasho. Ngele omwanamati nenge omwanakadhona gweni okwa thigi po Jehova, inamu kanitha etegameno kutya esiku limwe ona ka galuke. Dhimbulukweni eyele lyomumati a kanene. (Luk. 15:11-19, 22-24) Omumati ngoka omugundjuka okwa li a ningi iinima oyindji iiwinayi, ihe pehulilo okwa galukile kegumbo. Gumwe otashi vulika a tye, “Ndyoka eyele owala. Oshinima shoka otashi vulu ngaa shili okuningwa?” Eeno, otashi vulu! Shoka osho nokuli sha li sha ningwa komulumentu gumwe omugundjuka gwedhina Elie.

17. Oshimoniwa shaElie oshe ku tsa ngiini omukumo?

 ¹⁷ Elie okwa popi kombinga yaavali ye a ti: “Oya li ya ningi ngaashi taya vulu ya longe ndje ndi kale ndi hole Jehova nOohapu dhe, Ombiimbeli. Sho ndi na omimvo omulongo nasha, onda tameke okutukula uunashipotha.” Elie okwa tameke okukala nonkalamwenyo yopaali nokwa li a tindi ekwatho ndyoka aavali ye ya li taye mu pe sho taye mu kwathele a kale popepi naJehova. Sho a tembuka mo megumbo, okwa ka ninga iinima iiwinayi. Ihe nonando ongawo, omathimbo gamwe okwa li ha popi nookuume ke kombinga yOmbiimbeli. Elie okwa ti: “Sho ngaa nda kala handi popi kombinga yaJehova pookuume kandje, onda kala handi dhiladhila kombinga yaJehova. Mokweendela ko kwethimbo, oombuto dhoshili ndhoka dha li momutima gwandje, ndhoka aavali yandje ya kambadhala noonkondo okukuna mo, odha tameke okumena.” Konima yethimbo, Elie okwa galukile moshili. * Dhiladhila owala kutya aavali ye oya li ya nyanyukwa shi thike peni sho ya li ya kambadhala oku mu longa sho a li okanona a kale e hole Jehova! — 2 Tim. 3:14, 15.

18. Owu uvite ngiini kombinga yaavali mboka haya longo nuudhiginini ya longe oyana ya kale ye hole Jehova?

¹⁸ Aavali, omwa pewa oshinakugwanithwa oshinene shokuputudha epipi epe lyaalongeli yaJehova. (Eps. 78:4-6) Ihe shoka kashi shi oshinima oshipu, notatu mu pandula noonkondo sho mwa kala tamu longo nuudhiginini mu kwathele aanona yeni! Ngele omwa tsikile okuninga ngaashi tamu vulu mu ya kwathele ya kale ye hole Jehova noku ya longa ya kale haya vulika kuye, otamu vulu okukala nuushili kutya Tate yetu omunahole, Jehova, ota ka kala a nyanyukwa. — Ef. 6:4.