OSHITOPOLWA SHOKUKONAKONWA 20
Embo lyEhololo olya popya shoka aatondi yaKalunga taya ka ningilwa
“Oombepo odha gongele aakwaniilwa pehala ndyoka hali ithanwa mOshihebeli Armagedon.” — EH. 16:16.
EIMBILO 150 Kongeni Kalunga, opo mu ka hupithwe
ELALAKANO LYOSHITOPOLWA *
1. Embo lyEhololo otali popi shike kombinga yoshigwana shaKalunga?
EMBO lyEhololo olya popya kutya Uukwaniilwa waKalunga owa dhikwa po megulu nosho wo kutya Satana oku umbilwa kombanda yevi. (Eh. 12:1-9) Ngashingeyi megulu omu na ombili, ihe kombanda yevi oku na omaupyakadhi ogendji omolwaSatana. Omolwashike mbela? Omolwaashoka oku udha ondjahi noha ponokele mboka haya longele Jehova nuudhiginini. — Eh. 12:12, 15, 17.
2. Oshike tashi tu kwathele tu kale aadhiginini kuJehova?
2 Ongiini tatu vulu okukala aadhiginini kuJehova nonando otatu ponokelwa kuSatana? (Eh. 13:10) Oshinima shimwe shoka tashi vulu oku tu kwathela okutseya kutya oshike tashi ka ningwa po monakuyiwa. Pashiholelwa, membo lyEhololo, omuyapostoli Johannes okwa popi kombinga yomayambeko ngoka tatu ka mona masiku. Limwe lyomomayambeko ngoka olyo kutya aatondi yaKalunga otaya ka hanagulwa po. Ngashingeyi natu ka konakoneni shoka sha popiwa membo lyEhololo kombinga yaatondi mboka naashoka tashi ke ya ningilwa monakuyiwa.
AATONDI YAKALUNGA YA POPIWA ‘PAMANDHINDHILIKO’
3. Omandhindhiliko gamwe geni ga longithwa membo lyEhololo?
3 Movelise yotango yontopolwa yotango yembo lyEhololo omwa popiwa kutya uuyelele mboka tatu ka lesha membo ndyoka owa gandjwa molupe ‘lwomandhindhiliko,’ ano kutya owa popiwa pathaneko. (Eh. 1:1) Aatondi yaKalunga oya popiwa mo pathaneko. Pashiholelwa, omwa popiwa iilikama yi ili noyi ili, ngaashi, “oshilikama tashi zi mefuta” shi na “ooniga omulongo nomitse heyali.” (Eh. 13:1) Oshilikama shoka osha landulwa ‘koshilikama oshikwawo tashi zi mevi,’ shoka hashi popi sha fa oshikoko nohashi ningitha “omulilo gu ze megulu.” (Eh. 13:11-13) Omwa popiwa wo ‘oshilikama oshitiligane’ sha kayilwa kohonda. Iilikama mbika itatu otayi thaneke aatondi mboka ya kala taya kondjitha Jehova Kalunga nUukwaniilwa we ethimbo ele. Onkee, osha simana tu tseye kutya iilikama mbyoka otayi thaneke oolye. — Eh. 17:1, 3.
IILIKAMA IINENE INE
Oya “anduka mefuta.” (Dan. 7:1-8, 15-17) Otayi thaneke omapangelo omanankondo muuyuni, ngoka ga kala nokupangela nokupataneka noonkondo oshigwana shaKalunga okuza pethimbo lyaDaniel (Tala okatendo 4, 7)
4-5. Uuyelele mboka wu li muDaniel 7:15-17 otawu tu kwathele ngiini tu uve ko kutya omandhindhiliko ngoka otaga ti shike?
4 Manga inaatu ilonga kutya aatondi mboka oyeni, otwa pumbwa okuuva ko kutya iilikama mbyoka nosho wo ohonda otayi thaneke shike. Shoka tashi tu kwathele tu uve ko nawa, okweetha Ombiimbeli yi iyelithe yoyene. Omandhindhiliko ogendji ngoka ge li membo lyEhololo oga yelithwa nale momambo galwe gOmbiimbeli. Pashiholelwa, omuhunganeki Daniel okwa li a lala ondjodhi moka a mono ‘iilikama iinene ine ya anduka mefuta.’ (Dan. 7:1-3) Daniel okwe tu lombwela kutya iilikama mbyoka iinene otayi thaneke shike. Okwa ti kutya otayi thaneke “aakwaniilwa” (NW) yane nenge tu tye omapangelo gane. (Lesha Daniel 7:15-17.) Eyelitho ndyoka lya yela nawa otali tu kwathele tu uve ko kutya iilikama mbyoka ya popiwa membo lyEhololo oyi na wo okukala tayi thaneke omapangelo gopapolotika.
5 Ngashingeyi natu ka konakoneni omandhindhiliko gamwe ngoka ga popiwa membo lyEhololo. Sho tatu shi ningi, otatu ka mona nkene Ombiimbeli tayi tu kwathele tu uve ko kutya omandhindhiliko ngoka otaga ti shike. Natu tameke niilikama. Tango otatu ka tala kutya otayi thaneke shike, opo nduno otatu ka tala kutya otayi ka ningilwa shike. Hugunina, otatu ka tala kutya iiningwanima mbyoka otayi ti shike kutse.
AATONDI YAKALUNGA TAYA HOLOLWA
OSHILIKAMA SHOMITSE HEYALI
Osha “zi mefuta” noshi na omitse heyali, ooniga omulongo, niishani omulongo. (Eh. 13:1-4) Otashi thaneke omapangelo agehe gopapolotika ngoka ga kala nokupangela aantu sigo onena. Omitse heyali otadhi thaneke omapangelo omanankondo gaheyali gomuuyuni ngoka ga kala nokupangela nokupataneka noonkondo oshigwana shaKalunga (Tala okatendo 6-8)
6. Oshilikama shomitse heyali shoka sha popiwa mEhololo 13:1-4 otashi thaneke shike?
6 Oshilikama shomitse heyali otashi thaneke shike? (Lesha Ehololo 13:1-4.) Moovelise ndhoka otatu lesha mo kutya oshilikama shoka osha fa ongwe, ihe oshi na omakaha ga fa gemwanka, okana kwa fa kwonime noshi na ooniga omulongo. Omaukwatya agehe ngoka ogo wo ge li kiilikama ine mbyoka ya tumbulwa membo lyaDaniel ontopolwa 7. Ihe membo lyEhololo, omaukwatya ngoka oge li koshilikama shimwe, ihe hakiilikama ya yoolokathana ine. Oshilikama shoka itashi thaneke owala epangelo limwe nenge epangelo enankondo muuyuni. Osha popiwa kutya otashi pangele “omaludhi agehe gaantu, iigwana ayihe, omalaka agehe nomihoko adhihe dhaantu.” Onkee oshi na okukala shi vule epangelo kehe lyopantu. (Eh. 13:7) Osha yela kutya oshilikama shika oshi na okukala tashi thaneke omapangelo agehe gopapolotika, ngoka ga kala nokupangela aantu sigo okunena. * — Omuuv. 8:9.
7. Omitse heyali dhoshilikama kehe gumwe otagu thaneke shike?
7 Omutse kehe gwoshilikama shomitse heyali otagu thaneke shike? Ehololo ontopolwa 17 otali tu kwathele tu mone eyamukulo, oshoka olya yelitha oshilikama shoka sha popiwa mEhololo ontopolwa 13. MEhololo 17:9, 10, otatu lesha mo ngeyi: “Aakwaniilwa yaheyali: yatano yomuyo oya sa nale, gumwe ota pangele natango nomutiheyali ine ya. Ihe ngele te ke ya, ota ka pangela owala okathimbo okafupi.” Omapangelo agehe ngoka Satana a longitha, gaheyali oga yelekanithwa ‘nomitse,’ molwaashoka oga li ge na oonkondo odhindji. Omapangelo ngaka guuyuni oga kala nokupangela oshigwana shaKalunga noku shi pataneka. Pethimbo lyomuyapostoli Johannes, gatano gomugo oga adhika ga pangela nale. Ogo: Egipiti, Assiria, Babilonia, Medo-Persia, naGreka. Epangelo etihamano, Roma, olyo lya adhika natango tali pangele sho Johannes a pewa emoniko lyembo lyEhololo. Epangelo enankondo muuyuni etiheyali nolyahugunina nenge tu tye omutse omutiheyali ogwa li tagu thaneke shike?
8. Olye ta thanekwa komutse omutiheyali gwoshilikama?
8 Ngaashi tatu ke shi mona, omahunganeko ngoka ge li membo lyaDaniel otage tu kwathele tu tseye kutya omutse omutiheyali nogwa hugunina gwoshilikama otagu thaneke shike. Epangelo lini enankondo muuyuni lya kala tali pangele pethimbo ndika lyehulilo, ano pethimbo ‘lyEsiku lyOmuwa’? (Eh. 1:10) Iilongo iyali yi imanga kumwe, Britania nosho wo Amerika, nenge tu tye Anglo-Amerika. Onkee otatu vulu okuthika pehulithodhiladhilo kutya olyo omutse omutiheyali gwoshilikama shoka sha popiwa mEhololo 13:1-4.
OSHILIKAMA SHI NA OONIGA MBALI DHA FA OONIGA DHONZI
Osha “zi mevi” nohashi popi newi “lya fa lyoshikoko.” Ohashi ithana “omulilo, gu ze megulu” nohashi longo iikumithalonga sha fa “omuhunganeki omufundja.” (Eh. 13:11-15; 16:13; 19:20) Epangelo lyaAnglo-Amerika ndyoka li li oshilikama shi na ooniga mbali nomuhunganeki omufundja, ohali pukitha aantu ayehe yokombanda yevi nohali ya lombwele ya “honge oshiyelekela shoshilikama” shoka shi na omitse heyali nooniga omulongo (Tala okatendo 9)
9. Oshike tashi thanekwa koshilikama shi na “ooniga mbali dha fa ooniga dhonzi”?
9 Ehololo ontopolwa 13 olya tsikile ko tali ti kutya omutse omutiheyali, epangelo enankondo muuyuni, Anglo-Amerika, ohali ihumbata wo lya fa oshilikama shi na ‘ooniga mbali dha fa ooniga dhonzi, nohashi popi newi lya fa lyoshikoko.’ Oshilikama shika ‘ohashi longo iikumithalonga iinene. Ohashi ithana omulilo, gu ze megulu, gu gwile kombanda yevi, gwa talika kaantu ayehe.’ (Eh. 13:11-15) Ehololo ontopolwa 16 no 19 otadhi popi oshilikama shika kutya “omuhunganeki omufundja.” (Eh. 16:13; 19:20) Daniel naye okwa popya oshinima sha faathana, ano kutya epangelo enankondo muuyuni, Anglo-Amerika, olya li tali ka eta “ehanagulo li kenyaneka.” (Dan. 8:19, 23, 24) Shoka osho naanaa sha li sha ningwa pethimbo lyIita Iitiyali yUuyuni. Oomboma mbali ndhoka dha li dha hulitha po iita mbyoka dha topelele mEfuta lya Mwena, odha li dha ndulukwa po kaanongononi yaBritania naAmerika mboka ya li ya longele kumwe. Sho epangelo lyaAnglo-Amerika lya nduluka po oomboma ndhoka, kungawo olya ningitha “omulilo gu ze megulu, gu gwile kombanda yevi.”
OSHILIKAMA OSHITILIGANE
Osha kayilwa kohonda, Babilon Oshinene. Oshilikama shoka osha popiwa kutya omukwaniilwa omutihetatu. (Eh. 17:3-6, 8, 11) Tango ohonda ndjoka oya pangele oshilikama shoka, ihe konima osha ka hanagulwa po kusho. Ohonda ndjoka otayi thaneke uukwaniilwa womalongelokalunga giifundja. Oshilikama shoka kunena otashi thaneke Iigwana ya Hanga, mbyoka kunena hayi humitha komeho iinima yi na ko nasha nopolotika muuyuni awuhe (Tala okatendo 10, 14-17)
10. “Oshiyelekela shoshilikama” otashi thaneke shike? (Ehololo 13:14, 15; 17:3, 8, 11)
10 Montopolwa 13 yembo lyEhololo omwa popiwa ishewe oshilikama shilwe. Oshilikama shoka konyala ohashi monika sha fa oshilikama shomitse heyali, ihe sho oshitiligane. Ohashi ithanwa “oshiyelekela shoshilikama” notashi popiwa kutya “omukwaniilwa omutihetatu.” * (Lesha Ehololo 13:14, 15; 17:3, 8, 11.) “Omukwaniilwa” ngoka okwa popiwa kutya okwa holoka, e ta kala ishewe kee po we, konima e ta ka holoka natango. Oohapu ndhoka itadhi opalele tuu ehangano Iigwana ya Hangana ndyoka hali humitha komeho iinima yopapolotika muuyuni awuhe! Tango olya li hali ithanwa Oshipandi shIigwana. Olya ka kana po pethimbo lyIita Iitiyali yUuyuni. Konima yethimbo olya ka holoka ishewe nohali ithanwa Iigwana ya Hangana kunena.
11. Iilikama yopapolotika ohayi hwahwameke shike, nomolwashike kaatu na oku yi tila?
11 Iilikama mbyoka yopapolotika nenge omapangelo ohaga hwahwameke aantu ya pataneke Jehova noshigwana she. Pathaneko, iilikama mbyoka ohayi gongele ‘aakwaniilwa yokombanda yevi alihe’ yi ke ya hanganithe piita yaArmagedon, ‘esiku enene lyaKalunga Omunankondoadhihe.’ (Eh. 16:13, 14, 16) Ihe tse itatu ka kala twa tila nando osha. Kalunga ketu omunene, Jehova, ota ka katuka meendelelo a hupithe ayehe mboka haya ambidhidha uunamapangelo we. — Hes. 38:21-23.
12. Oshike tashi ka ningilwa iilikama mbyoka ayihe?
12 Oshike tashi ka ningilwa iilikama mbyoka ayihe? Ehololo 19:20 otayi yamukula tayi ti: “Oshilikama osha kwatwa, osho wo omuhunganeki omufundja ngoka a longo iikumithalonga montaneho yasho nokupukitha aantu mboka ye na endhindhiliko lyasho, naamboka ya li haa galikana oshiyelekela shasho. Oshilikama nomuhunganeki omufundja oyu umbilwa mefuta lyomulilo ye na omwenyo ngoka tagu hohelithwa osulufuli.” Nonando omapangelo ngaka gopapolotika nogeli aatondi yaKalunga otaga pangele natango, Kalunga ote ke ga hanagula po thiluthilu.
13. Uupyakadhi wuni omapangelo gamwe haga etele Aakriste ayehe?
13 Shoka otashi ti shike kutse? Tu li Aakriste, otu na okukala aadhiginini kuKalunga nokUukwaniilwa we. (Joh. 18:36) Opo tu shi ninge, otwa pumbwa okukala ihaatu gama ombinga miinima yopapolotika yomuuyuni mbuka. Ihe shoka ohashi vulu okukala oshidhigu noonkondo, molwaashoka omapangelo muuyuni ohaga kala ga hala tu ga ambidhidhe thiluthilu moohapu nomiilonga. Mboka hayi iyethele momathiminiko gawo, ohaya pewa endhindhiliko lyoshilikama shoka. (Eh. 13:16, 17) Ihe kehe ngoka ta pewa endhindhiliko ndyoka, ita kala a hokiwa kuJehova noita ka mona omwenyo gwaaluhe. (Eh. 14:9, 10; 20:4) Onkee ano, osha simana noonkondo kehe gumwe gwomutse a kale ihaa kutha nandonando ombinga miinima yomuuyuni, kashi na nduno mbudhi kutya otatu thiminikwa shi thike peni komapangelo tu ga ambidhidhe.
EHANAGULO TALI SITHA OHONI LYOHONDA KAMANA
14. Oshinima shini oshikumithi omuyapostoli Johannes a li mono ishewe, ngaashi sha popiwa mEhololo 17:3-5?
14 Omuyapostoli Johannes okwa popi kutya ‘okwa li a kumwa noonkondo’ koshinima shimwe ishewe a li a mono. Oshinima shoka oshini? Omukiintu a kayila shimwe shomiilikama mbika kaayi na ohenda. (Eh. 17:1, 2, 6) Okwa popiwa kutya “ohonda kamana” noti ithanwa “Babilon Oshinene.” Omukiintu ngoka oha ‘hondele naakwaniilwa yokombanda yevi.’ — Lesha Ehololo 17:3-5.
15-16. “Babilon Oshinene” olye, notu shi shi ngiini?
15 “Babilon Oshinene” olye? Omukiintu nguka ita thaneke ehangano lyontumba lyopapolotika, molwaashoka okwa popiwa kutya ota hondele naawiliki yopolotika yomuuyuni. (Eh. 18:9) Oha kambadhala nokuli oku ya pangela, oshoka okwa popiwa pathaneko kutya okwe ya kayila. Shimwe ishewe, ita vulu okukala e lile po oongeshefa ndhoka dhi na olwiho dhomuuyuni waSatana. Oongeshefa ndhoka odha popiwa moovelise dhilwe kutya “aahalithi yokombanda yevi.” — Eh. 18:11, 15, 16.
16 MOmbiimbeli, uutumbulilo “ohonda” ohawu vulu okuukithwa kaantu mboka hayi iti kutya ohaya longele Kalunga, ihe ohaya kutha ombinga mokulongela iikalunga nenge ye li ookuume kuuyuni. (1 Ondjal. 5:25; Jak. 4:4) Mepingathano naashono, mboka haya longele Kalunga nuudhiginini otaya popiwa pathaneko kutya ‘aayelele’ nenge ‘aakadhona.’ (2 Kor. 11:2; Eh. 14:4) Babilonia shonale osho sha li ondingandinga yomalongelokalunga giifundja. Onkee Babilon Oshinene oshi na okukala tashi thaneke omalongelokalunga agehe giifundja. Nokuli osho omukwaniilwa gwomalongelokalunga giifundja. — Eh. 17:5, 18; tala oshitopolwa “Babilon Oshinene oshike?” shi li kepandja lyokointaneta, jw.org.
17. Oshike tashi ka ningilwa Babilon Oshinene?
17 Oshike tashi ka ningilwa Babilon Oshinene? Ehololo 17:16, 17 otali ya yamukula epulo ndyoka ta li ti: “Ooniga omulongo we dhi mono, nosho wo oshilikama, otayi ka tonda ohonda ndjoka. Oyo otaa ke yi hula ashihe shoka yi na notaye ke yi thiga yi li olutu lwowala. Oyo otaa ka lya po onyama yayo notaa ke yi lungunitha po nomulilo. Oshoka Kalunga [“okwe shi tula moomwenyo dhawo, ya gwanithe po elalakano lye,” NW].” Jehova ote ki inyengitha iigwana yi longithe oshilikama oshitiligane, ano Iigwana ya Hangana, yi pilukile po uukwaniilwa womalongelokalunga giifundja e tayi wu hanagula po thiluthilu. — Eh. 18:21-24.
18. Ongiini tatu vulu okushilipaleka kutya ihatu yambidhidha Babilon Oshinene?
18 Shika otashi ti shike kutse? Otwa pumbwa okukaleka “elongelokalunga [lyetu] lya yela nolya yogoka koshipala shaKalunga.” (Jak. 1:27) Inatu etha nando tu nwethwe mo komalongo giifundja, kiituthi yoshipagani, keihumbato ewinayi lyomuuyuni mbuka, nokomikalondjigilile dhuumpulile dhaBabilon Oshinene! Pehala lyaashono, natu tsikile okulondodha aantu ya ‘ze mo musho,’ opo Kalunga kee ke ya tale ko kutya oye na ondjo yokukutha ombinga momayono gasho. — Eh. 18:4.
OMUTONDI OMUNENE GWAKALUNGA TA PANGULWA
OSHIKOKO OSHITILIGANE
Satana oye ha gandja oonkondopangelo koshilikama shoka. (Eh. 12:3, 9, 13; 13:4; 20:2, 10) E li omutondi omunene a shiga ko gwaKalunga, Satana ota ka umbilwa molumbogo, moka ta ka kala omimvo 1 000. Konima yaashoka, ota ka umbilwa ‘mefuta lyomulilo nosulufuli (Tala okatendo 19-20)
19. Olye “oshikoko oshinene oshitiligane”?
19 Embo lyEhololo otali popi wo “oshikoko oshinene oshitiligane.” (Eh. 12:3) Oshikoko shika ohashi kondjitha Jesus naayengeli ye. (Eh. 12:7-9) Ohashi ponokele oshigwana shaKalunga, nohashi gandja oonkondo kiilikama yopapolotika. (Eh. 12:17; 13:4) Oshikoko shika olye? “Eyoka ndyoka hali ithanwa Omuhindadhi nenge Satana.” (Eh. 12:9; 20:2) Oye ha yambidhidha aatondi yalwe ayehe yaJehova.
20. Oshike tashi ka ningilwa oshikoko?
20 Oshike tashi ka ningilwa oshikoko? Ehololo 20:1-3 otali popi kutya omuyengeli gumwe ota ka umbila Satana molumbogo, moka ta ka kala a fa a tulwa mondholongo. Pethimbo e li moka, Satana ita ka vula we ‘okupukitha aantu, sigo oomvula eyovi limwe dha piti po.’ Hugunina, Satana noompwidhuli dhe otaya ka umbilwa “mefuta lyomulilo nosulufuli,” sha hala okutya otaya ka hanagulwa po thiluthilu. (Eh. 20:10) Dhiladhila owala kutya uuyuni otawu ka kala wa tya ngiini kaawu na Satana noompwidhuli dhe! Itali ka kala tuu ethimbo ewanawa noonkondo!
21. Omolwashike tatu vulu okukala twa nyanyukwa kombinga yaashoka twa lesha membo lyEhololo?
21 Itashi tu tsu tuu omukumo sho tu uvu ko kutya omandhindhiliko ngoka ge li mEmbo lyEhololo otaga ti shike! Inatu vula owala okumona kutya aatondi yaJehova oyeni, ihe otwa mona wo kutya otaya ka ningilwa shike. Eeno shili, ‘kehe ngoka ta lesha muule oohapu dhomehunganeko ndika nakehe ngoka ta uvu shoka sha nyolwa mo, ota ka kala a nyanyukwa’! (Eh. 1:3, yelekanitha NW) Ihe ngele aatondi yaKalunga ya hanagulwa po, omayambeko geni aantu mboka haya vulika kuye taya ka mona? Oshinima shoka otatu ke shi kundathana moshitopolwa sha landula ko sha hugunina shomiitopolwa mbika ya pambathana.
EIMBILO 23 Uukwaniilwa waJehova owa tameka okupangela
^ Embo lyEhololo olya longitha omandhindhiliko li holole kutya aatondi yaKalunga oyeni. Embo lyaDaniel otali tu kwathele tu uve ko kutya omandhindhiliko ngoka otaga ti shike. Moshitopolwa shika, otatu ka yelekanitha omahunganeko gamwe ge li membo lyaDaniel naangoka ge ga fa ge li membo lyEhololo. Shoka otashi ke tu kwathela tu tseye kutya aatondi yaKalunga oyeni. Opo nduno otatu ka tala kwaashoka tashi ke ya ningilwa.
^ Oshinima shimwe ishewe shoka tashi ulike kutya oshilikama shomitse heyali otashi thaneke omapangelo gopapolotika osho kutya oshi na “ooniga omulongo.” Onomola omulongo olundji oya longithwa mOmbiimbeli tayi thaneke oshinima shi ihwapo.
^ Oshilikama shika kashi na “iishani” kooniga dhasho ngaashi oshilikama shotango. (Eh. 13:1) Shika osho shi li ngaaka molwaashoka ‘osha za maakwaniilwa yaheyali’ nohashi pewa oonkondopangelo kaakwaniilwa mboka. — Tala oshitopolwa “Oshilikama oshitiligane shoka sha popiwa mEhololo ontopolwa 17 oshike?” shi li kepandja lyetu lyokointaneta, jw.org.
