1-2. Omolwetompelo limwe lini tu na okukala tu na ohokwe membo lyEhololo?

 MBELA opu na oshikando shimwe wa li wa pewa oalbuma yagumwe ngoka wu shi wu tale mo? Sho wa tameke okutala omathano moalbuma ndjoka koolimwe noolimwe, owa mono mo iipala yaantu kuu ya shi. Ihe sho we ya pethano limwe, owa kala to li tongolola nawa. Omolwashike? Omolwaashoka methano moka nangoye omo wu li. Sho to li tala nawa, owa mono kutya omwa thanekelwe uunake nosho wo kutya omwa thanekelwa peni. Owa kambadhala wo okumona kutya oolye ye li methano ndyoka. Onkee ethano ndyoka otali ti sha lela kungoye.

² Embo lyEhololo olya fa naanaa ethano ndyoka. Omolwashike mbela? Omolwomatompelo gaali. Lyotango, embo ndika otse lya nyolelwa. Ovelise yotango yembo ndyoka otayi ti: “Embo ndika olyo ehokololo lyiiningwanima mbyoka Jesus Kristus e yi holola. Kalunga okwe mu pe ehololo ndika e li hololele aapiya yaKalunga shoka shi na okuningwa mbala.” (Eh. 1:1) Onkee ano, shono sha nyolwa membo ndika inashi nuninwa owala kehe omuntu, ihe osha nuninwa mboka yi iyapulila Kalunga. Tu li oshigwana shaKalunga, inashi tu kumitha uuna tu wete kutya otatu kutha ombinga megwanitho lyomahunganeko ngoka ge li membo ndika ekumithi. Osha yela kutya embo lyEhololo olya popya kombinga yiinima mbyoka ye tu guma pauhandimwe.

3-4. Shi ikolelela kembo lyEhololo, uunake omahunganeko gomembo ndyoka ga tameke okugwanithwa, naashoka oshi na oku tu inyengitha tu ninge shike?

³ Etompelo etiyali olya kwatela mo ethimbo ndyoka omahunganeko ngoka taga ka gwanithwa. Sho omuyapostoli Johannes a li omukokele, okwa popi kombinga yethimbo ndyoka a ti: ‘Ombepo ondjapuki oya ulikile ndje shoka tashi ningwa mesiku lyOmuwa.’ (Eh. 1:10, yelekanitha NW) Sho Johannes a nyola oohapu ndhoka lwomomumvo 96 E.N., ‘esiku lyOmuwa’ olya li li li natango kokule. (Mat. 25:14, 19; Luk. 19:12) Ihe shi ikolelela kembo lyEhololo,  esiku ndyoka olya tameke mo 1914 sho Jesus a langekwa po e li Omukwaniilwa megulu. Okuza momumvo ngoka okuuka komeho, omahunganeko gomembo lyEhololo ngoka ga kwatela mo oshigwana shaKalunga, oga tameke okugwanithwa. Eeno shili, otu li pethimbo ‘lyesiku lyOmuwa’!

⁴ Molwaashoka otu li pethimbo li tuntula, otwa pumbwa okugandja eitulomo li ikalekelwa komayele gopahole ngoka ge li mEhololo 1:3. Otaga ti: ‘Kehe ngoka ta lesha muule oohapu dhomehunganeko ndika, nakehe ngoka ta uvu nokuvulika kwaashoka sha nyolwa mo, ota ka kala a nyanyukwa, oshoka ethimbo oli li popepi uuna iinima mbika ayihe yi na okugwanithwa.’ Eeno shili, otwa pumbwa ‘okulesha muule,’ ‘okuuva oohapu dhomehunganeko ndika,’ ‘nokuvulika kudho.’ Oohapu dhimwe dhini twa pumbwa okuvulika kudho?

5. Embo lyEhololo otali shi ulike ngiini kutya osha simana tu shilipaleke kutya otatu longele Jehova momukalo ngoka a hokwa?

⁵ Montopolwa yotango yembo lyEhololo, otatu ilongo mo kutya Jesus oku wete lela shoka tashi ningwa momagongalo gaalanduli ye. (Eh. 1:12-16, 20; 2:1) Jesus okwe shi ulike kutya oha kala e shi shi, mokutala komatumwalaka ngoka a li a tumine omagongalo gaheyali gomuAsia Eshona. Momatumwalaka ngoka, okwa li a gandja omalombwelo gokondandalunde a kwathele Aakriste yomethelemumvo lyotango ya shilipaleke kutya otaya longele Jehova momukalo ngoka a hokwa. Ihe nonando ongawo, shono a popi osha kwatela mo wo oshigwana shaKalunga ashihe kunena. Shika otashi tu longo shike? Omuwiliki gwetu, Jesus Kristus, oku shi nawa lela kutya ekwatathano lyetu naJehova oli li ngiini. Jesus oye te tu wilike, onkee kapu na shoka ihaa kala kee wete. Oku shi shoka twa pumbwa okuninga, opo tu tsikile okukala twa hokiwa kuJehova. Omalombwelo geni e tu pa ngoka twa pumbwa okuvulika kugo kunena?

6. (a) Oohapu dhaJesus ndhoka dhi li mEhololo 2:3, 4 otadhi ulike kutya egongalo lyomuEfeso olya li li na uupyakadhi wuni? (b) Otatu ilongo mo shike moshinima shoka?

⁶ Lesha Ehololo 2:3, 4. Inatu etha po ohole yetu yotango yokuhola Jehova. Etumwalaka ndyoka Jesus a li a tumine Aakriste yomegongalo lyaEfeso otali ulike kutya oya li yi idhidhimike noya li ya tsikile okulongela Jehova nonando oya li ye li momaudhigu gi ili nogi ili. Ihe nonando ongawo, oya li ya etha po ohole yawo yotango. Onkee oya li ishewe ya pumbwa okukokeka ohole ndjoka, oshoka ngele hasho, Jehova kali ta ka kala a hokwa omukalo moka taye mu longele. Sha faathana nokunena, natse otwa pumbwa okuninga oshindji shi vulithe owala pokwiidhidhimikila omaudhigu. Otwa pumbwa okwiidhidhimika, tatu inyengithwa komatompelo ga uka. Kalunga ketu iha kala owala e na ohokwe mwaashoka hatu ningi, ihe oha kala wo e na ko nasha kutya omolwashike tatu shi ningile. Omainyengotompelo getu oga simana kuye, molwaashoka okwa hala tu mu longele oshoka otu mu hole nomutima aguhe nosho wo kutya otwe mu pandula. — Omayel. 16:2; Mark. 12:29, 30.

7. (a) Ngaashi sha popiwa mEhololo 3:1-3, Jesus okwa li a popi kutya aakwanegongalo yomegongalo lyaSardis oya li ye na uupyakadhi wuni? (b) Oshike twa pumbwa okuninga?

⁷ Lesha Ehololo 3:1-3. Natu tsikile okukala twa tonata. Ooitaali megongalo lyaSardis oya li ye na uupyakadhi wulwe wi ili. Nonando oya kala taya longele Jehova nuudhiginini monakuziwa, oya li ya etha po oku shi ninga. Onkee Jesus okwe ya lombwele ya ‘tonate.’ Shoka otashi tu longo shike? Odhoshili kutya Jehova ke na esiku a dhimbwe iilonga yetu. (Heb. 6:10) Ihe nonando ongawo, inatu dhiladhila kutya molwaashoka otwa kala tatu mu longele monakuziwa, ngashingeyi inatu pumbwa we oku shi ninga. Kutya nduno ngashingeyi otu na omangambeko, otwa  pumbwa okukala twi ipyakidhila ‘niilonga yOmuwa,’ nokukala twa tonata sigo okehulilo. — 1 Kor. 15:58; Mat. 24:13; Mark. 13:33.

8. Oshike tatu ilongo metumwalaka ndyoka Jesus a li a pe aamwatate yokuLaodikea mEhololo 3:15-17?

⁸ Lesha Ehololo 3:15-17. Natu kale aalaadhi nokulongela Jehova nomutima gwetu aguhe. Etumwalaka ndyoka Jesus a li a tumine aakwanegongalo yokuLaodikea otali ulike kutya nayo oya li ye na uupyakadhi uukwawo wi ili. Oya li ye na “okayenye okashona” kowala mokulongela Jehova. Molwaashoka oya li kaaye na ko nasha, Jesus okwe ya lombwele a ti kutya ‘inaya nyanyukwa notaya etitha ohenda.’ (NW) Oya li ye na okukala taya longele Jehova nuulaadhi nokukala aadhiginini kelongelokalunga lye. (Eh. 3:19) Oshike tatu ilongo moshinima shika? Ngele ngashingeyi katu na we uulaadhi wokulongela Jehova ngaashi nale, otu na okukokeka olupandu lwetu omolwiinima iiwanawa mbyoka hatu mono okuza kuJehova nokehangano lye. (Eh. 3:18) Inatu lalakanena nando onkalamwenyo yuuzeko, shoka tashi ka ningitha okulongela kwetu Jehova kaaku kale we pondondo yotango monkalamwenyo yetu.

9. Ngaashi sha ulikwa metumwalaka ndyoka Jesus a li a tumine Aakriste yokuPergamo noyokuTiatira, oshike tu na okuyanda?

⁹ Otu na okuyanda omalongo gaashunimonima. Jesus okwa li a ganda Aakriste yomegongalo lyaPergamo, molwaashoka oya li taya humitha komeho etopoko niimpaga. (Eh. 2:14-16) Ihe okwa li a pandula Aakriste yomegongalo lyaTiatira mboka ya li ya yanda “iiholekwa yaSatana,” e te ya ladhipike ya “dhiginine” oshili. (Eh. 2:24-26) Aakriste mboka ekwatathano lwawo naJehova lya li lya nkundipala noya li yi iyetha ya pukithwe komalongo giifundja oya li ya pumbwa okwiitedhulula. Ongiini kombinga yetu kunena? Otu na okuyanda elongo kehe ndyoka li li ompinge nomadhiladhilo gaJehova. Aashunimonima otashi vulika ya monike “ya fa haa simaneke Kalunga,” ihe ohaya “idhimbike oonkondo dhe.” (2 Tim. 3:5) Oshipu lela okudhimbulula mo nokuyanda omalongo giifundja ngele ohatu konakona nawa oohapu dhaKalunga. — 2 Tim. 3:14-17; Jud. 3, 4.

10. Oshike ishewe tatu ilongo mwaashoka Jesus a lombwele egongalo lyaPergamo nolyaTiatira?

¹⁰ Inatu popila nokukutha ombinga momilalo dha nyata nenge tu dhi pitike. Megongalo lyaPergamo nolyaTiatira omwa li ishewe mu na uupyakadhi wulwe. Jesus okwa li a ganda yamwe momagongalo ngoka, molwaashoka oya li ya pitike mboka haya kutha ombinga momilalo dha nyata ya kale mokati kawo. (Eh. 2:14, 20) Shoka otashi tu longo shike? Jehova ke na siku a pitike tu kuthe ombinga momilalo dha nyata, nonando otwe mu longela omimvo odhindji nosho wo kutya  ngashingeyi otu na iinakugwanithwa oyindji. (1 Sam. 15:22; 1 Pet. 2:16) Jehova okwa hala tu kale twa lenga omithikampango dhe dha dhenga mbanda dhopamikalo, kashi na nduno mbudhi kutya eihumbato muuyuni olya nayipala shi thike peni. — Ef. 6:11-13.

11. Sigo oompaka otwi ilongo shike? (Tala oshimpungu “ Iiyilongomwa kutse kunena.”)

¹¹ Sigo oompano otwi ilongo shike? Otwa mona kutya otwa pumbwa okushilipaleka kutya otatu longele Jehova momukalo ngoka a hokwa. Ngele opu na oshinima oshiwinayi hatu ningi, shoka tashi tu ningitha kaatu kale twa hokiwa kuye, otwa pumbwa okuninga omalunduluko meendelelo, opo a kale e tu hokwa. (Eh. 2:5, 16; 3:3, 16) Jesus okwa li wo a tumbula oshinima shimwe metumwalaka ndyoka a li a nyolele omagongalo. Oshinima shoka oshini?

12. Oshike tatu ilongo metumwalaka ndyoka Jesus a li e pe aamwatate yomegongalo lyaSmirna nolyaFiladelfia? (Ehololo 2:10)

¹² Ngashingeyi natu ka taleni komatumwalaka ngoka Jesus a li a tumine egongalo lyaSmirna nolyaFiladelfia. Okwa li a lombwele Aakriste yomegongalo ndyoka kaaya kale ya tila okuhepekwa, molwaashoka ngele oya kala aadhiginini, Jehova okwa li te ke ya pa ondjambi. (Lesha Ehololo 2:10; 3:10) Shoka otashi tu longo shike kunena? Natu kale tu shi kutya omathimbo gamwe otatu ka hepekwa, onkee inatu kala twa tila okwiidhidhimikila omahepeko ngoka. (Mat. 24:9, 13; 2 Kor. 12:10) Omolwashike edhimbulukitho ndika lya simana?

13-14. Oshigwana shaKalunga osha gumwa ngiini kiiningwanima mbyoka ya popiwa mEhololo ontopolwa 12?

¹³ Membo lyEhololo otamu popiwa ishewe kutya oshigwana shaKalunga otashi ka hepekwa pethimbo lyetu, ano ‘mesiku lyOmuwa.’ Ehololo ontopolwa 12 oya popya kutya megulu omwa li mwa tukuluka olugodhi nziya konima sho Jesus a langekwa po e li Omukwaniilwa gwUukwaniilwa waKalunga. Mikael, Jesus Kristus omutumbalekwa, naayengeli ye oya kondjitha Satana noompwidhuli dhe. (Eh. 12:7, 8) Oshizemo osha li shini? Aatondi mboka yaKalunga oya sindika e taya umbilwa kombanda yevi, noya kala taya etele aantu okumona iihuna okundji. (Eh. 12:9, 12) Sho oshinima shoka sha ningwa, osha gumu ngiini oshigwana shaKalunga?

¹⁴ Ontopolwa 12 yembo lyEhololo otayi popi ishewe kutya Satana okwi inyenge ngiini. Ngashingeyi ke mo we megulu, onkee oha kala ta hepeke nonyanya oshihupe shaagwayekwa mboka ye li aakalelipo yUukwaniilwa waKalunga yokombanda yevi ‘nohaya tseyitha oshili kombinga yaJesus.’ (Eh. 12:17, yelekanitha NW; 2 Kor. 5:20; Ef. 6:19, 20) Ehunganeko ndyoka olya kala nokugwanithwa ngiini?

15. Oolye taya thanekwa ‘kaahokololi yaali’ mboka ya popiwa mEhololo ontopolwa 11, noshike sha li she ya ningilwa?

¹⁵ Satana okwa li a ningitha aatondi yaKalunga  ya ponokele aamwatate aagwayekwa mboka ya li taya kwatele komeho iilonga yUukwaniilwa yokuuvitha. Yamwe yomaalumentu mboka oya popiwa pathaneko ye li “aahokololi yaali” ya dhipagwa. * (Eh. 11:3, 7-11) Mo 1918, aamwatate yahetatu mboka ya li taya kwatele komeho oya li ya lundilwa e taya tokolelwa ondholongo yomimvo odhindji, oshoka aniwa oya li ya monika ondjo. Pataloko lyopantu, iilonga yaalumentu mboka aagwayekwa oya li tayi monika ya “dhipagwa” pathaneko.

16. Momumvo 1919 omwa ningwa shike oshihokithi, na Satana okwa tsikile okuninga shike okuza pethimbo ndyoka?

¹⁶ Ehunganeko ndyoka li li mEhololo ontopolwa 11 olya popi wo kutya “aahokololi yaali” oya li taya ka yumudhwa konima yethimbo efupi. Sho ehunganeko ndyoka lya gwanithwa mo 1919, opwa ningwa oshinima oshihokithi konima owala sho ya kala mondholongo uule womumvo gumwe. MuMaalitsa 1919, aamwatate mboka aagwayekwa oya li ya mangululwa mo mondholongo, nokonima oshipotha shawo osha ekelwahi. Aamwatate mboka oya tameke nziya okuuvitha onkundana yUukwaniilwa. Ihe shoka inashi keelela Satana a ponokele natango oshigwana shaKalunga. Okuza pethimbo ndyoka, Satana okwa kala nokweetela oshigwana shaKalunga omahepeko ngoka ga fa ‘omulonga.’ (Eh. 12:15) Onkee ano, shino ‘otashi pula shili kehe gumwe gwomutse a kale e na eidhidhimiko neitaalo.’ — Eh. 13:10.

17. Oshigwana shaKalunga osha li sha mono ekwatho lini ndyoka sha li inaa shi tegelela nonando osha kala tashi ponokelwa kuSatana?

¹⁷ Ontopolwa 12 yembo lyEhololo otayi ulike kutya oshigwana shaKalunga osha li tashi ka mona ekwatho konzo yimwe hoka sha li inaa shi tegelela shi mone ekwatho. Embo lyEhololo olya popya oshinima shoka pathaneko kutya otashi ka kala sha fa “evi” tali pona po “omeya” nenge omulonga gwomahepeko. (Eh. 12:16) Naashoka osho naanaa sha ningwa. Omathimbo nomathimbo, omahangano ngoka haga popile aantu muuyuni waSatana, ngaashi gamwe gopampangu, oga kala nokupopila oshigwana shaKalunga. Iikando oyindji, aapiya yaJehova oya sindana po iipotha moompangu, shoka she ya kwathele ya mone emanguluko lyontumba ya longele Jehova. Emanguluko lyawo ndyoka oye li longitha ngiini? Oya kala nokukutha ombinga ngaashi taya vulu miilonga mbyoka Jehova e ya pa. (1 Kor. 16:9) Iilonga mbyoka oya kwatela mo shike?

18. Oshilonga shetu sha simanenena oshini pethimbo ndika lyomasiku gahugunina?

 ¹⁸ Jesus okwa li a hunganeke kutya aalanduli ye otaye ku uvitha ‘elaka etoye lyOshilongo shaKalunga’ kombanda yevi alihe manga ehulilo inaali ya. (Mat. 24:14) Sho taya uvitha, ohaya kwathelwa komuyengeli nenge kongundu yaayengeli mboka ya popiwa ye na ‘oohapu dhelaka etoye lyaaluhe, ya tuka mombanda muule, ya ka uvithile aantu yokombanda yevi, omihoko adhihe, omaludhi agehe, omalaka agehe niigwana ayihe.’ — Eh. 14:6.

19. Etumwalaka lilwe lini li na okuuvithwa kwaamboka ye hole Jehova?

¹⁹ Onkundana ombwanawa yUukwaniilwa hayo owala etumwalaka ndyoka oshigwana shaKalunga shi na okuuvitha. Ihe osha pumbwa wo okuyambidhidha iilonga yaayengeli mboka ya popiwa mEhololo ontopolwa 8 sigo 10. Aayengeli mboka oya popiwa kutya otaya tseyitha omaudhigu ga kwata miiti ngoka taga ka adha aantu mboka kaaye na ko nasha nUukwaniilwa waKalunga. Onkee Oonzapo dhaJehova odha kala nokuuvitha etumwalaka lyepangulo itaali lile omuntu okathima koluko, ndyoka lya faathanithwa ‘noompawe nomulilo’ notali yelitha kombinga yepangulo lyaKalunga sho ta ka pangula iitopolwa yi ili noyi ili yUuyuni waSatana. (Eh. 8:7, 13) Onkee, aantu oya pumbwa okutseya kutya ehulilo oli li popepi, opo ya ninge omalunduluko ngoka ga pumbiwa moonkalamwenyo dhawo noya ka hupe mesiku lyondjahi yaJehova. (Sef. 2:2, 3) Ihe etumwalaka ndika kali holike. Otwa pumbwa okukala tu na uulaadhi, opo tu li lombwele aantu. Pethimbo lyuudhigu uunene, etumwalaka lya hugunina lyepangulo otali ka kala edhigu noonkondo. — Eh. 16:21.

20. Oshike tatu ka konakona miitopolwa iyali ya landula ko?

²⁰ Otwa pumbwa okuvulika ‘koohapu dhomehunganeko ndika’ molwaashoka natse otwa kwatelwa mo megwanitho lyaashoka hatu lesha membo lyEhololo. (Eh. 1:3) Ihe ongiini tatu vulu okwiidhidhimikila omahepeko nuudhiginini e tatu tsikile okuuvitha omatumwalaka ngoka nuulaadhi? Otatu ka tsuwa omukumo kiinima iyali. Shotango, okwaashoka embo lyEhololo tali popi kombinga yaatondi yaKalunga, noshitiyali, okomayambeko gomonakuyiwa ngoka tatu ka mona ngele otwa kala aadhiginini. Natu ka taleni kiinima mbyoka miitopolwa iyali tayi landula ko.