OSHITOPOLWA SHOKUKONAKONWA 22
Omayele gopandunge ngoka taga vulu oku tu kwathela kehe esiku
“Omuwa ota gandja owino.” — OMAYEL. 2:6.
EIMBILO 89 Vulika, pulakena, opo wu yambekwe
ELALAKANO LYOSHITOPOLWA *
1. Omolwashike twa pumbwa uunongo wopakalunga? (Omayeletumbulo 4:7)
MBELA opu na oshikando shimwe wa li wu na okuninga etokolo lya simana? Kapu na omalimbililo kutya owu na okukala wa li wa galikana wu pewe owino, oshoka owa li wu shi kutya owe yi pumbwa. (Jak. 1:5) Omukwaniilwa Salomo okwa nyola a ti: ‘Owino oyo oshinima sha simanenena.’ (Lesha Omayeletumbulo 4:7, yelekanitha NW) Salomo kali ta popi owino kehe, ihe okwa li ta popi owino ndjoka hayi zi kuJehova Kalunga. (Omayel. 2:6) Ihe mbela owino ndjoka yopakalunga otayi vulu ngaa oku tu kwathela tu ungaunge nuupyakadhi kehe mboka tu na kunena? Eeno, otayi vulu, ngaashi tatu ke shi mona moshitopolwa shika.
2. Omukalo gumwe guni tagu vulu oku tu kwathela tu kale tu na oondunge lela?
2 Omukalo gumwe moka tatu vulu okukala tu na oondunge, okukonakona nokutula miilonga omayele gaalumentu yaali mbono ya li ya simanekwa apuhe, molwaashono oya li lela ye na oondunge. Tango, otatu ka tala kuSalomo. Ombiimbeli otayi ti kutya “Kalunga okwa pe Salomo owino tau kumitha noondunge nomayele kaage shi kuyelekwa.” (1 Aak. 4:29) Hugunina, otatu ka tala kuJesus, ngoka a li e na owino ya shiga ko kombanda yevi. (Mat. 12:42) Ombiimbeli oya hunganeka kombinga yaJesus ya ti: “Ombepo yOmuwa otayi mu lambele, ombepo yowino noyoondunge.” — Jes. 11:2.
3. Oshike tatu ka kundathana moshitopolwa shika?
3 Salomo naJesus oya li ye na oondunge ye dhi pewa kuKalunga, onkee oya li ya vulu okugandja omayele omawanawa ge na ko nasha niimaliwa. Moshitopolwa shika, otatu ka tala kugatatu gomugo: Okukala tu na etaloko li li pandjele li na ko nasha niimaliwa, niilonga nosho wo kombinga yetu yene.
ETALOKO LILI PANDJELE LI NA KO NASHA NIIMALIWA
4. Uuhupilo waSalomo owa li wa yooloka ko ngiini kuwaJesus?
4 Salomo okwa li lela omuyamba, nokwa li ha kala megumbo ewanawa lyuuzeko. (1 Aak. 10:7, 14, 15) Omanga Jesus a li e na iiniwe iishona noka li e na egumbo lye mwene. (Mat. 8:20) Ihe aalumentu mbaka ayehe oya li ye na etaloko li li pandjele lyiinima yopamaliko, molwaashoka oya li ye na oondunge dha za kOnzo yimwe, Jehova Kalunga.
5. Salomo okwa li e na etaloko lini li li pandjele kombinga yiimaliwa?
5 Salomo okwa popi kutya iimaliwa oyi li “egameno.” (Omuuv. 7:12) Ngele omuntu oku na iimaliwa, oha vulu okwiimonena iipumbiwa yakehe esiku, naambyoka tashi vulika a hala. Ihe nonando Salomo okwa li omuyamba, okwa li e shi mono kutya opu na iinima yimwe ya simana noonkondo yi vule iimaliwa. Pashiholelwa, okwa nyola a ti: “Edhina [“ewanawa” NW] olya simana li vule omaliko ogendji.” (Omayel. 22:1) Salomo okwa li wo e shi ndhindhilike kutya aantu mboka ye hole iimaliwa ihaya kala ya mbilipalelwa kwaashono ye na. (Omuuv. 5:10, 12) Okwa londodha wo aantu kaaya kale yi inekela iimaliwa, oshoka kutya nduno otu yi na yi thike peni, otayi vulu okupwa po mbala. — Omayel. 23:4, 5.
Mbela etaloko lyetu lyiinima yopamaliko ohali tu imbi tu pitithe komeho okulongela Jehova? (Tala okatendo 6-7) *
6. Jesus okwa li e na etaloko lini li li pandjele li na ko na sha niinima yopamaliko? (Mateus 6:31-33)
6 Jesus okwa li e na ondjele niinima yopamaliko. Okwa li a nyanyukilwa okulya iikulya nokunwa omaviinu. (Luk. 19:2, 6, 7) Pompito yimwe okwa li a shitukitha omeya omaviinu omatoye, shoka sha li oshikumithalonga she shotango. (Joh. 2:10, 11) Mesiku ndyono a si, okwa li a zala onguwo yondilo. (Joh. 19:23, 24) Ihe Jesus kali a pititha komeho iinima yopamaliko monkalamwenyo ye. Okwa li a lombwele aalongwa ye a ti: “Kaku na ngoka ta vulu okulongela aawa yaali, . . . Kamu vulu okulongela Kalunga pamwe nemona.” (Mat. 6:24) Jesus okwa li a longo aantu kutya ngele oya kongo tango Uukwaniilwa waKalunga, Jehova ota ka shilipaleka kutya oye na shoka ya pumbwa. — Lesha Mateus 6:31-33.
7. Omumwatate gumwe okwa mono ngiini uuwanawa sho a kala e na etaloko li li pandjele lyiimaliwa?
7 Aamwatate naamwameme oyendji oya mona uuwanawa sho ya tula miilonga omayele gaJehova gopandunge ge na ko nasha niimaliwa. Tala koshiholelwa shomumwatate inaa hokana, Daniel. Okwa ti: “Sho nda li ndi na omimvo omulongo nasha, onda li nda tokola kutya okulongela Jehova okwo oshinima tashi kala sha simanenena monkalamwenyo yandje.” Molwaashoka Daniel okwa li a kaleke onkalamwenyo ye paunathangwa, okwa li a vulu okulongitha ethimbo lye nuunkulungu we mooproyeka odhindji dhehangano lyaJehova. Okwa gwedha ko a ti: “Otandi popi oshili kutya kapu nando esiku limwe ndi ilya ominwe kombinga yetokolo ndyoka nda ninga. Odhoshili kutya onda li tandi vulu okulikola iimaliwa oyindji ngele andola oyo nda li nda pititha komeho monkalamwenyo yandje. Ihe ngele andola osho nda ningile, ando inandi mona ookuume aawanawa mboka ndi na ngashingeyi. Shimwe ishewe, ando inandi kala nda nyanyukwa ngaashi sho ngashingeyi handi gandja eitulomo kokulongela Jehova. Omayambeko ngono Jehova a pa ndje itaga vulu okuyelekanithwa niimaliwa mbyoka nda li tandi vulu okwiimonena.” Osha yela kutya ohatu mono uuwanawa ngele ohatu gandja eitulomo kokulongela Jehova, ihe hakiimaliwa.
ETALOKO LI LI PANDJELE LYIILONGA YOKWIIKONGELA OMBOLOTO
8. Otu shi shi ngiini kutya Salomo okwa li e na etaloko li li pandjele lyiilonga? (Omuuvithi 5:18, 19)
8 Salomo okwa li a popi kutya enyanyu ndyoka hali zi mokulonga iilonga yetu nuudhiginini, “omagano gaKalunga.” (Lesha Omuuvithi 5:18, 19.) Okwa nyola a ti: ‘Okulonga nuudhiginini ohaku likolitha omuntu’ nenge tu tye ohaku etele omuntu uuwanawa. (Omayel. 14:23, yelekanitha NW) Salomo okwa li e shi kutya ota popi shike, oshoka naye okwa li omuniilonga. Okwa li a tungu omagumbo, a tsike iitsambe yomiviinu, i ikunine omapya, nokwa li a hupu omatale. Okwa li wo a tungu iilando. (1 Aak. 9:19; Omuuv. 2:4-6) Iilonga mbyono oya li iidhigu shili, nosha yela kutya oya li ye mu ningitha a kale a nyanyukwa. Ihe Salomo kali i ikolelela kiilonga mbyoka oyo yi mu pe enyanyu. Okwa li wo a kutha ombinga miilonga yokulongela Jehova. Pashiholelwa, okwa li a wilike iilonga yokutunga otempeli yelongelokalunga lyaJehova, ndjoka ya li ya pula omimvo heyali! (1 Aak. 6:38; 9:1) Konima sho a li a kutha ombinga miilonga ye mwene naambyono yaJehova, Salomo okwa li e shi mono kutya iilonga yokulongela Jehova oyo ya simana yi vule yokwiikongela omboloto. Okwa nyola a ti: “Ekota lyaashihe shu uvika, olyo ndika: Tila Kalunga nou dhiginine iipango ye.” — Omuuv. 12:13.
9. Jesus okwa li a shilipaleke ngiini kutya iilonga ye yokuhonga iipilangi hayo yi na okukala ya simanenena kuye?
9 Jesus okwa li ha longo nuudhiginini. Sho a li omugundjuka okwa li ha hongo iipilangi. (Mark. 6:3) Osha yela wo kutya aavali ye oya li haya kala ya pandula ekwatho lye sho taya longo nuudhiginini ya sile oshimpwiyu uukwanegumbo wawo, unene tuu palutu. Molwaashoka Jesus okwa li a gwanenena nokwa li ha longo nawanawa iilonga yokuhonga iipilangi, aantu oyendji otashi vulika ya li haya kala ya hala e ya ningile iinima. Jesus oku na okukala a li ha nyanyukilwa iilonga ye. Ihe nonando okwa li ha longo iilonga mbyoka, okwa li ha shilipaleke aluhe kutya okwiitulila po ethimbo a longele Jehova. (Joh. 7:15) Konima yethimbo sho a ka kala omuuvithi gwonkundana ombwanawa, okwa li a ladhipike aapulakeni ye a ti: ‘Inamu longela iikulya mbyoka tayi hulu po, ihe iikulya mbyoka tayi kalelele sigo omomwenyo gwaaluhe.’ (Joh. 6:27, yelekanitha NW) MEuvitho lye lyokOndundu okwa li wo a popi a ti: “Ilikoleleni omaliko megulu.” — Mat. 6:20.
Ongiini tatu vulu okukala twa tala ko pandjele iilonga yetu yokwiikongela omboloto nomaipyakidhilo getu gokulongela Jehova? (Tala okatendo 10-11) *
10. Uupyakadhi wuni tashi vulika wu holoke po ngele tashi ya piilonga yetu yokwiikongela omboloto?
10 Uunongo wopakalunga ohawu tu kwathele tu kale tu na etaloko li li pandjele lyiilonga yokwiikongela omboloto. Tu li Aakriste, ohatu longwa tu longe ‘iilonga yetu nuudhiginini, iilonga iiwanawa.’ (Ef. 4:28, NW) Aahona yetu olundji ohaye shi ndhindhilike kutya tse otu li aanashili nohatu longo nuudhiginini, nohashi vulika ye tu lombwele kutya oya pandula lela iilonga yetu. Onkee omolwomainyengotompelo omawanawa, otashi vulika tu tameke okudhiladhila tu longe oowili odhindji, tatu dhiladhila kutya aahona yetu otaya ka dhiladhilila muuwanawa Oonzapo dhaJehova. Ihe nziya otashi vulika tu shi mone kutya ihatu kala we ethimbo olindji nomaukwanegumbo getu, noihatu kutha we ombinga miilonga yaJehova. Onkee otatu ka pumbwa okuninga omalunduluko, opo tu kale tu na ethimbo lyokuninga iinima mbyoka ya simanenena.
11. Omumwatate gumwe okwi ilongo shike kombinga yokukala tu na etaloko li li pandjele kombinga yiilonga?
11 Omumwatate gumwe omugundjuka William, okwe shi ndhindhilika kutya osha simana okulonga iilonga yokwiikongela omboloto pethimbo ndyoka owala tu na oku yi longa. Okwa popi kombinga yomukuluntugongalo gumwe ngono a li ha longele a ti: “[Omumwatate ngoka] oku li lela oshiholelwa oshiwanawa sha gumwe ngoka e na etaloko li li pandjele lyiilonga. Oha longo nuudhiginini, noku na ekwatathano ewanawa nookastoma dhe, molwaashoka oha longo iilonga ye nawa. Ihe ngele owili yokuzimbuka ya thiki, oha kala e shi kutya iilonga ye oku na oku yi etha a ka gandje eitulomo kuukwanegumbo we nokokulongela Jehova. Ihe owu shi ngaa kutya ongiini? Omumwatate ngoka oye omuntu gumwe ngoka ndi shi a nyanyukwa lela!” *
OKWIITALA KO PANDJELE
12. Salomo okwa li a ulike ngiini kutya okwi itala ko pandjele, ihe okwa li a kanitha ngiini etaloko ndyono?
12 Sho Salomo a li omulongeli gwaJehova omudhiginini, okwa i itala ko pandjele. Sho a li omulumentu omugundjuka, okwa li e shi zimine kutya oku na omangambeko nokwa li a pula Jehova e mu wilike. (1 Aak. 3:7-9) Petameko lyokupangela kwe, Salomo okwa li wo e shi kutya osha nika oshiponga okukwatwa kuuntsa. Okwa nyola a ti: “Uuntsa tau tetekele ehanagulo, einenepeko otali tetekele epunduko.” (Omayel. 16:18) Shiyemateka, konima yethimbo Salomo okwa ka ndopa okutula omayele ngoka ge mwene miilonga. Pompito yimwe pethimbo ta pangele, okwa li a kwatwa kuuntsa e ta tameke okukala ihaa vulika kuJehova. Pashiholelwa, ompango yimwe yomoompango oya li tayi ti kutya omukwaniilwa Omuhebeli ina kala “e na aanyekadhi oyendji, oshoka shika otashi mu pilamenitha Omuwa.” (Deut. 17:17) Salomo okwa li i ipwililikile ompango ndjoka, e ti ikongele aakulukadhi 700 naakiintu yoponto 300, noyendji yomuyo oya li aapagani! (1 Aak. 11:1-3) Otashi vulika Salomo a li e wete kutya oshinima shoka inashi nika oshiponga. Kutya nduno oshike, mokweendela ko kwethimbo Salomo okwa ka adhika kiilanduliko molwaashoka kali a vulika kuJehova. — 1 Aak. 11:9-13.
13. Oshike tatu ilongo kuukwatya waJesus weifupipiko?
13 Jesus okwa li ha kala itala ko pandjele nokwa li omwiifupipiki. Manga inee ya kombanda yevi, Jesus okwa li a ningi iinima iikumithi sho a li ta longo naJehova. Jehova okwa li a “shititha Kristus iinima ayihe yomegulu noyokombanda yevi.” (Kol. 1:16) Peninginitho lye, Jesus okwa li e shi ulike kutya okwa li a dhimbulukwa iinima mbyono a gwanitha po sho a li e li naHe megulu. (Mat. 3:16; Joh. 17:5) Ihe ontseyo ndjoka inayi ningitha Jesus a kale e na uuntsa. Shimwe ishewe, kali i ihumbata momukalo ngoka tagu ulike kutya oku vule yalwe. Okwa li a lombwele aalongwa ye a ti kutya “ine ya okuyakulwa, ihe okuyakula nokugandja omwenyo gwe, a hupithe oyendji.” (Mat. 20:28) Okwa li wo a popi kutya iha vulu nando okuninga sha kuye mwene. (Joh. 5:19) Jesus kali tuu a ulike eifupipiko! Okwe tu tulila po lela oshiholelwa oshiwanawa shoka tatu vulu okulandula.
14. Oshike tatu vulu okwiilonga kuJesus kombinga yokukala twi itala ko pandjele?
14 Jesus okwa li a longo aalanduli ye ya kale yi itala ko pandjele. Pompito yimwe okwa li e ya shilipaleke a ti: “Omafufu geni agehe gokomutse oga yalulwa.” (Mat. 10:30) Oohapu ndhono natse ohadhi tu hekeleke noonkondo, unene tuu ngele otu na egamo lyokwiitala ko nayi. Otadhi ulike kutya Tate gwetu gwomegulu oku na ko lela nasha natse, ano kutya otu na oshilonga momeho ge. Ngele Jehova okwe tu pitika tu mu longele, noku wete kutya otwa gwana okukala nomwenyo sigo aluhe muuyuni uupe, inatu dhiladhila nando kutya okwa puka.
Oshike tashi vulu oku tu ningilwa, ngele inatu itala ko pandjele? (Tala okatendo 15) *
15. (a) Oshungolangelo yimwe oya popi kutya otu na okukala twi itala ko ngiini? (b) Ngaashi tashi ulikwa methano pepandja 24, ngele ohatu gandja eitulomo lya pitilila kutse yene, omayambeko geni hatu iyimbi?
15 Omimvo 15 dha ka pita, Oshungolangelo oya li ya popi kutya otu na okukala hatu itala ko pandjele. Oya ti: ‘Dhoshili, inatu hala tu kale hatu dhiladhila kutya otwa simana unene sigo tatu kwatwa kuuntsa, noinatu hala wo okukala tu na etaloko tali kondjithathana naandyoka nokudhiladhila kutya katu na nando oshilonga. Pehala lyaashono, natu kale hatu itala ko pandjele, sha hala okutya otu na okukala tu shi kutya otu na iinima moka hatu shi enditha nawa notu na wo omaunkundi. Omukiintu gumwe Omukriste okwe shi popi momukalo nguka a ti: ‘Ngame kandi shi naana omuntu e li nayi, niishewe kandi shi naana omuntu e li nawa. Ondi na omaukwatya omawanawa naangoka omawinayi, naashino osho wo kehe gumwe e li.’’ * Mbela owa ndhindhilika kutya omolwashike sha simana tu kale hatu kala twi itala ko pandjele?
16. Omolwashike Jehova he tu pe omayele gopandunge?
16 Jehova ohe tu pe omayele gopandunge okupitila mOohapu dhe. Oku tu hole nokwa hala tu kale twa nyanyukwa. (Jes. 48:17, 18) Etokolo lyopandunge ndyoka tatu vulu okuninga, ndyoka wo tali tu etele lela enyanyu, olyo okupititha komeho iinima mbyoka tayi nyanyudha Jehova. Ngele osho twa ningi, otatu ka yanda omaupyakadhi ogendji ngono haga adha mboka ya pititha komeho iimaliwa, iilonga yokwiikongela omboloto nenge yi ipititha yoyene komeho. Atuheni natu kaleni twa tokola toko okukala aanandunge nokunyanyudha omutima gwaJehova! — Omayel. 23:15.
EIMBILO 94 Otwa pandula Oohapu dhaKalunga
^ Salomo naJesus oya li lela ye na oondunge. Ngoka a li e ya pe oondunge ndhoka oJehova Kalunga. Moshitopolwa shika, otatu ka tala kutya oshike tatu vulu okwiilonga moohapu dha nwethwa mo dhaSalomo nodhaJesus kombinga yokukala tu na ondjele ngele tashi ya piimaliwa, piilonga yetu yokwiikongela omboloto nosho wo kombinga yetu yene. Otatu ka tala wo nkene ooitaali ooyakwetu yamwe ya mona uuwanawa sho ya tula omayele gOmbiimbeli miilonga miinima mbyoka.
^ Tala oshitopolwa “Nkene to vulu okunyanyukilwa iilonga yoye iidhigu” shi li mOshungolangelo yOshiingilisa 1 Febuluali 2015.
^ Tala oshitopolwa “Ombiimbeli otayi vulu oku ku kwathela wu mone enyanyu” shi li mOshungolangelo 1 Auguste 2005.
^ ETHANO: John naTom aamwatate aagundjuka ye li megongalo limwe. John oha longitha ethimbo olindji ta opaleke nawa ohauto ye. Tom oha longitha ohauto ye a kwathele yalwe ya kuthe ombinga miilonga yomomapya noku ya fala kokugongala.
^ ETHANO: John ota longo olutayima. Ina hala okuyemateka omuhona gwe. Onkee ethimbo kehe omuhona gwe e mu pula a longe olutayima, oha zimine owala. Uusiku mbono, Tom, ngoka e li omuyakuligongalo, okwa yi nomukuluntugongalo gumwe ketalelopo lyuusita. Monakuziwa, Tom okwa li a yelithile omuhona gwe kutya opu na oongulohi dhimwe moshiwike ha yi kokugongala, nosho wo kutya ita vulu okulonga oongulohi ndhoka.
^ ETHANO: John oha gandja eitulomo kuye mwene. Tom, ngono a pititha komeho okulongela Jehova, ohi imonene ookuume aape sho ha kwathele miilonga yokwoopalekulula Oshinyanga shIihogongi.
