1. Etokolo lini lya simana aantu ayehe ya pumbwa okuninga?

 AANTU kunena oye na etokolo lya simana ndyoka ye na okuninga. Mbela otaya ka gama ngaa kuJehova Kalunga ngoka oye Omupangeli ta opalele gweshito alihe, nenge otaya ka yambidhidha omutondi gwe omukwanyanya, Satana Ondiyapoli? Kehe gumwe oku na okuninga etokolo. Ita vulu okulya oompanda mbali. Etokolo kehe taya ningi olyo tali ke ya ningitha ya mone omwenyo gwaaluhe nenge hasho. (Mat. 25:31-33, 46) Pethimbo ‘lyomahepeko omanene,’ nenge lyuudhigu uunene, otaya ka ndhindhilikwa ya hupithwe nenge ya hanagulwe po. — Eh. 7:14; 14:9-11; Hes. 9:4, 6.

2. (a) Aahebeli 10:35-39 otaye tu ladhipike tu ninge shike? (b) Embo lyEhololo otali vulu ngiini oku tu kwathela?

² Lesha Aahebeli 10:35-39. Ngele owa hogolola okuyambidhidha uunamapangelo waJehova, owa ninga etokolo lyopandunge. Ngashingeyi owa halelela okukwathela yalwe nayo ya ninge etokolo lyomondjila. Onkee ano, oto vulu okulongitha uuyelele mbuka womembo lyEhololo wu ya kwathele. Embo ndika ekumithi otali holola shoka tashi ka ningilwa mboka ye li ompinge naJehova, ihe otali popi wo kombinga yomayambeko ngoka aantu mboka haya yambidhidha uunamapangelo we nuudhiginini taya ka mona. Oshi li nawa tu konakoneni iinima mbyoka, oshoka oya simana. Ngele osho twa ningi, otatu ka kala twa tokola toko tu tsikile okulongela Jehova. Shimwe ishewe, otatu ka vula okulongitha uuyelele mbuka twi ilonga, tu kwathele yalwe nayo ya ninge etokolo lyomondjila noye li dhiginine.

3. Oshike tatu ka kundathana moshitopolwa shika?

³ Moshitopolwa shika otatu ka tala komapulo ngaka: Mboka haya yambidhidha uunamapangelo waKalunga otaya ka ningilwa shike? Mboka haya yambidhidha oshilikama oshitiligane shoka sha popiwa membo lyEhololo, otaya ka ningilwa shike?

4. Omuyapostoli Johannes okwa li a mono Jesus e li nongundu yini megulu?

⁴ Memoniko limwe, omuyapostoli Johannes okwa mono oongundu mbali dhaantu mboka haya yambidhidha uunamapangelo waJehova noya pewa omwenyo gwaaluhe. Ongundu yotango oya thikama po maantu 144 000. (Eh. 7:4) Ohaya falwa megulu ya ka ninge oshitopolwa shepangelo, nenge shUukwaniilwa, pamwe naJesus megulu. Memoniko ndyoka, Johannes okwe ya mono taya pangele kombanda yevi pamwe naJesus. (Eh. 5:9, 10; 14:3, 4) Okwe ya mono wo ya thikama naJesus megulu kOndundu Sion. — Eh. 14:1.

5. Oshike tashi ka ningilwa masiku aagwayekwa mboka ya hupa ko kombanda yevi?

⁵ Okuza pethimbo lyaayapostoli sigo ongashingeyi, aantu omayovi oya kala nokuhogololwa ya ninge oshitopolwa shomwaalu gwaantu 144 000. (Luk. 12:32; Rom. 8:17) Ihe Johannes okwa lombwelwa kutya oshihupe owala oshishona, nenge omwaalu owala omushona gwaagwayekwa tagu ka kala kombanda yevi pethimbo lyomasiku gahugunina. “Mboka ya hupu ko” otaya ka pewa “oshihako” shoka tashi ulike kutya Jehova okwe ya hokwa, manga uudhigu uunene inaawu tameka. (Eh. 7:2, 3; 12:17) Opo nduno pethimbo lyontumba puudhigu uunene, oshihupe shoka shaagwayekwa otashi ka falwa megulu shi ka wayimine ongundu yaantu 144 000, mboka ya si aadhiginini. Otaya ka pangela pamwe naJesus mUukwaniilwa waKalunga womegulu. — Mat. 24:31; Eh. 5:9, 10.

6-7. (a) Johannes okwa mono ishewe ongundu yini, notatu ilongo shike kombinga yongundu ndjoka? (b) Omolwashike oshihupe shaagwayekwa nosho wo “ongundu onene” yi na okukala ya halelela okumona Ehololo ontopolwa 7 tali gwanithwa?

⁶ Konima sho Johannes a mono ongundu yaantu mboka ye li megulu, okwa mono “ongundu onene.” (NW) Ihe ongundu ndjoka itayi vulu okuyalulwa ngaashi ndjoka yaantu 144 000. (Eh. 7:9, 10) Oshike tatu ilongo kombinga yayo? Johannes okwa lombwelwa ngeyi: “Aantu mbaka oomboka ya piti momahepeko ngoka omanene. Oyo oya yogo oonguwo dhawo noye dhi yelitha nombinzi yOnzigona.” (Eh. 7:14) Konima ngele “ongundu onene” ya piti muudhigu uunene, otayi ka kala kombanda yevi notayi ka mona omayambeko ga dhenga mbanda. — Eps. 37:9-11, 27-29; Omayel. 2:21, 22; Eh. 7:16, 17.

⁷ Kutya nduno otwa hogololwa tu ye megulu nenge tu kale kombanda yevi, mbela otwi itaala ngaa kutya otatu ka mona nkene shoka sha popiwa mEhololo ontopolwa 7 tashi gwanithwa? Otu na okukala twe shi itaala. Itali ka kala tuu ethimbo li nyanyudha koongundu ndhoka adhihe dhaapiya yaKalunga! Otatu ka kala twa nyanyukwa lela sho twa hogolola tu yambidhidhe uunamapangelo waJehova. Embo lyEhololo otali tu lombwele ishewe shike kombinga yuudhigu uunene? — Mat. 24:21.

8. Uudhigu uunene otawu ka tameka ngiini, naantu oyendji otaye ki inyenga ngiini?

⁸ Ngaashi sha popiwa moshitopolwa sha tetekele, omapangelo gopapolotika gomuuyuni mbuka masiku otaga ka ponokela Babilon Oshinene, uukwaniilwa womalongelokalunga giifundja. (Eh. 17:16, 17) Eponokelo ndyoka otali ka kala etameko lyuudhigu uunene. Mbela otali ka ningitha aantu oyendji ya tokole ye ye melongelokalunga lyashili? Aawe. Mepingathano naashono, Ehololo ontopolwa 6 otali ulike kutya pethimbo ndyoka, aantu mboka ihaaya longele Jehova otaya ka konga egameno komahangano gopapolotika nogoongeshefa gomuuyuni mbuka, ngoka ga yelekanithwa noondundu. Molwaashoka aantu mboka itaya ka hogolola ya yambidhidhe Uukwaniilwa waKalunga, Jehova ote ke ya tala ko ye li aapataneki ye. — Luk. 11:23; Eh. 6:15-17.

9. Aantu otaya ka ndhindhilika mo ngiini oshigwana shaJehova pethimbo lyuudhigu uunene, notashi ka ningilwa shike?

 ⁹ Aapiya yaJehova aadhiginini otaye ki imonikila shili kutya oya yooloka ko kaantu yalwe pethimbo lyuudhigu uunene. Oyo owala taya ka kala ongundu yaantu kombanda yevi haya longele Jehova Kalunga nohaya tindi okuyambidhidha “oshilikama.” (Eh. 13:14-17) Molwaashoka otaya ka kala aadhiginini kuJehova, mboka haye mu pataneke otaya ka kala ya geya noonkondo. Shoka otashi ka ningitha ongundu yiigwana yi imanga kumwe yi ponokele oshigwana shaKalunga kombanda yevi alihe. Eponokelo ndyoka olya popiwa mOmbiimbeli kutya eponokelo lyaGog yaMagog. — Hes. 38:14-16.

10. Ngaashi sha popiwa mEhololo 19:19-21, Jehova ote ki inyenga ngiini keponokelo ndyoka tali ka ningilwa oshigwana she?

¹⁰ Jehova ote ki inyenga ngiini keponokelo ndyoka? Ote tu lombwele ta ti: “Ondjahi yandje otayi tukuluka.” (Hes. 38:18, 21-23) Ehololo ontopolwa 19 otayi popi kutya oshike tashi ka ningwa po konima yaashoka. Jehova ota ka tuma Omwana a gamene oshigwana She noku sinde aatondi yasho. Jesus ota ka wayiminwa meponokelo ndika ‘komatanga gwaakwiita yomegulu,’ ano aayengeli aadhiginini pamwe naantu 144 000. (Eh. 17:14; 19:11-15) Iita mbyoka otayi ka hula ngiini? Aantu ayehe noongundu ndhoka dhi li ompinge naJehova otaya ka hanagulwa po thiluthilu! — Lesha Ehololo 19:19-21.

11. Oshiningwanima shini sha simanenena tashi ka ningwa sha popiwa membo lyEhololo?

¹¹ Dhiladhila owala kutya aapiya yaJehova aadhiginini otaya ka kala yu uvite ngiini konima sho aatondi yaKalunga ayehe ya hanagulwa po! Itali ka kala tuu ethimbo linyanyudha! Nonando megulu otamu ka kala enyanyu enene sho Babilon Oshinene sha hanagulwa po, otapu ka ningwa oshinima shimwe ishewe shoka tashi ka eta enyanyu olindji noonkondo. (Eh. 19:1-3) Oshinima shoka osho oshiningwanima sha simana lela shoka sha popiwa membo lyEhololo kutya ‘ohango yOnzigona.’ — Eh. 19:6-9.

12. Ngaashi sha popiwa mEhololo 21:1, 2, ohango yOnzigona otayi ka ningwa uunake?

¹² Ohango yOnzigona otayi ka ningwa uunake? Aagwayekwa ayehe 144 000 otaya ka adhika ye li megulu manga iita yaArmagedon inaayi tameka. Ihe pethimbo ndyoka hapo ohango yOnzigona tayi ka ningwa. (Lesha Ehololo 21:1, 2.) Ohango ndjoka otayi ka ningwa konima yiita yaArmagedon naasho aatondi yaKalunga ayehe ya hanagulwa po. — Eps. 45:3, 4, 13-17.

13. Oshike tashi ka ningwa po pohango yOnzigona?

¹³ Ohango yOnzigona otayi ti shike kwaamboka ya kwatelwa mo? Ngaashi owala ohango yoyene hayi hanganitha omulumentu nomukiintu, ohango ndjika yopathaneko otayi ka hanganitha Omukwaniilwa, Jesus Kristus ‘nomufuko’ gwe, aagwayekwa 144 000. Oshiningwanima shika sha simana otashi ka langeka po epangelo epe ndyoka tali ka pangela kombanda yevi uule womimvo 1 000. — Eh. 20:6.

14-15. Ehololo ontopolwa 21 otali faathanitha aagwayekwa 144 000 nashike? (Tala ethano lyokombanda.)

¹⁴ Ehololo ontopolwa 21 otayi popi kombinga yoshinima shimwe shi ili. Otayi faathanitha aagwayekwa 144 000 noshilando sho opala kaaku na we hashi ithanwa “Jerusalem Oshipe.” (Eh. 21:2, 9) Oshilando shoka osha tungilwa komamanya 12 ga nyolwa “omadhina gaayapostoli yOnzigona omulongo nayaali.” Omolwashike sha li oshihokithi kuJohannes? Omolwaashoka okwa mono edhina lye lya nyolwa kulimwe lyomomamanya ngoka. Mboka kawa li tuu uuthembahenda uunene! — Eh. 21:10-14; Ef. 2:20.

¹⁵ Oshilando shika shopathaneko inashi shi fa iilando yilwe. Epandaanda lyasho enene  olyoshingoli, oshi na iiyelo 12 yuuwe, omakuma nomakankameno gasho oga opalekwa nomamanya gondilo, omutamo nomutumbo gwasho oyi thike pamwe nuule washo. (Eh. 21:15-21) Ihe natango opu na shoka tashi monika kaashi mo! Ndhindhilika kutya Johannes okwa ti: “Ongame inandi mona mo nando otempeli moshilando shiyaka, oshoka Omuwa Kalunga, Omunankondoadhihe, nOnzigona oyo otempeli yasho. Oshilando shika inashi pumbwa etango nenge omwedhi oku shi minikila, oshoka eadhimo lyaKalunga otali shi minikile, nOnzigona oye olamba yasho.” (Eh. 21:22, 23) Mboka ye li oshitopolwa shaJerusalem Oshipe otaya ka kala naJehova. (Heb. 7:27; Eh. 22:3, 4) Onkee, Jehova naJesus oyo otempeli ndjoka yi li moshilando shoka.

16. Aantu otaya ka ningilwa shike pethimbo lyElelo lyOomvula Eyuvi lyUukwaniilwa waKalunga?

¹⁶ Aagwayekwa otaya vulu lela okunyanyukilwa okudhiladhila kombinga yoshilando shoka. Ihe naamboka ye na etegameno lyoku ka kala kombanda yevi oye na okukala ye na ohokwe moshilando shoka. Pethimbo lyElelo lyOomvula Eyuvi lyUukwaniilwa waKalunga, Jerusalem Oshipe otashi ka etela aantu omayambeko itaaga vulu okuyalulwa. Johannes okwa mono omayambeko ngoka taga kunguluka ga fa “omulonga gwomeya gomwenyo” nokombinga kehe yomulonga ngoka oku na ‘omiti dhomwenyo’ dhi na omafo ‘gokwaaludha aantu.’ (Eh. 22:1, 2) Aantu ayehe mboka taya ka kala kombanda yevi otaya kala ye na ompito yokumona uuwanawa momasiloshimpwiyu ngoka. Aantu ayehe mboka haya vulika kuKalunga otaye ke endela ko ya uka megwaneneno. Itaku kala we omikithi, uuwehame nosho wo okulila. — Eh. 21:3-5.

17. Ngaashi Ehololo 20:11-13 tali shi ulike, oolye taya ka mona uuwanawa pethimbo lyElelo lyOomvula Eyuvi?

¹⁷ Oolye taya ka mona mo uuwanawa momasiloshimpwiyu ngoka? Tango, ongundu onene yaantu mboka taya ka hupa puArmagedon, nuunona mboka tashi vulika wu ka valwe muuyuni uupe. Ihe Ehololo ontopolwa 20 otali tu uvanekele wo kutya oonakusa otaya ka yumudhwa. (Lesha Ehololo 20:11-13.) Aantu “aawanawa,” nenge tu tye aayuuki mboka ya sa monakuziwa nosho wo mboka “aawinayi,” nenge tu tye aalunde mboka ya si inaaya mona ompito yokwiilonga kombinga yaJehova, otaya ka yumudhwa ya ka kale nomwenyo kombanda yevi. (Iil. 24:15; Joh. 5:28, 29) Mbela shika osha hala okutya kehe gumwe ota ka yumudhwa pethimbo lyElelo lyOomvula Eyuvi? Aawe. Mboka ya tindi okulongela  Jehova manga inaaya sa itaya ka yumudhwa. Oya li ye na ompito yoku shi ninga, ihe oye shi ulike kutya inaya gwana oku ka kala mOparadisa kombanda yevi. — Mat. 25:46; 2 Tes. 1:9; Eh. 17:8; 20:15.

18. Onkalo otayi ka kala ya tya ngiini kombanda yevi pehulilo lyomimvo 1 000?

¹⁸ Pehulilo lyomimvo 1 000, aantu ayehe mboka taya ka kala kombanda yevi otaya ka kala ya gwanenena. Kapu na nando omuntu ta ka adhika kiilanduliko yokuyona hoka a thigulula kuAdam. (Rom. 5:12) Iilanduliko yokuyona kwaAdam otayi ka kuthwa po thiluthilu. Kungawo, mboka taya ka kala kombanda yevi otaya ka ‘ninga omwenyo’ ye li aantu ya gwanenena pehulilo lyomimvo 1 000. — Eh. 20:5.

19. Omolwashike pwa pumbiwa emakelo lya hugunina?

¹⁹ Otu shi kutya Jesus okwa li omudhiginini kuKalunga sho Satana a li te mu makele. Ihe aantu ya gwanenena otaya ka kala ngaa aadhiginini kuJehova sho Satana ta ka pewa ompito e ya makele? Kehe gumwe gwomutse ota ka pumbwa okuulika kutya omudhiginini sho Satana ta ka piithwa mo molumbogo nenge mondholongo pehulilo lyomimvo 1 000. (Eh. 20:7) Mboka taya ka kala aadhiginini kuJehova pethimbo lyemakelo lyahugunina, otaya ka mona omwenyo gwaaluhe notaya ka kala shili ya manguluka. (Rom. 8:21) Mboka taya ka tukula uunashipotha otaya ka hanagulwa po pamwe nOmuhindadhi nosho wo noompwidhuli dhe. — Eh. 20:8-10.

20. Owu uvitile ngiini omahunganeko omahokithi ngoka ge li membo lyEhololo?

²⁰ Owu uvite ngiini sho wa konakona uuyelele mbuka kombinga yembo lyEhololo? Mbela ino nyanyukwa sho wu wete omahunganeko ngaka omahokithi taga gwanithwa pethimbo lyetu? Mbela itashi ku inyengitha wu hiye yalwe ye ku wayimine melongelokalunga lya yogoka lyaKalunga ketu? (Eh. 22:17) Molwaashoka omadhiladhilo nomitima dhetu odhi inyengithwa kiiningwanima mbika iihokithi tayi ka ningwa monakuyiwa, oshe tu tsa lela omukumo tu popye ngaashi omuyapostoli Johannes ngoka a popile a ti: “Eewa ano. Ila, Omuwa Jesus!” — Eh. 22:20.