1. Jehova oha hiya aalongeli ye ya ninge shike? (Tala wo ethano.)

 OKULYE tatu vulu okuya, uuna twa pumbwa ehekeleko newiliko? Eyamukulo kepulo ndyoka otu li shi. Otatu vulu okugalikana kuJehova Kalunga. Jehova ote tu hiya tu ninge ngaaka. Okwa hala tu galikane olundji, ano tu ‘galikane aluhe.’ (1 Tes. 5:17) Otatu vulu okugalikana kuye twa manguluka noku mu pula e tu wilike mukehe shimwe monkalamwenyo yetu. (Omayel. 3:5, 6) Molwaashono Jehova oha gandja, ine tu tulila po ongamba kutya natu galikane kuye iikando ingapi.

2. Oshike tatu ka kundathana moshitopolwa shika?

² Otwa lenga omagano gegalikano. Ihe molwaashono ohatu kala twi ipyakidhila, otashi vulika tu shi mone oshidhigu okumona ethimbo lyokugalikana. Otashi vulika wo tu kale tu uvite kutya otwa pumbwa okuhwepopaleka ongushu yomagalikano getu. Ihe shoka shi shi okupandulwa, osho kutya otatu vulu okumona lela etsomukumo newiliko mOmbiimbeli. Moshitopolwa shika, otatu ka tala nkene tatu vulu okwiitulila po ethimbo lyokugalikana mokukonakona oshiholelwa shaJesus. Otatu ka kundathana wo nkene tatu vulu okuhwepopaleka ongushu yomagalikano getu, moku ka tala kiinima itano ya simana.

3. Jesus okwa li i ilongo shike kombinga yegalikano?

³ Jesus okwa li e shi kutya Jehova okwa lenga egalikano. Nale manga inee ya kombanda yevi, okwa li a mono nkene He ta yamukula  omagalikano gaapiya ye aadhiginini aalumentu naakiintu. Pashiholelwa, Jesus okwa li puHe sho a yamukula omagalikano taga zi komutima gaHanna, gaDavid nosho wo gaElia, okutumbula po owala yamwe. (1 Sam. 1:10, 11, 20; 1 Aak. 19:4-6; Eps. 32:5) Nomolwaashono Jesus a li a longo aalongwa ye ya galikane olundji, ye na einekelo kutya omagalikano gawo otaga yamukulwa. — Mat. 7:7-11.

4. Oshike tatu ilongo komagalikano gaJesus?

⁴ Jesus okwa tulila po aalongwa ye oshiholelwa ye shi landule, sho a li a galikana kuJehova. Momukokomoko guukalele we, Jesus okwa li a galikana lwiikando. Okwa li e na okwiitulila po ethimbo a galikane, molwaashoka olundji okwa li ha kala i ipyakidhila nokwa umanenwa kaantu. (Mark. 6:31, 45, 46) Okwa li a penduka ongulonene e ki ikalele, opo a galikane. (Mark. 1:35) Pompito yimwe, okwa li a galikana uusiku awuhe, manga inaa ninga etokolo lya simana. (Luk. 6:12, 13) Jesus okwa li wo a galikana lwiikando ongulohi ndjoka ya tetekele eso lye, manga inaa mana oshitopolwa she shoka oshidhigudhigu shoshinakugwanithwa she shokombanda yevi. — Mat. 26:39, 42, 44.

5. Ongiini tatu vulu okuholela Jesus, uuna tatu galikana?

⁵ Oshiholelwa shaJesus ohashi tu longo kutya kashi na nduno mbudhi kutya otwi ipyakidhila shi thike peni, otwa pumbwa okwiitulila po ethimbo lyokugalikana. Ngaashi Jesus, otashi vulika tu kale twa pumbwa okwiitulila po ethimbo lyokugalikana ongulonene nenge kongulohi. Ngele otwe shi ningi, otatu ka ulukila Jehova kutya otwa pandula omagano ngaka gi ikalekelwa gegalikano. Omumwameme gwedhina Lynne, oha dhimbulukwa nkene a li a pandula, sho i ilongo oshikando shotango kombinga yuuthembahenda wegalikano. Okwa ti: “Sho ndi ilongo kutya otandi vulu okupopya naJehova ethimbo kehe, osha kwathele ndje ndi mu tale ko e li Kuume kandje kopothingo, nokukala nda hala okuhwepopaleka omagalikano gandje.” Kapu na omalimbililo kutya oyendji yomutse osho hatu kala tu uvite ngaaka. Onkee ano, natu taleni kiinima itano ya simana mbyoka tatu vulu okukwatela momagalikano getu.

6. Shi ikolelela kEhololo 4:10, 11, Jehova okwa gwana okupewa shike?

⁶ Tanga Jehova. Omuyapostoli Johannes okwa li a mono aakuluntu 24 taya galikana  Jehova megulu, memoniko ekumithi ndyoka a li a mono. Oya li ya tanga Jehova taya ti okwa gwana “okusimanekwa omolweadhimo, esimano noonkondo.” (Lesha Ehololo 4:10, 11.) Aayengeli aadhiginini nayo oye na omatompelo ogendji gokutanga nokusimaneka Jehova. Oye li naye megulu noye mu shi nawa. Ohaya mono nkene ta ulike omaukwatya ge miilonga ye. Uuna ya mono nkene Jehova ta katuka oonkatu, ohashi ya inyengitha ye mu tange. — Job 38:4-7.

7. Otatu vulu okutanga Jehova kombinga yashike?

⁷ Natse otu na okutanga Jehova momagalikano getu. Otatu vulu oku shi ninga moku mu lombwela shoka tu hole kombinga ye nosho wo kutya omolwashike twe mu simaneka. Sho to lesha nokukonakona Ombiimbeli, kambadhala okumona omaukwatya gaJehova ngoka wu hole unene. (Job 37:23; Rom. 11:33) Opo nduno lombwela Jehova nkene wu uvite kombinga yomaukwatya ngoka. Otatu vulu wo okutanga Jehova sho e tu kwathela nosho wo nkene a kwathela aamwatate naamwameme ayehe. Ohe tu sile aluhe oshimpwiyu nohe tu gamene. — 1 Sam. 1:27; 2:1, 2.

8. Omatompelo gamwe geni tu na gokupandula Jehova? (1 Aatessalonika 5:18)

⁸ Pandula Jehova. Otu na omatompelo ogendji gokupandula Jehova megalikano. (Lesha 1 Aatessalonika 5:18.) Otatu vulu oku mu pandula omolwiinima iiwanawa ayihe mbyoka tu na, molwaashoka omagano kehe omawanawa ohaga zi kuye. (Jak. 1:17) Pashiholelwa, otatu vulu oku mu pandula, omolwevi ewanawa niinima iikumithi mbyoka a shitila ko. Otatu vulu wo oku mu pandula, sho e tu pa omwenyo, uukwanegumbo wetu, ookuume nosho wo etegameno. Otwa hala wo okupandula Jehova, sho e tu pitika tu kale tu na uukuume wa dhenga mbanda naye.

9. Omolwashike tashi vulika tu kale twa pumbwa okukokeka olupandu lwetu lwokupandula Jehova?

⁹ Otashi vulika tu kale twa pumbwa okuninga oonkambadhala dhi ikalekelwa, tu dhiladhile kombinga yomatompelo ngoka tu na pauhandimwe gokupandula Jehova. Aantu oyendji kunena ihaya pandula. Olundji ohaya dhiladhila owala kombinga yankene taya vulu okumona shoka ya hala, pehala lyokudhiladhila kombinga yankene taya vulu okuulika olupandu lwawo. Ngele otwa etha iikala ya tya ngawo yi tu nwethe mo, omagalikano getu otashi vulika owala ga kale gokupula shoka twa hala. Opo shoka tu shi yande, otwa pumbwa okutsikila okukokeka olupandu lwetu nokupandula Jehova, omolwiinima ayihe mbyoka he tu ningile. — Luk. 6:45.

10. Ongiini okupandula kwa kwathele omumwameme gumwe i idhidhimike? (Tala wo ethano.)

¹⁰ Okupandula otaku vulu oku tu kwathela tu idhidhimikile omaudhigu. Tala koshimoniwa shaKyung-sook, shi li mOshungolangelo yo 15 gaJanuali 2015. Okwa li a monika okankela yokomapunga. Okwe shi koleke a ti: “Omukithi nguka ogwa halutha ndje noonkondo. Onda li ndi uvite kutya kandi na etegameno lyasha nonda li nda tila.” Oshike she mu kwathele i idhidhimike?  Okwa ti kutya ongulohi kehe manga inaa ka lala, okwa li ha londo pontala yi li pombanda yegumbo lye e ta galikana muule kombinga yiinima itano mbyoka a pandula esiku ndyoka. Shika oshe mu kwathele a kale e na omukumo noshe mu ningitha a ulike ohole ye yokuhola Jehova. Okwa mona kutya Jehova oha kwathele aapiya ye aadhiginini, uuna ye li muudhigu, nokwa mona wo kutya omayambeko getu itaga yelekwa nuudhigu mboka tu na. Ngaashi Kyung-sook, otu na omatompelo ogendji gokupandula Jehova, nonando otu li muudhigu wontumba. Oku mu pandula megalikano otaku vulu oku tu kwathela tu idhidhimike notu kale twa ngungumana.

11. Omolwashike aalongwa yaJesus ya li ya pumbwa uulaadhi, konima sho Jesus a shuna megulu?

¹¹ Pula Jehova e ku pe uulaadhi wokuuvitha. Konima owala manga Jesus inaa shuna megulu, okwa li a dhimbulukitha aalongwa ye kombinga yoshinakugwanithwa shawo shoka e ya pa shokuuvitha kombinga ye “muJerusalem, muJudea alihe nomuSamaria sigo omiilongo ayihe yokombanda yevi.” (Iil. 1:8; Luk. 24:46-48) Konima yethimbo efupi, aawiliki Aajuda oya kwata po omuyapostoli Petrus naJohannes, e taye ya fala koshipala shOmpangu yopombanda yAajuda, noya li ya lombwele aalumentu mboka aadhiginini ya ethe po okuuvitha e ta ye ya ningile nokuli omatilitho. (Iil. 4:18, 21) Petrus naJohannes oya li yi inyenge ngiini?

12. Shi ikolelela kIilonga 4:29, 31, aalongwa oya li ya ningi shike?

¹² Petrus naJohannes oya yamukula aawiliki yelongelokalunga lyOshijuda, mboka ya li taye ya ningile omatilitho ya ti: “Tokoleni ne yene kutya oshini po shu uka koshipala shaKalunga. Otu na okuvulika kune nenge otu na okuvulika kuKalunga? Oshoka itatu vulu okumwena, tu kale ando itaatu hokolola shoka tse twe shi mono notwe shi uvu.” (Iil. 4:19, 20) Sho Petrus naJohannes ya mangululwa, aalongwa mboka oya li ya galikana kuJehova ya longe ehalo lye. Oya galikana ya ti: ‘Pa aamati yoye oohapu dhoye, tu popye nuulaadhi auhe twaa na uumbanda.’ Jehova okwa li a yamukula egalikano ndyoka tali zi komutima. — Lesha Iilonga 4:29, 31.

13. Oshike tatu vulu okwiilonga koshiholelwa shaJin-hyuk?

¹³ Otatu vulu okuholela aalongwa mboka, mokutsikila okuuvitha nokuli nonando aakwanepangelo otaye tu lombwele tu ethe po oku shi ninga. Tala koshiholelwa shaJin-hyuk, omumwatate gumwe ngono a li a tulwa mondholongo, molwaashoka ihaa kutha ombinga miita. Sho e li mondholongo, okwa li a pewa oshinakugwanithwa shokusila oshimpwiyu aanandholongo yamwe mboka ya li yi ikalekelwa muundunda. Ihe ka li a pitikwa okupopya nayo kombinga yoshinima kehe inaashi pamba oshinakugwanithwa she, mwa kwatelwa nOmbiimbeli. Okwa galikana kuJehova e mu pe uulaadhi noku popye nekoto oshili pompito kehe. (Iil. 5:29) Okwa ti: “Jehova okwa yamukula omagalikano gandje moku pa ndje uulaadhi nuunongo wokutameka omakonakonombiimbeli gominute ntano piiyelo yuundunda womondholongo. Opo nduno uusiku onda li handi nyola oontumwafo, ndhono nda li handi dhi gandja kaanandholongo mboka, esiku lya landula ko.” Natse otatu vulu okukala tu na einekelo kutya Jehova ota vulu oku tu kwathela tu gwanithe po uukalele wetu. Ngaashi Jin-hyuk, natse otatu vulu okugalikana tu pewe uulaadhi nuunongo.

14. Oshike tashi vulu oku tu kwathela, uuna tu na omaupyakadhi? (Episalomi 37:3, 5)

¹⁴ Pula Jehova ekwatho, wu vule okuungaunga nomaupyakadhi. Oyendji yomutse otatu mono iihuna omolwuuwehame nenge molwuupyakadhi wopamaiyuvo, twa silwa, tu na uupyakadhi megumbo, tatu hepekwa, nenge tu na omaupyakadhi galwe. Iinima ngaashi omikithi dhekomba niita, oya ningitha omashongo ngano  ga kale omadhigu unene okuungaungiwa nago. Onkee mbumbulila Jehova omutima gwoye. Mu lombwela kombinga yonkalo yoye, ngaashi owala to lombwele kuume koye kopothingo. Kala wu na uushili kutya Jehova ‘ote ku kwathele.’ — Lesha Episalomi 37:3, 5.

15. Ongiini egalikano tali vulu oku tu kwathela tu ‘idhidhimike muudhigu’? Gandja oshiholelwa.

¹⁵ Okudhiginina okugalikana otaku vulu oku tu kwathela tu ‘idhidhimike muudhigu.’ (Rom. 12:12) Jehova oku shi kutya aalongeli ye oye li moonkalo dha tya ngiini noha “uvu omaindilo gawo.” (Eps. 145:18, 19) Omukokolindjila gumwe gwomimvo 29 gwedhina Kristie, okwa mona kutya oshinima shoka oshoshili. Okwa li a tameke okweehama uuvu wa kwata miiti ombaadhilila. Omolwoshinima shono, okwa li a kwatwa kepolimano. Konima yethimbo, okwa ka uva kutya yina okwa monika omukithi tagu mu fala meso. Kristie okwa ti: “Onda galikana nda mana mo kuJehova a pe ndje oonkondo ndhoka nda pumbwa. Onda kambadhala okukala handi ningi iinima yopalongelokalunga pandjigilile, ngaashi okuya kokugongala nokuninga ekonakonombiimbeli lyopaumwene.” Okwa gwedha ko a ti: “Egalikano olya kwathela ndje ndi idhidhimike momathimbo ngoka omadhigu. Ondi shi kutya Jehova opo a li aluhe naashoka osha li sha kwathele ndi kale ndi uvite lela hwepo. Nonando uupyakadhi wandje wu na ko nasha nuukolele kawa li wa zi po meendelelo, Jehova okwa li a yamukula omagalikano gandje moku pa ndje ombili nengungumano.” Onkee ano, inatu dhimbwa nando kutya “Omuwa oku shi shi, nkene e na okuhupitha aantu ye momamakelo ngoka tage ya adha.” — 2 Pet. 2:9.

16. Omolwashike twa pumbwa ekwatho lyaJehova, opo tu sinde omamakelo?

¹⁶ Pula Jehova ekwatho, opo wu sinde omamakelo. Tu li aantu inaatu gwanenena, ohatu kondjo aluhe nemakelo lyokuninga shoka sha puka. Satana ota ningi ngaashi ta vulu, opo e shi ningithe oshidhigu ngaashi tashi vulika. Omukalo gumwe ha kambadhala okunyateka omadhiladhilo getu, okupitila momainyanyudho  inaaga yogoka. Omainyanyudho ngoka otaga vulu okuudhitha omadhiladhilo getu niinima ya nyata, omadhiladhilo ngoka haga nyateke omuntu gwetu gwomeni nohage tu ningitha tu yone sha kwata miiti. — Mark. 7:21-23; Jak. 1:14, 15.

17. Konima ngele twa galikana Jehova e tu kwathele, oshike tu na okuninga? (Tala wo ethano.)

¹⁷ Otwa pumbwa ekwatho lyaJehova, ngele otwa hala okusinda emakelo lyokuninga shoka sha puka. Jesus okwa li a kwatele oohapu ndhika megalikano ndyoka e tu longa, tadhi ti: ‘Ino tu fala mehongololo, aawe, tu hupitha kumwiinayi.’ (Mat. 6:13) Jehova okwa hala oku tu kwathela, ihe otu na oku mu pula ekwatho. Otu na wo okukatuka metsokumwe nomagalikano getu. Otatu vulu okukambadhala okuninga ngaashi tatu vulu tu yande okulesha nokupulakena kiinima ya puka, mbyoka yi li apuhe muuyuni waSatana. (Eps. 97:10) Otatu vulu okuudhitha omadhiladhilo getu niinima iiwanawa, uuna tatu lesha nokukonakona Ombiimbeli. Okukala pokugongala nokukutha ombinga miilonga yokuuvitha, otaku gamene wo omadhiladhilo getu. Na Jehova okwe tu uvanekela kutya ita ka etha tu makelwe nemakelo ndyoka li vule oonkondo dhetu. — 1 Kor. 10:12, 13.

18. Atuhe otwa pumbwa okuninga shike, ngele tashi ya pegalikano?

¹⁸ Kehe gumwe gwomutse okwa pumbwa ha galikana shi vulithe shito, opo a kale omudhiginini kuJehova momasiku ngaka omadhigu gahugunina. Itulila po ethimbo lyokugalikana tashi zi komutima. Jehova okwa hala tu ‘aneke omaudhigu getu koshipala she.’ (Eps. 62:8) Tanga Jehova noku mu pandula, omolwaashihe shoka a ninga. Mu pula e ku kwathele wu kale wu na uulaadhi muukalele. Mu indila e ku kwathele wu ungaunge nuupyakadhi kehe nokusinda omamakelo ngoka tashi vulika wu na. Ino etha nando osha nenge omuntu e ku ethithe po okugalikana kuJehova pandjigilile. Ihe ongiini nduno Jehova ha yamukula omagalikano getu? Moshitopolwa tashi landula otatu ka yamukula epulo ndyoka lya simana.