1. Oyendji yomutse otwa nyengwa okuninga shike?

 MBELA opu na oshikando shimwe wa li wi itulile po elalakano lyopambepo, ihe owa li to nyengwa oku li adha? b Ngele osho, hangoye awike. Pashiholelwa, Philip okwa li a hala okuhwepopaleka ongushu yomagalikano ge nokukala ha galikana pandjigilile. Ihe okwa li ha mono oshidhigu okumona ethimbo lyokugalikana. Erika okwa li i itulile po elalakano lyokuthika kuyele pelongekidho lyiilonga yomomapya. Ihe okwa li ha thiki a lata konyala oshikando kehe. Tomáš okwa kambadhala iikando yontumba a mane ko Ombiimbeli. Okwa ti: “Kanda li handi nyanyukilwa okulesha Ombiimbeli. Onde shi kambadhala iikando itatu, ihe oshikando kehe onda lesha owala sigo opuLevitikus, ngame otandi etha.”

2. Omolwashike kaatu na okuteka omukumo ngele otwi itulila po elalakano lyopambepo, ihe inatu li adha natango?

² Ngele ngashingeyi owi itulila po elalakano ndyoka inoo adha natango, ino teka omukumo. Nokuli naandyoka kaali shi enene, olundji ohali pula ethimbo nokulonga nuudhiginini. Sho wa hala natango okwaadha elalakano lyoye ndyoka, otashi ulike kutya owa lenga ekwatathano lyoye naJehova nowa hala oku mu pa shoka sha dhenga mbanda. Jehova oha pandula oonkambadhala dhoye. Odhoshili kutya ina tegelela wu ninge oshindji shi vulithe pwaashoka to vulu okuninga. (Eps. 103:14; Mika 6:8) Onkee elalakano lyoye nali kale li li pandjele  noto vulu oku li adha. Ngele owi itulile po elalakano lyontumba, oshike to vulu okuninga wu li adhe? Natu ka kundathaneni omaetopo gamwe.

3. Omolwashike okukala wa halelela okwaadha elalakano lyoye kwa simana?

³ Osha simana noonkondo wu kale wa halelela okwaadha elalakano lyoye. Omuntu ngoka e na lela ehalo, oha longo nuudhiginini adhe elalakano lye. Okukala twa halelela otatu vulu oku ku yelekanitha nombepo ndjoka hayi undulile okambautu mpoka ku uka. Ngele ombepo oya tsikile nokupepa, omuhingi gwokambautu otashi vulika a ka thike hoka ta yi. Nongele ombepo onene, otashi vulika nokuli a thike mbala. Sha faathana, ngele otwa kala tu na lela ehalo otashi vulika lela tu ka adhe omalalakano getu. Omumwatate David gwokoEl Salvador, okwa ti: “Uuna wu na lela ehalo, oho ningi ngaashi to vulu. Oho kambadhala kuu ethe nando oshimwe shi ku imbe wu adhe elalakano lyoye.” Onkee ano, oshike to vulu okuninga wu kale wa halelela okwaadha elalakano lyoye?

4. Otatu vulu okugalikana kombinga yashike? (Aafilippi 2:13) (Tala wo ethano.)

⁴ Galikana wu kale wu na lela ehalo. Okupitila mombepo ondjapuki, Jehova ota vulu oku ku pa ehalo wu adhe elalakano lyoye. (Lesha Aafilippi 2:13.) Omathimbo gamwe ohatu itulile po elalakano, oshoka otu shi shi kutya otu na oku shi ninga naashono oshinima oshiwanawa. Ihe otashi vulika tu kale kaatu na lela ehalo lyoku li adha. Omumwameme gumwe gwomoUganda gwedhina Norina naye osho a li e uvite ngaaka. Okwa li i itulile po elalakano lyokuninga ekonakonombiimbeli, ihe ka li e na lela ehalo lyokwaadha elalakano ndyoka, oshoka okwa li e uvite kutya ke shi omulongi omwaanawa. Oshike she mu kwathele? Okwa ti: “Onda tameke okupula Jehova esiku kehe a kwathele ndje ndi kale ndi na lela ehalo lyokuninga ekonakonombiimbeli. Onda katuka metsokumwe negalikano lyandje mokuhwepopaleka uunkulungu wandje wokulonga. Konima yoomwedhi oonshona, onde shi ndhindhilike kutya ondi na lela ehalo. Omumvo ogo tuu ngono, onda tameke omakonakonombiimbeli gaali.”

5. Otatu vulu okudhiladhila kushike opo tu kale twa halelela okwaadha elalakano lyetu?

⁵ Dhiladhila muule kwaashoka Jehova e ku ningila. (Eps. 143:5) Omuyapostoli Paulus okwa li a dhiladhila muule kohenda ndjoka Jehova e mu ulukile naashoka oshe mu ningitha a kale a halelela okulongela Jehova nuudhiginini. (1 Kor. 15:9, 10; 1 Tim. 1:12-14) Sha faathana, ngele owa tsikile okudhiladhila kwaashoka Jehova e ku ningila, oto ka kala wa halelela okwaadha elalakano lyoye. (Eps. 116:12) Tala kwaashoka sha kwathele omumwameme gumwe gwokoHonduras, a adhe elalakano lye lyokuninga omukokolindjila gwondjigilile. Okwa ti: “Onda dhiladhila kunkene Jehova e hole ndje. Okwa eta ndje moshigwana she. Oku na ko nasha nangame noha gamene ndje. Okutedhatedha kiinima mbyoka okwa kokeke ohole yandje yoku mu hola nokwa ningitha ndje ndi kale ndi na lela ehalo lyokulonga nuudhiginini ndi ninge omukokolindjila.”

6. Oshike ishewe tashi vulu oku tu kwathela tu kale twa halelela okwaadha elalakano lyetu?

⁶ Gandja eitulomo kuuwanawa mboka hawu zi mokwaadha elalakano lyoye. Ndhindhilika shoka sha kwathele Erika, ngoka a tumbulwa metetekelo,  a adhe elalakano lye lyokuthika pethimbo. Okwa ti: “Onde shi ndhindhilike kutya onda li handi kanitha oshindji noonkondo, sho handi ya nda lata pelongekidho lyiilonga yomomapya. Ihe ando onda li handi thiki pethimbo, onda li tandi ka vula okupopitha aamwatate naamwameme nokukala ethimbo pamwe nayo. Onda li wo tandi ka vula okupulakena komaetopo omawanawa ngoka taga vulu okukwathela ndje ndi nyanyukilwe nokuhwepopaleka uukalele wandje.” Erika okwa gandja eitulomo kuuwanawa wokuthika pethimbo, nokwa adha elalakano lye. Mbela uuwanawa wuni to vulu okugandja eitulomo kuwo? Ngele elalakano lyoye okuhwepopala mokulesha Ombiimbeli nenge mokugalikana, dhiladhila kombinga yankene iinima mbyoka tayi vulu okukoleka ekwatathano lyoye naJehova. (Eps. 145:18, 19) Ngele elalakano lyoye okukokeka uukwatya wontumba wopaKriste, gandja eitulomo kunkene tawu vulu okuhwepopaleka ekwatathano lyoye nayalwe. (Kol. 3:14) Oshike itoo nyola omusholondondo gwomatompelo agehe kutya omolwashike wa hala okwaadha elalakano lyoye? Kala ho tala mo pandjigilile momusholondondo ngoka. Tomáš, ngoka a popiwa metetekelo, okwa ti: “Uuna pu na omatompelo ogendji gokwaadha elalakano lyandje, otandi ka longa nuudhiginini lela ndi li adhe.”

7. Oshike sha kwathele Julio nomukadhi ya adhe elalakano lyawo?

⁷ Kala ho kala naamboka taye ku tsu omukumo. (Omayel. 13:20) Ndhindhilika shoka sha kwathele Julio nomukadhi, ya adhe elalakano lyawo lyokulonga nuudhiginini miilonga yokuuvitha. Julio okwa ti: “Otwa hogolola ookuume mboka taye tu tsu omukumo tu kambadhale okwaadha elalakano lyetu, notwa li hatu kundathana nayo kombinga yelalakano ndyoka. Oyendji oya adhikile nale ya adha omalalakano ga fa getu, onkee oye tu pe omayele omawanawa. Oya li wo haye tu pula kutya otatu shi enditha ngiini noye tu tsu omukumo, uuna twa li twe gu pumbwa.”

8. Oshike tashi vulu okuningwa po ngele otwa kambadhala tu adhe elalakano lyetu, uuna owala tu uvite tu na lela ehalo? (Tala wo ethano.)

⁸ Atuheni otu na omasiku ngoka hatu kala tu uvite kaatu na lela ehalo lyokwaadha elalakano lyetu. Mbela shono osha hala okutya itatu vulu oku li a adha? Aawe. Natu shi thaneke ngeyi: Ombepo ohayi vulu okukala yi na oonkondo dhokuundulila okambautu hoka taka yi. Ihe ombepo ohayi kala yi na oonkondo dha yoolokathana, nomasiku gamwe ohashi vulika ku kale kaaku na ombepo nokuli. Mbela shono osha hala okutya omuhingi gwokambautu hoka, ita vulu we okutsikila oku ka hinga? Hasho naanaa. Pashiholelwa, uumbautu wumwe owu na ooindjina, omanga wulwe owu na iiti yokudhuga. Omuhingi gwokambautu ota vulu okulongitha iinima mbyoka, opo okambautu ka tsikile okweenda ka uka kehala hoka taka yi. Okukala tu na lela ehalo otaku vulu okufaathanithwa nombepo; okukala tu uvite tu na lela ehalo ohashi vulika ku kale kwa yoolokathana. Omasiku gamwe ohashi vulika wo tu kale kaatu na nando ehalo lyokwaadha elalakano lyetu. Onkee ngele otwa longo owala tu adhe elalakano lyetu uuna tu uvite tu na lela ehalo, otashi vulika kaatu ke li adhe nandonando. Ihe ngaashi owala omuhingi gwokambautu ha kongo po omikalo dhilwe, opo a thike kehala hoka a hala okuthika, natse otatu vulu okukambadhala tu adhe elalakano  lyetu, nonando katu na ehalo lyoku shi ninga. Nonando shoka otashi tu pula tu kale tu na eipangelo, otatu ka kala twa nyanyukwa ngele otwa adha elalakano lyetu. Manga inaatu ka kundathana shoka tatu vulu okuninga, natu ka taleni kepulo limwe ndyoka tashi vulika li holoke po.

9. Mbela osha puka okutsikila okwaadha elalakano lyontumba, nonando otu uvite kaatu na lela ehalo lyoku shi ninga? Shi yelitha.

⁹ Jehova okwa hala tu mu longele twa nyanyukwa nonehalo ewanawa. (Eps. 100:2; 2 Kor. 9:7) Onkee mbela otu na ngaa okutsikila okulonga tu adhe elalakano lyontumba lyopambepo, ngele katu na ehalo lyoku shi ninga? Tala koshiholelwa shomuyapostoli Paulus. Okwa ti: “Onda kolondeke olutu lwandje noku lu dhenga, ndi lu vulikithe.” (1 Kor. 9:25-27) Paulus okwa li i ikondjitha a ninge shoka shi li mondjila nonando otashi vulika a li e uvite kee na ehalo lyoku shi ninga. Ihe mbela Jehova okwa li ngaa a panda iilonga mbyono a longelwa kuPaulus? Eeno! Na Jehova okwa li e mu yambeke, omolwoonkambadhala dhe. — 2 Tim. 4:7, 8.

10. Uuwanawa wuni hatu mono mokulonga tu adhe elalakano lyetu, nokuli nuuna kaatu na lela ehalo lyoku shi ninga?

¹⁰ Sha faathana, Jehova oha kala a nyanyukwa, uuna e tu wete tatu longo tu adhe elalakano lyetu, nokuli nando katu na ehalo lyoku shi ninga. Oha kala a nyanyukwa oshoka oku shi kutya nonando otashi vulika ihaatu kala aluhe tu hole shoka tatu ningi, ohatu shi ningi molwaashono tu mu hole. Ngaashi owala Jehova a li a yambeke Paulus, Ote ke tu yambeka wo omolwoonkambadhala dhetu. (Eps. 126:5) Sho Jehova te tu yambeke, otashi vulika nokuli tu tameke okukala twa halelela okwaadha elalakano lyetu. Omumwameme gwokoPoland, Lucyna, okwa ti: “Omathimbo gamwe ihandi kala nda hala okuya momapya, unene tuu ngele onda vulwa. Nando ongawo, enyanyu ndyono handi kala ndi uvite oli li omagano ga dhenga mbanda.” Ngashingeyi natu ka taleni kwaashoka tu na okuninga, uuna tu uvite kaatu na lela ehalo lyokwaadha elalakano lyetu.

11. Jehova ota vulu ngiini oku tu kwathela tu kokeke eipangelo?

¹¹ Galikana wu pewe eipangelo. Eipangelo uukwatya womuntu wokuvula okupangela omaiyuvo ge noonkatu dhe. Uutumbulilo mboka olundji hawu gandja edhiladhilo lyokwiikeelela kuu ninge oshinima sha puka. Ihe otwa pumbwa wo eipangelo, opo tu ninge shoka oshiwanawa, unene tuu ngele oshilonga shontumba oshidhigu nenge kaatu na lela ehalo lyoku shi ninga. Dhimbulukwa kutya eipangelo oli li oshitopolwa shiiyimati yombepo ondjapuki. Onkee pula Jehova e ku pe ombepo ndjoka yi ku kwathele, wu kokeke uukwatya mboka wa simana. (Luk. 11:13; Gal. 5:22, 23) David, ngoka a tumbulwa metetekelo, okwa yelitha nkene egalikano lye mu kwathele. Okwa li a hala okukala ha ningi ekonakono lye lyopaumwene pandjigilile. Okwa ti: “Onda li handi pula Jehova a kwathele ndje ndi kokeke eipangelo. Kekwatho lye, onda li nda vulu okutameka ekonakono lyopaumwene noku li ninga pandjigilile.”

12. Ekotampango ndyoka ta li adhika mOmuuvithi 11:4, otali tu kwathele ngiini tu adhe omalalakano getu gopambepo?

¹² Ino tegelela oonkalo dhi li nawa. Muuyuni mbuno, oonkalo otashi vulika kaadhi ka kale nawa nando. Ngele otwa tegelele, otashi vulika kaatu adhe elalakano lyetu. (Lesha Omuuvithi 11:4.) Omumwatate gwedhina Dayniel, okwa ti: “Kapu na oonkalo oombwanawa. Onkee ano, katu na okutegelela, natu tameke owala.” Omumwatate gumwe moUganda gwedhina Paul, okwa popi etompelo lilwe kutya omolwashike kaatu na okukakadhala, a ti: “Uuna twa tameke oshilonga shontumba nando opu na oonkalo ondhigu, Jehova ota vulu oku tu kwathela.” — Mal. 3:10

13. Uuwanawa wuni hawu zi mokutameka nomalalakano omashona?

¹³ Endela ko kashona nakashona. Otashi vulika tu kale kaatu na lela ehalo lyokwaadha elalakano lyetu, molwaashoka tali monika lya fa edhigu okwaadha. Ngele nokungoye osho shi li ngawo, oto vulu okwaadha elalakano lyoye, to endele ko kashona nakashona. Ngele elalakano lyoye okukokeka  uukwatya wontumba, omolwashike itoo endele ko to wu ulike kashona nakashona? Ngele elalakano lyoye okulesha Ombiimbeli ayihe, omolwashike ito itulile po elandulathano lyoku yi lesha ethimbo efupi? Tomáš, ngoka a popiwa petameko lyoshitopolwa shika, osha li oshidhigu kuye okwaadha elalakano lye lyokulesha Ombiimbeli ayihe momumvo. Okwa ti: “Onde shi mono kutya onda li handi yi lesha tandi endelele unene. Onkee onda tokola okukambadhala ishewe, ihe oshikando shino ondi itulile po elandulathano lyokulesha oshitopolwa shomontopolwa yontumba esiku kehe nokutedhatedha kusho. Oshizemo, onda tameke okukala ndi hole oku yi lesha.” Sho Tomáš’ a tameke okukala e hole okulesha Ombiimbeli, okwa kala he yi lesha uule wethimbo. Mokweendela ko kwethimbo, okwa lesha Ombiimbeli ayihe. c

14. Iinima yini tashi vulika yi tu imbe tu adhe elalakano lyetu?

¹⁴ Kutya nduno otwa halelela okwaadha elalakano lyetu nenge tu na elandulathano, otashi vulika natango pu kale iiyimbi. Pashiholelwa, “iiningwanima yombaadhilila” otayi vulu okulya po ethimbo lyetu ndyoka twa pumbwa, opo tu adhe elalakano lyetu. (Omuuv. 9:11, NW) Otashi vulika pu holoke uudhigu mboka tawu tu thigi tu uvite twa teka omukumo nokaatu na lela oonkondo. (Omayel. 24:10) Okwaagwanenena kwetu otaku vulu oku tu ningitha tu katuke momukalo ngoka itaagu tu kwathele tu adhe elalakano lyetu. (Rom. 7:23) Nenge otashi vulika tu kale owala tu uvite twa vulwa. (Mat. 26:43) Oshike tashi vulu oku tu kwathela tu sinde iiyimbi mbyoka?

15. Ngele opu na oshiimbi shontumba, mbela shono osha hala okutya otwa ndopa? Shi yelitha. (Episalomi 145:14)

¹⁵ Dhimbulukwa kutya ngele opu na oshiimbi shontumba, itashi ti kutya owa ndopa. Ombiimbeli otayi ti kutya otashi vulika tu adhike komaupyakadhi lwiikando. Ihe otayi shi popi wo sha yela kutya otatu vulu okwaadha elalakano lyetu, unene tuu kekwatho lyaJehova. (Lesha Episalomi 145:14.) Omumwatate Philip, ngoka a tumbulwa metetekelo, okwa ti: “Okupondola kwandje inaku ikolelela kiikando mbyoka inaandi adha omalalakano gandje. Pehala lyaashoka, okwi ikolelela kiikando  mbyoka nda vula oku ga adha.” David, ngoka a popiwa metetekelo, okwa ti: “Ohandi kambadhala okutala ko iiyimbi nomasiku omawinayi kutya kayi shi omandangalati, ihe oompito dhokuulukila Jehova kutya ondi mu hole shi thike peni.” Ngele otwa tsikile okukambadhala tu adhe elalakano lyetu nonando oshidhigu, ohatu ulukile Jehova kutya otwa hala oku mu nyanyudha. Jehova iha kala tuu a nyanyukwa, uuna e wete to tsikile okukambadhala okwaadha elalakano lyoye!

16. Oshiimbi shontumba otashi vulu oku tu longa shike?

¹⁶ Ilonga kiikando mbyoka hapu ningwa sha, shoka hashi ku imbi wu adhe elalakano lyoye. Dhiladhila kombinga yaashoka sha ningwa po, e to ipula to ti, ‘Oshike tandi vulu okuninga, opo shika kaashi ningilwe ndje we?’ (Omayel. 27:12) Ihe omathimbo gamwe ngele oshidhigu noonkondo kungoye okwaadha elalakano ndyoka, otashi vulika shi ulike kutya, elalakano ndyoka kwa li to wapa oku li gwanitha po. Ngele owu uvite kutya nangoye owu li monkalo ndjoka, dhiladhilulula kombinga yelalakano lyoye wu tale ngele oto vulu oku li adha. d Jehova ite ke ku tala ko kutya owa ndopa, ngele ino adha elalakano ndyoka wa li itoo vulu oku li adha. — 2 Kor. 8:12.

17. Omolwashike tu na okutsikila okukaleka momadhiladhilo shoka twa pondola nale musho?

¹⁷ Kaleka momadhiladhilo shoka wa pondola nale musho. Ombiimbeli otayi ti kutya ‘Kalunga oku shi kwiinekelwa. Ita dhimbwa iilonga yoye.’ (Heb. 6:10) Onkee nangoye ino yi dhimbwa. Dhiladhila kwaashoka wa pondola nale musho. Otashi vulika wa kokeka ekwatathano lyoye naJehova, wa lombwela yalwe kombinga ye nenge wa ninginithwa. Ngaashi owala wa li wa ningi ehumokomeho e to adha omalalakano goye gopambepo monakuziwa, oto vulu okutsikila okuninga ehumokomeho wu adhe elalakano ndyoka wi itulila po ngashingeyi. — Fil. 3:16.

18. Oshike tu na okudhimbulukwa okuninga, sho tatu longo tu adhe elalakano lyetu? (Tala wo ethano.)

¹⁸ Kekwatho lyaJehova, oto vulu okwaadha elalakano lyoye, ngaashi omuhingi gwokambautu ha kala a nyanyukwa uuna a thiki hoka ta yi. Dhimbulukwa kutya aahingi yuumbautu oyendji ohaya nyanyukilwa wo olweendo lwawo. Sha faathana, sho to tsikile okulonga nuudhiginini wu adhe elalakano lyoye, aluhe kambadhala okumona nkene Jehova te ku kwathele note ku yambeke sho to longo wu li adhe. (2 Kor. 4:7) Ngele inoo shuna omutse miipeta, oto ka mona omayambeko nokuli ge vulithe pwaangoka. — Gal. 6:9.