1. Ombiimbeli otayi popi ngiini kombinga yohole?

 EHAYANGO lyohole “olyo ehayango lyomulilo, ehayango lyOmuwa. Efundja lyomeya ihali vulu okudhima ohole, nomilonga ihadhi vulu oku yi kungulula po.” b (Ondjimb. 8:6, 7) Oohapu ndhoka itadhi yelitha tuu ohole momukalo omwaanawa! Otadhi tsu lela omukumo aaihokani, oshoka otadhi ulike kutya otamu vulu okukala mu holathane noonkondo.

2. Aaihokani oye na okuninga shike, opo ya shilipaleke kutya ohole yawo itayi talala?

² Ngele aaihokani oya hala okukala nohole itaayi hulu po, oshi ikwatelela kuyo. Natu shi thaneke ngeyi, omulilo ohagu vulu owala okukala gwa tema, ngele otagu tulwa iikuni. Ngele hasho, omulilo ngoka otagu ka endela ko tagu dhimi. Sha faathana, ohole pokati komusamane nomukulukadhi otayi vulu owala okukala ya kola lela, ngele ohaya koleke ekwatathano lyawo. Omathimbo gamwe, aaihokani ohashi vulika ya kale yu uvite kutya ohole yawo otayi talala, unene tuu ngele oye na omaupyakadhi gopamahupilo, gopaukolele nenge gokuputudha aanona. Onkee ano, ngele owu li mondjokana, ongiini mbela to vulu okukaleka “ehayango lyOmuwa” lya tema mondjokana yeni? Moshitopolwa shika otatu ka kundathana omikalo ndatu dhankene tamu vulu okukaleka ekwatathano lyeni mondjokana yeni lya kola nomwa nyanyukwa. c

3. Ongiini ekwatathano lya kola naJehova hali kwathele aaihokani ya tsikile okukaleka ohole yawo ya kola? (Omuuvithi 4:12) (Tala wo ethano.)

³ Opo aaihokani ya kaleke “ehayango lyOmuwa” lya tema, ayehe omusamane nomukulukadhi, oye na okulonga, opo ya kale ye na ekwatathano lya kola naJehova. Ongiini shoka tashi vulu oku ya kwathela mondjokana yawo? Uuna aaihokani ya lenga ekwatathano lyawo naHe gwawo gwomegulu, ohaya tula omayele ge miilonga nuupu, shoka hashi ya kwathele ya yande nokusinda omaupyakadhi ngoka tashi vulika ga ningithe ohole yawo yi talale. (Lesha Omuuvithi 4:12.) Aantu mboka ye na ekwatathano lya kola naJehova ohaya ningi wo ngaashi taya vulu ye mu holele nokukokeka omaukwatya ngoka ha ulike, ngaashi olukeno, eidhidhimiko nosho wo edhiminopo. (Ef. 4:32–5:1) Aaihokani mboka haya ulike omaukwatya ngoka ohaye shi ningitha oshipu, opo ohole yawo yi ende tayi koko. Omumwameme gwedhina Lena, ngoka ngashingeyi a hokanwa uule womimvo dhi vulithe po 25, okwa ti: “Oshipu okukala wu hole nowa simaneka omuntu ngoka e na ekwatathano lya kola naJehova.”

4. Omolwashike Jehova a hogolola Josef naMaria ya ninge aavali yaangoka a li ta ka ninga Mesiasa?

⁴ Tala koshiholelwa shika shomOmbiimbeli. Sho Jehova a hogolola aaihokani yamwe ya ninge aavali yaangoka a li ta ka ninga Mesiasa, okwa hogolola Josef naMaria moluvalo olundji lwaDavid. Omolwashike mbela? Omolwaashoka ayehe oya li ye na ekwatathano paumwene naJehova, na Jehova okwa li e shi kutya otaye ke mu pititha komeho mondjokana yawo. Aaihokani, oshike tamu vulu okwiilonga kuJosef naMaria?

5. Oshike aasamane taya vulu okwiilonga kuJosef?

⁵ Josef okwa tula miilonga nehalo ewanawa elombwelo lyaJehova, naashoka oshe mu ningi omusamane e li nawa. Poompito dhi li ndatu lwaampono, okwa li a pewa omalombwelo kuJehova ge na ko nasha nuukwanegumbo we. Oshikando kehe okwa li a vulika meendelelo, nuuna nokuli sha li tashi pula a ninge omalunduluko omanene. (Mat. 1:20, 24; 2:13-15, 19-21) Sho a landula elombwelo lyaKalunga, Josef okwa gamene Maria, okwe mu ambidhidha nokwe mu sile oshimpwiyu. Dhiladhila owala kombinga yankene shoka Josef a ningi sha ningitha Maria a kale e mu hole nokwe mu simaneka shi vulithe nale! Aasamane, otamu vulu okuholela Josef mokukala hamu kongo omayele ga kankamena kOmbiimbeli, gankene mu na okusila oshimpwiyu omaukwanegumbo geni. d Uuna wa tula miilonga omayele ngoka, nokuli nando otage ku pula wu ninge omalunduluko, oto ulike kutya owu hole omukulukadhi gwoye noho koleke ondjokana yeni. Omumwameme gumwe moVanuatu ngoka a kala a hokanwa uule womimvo dhi vulithe 20 okwa ti: “Uuna omusamane gwandje ta kongo ewiliko kuJehova noku li landula, ohandi mu simaneke shi vulithe nale. Ohandi kala ndi uvite nda gamenwa nohandi kala ndi inekela omatokolo ge.”

6. Aakulukadhi otaya vulu okwiilonga ko shike kuMaria?

 ⁶ Maria okwa li e na ekwatathano paumwene naJehova. Eitaalo lye kalya li li ikolelela kwaashoka Josef a li ha ningi. Maria okwa li e shi nawa Omanyolo. Okwa li wo ha longitha ethimbo a tedhatedhe kwaashoka i ilongo. (Luk. 2:19, 51) Otatu vulu okukala nuushili kutya ekwatathano lyaMaria naJehova olye mu ningitha omukulukadhi a dhenga mbanda. Kunena, aakulukadhi oyendji ohaya kambadhala okuninga ngaashi Maria a li ha ningi. Pashiholelwa, omumwameme Emiko okwa ti: “Sho nda li inaandi hokanwa, onda li ndi na elandulathano lyopaumwene lyokuninga iinima yopambepo. Ihe konima sho nda hokanwa, onde shi mono kutya omusamane gwandje oye a li ha galikana nokukwatela komeho elongelokalunga lyuukwanegumbo. Onkee onda tameke okukala owala ndi ikolelela kuye a ninge iinima mbyoka. Onde shi mono kutya onda li nda pumbwa okuhumbata omutenge gwandje ngaye mwene, ngele tashi ya pekwatathano lyandje naJehova. Onkee ngashingeyi ohandi itulile po ethimbo lyokukala ongame awike naKalunga, tandi galikana, tandi lesha Oohapu dhe, nokutedhatedha kudho.” (Gal. 6:5) Aakulukadhi sho tamu tsikile okukoleka ekwatathano lyeni naJehova, aasamane yeni otaye ku tanga notaya ka kala ye mu hole shi vulithe nale. — Omayel. 31:30.

7. Aaihokani taya vulu okwiilonga shike kuJosef naMaria kombinga yokulongela Kalunga pamwe?

⁷ Josef naMaria oya li wo ya longo pamwe, opo ya kaleke ekwatathano lyawo naJehova lya kola. Oya li yu uvite ko kutya osha simana okulongela Jehova pamwe ye li uukwanegumbo. (Luk. 2:22-24, 41; 4:16) Otashi vulika sha li oshidhigu kuyo oku shi ninga unene tuu sho ya ka mona aanona oyendji, ihe nonando ongawo, oya li ye shi ningi. Shika kashi shi tuu oshiholelwa sha dhenga mbanda kaaihokani kunena! Ngele omu na aanona ngaashi Josef naMaria, otashi vulika shi kale eshongo ku ne okukala hamu kala pokugongala nenge okwiitulila po ethimbo lyokuninga elongelokalunga lyuukwanegumbo. Otashi vulika nokuli shi kale oshidhigu lela okumona ethimbo lyokukonakona nenge lyokugalikana pamwe mu li aaihokani. Ihe dhimbulukweni kutya uuna tamu longele Jehova pamwe, ohamu hedha popepyeelela naye nakehe gumwe oha hedha popepyeelela namukwawo. Onkee ano, kaleni mwa pititha komeho okulongela Kalunga.

8. Aaihokani mboka ye na omaupyakadhi mondjokana yawo otaya vulu okuninga shike, opo ya mone mo uuwanawa thiluthilu melongelokalunga lyuukwanegumbo?

⁸ Ongiini ngele omu na omaupyakadhi mondjokana yeni? Okuninga elongelokalunga pamwe lyuukwanegumbo, otashi vulu okukala oshinima kaashi shi oshihokithi. Ngele osho, tamekeni okuninga oshinima shoka oshifupi nomu shi hole, oshinima shoka amuhe hamu zimine okukundathana kombinga yasho. Shono otashi vulu oku mu kwathela mu kale mu holathane shi vulithe nale nokukala mwa hala okulongela Jehova pamwe mu li aaihokani.

9. Omolwashike omusamane nomukulukadhi ye na okukala haya kala ethimbo pamwe?

⁹ Aaihokani otamu vulu wo okukaleka ohole yeni ya hwama mokukala hamu kala ethimbo pamwe. Ngele omwe shi ningi, otashi ka kwathela kehe gumwe gwomune a tseye shoka mukwawo ta dhiladhila nankene e uvite. (Gen. 2:24) Ndhindhilika shoka Lilia naRuslan ya ndhindhilike nziya konima sho ya kala mondjokana uule womimvo dhi vulithe po 15. Lilia okwa ti: “Otwa mono kutya katu na ethimbo olindji lyokukala pamwe ngaashi twa li twa dhiladhila. Otwa li hatu kala twi ipyakidhila unene niilonga yokwiikongela omboloto, yomegumbo nokonima onaanona yetu. Otwa mono kutya ngele otwa kala kaatu na ethimbo lyokukala pamwe tu li aaihokani, otashi vulika ekwatathano lyetu kaali kale lya kola.”

10. Aaihokani otaya vulu ngiini okutula miilonga ekotampango ndyoka li li mAaefeso 5:15, 16?

¹⁰ Aaihokani otaya vulu okuninga shike, opo ya shilipaleke kutya ohaya kala ethimbo pamwe?  Otamu vulu okwiitulila po ethimbo lyokukala pamwe. (Lesha Aaefeso 5:15, 16.) Omumwatate gwokoNigeria, Uzondu, okwa ti: “Uuna tandi itulile po elandulathano lyaashoka tandi ka ninga, ohandi kwatele mo ethimbo lyokukala pamwe nomukulukadhi gwandje tu li aaihokani, nethimbo ndyoka ohandi kala nde li lenga.” (Fil. 1:10) Tala kunkene Anastasia, omukulukadhi gwomutonatelishikandjo gumwe gwomoMoldova, ha longitha nawa ethimbo lye. Okwa ti: “Ohandi kambadhala okuninga iinima yopaumwene, sho omusamane gwandje i ipyakidhila niinakugwanithwa ye. Komukalo ngono ohatu vulu okukala ethimbo pamwe lwanima.” Ihe ongiini nduno ngele omalandulathano geni ohage shi ningitha oshidhigu mu kale ethimbo pamwe?

11. Iilonga yini Akula naPriska ya li ya longo pamwe?

¹¹ Aaihokani otaya vulu okwiilonga koshiholelwa shaAkula naPriska, aaihokani mboka ya li ya simanekwa kAakriste oyendji yopetameko. (Rom. 16:3, 4) Nonando Ombiimbeli inayi popya uuyelele owundji kombinga yondjokana yawo, otayi ulike kutya oya li ya longo pamwe, yu uvitha pamwe nokukwathela yalwe pamwe. (Iil. 18:2, 3, 24-26) Uushili owo kutya uuna Ombiimbeli tayi popi Akula naPriska, olundji ohayi ya popile pamwe.

12. Omusamane nomukulukadhi otaya vulu okuninga shike ya kale ethimbo olindji pamwe? (Tala wo ethano.)

¹² Ongiini aaihokani taya vulu okuholela Akula naPriska? Dhiladhila kombinga yiinima oyindji mbyoka ngoye nakuume koye kopandjokana mwa pumbwa okuninga. Mbela itamu vulu okulonga iilonga mbika pamwe mu li aaihokani, pehala lyoku yi iningila? Pashiholelwa, Akula naPriska oya li haya uvitha pamwe. Mbela nane ohamu ningi ngaa omalongekidho pandjigilile mu ninge sha faathana? Akula naPriska oya li haya longo pamwe. Ngoye nakuume koye kopandjokana otashi vulika mu kale kaamu na iilonga ya faathana, ihe mbela itamu vulu okulonga iilonga yomegumbo pamwe? (Omuuv. 4:9) Uuna tamu kwathelathana mu longe oshilonga shontumba, ohamu kala mu uvite mu li osipana nohamu kala mu na ompito yokupopya. Robert naLinda oya kala ya hokana uule womimvo 50. Robert okwa ti: “Uushili owo kutya katu na ethimbo olindji lyokukutha ombinga momainyanyudho pamwe. Ihe uuna tandi yogo iiyaha nomukulukadhi gwandje ote yi theta nenge uuna tandi longo moshikunino shetu, omukulukadhi gwandje e te ya tu longe pamwe, ohandi kala nda nyanyukwa noonkondo. Okuninga iinima pamwe ohaku tu hanganitha. Ohole yetu otayi tsikile nokukoka.”

13. Opo omusamane nomukulukadhi ya kale ya hangana shili, oye na okuninga shike?

¹³ Ihe dhimbulukwa kutya okukala pamwe haaluhe haku mu ningitha mu kale mwa hangana. Omukulukadhi gumwe gwokoBrasilia okwa ti: “Kunena, opu na iinima oyindji mbyoka hayi tu piyaganeke, noshipu okudhiladhila kutya ohatu kala owala pamwe molwaashoka hatu zi megumbo limwe. Ondi ilonga kutya okukala pamwe inaku gwana, ihe otwa pumbwa okuninga oshindji. Onda pumbwa wo okugandja eitulomo kukuume kandje kopandjokana.” Ndhindhilika nkene Bruno nosho wo omukulukadhi gwe, Tays, haya shilipaleke kutya ohaya paathana eitulomo.  Bruno okwa ti: “Uuna twa manguluka, oongodhi dhetu ohatu tu dhi etha nokupaathana eitulomo.”

14. Ngele aaihokani ihaya nyanyukilwa okukala ethimbo pamwe, oshike taya vulu okuninga?

¹⁴ Ihe ongiini ngele ngoye nakuume koye kopandjokana ihamu nyanyukilwa okukala ethimbo pamwe? Otashi vulika kaamu hole iinima ya faathana nenge hamu ningilathana nayi. Oshike tamu vulu okuninga? Taleni koshiholelwa shomulilo shoka sha popiwa metetekelo. Omulilo ihagu tameke owala gwa tema nawanawa. Ogwa pumbwa okutulwa iikuni iinene kashona nakashona. Sha faathana, omolwashike itaamu tamekele ko okukala pamwe ethimbo efupi esiku kehe? Shilipalekeni kutya ohamu ningi oshinima shoka amuhe mu hole, ihe haashoka tashi eta oontamanana. (Jak. 3:18) Ngele omwa tamekele ko kashona nakashona, otashi vulika mu ke shi mone kutya ohole yeni yokuholathana otayi koko ishewe.

15. Omolwashike okusimanekathana kwa simanenena, opo aaihokani ya kaleke ohole yawo ya hwama?

¹⁵ Okusimanekathana okwa simanenena mondjokana. Okusimanekathana okwa fa ombepo yohapi ndjoka hayi ningitha omulilo gu kale gwa tema nawa. Ngele kayi po, omulilo ohagu dhini mbala. Sha faathana, ngele aaihokani ihaya simanekathana otaya ka mona kutya ohole yawo otayi vulu okutalala nziya. Mepingathano naashono, omusamane nomukulukadhi mboka haya kambadhala okusimanekathana, ohaya longo nuudhiginini ya kaleke ohole yawo ya hwama. Ihe shi kaleka momadhiladhilo kutya shoka sha simana hangele ongoye wu wete kutya oho simaneke kuume koye kopandjokana, ihe ongele kuume koye kopandjokana e uvite kutya oho mu simaneke. Penny naAret oya kala ya hokana uule woomvula dhi vulithe po 25. Penny ota ti: “Molwaashoka ohatu simanekathana, otu holathane megumbo. Otu uvite kutya ohatu popi twa mangulukilathana, molwaashoka otu shi kutya kehe gumwe okwa lenga omadhiladhilo gamukwawo.” Onkee ano, oshike to vulu okuninga wu kwathele kuume koye kopandjokana a kale e uvite kutya owe mu simaneka shili? Tala kiiholelwa yaAbraham naSara.

16. Oshike shoka aasamane taya vulu okwiilonga koshiholelwa shaAbraham? (1 Petrus 3:7) (Tala wo ethano.)

¹⁶ Abraham okwa li a ungaunga naSara nesimaneko. Okwa li a pulakene kuye noku ulike kutya okwa simaneka omaiyuvo ge. Pompito yimwe, Sara okwa li a yemata nokwa li a lombwele Abraham nkene e uvite nokwa li nokuli e mu pe ombedhi. Mbela Abraham okwa li a geye e te mu yamukula nayi? Aawe. Okwa li a e shi kutya Sara omukulukadhi ha vulika noha longele kumwe nomatokolo ge. Abraham okwa li a pulakene kuye nokukambadhala okukandula po uupyakadhi mboka wa holoka po. (Gen. 16:5, 6) Oshike tatu vulu okwiilonga kuAbraham? Aasamane omu na oonkondopangelo dhokuninga omatokolo momaukwanegumbo geni. (1 Kor. 11:3) Ihe oshinima shopahole shoka tamu vulu okuninga okuuva kutya omukulukadhi gwoye ota ti ngiini, manga inoo ninga etokolo, unene tuu ngele etokolo ndyoka otali ke mu guma. (1 Kor. 13:4, 5) Omathimbo gamwe, omukulukadhi gwoye otashi  vulika a kale e uvite a yemata notashi vulika a kela a pumbwa okupopya nkene e uvite. Mbela oho simaneke ngaa omaiyuvo ge mokupulakena kuye neitulomo? (Lesha 1 Petrus 3:7.) Angela naDmitry oya kala ya hokana omimvo 30 lwaampo. Angela okwa yelitha nkene omusamane gwe he mu ningitha a kale e uvite a simanekwa a ti: “Dmitry oha kala aluhe i ilongekidha okupulakena ndje, uuna nda yemata nenge uuna nda hala owala okupopya. Oha idhidhimikile ndje nokuli nuuna itaandi popi nda ngungumana.”

17. Aakulukadhi otaya vulu okwiilonga shike koshiholelwa shaSara? (1 Petrus 3:5, 6)

¹⁷ Sara okwa li a ulike kutya okwa simaneka Abraham mokuyambidhidha omatokolo ge. (Gen. 12:5) Pompito yimwe, Abraham okwa li a tokola a yakule aayenda mboka a li inaa tegelela. Okwa li a pula Sara a ethe po shoka a li ta ningi, a longekidhe iikwiila oyindji. (Gen. 18:6) Sara okwa katuka nziya e ta ningi shoka Abraham e mu pula a ninge. Aakulukadhi otamu vulu okuholela Sara mokuyambidhidha omatokolo ngoka taga ningwa kaasamane yeni. Uuna tamu shi ningi, otamu koleke ondjokana yeni. (Lesha 1 Petrus 3:5, 6.) Dmitry, ngoka a tumbulwa mokatendo ka tetekele, okwa yelitha nkene omukulukadhi gwe he mu ningitha a kale e uvite a simanekwa. Dmitry okwa ti: “Ohandi pandula oonkambadhala dhaAngela ndhoka ha ningi a yambidhidhe omatokolo gandje, nokuli nonando ita tsu kumwe nago. Ngele iinima inayi enda nawa, iha pe ndje uusama.” Ihashi kala tuu oshipu okukala wu hole omuntu ngoka he ku simaneke!

18. Ongiini aaihokani taya vulu okumona uuwanawa mokulonga nuudhiginini ya kaleke ohole yawo ya hwama?

¹⁸ Kunena, Satana okwa hala aaihokani Aakriste ya ethe po okukala ye holathane. Oku shi kutya ngele aaihokani oya kala kaaye holathane, otashi vulika ya tameke okuhedha kokule naJehova. Ihe nando ongawo, ohole yashili ihayi hulu po. Onkee ano, ohole ndjoka mu na mondjokana yeni nayi kale ya fa ohole ndjoka ya popiwa mOndjimbolela. Kaleni mwa tokola toko okupititha Jehova komeho mondjokana yeni. Kaleni hamu kala ethimbo pamwe, na kehe gumwe na kale a simaneka omaiyuvo noompumbwe dhamukwawo. Ngele omwe shi ningi, ondjokana yeni otayi ka simanekitha Onzo yohole yashili, Jehova, nohole yeni otayi ka kala ya hwama sigo aluhe, ngaashi naanaa omulilo gwa tema nawa.