1, 2. (a) Aantu yamwe ohayi inyenge ngiini kedhiladhilo kutya Kalunga oku na ehangano? (b) Oshike tatu ka kundathana moshitopolwa muno?

MBELA Kalunga oku na ehangano? Aantu yamwe otashi vulika ya tye: “Ino pumbwa ehangano li ku wilike. Owa pumbwa owala okukala wu na ekwatathano naKalunga.” Mbela okupopya kwa tya ngawo oku li mondjila? Shoka otashi ulike shike?

² Moshitopolwa shika otatu ka kundathana uunzapo mboka tawu ulike kutya Jehova, Kalunga kelandulathano, Omuunganeki a shiga ko. Otatu ka konakona wo nkene tatu ki inyenga kewiliko ndyoka tatu pewa mehangano lyaJehova. (1 Kor. 14:33, 40) Omimvo 2 000 dha ka pita nopethimbo lyetu, Ombiimbeli oya kwathela aantu oyendji mehangano lyaJehova lyokombanda yevi ya longe iilonga iinene yokuuvitha onkundana ombwanawa. Molwaashono ohatu landula Ombiimbeli nohatu landula omalombwelo gehangano, ohatu humitha komeho uuyogoki, ombili nuukumwe megongalo alihe.

3. Oshike she ku tompa kutya Jehova Omuunganeki a shiga ko?

³ Eshito otali shi ulike kutya Kalunga Omuunganeki a shiga ko. Ombiimbeli otayi ti: “Omuwa okowino ye a dhike evi, nokuunkulungu we a yalaleke egulu.” (Omayel. 3:19) Otu shi kutya  ‘ayihe mbika otayi ulike oonkondo dhaKalunga noyo enongono lyowala momakutsi getu.’ (Job 26:14) Nonando otu shi owala kashona kombinga yoopulanete, yoonyothi noyomilalawili, oshe tu inyengitha tu tseye kutya omaminikilo gokegulu ogu unganekwa nawa kaaku na we. (Eps. 8:3, 4) Omilalawili odha thikama po moonyothi omamiliyona ndhoka adhihe hadhi inyenge momukalo gu unganekwa nawa. Oopulaneta ndhoka dha dhingoloka etango, ohadhi ende melandulathano dha fa tadhi wilikwa koompango dhomoondjila. Osha yela kutya elandulathano ekumithi ndyoka li li meshito otali tu ulukile kutya Jehova ngoka “a shiti egulu kuunongo we” nevi, okwa gwana okupandulwa, okwiinekelwa nokusimanekwa. — Eps. 136:1, 5-9.

4. Omolwashike aanongononi ya ndopa okuyamukula omapulo ogendji?

⁴ Uunongononi owa holola oshindji kombinga yeshito nosho wo yevi, nowe tu etela omauwanawa ogendji monkalamwenyo. Ihe opu na omapulo ogendji ngoka aanongononi inaaya vula okuyamukula. Pashiholelwa, aanongononi yoonyothi itaya vulu oku tu lombwela naanaa nkene eshito lye ya po nenge kutya omolwashike kevi ku na aantu niinamwenyo. Natango aantu itaya vulu okuyelitha kutya omolwashike aantu ye na ehalo enene lyokukala nomwenyo sigo aluhe. (Omuuv. 3:11.) Omolwashike pu na omapulo ogendji ga simana, ihe kage ninwe omayamukulo? Omolwaashono aanongononi oyendji nayalwe ohaya ti kutya kaku na Kalunga nohaya humitha komeho elongo lyoevolusi. Ihe Jehova oha yamukula omapulo ngoka aantu kehe pamwe, haya kala tayi ipula nago, okupitila mOohapu dhe.

5. Omomikalo dhini hatu vulika koompango dhaKalunga dhopaunshitwe?

⁵ Ohatu vulika koompango dhaJehova dhopaunshitwe ndhoka ihaadhi lunduluka nodhi shi okwiinekelwa. Aapangeli yomalusheno, aalongi yominino, ooyindjiniya, aahingindhila naatandindohotola, ayehe ohaya vulika koompango ndhoka sho taya longo iilonga yawo. Pashiholelwa, omutandindohotola kehe oku shi kutya iitopolwa yomoluntu lwomuntu oya gama peni. Ndohotola oku shi kutya omutima ogwa gama peni ngele ta tanda. Atuheni otwa simaneka oompango dhopaunshitwe. Ngele omuntu okwa nuka okuza pombanda puule otashi vulika a se.

6. Omolwashike aalongeli yaJehova ye na okukala yu unganekwa?

⁶ Ewangandjo olyu unganekwa momukalo omukumithi. Onkee ano, osha yela kutya Jehova okwa hala aalongeli ye ya kale yu unganekwa nawa. Okwe tu pa Ombiimbeli yi tu wilike. Ngele itatu wilikwa kehangano lye nokomithikamompango dhe itatu ka kala twa nyanyukwa notashi ke tu etela iilanduliko yinikitha oluhodhi.

7. Oshike tashi ulike kutya Ombiimbeli oyu unganekwa nawa?

⁷ Ombiimbeli kayi shi owala embo lya tulwa kumwe kAajuda yontumba nokwaamboka hayi iti Aakriste. Pehala lyaashono, oyi li embo lyu unganekwa nawa nolya nwethwa mo kuKalunga momukalo omukumithi. Omambo gOmbiimbeli otaga tsu kumwe. Enenedhiladhilo lyOmbiimbeli okuza kuGenesis sigo okEhololo otali ulike uunamapangelo waJehova negwanitho lyelalakano lye li na ko nasha nevi okupitila mUukwaniilwa we mboka Kristus, e li “oluvalo” lwu uvanekwa, oye omupangeli gwawo. — Lesha Genesis 3:15; Mateus 6:10; Ehololo 11:15.

8. Omolwashike tatu tile kutya Aaisraeli oya li yu unganekwa nawa?

⁸ Aantu yomuIsraeli shonale oya li yu unganekwa nawa. Pashiholelwa, pethimbo lyOmpango yaMoses, opwa li “aakiintu mboka haa yakula posheelo shetsalihangano” yu unganekwa nawa. (Eks. 38:8) Aaisraeli uuna taya tembudha ontanda yawo pamwe noshikethahangano  oya li haya kala yu unganekwa nawa. Konima yethimbo omukwaniilwa David okwa li u unganeke Aalevi naayambi moongundu pailonga yawo. (1 Ondjal. 23:1-6; 24:1-3) Aaisraeli sho ya li ya vulika, Jehova okwe ya yambeke ya kale ye na ombili noya hangana. — Deut. 11:26, 27; 28:1-14.

9. Oshike tashi ulike kutya egongalo lyopaKriste lyomethelemimvo lyotango olya li lyu unganekwa?

⁹ Egongalo lyopaKriste lyomethelemimvo lyotango olya li lyu unganekwa. Olya li hali kwathelwa komalombwelo ngoka haga zi kolutuwiliki, ndoka tango lwa li lwa thikama po maayapostoli. (Iil. 6:1-6) Konima yethimbo, molutuwiliki omwa gwedhwa aamwatate yontumba. (Iil. 15:6) Omayele nomalombwelo oga li haga gandjwa okupitila moontumwafo dha nwethwa mo ndhoka dha nyolwa kaamwatate mboka ya li iilyo yolutuwiliki lwomethelemimvo lyotango nenge kwaamboka ya li haya longo pamwe nalwo. (1 Tim. 3:1-13; Tit. 1:5-9). Omangongalo oga li haga mono uuwanawa ngiini mokulandula omalombwelo ngoka ga za kolutuwiliki?

10. Omagongalo gopethimbo lyonale oga li haga mono uuwanawa washike uuna ga landula omalombwelo ngoka ga gandjwa kolutuwiliki? (Tala kethano lyopetameko.)

¹⁰ Lesha Iilonga 16:4, 5. Aamwatate oya li haya ka talela po omagongalo pehala lyolutuwiliki taye ga lombwele “omautho ngoka ga ningwa kaayapostoli nokaakuluntu muJerusalem.” Sho omagongalo ga vulika komautho ngoka “oga kolekelwa meitaalo nomwaalu gwooitaali ogwi indjipala esiku kehe.” Mbela ehokololo ndika lyOmbiimbeli otali tu longo shike, shoka tatu vulu okutula miilonga sho tu li mehangano lyaJehova kunena?

11. Aamwatate mboka ya langekwa po oye na okwiinyenga ngiini komalombwelo ngoka taya pewa kehangano lyaKalunga?

¹¹ Iilyo yOokomitiye dhIitayimbelewa, aatonatelishikandjo naakuluntu yomagongalo oye na okuninga po shike ngele ya pewa omalombwelo kehangano lyaKalunga kunena? Oohapu dhaJehova, Ombiimbeli, ohadhi tu wilike tu kale hatu vulika. (Deut. 30:16; Heb. 13:7, 17). Ombepo yokwaavulika inayi pumbiwa mehangano lyaKalunga, oshoka iikala ya tya ngawo otayi vulu okupiyaganeka ohole yetu, ombili yetu nuukumwe momagongalo. Osha yela kutya kapu na Omukriste omudhiginini ta ka kala a hala okuulika ombepo yokwaanesimaneko noyokwaanevuliko, ngaashi Diotrefes. (Lesha 3 Johannes 9, 10.) Otatu vulu okwiipula ngeyi: ‘Mbela ohandi kwathele ngaa Aakriste ooyakwetu ya koke pambepo? Mbela ohandi endelele ngaa okutaamba ko ewiliko ndyoka hali gandjwa kaamwatate mboka haya kwatele komeho?’

12. Omalunduluko geni ga ningwa ge na ko nasha nokulangeka po aakuluntugongalo naayakuligongalo?

¹² Natu taleni omatokolo ngoka opo ga ningwa kolutuwiliki. “Omapulo ga za kaaleshi” mOshungolangelo yo 15 Novomba 2014, omalunduluko ge na ko nasha nankene aakuluntugongalo naayakuligongalo ye na okulangekwa po. Oshitopolwa osha ti kutya olutuwiliki lwomethelemimvo lyotango olwa li lwa pitika aatonateli aayendi ya langeke po aakuluntugongalo naayakuligongalo. Okuza me 1 Sepetemba 2014, aatonatelishikandjo oya tameke okulangeka po aakuluntugongalo naayakuligongalo. Omutonatelishikandjo oha kambadhala okutseya aalumentu mboka ya hogololwa, nokulonga pamwe nayo muukalele ngele onkalo otayi shi pitike. Oha tala wo aanegumbo yomumwatate ngoka a hogololwa. (1 Tim. 3:4, 5) Olutu lwaakuluntugongalo nomutonatelishikandjo ohaya tala nawa ngele aamwatate mbono oya gwanitha po iitegelelwa yopamanyolo, opo ya vule okulangekwa po ye li aayakuligongalo naakuluntugongalo. — 1 Tim. 3:1-10, 12, 13; 1 Pet. 5:1-3.

13. Ongiini tatu vulu okuyambidhidha ewiliko ndyoka hatu pewa kaakuluntugongalo?

 ¹³ Otwa pumbwa okulandula ewiliko lya kankamena kOmbiimbeli ndyoka hatu pewa kaakuluntugongalo. Aakuluntugongalo mbaka aadhiginini mehangano lyaKalunga ohaya wilikwa ‘koohapu dhoshili’ nokomalombwelo ngoka taga adhika mOmbiimbeli. (1 Tim. 6:3) Natu taleni omayele gaPaulus ge na ko nasha nayamwe mboka ya li itaaya landula ewiliko megongalo. Aantu yamwe ‘kaya li ya hala okulonga sha, ihe oya li owala hayi itula miinima yayakwawo.’ Osha yela kutya aakuluntugongalo oya li ya kambadhala oku ya kwathela, ihe oya tindi okutaamba ko omayele gawo. Egongalo olya li tali ka ninga po shike shi na ko nasha nayo? Paulus okwa londodha egongalo a ti: ‘Ya konekeni ne inamu endathana nayo.’ Omayele ngono oga li tage ya kwathele kaaye ya tale ko ye li aatondi yawo. (2 Tes. 3:11-15) Kunena aakuluntugongalo otashi vulika ya gandje oshipopiwa tashi londodha kombinga yagumwe ngoka ta tsikile neihumbato ewinayi megongalo, ngaashi okweendelathana nagumwe ngoka kee shi omwiitaali. (1 Kor. 7:39) Mbela oho inyenge ngiini ngele omukuluntugongalo ta gandja oshipopiwa sha fa mpono? Ngele owu shi gumwe te endelathana nagumwe ngoka kee shi omwiitaali, mbela oto ke etha po ngaa okweendathana nomuntu ngono? Okunakonasha kwoye nokuhenuka okweendathana naye, otaku vulu oku mu inyengitha e ethe po eihumbato lya puka. ^[1]

14. Ongiini tatu vulu okuhumitha komeho uuyogoki megongalo?

¹⁴ Otatu vulu okuhumitha komeho uuyogoki wopambepo megongalo mokulandula ewiliko ndyoka tali adhika mOohapu dhaKalunga. Natu konakoneni onkalo yomuKorinto shonale. Paulus okwa li u uvithile aantu yomoshilando shoka, nokwa li e hole “aayapuki” ooyakwawo yamo. (1 Kor. 1:1, 2) Paulus oku na okukala a li u uvite nayi sho a li tu ungaunga nuupyakadhi woluhondelo mboka wa li we ethelwa megongalo. Okwa li a lombwele aakuluntugongalo ya gandje omuntu ngoka a hondela kuSatana, niitya yimwe, ye mu konde mo megongalo. Opo ya kaleke egongalo lya yela, aakuluntugongalo oye na okukutha mo ‘efulika’ lyopathaneko. (1 Kor. 5:1, 5-7, 12) Ngele otwa yambidhidha etokolo lyaakuluntugongalo lyokukonda mo omuyoni ngoka ini iyela ombedhi megongalo, otatu kaleke po uuyogoki megongalo notashi vulika shi mu inyengithe i iyele ombedhi ye a dhiminwe po kuJehova.

15. Ongiini tatu vulu okukaleka po ombili megongalo?

¹⁵ MuKorinto omwa li mwa holoka uupyakadhi wulwe. Aamwatate yamwe oya li ya fala ooitaali ooyakwawo kompangu. Paulus okwe ya pula epulo ndyoka tali ya kwathele ya dhiladhile muule tali ti: “Omolwashike itaamu pitika, mu ningwe nayi?” (1 Kor. 6:1-8) Oonkalo dha fa mpoka ohadhi holoka nokunena. Omathimbo gamwe ombili mokati kaamwatate ohayi kana po, molwaashoka ongeshefa yawo ya pata, tashi vulika ya kanitha oshimaliwa nenge gumwe ta dhiladhila kutya mukwawo okwe mu kengelela. Yamwe ohaya fala aamwahe kompangu, ihe Ombiimbeli otayi tu kwathele tu mone kutya oshi li hwepo tu kanithe shoka twa kanitha pehala lyokunyateka edhina lyaKalunga nenge tu piyageneke ombili yegongalo. ^[2] Opo tu kandule po uupyakadhi wa kwata miiti noontamanana, otu na okutula miilonga omayele gaJesus. (Lesha Mateus 5:23, 24; 18:15-17.) Ngele otwe shi ningi, otatu ka humitha komeho uukumwe mokati kaalongeli yaJehova.

16. Omolwashike tu na okukala twa tegelela aapiya yaKalunga ya kale yu unganekwa?

¹⁶ Oohapu dhaJehova, Ombiimbeli, otadhi ulike kutya omolwashike tu na okukala twa tegelela aapiya ye ya kale yu unganekwa.  Omupisalomi okwi imbi a ti: “Osho opala sho opalelela aantu ayehe ngele taa kala ye holathana ngaashi aamwayinathana.” (Eps. 133:1) Sho Aaisraeli ya li haya vulika kuJehova, oya li haya kala yu unganekwa noya hangana. Kalunga okwe ya lombwele kombinga yonakuyiwa yawo yokomeho a ti: “Otandi ke mu gongela, ngaashi oonzi tadhi ya koshigunda.” (Mika 2:12) Oshikwawo, Jehova okwa hunganeke okupitila momupolofeti Sefanja a ti: “Otandi ka shitulula aantu yiigwana, notaa ka galikana ndje ngame awike nohaikalunga yilwe. Ayehe otaa ka vulika kungame.” (Sef. 3:9) Inatu nyanyukwa tuu sho tu na uuthembahenda wokulongela Jehova twa hangana!

17. Opo aakuluntugongalo ya kaleke po uukumwe nuuyogoki megongalo, oye na okuungaunga ngiini nomuyoni?

¹⁷ Opo uukumwe nuuyogoki wu kalekwe po megongalo, aakuluntugongalo oye na okuungaunga niinima yopampangu mbala nomomukalo omwaanawa. Paulus okwa li e shi kutya ohole yaKalunga itayi wilikwa komaiyuvo gowala, noku shi kutya Jehova ite ki idhidhimikila omuyoni. (Omayel. 15:3) Onkee ano, Paulus ina sa uunye okunyola Aakorito yotango, ontumwafo ndjoka tayi tsu aantu omukumo noyopahole. Aakorinto aatiyali oya li ya nyolwa konima yoomwedhi dhontumba, shoka otashi ulike kutya ehumokomeho olya li lya ningwa, molwaashono aakuluntugongalo oya li ya tula ewiliko lyomuyapostoli Paulus miilonga. Ngele Omukriste a gwile meyono lyontumba, nena aakuluntugongalo oye na oku mu pukulula nohenda. — Gal. 6:1.

18. (a) Omomikalo dhini omayele ngoka ge li mOmbiimbeli ga kwathela omagongalo gomethelemimvo lyotango? (b) Otatu ka kundathana shike moshitopolwa tashi landula?

¹⁸ Osha yela kutya Oohapu dhaKalunga dha nwethwa mo odha kwathela Aakriste yomethelemimvo lyotango muKorinto napalwe ya kale aayogoki, ye na ombili noya hangana momagongalo gawo. (1 Kor. 1:10; Ef. 4:11-13; 1 Pet. 3:8) Oshizemo, aamwatate naamwameme yopethimbo ndyoka oya li ya vulu okuninga oshindji muukalele. Osha yela kutya, Paulus okwa li ta vulu okutya onkundana ombwanawa ‘otayi uvithilwa aantu ayehe muuyuni.’ (Kol. 1:23) Kunena ontseyo kombinga yelalakano ekumithi lyaKalunga otayi taandele nevi alihe. Shoka oshe etithwa koonkambadhala ndhoka dha ningwa kwaamboka yomehangano ndyoka tali uvitha lya hangana. Oshitopolwa tashi landula otashi ku ulika kutya aantu mboka oya lenga noonkondo Ombiimbeli noya tokola okusimananekitha Omupangeliawike gweshito alihe, Jehova. — Eps. 71:15, 16.