1-3. Uupyakadhi pokati kaEuodia naSintike otashi vulika wa li wa holoka po ngiini, nuupyakadhi wa tya ngawo otawu vulu okuyandwa ngiini? (Tala kethano lyopetameko.)

AAPIYA yaJehova oya lenga embo lyaKalunga eyapuki, Ombiimbeli. Molwaashoka inatu gwanenena, omathimbo gamwe atuheni ohatu pewa omayele gopamanyolo. Mbela otatu ki inyenga ngiini ngele otwe ga pewa? Natu taleni koshiholelwa shAakriste yomethelemimvo lyotango, Euodia naSintike. Pokati kaakiintu mboka aagwayekwa opwa li pwa holoka uupyakadhi wa kwata miiti. Mbela uupyakadhi mboka owashike? Ombiimbeli inayi wu popya. Natu taleni kethaneko lyaashoka tashi vulu okuholoka megongalo.

² Natu tye ando Euodia okwa hiya aamwatate naamwameme yontumba kegumbo lye ya ka lye pamwe naye noya nyanyukilwe eendathano. Sintike ka li a hiywa, ihe okwa li u uvu kutya ayehe oya li ya nyanyukilwa pamwe. Sintike otashi vulika a ti: ‘Itandi shi itaale kutya Euodia ina hiya ndje! Ando tse ookuume ngaa kopothingo.’ Sintike okwa li u uvite kee holike we kuEuodia nokwa tameke okukala e mu limbililwa. Onkee ano, Sintike okwa tokola a hiye aamwatate naamwameme yontumba, ihe ina hiya Euodia. Uupyakadhi  mboka wa li pokati kaEuodia naSintike owa li tawu vulu okuteya po ombili yegongalo. Ombiimbeli inayi popya sha kombinga yaashoka, ihe otashi vulika aamwameme mbaka yaali ya li ya taamba ko omayele gopahole gomuyapostoli Paulus. — Fil. 4:2, 3.

³ Omathimbo gamwe oonkalo dha fa ndjoka ohadhi vulu wo okweeta uupyakadhi momagongalo goshigwana shaJehova kunena. Ihe omaupyakadhi ga tya ngaka otaga vulu okukandulwa po nenge okuyandwa ngele otwa tula miilonga omayele gomOohapu dhaKalunga, Ombiimbeli. Ngele otwa lenga embo lyaKalunga otatu ka vulika kwaashoka te tu longo. — Eps. 27:11.

4, 5. Omayele geni Oohapu dhaKalunga tadhi tu pe kombinga yokupangela omaiyuvo getu?

⁴ Ihashi kala oshipu okupangela omaiyuvo getu uuna tu uvite kutya otu ungaungiwa natse momukalo kaagu li pauyuki. Otashi vulika tu uve nayi noonkondo ngele otu ungaungiwa natse nayi omolweputuko lyopamuhoko, olwaala lwetu nenge eholokopo lyetu. Ihashi kala tuu shiyemateka ngele otwe shi ningilwa kOmukriste omukwetu! Mbela Oohapu dhaKalunga otadhi gandja ngaa omayele ngoka taga vulu oku tu kwathela ngele otwi ihumbatelwa momukalo gwa tya ngawo?

⁵ Okuza petameko lyokushitwa kwaantu Jehova okwa kala nokutala nkene aantu tayu ungaunga nooyakwawo. Oha mono omaiyuvo getu noonkatu dhetu. Uuna omuntu a geya ohashi vulika a popye oohapu nenge a ninge sha, shoka tashi ke mu ningitha i ipe uusama konima yethimbo. Kashi li tuu pandunge okutula miilonga omayele gOmbiimbeli ngoka tage tu kwathele tu pangele ongeyo yetu nokuyanda okuuva nayi nziya! (Lesha Omayeletumbulo 16:32; Omuuvithi 7:9.) Osha yela kutya atuheni otwa pumbwa okukambadhala tu kale ihaatu geye mbala nohatu dhimine po. Jehova naJesus okudhimina po oye ku tala ko kwa simana. (Mat. 6:14, 15) Mbela ino pumbwa okukala ho dhimine po nenge ho pangele omaiyuvo goye?

6. Omolwashike tu na okupangela ongeyo yetu?

⁶ Aantu mboka ihaaya pangele omaiyuvo gawo olundji ohaya geye mbala. Oshilanduliko, yalwe otashi vulika ya kale inaaya hala okukala nayo. Omuntu ngoka ha geye mbala ota vulu okukala enwethomo ewinayi kegongalo. Ota vulu okuholeka ongeyo ye nenge uutondwe, ihe omadhiladhilo omawinayi ngoka ge li momutima gwe otaga “yanununwa moshigongi.” (Omayel. 26:24-26) Aakuluntugongalo otaya vulu oku mu kwathela a mone kutya ongeyo, uutondwe nokukwatela onkone, omaukwatya ngoka inaaga halikila mehangano lyaKalunga. Embo lyaJehova ndyoka li na ongushu olye shi popya sha yela. (Lev. 19:17, 18; Rom. 3:11-18) Mbela ito tsu kumwe nalyo?

7, 8. (a) Jehova oha wilike ngiini oshitopolwa shehangano lye shokombanda yevi? (b) Ewiliko nenge omalombwelo geni taga adhika mOohapu dhaKalunga, nomolwashike tu na okuvulika kugo?

⁷ Jehova oha wilike nokupalutha aapiya ye mboka ye li moshitopolwa shehangano lye shokombanda yevi okupitila ‘momupiya omudhigini nomunandunge’ kohi yewiliko lyaKristus ngoka e li “omutse gwegongalo.” (Mat. 24:45-47, NW; Ef. 5:23, OB-1954) Ngaashi olutuwiliki lwomethelemimvo lyotango, omupiya nguka oha taamba ko Oohapu dhaKalunga dha nwethwa mo, nenge etumwalaka lye nohe li simaneke noonkondo. (Lesha 1 Aatessalonika 2:13.) Ombiimbeli oye tu pa ewiliko nenge omalombwelo geni ngoka taga vulu oku tu etela uuwanawa?

⁸ Ombiimbeli otayi tu lombwele tu kale hatu kala pokugongala pandjigilile. (Heb. 10:24, 25) Otayi tu kumagidha tu kale twi itaala melongo limwe. (1 Kor. 1:10) Oohapu dhaKalunga otadhi tu lombwele tu pitithe komeho  Uukwaniilwa moonkalamwenyo dhetu. (Mat. 6:33) Omanyolo otaga tsu wo omuthindo kombinga yoshinakugwanithwa shetu nuuthembahenda wetu wokuuvitha egumbo negumbo, momapandaanda nokugandja uunzapo wontukuluka. (Mat. 28:19, 20; Iil. 5:42; 17:17; 20:20) Embo lyaKalunga ohali wilike aakuluntugongalo ya kaleke ehangano lye lya yela. (1 Kor. 5:1-5, 13; 1 Tim. 5:19-21) Jehova okwa popya kutya ayehe mboka ye li mehangano lye oye na okukala ya yogoka palutu nopambepo. — 2 Kor. 7:1.

9. Jesus okwa tula po lye awike e tu kwathele tu uve ko Oohapu dhaKalunga?

⁹ Aantu yamwe otashi vulika ya kale ye wete kutya otaya vulu okuuva ko kuyo yene shoka Ombiimbeli tayi ti. Ihe Jesus okwa tula po ‘omupiya omudhiginini’ a gandje iikulya yopambepo. Okuza mo 1919, Jesus Kristus okwa kala ta longitha omupiya ngoka a kwathele aalanduli ye yu uve ko embo lyaKalunga, Ombiimbeli, nokuvulika komalombwelo galyo. Uuna tatu vulika kulyo, otatu humitha komeho uuyogoki, ombili nuukumwe megongalo. Otashi ka kala shi li pandunge kehe gumwe gwomutse i ipule ta ti: ‘Mbela ondi li ngaa omudhiginini kuupitilo mboka Jesus ta longitha kunena a gandje iikulya yopambepo?’

10. Oshitopolwa shehangano lyaJehova shomegulu osha hokololwa ngiini membo lyaHesekiel?

¹⁰ Oohapu dhaJehova, Ombiimbeli ohadhi tu kwathele tu tseye oshitopolwa shehangano lye shomegulu. Pashiholelwa, omupolofeti Hesekiel okwa li a mono emoniko moka oshitopolwa shehangano lyaKalunga shomegulu tashi thanekwa ketemba lyomegulu. (Hes. 1:4-28) Jehova oye ta hingi etemba ndika, nohali tanaukile kombinga kehe hoka ombepo ye tayi li ukitha. Oshitopolwa shehangano lye shomegulu ohashi nwetha mo oshitopolwa shokombanda yevi. Uushili owi iwetikile kutya etemba ndika olya kala tali matuka. Dhiladhila komalunduluko ogendji ngoka ga ningwa mehangano momukokomoko gwoomvula omulongo dha pita, e to kaleke momadhiladhilo kutya Jehova oye a ninga omalunduluko agehe ngoka. Molwaashoka Jesus naayengeli aayapuki oye li pokuhanagula po uuyuni mbuka wa kolokosha, etemba lyaJehova otali matuka, opo uunamapangelo we wu yukipalithwe nedhina lye eyapuki li yapulithwe.

11, 12. Ehangano lyaJehova olya pondola okuninga po iinima yontumba yini?

¹¹ Dhiladhila kwaashoka oshitopolwa shehangano lyaJehova shokombanda yevi sha tompola po momasiku ngaka gahugunina. Iilonga yokutunga. Aamwatate naamwameme oyendji oya li yi ipyakidhila nokutunga oombelewa oonene oompe dhOonzapo dhaJehova koWarwick, moNew York, moAmerika. Oshikondo shokuthaneka nokutunga muuyuni awuhe, otashi wilike aaiyambi omayovi mboka taya longo nuudhiginini sho taya tungu Iinyanga yUukwaniilwa naasho taya tamununa mo iitayimbelewa. Inatu pandula tuu sho aaiyambi oyendji taya longo nuudhigini miilonga mbino! Dhimbulukwa kutya Jehova  oha yambeke aauvithi yUukwaniilwa muuyuni awuhe mboka taya longo neifupipiko nonuudhigini ngaashi taya vulu mokuyambidhidha pashimaliwa iilonga mbika. — Luk. 21:1-4.

¹² Elongo. Natu taleni koosikola dhi ili nodhi ili ndhoka tadhi humitha komeho elongo lyopakalunga. (Jes. 2:2, 3) Otu na Osikola yOkudheula Aakokolindjila, Osikola yaauvithi yUukwaniilwa, Osikola yaGilead, Osikola yAabetel aape, Osikola yAatonatelishikandjo naakulukadhi yawo, Osikola yAakuluntugongalo, Osikola yUukalele wUukwaniilwa nOsikola yOkudheula Iilyo yOokomitiye dhIitayimbelewa naakulukadhi yawo. Inatu pandula tuu sho Jehova e hole okulonga oshigwana she! Elongo lyOmbiimbeli oli li wo kepandja lyetu lyokointaneta, www.pr418.com/ng, hoka taku adhika iileshomwa momalaka ogendji. Kepandja ndika oku na iitopolwa yi ikalekelwa ya pamba aanona, aanegumbo niinima yilwe iipe. Mbela owa longitha nale epandja lyetu lyokointaneta muukalele nomelongelokalunga lyuukwanegumbo lyeni?

13. Tu li aalongeli yaJehova aadhiginini, otwa tegelelwa tu ninge shike?

¹³ Kashi li tuu uuthembahenda uunene okukala tu li oshitopolwa shehangano lyaJehova! Molwaashoka otu shi iitegelelwa nomithikampango dhaJehova Kalunga, otu na oshinakugwanithwa shokuninga shoka shi li mondjila nokuvulika kuunamapangelo we. Sho uuyuni mbuka tawu ende tawu nayipala mokulonga uulunde, otu na ‘okutonda uuwinayi,’ ngaashi Jehova e wu tonde. (Eps. 97:10) Ihatu landula aakeenakonashanakalunga mboka haya ti kutya “uuwinayi owo uuwanawa, nuuwanawa owo uuwinayi.” (Jes. 5:20) Molwaashono otwa hala okunyanyudha Kalunga, ohatu kambadhala okukala twa yogoka palutu, pamikalo nopambepo. (1 Kor. 6:9-11) Molwaashoka otu hole Jehova notwe mu inekela, otwa hogolola okukala aadhiginini kuye mokukala metsokumwe nomithikampango dhe ndhoka dha popiwa sha yela mOohapu dhe, Ombiimbeli. Ohatu ningi oonkambadhala kehe tu kale metsokumwe nomithikampango ndhoka momagumbo, megongalo, kiilonga, kosikola nakehe pamwe. (Omayel. 15:3) Natu taleni omikalo dhilwe moka tatu vulu okuulika uudhigini wetu kuKalunga.

14. Aavali Aakriste otaya vulu ngiini okuulika uudhiginini wawo kuKalunga?

¹⁴ Okuputudha aanona. Aavali Aakriste ohayu ulike uudhiginini kuJehova mokuputudha oyana metsokumwe nOohapu dhe. Aavali aatilikaIunga kaye na okunwethwa mo komataloko gopamithigululwakalo dhomomidhingoloko dhawo dhaa li mondjila dhi na ko nasha nokuputudha aanona. Ombepo yuuyuni inayi pitikwa nando momagumbo gAakriste. (Ef. 2:2) Tate Omukriste a ninginithwa, ke na nando okupopya kutya ‘moshilongo shetu aakulukadhi oyo ye na okuputudha aanona.’ Ombiimbeli oya popya sha yela ya ti: ‘Ootate putudheni aanona yeni ne mu ya kumagidhe paukriste.’ (Ef. 6:4, yelekanitha NW.) Aasamane naakulukadhi mboka haya tila Kalunga oya hala oyana ya kale ya fa Samuel ngoka Jehova a li pamwe naye sho ta koko. — 1 Sam. 3:19.

15. Ohatu ulike ngiini uudhiginini wetu kuJehova uuna tatu ningi omatokolo ga simana?

¹⁵ Okuninga omatokolo. Uuna tatu ningi omatokolo ga simana, otu na okuulika uudhiginini wetu kuKalunga mokukonga ekwatho mOohapu dhe nokehangano lye. Opo tu ulike kutya osha simana oku shi ninga, natu taleni oshinima shimwe shiyemateka hashi ningwa kaavali oyendji. Oshi li omukalondjigilile kwaamboka ya tembukila kiilongo yilwe okutuma aanona yawo opo ya valwa ya ka putudhwe kaakwanezimo, opo ya vule okutsikila niilonga yawo noya mone iimaliwa oyindji koshilongo hoka ya tembukila. Eeno, ndika etokolo lyomuntu mwene, ihe otu na okudhimbulukwa kutya kehe gumwe ote ki ihokolola kuKalunga, omolwetokolo ndyoka ta ningi.  (Lesha Aaroma 14:12.) Mbela oshi li ngaa pandunge okuninga omatokolo ga simana kombinga yoyaandjetu noyonkalamwenyo yetu inaatu tala kutya Ombiimbeli otayi ti ngiini? Kashi li pandunge. Otwa pumbwa Tate yetu gwomegulu e tu kwathele, molwaashoka itatu vulu okuutha oonkantu dhetu. — Jer. 10:23.

16. Sho omuvali gumwe a li a mono okanona kokamati okwa li e na okuninga etokolo lini, noshike sha li she mu kwathele a ninge etokolo lyomondjila?

¹⁶ Omukiintu gumwe ngoka a mono okanona kokamati manga a li koshilongo shilwe, okwa li a hala oku ka tuma koshilongo shawo ka ka putudhwe kuyinakulu. Sho opo e ka mono, Onzapo yaJehova yimwe oya li ya tameke okukonakona Ombiimbeli naye. Okwa ningi ehumokomeho e ta mono kutya oshi li oshinakugwanithwa she okuputudha okanona ke ka kale haka longele Jehova. (Eps. 127:3; Omayel. 22:6) Omukiintu nguka omugundjuka okwa mbumbulile Jehova omutima gwe ngaashi Omanyolo tage tu lombwele tu shi ninge. (Eps. 62:7, 8) Oshinima shoka okwe shi lombwele wo ngoka ha konakona naye nokwe shi lombwele yalwe megongalo. Nonando aapambele nookuume ke oya li taye mu thiminike a tume okanona kuyinakulu, okwa thiki pehulithodhiladhilo kutya kashi li pandunge oku shi ninga. Omusamane gwe okwa li a kuminwa lela omukalo ngoka egongalo lya kwathele omukadhi nokanona kawo. Shoka oshe mu ningitha a taambe ko ekonakonombiimbeli e ta tameke okukala ha yi kokugongala pamwe nomukadhi nokanona kawo. Mbela omuvali nguno ka li u uvite kutya Jehova okwa yamukula egalikano lye lya za komutima? Kapu na omalimbililo, osho a li u uvite ngawo.

17. Elombwelo lini twa pewa li na ko nasha naakonakoni yetu?

¹⁷ Okuvulika komalombwelo. Omukalo gumwe gwa simana moka tatu vulu okuulika uudhiginini wetu kuKalunga, okukala hatu vulika komalombwelo ngoka hatu pewa kehangano lye. Pashiholelwa, natu taleni komaetopo ngoka hatu pewa ge na ko nasha naakonakonimbiimbeli yetu. Otwa lombwelwa kutya ngele tatu ningi ekonakonombiimbeli nagumwe membo Omalongo gashili gOmbiimbeli ogeni naanaa?, natu longithe ominute omishona konima yekonakono kehe tu mu ulukile sha kombinga yehangano. Shino otatu vulu oku shi ninga mokulongitha okavidio Oshike hashi ningwa pokugongala kwOonzapo dhaJehova? nokambo Oolye taya longo ehalo lyaJehova kunena? Ngele twa mana okukonakona embo Omalongo gashili nomukonakoni ngoka ta ningi ehumokomeho, otwa lombwelwa tu konakone naye embo ‘Ikalekeni mohole yaKalunga’ nonando pethimbo mpoka okwa ninginithwa. Ehangano olya gandja omalombwelo ngaka, opo omulongwa nguka omupe ‘a kale meitaalo.’ (Kol. 2:7) Mbela oho ga landula ngaa?

18, 19. Omolwomatompelo gamwe geni hatu pandula Jehova?

¹⁸ Opu na omatompelo ogendji kutya omolwashike tu na okupandula Jehova. Okwe tu pa omwenyo, ngele katu gu na, itatu vulu nokuli okwiinyenga nenge okukala po. (Iil. 17:27, 28) Okwe tu pa omagano ge na ondilo embo lye, Ombiimbeli. Otwe li taamba ko li li etumwalaka lya za kuKalunga, ngaashi Aakriste yokuTessalonika ya li ya ningi. — 1 Tes. 2:13.

¹⁹ Oohapu dhaKalunga odhe tu kwathela tu hedhe popepi naJehova, naashika oshe mu ningitha a hedhe popepi natse. (Jak. 4:8) Tate yetu gwomegulu okwe tu pa uuthembahenda uukumithi wokukala tu li oshitopolwa shehangano lye. Mbela otwa pandula ngaa omayambeko ngono? Omupisalomi okwi imbi a ti: “Hambeleleni Omuwa, oshoka oye omwaanawa, nesilohenda lye otali kala aluhe.” (Eps. 136:1) Mepisalomi 136, otamu adhika lwiikando omilongo mbali nahamano oohapu ndhoka tadhi ti: “Esilohenda lye otali kala aluhe.” Ngele otwa kala aadhiginini kuJehova nokehangano lye, oohapu ndhoka otadhi ka kala dhoshili kutse, molwaashoka otatu ka kala nomwenyo sigo aluhe.