1. Omolwashike atuheni twa pumbwa ehekeleko?

ATUHENI otwa pumbwa ehekeleko. Omolwashike? Omolwaashono otashi vulika tu na iimpwiyu oyindji, eyeme nosho wo uuwehame. Otashi vulika tatu mono iihuna, omolwuukokele, uuwehame nenge twa silwa ngoka tu hole. Yamwe yomutse otatu ungaungiwa natse nayi. Aantu mboka ye tu kundukidha, otaye ende taya nayipala mokulonga uukolokoshi. Otwa tompwa shili kutya “omathimbo omadhigu” ngaka tu li mugo, otaga ulike lela kutya otu li ‘momasiku gahugunina,’ nonokutya esiku kehe tatu piti mulyo otali tu hedhitha kuuyuni uupe. (2 Tim. 3:1) Nonando ongawo, otashi vulika twa kala twa tegelela ethimbo nuule tu mone omauvaneko gaJehova taga gwanithwa, notashi vulika omaupyakadhi getu taga indjipala. Ihe mbela openi tatu vulu okwaadha ehekeleko?

2, 3. (a) Oshike tu shi kombinga yaHabakuk? (b) Omolwashike tatu ka kundathaneni embo lyaHabakuk?

² Opo tu mone eyamukulo, natu ka kundathaneni embo lyaHabakuk. Nonando Omanyolo inage tu lombwela uuyelele wokondandalunde kombinga yonkalamwenyo yaHabakuk niilonga ye, embo ndyoka lye mu lukilwa, oli li onzo yetsomukumo. Edhina lye anuwa otali ti:  “Okupapatela nohole.” Shika otashi vulu okuukithwa kehekeleko lyaJehova nenge komukalo moka aalongeli ye ye mu inekela. Habakuk okwa li a popi naKalunga noku mu pula omapulo gontumba. Okwa pula Jehova omapulo pehala lyetu, oshoka Jehova okwa li e mu nwetha mo a nyole oonkundathana ndhoka. — Hab. 2:2.

³ Oonkundathana ndhoka dhuukuume pokati kaJehova nomuhunganeki ngoka a li a lulilwa, odho owala dha popiwa mOmbiimbeli kombinga yaHabakuk. Embo lye oli li oshitopolwa ‘shaashihe shoka sha nyolwa mOmanyolo,’ ano shOmbiimbeli, “opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” (Rom. 15:4) Ongiini tatu vulu okumona mo uuwanawa membo lyaHabakuk? Otali vulu oku tu kwathela tu mone kutya okwiinekela muJehova otashi ti shike. Shimwe ishewe, ehunganeko lyaHabakuk otali tu shilipaleke kutya otatu vulu okukala nomutima gwa gundjila, nonando otu li muupyakadhi. Tu na shoka momadhiladhilo, natu ka kundathaneni embo lyaHabakuk muule.

4. Omolwashike Habakuk a li a yemata?

⁴ Lesha Habakuk 1:2, 3. Habakuk okwa li ko pethimbo edhigu noonkondo noli na omashongo. Okwa li a yemata noonkondo, molwaashono okwa li a kundukidhwa kaakolokoshi. Mbela uukolokoshi wawo owa li tawu ka hula uunake? Omolwashike Jehova a li e etha pu pite ethimbo ele, opo nawa a katuke onkatu? Ashihe shoka Habakuk a li e wete, okwaanuuyuuki nosho wo omathiminiko taga longwa kaantu yomoshilongo shawo. Okwa li u uvite kaapu na ngoka ta vulu oku mu kwathela. Onkee ano, pethimbo ndyoka edhigu, okwa pula Jehova e mu kwathele. Habakuk otashi vulika a li a tameke okudhiladhila kutya Jehova ke na ko nasha. Nenge kutya okwa li ta ka katuka onkatu konima sho pwa pita ethimbo ele. Mbela opu na esiku nangoye wa li wu uvite ngaashi omupiya gwaKalunga ngoka?

5. Oshiilongomwa sha simana shini shi li membo lyaHabakuk? (Tala kethano lyopetameko.)

⁵ Mbela Habakuk okwa li a kanitha einekelo muJehova? Mbela okwa li a ndopa okwiitaala momauvaneko gaJehova? Hasho dha li! Habakuk oku ulike kutya ina teka omukumo, molwaashono okwa li i inekela kutya Jehova ota vulu oku mu kwathela muupyakadhi we nokombinga yaashoka a li ti ipula nasho, ihe haantu. Okwa li a ngwangwana, molwaashono ka li u uvite ko kutya omolwashike Kalunga e etha pu pite ethimbo ele nomolwashike e mu ethele monkalo ondhigu. Omolwashike Jehova a nwetha mo Habakuk a nyole nkene u uvite? Opo tu ilonge mo oshinima sha simana, ano kaatu kale twa tila okulombwela Jehova iimpwiyu yetu nenge nkene tu uvite. Nokuli, ote tu hiya tu mu mbumbulile omitima dhetu megalikano. (Eps. 50:15; 62:8) Omayeletumbulo 3:5 otage tu ladhipike tu ‘inekele Omuwa nomutima gwetu aguhe nokaatu igameke koondunge dhetu yene.’ Habakuk otashi vulika a li e shi oohapu ndhika nokwe dhi dhiginine momutima gwe.

6. Omolwashike egalikano lya simana?

⁶ Habakuk okwa li a katuka onkatu a hedhe popepi naJehova, Kuume ke nosho wo He ngoka omwiinekelwa. Habakuk ka li owala ti ipula nonkalo ye nokwiigameka koondunge dhe mwene. Pehala lyaashono, okwa li a galikana kombinga yankene u uvite nosho wo shoka a li ti ipula nasho. Okwe tu tulila po lela oshiholelwa oshiwanawa. Shimwe ishewe, Jehova, Omuuvi gwomagalikano, ote tu hiya tu ulike kutya otwe mu inekela, mokukala tatu mu lombwele shoka tatu ipula nasho, megalikano. (Eps. 65:2) Ngele otwe shi ningi, otashi ke tu kwathela tu mone nkene Jehova ta yamukula omagalikano getu. Otatu ka kala tu uvite ohole ye, moku tu pa ewiliko lyopahole. (Eps. 73:23, 24) Ote ke tu kwathela tu tseye nkene a tala ko iinima, nonando otwi iyadha moonkalo  dha tya ngiini. Omukalo gumwe moka tatu vulu okuulika lela kutya otwi inekela muKalunga, ongele tatu mu galikana tashi zi komutima.

7. Sho Habakuk a lombwele Jehova shoka ti ipula nasho, Jehova okwi inyenge ngiini?

⁷ Lesha Habakuk 1:5-7. Konima sho Habakuk e ethele iimpwiyu ye naashoka a li ti ipula nasho momake gaJehova, otashi vulika a li ti ipula nkene Jehova te ki inyenga. E li Tate omunahole, Jehova ka li a ganda Habakuk, molwomanyenyeto ge, oshoka onkalo ye okwa li e yi uvite ko. Kalunga okwa li e shi kutya onkalo yaHabakuk ondhigu noonkondo noyinikitha oluhodhi. Okwa li a tseyithile Habakuk kombinga yaashoka a li ta ka ningila masiku Aajuda mboka kaaye shi aadhiginini. Otashi vulika Habakuk oye gwotango a hololelwa kuJehova kutya ehulilo lyuukolokoshi wopethimbo lye, oli li popepi.

8. Omolwashike Habakuk a li a ngwangwana kunkene Jehova e mu yamukula?

⁸ Jehova okwa li a ulukile Habakuk kutya okwi ilongekidha okukatuka onkatu. Egeelo lyaantu mboka aakolokoshi, olya li popepi. Sho Jehova a popi kutya ‘otamu li mono,’ oku ulike kutya egeelo ndika olya li tali ka ningwa pethimbo lyomuhunganeki ngoka nolyaakolokoshi mboka. Habakuk ka li nando a tegelela Jehova a yamukule ngawo. Mbela ndika olya li eyamukulo komanyenyeto ge? Shoka a lombwelwa kuJehova, osha li tashi ti kutya Aajuda ayehe otaya ka mona iihuna shimwe to nyengwa. Aababilonia oya li ye na onyanya unene, ye vulithe Aajuda, mboka ya li ye shi omithikampango dhaJehova. Omolwashike nduno Jehova a li ta ka longitha oshigwana shika oshikwanyanya shi ponokele oshigwana she? Andola ongoye wa li wu uvu onkundana ndjoka, ando owi inyenge ngiini?

9. Omapulo geni tashi vulika Habakuk a li a pula Jehova?

⁹ Lesha Habakuk 1:12-14, 17. Habakuk okwa li e shi kutya Jehova okwa li ta ka longitha Aababilonia, opo a pangule noku geele aakolokoshi mboka ye mu kundukidha. Nonando ongawo, Habakuk okwa li ngaa natango a ngwangwana. Onkene okwa lombwele Jehova neifupipiko kutya okwa tsikile okukala ‘Emanya’ lye. (Deut. 32:4; Jes. 26:4) Habakuk okwa tsikile okukala neinekelo kutya Kalunga omunahole nomunalukeno. Shoka oshe mu kwathele kaa kale a tila, notashi vulika a li e mu pula omapulo ga gwedhwa po, ngaashi: Omolwashike Kalunga e etha onkalo muJuda yi nayipale? Omolwashike inaa katuka onkatu nziya? Omolwashike Omunankondoadhihe i idhidhimikile okutala okumona iihuna okundji? Omolwashike a kala a “mwena,” sho uukolokoshi wa tameke? Jehova ‘Omuyapuki’ nonokutya “omeho [ge] omayapuki unene okutala uuwinayi.”

10. Ngaashi Habakuk, omathimbo gamwe otashi vulika tu kale tu uvite ngiini?

¹⁰ Omathimbo gamwe, otashi vulika tu kale tu uvite ngaashi Habakuk. Pashiholelwa, ohatu pulakene kuJehova. Otwe mu inekela nohatu lesha nokukonakona Oohapu dhe, naashika ohashi tu pe etegameno. Ohatu uvu kombinga yomauvaneko ge okupitila momalombwelo ngoka tatu pewa kehangano lye. Nonando ongawo, ohashi vulika natango tu ipule kutya: ‘Okumona iihuna kwetu otaku ka hula po uunake?’ Oshike tatu ilongo kwaashoka Habakuk a ka ninga po?

11. Habakuk okwa li a tokola a ninge shike, konima sho a pulakene kuJehova?

¹¹ Lesha Habakuk 2:1. Sho Habakuk a popi naJehova, oshe mu kwathele a kale e na omutima gwa gundjila. Onkee ano, okwa li a tokola okutegelela Jehova a katuke onkatu. Ka li owala a tokola e shi ninge oshikando shimwe, ihe olwiikando, oshoka okwa ti: “Otandi mwena nda tegelela, ethimbo li ye, uuna Kalunga ta geele mboka taye tu ponokele.” (Hab. 3:16) Aapiya yaKalunga yalwe aadhiginini nayo oya li ye mu tegelele a  katuke onkatu. Iiholelwa yawo otayi tu tsu omukumo tu kale hatu tegelele Jehova a katuke onkatu. — Mika 7:7; Jak. 5:7, 8.

12. Iiyilongomwa yimwe yini tatu ilongo kuHabakuk?

¹² Okutokola toko kwaHabakuk otaku tu longo shike? Shotango, inatu etha po nando okugalikana kuJehova kutya nduno otwi iyadhe moonkalo dha tya ngiini. Oshitiyali, otwa pumbwa okupulakena kwaashoka Jehova te tu lombwele okupitila mOohapu dhe nomehangano lye. Oshititatu, natu kale hatu tegelele neidhidhimiko Jehova a katuke onkatu, twi itaala thiluthilu kutya ote ke tu kwathela muudhigu wetu pethimbo lyo opala. Ngaashi Habakuk, ngele natse otwa tsikile okugalikana kuJehova tashi zi komutima nokupulakena kuye neidhidhimiko, otatu ka kala wo tu na omutima gwa gundjila, ngoka tagu ke tu kwathela tu idhidhimike. Etegameno lyetu otali ka koleka eidhidhimiko lyetu, ndyoka tali ke tu kwathela tu kale twa nyanyukwa, nonando otu kale tu li muupyakadhi. Etegameno otali tu kwathele tu kale tu na einekelo kutya Tate yetu gwomegulu ota ka katuka onkatu. — Rom. 12:12.

13. Eshilipaleko lyopahole lini tatu adha muHabakuk 2:3?

¹³ Lesha Habakuk 2:3. Osha yela kutya Jehova okwa li a hokwa etokolo lyaHabakuk, lyokutegelela a katuke onkatu. Omunankondoadhihe okwa li e shi thiluthilu onkalo yaHabakuk. Onkee ano, Kalunga okwa li e mu hekeleke, moku mu shilipaleka pahole kutya omapulo ge ga za komutima, otaga ka yamukulwa. Shoka osha li tashi ka ningwa nziya. Kalunga okwa fa a li ta lombwele Habakuk ta ti: “Idhidhimika e to inekele ndje. Otandi ku yamukula nziya!” Jehova okwa li e mu dhimbulukitha kutya oku na ethimbo lye lyo opala lyokugwanitha po omauvaneko ge. Okwa tsu Habakuk omukumo e mu tegelele a gwanithe po omauvaneko Ge. Shoka osha li tashi ke mu etela enyanyu pehulilo.

14. Uuna tu li moonkalo oondhigu, otu na okutokola toko okuninga shike?

¹⁴ Ngele otwa kala hatu tegelele Jehova nokupulakena kwaashoka te tu lombwele, otashi ke tu kwathela tu kale neinekelo nonomutima gwa gundjila nuuna tu li moonkalo oondhigu. Jesus okwe shi koleke kutya otatu vulu okwiinekela muJehova, Omudhiginini gwEthimbo Omunene, ihe haku gandja eitulomo ‘komathimbo nenge kootundi’ ndhoka inee dhi tu hololela natango. (Iil. 1:7, yelekanitha OB-1954.) Onkee ano, inatu teka omukumo, ihe natu tegelele Jehova tu na eifupipiko, eitaalo neidhidhimiko. Natu longithe nawa ethimbo ndyoka tu na, tu mu longele naanaa ngaashi tatu vulu. — Mark. 13:35-37; Gal. 6:9.

15, 16. (a) Omauvaneko geni ga simana tatu adha membo lyaHabakuk? (b) Omauvaneko ngoka otage tu longo shike?

¹⁵ Jehova oku uvanekela aayuuki mboka ye mu inekela a ti: “Aayuuki otaa ka kala ko, oshoka oyi inekela Kalunga,” nosho wo kutya “evi otali ku udha okutseya esimano lyOmuwa.” (Hab. 2:4, 14) Eeno, mboka ye na eidhidhimiko noyi inekela muKalunga, otaya ka mona ondjambi yomwenyo.

¹⁶ Dhiladhila kombinga yeuvaneko ndyoka li li muHabakuk 2:4. Omuyapostoli Paulus okwa li a mono kutya euvaneko lyaJehova ndyoka olya simana noonkondo, oshoka okwe li popi momanyolo ngaka gatatu. (Rom. 1:17; Gal. 3:11; Heb. 10:38) Kutya nduno omuyuuki na adhike komashongo ga tya ngiini, ota ka mona nkene omauvaneko gaKalunga taga ka gwanithwa, ngele okwa kala e na eitaalo neinekelo muye. Jehova ote tu lombwele tu gandje eitulomo kwaashoka tashi ka ningwa monakuyiwa.

17. Eshilipaleko lini tatu adha membo lyaHabakuk?

¹⁷ Membo lyaHabakuk omu na oshiilongomwa sha simana kutse atuhe mbaka tu li momasiku ngaka gahugunina. Jehova oku uvanekela omuntu kehe ngoka omuyuuki, e na eitaalo muye nokwe  mu inekela, omwenyo gwaaluhe. Onkee ano, natu tsikileni okukoleka eitaalo neinekelo lyetu muKalunga kutya nduno otu pite moonkalo oondhigu dha tya ngiini. Jehova okwe tu shilipaleka okupitila muHabakuk kutya ote ke tu ambidhidha note ke tu hupitha. Ote tu pula pahole tu kale twe mu inekela noku mu tegelela neidhidhimiko a katuke onkatu pethimbo lyo opala, sho Uukwaniilwa we tawu ka pangela kombanda yevi, hoka taku ka kala aapiya ye ya nyanyukwa noye na ombili. — Mat. 5:5; Heb. 10:36-39.

18. Oohapu dhaJehova odha li dha gumu ngiini Habakuk?

¹⁸ Lesha Habakuk 3:16-19. Oohapu dhaJehova odha li dha gumu Habakuk noonkondo. Okwa li a tedhatedha kwaashoka Jehova a ningila oshigwana she monakuziwa. Shoka osha li sha koleke eitaalo lye muJehova. Okwa li e shi kutya Jehova ota ka katuka onkatu nziya. Shoka oshe mu hekeleke, nokuli nonando okwa li e shi kutya uupyakadhi we otashi vulika wu tsikile uule wokathimbo. Habakuk ka li we a limbililwa, ihe pehala lyaashono, okwa li e na eitaalo thiluthilu kutya Jehova ote ke mu hupitha. Shoka a popi movelise 18, otashi vulika osho shimwe shomomautumbulilo ngoka kaage shi okudhimbiwa komuntu, tagu ulike einekelo lye. Aalongwantu yamwe otaya dhiladhila kutya ovelise ndjoka otayi ti lelalela: “Otandi nuka, omolwenyanyu ndyoka ndi na mOmuwa; otandi tanta, molwaashoka nda pandula Kalunga.” Kali shi tuu eshilipaleko lya simana kutse atuheni! Jehova ine tu uvanekela owala omauvaneko omawanawa, ihe okwe tu shilipaleka wo kutya ngashingeyi ota longo, opo e ga gwanithe po.

19. Ongiini Jehova ta vulu oku tu hekeleka ngaashi a li a hekeleke Habakuk?

¹⁹ Kapu na omalimbililo kutya etumwalaka lya simanenena membo lyaHabakuk, olyo okukala twi inekela muJehova. (Hab. 2:4) Otatu vulu okutsikila okwiinekela muye, ngele otwa koleke ekwatathano lyetu naye, mokuninga iinima tayi landula. Shotango, natu tsikile okugalikana kuJehova, tatu mu lombwele iimpwiyu yetu ayihe naashoka tatu ipula nasho. Oshitiyali, natu kale hatu pulakene kOohapu dhaJehova nokulandula ewiliko ndyoka tatu pewa okupitila mehangano lye. Oshititatu, natu kale aadhiginini nokukala hatu tegelele Jehova neidhidhimiko. Shoka osho Habakuk a li a ningi. Nonando membo lye petameko okwa holola nkene a li a nika oluhodhi, pehulilo lyalyo okwa holola einekelo nosho wo enyanyu lye. Onkee ano, oshi li nawa ngele otwa landula oshiholelwa she oshiwanawa, opo wo natse tu vule okukala tu uvite tu holike kuTate yetu, Jehova! Mbela muuyuni mbuka otatu vulu ngaa okupewa mo ehekeleko ndyoka lya dhenga mbanda?