1, 2. Sho ekwatathano lyetu naJehova tali ende tali koko, ohatu ilongo okuninga shike? Gandja oshiholelwa.

DHILADHILA andola okanona ka pewa omagano, aavali yako e taye ka lombwele taya ti: “To ti tangi.” Okanona otashi vulika ke shi popye, ihe itashi zi komutima. Sho taka koko, otaka tameke okukala ke na lela olupandu lwaashoka ka lombwelwa kaavali yako nosho wo lwolukeno ndoka ku ulukilwa kuyalwe. Kungawo, olupandu lwako otalu ka kala halu zi komutima. Omolwashike? Omolwaashoka ngashingeyi okupandula okwa mena omidhi momadhiladhilo gako.

² Sha faathana, sho twa tseya oshili yOmbiimbeli, otwi ilongo nkene okuvulika komalongo gaJehova gopetameko, kwa simana. Ihe sho ekwatathano lyetu naJehova tali ende tali koko, ohatu ilongo oshindji kombinga yankene Jehova ha dhiladhila, ano shoka e hole, shoka kee hole nankene ha tala ko iinima yi ili noyi ili. Ngele otwi ilongo okukala tu na etaloko lya fa lyaJehova nokweetha omadhiladhilo ge ga nwethe mo oonkatu dhetu nomatokolo getu, otatu ulike kutya ohatu dhiladhila ngaashi ye.

3. Omolwashike tashi vulu okukala eshongo okukaleka omadhiladhilo getu metsokumwe nogaJehova?

³ Nonando okwiilonga okukaleka omadhiladhilo getu metsokumwe  nogaJehova oshinima hashi nyanyudha noonkondo, ohaku vulu wo okukala eshongo. Omathimbo gamwe, omadhiladhilo getu ngoka inaaga gwanenena, otashi vulika ge tu imbe oku shi ninga. Pashiholelwa, otashi vulika tu kale tu wete oshidhigu okuuva ko nkene Jehova ha tala ko uuyogoki wopamikalo, omaliko, iilonga yokuuvitha, okutulwa ombinzi noku yi lya nenge sha shilwe. Oshike nduno tatu vulu okuninga po? Ongiini tatu vulu okutsikila okukala netaloko lya fa lyaKalunga? Okuninga ngawo otaku ka guma ngiini oonkatu dhetu ngashingeyi nomonakuyiwa?

4. Okulandula elombwelo lyaPaulus ndika tali ti kutya natu ‘shitulule omadhiladhilo getu,’ okwa kwatela mo shike?

⁴ Lesha Aaroma 12:2. Movelise ndjika omuyapostoli Paulus okwa popi kombinga yaashoka sha kwatelwa mo, mokwiilonga okudhiladhila ngaashi Jehova. Oshitopolwa sha tetekele, oshe tu kwathela tu uve ko kutya opo ‘kaatu faathane nonkalo yuuyuni mbuka,’ otwa pumbwa okuyanda omadhiladhilo guuyuni neihumbato lyawo. Paulus okwa popi wo kutya otwa pumbwa tu ‘shitulule omadhiladhilo getu.’ Shika osha kwatela mo okukonakona Oohapu dhaKalunga nelalakano lyokuuva ko nkene ha dhiladhila, okutedhatedha kudho nokukaleka omadhiladhilo getu metsokumwe noge.

5. Yelitha eyooloko ndyoka li li pokati kokulesha shampa owala to lesha nokukonakona.

⁵ Okukonakona kaku shi owala okulesha shampa to lesha nokutenda omayamukulo, ihe okwa kwatela mo oshindji. Uuna tatu konakona, ohatu tala kutya shoka tatu lesha otashi tu lombwele shike kombinga yaJehova, yoondjila dhe nankene ha dhiladhila. Ohatu kambadhala okuuva ko kutya omolwashike Kalunga te tu lombwele tu ninge oshinima shontumba nenge kaatu shi ninge. Ohatu dhiladhila wo komalunduluko ngoka twa pumbwa okuninga monkalamwenyo yetu nomomadhiladhilo getu. Ethimbo kehe tatu konakona otashi vulika kaatu tedhatedhe kiinima ayihe mbyoka, ihe otatu ka mona mo uuwanawa, ngele otwa longitha ethimbo lyontumba tu tedhatedhe muule kwaashoka twa lesha. — Eps. 119:97; 1 Tim. 4:15.

6. Uuna tatu tedhatedha kOohapu dhaKalunga, oshike hashi ningwa po?

⁶ Sho tatu tedhatedha pandjigilile Oohapu dhaKalunga, ohapu ningwa sha oshihokithi. Ohatu “vulu ihe okutseya,” nenge tu tye, ohatu shi zimine kutya etaloko lyaJehova kombinga yiinima olyo lela li li mondjila. Ohatu tameke okukala tu na etaloko lya fa lye, e tatu li taamba ko. Omadhiladhilo getu ohaga ‘shitululwa,’ e tatu tameke okudhiladhila momukalo gulwe. Mokweendela ko kwethimbo, ohatu taamba ko omadhiladhilo gaJehova.

7, 8. (a) Jehova okwa tala ko ngiini iinima yopamaliko? (Tala komathano gopetameko.) (b) Oshike tatu ka pititha komeho, ngele otwa kala tu na etaloko lya fa lye?

⁷ Okudhiladhila kwetu ihaku gumu owala omaiyuvo getu, ihe noonkatu dhetu. Shono otashi ulike kutya ohayi endele pamwe. (Mark. 7:21-23; Jak. 2:17) Shika otatu vulu oku shi uva ko nawa, ngele otwa tala kiiholelwa yontumba. Pashiholelwa, Omavaangeli gane oge na uuyelele wa yela kombinga yankene Jehova ha tala ko iinima yopamaliko. Kalunga okwa li a hogolola nuukeka mboka ya li taya ka putudha Omwana. Aaihokani mboka kaya li aayamba. (Lev. 12:8; Luk. 2:24) Sho Jesus a valwa, Maria okwe mu “langeke metemba lyokulila iimuna, oshoka mongulu yaayenda kamwa li mu na eha.” (Luk. 2:7) Jehova okwa li ta vulu okulongitha omikalo odhindji a konge ehala li li nawa, moka tamu vulu okuvalelwa Omwana. Shoka sha li sha simana kuye, okweetha Jesus a putudhwe kaavali mboka ye na ekwatathano naYe.

⁸ Ehokololo ndika kombinga yokuvalwa kwaJesus,  otali vulu oku tu kwathela tu uve ko nawa nkene ha tala ko iinima yopamaliko. Aavali yamwe ohaya kala ya halela oyana iinima yondilo, nonando otashi vulu okufala moshiponga ekwatathano lyoyana ndyoka ye na naJehova. Ihe Jehova oha tala ko ekwatathano ndyoka tu na naye olyo lya simana noonkondo. Mbela owu na ngaa etaloko lya fa lyaJehova? Oonkatu dhoye otadhi ulike shike? — Lesha Aahebeli 13:5.

9, 10. Ongiini tatu vulu okuulika kutya ohatu tala ko okupundukitha yalwe ngaashi Jehova?

⁹ Oshiholelwa shilwe, oshankene Kalunga a tala ko okupundukitha yalwe. Jesus okwa ti: “Ngoka ta hongolola kamwe komuushona mbuka wi itaala ndje, okwa gwana a mangelwe emanya edhigudhigu mothingo ye e tu umbilwa muule wefuta.” (Mark. 9:42) Oohapu ndhono itadhi ulike tuu kutya okupundukitha gulwe, oshinima sha kwata miiti! Molwaashoka Jesus okwa li a ulike uukwatya wa fa waHe thiluthilu, otatu vulu okukala nuushili kutya Jehova naye oha kala u uvitile nayi kehe ngoka ta pundukitha owina gumwe gwomaalanduli yaJesus. — Joh. 14:9.

¹⁰ Mbela ohatu tala ko ngaa okupundukitha yalwe ngaashi Jehova naJesus haye ku tala ko? Mbela etaloko lyawo otwe li taamba ko ngaa? Oonkatu dhetu otadhi ulike shike? Pashiholelwa, natu tye nduno otwa hala okuzala nenge okwiiyopaleka momukalo ngoka tagu uvitha nayi yalwe megongalo nenge tagu pendutha omahalo gopamilalo muyo. Ngele otu hole ooitaali ooyakwetu, otatu ka zala ngaa nokwiiyopaleka momikalo ndhono? — 1 Tim. 2:9, 10.

11, 12. Okukala neipangelo nokutala ko uuwinayi ngaashi Kalunga e wu tala ko, otaku ke tu gamena ngiini kaatu longe uuwinayi?

¹¹ Oshiholelwa oshititatu, Jehova oku tonde okwaanuuyuuki. (Jes. 61:8) Nonando oku shi kutya otu na egamo lyokuninga iinima ya puka omolwokwaagwanenena hoka twa thigulula, ote tu ladhipike tu kale tu tonde uuwinayi. (Lesha Episalomi 97:10.) Okutedhatedha kutya omolwashike Jehova e tonde uuwinayi, otaku ke tu kwathela tu kale tu na etaloko lya fa lye. Shoka otashi ke tu pa omukumo tu yande okulonga uuwinayi.

¹² Okukala hatu tala ko okwaanuuyuuki ngaashi Jehova, otaku ke tu kwathela wo tu ndhindhilike mo iinima yimwe mbyoka ya puka, nonando inayi popiwa kondandalunde mOmbiimbeli. Pashiholelwa, okundaanisa momukalo tagu pendutha omahalo gopamilalo (lap dancing), oshinima tashi ende tashi nayipala muuyuni. Yamwe otashi vulika ya tye kutya okundaanisa ngaaka inaku puka, oshoka kaku shi okuya momilalo dho dhene. * Ihe mbela shoka otashi ulike ngaa kutya otaya dhiladhila ngaashi Kalunga, ngoka e tonde uuwinayi kehe? Natu ikaleke kokule nokulonga uuwinayi mokukala tu na eipangelo nosho wo okutonda shoka Jehova e tonde. — Rom. 12:9.

13. Omolwashike tu na okudhiladhila komeho yethimbo nkene Jehova ha tala ko iinima, opo shi ke tu kwathele uuna twe ki iyadha monkalo yontumba?

¹³ Uuna tatu konakona, oshiwanawa ngele otwa tala kunkene Jehova a tala ko onkalo yontumba, ndjoka tashi vulika tu ki iyadhe muyo monakuyiwa. Ngele otwe ki iyadha muyo, otatu ka tokola pandunge, naashoka otashi ke tu gamena. (Omayel. 22:3) Natu ka taleni kiiholelwa yimwe yomOmbiimbeli.

14. Oshike tatu ilongo kuJosef, sho a tindi okuya momilalo nomukulukadhi gwaPotifar?

¹⁴ Sho Josef a tindi meendelelo okuya momilalo  nomukulukadhi gwaPotifar, oku ulike kutya okwa li e shi nkene Jehova a tala ko okukala omudhiginini kukuume kopandjokana. (Lesha Genesis 39:8, 9.) Shimwe ishewe, sho a yamukula omukulukadhi gwaPotifar a ti: “Ondi longe ngiini uuwinayi u thike mpono, ndi yone kuKalunga?” otashi ulike kutya okwa li e na etaloko lya fa lyaKalunga. Ongiini kombinga yetu? Natu tye nduno omuniilonga pamwe nangoye okwa tameke okudhana nomaiyuvo goye. Nenge, ongiini ngele owa tuminwa omatumwalaka nenge omathano ngoka taga pendutha omahalo gopamilalo? * Itatu ka ya moomwigo ndhoka nuupu, ngele otwa adhika tu shi kutya Jehova okwe dhi tala ko ngiini notwa tokola nale kutya otatu ka ninga po shike.

15. Ngaashi Aahebeli yatatu, ongiini tatu vulu okuyanda okuyona kuJehova?

¹⁵ Natu ka taleni koshiholelwa shAahebeli yatatu, Shadrak, Meshak naAbednego. Sho ya tokola okutinda okwiinyongamena koshiyelekela shoshingoli shoka sha li sha dhikwa komukwaniilwa Nebukadnezzar nankene ye mu yamukula, oya ulike kutya oya dhiladhila tango kutya okukala omudhiginini kuJehova okwa kwatela mo shike. (Eks. 20:4, 5; Dan. 3:4-6, 12, 16-18) Natu tye nduno omuhona gwoye okwe ku pula wu gandje omayambidhidho gopashimaliwa, ga ka longithwe moshituthi shi na ko nasha nelongelokalunga lyiifundja. Oto ka ninga po shike? Pehala lyokutegelela oonkalo dha fa mpono dhi holoke, omolwashike itoo dhiladhila ngashingeyi kutya Jehova ohe dhi tala ko ngiini? Opo ihe, ngele owi iyadha muyimwe yomudho, otashi ka kala oshipu kungoye wu ninge nowu popye shoka shi li mondjila, ngaashi Aahebeli yatatu ya ningi.

16. Okukala tu shi nawa etaloko lyaJehova, otaku ke tu kwathela ngiini tu ilongekidhile epango lyomeendelelo?

¹⁶ Okudhiladhila komeho yethimbo kombinga yokukala aadhiginini kuKalunga, otaku ke tu kwathela wo nuuna twa pumbwa epango lyopaunamiti meendelelo. Nonando otwa tokola toko kaatu tulwe ombinzi ayihe nenge shimwe shomiitopolwa yayo iinene, omikalo dhimwe dhokupanga taku longithwa ombinzi, otadhi pula tu ninge etokolo lyopaumwene li ikolelela komithikampango dhOmbiimbeli, ndhoka tadhi ulike nkene Jehova e yi tala ko. (Iil. 15:28, 29) Osha yela kutya ethimbo li li nawa lyokuninga etokolo ndyoka, kali shi ngele tu li moshipangelo, tashi  vulika uuna tatu ehama notatu thiminikwa tu tokole meendelelo. Ngashingeyi olyo ethimbo lyokuninga omapekapeko nolyokuudhitha okakalata kombinzi, moka to nyola etokolo lyoye, e to popi nandohotola. *

17-19. Omolwashike sha simana tu ilonge ngashingeyi nkene Jehova ha tala ko iinima? Gandja oshiholelwa shonkalo ndjoka twa pumbwa okwiilongekidhila.

¹⁷ Hugunina, natu taleni kunkene Jesus a yamukula Petrus, sho e mu pe omayele kaage li pandunge, taga ti: “Omuwa [iyaalela, NW]!” Jesus okwa kala ha dhiladhila kwaashoka Kalunga a hala a ninge nokomahunganeko kombinga yonkalamwenyo ye nosho wo yeso lye kombanda yevi. Ontseyo ndjoka oye mu kwathele a kale omudhiginini nokwi igandje e tu sile. — Lesha Mateus 16:21-23.

¹⁸ Kunena, Kalunga okwa hala aapiya ye ya kale ye na ekwatathano naye noya uvithe nuulaadhi. (Mat. 6:33; 28:19, 20; Jak. 4:8) Ngaashi Jesus a li a ningilwa, aantu mboka taya monika ya fa ye na etaloko li li nawa, otashi vulika ye tu teye omukumo kaatu shi ninge. Pashiholelwa, ongiini ngele omuhona gwoye okwe ku pe ondondo yopombanda, ndjoka hayi futu nawa lela, ihe otayi ka guma okuya kwoye kokugongala nokuuvitha? Nenge natu tye nduno owu li mosikola, e to pewa ompito wu ye wu ka mone elongo lya gwedhwa po kehala li li kokule negumbo. Ngele owi iyadha moonkalo ndhono, mbela ito ka ninga omapekapeko pamwe negalikano, e to popi noyaandjeni tashi vulika wo nonaakuluntugongalo, opo nduno to ningi etokolo? Omolwashike itoo konakona ngashingeyi kombinga yankene Jehova a tala ko oonkalo ndhoka, e to kambadhala okukala wu na etaloko lya fa lye? Opo nduno ngele owi iyadha moonkalo ndhoka, itadhi ka kala eshongo nando kungoye. Oto ka adhika nale wi itulila po omalalakano gokulongela Jehova. Onkee shoka to ka pumbwa okuninga, okukala omudhiginini.

¹⁹ Oto vulu okudhiladhila koonkalo dhilwe ndhoka tashi vulika dhi holoke po ombaadhilila. Odhoshili kutya itatu vulu okwiilongekidhila kehe onkalo ndjoka tashi vulika tu iyadhe muyo. Ihe ngele ethimbo lyetu lyokuninga ekonakono lyOmbiimbeli lyopaumwene otwe li longitha wo tu tedhatedhe kunkene Jehova ha tala ko iinima, otatu ka vula okudhimbulukwa nokutula miilonga shoka twa konakona, uuna tu li monkalo ndjoka. Onkee ano, natu kale hatu tala ko iinima ngaashi Jehova he yi tala ko, e tatu shi taamba ko. Natu kale wo hatu tala nkene etaloko lye tali vulu okuguma omatokolo ngoka tatu ningi ngashingeyi nomonakuyiwa.

20, 21. (a) Omolwashike tatu ka nyanyukilwa emanguluko muuyuni uupe, nonando itatu ka ninga kehe shimwe? (b) Oshike tashi vulu oku tu kwathela tu kale twa nyanyukwa nongashingeyi?

²⁰ Otwa tegelela nondjuulukwe uuyuni uupe. Oyendji yomutse otwa tegelela oku ka kala nomwenyo sigo aluhe meviparadisa. Muuyuni uupe mboka tawu ka kala kohi yUukwaniilwa waKalunga, aantu itaya ka kala ya yemata ngaashi shi li kunena. Odhoshili kutya aantu otaya ka kala natango ye na emanguluko lyokuninga omatokolo. Omuntu kehe ota ka ninga omatokolo gi ikolelela kwaashoka a hala nenge e hole.

²¹ Nonando ongawo, aantu itaya ka kala ya manguluka okuninga kehe shimwe. Ngele tashi ya pokutokola shoka shi li mondjila naashoka sha puka, aaifupipiki otaya ka wilikwa koompango dhaJehova nokukaleka omadhiladhilo gawo metsokumwe noge. Shoka otashi ka kala oshiwanawa okuninga notashi ke etela aantu enyanyu enene nombili. (Eps. 37:11) Ngashingeyi otatu vulu okukala twa nyanyukwa, ngele otwa kala hatu tala ko iinima ngaashi Jehova he yi tala ko.