1, 2. (a) Jesus okwa li a yamukula Petrus ngiini, sho e mu lombwele i iyaalele? (Tala kethano lyopetameko.) (b) Omolwashike Jesus e mu yamukula momukalo ngoka?

AALONGWA yaJesus kaya li taya vulu okwiitaala shoka taya lombwelwa. Jesus ngoka ya li ya tegelela a totulule uukwaniilwa waIsraeli, okwa li e ya lombwele kutya masiku ota ka mona iihuna e ta si. Opo ihe, omuyapostoli Petrus okwa ti kuye: “Omuwa [“iyaalela,” NW], shi valelwe, u ningwe ngaaka!” Jesus okwe mu yamukula a ti: “Za po pungame, Satana! Ongoye omwigo gwandje, oshoka ito dhiladhila shoka shopaKalunga, ihe ooshoka shopantu.” — Mat. 16:21-23; Iil. 1:6.

² Jesus okwa popi oohapu ndhoka, opo a ulike eyooloko ndyoka li li pokati komadhiladhilo gaKalunga naangoka guuyuni mbuka wu li mepangelo lyaSatana. (1 Joh. 5:19) Petrus okwa li a ulike ombepo yokwiihola mwene, ndjoka yi li muuyuni. Ihe Jesus okwa li e shi kutya omadhiladhilo gaHe hasho ge li ngaaka. Jesus okwa li e shi kutya Kalunga okwa hala i ilongekidhile okumona iihuna neso ndyoka lya li tali ke mu adha. Momukalo moka Jesus a yamukula Petrus, ogwu ulike kutya oha tala ko iinima ngaashi Jehova, ihe hangaashi uuyuni.

3. Omolwashike hashi kala oshidhigu okudhiladhila ngaashi Jehova?

 ³ Ongiini kombinga yetu? Mbela ohatu dhiladhila ngaashi Kalunga nenge ongaashi uuyuni? Otashi vulika hatu ihumbata momukalo ngoka gwa hokiwa kuKalunga, ihe ongiini kombinga yokudhiladhila kwetu? Mbela ohatu dhiladhila ngaa shoka shi li metsokumwe nehalo lyaJehova notu na etaloko lya fa lye? Okukala metsokumwe nehalo lye, otaku pula oonkambadhala dha mana mo. Mepingathano naashoka, oshipu okudhiladhila ngaashi uuyuni. Omolwashike? Omolwaashoka otwa kundukidhwa kombepo yuuyuni. (Ef. 2:2) Shimwe ishewe, molwaashono aantu muuyuni oyi ihole yo yene, otashi vulika ye tu nwethe mo. Eeno, ohashi kala oshidhigu shili okudhiladhila ngaashi Jehova, ihe oshipu okudhiladhila ngaashi uuyuni.

4. (a) Oshike tashi vulu oku tu ningilwa, ngele otwe etha omadhiladhilo getu ga nwethwe mo kuuyuni? (b) Oshitopolwa shika otashi ke tu kwathela ngiini?

⁴ Ngele otwe etha uuyuni wu nwethe mo okudhiladhila kwetu, otawu ke tu ningitha tu kale twi ihole mwene nokuninga shoka twa hala. (Mark. 7:21, 22) Onkee ano, osha simana noonkondo tu kale hatu “dhiladhila shoka shopaKalunga,” ihe haashoka “shopantu.” Oshitopolwa shika otashi ke tu kwathela tu shi ninge. Otashi yelitha kutya omolwashike okudhiladhila ngaashi Jehova kaaku shi oshinima shoka tashi tu ngambeke unene, ihe otashi tu etele uuwanawa. Otashi ke tu kwathela wo tu mone nkene tatu vulu okuyanda okunwethwa mo komadhiladhilo guuyuni. Moshitopolwa tashi landula, otatu ka kundathana nkene Jehova ha tala ko iinima yi ili noyi ili nankene tatu vulu oku mu holela.

5. Omolwashike aantu yamwe ihaaya etha omadhiladhilo gawo ga nwethwe mo kuyalwe?

⁵ Aantu yamwe ohaya tindi okweetha omadhiladhilo gawo ga nwethwe mo kuyalwe. Ohaya ti: “Ohandi dhiladhila kungame mwene.” Aantu mboka oya fa ya hala okutya, ohaya ningi omatokolo kuyo yene noshi li mondjila okuninga ngaaka. Kaye hole okupangelwa nokuthiminikwa ya kale ya fa aantu yalwe. *

6. (a) Jehova okwe tu pa emanguluko lini? (b) Mbela emanguluko ndika olya ngambekwa?

⁶ Shoka tu na okukala tu shi osho kutya okukala metsokumwe nomadhiladhilo gaJehova itashi ti kutya katu na okulandula omadhiladhilo gaantu yalwe. Aakorinto aatiyali 3:17 otayi ti: “Mpoka pu na [ombepo] yOmuwa, opu na emanguluko.” Otwa manguluka okuhogolola kutya otwa hala okukala aantu ya tya ngiini. Ehogololo oli li miikaha yetu yene, onkee otatu vulu okuhogolola iinima mbyoka tu na ohokwe muyo. Jehova osho e tu shita ngaaka. Nonando otu na emanguluko, itatu vulu owala okukala hatu ningi kehe shimwe. (Lesha 1 Petrus 2:16.) Ngele tashi ya pokutokola shoka shi li mondjila naashoka sha puka, Jehova okwa hala tu wilikwe komadhiladhilo ge ngoka ge li mOmbiimbeli. Mbela shika oshe tu ngambeka unene nenge oshi li po oku tu kwathela?

7, 8. Omolwashike okukala tu na etaloko lyaJehova kaaku shi oshinima shoka she tu ngambeka unene? Gandja oshiholelwa.

⁷ Natu taleni koshiholelwa tashi landula. Aavali ohaya ningi ngaashi taya vulu ya longe oyana omikalo omiwanawa. Otashi vulika ye ya longe nkene taya vulu okukala aanashili, haya longo nuudhiginini noye na ko nasha nayalwe. Shika inashi kutha po nando emanguluko lyoyana. Pehala lyaashono, otaya kwathelwa kaavali, opo ya ka kale nonkalamwenyo ombwanawa, ngele ya ningi aakuluntu. Uuna aanona ya koko e taya ka ninga omagumbo gawo, ohaya kala ya manguluka okuninga omatokolo kuyo yene. Ngele oya tokola okuninga shoka ya longwa kaavali  yawo, nena ohashi ya kwathele ya vule okuninga omatokolo ngoka itaage ke ya ningitha yi ipe uusama. Oshizemo? Itaye ki iyetela omaupyakadhi niimpwiyu oyindji.

⁸ Ngaashi omuvali omunahole, Jehova okwa hala aanona ye ya kale ye na onkalamwenyo yi na eityo. (Jes. 48:17, 18) Onkee ano, okwe tu pa omakotampango kombinga yankene tu na okwiihumbata nogankene tu na okwiihumbatela yalwe. Kungawo, ote tu kwathele tu kale hatu tala ko iinima ngaashi he yi tala ko notu kale metsokumwe nomithikampango dhe. Shoka inashi tu ngambeka unene, ihe otashi tu kwathele tu hwepopaleke okudhiladhila kwetu notu kale hatu dhiladhila iinima muule. (Eps. 92:5; Omayel. 2:1-5; Jes. 55:9) Ngele otwa ningi ngawo, otatu vulu natango okuninga iinima yetu yopaumwene notashi ke tu kwathela wo tu ninge omatokolo ngoka tage tu etele enyanyu. (Eps. 1:2, 3) Eeno, okudhiladhila ngaashi Jehova ohaku tu etele uuwanawa mboka twa pumbwa.

9, 10. Omadhiladhilo gaJehova oge shi holola ngiini kutya oge vule kokulekule guuyuni?

⁹ Etompelo limwe kutya omolwashike oshigwana shaJehova shi hole okukaleka omadhiladhilo gasho metsokumwe nomadhiladhilo Ge, olyo kutya omadhiladhilo ge oge vule kokulekule guuyuni. Uuyuni ohawu gandja omayele kombinga yomikalo, yomakwatathano momaukwanegumbo, yiilonga nosho wo yiinima yilwe yomonkalamwenyo. Ogendji gomugo kage li metsokumwe nehalo lyaJehova. Pashiholelwa, aantu muuyuni ohaya ladhipikwa ya pitithe komeho uuwanawa wawo yene. Uuyuni otawu humitha wo komeho oluhondelo. Natango, otawu humitha komeho etopoko nehengathano molwomatompelo gaafele, oshoka anuwa ohashi etele aantu enyanyu lyashili. Omayele agehe ngoka itaga tsu kumwe nOmbiimbeli. Ihe mbela omayele gamwe ngoka haga gandjwa muuyuni, otaga vulu ngaa oku tu kwathela pethimbo lyetu?

¹⁰ Jesus okwa ti: “Uunongo waKalunga owa hololwa kiilonga ye.” (Mat. 11:19) Nonando uuyuni owa vula okuninga ehumokomeho lyontumba muuteknolohi, inawu vula okukandula po omaupyakadhi omanene ngoka taga yemateke aantu, ngaashi iita, uukwamuhoko nomiyonena. Uuyuni sho wa taamba ko oluhondelo, mbela aantu oye shi tala ko ngiini? Aantu oyendji otaye shi zimine kutya oluhondelo kalu shi ekandulopo lyuupyakadhi, ihe ohalu e ta owala etopoko momaukwanegumbo, omikithi nomaupyakadhi galwe. Mepingathano naashono, Aakriste mboka ye na etaloko lya fa lyaKalunga, oye na ekwatathano ewanawa momaukwanegumbo, oye na uukolele wu li hwepo noye na ombili nooitaali ooyakwawo muuyuni awuhe. (Jes. 2:4; Iil. 10:34, 35; 1 Kor. 6:9-11) Mbela shika itashi ulike kutya omadhiladhilo gaJehova oge vule kokulekule guuyuni?

11. Moses okwa li a etha a wilikwe kulye, noshe e ta iizemo yini?

¹¹ Aapiya yaJehova mboka ya popiwa mOmbiimbeli, oye shi mona kutya omadhiladhilo ge oga dhenga mbanda. Pashiholelwa, nonando Moses okwa li a longwa “uunongo auhe wAayegipiti,” okwa pula Kalunga e mu pe ‘oondunge.’ (Iil. 7:22; Eps. 90:12) Okwa li wo a galikana kuJehova a ti: “Tseyithila ndje oondjila dhoye.” (Eks. 33:13) Molwaashoka okwa li a etha a wilikwe kuJehova, okwa longo iilonga ya simana mokugwanitha po ehalo Lye nokwa popiwa nesimaneko mOmbiimbeli kutya ye omulumentu e na eitaalo. — Heb. 11:24-27.

12. Omatokolo gomuyapostoli Paulus oga li ga kankamena kushike?

¹² Omuyapostoli Paulus okwa li omulumentu e na oondunge, a longwa noku shi nokuli omalaka gaali. (Iil. 5:34; 21:37, 39; 22:2, 3) Ihe ngele tashi ya pokutokola shoka shi li mondjila naashoka sha puka, ka li ha landula omadhiladhilo guuyuni. Pehala lyaashono, okwa li ha tokola  metsokumwe nOmanyolo. (Lesha Iilonga 17:2; 1 Aakorinto 2:6, 7, 13.) Oshizemo, Paulus okwa li a pondola miilonga yokuuvitha nokwa pewa ondjambi yokukala nomwenyo sigo aluhe. — 2 Tim. 4:8.

13. Olye e na oshinakugwanithwa shokulundulula omadhiladhilo getu ga kale metsokumwe nomadhiladhilo gaJehova?

¹³ Odhoshili kutya omadhiladhilo gaKalunga oge vule kokulekule guuyuni. Okukala metsokumwe nomadhiladhilo gaKalunga, ohaku tu etele enyanyu lyashili nohaku tu kwathele tu pondole. Ihe Jehova ke na esiku e tu kondjithe tu dhiladhile ngaashi ye. “Omupiya, omudhiginini nomunandunge” nosho wo aakuluntugongalo nayo ihaye tu thiminike tu dhiladhile shoka shi li metsokumwe nehalo lyaJehova. (Mat. 24:45, NW; 2 Kor. 1:24) Pehala lyaashono, Omukriste kehe oku na oshinakugwanithwa shokukaleka omadhiladhilo ge metsokumwe nehalo lyaKalunga. Ongiini tatu vulu oku shi ninga?

14, 15. (a) Ngele otwa hala tu kale tu na etaloko lya fa lyaJehova, okushike tu na okutedhatedha? (b) Shi ikolelela kAaroma 12:2, omolwashike twa pumbwa okuyanda okunwethwa mo kuuyuni? Shi thaneka.

¹⁴ Aaroma 12:2, otayi tu londodha tayi ti: “Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” Enyolo ndyoka otali tu kwathele tu mone kutya nonando omadhiladhilo getu oga li ga nwethwa mo kushike manga inaatu tseya oshili, otatu vulu oku ga lundulula ga kale metsokumwe nogaKalunga. Eeno, poompito dhimwe omadhiladhilo getu otaga vulu okukala ga nwethwa mo komaukwatya ngoka twa thigulula nokwaashoka twa li hatu ningi, manga inaatu ya moshili. Ihe otaga vulu okulunduluka ethimbo nethimbo. Shoka tashi ke tu ningitha tu ga lundulule, ooshoka tatu tokola okudhiladhila naashoka tatu tedhatedha kusho. Okukala hatu tedhatedha kunkene Jehova ha dhiladhila, otaku vulu oku tu kwathela tu mone kutya etaloko lye oli li mondjila. Shoka osho tashi ke tu kwathela tu kale twa hala okutala ko iinima ngaashi ye he yi tala ko.

¹⁵ Ngele otwa hala tu kale tu na etaloko lya fa lyaJehova, otu na okulandula elondodho ndika tali ti: “Inamu faathana nonkalo yuuyuni mbuka.” Otu na okuyanda omadhiladhilo ngoka ge li ompinge nehalo lyaKalunga. Opo tu mone nkene onkatu ndjoka ya simana, otatu vulu oku yi faathanitha niikulya. Omuntu otashi vulika a kale ta li iikulya tayi tungu, molwaashoka a hala okukala e na uukolele. Ihe otashi kwatha shike, ngele oha li ishewe iikulya ya ninga nayi? Sha faathana, ngele omuntu oha konakona Oohapu dhaKalunga, ihe oha nyateke omadhiladhilo ge niinima yuuyuni, otashi ka kala osima yowala.

16. Otwa pumbwa okwiigamena kushike?

¹⁶ Mbela otatu vulu ngaa okuyanda thiluthilu omadhiladhilo guuyuni? Aawe. Omolwashike? Omolwaashono paulelalela itatu vulu okuza mo muuyuni mbuka. Onkene omadhiladhilo gamwe itatu vulu oku ga yanda thiluthilu. (1 Kor. 5:9, 10) Uuna tatu uvitha, ohatu tsakanene naantu mboka ye na omaitaalo ga puka. Onkee ano, shoka taya popi, inatu shi ambidhidha nenge tu shi taambe ko. Ngaashi Jesus, natse otu na okukala hatu yanda nziya omadhiladhilo gaSatana. Shimwe ishewe, otatu vulu okwiigamena komadhiladhilo guuyuni. — Lesha Omayeletumbulo 4:23.

17. Omomikalo dhimwe dhini tatu vulu okuyanda omadhiladhilo guuyuni?

¹⁷ Ngele tashi ya pokuhogolola ookuume, otu na okukala twa kotoka. Ombiimbeli otayi tu londodha kaatu pange uukuume naantu mboka ihaaya longele Jehova, oshoka otaya vulu oku tu nwetha mo. (Omayel. 13:20; 1 Kor. 15:12, 32, 33) Otatu vulu wo okukala hatu hogolola omainyanyudho nuukeka. Ohatu yanda okunyateka omadhiladhilo getu naangoka haga “inenepekele  okutseya Kalunga,” mokuyanda omainyanyudho ngoka haga humitha komeho elongo lyoevolusi, elongithonkondo noluhondelo. — 2 Kor. 10:5.

18, 19. (a) Omolwashike tu na okukotokela omadhiladhilo guuyuni, ngoka taga humithwa komeho momukalo ngoka omudhigu okunongela? (b) Omapulo geni tu na okwiipula, nomolwashike?

¹⁸ Ohatu ningi ngaashi tatu vulu tu ndhindhilike mo omadhiladhilo guuyuni noku ga yanda, nuuna ga hololwa momikalo ndhoka omidhigu okumona. Pashiholelwa, oonkundana otashi vulika dhi kundanekwe momukalo ngoka tagu popile omaetopo gontumba gopapolitika. Omahokololo gamwe, otashi vulika ga humithe komeho etaloko lyuuyuni li na ko nasha nomalalakano nosho wo nokupondola. Oomuvi dhimwe nomambo gamwe, ohaga humitha komeho okukala tu iholele komeho nosho wo okuhalela uukwanegumbo wetu komeho, nokuningitha omatoloko ngoka ga kale ga fa ge li nawa, taga hokitha noge li mondjila. Omataloko ngoka, oge li ompinge nOmanyolo. Ohage tu ningitha tu dhiladhile kutya tse nuukwanegumbo wetu otatu vulu okukala twa nyanyukwa, ngele otwa kala tu hole iinima yilwe pehala lyokuhola Jehova. (Mat. 22:36-39) Shimwe ishewe, omahokololo gamwe ngoka ga nuninwa aanona, nonando oga kale ga fa omawanawa, otaga vulu okunwetha mo nayi eihumbato lyawo.

¹⁹ Shika itashi ti kutya okunyanyukilwa omainyanyudho omawanawa okwa puka. Ihe osha simana okwiipula omapulo ngaka: ‘Mbela ohatu ndhindhilike mo ngaa omalongo guuyuni, nonando otaga humithwa komeho momukalo ngoka itaatu vulu oku gu nongela nuupu? Ngele tashi ya pokutala oopolohalama dhontumba nenge okulesha omambo gontumba, mbela ohatu itulile po ngaa omangambeko nosho wo aanona yetu? Mbela ohatu kwathele ngaa aanona yetu ya kale ye na etaloko lya fa lyaJehova, kombinga yiinima yomuuyuni mbyoka haya uvu nenge haya mono?’ Opo tu yande ‘okufaathana nonkalo yuuyuni mbuka,’ otwa pumbwa okutseya eyooloko pokati komadhiladhilo gaKalunga naangoka guuyuni.

20. Oshike tashi ka ulika kutya otwa nwethwa mo komadhiladhilo gaKalunga nenge oguuyuni?

²⁰ Dhimbulukwa kutya opu na oonzo mbali dhuuyelele, Jehova nosho wo uuyuni mbuka tawu pangelwa kuSatana. Onzo yini hayi tu nwetha mo? Oondjoka hayi tu pe uuyelele. Ngele otwa kala hatu landula omadhiladhilo guuyuni, otaga ka nwetha mo okudhiladhila kwetu, e tatu tameke okukala tu na etaloko lyopantu neihumbato lyuuyuni. Onkee ano, osha simana lela tu kotokele shoka tatu tedhatedha kusho.

21. Moshitopolwa tashi landula, otatu ka kundathana shike sha simana?

²¹ Ngaashi sha tumbulwa metetekelo, opo tu kale hatu dhiladhila ngaashi Jehova, otwa pumbwa okuninga oshindji shi vulithe owala okukaleka omadhiladhilo getu ga yela. Otwa pumbwa wo okukala hatu konakona oohapu dhaKalunga, tatu shi ningi nelalakano tu kale netaloko lya fa lye. Oshitopolwa tashi landula otashi ka kundathana muule kombinga yankene tatu vulu oku shi ninga.