Ongulohi manga Jesus inaa sa, okwa li a pe aalongwa ye omayele kombinga yokwaaikongela oondondo dha simana mokati kooitaali ooyakwawo. Okwe ya lombwele a ti: “Aakwaniilwa yomuuyuni mbuka ohaa pangele aantu yawo koonkondo, naapangeli yawo oya hala, yi ithanwe ookuume kaantu. Ihe ne inamu kala ngaaka!” — Luk. 22:25, 26.

Ookuume kaantu mboka Jesus a popi oyo oolye? Iinyolwa yontumba niimaliwa iikukutu yopethimbo ndiyaka, otayi shi ulike kutya osha li omukalondjigilile kAagreka nokAaroma okugandja esimano kaalumentu mboka ye na oondondo dha simana nosho wo kaapangeli, moku ya ithana nedhinasimaneko, ookuume kaantu nenge Euergetes. Aantu mboka oya li haya ithanwa ngaaka, molwaashoka oya li haya gandja eyakulo lya simana moshigwana.

Aakwaniilwa yamwepo nayo oya li hayi ithanwa ookuume kaantu. Yamwe yomuyo oya li aapangeli Aaegipiti, ngaashi: Ptolemy III Euergetes (mo 247-222 K.E.N.) naPtolemy VIII Euergetes II (mo 147-117 K.E.N.) Aapangeli yomuRoma, Julius Caesar (mo 48-44 K.E.N.) naAugustus (mo 48-44 K.E.N.) nosho wo omukwaniilwa gwaJudea, Herodes Omunene, nayo oya li hayi ithanwa ngaaka. Herodes okwa li i ithanwa nedhinasimaneko ndyoka, tashi vulika molwaashoka e etele mo iilya nosho wo iizalomwa moshilongo she shoka sha li shi na ondjala.

Shi ikolelela komulongwantu gwOmbiimbeli gumwe Omundowishi, edhinasimaneko ookuume kaantu olya li lya ha. Okwa ti: “Osha li oshipu okwaadha edhinasimaneko ndyoka iikando oyindji miinyolwa yonale.”

Jesus okwa li a hala okutya shike, sho a lombwele aalongwa ye a ti kutya “ne inamu kala ngaaka”? Mbela okwa li te ya lombwele kaaya kwathele aantu yomomudhingoloko gwawo, ano kaaya kale ye na ko nasha nonkalonawa yawo? Hasho nando. Jesus okwa li ta popi kombinga yeinyengotompelo lyawo lyokugandja.

Pethimbo lyaJesus, aayamba oya li ye hole okwiimonena edhina ewanawa, mokugandja iimaliwa yi longithwe momaudhano, mokutunga oopaarka nooteempeli nosho wo miinima yilwe ya fa mpoka. Shoka oya li haye shi ningi, nelalakano lyokwiikongela esimano, lyokukala ya tseyika nawa nokuningitha aantu ye ya hogolole. Embo limwe lyuuyelele olya ti kutya “nonando opu na iiholelwa yaantu mboka ya li ya gandja nehalo ewanawa, olundji oya li haye shi ningi, molwopolotika.” Jesus okwa li a kumagidha aalongwa ye kaaya kale ye na iikala mbyoka yokwiiyulika noyokwiihola mwene.

Konima yomimvo dhontumba, omuyapostoli Paulus okwa li wo a tsu omuthindo oshili ndjoka ya simana kombinga yokugandja neinyengotompelo ewanawa. Okwa nyolele ooitaali ooyakwawo yomuKorinto a ti: “Kehe gumwe na gandje, ngaashi eiyuvo lye tali mu lombwele, hanokungungutula nenge kethiminiko. Oshoka Kalunga oku hole ngoka ta gandja nenyanyu.” — 2 Kor. 9:7.