Onda valwa mo 1983. Onda valelwe ndi na uukolele, ihe sho nda gwanitha omimvo omulongo, olutu lwandje aluhe olwa tameke okukala talu ehama nayi. Konima yomimvo mbali lwaampono, ongula yimwe sho nda penduka, kanda li we tandi vulu okwiinyenga. Onda kala te kambadhala okwiinyengitha omagulu gandje, ihe kanda li tandi vulu. Okuza esiku ndyoka, inandi vula we okweenda. Uuwehame mboka owa ningitha ndje kaandi koke we. Sigo okunena, ondi thike owala pokanona.

Konima yoomwedhi dhontumba sho nda kala ndi li megumbo tandi ehama, Oonzapo dhaJehova mbali odhe ya oku tu talela po. Olundji uuna aantu ye ya oku tu talela po, ohandi kambadhala oku ya holama, ihe esiku ndyono onde etha aakulukadhi yaali Oonzapo ya popye nangame. Sho ya popi kombinga yOparadisa, onda dhimbulukwa shoka ndu uvile sho nda li ndi na omimvo ntano lwaampono. Ethimbo ndyono, omutumwa gwedhina Jethro, ngoka a li ha zi koSuriname, okwa li ha talele po omukunda gwetu lumwe momwedhi nokwa li ha konakona Ombiimbeli natate. Jethro okwa li hu ungaunga nawa nangame. Onda li ndi mu hole noonkondo. Shimwe ishewe, kuku gwandje nomukulukadhi gwe oya li haya faalele ndje kokugongala kwOonzapo, hoka kwa li haku ningilwa momukunda gwetu. Onkee ano, sho Florence, ngoka e li gumwe gwomaakulukadhi mboka ya li ye ya oku tu talela po, a pula ndje ngele onda hala okwiilonga oshindji, onda ti eeno.

Florence okwe ke ya nomusamane gwe, Justus, e taya tameke ekonakonombiimbeli nangame. Sho ya mono kutya kandi shi okulesha, oya longo ndje ndi tseye okulesha. Konima yethimbo, onda tseya okulesha. Esiku limwe, oya lombwele ndje kutya oya tuminwa koSuriname. Shiyemateka, moOrealla kamwa li mu na ngoka ta vulu okutsikila okukonakona Ombiimbeli nangame. Ihe shoka oshiwanawa, Jehovah ka li a dhimbwa ndje.

Nziya konima sho ya yi, moOrealla omwe ya omukokolindjila gwedhina, Floyd nokwe ya paandjetu, sho a li tu uvitha egumbo negumbo. Sho a popi nangame kombinga yekonakonombiimbeli, ondi imemeha. Okwa pula ndje a ti: “Omolwashike to imemeha?” Onde mu lombwele kutya onda konakona nale okambo Kalunga ota pula shike kutse? nonda tameka nale okukonakona embo Ontseyo ndjoka tayi fala komwenyo gwaaluhe. * Onde mu yelithile kutya omolwashike ihaandi konakona we. Floyd okwa kwathele ndje ndi mane okukonakona embo Ontseyo, ihe mokweendela ko kwethimbo naye  okwa tumwa a ka longele kulwe. Onda kala ishewe kaandi na ngoka ta konakona nangaye Ombiimbeli.

Ihe nonando ongawo, mo 2004, aakokolindjila yi ikalekelwa yaali, Granville naJoshua, oya li ya tuminwa koOrealla. Sho ya li tayu uvitha egumbo negumbo, oye ya paandjetu. Sho ya pula ndje ngele onda hala ekonakono, ondi imemeha. Onde ya pula ya konakonene nangame embo Ontseyo, okuza ketameko. Onda li nda hala ndi tale ngele otaya longo ndje ngaa iinima ya faathana naambyoka nda longwa kaalongi yandje yotango. Granville okwa lombwele ndje kutya momukunda gwetu ohamu ningwa okugongala. Nonando onda adhika nda ninga omimvo omulongo inaandi za mo megumbo, onda li nda hala okuya kokugongala hoka. Onkee ano, Granville okwi ile ndje e ta fala ndje kOshinyanga shUukwaniilwa ndi li mokatemba.

Konima yethimbo, Granville okwa ladhipike ndje ndi kale handi kutha ombinga mOsikola yOkudheula Aauvithi. Okwa ti: “Owa lemana, ihe oho vulu okupopya. Esiku limwe, oto ka gandja oshipopiwa shomontaneho. Shoka otashi ka ningwa shili.” Eladhipiko lye olya tsu ndje omukumo.

Onda tameke okukutha ombinga miilonga yokuuvitha pamwe naGranville. Ihe oondjila odhindji momukunda odha li oombwiinayi nokweenda nokatemba. Onkene onda pula Granville a tule ndje mokatololi oko a kale tu undula, sho tatu uvitha. Shoka osha kala tashi ende nawa lela. Onda ninginithwa muApilili 2005. Konima yaashono, aamwatate oya dheula ndje ndi kale handi yakula piileshomwa nosho wo okuungaunga niikwamambako mOshinyanga shUukwaniilwa.

Shiyemateka, mo 2007 tate okwa si moshiponga shombautu. Yaandjetu oya li ya yemata noonkondo. Granville okwa kala ta galikana pamwe natse nokwa kala te tu leshele oohapu tadhi hekeleke okuza mOmbiimbeli. Konima yoomvula mbali, otwa li twa adhika ishewe koluhodhi lulwe sho Granville a sile moshiponga shombautu.

Egongalo lyetu eshona nolya nika oluhodhi, kalya li we li na omukuluntugongalo, nolya li owala li na omuyakuligongalo gumwe awike. Eso lyaGranville olya li lela lya yemateka ndje, oshoka okwa li kuume kandje kopothingo. Okwa li ha kwathele ndje aluhe pambepo nopalutu. Konima yeso lye pokugongala kwa landula ko, onda li nda pulwa ndi leshe uutendo pEkonakono lyOshungolangelo. Sho nda lesha ko owala uutendo uyali, onda tameke okulila, e tandi zi ko komutuni.

Onda tameke ishewe ndi uvite hwepo, sho aamwatate yokegongalo lilwe ye ya oku tu kwathela moOrealla. Shilwe ishewe, oshitayimbelewa oshe tu tumine omukokolindjila i ikalekelwa gwedhina Kojo. Shinyanyudha, meme nokamwamememati oya ka tameka okukonakona Ombiimbeli e taya ninginithwa. Opo ihe, muMaalitsa 2015, onda ningi omuyakuligongalo. Konima yethimbo, onda gandja oshipopiwa shomontaneho oshikando shandje shotango. Esiku ndyoka onda li tandi imemeha nonda li tandi lili sho nda dhimbulukwa shoka Granville a lombwelele ndje omimvo dha ka pita, sho a tile: “Esiku limwe, oto ka gandja oshipopiwa shomontaneho. Shoka otashi ka ningwa shili.”

Okupitila mOopolohalama dhotiivii JW ondi ilongo kombinga yaamwatate naamwameme yalwe mboka ye li monkalo ya fa yandje. Nonando oya lemana nenge taye ehama, ohaya vulu okulonga oshindji noya nyanyukwa. Nangame wo ohandi vulu okuninga iinima yontumba. Molwaashoka onda li ndi na ehalo lyokulongela Jehova ngaashi tandi vulu, onda ningi omukokolindjila gwondjigilile. Lwanima muSeptemba 2019 onda li nda kumwa sho nda ningi omukuluntugongalo megongalo lyetu, moka mu na aauvithi ye li 40 lwaampono.

Onda pandula aamwatate naamwameme mboka ya konakona nangame naasho ya kala taya kwathele ndje ndi longele Jehova. Kakele kaashono, onda pandula Jehova noonkondo sho inaa dhimbwa ndje.