OSHITOPOLWA SHOKUKONAKONWA 45
Nkene tatu vulu okukwathela yalwe ya vulike komalombwelo gaKristus
“Indeni ano, ka ningeni aantu ayehe aalongwa yandje . . . ne mu ya longe okudhiginina ayihe mbyoka nde yi mu lombwele.” — MAT. 28:19, 20.
EIMBILO 89 Vulika, pulakena, e to yambekwa
ELALAKANO LYOSHITOPOLWA *
1. Shi ikolelela kuMateus 28:18-20, elombwelo lini Jesus a pe aalongwa ye?
KONIMA sho Jesus a yumudhwa, okwi ihololele aalongwa ye mboka ya li ya gongala muGalilea. Okwa li e na sha sha simana oku ya lombwela. Osha li shike mbela? Shoka e ya lombwela otashi adhika muMateus 28:18-20. — Lesha.
2. Omapulo geni tatu ka kundathana?
2 Elombwelo lyaJesus lyokuninga aantu aalongwa otali longo wo nokaapiya yaKalunga yokunena. Onkee ano, natu ka kundathaneni omapulo gatatu ge na ko nasha noshinakugwanithwa shoka Jesus e tu pa. Lyotango, kakele kokulonga aalongwa aape iitegelelwa yaKalunga, oshike ishewe tu na okuninga? Etiyali, ongiini aauvithi ayehe megongalo taya vulu okukwathela aakonakonimbiimbeli ya ninge ehumokomeho? Etitatu, ongiini tatu vulu okukwathela mboka inaayi ipyakidhila we ya kale ishewe haya kutha ombinga miilonga yokuninga aantu aalongwa?
YA LONGA OKUDHIGININA OMALOMBWELO GAKRISTUS
3. Omalombwelo geni gokondandalunde Jesus a li a kwatele melombwelo lye?
3 Omalombwelo gaJesus oga yela. Otu na okulonga aantu iinima mbyoka e tu lombwela tu ya longe. Nonando ongawo, katu na okudhimbwa oshitsa shimwe sha simana. Jesus ina tya: ‘Ya longeni iinima ayihe mbyoka nde yi mu lombwele.’ Pehala lyaashono okwa ti: Ya longeni “okudhiginina ayihe mbyoka nde yi mu lombwele.” Opo tu vulike kelombwelo lyaJesus, otwa pumbwa okulonga omukonakoni gwetu shoka e na okuninga nankene e na oku shi ninga. (Iil. 8:31) Omolwashike tu na oku shi ninga?
4. Okuvulika kelombwelo otashi ti shike? Shi thaneka.
4 “Okudhiginina” elombwelo otashi ti okuvulika kulyo. Ihe ongiini tatu vulu okulonga omuntu a vulike kiinima mbyoka Kristus e tu lombwela? Oshiholelwa tashi landula otashi vulu oku tu kwathela tu uve ko shoka tu na okuninga. Ngoka ha longo aantu okuhinga, ohe ya longo ngiini ya vulike koompango dhomondjila? Tango ohe ya longo oompango dhomondjila ndhoka ye na okuvulika kudho. Ihe opo e ya longe okuvulika koompango ndhoka, oku na okuninga oshinima shilwe. Oku na oku ka hinga nayo noku ya pa omayele gankene ye na okutula miilonga oompango dhomondjila. Oshike tatu vulu okwiilonga koshiholelwa shoka?
5. (a) Shi ikolelela kuJohannes 14:15 nosho wo Johannes gwotango 2:3, oshike twa pumbwa okulonga aakonakonimbiimbeli yetu ya ninge? (b) Gandja iiholelwa yankene tatu vulu okukwathela aakonakonimbiimbeli yetu ya tule miilonga shoka tayi ilongo.
5 Uuna tatu konakona Ombiimbeli nayalwe, ohatu ya longo nkene Jehova a hala tu kale. Ihe otu na okuninga oshindji shi vulithe mpoka. Otu na okulonga aakonakonimbiimbeli yetu okutula miilonga shoka tayi ilongo. (Lesha Johannes 14:15; 1 Johannes 2:3.) Pashiholelwa, otatu vulu oku yu ulukila nkene taya vulu okutula miilonga omakotampango gOmbiimbeli uuna ye li kosikola, kiilonga nuuna tayi inyanyudha. Otatu vulu oku ya kuthila ko shi na ko nasha nankene okutula miilonga omakotampango gOmbiimbeli kwe tu gamena nokwe tu kwathela tu ninge omatokolo gopandunge. Uuna tu li naakonakoni yetu otatu vulu okugalikana Jehova, tatu mu pula ombepo ye ondjapuki yi ya wilike. — Joh. 16:13.
6. Oshike sha kwatelwa mo mokulonga yalwe ya vulike komalombwelo gaJesus?
6 Oshike ishewe tu na okuninga uuna tatu longo yalwe ya vulike komalombwelo gaJesus? Otwa pumbwa oku ya kwathela ya kale ye na ehalo lyokuninga aantu aalongwa. Kaakonakonimbiimbeli yamwe, okukutha ombinga miilonga yokuuvitha otashi vulika ku kale oshinima oshitilithi. Onkee ano, otu na okukala aaidhidhimiki sho tatu ya kwathele yu uve ko oshili yOmbiimbeli, opo ya kale ye na eitaalo lya kola. Shoka otashi ka guma omitima dhawo noku yi inyengitha ya kale ye na ehalo lyokuuvitha. Oshike ishewe tatu vulu okuninga tu kwathele aakonakoni ya kale ye na ehalo lyokuuvithila yalwe onkundana ombwanawa?
7. Ongiini tatu vulu okukwathela omukonakoni a kale e na ehalo lyokuuvithila yalwe onkundana ombwanawa?
7 Otatu vulu okupula omukonakoni gwetu omapulo taga landula: “Okutaamba ko etumwalaka lyUukwaniilwa okwa hwepopaleka ngiini onkalamwenyo yoye? Mbela oto dhiladhila kutya yalwe oya pumbwa wo okuuva etumwalaka ndino? Oshike to vulu okuninga, opo wu ya kwathele?” (Omayel. 3: 27; Mat. 9:37, 38) Ulukila omukonakoni gwoye uufo mboka wu li wumwe womiileshomwa mbyoka hatu longitha tu konakone naantu Ombiimbeli, e to mu etha a hogolole hoka ta dhiladhila kutya otaka ka kala okahokithi kaapambele ye, kookuume ke nenge kaaniilonga pamwe naye. Mu pa uufo owundji wa yoolokathana. Mu ulukila nkene ta vulu okugandja uufo mboka momukalo omuwanawa. Uuna omukonakoni gwetu a ningi omuuvithi inaa ninginithwa, otu na okulonga pamwe naye muukalele, opo tu mu kwathele. — Omuuv. 4:9, 10; Luk. 6:40.
NKENE EGONGALO TALI VULU OKUKWATHELA AAKONAKONI YA NINGE EHUMOKOMEHO
8. Omolwashike sha simana aakonakoni yetu ya kale ye hole Kalunga noonkondo nosho wo aantu ooyakwawo? (Tala wo oshimpungu “ Nkene tatu vulu okukwathela aakonakoni yetu ya kale ye hole Kalunga.”)
8 Dhimbulukwa kutya Jesus okwe tu lombwela tu longe yalwe ‘ya dhiginine ayihe’ mbyoka e tu lombwela. Shoka osha kwatela mo iipango iyali ya simanenena mbyoka ya pambathana niilonga yokuuvitha noyokuninga aantu aalongwa, ano okukala tu hole Kalunga nosho wo aantu ooyakwetu. (Mat. 22:37-39) Iinima mbyono oya pambathana ngiini? Shoka hashi tu inyengitha tu kale hatu kutha ombinga miilonga yokuuvitha, ohole, ano ohole yokuhola Kalunga nosho wo aantu ooyakwetu. Oshi shi okuuviwa ko uuna petameko omukonakoni ha kala a tila okuuvithila yalwe. Ihe otatu vulu oku mu shilipaleka kutya kekwatho lyaJehova, mokweendela ko kwethimbo ota ka vula okusinda uumbanda mboka. (Eps. 18:1-3; Omayel. 29:25) Oshimpungu shoka shi li moshitopolwa shika osha kundathana shoka tatu vulu okuninga tu kwathele omukonakoni gwetu a kale e hole Kalunga noonkondo. Kakele kaashono, oshike egongalo tali vulu okuninga li kwathele aalongwa aape, ya kale ye hole Jehova noonkondo?
9. Methaneko lyaangoka ti ilongo okuhinga, omomikalo dhini ta vulu okwiilonga iiyilongomwa ya simana yi na ko nasha nokuhinga?
9 Dhiladhila natango kethaneko lyomuntu ti ilongo okuhinga. Uuna ta hingi pamwe nomulongi gwe, omomukalo guni ta vulu okwiilonga okukala ha hingi nawa? Omokupulakena kuye nokutala nkene aahingi yalwe taya hingi nuukeka. Pashiholelwa, omulongi gwe ota vulu oku mu ulukila omuhingi gulwe ngoka ta gandja ompito kugulwe a pite po. Nenge e mu ulukile omuhingi ngoka ta shunitha uuyelele womalamba ge pevi, opo aahingi yalwe ya vule okumona ko. Iiholelwa mbyoka otayi longo ngoka ti ilongo okuhinga iinima ya simana mbyoka ta vulu okutula miilonga uuna ta hingi.
10. Oshike tashi vulu okukwathela omukonakonimbiimbeli a hume komeho?
10 Sha faathana, omukonakonimbiimbeli ngoka a tameka okweenda mondjila ndjoka tayi fala komwenyo gwaaluhe, ihi ilongo owala komulongi gwe, ihe nokiiholelwa wo iiwanawa yaapiya yalwe yaJehova. Onkee ano, oshike tashi ka kwathela unene aakonakonimbiimbeli ya ninge ehumokomeho? Okukala haye ya komakugongala gopaKriste. Omolwashike tatu tile ngawo? Shoka taye ki ilonga kokugongala otashi ke ya kwathela ya tseye oshindji noya kale ye na eitaalo lya kola, notashi ke ya kwathela wo ya kale ye hole Kalunga noonkondo. (Iil. 15:30-32) Shimwe ishewe, ngoka ta konakona naye ota vulu oku mu tseyitha aamwatate naamwameme mboka ya pita momashongo ga fa ge. Iiholelwa yini yokuulukilathana ohole yopaKriste omukonakoni tashi vulika a mone? Natu ka taleni kiiholelwa tayi landula.
11. Iiholelwa yini tashi vulika omukonakoni a ndhindhilike megongalo, notashi vulika yi mu gume ngiini?
11 Omukonakonimbiimbeli ngoka ta putudha oyana oye awike, okwa mono omumwameme ngoka e li monkalo ya fa ye. Omukonakonimbiimbeli sho a mono oonkambadhala ndhoka omumwameme ha ningi e ye kokugongala noyana, oshe mu gumu komutima. Omukonakoni ngoka ta kondjo nokweetha po okuhila omakaya, okwa tseyathana nomuuvithi ngoka naye a li ha kondjo noku ge etha po, ihe konima yethimbo okwe ke ge etha po. Omuuvithi ngoka okwe mu lombwele nkene ohole ye yokuhola Jehova, ye mu inyengitha a vulike koompango dhe. (2 Kor. 7:1; Fil. 4:13) Konima sho omumwatate e mu lombwele nkene e etha po okuhila omakaya, okwe mu ladhipike a ti: “Nangoye wo oto vulu oku ge etha po.” Omukiintu omugundjuka ngoka e li omukonakonimbiimbeli, okwa mono omumwameme gwepipi lye, ngoka ha nyanyukilwa onkalamwenyo ye sho e li Onzapo. Sho omukonakoni a ndhindhilike kutya omumwameme ngoka oha kala aluhe a nyanyukwa, oshe mu inyengitha a kale a halelela okutseya kutya omolwashike.
12. Omolwashike tatu vulu okutya kehe gumwe megongalo ota vulu okukwathela aakonakonimbiimbeli?
12 Uuna aakonakonimbiimbeli ya tseya aauvithi aadhiginini yi ili noyi ili, ohayi ilongo sha kiiholelwa yawo yi na ko nasha nokuvulika kelombwelo lyaKristus lyokukala tu hole Kalunga naantu ooyakwetu. (Joh. 13:35; 1 Tim. 4:12) Shimwe ishewe, ngaashi sha popiwa metetekelo, omukonakoni ota vulu okwiilonga sha kaauvithi mboka tayu ungaunga nomashongo ga fa ge. Iiholelwa yaauvithi mbyoka otayi vulu okukwathela omukonakoni a ninge omalunduluko, opo a vule okuninga omulongwa gwaKristus. (Deut. 30:11) Kehe gumwe megongalo ota vulu okukwathela aakonakoni momikalo dhi ili nodhi ili, ya ninge ehumokomeho. (Mat. 5:16) Oonkambadhala dhini ho ningi, opo wu kwathele aakonakoni mboka haye ya kokugongala?
KWATHELA MBOKA INAAYI IPYAKIDHILA WE YA KALE HAYU UVITHA
13-14. Jesus okwa li u ungaunga ngiini naayapostoli ye mboka ya li ya teka omukumo?
13 Otwa hala okukwathela aamwatate naamwameme mboka inaayi ipyakidhila we, ya kale ishewe haya kutha ombinga miilonga yokuninga aantu aalongwa mbyoka twa pewa kuKristus. Omukalo moka Jesus a li u ungaunga naayapostoli ye mboka ya li ya teka omukumo, otagu ulike shoka tatu vulu okuninga kunena.
14 Jesus pehulilo lyuukalele we kombanda yevi sho e li pokudhipagwa, aayapostoli ye “ayehe oye mu thigi po e taa yi ontuku.” (Mark. 14:50; Joh. 16:32) Jesus okwi inyenge ngiini sho aayapostoli ye ya li ya teka omukumo? Konima yokuyumudhwa kwe okwa lombwele yamwe yomaalanduli ye, a ti: “Inamu tila. Indeni, mu ka lombwele aamwatate [kutya onda yumuka].” (Mat. 28:10a) Jesus ka li a si uunye aayapostoli ye. Nonando oya li ye mu yi ontuku, natango kwe yi ithana ‘aamwahe.’ Ngaashi Jehova, Jesus okwa li omunahenda noha dhimine po. — 2 Aak. 13:23.
15. Otu uvitile ngiini mboka inaayi ipyakidhila we?
15 Sha faathana, natse otu na ko nasha lela naamboka inaayi ipyakidhila we. Oye li natango aamwatate naamwameme notu ya hole. Inatu dhimbwa nkene aamwatate naamwameme mboka ya kala taya longele Jehova nuudhiginini, nayamwe nokuli oya kala taye shi ningi uule womimvo. (Heb. 6:10) Otwe ya yuulukwa noonkondo! (Luk. 15:4-7) Ngaashi Jesus, omomikalo dhini tatu vulu oku yu ulukila kutya otu na ko nasha nayo?
16. Ongiini tatu vulu okuulika kutya otu na ko nasha naamwatate naamwameme mboka inaayi ipyakidhila we?
16 Ya hiya kokugongala momukalo gwombili. Omukalo gumwe moka Jesus a li a ladhipike aayapostoli ye mboka ya li ya teka omukumo, omoku ya hiya kokugongala. (Mat. 28:10b; 1 Kor. 15:6) Sha faathana, nokunena otatu vulu okuladhipika mboka inaayi ipyakidhila we ya kale haya gongala. Otu shi kutya otashi vulika tu na oku ya hiya lwiikando sigo ye ya kokugongala. Kapu na omalimbililo kutya Jesus okwa li a nyanyukwa noonkondo sho aalongwa ye ya taamba ko ehiyo lye. — Yelekanitha Mateus 28:16 naLukas 15:6.
17. Otatu ki inyenga ngiini uuna ngoka ini ipyakidhila we, e ya kokugongala?
17 Ya taamba ko nomaako agehe. Jesus okwa li a ningitha aalongwa ye ya kale ye mu mangulukila, sho a tsakanene nayo. Ka li a tegelele oyo ye ye kuye, pehala lyaashono okwa yi kuyo, e ta popi nayo. (Mat. 28:18) Otatu ki inyenga ngiini uuna ngoka ini ipyakidhila we, e ya kokugongala? Otwa pumbwa oku mu taamba ko nomaako agehe. Petameko, otashi vulika tu kale kaatu shi kutya natu popye naye shike. Ihe otatu vulu oku mu lombwela kutya otwa nyanyukwa oku mu mona, nokaapu na oku mu sitha ohoni.
18. Ongiini tatu vulu okutsa omukumo aauvithi mboka inaayi ipyakidhila we?
18 Ya tsa omukumo. Aalongwa yaJesus otashi vulika ya li yu uvite kutya itaya ka vula okuuvithila uuyuni awuhe onkundana ombwanawa. Jesus okwa li a tsu omukumo aalanduli ye, a ti: “Otandi kala pamwe nane omasiku agehe.” (Mat. 28:20) Mbela shoka osha li ngaa sha kwathele aalongwa ye? Eeno. Muule owala wethimbo efupi, oya tameke “okulonga nokuuvitha” onkundana ombwanawa. (Iil. 5:42) Aauvithi mboka inaayi ipyakidhila we, nayo oya pumbwa okutsuwa omukumo. Otashi vulika ya kale ya tila okutameka ishewe okuuvitha. Otatu vulu oku ya shilipaleka kutya itaye ku uvitha oyo ayeke. Uuna ya tameke okukala ya hala okuuvitha ishewe, otatu vulu okukala hatu longo pamwe nayo muukalele. Kapu na omalimbililo kutya otaya ka kala ya pandula ekwatho ndyoka hatu ya pe, sho ya tameke okuuvitha ishewe onkundana ombwanawa. Ngele otwa kala twa tala ko mboka inaayi ipyakidhila we ye li aamwatate naamwameme, otashi vulu oku ya kwathela ya tameke okuuvitha ishewe, shoka tashi ka nyanyudha egongalo alihe.
OTWA HALA TU MANITHE OSHILONGA SHOKA TWI INEKELELWA
19. Oshike twa halelela okuninga, nomolwashike?
19 Iilonga yokuuvitha noyokuninga aantu aalongwa otatu yi longo sigo uunake? Otu na oku yi longa sigo ehulilo lyuuyuni (Mat. 28:20) Mbela otatu ka gwanitha po ngaa iilonga mbyoka Jesus e tu pa? Otwa tokola toko oku shi ninga! Nehalo ewanawa, ohatu longitha ethimbo lyetu, oonkondo dhetu niiniwe yetu, tu konge mboka “ya halelela oku ka mona omwenyo gwaaluhe.” (Iil. 13:48, NW) Uuna tatu shi ningi, kungawo otatu holele Jesus. Okwa tile: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Joh. 4:34; 17:4) Natse osho hatu kala tu uvite ngawo. Otwa hala okutsakanitha oshilonga shoka twi inekelelwa. (Joh. 20:21) Otwa hala wo yalwe, mwa kwatelwa mboka inaayi ipyakidhila we ye tu wayimine miilonga mbika. — Mat. 24:13.
20. Shi ikolelela kAafilippi 4:13, omolwashike tatu vulu okugwanitha po oshilonga shoka Jesus e tu pa?
20 Odhoshili kutya okugwanitha po iilonga mbyoka Jesus e tu pa, kashi shi oshipu. Nonando ongawo, iilonga mbika ihatu yi longo otse atuke. Jesus oku uvaneka kutya ota ka kala pamwe natse. Otu li “aalongi pamwe naKalunga” nosho wo ‘naKristus.’ Onkee ano, Jehova naJesus ohaye tu ambidhidha miilonga mbika yokuninga aantu aalongwa. (1 Kor. 3:9; 2 Kor. 2:17) Ano iilonga mbyoka otatu vulu oku yi gwanitha po. Okugwanitha po oshinakugwanithwa shika nosho wo okukwathela yalwe ye shi ninge, kashi li tuu uuthembahenda uunene! — Lesha Aafilippi 4:13.
EIMBILO 79 Ya kwathela ya kale ya kola
^ okat. 5 Jesus okwa lombwela aalanduli ye, ya ninge aantu aalongwa noku ya longa ya dhiginine ayihe mbyoka e ya lombwele. Oshitopolwa shika otashi ka kundathana kombinga yankene tatu vulu okuvulika komalombwelo gaJesus. Uuyelele wamo wulwe owa kankamena koshitopolwa shoka tashi adhika mOshungolangelo ye 1 Juli 2004, epandja 15-18.
^ okat. 66 OMATHANO pepandja 4: Omumwameme ta kwatele komeho ekonakonombiimbeli nota yelithile omukonakoni gwe oonkatu ndhoka e na okukatuka, opo a kale e hole Kalunga shi vulithe nale. Lwanima, omukonakoni okwa ka tula miilonga omaetopo ngoka a pewa komumwameme ngoka ha konakona naye.
