1. Omapulo geni tashi vulika tu ipule?

MBELA omathimbo gamwe oho kala to ipula unene niiningwanima mbyoka tayi ka ningwa monakuyiwa, ngaashi okuhanagulwa po kwomalongelokalunga giifundja, eponokelo lyaGog yaMagog nosho wo kombinga yiita yaArmagedon? Mbela oho ipula mwene to ti: ‘Otandi ka tsikila ngaa okukala omudhiginini sho iiningwanima mbyoka iitilithi tayi ningwa?’ Ngele owi ipulile nale ngawo, okukundathana kombinga yoohapu dhaJesus ndhoka dhi li enyolo lyenenedhiladhilo lyoshitopolwa shika otaku vulu oku ku kwathela. Jesus okwa li a lombwele aalongwa ye a ti: “Oomwenyo dheni inadhi kala dha ziyalala. Itaaleni.” (Joh. 14:1) Eitaalo lya kola otali vulu oku tu kwathela tu taalele onakuyiwa tu na omukumo.

2. Ongiini tatu vulu okukoleka eitaalo lyetu, noshike tatu ka kundathana moshitopolwa shika?

² Okutala kunkene hatu ungaunga noonkalo ndhoka hadhi yeleke eitaalo lyoye kunena, otaku vulu oku tu kwathela tu mone shoka tu na okuninga, opo tu koleke eitaalo lyetu. Shoka otashi ke tu kwathela wo tu idhidhimikile omamakelo ngoka tatu ka taalela monakuyiwa. Moshitopolwa shika, otatu ka tala koonkalo mbali moka aalongwa yaJesus ya li yi iyadha mudho ndhoka dha li dhu ulike kutya oya pumbwa eitaalo lya kola. Opo nduno otatu ka kundathana kombinga yankene tatu vulu okwiidhidhimikila oonkalo dha fa ndhoka, nankene okupita mudho taku vulu oku tu longekidha tu ki idhidhimikile oonkalo oondhigu monakuyiwa.

3. Oohapu dhaJesus ndhoka dhi li muMateus 6:30, 33 otadhi tu kwathele tu uve ko shike?

³ Oshi li paunshitwe kungoka e li omutse gwuukwanegumbo a kale a hala okushilipaleka kutya uukwanegumbo we owu na iikulya, iizalomwa nosho wo ehala lyokukala. Shoka ihashi kala aluhe oshipu okuninga momathimbo ngaka omadhigu. Poompito dhimwe, ooitaali ooyakwetu oya kanitha iilonga yawo, noinaya vula okumona  po yilwe. Yalwe ohaya tindi okutaamba ko iilonga mbyoka inaayi opalela Aakriste. Moonkalo adhihe ndhoka, otwa pumbwa eitaalo lya kola kutya Jehova ota ka shilipaleka aluhe kutya otu na ashihe shoka twa pumbwa. Jesus okwa li a yelithile aalongwa ye oshinima shoka mEuvitho lye lyokondundu. (Lesha Mateus 6:30, 33.) Ngele otwa kala twa tompwa thiluthilu kutya Jehova ke na siku e tu ekelehi, otatu ka vula okugandja eitulomo kiinima mbyoka ya simana, ano okupititha komeho Uukwaniilwa. Sho tu wete nkene Jehova te tu kwathele naashoka twa pumbwa, otatu ka hedha popepyeelela naye, shoka tashi ka koleka wo eitaalo lyetu.

4-5. Oshike sha kwathele uukwanegumbo wumwe sho wa li wu li mompumbwe?

⁴ Ndhindhilika nkene uukwanegumbo wumwe womoVenezuela wa li wa kwathelwa kuJehova sho wa kala tawu ipula naashoka wa pumbwa. Petameko uukwanegumbo womumwatate Castro owa kala hawu hupu mokulonga epya lyawo. Opo nduno ongundu yaalumentu ya homata oya kwata ko epya negumbo lyawo, shoka she ya ningitha ye yi thige po. Omumwatate Miguel Castro, okwa ti: “Ngashingeyi ohatu hupu owala mokulonga okapya okashona hoka hatu futile. Esiku kehe ohandi galikana Jehova e tu kwathele tu mone shoka twa pumbwa.” Nonando onkalamwenyo ondhigu kuukwanegumbo womumwatate Castro, molwaashoka owu na einekelo lya kola kutya Jehova ote ke wu sila oshimpwiyu, ohawu kala aluhe pokugongala nohawu kutha wo ombinga miilonga yokuuvitha. Molwaashoka uukwanegumbo mboka owa pititha komeho Uukwaniilwa, Jehova ohe wu sile oshimpwiyu.

⁵ Sho ya kala ya taalela onkalo ndjoka ondhigu, Miguel nomukulukadhi gwe, Yurai, oya kala taya gandja eitulomo kunkene Jehova a kala te ya sile oshimpwiyu. Poompito dhimwe, Jehova okwa li a longitha aamwatate naamwameme ye ya kwathela naashoka ya pumbwa nosho wo okukongela omumwatate Miguel iilonga. Poompito dhilwe, Jehova okwa kala te ya kwathele okupitila momakwatho ngoka haga gandjwa kiitayimbelewa. Jehova ka li nando e ya ekelehi. Shoka osha koleka eitaalo lyuukwanegumbo wawo. Konima sho omwanakadhona gwawo gwosheeli, Yoselin, a hokolola kombinga yomukalo gumwe moka Jehova e ya kwathela, okwa ti: “Omukalo moka Jehova a kala te tu kwathele ogwa guma ndje lela. Onde mu tala ko e li kuume kandje ngoka e lile ndje po onkalamwenyo yandje ayihe.” Okwa gwedha ko wo a ti: “Omamakelo ngoka twa pita mugo tu li uukwanegumbo oge tu longekidhila okutaalela omayeleko ngoka omadhigu noonkondo monakuyiwa.”

6. Ongiini to vulu okukoleka eitaalo lyoye ngele uuhupilo woye otawu nyangwanyangwa?

⁶ Mbela owu na uuhupilo tawu nyangwanyangwa? Ngele osho, kapu na omalimbililo kutya oto ungaunga nonkalo ondhigu. Nonando owu li monkalo ndjoka ondhigu, oto vulu okulongitha ethimbo ndyoka wu koleke eitaalo lyoye. Galikana kuJehova e to kala wo ho lesha oohapu dhaJesus ndhoka dhi li muMateus 6:25-34 nokutedhatedha kudho. Dhiladhila kiimoniwa yokunena mbyoka tayi koleke kutya Jehova oha sile oshimpwiyu mboka haya kala yi ipyakidhila niilonga ye. (1 Kor. 15:58) Okuninga ngawo otaku ke ku kwathela wu kale wu na omukumo kutya,  ngaashi owala Tate gwoye gwomegulu a sile oshimpwiyu yalwe mboka ya li monkalo ya fa yoye, nangoye ote ke ku sila wo oshimpwiyu. Oku shi shoka wa pumbwa noku shi nkene te ke shi ku pa. Uuna wa mono nkene Jehova te ku kwathele, eitaalo lyoye otali ka kola notali ke ku kwathela wi idhidhimikile omamakelo omanene monakuyiwa. — Hab. 3:17, 18.

7. Shi ikolelela kuMateus 8:23-26, eitaalo lyaalongwa yaJesus olya li lya makelwa ngiini ‘koshikungulu oshidhigu’?

⁷ Sho Jesus naalongwa ye yi iyadha moshikungulu mefuta, Jesus okwa longitha ompito ndjoka e ya kwathele ya mone kutya oya pumbwa okukoleka eitaalo lyawo. (Lesha Mateus 8:23-26.) Oshikungulu shoka osha li oshidhigu noonkondo, naasho omakuthikuthi ga kala taga umbile omeya mombautu yawo, Jesus okwa li owala a kotha nombili. Sho aalongwa ye ye mu pendula e taye mu lombwele e ya hupithe, Jesus okwe ya pula a ti: “Ooitaali ne aankundi, omolwashike mwa tila?” Aalongwa mboka oya li ye na okukala ye shi kutya Jehova ota vulu okugamena Jesus nosho wo mboka ye li naye. Mbela shoka otashi tu longo shike? Eitaalo lya kola otali vulu oku tu kwathela tu idhidhimikile kehe “oshikungulu oshidhigu” kutya nduno osholela nenge oshopathaneko.

8-9. Eitaalo lyaAnel olya li lya makelwa ngiini, noshike she mu kwathele?

⁸ Ndhindhilika nkene eitaalo lyomumwameme inaa hokanwa gwedhina Anel, ngoka ha zi moPuerto Rico, lya li lya kolekwa sho i idhidhimikile emakelo lyontumba. Emakelo ndyoka a li a taalele olya li “oshikungulu” sho shene. Emakelo ndyoka olya tameke mo 2017, sho oshikungulu shedhina Maria sha hanagula po egumbo lyomumwameme Anel. Okwa kanitha wo iilonga ye, omolwoshikungulu shoka. Anel okwa zimine a ti: “Sho nda li monkalo ndjoka onda li handi kala ndi na omaipulo ogendji, ihe ondi ilongo okukala ndi inekela muJehova okupitila megalikano nokuyanda okweetha omaipulo ngoka ga ningithe ndje kaandi ninge shoka nda pumbwa okuninga.”

⁹ Anel okwa popi wo oshinima shilwe shoka she mu kwathele u ungaunge nemakelo ndyoka a li mulyo, ano okuvulika. Okwa ti: “Okuvulika komalombwelo gehangano okwa kwathela ndje ndi kale nda ngungumana. Onda mono nkene Jehova a kala ta kwathele ndje okupitila metsomukumo ndyoka nda kala tandi pewa nosho wo okupitila momakwatho ngoka nda pewa kooitaali ooyakwetu.” Okwa gwedha ko wo a ti: “Jehova okwa kwathele ndje momikalo moka kaanda li nda tegelela, naashoka osha koleke eitaalo lyandje.”

10. Oshike to vulu okuninga ngele owa taalela uupyakadhi wontumba?

¹⁰ Mbela owa taalela “oshikungulu oshidhigu”? Otashi vulika wu li monkalo ondhigu molwaashoka wa dhengwa koshiponga shopaunshitwe. Nenge tashi vulika to kondjo nuuvu mboka we ku ningitha wu kale wa teka omukumo. Omathimbo gamwe otashi vulika wu kale to ipula unene, ihe ino etha shoka shi ku ningithe wu ethe po okukala wi inekela muJehova. Hedha popepi naye okupitila  mokugalikana tashi zi komutima. Koleka wo eitaalo lyoye mokutedhatedha kunkene Jehova e ku kwathela monakuziwa. (Eps. 77:11, 12) Oto vulu okukala nuushili kutya ke na esiku e ku ekelehi.

11. Omolwashike tu na okukala hatu vulika kwaamboka taya kwatele komeho?

¹¹ Oshike ishewe tashi vulu oku ku kwathela wi idhidhimikile omamakelo? Ngaashi sha popiwa kuAnel, okuvulika. Ilonga okukala wi inekela mboka Jehova naJesus yi inekela. Omathimbo gamwe, omalombwelo gaamboka taya kwatele komeho otashi vulika ga kale taga monika ga fa inaaga dhiladhilwa nawa. Nonando ongawo, Jehova oha yambeke mboka haya vulika. Oohapu dhaKalunga nosho wo iimoniwa yooitaali aadhiginini ohayi tu ulukile kutya okuvulika ohaku hupitha oomwenyo. (Eks. 14:1-4; 2 Ondjal. 20:17) Tedhatedha kiiholelwa mbyoka. Oku shi ninga otaku ke ku kwathela wu kale ho vulika komalombwelo okuza kehangano ngashingeyi nosho wo monakuyiwa. (Heb. 13:17) Kungawo ito ka kala we wa tila okutaalela uudhigu uunene mboka tatu ka taalela masiku. — Omayel. 3:25.

12. Lukas 18:1-8 okwa faathanitha ngiini okukala wu na eitaalo nokwiidhidhimikila okuningilwa okwaanuuyuuki?

¹² Jesus okwa li e shi kutya okuningilwa okwaanuuyuuki otaku ka yeleka eitaalo lyaalongwa ye. Opo e ya kwathele ye wu idhidhimikile, okwe ya pe eyele ndyoka li li membo lyaLukas. Jesus okwa li e ya hokololele ehokololo kombinga yomuselekadhi ngoka a kala ta pula lwiikando omutokoli ngoka ihaa tila Kalunga, u ungaunge pauyuuki nuupyakadhi mboka a li e na. Omuselekadhi ngoka okwa li a tompwa kutya ngele okwa kala ta pula omutokoli ngoka e mu ningile shoka ta pula, mokweendela ko kwethimbo ote ke shi ninga. Lwanima, omutokoli ngoka okwe mu ningile shoka a kala ta pula. Shoka otashi tu longo shike? Jehova ke shi omukeenuuyuuki. Nomolwaashono Jesus a li a popi a ti: “Ano Kalunga itu uthile ando aahogololwa mboka haye mu ithana omutenya nuusiku?” (Lesha Lukas 18:1-8.) Okwa gwedha ko wo a ti: ‘Ihe Omuna gwOmuntu uuna te ke ya, ota ka adha ko tuu eitaalo lya fa ndyoka kombanda yevi?’ Uuna tatu ningilwa okwaanuuyuuki, otwa pumbwa oku shi ulika okupitila meidhidhimiko kutya otu na eitaalo lya kola ngaashi lyomuselekadhi ngoka. Ngele otwe shi ningi, otatu vulu okukala nuushili kutya masiku Jehova ote ku ukitha iinima. Otwa pumbwa wo okukala twa tompwa thiluthilu kutya egalikano ohali vulu okutompola sha. Omathimbo gamwe Jehova oha vulu okuyamukula omagalikano getu momikalo moka kaatwa li twa tegelela.

13. Egalikano olya kwathele ngiini uukwanegumbo wumwe mboka wa li wa ungaungiwa nawo kaashi li pauyuuki?

¹³ Natu taleni koshimoniwa shomumwameme gwedhina Vero, ngoka ha zi moOrepablika yoPaudemokoli yaKongo. Vero, omusamane gwe ngoka kee shi Onzapo nosho wo okamwanakadhona kawo ke na omimvo 15 oya li ya fadhuka po sho omukunda gwawo gwa ponokelwa kongundu yaakwiita. Sho ya thiki poboloka yontumba oya kwatwa po noya tilithwa kaakwiita kutya otaye ya dhipaga. Sho Vero a tameke okulila,  okamwanakadhona oka kambadhala oku mu hekeleka mokugalikana muule taka tumbula edhina lyaJehova lwiikando. Sho ka mana okugalikana, ondjayi yongundu yaakwiita oye ka pula ya ti: “Omukadhona ngoye, olye e ku longo okugalikana?” Oka yamukula ka ti: “Meme oye a longo ndje, a longitha oshiholelwa shegalikano shoka shi li muMateus 6:9-13.” Ondjayi oya ti kuko: “Inda pamwe naavali yoye nombili, na Jehova Kalunga koye ne mu gamene.”

14. Oshike tashi vulika shi makele eitaalo lyetu, noshike tashi vulu oku tu kwathela tu idhidhimike?

¹⁴ Iimoniwa ya fa mbyoka otayi tu longo kutya katu na okukala twa dhina shoka egalikano tali vulu okuninga. Ihe ongiini ngele omagalikano goye inaga yamukulwa mbala nenge momukalo moka wa li wa tegelela? Ngaashi omuselekadhi gwomeyele lyaJesus, tsikila okugalikana, wu na einekelo kutya Jehova ite ke ku idhimbika nosho wo kutya ote ke ku yamukula pethimbo tali opalele. Tsikila wo okupula Jehova ombepo ye ondjapuki. (Fil. 4:13) Dhimbulukwa kutya masiku Jehova ote ke ku laleka nuuyamba, e to dhimbwa uuwinayi awuhe mboka wa ningilwa monakuziwa. Sho to idhidhimikile omamakelo kekwatho lyaJehova, eitaalo lyoye otali ka kola noto ka vula okwiidhidhimikila omamakelo ngoka to ki iyadha mugo monakuyiwa. — 1 Pet. 1:6, 7.

15. Ngaashi sha popiwa muMateus 17:19, 20, uupyakadhi wuni aalongwa yaJesus ya li ya taalele?

¹⁵ Jesus okwa li a longo aalongwa ye kutya eitaalo otali ke ya kwathela ya sinde omaupyakadhi. (Lesha Mateus 17:19, 20.) Oshikando shimwe oya li ya nyengwa okutidha mo ompwidhuli momumati gumwe, nonando poompito dhilwe oya li ya vulu oku shi ninga. Mbela uupyakadhi owa li peni? Jesus okwe ya yelithile kutya oya pumbwa eitaalo lya kola. Okwe ya lombwele kutya ngele oya kala ye na eitaalo lya kola otaya ka vula okusinda omaupyakadhi omanene ga fa oondundu. Kunena, natse otashi vulika tu taalele omaupyakadhi omanene ga fa oondundu.

16. Eitaalo olya li lya kwathele ngiini Geydi u ungaunge nonkalo ondhigu?

¹⁶ Natu taleni koshiholelwa shomumwameme Geydi, ngoka ha zi moGuatemala. Omusamane gwe, Edi, okwa dhipagwa sho ya li taya zi kokugongala. Eitaalo lyaGeydi olye mu kwathele ngiini u ungaunge nonkalo ndjoka? Okwa ti: “Okugalikana okwa kwathele ndje ndi tsike Jehova omutengi gwandje, shoka sha kwathele ndje ndi kale ndi uvite ombili. Ohandi kala ndi wete nkene Jehova ta kwathele ndje okupitila maantu yaandjetu nosho mookuume kandje megongalo. Okukala ndi ipyakidhila miilonga yaJehova ohaku kwathele ndje kaandi kale ndi uvite unene oluhodhi nokaandi kale tandi ipula unene. Sho nda piti monkalo ndjika, ondi ilongo kutya, kutya nduno ondi ki iyadhe muupyakadhi wu thike peni monakuyiwa, kekwatho lyaJehova, Jesus nosho wo ooitaali ooyakwetu, otandi vulu oku wu idhidhimikila.”

17. Oshike tatu vulu okuninga uuna twa taalela onkalo ondhigu?

¹⁷ Mbela owa silwa gumwe ngoka wu hole? Itulila po ethimbo wu koleke eitaalo lyoye metegameno lyeyumuko, mokulesha omahokololo gOmbiimbeli kombinga yaamboka ya li ya yumudhwa. Mbela owu uvite nayi sho gumwe ngoka wu hole  a kondwa? Konakona Ombiimbeli, opo wu kale wa tompwa kutya egeeloputudho lyaJehova ohali kala aluhe pahole. Kutya nduno owa taalela uupyakadhi wuni, longitha ompito ndjoka wu koleke eitaalo lyoye. Mbumbulila Jehova omutima gwoye. Ino iteta ko kooitaali ooyakweni, ihe kala popepi nayo. (Omayel. 18:1) Kala ho kutha ombinga miilonga mbyoka tayi vulu oku ku kwathela wu idhidhimike, nonando natango owa sa eyeme. (Eps. 126:5, 6) Tsikila okukala pomakugongala, okuya muukalele nosho wo okulesha Ombiimbeli pandjigilile. Kala wo ho gandja eitulomo komauvaneko gaJehova gomonakuyiwa. Sho wu wete nkene Jehova te ku kwathele, eitaalo lyoye muye otali ka kala lya kola shi vulithe nale.

18. Oshike to vulu okuninga, ngele owa mono kutya owa pumbwa okukoleka eitaalo lyoye?

¹⁸ Ino kala wa teka omukumo, ngele omamakelo ngoka wa pita mugo oga ulika kutya eitaalo lyoye inali kola. Kala wa tokola toko wu koleke eitaalo lyoye ngashingeyi. Ninga ngaashi aayapostoli yaJesus ya li ya ningi, sho ya li ya pula ya ti: “Tu gwedhela eitaalo.” (Luk. 17:5) Shimwe ishewe, tedhatedha kiiholelwa mbyoka twa kundathana moshitopolwa shika. Ngaashi Miguel naYurai, kala ho dhimbulukwa nkene Jehova e ku kwathela monakuziwa. Ngaashi omwanakadhona gwaVero naAnel, kala ho galikana kuJehova wa mana mo, unene tuu uuna wu li monkalo ondhigu. Nongaashi Geydi, kala wu shi kutya Jehova oha vulu oku tu kwathela okupitila maanegumbo lyetu nosho wo mookuume ketu. Ngele owe etha Jehova e ku kwathele wu idhidhimikile omaupyakadhi ngashingeyi, oto ka kala wu na omukumo kutya ote ke ku kwathela wo wu idhidhimikile omaupyakadhi ngoka to ki iyadha mugo monakuyiwa.

19. Uushili wuni Jesus a li e na, nuushili wuni to vulu okukala wu na?

¹⁹ Jesus okwa li a ndhindhilike kutya aalongwa ye kaya li ye na eitaalo lya kola miinima yimwe, ihe okwa li e na uushili kutya kekwatho lyaJehova, otaya ka vula okusinda omamakelo gomonakuyiwa. (Joh. 14:1; 16:33) Okwa li wo e na uushili kutya ongundu onene yaantu otayi ka pita mo muudhigu uunene omolweitaalo lyawo lya kola. (Eh. 7:9, 14) Mbela oto ka kala ngaa gumwe gwomuyo? Kekwatho lyaJehova, oto vulu oku ka kala gumwe gwomuyo, ngele owa kala ho longitha ompito ndjoka wu na ngashingeyi wu koleke eitaalo lyoye. — Heb. 10:39.