1-2. (a) Omolwashike mboka opo ya yi mondjokana ye na okwiinekela muJehova? (Episalomi 37:3, 4) (b) Oshike tatu ka kundathana moshitopolwa shika?

MBELA owu li pokuya mondjokana, nenge opo wa yi mo? Ngele osho, kapu na omalimbililo kutya owa halelela okunyanyukilwa onkalamwenyo pamwe nomuholike gwoye ngoka wu hole noonkondo. Odhoshili kutya mondjokana ohamu vulu okuholoka omaupyakadhi, nopu na wo omatokolo ga simana ngoka mu na okuninga. Omatokolo ngoka tamu ningi otaga ka guma enyanyu lyeni mondjokana yeni ethimbo ele. Ngele omwa kala mwi ikolelela muJehova, otamu ka ninga omatokolo ge li pandunge, ondjokana yeni otayi ka kala ya kola, notamu ka kala mwa nyanyukwa. Ngele omwa ndopa okutula miilonga omayele gaJehova, otashi vulika mu ka taalele omaupyakadhi, shoka tashi ka nkundipaleka ondjokana yeni notashi ka yona po enyanyu lyeni. — Lesha Episalomi 37: 3, 4.

² Nonando oshitopolwa shika osha nuninwa aaihokani mboka opo ya yi mondjokana, otashi ka kundathana omashongo ngoka aaihokani ayehe tashi vulika ya taalele. Otashi ka kundathana wo shoka tatu vulu okwiilonga kiiholelwa yaapiya yaJehova yopethimbo lyOmbiimbeli. Iiholelwa yawo otayi tu longo iiyilongomwa ya simana mbyoka tatu vulu okutula miilonga monkalamwenyo yetu nosho wo mondjokana. Otatu ka tala wo kwaashoka tatu vulu okwiilonga kiimoniwa yooitaali yamwe yopethimbo lyetu.

3-4. Omashongo geni mboka opo ya yi mondjokana tashi vulika ya taalele?

³ Aantu yamwe otashi vulika ya ladhipike mboka opo ya yi mondjokana ya kale nonkalamwenyo ya fa yaantu ayehe. Pashiholelwa, aavali yawo nosho wo aakwanezimo otashi vulika ye ya thininike ya mone aanona nziya ngaashi tashi vulika. Nenge tashi vulika ookuume kawo nosho wo aakwanezimo ye ya ladhipike ya lande egumbo noku li landela iinima oyindji, li kale tali monika nawa.

⁴ Ngele aaihokani inaya kotoka, otashi vulika ya ninge omatokolo kaage li pandunge, e taye iyadha ye na oongunga odhindji noonkondo. Opo nduno, ayehe yaali otashi vulika ya kale taya longo oowili odhindji kiilonga opo ya fute oongunga ndhoka. Shoka otashi vulika shi ya ningithe kaaya kale we ye na ethimbo lya gwana ya konakone Ombiimbeli paumwene, ya ninge elongelokalunga lyuukwanegumbo nosho wo ya kuthe ombinga muukalele. Otashi vulika wo ya tameke okufaula omakugongala sho haya longo olutayima opo ya mone oshimaliwa oshindji noya kaleke po iilonga yawo. Shono otashi ke ya ningitha ya pitililwe po koompito dhokutamununa mo uukalele wawo ya longele Jehova noya kale ya nyanyukwa.

5. Oshike to ilongo koshiholelwa shaKlaus naMarisa?

⁵ Iiholelwa oyindji oye shi ulika kutya okulalakanena omaliko ihaku etele aantu enyanyu. Ndhindhilika shoka sha li sha ningilwa aaihokani yaali, Klaus naMarisa. * Konima sho ya hokana, ayehe oya tameke okulonga, opo ya kale ye na omaliko niimaliwa oyindji. Nonando ongawo, kaya li ya nyanyukwa shili. Klaus okwe shi zimine a ti: “Otwa li tu na ashihe shoka twa pumbwa, ihe katwa li twi itulila po omalalakano gasha miilonga yaJehova. Paushili, onkalamwenyo yetu oya li ya kitakana notwa li hatu kala twa gwililwa po.” Nangoye otashi vulika wa mona kutya okulalakanena omaliko inaku ku etela enyanyu lyasha. Ngele osho, ino teka omukumo. Okukonakona iiholelwa iiwanawa yayalwe otaku vulu oku ku kwathela. Tango, natu ka taleni kwaashoka aasamane taya vulu okwiilonga koshiholelwa shomukwaniilwa Jehosafat.

6. Metsokumwe nomayele ngoka taga adhika mOmayeletumbulo 3:5, 6, omukwaniilwa Jehosafat okwa li u ungaunga ngiini nonkalo yimwe ondhigu?

⁶ Aasamane, mbela omathimbo gamwe ohamu kala mu uvite mwa gwililwa po kiinakugwanithwa yeni? Ngele osho, oshiholelwa shomukwaniilwa Jehosafat otashi vulu oku mu kwathela. E li omukwaniilwa, Jehosafat okwa li e na okugamena oshigwana ashihe. Oshinakugwanithwa shoka oshinene okwa li e shi gwanitha po ngiini? Jehosafat okwa li a ningi ngaashi ta vulu e shi gamene. Okwa li a tungu omapopilongulu miilando yomoshitopolwa shaJudea nokwi igongelele etangakwiita li na aakwiita 1 160 000. (2 Ondjal. 17:12-19) Lwanima, Jehosafat okwe ki iyadha a taalela onkalo ondhigu. Omatangakwiita gAayammoni nAamoabi pamwe noshipambu shimwe shAameuni, oga ponokele Juda. (2 Ondjal. 20:1, 2) Mbela Jehosafat okwa li ta ka ninga po shike?  Okwa pula Jehova ekwatho. Shoka a ningi oshi li metsokumwe nomayele ngoka taga adhika mOmayeletumbulo 3:5, 6. (Lesha.) Egalikano lyaJehosafat kuJehova ndyoka tali adhika 2 mOndjalulo 20:5-12, otali ulike nkene a li i inekela thiluthilu muHe gwomegulu omunahole. Jehova okwa li a yamukula ngiini egalikano lyaJehosafat?

7. Jehova okwa li a yamukula ngiini egalikano lyaJehosafat?

⁷ Jehova okwa li a popi naJehosafat okupitila mOmulevi gwedhina Jahasiel. Jehova okwa li e mu lombwele a ti: “Thikameni owala mwa tegelela: Otamu ka tala, nkene Omuwa te mu pe esindano.” (2 Ondjal. 20:13-17) Ngoka hago omukalo aantu ya li haya kondjo molugodhi. Nonando ongawo, omalombwelo ngoka kaga li ga za komuntu, ihe okuJehova. Jehosafat okwa li i inekela Kalunga ke nokwa ningi ngaashi e mu lombwele. Sho ye naantu ye ya yi ya ka tsakaneke aatondi yawo, Jehosafat okwa lombwele aaimbi inaaya homata oyo ya kwatele komeho etangakwiita, ihe haakwiita mboka ye na owino mokukondja. Jehova okwa li a gwanitha po euvaneko lye kuJehosafat, nokwa sindi aatondi mboka. — 2 Ondjal. 20:18-23.

8. Oshike shoka aasamane taya vulu okwiilonga koshiholelwa shaJehosafat?

⁸ Aasamane, otamu vulu okwiilonga sha koshiholelwa shaJehosafat. Omu na oshinakugwanithwa shokugamena aanegumbo lyeni, onkene omu na okulonga nuudhiginini mu ya ambidhidhe noku ya gamena. Uuna pwa holoka uupyakadhi, otashi vulika wu dhiladhile kutya oto vulu oku wu kandula po ngoye mwene. Ihe yanda okwiinekela moonkondo dhoye mwene. Pehala lyaashono, kala ho galikana Jehova e ku kwathele. Shimwe ishewe, kala ho galikana nomutima aguhe pandjigilile pamwe nomukulukadhi gwoye. Kala ho kongo ewiliko lyaJehova, mokukala ho konakona Ombiimbeli nosho wo iileshomwa mbyoka ya nyanyangidhwa kehangano lyaJehova, e to tula miilonga omayele ngoka wa mona mo. Yalwe otashi vulika kaaya tse kumwe netokolo ndyoka wa ninga sho wa tula miilonga omayele ngoka, notashi vulika wo ye ku lombwele kutya etokolo ndyoka wa ninga olya nika uusama. Otashi vulika ye ku lombwele kutya iimaliwa nosho wo shoka hayi vulu okulanda otayi vulu okugamena aanegumbo lyoye. Ihe kaleka momadhiladhilo oshiholelwa shaJehosafat. Okwa li i inekela Jehova nokwa li he shi ulike miilonga ye. Jehova ka li e ekelehi omulumentu ngoka omudhiginini, noite ke ku ekelahi wo. (Eps. 37:28; Heb. 13:5) Oshike shoka aaihokani taya vulu okuninga, opo ya kale ye na onkalamwenyo tayi ti sha?

9. Omuhunganeki Jesaja nomukulukadhi gwe oya tulila po aaihokani oshiholelwa shini?

⁹ Omuhunganeki Jesaja nomukulukadhi gwe oya li ya pititha komeho okulongela Jehova. Jesaja okwa li omuhunganeki, notashi vulika omukulukadhi gwe naye a li ha hunganeke, oshoka okwa li hi ithanwa ‘omuprofeti omukiintu.’ (OB-1954) (Jes. 8:1-4) Ye li aaihokani, Jesaja nomukadhi oya li ya pititha komeho okulongela Jehova. Oye li oshiholelwa oshiwanawa kaaihokani kunena!

10. Okukonakona omahunganeko gomoMbiimbeli otaku vulu ngiini okukwathela aaihokani ya kale ya tokola toko ya ninge ashihe shoka taya vulu miilonga yaJehova?

¹⁰ Aaihokani kunena otaya vulu okupititha komeho okulongela Jehova, mokuninga ashihe shoka taya vulu miilonga ye. Otaya vulu okukoleka einekelo lyawo muJehova, mokukonakona pamwe omahunganeko gomoMbiimbeli nokumona nkene aluhe haga gwanithwa. * (Tit. 1:2) Otaya vulu wo okwiipula kombinga yonkandangala  ndjoka taya vulu okudhana mokugwanithwa po kwomahunganeko gamwe gomoMbiimbeli. Pashiholelwa, otaya vulu okudhana onkandangala mokugwanithwa po kwehunganeko lyaJesus kombinga yonkundana ombwanawa ndjoka yi na okuuvithilwa iigwana ayihe manga ehulilo inaali ya. (Mat. 24:14) Ngele aaihokani oya kala ya tompwa kutya omahunganeko gomoMbiimbeli otaga gwanithwa, otaya ka kala ya tokola toko ya ninge ashihe shoka taya vulu miilonga yaJehova.

11. Oshike shoka Akula naPriskila ya li ya vulu okuninga, nomolwashike?

¹¹ Aaihokani aagundjuka otaya vulu okwiilonga sha koshiholelwa shaAkula naPriskila, mboka ya li Aajuda nohaya zi muRoma. Konima sho yu uvu onkundana ombwanawa kombinga yaJesus, oya ningi Aakriste. Kapu na omalimbililo kutya oya li ye na ashihe shoka ya pumbwa. Nonando ongawo, onkalamwenyo yawo oya lunduluka sho Omupangeli Klaudius a gandja elombwelo Aajuda ayehe ya ze mo muRoma. Dhiladhila owala kwaashihe shoka Akula naPriskila ya li ye na oku ka ninga. Oya li ye na okwiigilila okukala haya zi mehala epe, okukonga egumbo epe, nokutamekulula ishewe ongeshefa yawo mehala epe. Mbela shoka osha li she ya ningitha kaaya kale we ya pititha komeho okulongela Jehova? Otashi vulika eyamukulo kepulo ndyoka wu li shi. Sho ya kala haya zi muKorinto, Akula naPriskila oya kala haya endathana negongalo lyomoshilando shoka noya kala haya longo pamwe nomuyapostoli Paulus ya tse omukumo ooitaali yomegongalo ndyoka. Lwanima, oya tembukile komikunda dhilwe hoka kwa li ku na ompumbwe onene yaauvithi. (Iil. 18:18-21; Rom. 16:3-5) Oya li lela ye na onkalamwenyo tayi ti sha, noya li haye yi tyapula.

12. Omolwashike aaihokani ye na okwiitulila po omalalakano miilonga yaJehova?

¹² Aaihokani yokunena otaya vulu okuholela Akula naPriskila, mokukala haya pititha komeho Uukwaniilwa. Ethimbo ewanawa lyokupopya kombinga yomalalakano gawo, oosho taye endelathana. Ngele aaihokani oya kala haya ningi omatokolo pamwe nohaya longo nuudhiginini ya adhe omalalakano gawo miilonga yaJehova, otaya ka mona nkene ombepo ondjapuki yaJehova tayi ya kwathele monkalamwenyo yawo. (Omuuv. 4:9, 12) Natu taleni koshimoniwa shaRussell naElizabeth. Omumwatate Russell okwa  ti: “Sho twa li tatu endelathana, olundji otwa kala hatu kundathana kombinga yomalalakano getu miilonga yaJehova.” Elizabeth okwa gwedha ko a ti: “Shoka otwa li hatu shi ningi, opo uuna tu na okuninga etokolo lyontumba, kaatu ethe li ye omalalakano getu moshipala.” Russell naElizabeth oya li ya vulu okutembukila koMicronesia, oshoka okwa li ku na ompumbwe onene yaauvithi.

13. Shi ikolelela kEpisalomi 28:7, oshizemo otashi ka kala shini ngele otwa kala twi inekela Jehova?

¹³ Ngaashi Russell naElizabeth, aaihokani oyendji oya ninga etokolo ya kaleke oonkalamwenyo dhawo paunathangwa, opo ya kale ye na ethimbo lya gwana ya longe oshindji miilonga yokuuvitha noyokulonga aantu. Ngele aaihokani oyi itulile po omalalakano miilonga yaJehova nokulonga nuudhiginini ye ga adhe, otashi ke ya etela uuwanawa. Otaya ka mona nkene Jehova te ya kwathele, einekelo lyawo muye otali ka kola, notaya kala ya nyanyukwa shili. — Lesha Episalomi 28:7.

14. Omuyapostoli Petrus nomukadhi oya li yu ulike ngiini kutya oyi inekela meuvaneko ndyoka tali adhika muMateus 6:25, 31-34?

¹⁴ Aaihokani otaya vulu wo okwiilonga sha koshiholelwa shomuyapostoli Petrus nomukulukadhi gwe. Konima yoomwedhi hamano sho opo a tsakanene naJesus oshikando shotango, okwa li e na okuninga etokolo lya simana. Petrus okwa li omuyuli gwoohi. Onkene sho Jesus e mu hiya e mu landule, okwa li e na okwiipula muule kombinga yankene ta ka sila oshimpwiyu uukwanegumbo we. (Luk. 5:1-11) Petrus okwa hogolola okulandula Jesus nokuuvitha pamwe naye. Okwa ningi etokolo li li pandunge! Nokapu na omalimbililo kutya omukulukadhi gwe okwa li a tsu kumwe netokolo lye. Ombiimbeli oya popya kutya konima sho Jesus a yumuka, omukulukadhi gwaPetrus okwa kala he ende pamwe naPetrus uule wethimbo lyontumba. (1 Kor. 9:5) Molwaashoka okwa li omukiintu Omukriste e li nawa, Petrus okwa li a vulu okugandja omayele ga nwethwa mo kaaihokani a manguluka. (1 Pet. 3:1-7) Kapu na omalimbililo kutya Petrus nomukadhi oya li ye na einekelo meuvaneko lyaJehova kutya ngele oya kala ya pititha Uukwaniilwa komeho ote ke ya sila oshimpwiyu. — Lesha Mateus 6:25, 31-34.

15. Oshike to ilongo koshimoniwa shaTiago naEsther?

¹⁵ Ngele ngashingeyi mondjokana owa ninga mo omimvo dhontumba, ongiini to vulu okukala wu na ehalo lyokutamununa mo uukalele woye? Omukalo gumwe to vulu oku shi ninga, omokwiilonga kombinga yiimoniwa yayalwe. Pashiholelwa, oto vulu okulesha iitopolwa “Oyi igandja nehalo ewanawa.” Iitopolwa mbyoka oya kwathele Tiago naEsther, mboka ye li aaihokani yokoBrazil, ya kale ya halelela oku ka uvithila hoka ku na ompumbwe onene. Tiago okwa ti: “Sho twa kala tatu lesha kombinga yankene Jehova a kala nokukwathela nokusila oshimpwiyu ooitaali yopethimbo lyetu, oshe tu ningitha natse tu kale twa hala e shi tu ningile.” Mokweendela ko kwethimbo oya tembukile koParaguay, hoka ya kala taya longele okuza 2014. Esther okwa ti: “Enyolo limwe ndyoka atuhe tu hole noonkondo, Aaefeso 3:20. Olundji otwa kala nokugwanithilwa po oohapu ndhoka miilonga yaJehova.” Montumwafo ye ndjoka a nyolele Aaefeso, Paulus oku uvaneke kutya Jehova ote ke tu longela oshindji shi vulithe pushoka tatu mu indile. Euvaneko ndyoka Jehova ohe li gwanitha po shili.

16. Aaihokani aagundjuka otaya vulu okupula omayele koolye uuna ye wete kutya oya pumbwa okutalulula omalalakano gawo?

¹⁶ Kunena aaihokani aagundjuka otaya vulu okwiilonga sha kiimoniwa yooitaali mboka yi ilonga okukala yi inekela muJehova. Aaihokani yamwe otashi vulika ya kala ethimbo ele miilonga  yethimbo lyu udha. Mbela itamu vulu oku ya pula omayele ngele omu uvite kutya omwa pumbwa okutalulula omalalakano geni? Ngoka ogu li omukalo gumwe moka tamu vulu okuulika kutya omu na einekelo muJehova. (Omayel. 22:17, 19) Aakuluntugongalo nayo otaya vulu okukwathela aaihokani aagundjuka yi itulile po omalalakano miilonga yaJehova noye ga adhe.

17. Oshike sha ningilwa Klaus naMarisa, noshike tatu ilongo moshimoniwa shawo?

¹⁷ Omathimbo gamwe otashi vulika tu kale twa hala okulongela Jehova momukalo gwontumba, ihe Jehova okwa hala tu mu longele momukalo gulwe. Natu taleni koshiholelwa shaKlaus naMarisa, mboka ya popiwa metetekelo. Konima sho ya kala mondjokana uule womimvo ndatu, oya tembukile kokule negumbo lyawo noyi iyamba ya ka kwathele miilonga yokutunga koshitayimbelewa shaFinland. Ihe oya lombwelwa kutya oya pitikwa owala ya ka kwathele hoka uule woomwedhi inaadhi konda puhamano. Petameko kaya li ye shi uvitile ombili. Ihe lwanima oya hiywa ya ye kootundi dhokwiilonga Oshiarabic, nongashingeyi oya nyanyukwa sho haya longele moshilongo moka hamu popiwa elaka ndyoka. Sho Marisa ta dhiladhila kwaashoka ya ningilwa, okwe shi zimine a ti: “Petameko onda li nda tila okuninga oshinima shoka inaandi igilila nenge inaandi ninga nando onale nonda li nda pumbwa okukala ndi inekela muJehova thiluthilu. Ihe onda mono nkene Jehova a kala noku tu kwathela momikalo ndhoka kaatwa li twa tegelela. Shoka osha koleke einekelo lyandje muJehova.” Ngaashi oshiholelwa shoka she shi ulika, otatu vulu okukala nuushili kutya Jehova ote ke tu laleka aluhe nuuyamba ngele otwa kala twe mu inekela thiluthilu.

18. Oshike shoka aaihokani taya vulu okuninga, opo ya tsikile okukala yi inekela muJehova?

¹⁸ Ondjokana oyi li omagano ga za kuJehova. (Mat. 19:5, 6) Okwa hala aaihokani ya nyanyukilwe omagano ngoka. (Omayel. 5:18) Aaihokani aagundjuka, mbela itamu vulu okutalulula shoka mwa pititha komeho monkalamwenyo yeni? Mbela otamu ningi ngaa ashihe shoka tamu vulu mu ulike kutya omwa pandula omagano ngoka Jehova e mu pa? Galikaneni kuJehova. Kongeni omayele mOohapu dhaKalunga ngoka taga opalele onkalo yeni. Opo nduno, tuleni miilonga omayele ngoka Jehova te mu pe. Otamu vulu okukala nuushili kutya ngele omwa kala mwa pititha komeho okulongela Jehova monkalamwenyo yeni, otamu ka kala mwa nyanyukwa, nonkalamwenyo yeni otayi ka kala tayi ti sha.