1. Otu shi shi ngiini kutya Jehova okwa hala okukala popepi natse?

 JEHOVA ohe tu hiya tu hedhe popepi naye. (Jak. 4:8) Okwa hala okukala Kalunga ketu, Tate, nakuume ketu. Oha yamukula omagalikano getu nohe tu kwathele uuna tu li moonkalo oondhigu. Oha longitha wo ehangano lye e tu longe noku tu gamene. Ihe oshike tu na okuninga opo tu hedhe popepi naJehova?

2. Ongiini tatu vulu okuhedha popepi naJehova?

² Otatu vulu okuhedha popepi naJehova okupitila megalikano, mokulesha Oohapu dhe nomokutedhatedha kudho. Okuninga ngawo, ohaku tu ningitha tu kale tu mu hole lela notwe mu pandula. Ohashi tu inyengitha tu vulike kuye notu mu tange, molwaashoka oye a gwana okutangwa. (Eh. 4:11) Mpoka ngaa pu thike okutseya Jehova, opo ngaa tapu ka kala pu thike oku mu inekela nosho wo ehangano lye ndyoka e tu pa li tu kwathele.

3. Satana oha kambadhala ngiini oku tu topola ko kuJehova, ihe oshike tashi ke tu kwathela kaatu ethe po Kalunga nehangano lye? (Episalomi 31:13, 14)

³ Satana oha kambadhala oku tu topola ko kuJehova, unene tuu uuna tu li momashongo. Ohe shi ningi momukalo guni? Oha kambadhala kashona nakashona oku tu ethitha po okwiinekela muJehova nomehangano lye. Ihe otatu vulu okwiigamena komaponokelo ge. Uuna eitaalo neinekelo lyetu muJehova lya kola, itatu ka etha po Kalunga ketu nehangano lye. — Lesha Episalomi 31:13, 14.

4. Oshike tatu ka kundathana moshitopolwa shika?

⁴ Moshitopolwa shika, otatu ka kundathana omashongo gatatu ngoka hashi vulika ga ze kondje yegongalo, nakehe limwe lyomugo otali vulu oku tu ningitha kaatu kale we twa inekela Jehova  nehangano lye. Omashongo ngoka otaga vulu ngiini oku tu topola ko kuJehova? Noshike tatu vulu okuninga tu kondjithe oonkambadhala dhaSatana?

5. Ongiini omaudhigu haga vulu okunkundipaleka einekelo lyetu muJehova nomehangano lye?

⁵ Omathimbo gamwe ohatu adhika komaudhigu, ngaashi okupatanekwa kaakwanezimo nenge okukanitha iilonga. Ongiini omaudhigu ngaashi ngoka taga vulu okunkundipaleka einekelo lyetu mehangano lyaJehova noku tu topola ko kuye? Uuna twa kala nokwiidhidhimikila omaudhigu ethimbo ele, ohashi vulika tu kale tu uvite kaatu na etegameno nohatu kala twa polimana. Satana oha longitha oompito ndhoka e tu ningithe tu dhiladhile kutya Jehova ke tu hole. Satana okwa hala tu dhiladhile kutya Jehova nehangano Lye oye he tu etele okumona iihuna. Oshinima sha fa shoka, osha li sha ningilwa Aaisraeli yamwe muEgipiti. Petameko oya li yi itaala kutya Jehova okwa langeka po Moses naAaron ye ya mangulule mo muupika. (Eks. 4:29-31) Ihe lwanima sho Farao a dhigupaleke oonkalamwenyo dhawo, oya pe Moses naAaron ombedhi omolwomaupyakadhi gawo. Oye ya lombwele taya ti: “Omwe tu tonditha komukwaniilwa nomalenga ge. Omwe ya pe egongamwele, ye tu dhipage.” (Eks. 5:19-21) Oya pe aapiya yaKalunga mboka aadhiginini ombedhi. Itashi yemateke tuu! Ngele owa kala nokwiidhidhimikila omaudhigu ethimbo ele, ongiini to vulu okutsikila okukaleka einekelo lyoye lya kola muJehova nomehangano lye?

6. Oshike tatu ilongo komuhunganeki Habakuk kombinga yokwiidhidhimikila omaudhigu? (Habakuk 3:17-19)

⁶ Mbumbulila Jehova omutima gwoye megalikano, nokukonga ekwatho kuye. Omuhunganeki Habakuk okwa li a adhika komaudhigu ogendji. Pompito yimwe, okwa fa nokuli a li a limbililwa ngele Jehova oku na ko nasha naye. Onkee okwa li a mbumbulile Jehova omaiyuvo ge megalikano. Okwa ti: “Omuwa, sigo uunake ndi na oku ku kugila ekwatho ngoye itoo pulakene? . . . Sigo uunake to idhidhimikile iilonga yuukolokoshi?” (Hab. 1:2, 3) Jehova okwa li a yamukula egalikano tali zi komutima lyomupiya gwe omudhiginini. (Hab. 2:2, 3) Konima sho Habakuk a tedhatedha kunkene Jehova a li a hupitha oshigwana she, okwa tameke ishewe a nyanyukwa. Okwa tameke okukala a tompwa kutya Jehova oku na ko nasha naye note mu kwathele i idhidhimikile eshongo kehe. (Lesha Habakuk 3:17-19.) Oshike tatu ilongo kuHabakuk? Uuna wu li muudhigu, galikana kuJehova wu mu lombwele nkene wu uvite. Opo nduno, konga ekwatho kuye. Ngele osho wa ningi, oto vulu okukala wu na omukumo kutya Jehova ote ku pe oonkondo ndhoka wa pumbwa wi idhidhimike. Nuuna wu wete kutya ote ku kwathele, eitaalo lyoye muye otali kolo.

7. Omukwanezimo gumwe gwaShirley, okwa li a kambadhala oku mu ningitha a itaale shike, noshike sha ningitha Shirley kaa kanithe eitaalo lye muJehova?

⁷ Kala ho ningi iinima mbyoka tayi ku kwathele wu kale popepi naJehova. Natu ka taleni kwaashoka sha kwathele Shirley, omumwameme gumwe gwokoPapua New Guinea, sho a li momaupyakadhi. b Shirley nuukwanegumbo waandjawo oya li ya hepa, nomathimbo gamwe osha li oshidhigu okumona iikulya ya gwana. Gumwe gwomaakwanezimo ye okwa li a kambadhala okunkundipaleka einekelo lye muJehova. Okwa ti: “Oho ti ombepo yaKalunga otayi ku kwathele, ihe ekwatho oli li peni nduno? Yaandjeni natango oya hepa. Oto mana po ethimbo lyoye nokuuvitha.” Shirley okwa ti: “Ondi ipula nda ti: ‘Mbela Kalunga oku na ko ngaa nasha natse nenge hasho?’ Nziya onda  tameke okugalikana kuJehova nonde mu lombwele ashihe shoka sha li momadhiladhilo gandje. Inandi etha po okulesha Ombiimbeli niileshomwa yetu, nonda tsikile okuuvitha nokuya kokugongala.” Nziya okwa mono nkene Jehova ta kwathele uukwanegumbo we. Uukwanegumbo we inawu kala we nondjala, wo owa li wa nyanyukwa. Shirley okwa ti: “Onda li ndi uvite kutya Jehova ota yamukula omagalikano gandje.” (1 Tim. 6:6-8) Ngele owa kala ho ningi iinima mbyoka hayi ku kwathele wu kale popepi naJehova, nangoye ito ka etha omaupyakadhi nenge omalimbililo ge ku topole ko kuJehova.

8. Oshike tashi vulu okuningilwa aamwatate mboka taya kwatele komeho mehangano lyaJehova?

⁸ Aatondi yetu ohaya taandeleke iifundja nenge omitotolombo taya longitha iikundaneki nointaneta kombinga yaamwatate mboka taya kwatele komeho mehangano lyaJehova. (Eps. 31:13) Aamwatate yamwe oya kwatwa po noya lundilwa kutya aalongi yomiyonena. Aakriste yomethelemumvo lyotango nayo oya li monkalo ya faathana sho omuyapostoli Paulus a li a lundilwa e ta kwatwa po. Aakriste mboka oya li yi inyenge ngiini?

9. Aakriste yamwe oya li yi inyenge ngiini, sho omuyapostoli Paulus a li mondholongo?

⁹ Aakriste yamwe yomethelemumvo lyotango oya li ya etha po okuyambidhidha omuyapostoli Paulus sho a li mondholongo muRoma. (2 Tim. 1:8, 15) Omolwashike? Mbela oya li ya sa Paulus ohoni, molwaashoka aantu ya li ye mu tala ko e li omukolokoshi? (2 Tim. 2:8, 9) Nenge nayo oya li ya tila kutya nayo otaya ka hepekwa? Kutya nduno etompelo lyawo olini, dhiladhila owala nkene Paulus a li e uvite. Okwa li i idhidhimikile omaudhigu ogendji nokwa li nokuli a hupula omwenyo gwe molwayo. (Iil. 20:18-21; 2 Kor. 1:8) Onkee ano, inatu kala twa fa aantu mboka ya li ya etha okukwathela Paulus pethimbo a li a pumbwa ekwatho! Oshike tu na okukaleka momadhiladhilo, uuna aamwatate mboka taya kwatele komeho taya hepekwa?

10. Oshike tu na okudhimbulukwa uuna aamwatate mboka taya kwatele komeho taya hepekwa, nomolwashike?

 ¹⁰ Dhimbulukwa kutya omolwashike hatu hepekwa nosho wo kutya olye ha etitha omahepeko ngoka. Timoteus omutiyali 3:12 otayi ti: “Ayehe mboka ya hala okulongela Kalunga nesimaneko muukumwe naKristus Jesus, otaa ka tidhaganwa.” Onkee inatu kala twa kumwa sho Satana ha ponokele unene aamwatate mboka taya kwatele komeho. Ohe ya ponokele, molwaashoka okwa hala ya ethe po okulongela Jehova nokwa hala wo oku tu tilitha. — 1 Pet. 5:8.

11. Oshike tatu ilongo koshiholelwa shaOnesiforus? (2 Timoteus 1:16-18)

¹¹ Tsikila okukwathela aamwaho na ino ya etha. (Lesha 2 Timoteus 1:16-18.) Methelemumvo lyotango, Omukriste gwedhina Onesiforus okwa li i inyenge momukalo gwi ili sho Paulus a li mondholongo. ‘Ina sa Paulus ohoni’ sho a li monkalo ndjoka. Pehala lyaashono, Onesiforus okwa kongo Paulus, naasho e mu mono, okwa kambadhala oku mu kwathela a mone shoka a pumbwa. Mokuninga ngawo, Onesiforus okwa tula omwenyo gwe moshiponga. Oshike tatu ilongo kuye? Inatu etha uumbanda wokutila aantu wu tu imbe okukwathela aamwatate mboka taya hepekwa. Pehala lyaashono, natu ya popile noku ya kwathela. (Omayel. 17:17) Oya pumbwa ohole yetu neyambidhidho lyetu.

12. Oshike tatu ilongo kaamwatate naamwameme yomoRusia?

¹² Natu taleni nkene aamwatate naamwameme moRusia ya kwathele ooitaali ooyakwawo mboka ye li mondholongo. Uuna yamwe ya yi kompangu, aamwatate naamwameme oyendji ohaya yi ko ye ke ya yambidhidhe. Oshiilongomwa oshini? Uuna aamwatate mboka taya kwatele komeho ya lundilwa, ya kwatwa po, nenge taya hepekwa, ino tila. Ya galikanena, sila oshimpwiyu aantu yaandjawo, nokutala ishewe komikalo dhilwe moka to vulu oku ya yambidhidha. — Iil. 12:5; 2 Kor. 1:10, 11.

13. Aasheki ohaya nkundipaleke ngiini einekelo lyetu muJehova nomehangano lye?

¹³ Otashi vulika tu shekwe kaakwanezimo yetu, kaaniilonga pamwe natse, nenge kaanasikola ooyakwetu sho hatu uvitha nenge sho hatu kala metsokumwe nomithikampango dhaJehova dhopamikalo. (1 Pet. 4:4) Otashi vulika ya tye: “Ondi hole uukwatya woye, ihe elongelokalunga lyeni olye mu ngambeka unene nolyonkulu yonale.” Yamwe otashi vulika ye tu sheke kombinga yankene hatu ungaunga naamboka ya kondwa, taya ti: “Ongiini to vulu okutya owu hole aantu?” Omapopyo ga tya ngaaka otaga vulu okukuna omalimbililo momadhiladhilo getu. Otashi vulika tu tameke okudhiladhila tatu ti: ‘Mbela Jehova okwa tegelela ndi ninge oshindji shi vulithe pwaashoka tandi vulu? Mbela ehangano lye olye tu ngambeka unene?’ Ngele owu li monkalo ndjoka, ongiini to vulu okukala popepi naJehova nehangano lye?

14. Otu na okwiinyenga ngiini uuna yalwe taye tu sheke sho hatu vulika komithikampango dhaJehova? (Episalomi 119:50-52)

¹⁴ Kala wa tokola toko okuvulika komithikampango dhaJehova. Job okwa li a vulika komithikampango dhaJehova nonando okwa li ta shekwa sho te shi ningi. Gumwe gwomaalumentu mboka ya li tayi iningitha ya fa ookuume ke, okwa li a kambadhala oku mu itaalitha kutya Kalunga ke na ko nasha kutya nduno ota vulika komithikampango Dhe nenge hasho. (Job 4:17, 18; 22:3) Ihe Job okwa li a tindi okwiitaala iifundja mbyoka. Okwa li e shi kutya omithikampango dhaJehova dhaashoka shi li mondjila naashoka sha puka odhi li pauyuuki, nokwa li a tokola toko okuvulika kudho. Ina etha yalwe ya teye po uudhiginini we. (Job 27:5, 6) Oshiilongomwa oshini? Ino etha omasheko ge  ku ningithe wu kale wa limbililwa omithikampango dhaJehova. Dhiladhila koshimoniwa shoye mwene. Otashi vulika wa mona iikando oyindji kutya onkalamwenyo yoye oya kala yi li nawa, sho wa kala to ningi shoka Jehova ta ti osho shi li mondjila. Onkee kala wa tokola toko okuyambidhidha ehangano lyaJehova ndyoka hali vulika komithikampango dhe. Opo nduno kutya aantu oye ku sheke shi thike peni, ito ka etha po okulongela Jehova. — Lesha Episalomi 119:50-52.

15. Omolwashike Brizit a li a shekwa?

¹⁵ Tala koshiholelwa shomumwameme Brizit gwokoIndia. Okwa li ta shekwa kaakwanezimo ye omolweitaalo lye. Konima yethimbo efupi sho a ninginithwa mo 1997, omusamane gwe ngoka kaali Onzapo okwa kanitha iilonga. Onkee okwa tokola opo ye, Brizit nosho wo oyanakadhona yawo yane ya tembukile kegumbo lyaavali ye, mboka ya li koshilando shilwe. Ihe Brizit okwa ka adhika ishewe komashongo omanene ge vule ngoka. Molwaashoka omusamane gwe ka li we ha longo, Brizit okwa tameke okukala ha longo iilonga yokwiikongela omboloto ethimbo lyu udha, opo a vule okuyambidhidha uukwanegumbo we. Shimwe ishewe, egongalo ndyoka lya li popepi nayo olya li li li kokule ookilometa 350. Shi yemateka, aakwanezimo yomusamane gwe oye mu pataneke omolweitaalo lye. Onkalo osho ya ka nayipala noonkondo sigo Brizit nuukwanegumbo we ya tembuka ishewe. Opo nduno, omusamane gwe okwa hulitha ombaadhilila. Lwanima, omwanakadhona gumwe okwa hulitha kokankela sho owala a li e na omimvo 12. Aakwanezimo yaBrizit oya dhigupaleke ishewe onkalo, sho ya tameke oku mu pa uusama omolwiiningwanima mbyoka. Oya ti kutya andola okwa li inaa ninga Onzapo yaJehova, andola omaudhigu agehe ngoka inaga holoka po. Nonando ongawo, Brizit okwa kala i inekela muJehova nokwa kala popepi nehangano lye.

16. Brizit okwa li a yambekwa ngiini, sho a kala popepi naJehova nosho wo nehangano lye?

¹⁶ Molwaashoka Brizit okwa li kokule negongalo, omutonatelishikandjo gumwe okwe mu ladhipike a uvithile moshitopolwa shawo nokuninga okugongala megumbo lye. Petameko, okwa li e wete oshidhigu noonkondo. Ihe  okwa landula omalombwelo ngoka a pewa komumwatate ngoka. Oku uvithile aantu yomoshitopolwa shawo onkundana ombwanawa, okwa kala ha ningi okugongala megumbo lye nosho wo elongelokalunga lyuukwanegumbo noyanakadhona. Oshizemo osha li shini? Brizit okwa vulu okutameka nokuninga omakonakonombiimbeli ogendji, naakonakonimbiimbeli ye oyendji oya li ya ninginithwa. Mo 2005 okwa ningi omukokolindjila gwondjigilile. Molwaashoka okwa kala i inekela muJehova nokwa kala omudhiginini kehangano lye, okwa li a yambekwa. Oyanakadhona ohaya longele Jehova nuudhiginini, nomoshitopolwa shawo ngashingeyi omu na omagongalo gaali! Brizit okwa tompwa kutya Jehova okwe mu pa oonkondo ndhoka a pumbwa a ungaunge nomaudhigu ge nokwiidhidhimike sho a li ta shekwa kaakwanezimo ye.

17. Otu na okukala twa tokola toko okuninga shike?

¹⁷ Satana okwa hala tu itaale kutya Jehova ohe tu etha, uuna tu li muudhigu nosho wo kutya okukala mehangano lyaJehova otaku ningitha owala onkalamwenyo yetu ondhigu noonkondo. Satana okwa hala tu kale twa tila, uuna aamwatate mboka taya kwatele komeho taya lundilwa, taya hepekwa, nenge uuna ya tulwa mondholongo. Oha longitha omasheko ngoka, molwaashoka okwa hala okunkundipaleka einekelo lyetu momithikampango dhaJehova nomehangano Lye. Ihe omakoto ge omawinayi otu ga shi noitatu pukithwa kuye. (2 Kor. 2:11) Kala wa tokola toko okuyanda iifundja yaSatana nokukala omudhiginini kuJehova nokehangano Lye. Dhimbulukwa kutya Jehova ke na esiku e ku ekelehi. (Eps. 28:7) Onkee ano, ino etha nando osha shi ku topole ko kuJehova! — Rom. 8:35-39.

18. Oshike tatu ka kundathana moshitopolwa tashi landula ko?

¹⁸ Moshitopolwa shika, otwa kundathana omashongo ngoka hashi vulika ge tu ziilile kondje yegongalo. Ihe einekelo lyetu muJehova nomehangano lye otali vulu wo okumakelwa, uuna twa adhika komashongo ngoka haga zi meni lyegongalo. Ongiini tatu vulu okuungaunga nomupondo nomaupyakadhi ngoka? Oshinima shoka otatu ke shi kundathana moshitopolwa tashi landula ko.