1. Okukala twa tonata osha hala okutya ngiini? (2 Timoteus 4:5)

 UUNA pwa ningwa sha she tu uvitha nayi, uudhiginini wetu kuJehova nokehangano lye, otashi vulika wu makelwe. Ongiini tatu vulu okusinda omashongo ngoka? Otwa pumbwa okukala twa tonata nokukala twa kola meitaalo. (Lesha 2 Timoteus 4:5.) Ohatu kala twa tonata mokukala twa ngungumana, tatu dhiladhila nawa nokukambadhala okutala ko iinima ngaashi Jehova he yi tala ko. Uuna twe shi ningi omadhiladhilo getu, ihaga pangelwa komaiyuvo getu.

2. Oshike tatu ka kundathana moshitopolwa shika?

² Moshitopolwa sha tetekele, otwa kundathana omaupyakadhi gatatu ngoka tashi vulika ge tu adhe tage tu ziilile pondje yegongalo. Moshitopolwa shika, otatu ka kundathana omashongo gatatu ngoka taga vulu oku tu ziilila megongalo, notaga vulu okumakela uudhiginini wetu kuJehova. Eshongo (1) uuna tu uvithwa nayi kAakriste ooyakwetu, (2) uuna twa pewa egeeloputudho nosho wo (3) uuna tatu nyengwa okutaamba ko omalunduluko ngoka ga ningwa mehangano. Ongiini tatu vulu okukala twa tonata nokukala aadhiginini kuJehova nokehangano lye, uuna twa iyadha momashongo ga tya ngaaka?

3. Otashi vulika tu inyenge ngiini, ngele otu uvithwa nayi kOmukriste omukwetu?

³ Mbela opu na oshikando shimwe wa li wu uvithwa nayi kOmukriste omukweni, tashi vulika nokuli omukuluntugongalo? Otashi vulika omumwatate ine shi ninga nelalakano lyoku ku uvitha nayi. (Rom. 3:23; Jak. 3:2) Ihe oonkatu dhe otashi vulika dhe ku uvitha nayi. Otashi vulika wa li wa lala ondangala, omolwoshinima shoka. Otashi vulika nokuli wa li wi ipula kutya: ‘Ngele omumwatate oti ihumbata momukalo nguka, ndino ehangano ngaa lyaKalunga shili?’  Shoka osho Satana a hala tu dhiladhile. (2 Kor. 2:11) Ngele otwa dhiladhila momukalo ngoka, otashi vulika tu ethe po okulongela Jehova nokuthiga po ehangano lye. Uuna omumwatate nenge omumwameme e tu uvitha nayi, ongiini tatu vulu okuyanda okudhiladhila momukalo moka Satana a hala tu dhiladhile?

4. Josef okwa kala ngiini a tonata sho a li ta ningwa nayi, noshike tatu ilongo moshiholelwa she? (Genesis 50:19-21)

⁴ Ino geya. Sho Josef a li e na omimvo omulongo nasha, aamwahe mboka aakuluntu oya li ye mu ningi nayi. Oya li ye mu tonde, nayamwe oya li nokuli ya hala oku mu dhipaga. (Gen. 37:4, 18-22) Konima yethimbo, oye ke mu landitha po muupika. Omolwoshinima shoka, Josef okwa li adhika komashongo ngoka a kala nago omimvo 13 lwaampo. Josef okwa li ta vulu okukala a limbililwa ngele Jehova oku mu hole ngaa. Shimwe ishewe, okwa li ta vulu okukala e na omaipulo kutya Jehova okwe mu thiga po pethimbo a li a pumbwa ekwatho. Ihe Josef ina geya. Pehala lyaashono, okwa kala a tonata mokukala a ngungumana. Sho a li ta vulu okugalulila aamwahe uuwinayi, ka li e shi ningi nokwa li u ulike kutya oku ya hole nokwe ya dhimine po. (Gen. 45:4, 5) Josef okwa li i ihumbata momukalo ngoka, molwaashoka okwa li ta vulu okudhiladhila nawa. Pehala lyokugandja eitulomo komaupyakadhi ge, okwa li e wete shoka sha kwatelwa mo, ano elalakano lyaJehova. (Lesha Genesis 50:19-21.) Oshike tatu ilongo? Ngele owa ningwa nayi, ino geela Jehova nenge wu tye okwe ku thiga po. Pehala lyaashono, tedhatedha kunkene te ku kwathele wu ungaunge nuupyakadhi woye. Shimwe ishewe, uuna yalwe ye ku ningi nayi, ya dhimina po, e to dhimbulukwa kutya “ohole ohayi siikile omayono ogendji.” — 1 Pet. 4:8.

5. Miqueas okwa kala ngiini a tonata sho a li e uvite kutya okwa ningwa nayi?

⁵ Natu ka taleni koshiholelwa shopethimbo lyetu shomukuluntugongalo Miqueas gwokoAmerika lyokUumbugantu. b Ota dhimbulukwa nawa oshikando shimwe, sho a li u uvite kutya okwa ningwa nayi noonkondo kaamwatate yamwe mboka ye na iinakugwanithwa mehangano lyaJehova. Okwa ti: “Inandi uva nando onale nayi ngaaka. Onda li nda gwililwa po. Kanda li tandi vulu okukotha uusiku, nonda li handi lili, molwaashoka onda li ndu uvite kutya kandi na shoka tandi vulu okuninga po.” Ihe Miqueas okwa kala a tonata nokulonga nuudhiginini a pangele omaiyuvo ge. Okwa li ha galikana lwiikando ta pula Jehova ombepo ondjapuki yi mu kwathele i idhidhimike. Okwa li wo ha lesha uuyelele miileshomwa yetu, mboka tawu vulu oku mu kwathela. Oshiilongomwa oshini? Uuna wu uvite wa ningwa nayi komumwatate nenge komumwameme, kala wa ngungumana e to kambadhala wu pangele omaiyuvo omawinayi ngoka tashi vulika wu kale wu na. Otashi vulika wu kale kuu shi shoka shi inyengitha omuntu a popye nenge inyenge momukalo ngoka. Onkee galikana kuJehova, noku mu pula e ku kwathele wu tale ko oshinima shoka ngaashi omuntu ngoka e shi tala ko. Okuninga ngaaka, otashi ke ku kwathela wu dhiladhile kutya omumwatate nenge omumwameme ine shi ninga nelalakano e ku uvithe nayi, noto ke mu dhimina po. (Omayel. 19:11) Dhimbulukwa kutya Jehova oku wete onkalo yoye note ku pe oonkondo ndhoka wa pumbwa wu idhidhimike. — 2 Ondjal. 16:9; Omuuv. 5:8.

6. Omolwashike sha simana okutala ko egeeloputudho lyaJehova li li euliko kutya oku tu hole? (Aahebeli 12:5, 6, 11)

⁶ Egeeloputudho ohali vulu oku tu uvitha nayi noonkondo. Ihe ngele otwa kala owala tatu gandja eitulomo kuuwehame, otashi vulika tu tameke okudhiladhila kutya egeeloputudho ndyoka kali li pauyuuki, noinatu pumbwa oku li pewa. Oshizemo, otashi vulika shi tu imbe okuuva ko  oshinima sha simana, shoka kutya Jehova ote tu pukulula, molwaashoka e tu hole. (Lesha Aahebeli 12:5, 6, 11.) Ngele otwe etha omaiyuvo getu ge tu pangele, nena otatu ka pa Satana ompito e tu ponokele. Satana okwa hala kaatu taambe ko egeeloputudho, naashoka oshiwinayi noonkondo, okwa hala oku tu ningitha tu ethe po kashona nakashona okulongela Jehova notu thige po egongalo. Ngele owa pewa egeeloputudho oshike tashi vulu oku ku kwathela wu kale wa tonata?

7. (a) Ngaashi shu ulikwa methano, Petrus okwa li a longithwa ngiini kuJehova konima sho a taamba ko egeeloputudho? (b) Oshike to ilongo koshiholelwa shaPetrus?

⁷ Taamba ko egeeloputudho e to ningi omalunduluko ngoka ga pumbiwa. Jesus okwa li a pukulula Petrus iikando yi vulithe pushimwe komeho gaayapostoli ooyakwawo. (Mark. 8:33; Luk. 22:31-34) Oshinima shoka oshi na okukala sha li sha sitha Petrus ohoni noonkondo! Ihe Petrus okwa kala omudhiginini kuJesus. Okwa taamba ko egeeloputudho ndyoka a pewa nokwi ilongo sha momapuko ge. Onkee Jehova okwa li a pe Petrus ondjambi, omoluudhiginini we nokwe mu pe iinakugwanithwa ya simana megongalo. (Joh. 21:15-17; Iil. 10:24-33; 1 Pet. 1:1) Oshike tatu ilongo koshiholelwa shaPetrus? Ohatu mono uuwanawa nosho wo yalwe, uuna ihaatu gandja eitulomo kunkene twa sa ohoni, ihe okokutaamba ko epukululo, e ta tu ningi omalunduluko ngoka ga pumbiwa. Uuna twe shi ningi, otatu ka kala tu na oshilonga kuJehova nokaamwatate.

8-9. Bernardo okwa li i inyenge ngiini petameko, sho a pewa egeeloputudho, noshike sha li she mu kwathele a lundulule okudhiladhila kwe?

⁸ Natu ka taleni shoka sha li sha ningilwa omumwatate Bernardo gwokoMosambike. Okwa li a kuthwa uukuluntugongalo. Bernardo okwa li u uvite ngiini petameko? Okwa ti: “Onda li nda geya nokanda li nda panda egeeloputudho ndyoka nda pewa.” Okwa li ti ipula unene kutya yalwe megongalo otaye ke mu tala ko ngiini. Okwa ti ishewe: “Osha pula ndje oomwedhi dhontumba ndi kale ndi na etaloko ewanawa li na ko nasha nonkalo yandje nokukala ishewe ndi inekela Jehova nehangano lye.” Oshike sha kwathele Bernardo a lundulule etaloko lye?

⁹ Bernardo okwa lundulula okudhiladhila kwe. Okwa ti: “Sho nda li omukuluntugongalo, onda li handi longitha Aahebeli 12:7 ndi kwathele yalwe ya kale ye na etaloko lya fa lyaJehova li nasha negeeloputudho. Ondi ipula nda ti, ‘Olye a pumbwa okutula miilonga enyolo ndika?’ Aapiya yaJehova ayehe nangame nda kwatelwa mo.” Opo nduno, Bernardo okwa ningi omalunduluko ga gwedhwa po, opo a kale ishewe i inekela Jehova  nehangano lye. Okwa kala ha lesha Ombiimbeli shi vulithe nale nokulongitha ethimbo olindji ta tedhatedha muule kwaashoka a lesha. Nonando okwa li e na omaipulo kutya aamwatate naamwameme oye mu tala ko ngiini, okwa tsikile okulonga pamwe nayo miilonga yokuuvitha nokuyamukula pokugongala. Lwanima, Bernardo okwa langekwa po ishewe e li omukuluntugongalo. Ngaashi Bernardo, ngele nangoye owa pewa egeeloputudho, ino kala unene to ipula kombinga yankene wa sa ohoni, ihe kambadhala okutaamba ko omayele nokuninga omalunduluko ngoka ga pumbiwa. c (Omayel. 8:33; 22:4) Ngele owa ningi ngawo, oto ka kala wu na uushili kutya Jehova ote ke ku pa ondjambi, sho wa kala omudhiginini kuye nokehangano lye.

10. Elunduluko lini lya li lya ningwa mehangano lyaJehova, tashi vulika lya li lya makele uudhiginini waalumentu yamwe Aaisraeli?

¹⁰ Omalunduluko ngoka haga ningwa mehangano lyaJehova, otaga vulu okumakela uudhiginini wetu. Ngele inatu kotoka, otashi vulika nokuli tu ethe ge tu topole ko kuJehova. Pashiholelwa, natu taleni kelunduluko limwe ndyoka lya li lya ningwa kohi yOmpango yaMoses nkene tashi vulika lya li lya gumu Aaisraeli yamwe. Manga Ompango ndjoka inaayi totwa po, omitse dhomagumbo odha li hadhi longo iilonga yuuyambi. Odha li hadhi tungu iiyambelo nokuyambela Jehova omafikilondjambo, pehala lyomaukwanegumbo gadho. (Gen. 8:20, 21; 12:7; 26:25; 35:1, 6, 7; Job 1:5) Ihe sho Ompango yaMoses ya totwa po, omitse dhomagumbo kadha li we hadhi longo iilonga mbyoka. Jehova okwa li a langeke po aayambi okuza mezimo lyaAaron, oyo ya kale haya gandja omafikilondjambo. Konima sho elunduluko ndyoka lya ningwa, ngele omutse guukwanegumbo gwontumba ngoka kaa gu shi gwomezimo lyaAaron, ogwa tameke okuninga iinima mbyoka ya li hayi ningwa kaayambi, ogwa li hagu dhipagwa. d (Lev. 17:3-6, 8, 9) Mbela elunduluko ndyoka otashi vulika olyo limwe lyomomatompelo ngono Kora, Datan, Abiram naawiliki 250, lya li lye ya ningitha ya kale ye li ompinge naMoses naAaron? (Num. 16:1-3) Itatu vulu oku shi koleka. Ihe kutya nduno oshike, Kora naalumentu mboka a li nayo, oya li ya ndopa okukala aadhiginini kuJehova. Ngele omalunduluko ngono haga ningwa mehangano lyaJehova oga makele uudhiginini woye, oshike to vulu okuninga?

11. Oshike tatu ilongo koshiholelwa shayamwe yomAakwakehat Aalevi?

¹¹ Yambidhidha thiluthilu omalunduluko ngoka haga ningwa mehangano. Pethimbo Aakwakehat ya li molweendo lwawo mombuga, oya li ye na oshinakugwanithwa shi ikalekelwa. Ethimbo kehe Aaisraeli taya tembuka, Aakwakehat yamwe oya li haya humbata oshikethahangano ya kwatela oshigwana shoka komeho. (Num. 3:29, 31; 10:33; Jos. 3:2-4) Mboka kawa li tuu uuthembahenda uunene! Ihe iinima oya ka lunduluka, sho Aaisraeli ya tula mEvi lyEuvaneko. Oshikethahangano kasha li we sha pumbwa okutembukatembuka. Onkee ano, sho Salomo a ningi omukwaniilwa, Aakwakehat yamwe oya pewa oshinakugwanithwa shokwiimba, yamwe oshokukeelela pomiyelo nayalwe osho ku tonatela omaliko gomotempeli. (1 Ondjal. 6:31-33; 26:1, 24) Kapu na nando oompoka pwa nyolwa kutya Aakwakehat oya li ya nyenyeta nenge ya pula iinakugwanithwa ya gwedhwa po yi ikalekelwa, mbyoka ya li ye na nale. Oshike tatu ilongo kuyo? Yambidhidha nomutima aguhe omalunduluko  ngoka taga ningwa mehangano lyaJehova, mwa kwatelwa naangoka ga guma oshinakugwanithwa shoye. Nyanyukilwa oshinakugwanithwa kehe shoka wa pewa. Dhimbulukwa kutya oshinakugwanithwa shoye, hasho tashi ku ningitha wu kale wu na ongushu momeho gaJehova. Jehova okwa lenga okuvulika kwoye shi vulithe kokule oshinakugwanithwa kehe. — 1 Sam. 15:22.

12. Zaina okwa li u uvite ngiini sho a pewa oshinakugwanithwa oshipe?

¹² Natu taleni koshiholelwa shomumwameme Zaina, gwokUuzilo woPokati, ngoka a li a pewa oshinakugwanithwa oshipe e ta kanitha shoka a li e hole unene. Okwa li a ningwa omukokolindjila i ikalekelwa konima sho a kala nokulonga moBetel uule womimvo dhi vulithe 23. Okwa ti: “Sho nda pewa oshinakugwanithwa oshipe, osha li sha halutha ndje noonkondo. Onda li ndu uvite kaandi na oshilonga, nonda li handi kala tandi ipula kutya ‘Mbela onda ninga sha sha puka?’” Shi yemateka, aamwatate naamwameme yamwe megongalo, oya li ya gwedha ko kuuwehame we, sho ya kala taye mu lombwele taya ti: “Ando owa li wu li nawa, ando ehangano olye ku kaleka moBetel.” Uule wethimbo lyontumba Zaina okwa kala u uvite a gwililwa po, nokwa li ha lili ongulohi kehe. Ihe okwa ti: “Inandi etha ndi limbililwe ehangano lyaJehova nenge ndi kale ndu uvite kutya Jehova ke hole ndje.” Zaina okwa kala a tonata ngiini?

13. Zaina okwa ningi shike, opo e ethe po omadhiladhilo omawinayi?

¹³ Zaina okwa li a vulu okweetha po omadhiladhilo ge omawinayi. Oshike she mu kwathele? Okwa lesha iitopolwa miileshomwa yetu mbyoka tayi popi kombinga yuupyakadhi we. Oshitopolwa “Oto vulu okusinda etekomukumo!” shi li mOshungolangelo yOshiingilisa 1 Febuluali 2001, osha li she mu kwathele noonkondo. Oshitopolwa shono, otashi popi kombinga yomunyoli gumwe gOmbiimbeli Markus, ngono naye tashi vulika a li ta kondjo nomaiyuvo ga faathana, sho a li a pewa oshinakugwanithwa oshipe. Zaina okwa popi a ti: “Oshiholelwa shaMarkus osho lela nda li nda pumbwa, ndi ethe po okukala nda teka omukumo.” Zaina okwa kala wo e na ekwatathano lya kola nookuume ke. Ini itopola ko nenge a kale i iyuvitile ohenda. Okwa hulitha a ti kutya ombepo yaJehova ohayi kwathele ehangano lye nosho wo kutya mboka taya kwatele komeho, oye na ko nasha naye noonkondo. Ihe okwa li wo e shi ndhindhilike kutya ehangano lyaKalunga oli na okuninga shoka sha dhenga mbanda, opo iilonga yaJehova yi longwe.

14. Omalunduluko geni omumwatate Vlado a li ta nyengwa okutaamba ko, noshike sha li she mu kwathele?

 ¹⁴ Omumwatate Vlado, ngoka e na omimvo 73 noku li omukuluntugongalo moSlovenia, okwa li e shi mono oshidhigu, sho egongalo lyawo lya hengumukile mumwe negongalo lilwe, nOshinyanga shUukwaniilwa hoka a li ha gongala sha patwa. Okwa ti: “Kanda li ndu uvite ko kutya omolwashike Oshinyanga shUukwaniilwa shoka oshiwanawa, shi na okupatelwa. Onda li nda yemata, oshoka opo owala twa adhika twe shi opalekulula. Ngaye omuhongi gwiipilangi, nonda li nda tula mo iinima iipe. Shimwe ishewe, sho omagongalo ga hengumukile mumwe, opwa ningwa omalunduluko ogendji, ngoka kaaga li omapu kutse mboka twa kulupa.” Oshike sha kwathele omumwatate Vlado a yambidhidhe elunduluko ndyoka? Okwa yelitha a ti: “Okutaamba ko omalunduluko ngoka haga ningwa kehangano lyaJehova, ohashi eta aluhe omayambeko. Omalunduluko ngaka, ohage tu kwathele tu ilongekidhile omalunduluko omanene ngono taga ka ningwa monakuyiwa.” Mbela oto nyengwa okutaamba ko omalunduluko ngoka hage ya po, uuna egongalo lyontumba lya hengumukile mumwe negongalo lilwe nenge oshinakugwanithwa shoye sha lunduluka? Kala wu na uushili kutya Jehova oku uvite ko omaiyuvo goye. Uuna to yambidhidha omalunduluko ngoka nokukala omudhiginini kuJehova nokehangano ndyoka ta longitha, oto ka yambekwa. — Eps. 18:25.

15. Ongiini tatu vulu okukala twa tonata, uuna twa adhika komashongo ngoka tage tu ziilile megongalo?

¹⁵ Sho tatu hedha popepyeelela nehulilo lyuuyuni mbuka, otatu ka adhika komashongo tage tu ziilile megongalo. Omashongo ngono otaga vulu okumakela uudhiginini wetu kuJehova. Onkee otu na okukala twa tonata. Ngele owu uvite wa ningwa nayi kOmukriste omukweni, ino mu kwatela onkone. Ngele owa pewa egeeloputudho, ino gandja eitulomo kunkene tashi ku sitha ohoni, ihe taamba ko omayele nokuninga omalunduluko ngoka ga pumbiwa. Uuna ehangano lyaJehova lya ningi omalunduluko ngoka ge ku guma paumwene, ga taamba ko nomutima aguhe nokuvulika kewiliko ndyoka.

16. Oshike to vulu okuninga opo wu kale wi inekela muJehova nomehangano lye?

¹⁶ Oto vulu okukala wi inekela muJehova nomehangano lye, uuna uudhiginini woye tawu makelwa. Ihe opo wu shi ninge, owa pumbwa okukala wa tonata, sha hala okutya okukala wa ngungumana, okudhiladhila nawa nokutala ko iinima ngaashi Jehova he yi tala ko. Kala wa tokola toko okukonakona kombinga yaantu mboka ya popiwa mOmbiimbeli, mboka ya li ya vulu okusinda omashongo nomupondo ngaashi goye, e to tedhatedha kiiholelwa yawo. Galikana kuJehova e ku kwathele. Shimwe ishewe, ino itopola ko nando kegongalo. Kutya nduno oshike shi ningwe po, Satana ita ka vula oku tu topola ko kuJehova nokehangano lye. — Jak. 4:7.