1-2. (a) Omapulo geni tatu ka kundathana? (b) Oshike tashi ulike kutya Jehova okwa halelela oku tu kwathela?

 JEHOVA ota vulu oku tu kwathela tu idhidhimikile omaupyakadhi getu notu kale twa nyanyukwa sho tatu mu longele. Omomikalo dhini Jehova he tu kwathele? Ongiini tatu vulu okumona uuwanawa thiluthilu mekwatho ndyoka Jehova he tu pe? Omapulo ngaka otaga ka yamukulwa moshitopolwa shika. Ihe manga inaatu konakona omayamukulo gago, natu ka taleni kepulo ndika lye ga pamba: Jehova okwa hala ngaa shili oku tu kwathela?

² Oshitya shimwe sha longithwa komuyapostoli Paulus montumwafo ndjoka a li a nyolele Aahebeli, otashi vulu oku tu kwathela tu mone eyamukulo. Paulus okwa nyola a ti: “Omuwa oye omukwathi gwandje, itandi tila sha. Omuntu ota ningi ndje shike?” (Heb. 13:6) Omambo guuyelele wOmbiimbeli otaga ti kutya oshitya “omukwathi,” ngaashi sha longithwa movelise ndjoka, otashi popi omuntu ngoka ha endelele a ka kwathele gumwe ngoka ta kugu a kwathelwe. Kala ando wa fa wu wete Jehova te endelele a ka kwathele omuntu gwontumba e li muudhigu. Oto tsu kumwe nasho kutya eyelitho ndyoka otali ulike kutya Jehova oha kala a halelela oku tu kwathela. Uuna e tu kwathele, ohatu vulu okwiidhidhimikila omaupyakadhi getu nenyanyu.

3. Jehova ohe tu kwathele momikalo ndatu dhini tu idhidhimikile omaudhigu getu nenyanyu?

³ Omomikalo dhimwe dhini Jehova he tu kwathele tu idhidhimikile omaudhigu nenyanyu? Opo tu yamukuleni epulo ndyoka, natu yeni pembo lyaJesaja. Omolwashike? Omolwaashoka omahunganeko ogendji ngoka Jesaja a li a nwethwa mo a nyole, oga  kwatela mo aapiya yaKalunga kunena. Shimwe ishewe, olundji Jesaja okwa hokolola Jehova momukalo mono tatu vulu oku mu uva ko nuupu. Pashiholelwa, tala ontopolwa 30 yaJesaja. Montopolwa ndjoka, Jesaja okwa longitha omathaneko omawanawa a popye nkene Jehova he tu kwathele tu li oshigwana she. Okwa nyola a ti kutya Jehova ohe tu kwathele (1) moku tu pulakena neitulomo nomokuyamukula omagalikano getu, (2) moku tu wilika nosho wo (3) moku tu pa iinima mbyoka twa pumbwa ngashingeyi nosho wo monakuyiwa. Ngashingeyi natu kundathaneni omikalo ndhika ndatu moka Jehova he tu kwathele.

4. (a) Jehova okwa li a popi Aajuda yopethimbo lyaJesaja kutya oye li ngiini, nokwa li a pitike shike shi ningwe? (b) Etegameno lini Jehova a li a pe Aajuda mboka aadhiginini? (Jesaja 30:18, 19)

⁴ Movelise yotango yontopolwa 30 yaJesaja, Jehova okwa popi Aajuda a ti, “aatangalali” (NW) mboka haya ‘ndumbile oondjo mumwe.’ Okwa tsikile ko a ti: “Oya tsile Kalunga ondumbo, . . .  aluhe otaa tindi okupulakena omalongo gOmuwa.” (Jes. 30:1, 9) Molwaashoka aantu mboka oya li ya tindi okupulakena, Jesaja okwa li a hunganeke kutya Jehova ote ke ya etha ya mone iihuna. (Jes. 30:5, 17; Jer. 25:8-11) Shilishili, oya li ya falwa kAababilon muupongekwa. Ihe mokati kAajuda mboka omwa li yamwe aadhiginini, na Jesaja okwa li e ya nine etumwalaka lyetegameno. Okwe ya lombwele kutya esiku limwe Jehova ote ke ya pitika ya galukile kegumbo nokukala ishewe muIsraeli. (Lesha Jesaja 30:18, 19.) Naashoka osho lela sha ka ningwa. Jehova okwa li e ya mangulula mo muBabilonia. Ihe opwa li pwa piti omimvo odhindji manga inee ya mangulula. Oohapu “Omuwa ota tegelele e mu sile ohenda,” odha li tadhi ulike kutya opwa li tapu ka pita ethimbo, manga Aaisraeli mboka aadhiginini inaaya mangululwa. Nokuli oya li ya kala omimvo 70 muupongekwa muBabilonia, manga yamwe yomuyo inaaya galukila kuJerusalem. (Jes. 10:21; Jer. 29:10) Aaisraeli sho ya li oonkwatwa muBabilonia, oya li ya lili molwaashono ya yemata, ihe sho ya galukile kegumbo, oya li ya lili molwaashoka ya nyanyukwa.

5. Jesaja 30:19 ote tu shilipaleke shike?

⁵ Kunena otatu vulu okutsuwa omukumo koohapu: “Uuna tamu mu kugile onkugo, ote mu kwatha.” (Jes. 30:19) Jesaja ote tu shilipaleke kutya Jehova ota ka pulakena i itula mo, uuna tatu Mu kugile onkugo nOte ke tu yamukula nziya, uuna tatu galikana kuye. Jesaja okwa gwedha ko a ti: “Nge te ku uvu, ote ku itaale mbala.” (OB-1954) Oohapu ndhoka otadhi tu dhimbulukitha kutya Tate yetu okwa halelela oku tu kwathela, uuna tatu mu pula ekwatho. Okukala tu shi oshinima shoka, ohashi tu kwathele tu idhidhimike nenyanyu.

6. Oohapu dhaJesaja otadhi ulike ngiini kutya Jehova oha pulakene kegalikano lyomupiya gwe kehe?

⁶ Ovelise ndjika otayi tu longo ishewe shike kombinga yomagalikano getu? Jehova oha kala a pulakena neitulomo kukehe gumwe gwomutse sho ta galikana. Omolwashike tatu tile ngawo? Omolwaashoka oshitopolwa shopetameko shontopolwa 30 yaJesaja, omwa longithwa oshityapeha “ne” sha longithwa pauwindji, molwaashoka Jehova ota popi noshigwana she. Ihe movelise 19 omwa longithwa iitya tayi ulike uushimwe ngaashi “ito,” molwaashoka ota popi ta lombwele omuntu pauhandimwe. Jesaja okwa nyola a ti: ‘Ito ka lila we’; “oye ote ku sile ohenda”; “ote ku itaale mbala.” (OB-1954) E li Tate omunahole, Jehova ke na esiku a lombwele omwanamati nenge omwanakadhona ngoka a teka omukumo ta ti: “Kala wa kola ngaashi omumwaho nenge omumwanyoko ngoka.” Pehala lyaashono, oku na ko nasha nakehe gumwe gwomutse noha gandja eitulomo kegalikano lye. — Eps. 116:1; Jes. 57:15.

7. Jesaja naJesus oyu ulike ngiini kutya osha simana okutsikila okugalikana?

 ⁷ Uuna tatu galikana kuKalunga kombinga yoshinima shontumba tatu ipula nasho, nziya Jehova ohashi vulika e tu pe oonkondo tu idhidhimikile onkalo ndjoka. Ngele uudhigu wetu itawu zi po nziya ngaashi twa li twa tegelela, otashi vulika tu kale twa pumbwa okupula Jehova lwiikando e tu pe oonkondo tu wu idhidhimikile. Ote tu hiya tu ninge ngaaka. Shoka osha popiwa moohapu dhaJesaja ndhoka tadhi ti: “Inamu . . . pa [Jehova] evululuko.” (Jes. 62:7) Shoka osha hala okutya ngiini? Osha hala okutya otu na okutsikila okugalikana kuJehova meityo ndika kutya itaatu mu pe ompito a vululukwe. Oohapu dhaJesaja otadhi tu dhimbulukitha omathaneko gaJesus kombinga yegalikano ngoka taga adhika muLukas 11:8-10, 13. Moovelise ndhoka Jesus ote tu ladhipike tu galikane ‘nuudhiginini’ notu tsikile ‘okwiindila’ ombepo ondjapuki. Otatu vulu wo okwiindila Jehova e tu pe ewiliko ndyoka twa pumbwa, opo tu ninge omatokolo omawanawa.

8. Pethimbo lyonale, oohapu ndhoka dhi li muJesaja 30:20, 21 odha li dha gwanithwa ngiini?

⁸ Lesha Jesaja 30:20, 21. Sho etangakwiita lyaBabilonia lya li lya kondeka Jerusalem uule womumvo netata, Aajuda oya li ya adhika komaudhigu ogendji ngoka ga li ga ha ga fa oshikwiila nomeya. Ihe shi ikolelela kovelise 20 no 21, Jehova okwa li e ya uvanekele kutya ngele oyi itedhulula e taya lundulula omikalo dhawo, ote ya hupitha. Jesaja okwa ti kutya Jehova ‘Omulongi Omunenenene,’ (NW) nokwa li u uvanekele oshigwana shoka kutya Jehova ote ke shi longa momukalo ngoka a hokwa. Oohapu ndhoka odha li dha gwanithwa sho Aajuda ya mangululwa muupika. Jehova okwa li a ulike kutya ye Omulongi Omunenenene, nokohi yewiliko lye, aantu ye oya li ya pondola mokutotulula elongelokalunga lya yela. Otwa nyanyukwa noonkondo, sho tu na Jehova e li Omulongi gwetu Omunenenene kunena.

9. Omomukalo gumwe guni Jehova he tu longo kunena?

⁹ Moovelise ndhika Jesaja okwa ti kutya tse otwa fa aalongwa mboka tatu longwa kuJehova momikalo mbali. Omukalo gwotango, Jesaja okwa ti: ‘Omeho goye otaga ka kala nokutala Omulongi gwoye Omunenenene.’ (OB-1954) Methaneko ndika, Omulongi ngoka ota popiwa e li komeho gaalongwa ye. Kunena oshi li uuthembahenda uunene kutse okulongwa kuJehova. Jehova ohe tu longo ngiini? Ohe shi ningi okupitila mehangano lye. Inatu nyanyukwa tuu sho hatu pewa elongo lya yela okuza kehangano lyaJehova! Elongo ndyoka hatu pewa pokugongala,  piigongi iinene niishona, okupitila miileshomwa, mopolohalama yotiivii JW, nomomikalo dhilwe, ohali tu kwathele tu idhidhimikile omaupyakadhi getu nenyanyu.

10. Omomukalo guni hatu uvu ‘ewi lyaKalunga tali zi konima yetu’?

¹⁰ Jesaja okwa popi omukalo omutiyali moka Jehova he tu longo a ti: “Otamu ka uva ewi konima yeni.” Omuhunganeki nguka okwa popi kombinga yaJehova kutya okwa fa omulongi i itula mo, ta ende e li konima yaalongwa ye, te ya a lombwele kutya ondjila yini ye na okweenda. Kunena ohatu uvu ewi lyaKalunga tali tu ziilile konima yetu. Ngiini mbela? Okupitila moohapu dhaKalunga dha nwethwa mo ndhoka dha nyolwa mOmbiimbeli omimvo odhindji dha ka dhi longela. Onkee uuna tatu lesha Ombiimbeli, ohatu kala twa fa tu uvite ewi lyaKalunga tali tu ziilile konima yetu. — Jes. 51:4.

11. Opo tu idhidhimike nenyanyu, iinima yini twa pumbwa okuninga nomolwashike?

¹¹ Ongiini tatu vulu okumona uuwanawa thiluthilu mewiliko ndyoka Jehova he tu pe okupitila mehangano lye nomOohapu dhe? Ndhindhilika kutya Jesaja okwa popi iinima iyali. Shotango, “ondjila oyo ndjika.” Oshitiyali, “yi landuleni.” (Jes. 30:21) Inashi gwana owala okutseya “ondjila.” Otwa pumbwa wo oku ‘yi landula.’ Ohatu ilongo kutya Jehova okwa hala tu ninge shike mOohapu dhe, ngaashi hatu dhi yelithilwa kehangano lye. Ohatu ilongo wo okutula miilonga shoka tatu ilongo. Opo tu idhidhimike nenyanyu sho tatu longele Jehova, otwa pumbwa okuninga iinima ayihe mbyoka. Kungawo, opo owala tatu ka kala tu na uushili kutya Jehova ote tu yambeke.

12. Shi ikolelela kuJesaja 30:23-26, Jehova okwa li a yambeke oshigwana she ngiini?

¹² Lesha Jesaja 30:23-26. Ehunganeko ndika olya li lya gwanithilwa ngiini Aajuda mboka ya galukile koshilongo shawo, Israeli, konima sho ya kala muupongekwa muBabilonia? Jehova okwa li e ya pe iinima oyindji yi ya kwathele ya kale ye na omwenyo noya tsikile oku mu longela. Iinima yimwe mbyoka iikulya oyindji yopalutu. Ihe shoka sha simanenena, okwa li e ya pe kehe shimwe shoka ya pumbwa, opo ya hedhe popepi naye noya tameke ishewe oku mu longela momukalo ngoka a hokwa. Oshigwana shaKalunga pethimbo ndyoka, osha li sha mono omayambeko ogendji ge vulithe nokuli pwaangoka sha li shi na nale. Ngaashi tashi popiwa movelise 26, Jehova okwa li e shi pe uuyelele owundji, ano e shi kwathele shu uve ko Oohapu dhe. (Jes. 60:2) Omayambeko gaJehova oga kwathele aapiya ye ya tsikile oku mu longela nenyanyu nonomukumo, molwaashoka oya li ye na “ombili yokomwenyo.” — Jes. 65:14, NW.

13. Ehunganeko kombinga yokutotulula elongelokalunga lyashili olya kala tali gwanithwa ngiini pethimbo lyetu?

 ¹³ Mbela ehunganeko kombinga yokutotulula elongelokalunga lyashili olye tu kwatela mo ngaa kunena? Osho lela! Omomukalo guni? Okuza mo 1919 E.N., aantu omamiliyona oya manguluka mo muukwatwa waBabiloni Oshinene, ano uukwaniilwa womalongelokalunga giifundja. Oya kwathelwa ye ye mehala ewanawa lela li vule Evi lyEuvaneko lyaIsraeli. Oya kwathelwa ye ye moparadisa yopambepo. (Jes. 51:3; 66:8) Oparadisa yopambepo oshike?

14. Oparadisa yopambepo oshike, noolye ye li mo kunena? (Tala Uutumbulilo wa yelithwa.)

¹⁴ Okuza mo 1919 E.N., aagwayekwa oya kala nokutyapula okukala moparadisa yopambepo. b Mokweendela ko kwethimbo, mboka ye na etegameno lyoku ka kala kombanda yevi, ano ‘oonzi dhilwe,’ nayo oye ya mo moparadisa ndjoka noya kala taya tyapula omayambeko gaJehova ogendji. — Joh. 10:16; Jes. 25:6; 65:13.

15. Oparadisa yopambepo oyi li peni?

¹⁵ Oparadisa yopambepo oyi li peni? Aalongeli yaJehova otaya adhika muuyuni awuhe. Onkee ano, oparadisa yopambepo moka ye li, nayo oyi li muuyuni awuhe. Kunena, kutya nduno otu li peni muuyuni, otatu vulu okukala moparadisa yopambepo shampa owala tatu yambidhidha elongelokalunga lyashili twa itula mo.

16. Ongiini tatu vulu okutsikila okumona eopalo lyoparadisa yopambepo?

¹⁶ Kakele kiinima yilwe, opo tu kale moparadisa yopambepo, otu na okukala tu na olupandu lwegongalo lyopaKriste lyomuuyuni awuhe. Ongiini tatu vulu oku shi ninga? Omokugandja eitulomo keopalo lyalyo, ihe hakokwaagwanenena kwaamboka ye li mo. (Joh. 17:20, 21) Omolwashike sha simana noonkondo? Dhiladhila keyelekanitho ndika. Ohatu mono omiti dha yoolokathana dhi li moparka ombwanawa nenge moshikunino. Sha faathana, oparadisa yopambepo ndjoka yi li megongalo lyopaKriste kunena oyi na aamwatate naamwameme ya yoolokathana mboka taya yelekanithwa nomiti. (Jes. 44:4; 61:3) Otwa pumbwa okushilipaleka  kutya otatu tsikile okugandja eitulomo keopalo lyokuti hoka kopathaneko, ihe hakomapuko ngoka ge li ‘komiti’ ndhoka dhi li popepyeelela natse. Katu na okweetha okwaagwanenena kwetu nenge kwayalwe megongalo, ku tu imbe okumona eopalo lyegongalo alihe lyopaKriste ndyoka lya hangana muuyuni awuhe.

17. Oshike kehe gumwe gwomutse e na okuninga a humithe komeho uukumwe megongalo?

¹⁷ Oshike kehe gumwe gwomutse e na okuninga, opo a kaleke po uukumwe megongalo? Omokukala ha panga ombili. (Mat. 5:9; Rom. 12:18) Ethimbo kehe tatu kambadhala okuhumitha komeho ombili nooyakwetu megongalo, ohashi gwedha ko keopalo lyoparadisa yopambepo. Ohatu kaleke momadhiladhilo kutya Jehova oye e eta omuntu kehe ngoka e li moparadisa yopambepo melongelokalunga lyashili. (Joh. 6:44) Dhiladhila owala nkene Jehova ha kala a nyanyukwa sho e tu tala tatu longo nuudhiginini tu kaleke ombili nuukumwe mokati ketu, tu li oshigwana she shi na ondilo! — Jes. 26:3; Hag. 2:7.

18. Oshike tu na okukala hatu tedhatedha kombinga yasho, nomolwashike?

¹⁸ Jehova oha pe aapiya ye iinima iiwanawa. Ihe ongiini tatu vulu okumona mo lela uuwanawa miinima mbyoka? Otatu vulu okukala hatu dhiladhila muule kwaashoka hatu lesha mOohapu dhe nosho wo miileshomwa yetu ya kankamena kOmbiimbeli. Uuna tatu konakona nokutedhatedha kudho, otashi ke tu kwathela tu kokeke omaukwatya gopaKriste, ngoka tage tu kwathele tu ulike “ohole yaamwayinathana” nosho wo “okusimanekathana” megongalo. (Rom. 12:10) Uuna tatu tedhatedha komalaleko nuuyamba ngoka tu na ngashingeyi, ohatu koleke ekwatathano lyetu naJehova. Sho tatu tedhatedha kiinima mbyoka iiwanawa Jehova e tu uvanekela, etegameno lyetu lyoku mu longela sigo aluhe, ohali kala wo lyolela kutse. Iinima ayihe mbyoka otayi ke tu kwathela tu longele Jehova twa nyanyukwa lela.

19. (a) Shi ikolelela kuJesaja 30:18, uushili wuni tatu vulu okukala tu na? (b) Oshike tashi tu kwathele tu idhidhimike nenyanyu?

¹⁹ Jehova “okwi ilongekidha” a ka hulithe po uuyuni mbuka wa kolokosha peha lyetu. (Jes. 30:18) Otu na lela einekelo kutya Jehova, ‘Kalunga ngoka aluhe ha ningi ashike shoka shu uka’ ita ka pitika uuyuni waSatana wu kale po sigo aluhe. (Jes. 25:9) Otwa tegelela neidhidhimiko esiku ndyoka Jehova te ke tu hupitha. Ihe ngashingeyi, otwa tokola toko tu tsikile okukala twa lenga uuthembahenda wegalikano, wokukonakona nokutula miilonga Oohapu dhaKalunga, nokutedhatedha komayambeko getu. Pompito opo tuu mpoka, Jehova ote tu kwathele tu idhidhimike nenyanyu sho tatu mu longele.