1. Otatu vulu okuningilwa shike, notatu vulu okukala tu na uushili wuni?

 AANTU yamwe otaye ke tu pataneka sho tatu uvitha. Omapataneko ngoka otashi vulika ga ka indjipale monakuyiwa. (Dan. 11:44; 2 Tim. 3:12; Eh. 16:21) Nonando ongawo, otatu vulu okukala tu na uushili kutya Jehova ote ke tu pa ekwatho ndyoka twa pumbwa. Omolwashike? Omolwaashoka Jehova okwa kala nokukwathela aapiya ye ya gwanithe po iinakugwanithwa yawo, kutya nduno iinakugwanithwa mbyoka iidhigu shi thike peni. Opo tu shi uve ko, natu ka kundathaneni iiningwanima yimwe mbyoka ya li ya ningwa monkalamwenyo yomuhunganeki Hesekiel, ngoka a li a uvithile Aajuda mboka ya li muupongekwa muBabilonia.

2. Aantu mboka ya li haya uvithilwa kuHesekiel Jehova okwe ya popi kutya oya li ya tya ngiini, noshike tatu ka kundathana moshitopolwa shika? (Hesekiel 2:3-6)

² Aantu yomoshitopolwa moka mwa li hamu uvithilwa kuHesekiel oya li ya tya ngiini? Jehova okwa li e ya popi kutya “aatangalali,” oye na “omanganga” yo “aanandumbo.” Oya li ya nika oshiponga ya fa omakwega noondje. Nomolwaashoka Jehova a li a lombwele Hesekiel lwiikando a ti: “Ino tila”! (Lesha Hesekiel 2:3-6.) Hesekiel okwa li a vulu okugwanitha po oshinakugwanithwa she shokuuvitha, molwaashoka okwa li (1) a tumwa kuJehova, (2) okwa li a nkondopalekwa kombepo yaKalunga ondjapuki nosho wo (3) Oohapu dhaKalunga odha li dhe mu ningitha a kale e na eitaalo lya kola. Iinima mbyoka itatu oya li ya kwathele ngiini Hesekiel? Ongiini hayi tu kwathele kunena?

3. Oohapu dhini tashi vulika dha li dha nkondopaleke Hesekiel, na Jehova okwa li e mu shilipaleke ngiini kutya ote ke mu kwathela?

³ Jehova okwa li a lombwele Hesekiel a ti: “Otandi ku tumu.” (Hes. 2:3, 4) Oohapu ndhoka odhi na okukala dha li dha nkondopaleke  Hesekiel. Omolwashike? Omolwaashoka Hesekiel otashi vulika a li a dhimbulukwa kutya Jehova okwa li a lombwele Moses naJesaja oshinima sha faathana, sho e ya hogolola ya ninge aahunganeki ye. (Eks. 3:10; Jes. 6:8) Hesekiel okwa li wo e shi kutya Jehova okwa li a kwathele aahunganeki mboka yaali, ya gwanithe po iinakugwanithwa yawo iidhigu. Onkee ano, sho Jehova a lombwele Hesekiel iikando ayihe iyali a ti: “Otandi ku tumu,” omuhunganeki ngoka okwa li e na etompelo ewanawa lyokwiinekela mekwatho lyaJehova. Shimwe ishewe, membo lyaHesekiel otatu adha mo oohapu ndhika iikando oyindji, tadhi ti: “Omuwa okwa lombwele ndje a ti.” (Hes. 3:16; 6:1) Odhoshili kutya Hesekiel okwa li a tompwa kutya Jehova oye e mu tuma. Shimwe ishewe, he yaHesekiel okwa li omuyambi, onkee otashi vulika a li a longo Hesekiel kutya Jehova okwa kala aluhe nokulombwela aahunganeki Ye kutya ote ya kwathele. Pashiholelwa, Jehova okwa li a lombwele Jakob naJeremia a ti: “Ondi li pungoye.” — Gen. 26:24; 28:15; Jer. 1:8.

4. Oohapu dhini tadhi hekeleke dhi na okukala dha li dha nkondopaleke Hesekiel?

⁴ Aaisraeli oya li taye ki inyenga ngiini, sho taya uvithilwa kuHesekiel? Jehova okwa ti: “Kape na nando ogumwe gwomAaisraeli ta ka hala a pulakene [kungoye]; nokuli itaaka pulakena ndje nando.” (Hes. 3:7) Aantu sho ya tindi okupulakena kuHesekiel, oya tindi okupulakena kuJehova. Oohapu ndhoka odha li dha shilipaleke Hesekiel kutya sho aantu ya tindi okupulakena kuye, inashi hala okutya okwa ndopa okugwanitha po oshinakugwanithwa she. Jehova okwa li wo a shilipaleke Hesekiel kutya ngele epangulo ndyoka a li te ya uvithile olye ya, aantu mboka oya li taa ka “tseya kutya omuhunganeki okwa kala mokati kawo.” (Hes. 2:5; 33:33) Osha yela kutya oohapu ndhoka tadhi hekeleke, odha li dha tsu Hesekiel omukumo, opo a gwanithe po oshilonga she shokuuvitha.

5. Shi ikolelela kuJesaja 44:8, oshike hashi tu tsu omukumo?

⁵ Ohashi tu tsu omukumo okukala tu shi kutya Jehova oye e tu tuma. Ohe tu simaneke sho he tu ithana “oonzapo” dhe. (Jes. 43:10) Kawu shi tuu uuthembahenda uunene! Ngaashi owala Jehova a li a lombwele Hesekiel a ti: “Ino tila,” nokunena Jehova ohe tu lombwele ta ti: “Inamu tila.” Omolwashike kaatu na okutila aapataneki yetu? Ngaashi Hesekiel, Jehova oye e tu tuma nohe tu yambidhidha. — Lesha Jesaja 44:8.

6. (a) Jehova ohe tu shilipaleke ngiini kutya ote tu yambidhidha? (b) Oshike hashi tu hekeleke noku tu tsa omukumo?

⁶ Jehova okwe tu shilipaleka kutya ote ke tu kwathela. Pashiholelwa, manga inaa popya a ti: “One oonzapo dhandje,” okwa ti: “Ngele to pitile momeya, ondi li pungoye, nongele ku na omilonga dhomeya, itadhi ku ninginitha. Ngele to pitile momulilo, ito lunguna po, nomalaka gomulilo itage ku fike.” (Jes. 43:2) Sho tatu uvitha, omathimbo gamwe ohatu adhika komashongo ogendji ga fa efundja nomulilo. Nonando ongawo, Jehova ohe tu kwathele tu tsikile okuuvitha. (Jes. 41:13) Ngaashi pethimbo lyaHesekiel, aantu oyendji ohaya tindi etumwalaka lyUukwaniilwa. Ohatu shi kaleke momadhiladhilo kutya sho haye li tindi, shoka itashi ti kutya ihatu uvitha nawa tu li Oonzapo dhaKalunga. Ohashi tu hekeleke noku tu tsa omukumo okukala tu shi kutya Jehova oha kala a nyanyukwa, uuna tatu tsikile okuuvitha nuulaadhi etumwalaka lye. Omuyapostoli Paulus okwa ti: “Kalunga ota ka futa kehe gumwe shi thike piilonga ye.” (1 Kor. 3:8; 4:1, 2) Omumwameme gumwe ngoka a kala omukokolindjila ethimbo ele okwa ti: “Ohashi etele ndje enyanyu okukala ndi shi kutya Jehova ohe tu pe ondjambi, omolwoonkambadhala dhetu ndhoka hatu ningi.”

7. Hesekiel okwa li ha kala e uvite ngiini, uuna a dhiladhila kombinga yemoniko ndyoka a li a mono? (Tala ethano lyokombanda.)

⁷ Hesekiel okwa li a mono nkene ombepo yaKalunga yi na oonkondo. Memoniko limwe okwa li a mono ombepo ondjapuki tayi kwathele iishitwa yopambepo iinankondo nosho wo omagulu omanene getemba lyomegulu. (Hes. 1:20, 21) Hesekiel okwa li i inyenge ngiini? Okwa nyola shoka sha ningwa po, a ti: “Sho nde shi mono, onda tsu oshipala mevi.” Okwa li a kumwa noonkondo nokuli e ta gwile pevi. (Hes. 1:28) Konima, sho Hesekiel a ka dhiladhila kombinga yemoniko ndyoka ekumithi, oli na okukala lya li lye mu tompo kutya kekwatho lyombepo yaKalunga, ota vulu okugwanitha po oshinakugwanithwa she shokuuvitha.

8-9. (a) Oshike sha ningilwa Hesekiel, sho Jehova e mu lombwele a ‘thikame’? (b) Jehova okwa nkondopaleke ishewe Hesekiel ngiini, sho a li ta ka uvithila aantu aatangalali?

⁸ Jehova okwa li a lombwele Hesekiel a ti: “Muna gwomuntu, thikama. Onda hala ndi popye nangoye.” Oohapu ndhoka nosho wo ombepo yaKalunga, oya li ya pe Hesekiel oonkondo ndhoka a li a pumbwa, opo a yambuke po. Hesekiel okwa nyola a ti: “Ombepo yaKalunga oye ya mungame e tayi yambula ndje po.” (Hes. 2:1, 2) Ethimbo alihe Hesekiel a kala ta uvitha, okwa li a wilikwa ‘koshikaha’ shaKalunga, ano kombepo yaKalunga ondjapuki. (Hes. 3:22; 8:1; 33:22; 37:1; 40:1) Ombepo yaKalunga oya li ya nkondopaleke Hesekiel a gwanithe po oshilonga shoka a li a pewa, shokuuvithila aantu “aatangalali noye na omanganga” yomoshitopolwa she. (Hes. 3:7) Jehova okwe mu lombwele a ti: “Otandi ku ningi omukukutu wa kindja we ya fa. Otandi ke kuninga omukukutu wa fa emanya nongaashi ondiamande; ino tila aatangalali mboka.” (Hes. 3:8, 9) Kungawo, Jehova okwa fa a li ta lombwele Hesekiel ta ti: ‘Ino etha omanganga  gaantu mboka ge ku teye omukumo. Otandi ku nkondopaleke.’

⁹ Konima yaashono, ombepo yaKalunga oya li ya enditha Hesekiel moshitopolwa moka a li ta uvithile. Hesekiel okwa nyola a ti: “Oonkondo dhOmuwa odha kwata ndje.” Osha li sha pula omuhunganeki ngoka oshiwike ashihe i ilonge nawa noku uve ko etumwalaka ndyoka a li ta ka uvithila aantu, opo e ke li ya lombwele tu ulike kutya okwa tompwa. (Hes. 3:14, 15) Opo nduno, Jehova okwe mu lombwele a ye molusilu lwontumba moka ‘ombepo yaKalunga ye mu lambele.’ (Hes. 3:23, 24) Hesekiel okwa li i ilongekidha okutameka iilonga ye yokuuvitha.

10. Ekwatho lini twa pumbwa opo tu gwanithe po iilonga yetu yokuuvitha, nomolwashike?

¹⁰ Ekwatho lini twa pumbwa, opo tu gwanithe po iilonga yetu yokuuvitha? Opo tu yamukule epulo ndyoka, natu dhiladhile kwaashoka sha li sha ningilwa Hesekiel. Manga inaa tameka okuuvitha, ombepo yaKalunga oya li ye mu pe oonkondo ndhoka a li a pumbwa. Kunena, ngaashi sha li sha ningilwa Hesekiel, natse otatu vulu owala okulonga iilonga yokuuvitha kekwatho lyombepo yaKalunga. Omolwashike? Omolwaashoka Satana oha ningi kehe shoka ta vulu a hulithe po iilonga yetu yokuuvitha. (Eh. 12:17) Aantu oyendji ohaya dhiladhila kutya Satana oku na lela oonkondo noitatu vulu oku mu sinda. Ihe okupitila miilonga yetu yokuuvitha, ohatu mu sindi! (Eh. 12:9-11) Omomukalo guni? Uuna tatu uvitha, ohatu ulike kutya inatu tila omatilitho gaSatana. Oshikando kehe tatu uvitha, ohatu sindi Satana. Onkee, oshike hashi kala she tu yelela, uuna twa mono kutya otatu vulu okutsikila okuuvitha nonando aatondi yetu otaye tu pataneke? Ohashi kala shi iwetikile kutya ombepo yaJehova otayi tu nkondopaleke nonokutya Jehova okwe tu hokwa. — Mat. 5:10-12; 1 Pet. 4:14.

11. Ombepo yaKalunga otayi ke tu ningila shike, notu na okuninga shike opo tu tsikile oku yi pewa?

¹¹ Oshike ishewe tatu ilongo kombinga yankene Jehova a li a pe Hesekiel oonkondo ndhoka a li a pumbwa opo a uvithe? Ombepo yaKalunga  otayi vulu oku tu pa oonkondo ndhoka twa pumbwa, tu pite muudhigu kehe mboka tashi vulika wu tu adhe miilonga yokuuvitha. (2 Kor. 4:7-9) Oshike nduno tatu vulu okuninga opo tu shilipaleke kutya otwa pewa ombepo yaKalunga? Otwa pumbwa okugalikana twa mana mo, tu na einekelo kutya Jehova ota ka uva omagalikano getu. Jesus okwa longa aalongwa ye a ti: “Indileni, . . . kongeni, . . . konkoleni.” Jehova ota ka “gandja ombepo ondjapuki kumboka taye mu indile.” — Luk. 11:9, 13; Iil. 1:14; 2:4.

12. Shi ikolelela kuHesekiel 2:9–3:3, ondhingambo ndjoka ya li ya pewa Hesekiel oya zi peni noya li yi na shike?

¹² Hesekiel ka li owala a nkondopalekwa kombepo ondjapuki yaKalunga, ihe okwa li wo a nkondopalekwa koohapu Dhe. Memoniko, Hesekiel okwa li a mono oshikaha shi na ondhingambo. (Lesha Hesekiel 2:9–3:3.) Ondhingambo ndjoka oya zi peni? Omwa li mwa nyolwa shike? Oya nkondopaleke ngiini Hesekiel? Natu ke shi kundathaneni. Ondhingambo ndjoka oya li ya zi moshipangelapundi shaKalunga. Otashi vulika Jehova a li a longitha gumwe gwomaayengeli yane, mboka Hesekiel a li a mono petameko ye mu pe ondhingambo ndjoka. (Hes. 1:8; 10:7, 20) Ondhingambo ndjoka oya li yi na oohapu dhaKalunga, etumwalaka lyepangulo ndyoka Hesekiel a li e na oku ka lombwela Aaisraeli aatangalali mboka ya li muupongekwa. (Hes. 2:7) Etumwalaka ndyoka olya li lya nyolwa meni nokombanda yondhingambo ndjoka.

13. Jehova okwa li a lombwele Hesekiel a ninge shike nondhingambo, nomolwashike ya li ontoye?

¹³ Jehova okwa li a lombwele omuhunganeki gwe a lye ondhingambo ndjoka noku ‘kutithe nayo ela lye.’ Hesekiel okwa li a vulika sho a li po ondhingambo ayihe. Oshitopolwa shoka shemoniko ndyoka osha li sha hala okutya ngiini? Hesekiel okwa li a pumbwa okuuva ko nawa thiluthilu etumwalaka ndyoka a li ta ka uvitha. Okwa li e na okwiitala etumwalaka ndyoka opo li mu tse omukumo a uvithe. Opo nduno, opwa li pwa ningwa oshinima oshikumithi. Hesekiel okwa li e shi mono kutya ondhingambo ndjoka, oya li yi na “omulyo gwa fa omagadhi goonyushi.” (Hes. 3:3) Omolwashike? Omolwaashoka kuHesekiel uuthembahenda wokukalela po Jehova, owa li oshinima shi na omulyo, nenge oshiwanawa. (Eps. 19:8-11) Okwa li a pandula lela sho Jehova e mu pitike a ninge omuhunganeki gwe.

14. Oshike sha kwathele Hesekiel a kale i ilongekidha okutaamba ko oshinakugwanithwa she?

¹⁴ Konima yethimbo, Jehova okwa lombwele Hesekiel a ti: “Taamba oohapu dhandje adhihe tandi dhi ku lombwele.” (Hes. 3:10) Sho Jehova a pe Hesekiel omalombwelo ngoka, okwa li te mu lombwele a pungule momadhiladhilo oohapu ndhoka dha nyolwa mondhingambo nokutedhatedha kudho. Sho Hesekiel a ningi ngawo, oohapu ndhoka odha koleke eitaalo lye. Odha li wo dhi na etumwalaka lya kwata miiti ndyoka a li ta ka lombwela Aaisraeli mboka ya li muupongekwa. (Hes. 3:11) Sho Hesekiel a uvu ko nawa e ta itaale etumwalaka lyaKalunga, okwa li i ilongekidha okutameka okuuvitha, nokutsikila oku shi ninga sigo a mana oshinakugwanithwa she shoka. — Eps. 19:14.

15. Opo tu idhidhimike, oshike twa pumbwa “okutaamba” ko?

¹⁵ Opo tu idhidhimike miilonga yokuuvitha, natse otu na okweetha oohapu dhaKalunga dhi tsikile okukoleka eitaalo lyetu. Otwa pumbwa “okutaamba” ko oohapu adhihe ndhoka Jehova te tu lombwele. Kunena, Jehova oha popi natse okupitila mOohapu dhe, Ombiimbeli. Ongiini tatu vulu okushilipaleka kutya Oohapu dhaKalunga otadhi tsikile okwiinyengitha omadhiladhilo getu, omaiyuvo nomainyengotompelo getu?

16. Oshike tu na okuninga nOohapu dhaKalunga, nongiini dhi na okuningina momitima dhetu?

 ¹⁶ Uuna twa li iikulya, omalutu getu ohaga kala ge na oonkondo. Sha faathana, uuna twa konakona Oohapu dhaKalunga nokudhiladhila kombinga yadho, eitaalo lyetu ohali nkondopala. Shoka osho tatu ilongo kombinga yondhingambo. Ngele tashi ya pOohapu dhaKalunga, Jehova okwa hala ‘tu kutithe nadho omala getu,’ ano oku dhi uva ko nawa. Otatu vulu oku shi ninga mokugalikana, mokulesha nomokutedhatedha. Tango, ohatu galikana tu longekidhe omitima dhetu dhi taambe ko omadhiladhilo gaKalunga. Opo nduno, tatu lesha oohapu dhontumba mOmbiimbeli, e tatu mwena po tu tedhatedhe, ano tu dhiladhile muule kombinga yaashoka twa lesha. Oshike tashi ka ningwa po? Ngele otwa tsikile okutedhatedha, omutima gwetu gwopathaneko otagu ka taamba ko Oohapu dhaKalunga.

17. Omolwashike sha simana okutedhatedha kwaashoka twa lesha mOmbiimbeli?

¹⁷ Omolwashike sha simana okulesha Ombiimbeli nokutedhatedha kuyo? Omolwaashoka okuninga ngawo, ohaku tu pe oonkondo ndhoka twa pumbwa tu uvithe etumwalaka lyUukwaniilwa ngashingeyi, notu ka uvithe etumwalaka edhigu lyepangulo monakuyiwa yi li popepi. Shimwe ishewe, uuna tatu tedhatedha komaukwatya gaJehova omawanawa, ekwatathano lyetu naye ohali kolo shi vulithe nale. Oshizemo, otatu ka nyanyukilwa oshinima oshitoye shili, nenge oshiwanawa, ano ombili yokomutima nokukala twa gwanenwa. — Eps. 119:103.

18. Aantu moshitopolwa shetu otaya ka zimina shike, nomolwashike?

¹⁸ Hesekiel okwa li omuhunganeki, ihe tse katu shi aahunganeki. Nonando ongawo, otwa tokola toko tu tsikile okuuvitha etumwalaka lyaJehova li li mOohapu dhe sigo iilonga yokuuvitha tayi pu ngaashi a hala. Sho ethimbo lyepangulo tali ke ya, aantu moshitopolwa shetu itaya ka kala ye na etompelo lyokutya inaya uva elondodho lya sha nenge kutya Kalunga okwe yi idhimbika. (Hes. 3:19; 18:23) Pehala lyaashono, otaya ka mona kutya etumwalaka ndyoka twe ya uvithila olya za kuKalunga.

19. Oshike tashi tu pe oonkondo tu gwanithe po iilonga yetu yokuuvitha?

¹⁹ Oshike tashi tu pe oonkondo tu gwanithe po iilonga yetu yokuuvitha? Iinima itatu mbyoka ya li ya nkondopaleke Hesekiel. Ohatu tsikile okuuvitha, molwaashoka otu shi kutya Jehova oye e tu tuma, ohatu nkondopalekwa kombepo yaKalunga ondjapuki, nohatu kolekwa kOohapu dhe. Kekwatho lyaJehova, otwa inyengithwa tu gwanithe po iilonga yetu yokuuvitha nokwiidhidhimika ‘sigo okehulilo.’ — Mat. 24:13.