Manga inaandi mu lombwela kutya oshike sha ka ningwa po konima yaashono, nandi mu lombwele nkene nda tameke iilonga yethimbo lyu udha.

Onda valelwa mokantuntu okawanawa kedhina Curaçao, keli mefuta lyaKaribise, mo 1942. Tate okwa li omvalele yomoSuriname, ihe okwa li a tembukile kokantuntu Curaçao omolwiilonga. Omimvo dha ka pita manga inaandi valwa, tate okwa li gumwe gwomOonzapo dhaJehova dhotango dha li dha ninginithwa moCuraçao. a Okwa li ha konakona natse aanona ye tu li yatano oshiwike kehe, nonando katwa li aluhe hatu kala twa hala okukonakona. Sho nda li ndi na omimvo 14, tate noyaandjetu otwa tembukile koSuriname tu ka sile oshimpwiyu kuku.

Sho nda li moSuriname, onda tameke okweendathana naagundjuka yomegongalo lyetu mboka ya li taya longele Jehova nuulaadhi. Oya li aakuluntu kashona kungame, noya li aakokolindjila yondjigilile. Uuna taya popi kombinga yiimoniwa yawo mbyono ya mona miilonga yokuuvitha, iipala yawo oya li hayi kala tayi adhima kenyanyu. Konima yokugongala, ngame nokuume kandje mboka otwa li hatu kundathana kombinga yiikundathanwa yomOmbiimbeli, omathimbo gamwe sho twa kuutumba pondje twa tala kegulu lyu udha oonyothi uusiku. Ookuume mboka oya li ya kwathele ndje ndi mone kutya oshike nda hala monkalamwenyo; onda li nda hala okulongela Jehova. Onkee onda ninginithwa sho ndi na omimvo 16. Nokonima yethimbo, sho ndi na omimvo 18, onda tameke uukokolindjila wondjigilile.

Ondi ilonga iiyilongomwa oyindji ndi li omukokolindjila, noya kwathela ndje miilonga yethimbo lyu udha. Pashiholelwa, oshiilongomwa shotango shoka ndi ilonga, okombinga yankene sha simana okudheula yalwe. Sho nda tameke okukokola ondjila, omutumwa gwedhina Willem van Seijl okwa tameke okukwathela ndje. b Okwa li a longo ndje oshindji kombinga yankene ndi na okuungaunga niinakugwanithwa  yegongalo. Pethimbo ndyoka, kanda li ndi shi ngele onda pumbwa lela okudheulwa. Omumvo gwa landula ko, onda langekwa po ndi li omukokolindjila i ikalekelwa nonda tameke okukwatela komeho okangundu okashona kaamwatate naamwameme, mbono ya li mokuti kwaSuriname noya li wo kokule negongalo. Onda pandula lela kedheulo ndyoka nda li nda pewa kaamwatate pethimbo! Okuza mpono, onda kala nokulandula oshiholelwa shawo shokukutha ethimbo ndi dheule yalwe.

Oshinima oshitiyali shoka ndi ilonga, osho kutya oshiwanawa okukala inoo indumbila iinima monkalamwenyo nokukala wi iyunganeka nawa lela. Petameko lyomwedhi kehe, ngame nomukokolindjila omukwetu i ikalekelwa otwa li hatu tala kutya iikulya yini nosho wo kutya iinima yilwe yini twa pumbwa miiwike yokomeho. Opo nduno, gumwe gwomutse okwa li hayi molweendo olule koshilando a ka lande shoka twa pumbwa. Othilinga ndjono twa li hatu mono omwedhi kehe, otwa li hatu yi longitha nawa nosho wo iinima yetu opo yi kale po omwedhi aguhe. Ngele oshinima shontumba osha pupo sho tu li mokuti, katwa li naanaa hatu mono omuntu e tu kwathele. Ondi wete kutya sho ndi ilongo okukala inaandi i indumbila iinima monkalamwenyo sho nda li omushona nokukala ndi unganeka nawa, osha kwathela ndje ndi gandje eitulomo kiilonga yaJehova monkalamwenyo yandje ayihe.

Oshiilongomwa oshititatu ndi ilonga, uuwanawa wokulonga yalwe melaka ndyoka ya yama. Sho tandi koko onda kala handi popi Oshiholanda, Oshiingilisa, Oshipapiamento nOshisranatongo (haku tiwa wo Oshisranan), elaka ndyoka hali popiwa kaantu oyendji moSuriname. Ihe mokuti, onda mona kutya aantu oya li ya taamba ko nawa onkundana ombwanawa, sho twe ya uvithile melaka lyawo. Onda li handi shi mono oshidhigu okupopya omalaka gamwe, ngaashi Oshisaramaccan, elaka ndyoka hali longitha omitono hadhi yi pombanda nopevi. Nonando osha li oshidhigu, onda nyanyukwa sho nde shi ningi. Uule womimvo, onda vula okulonga aantu oyendji oshili, molwaashoka ohandi popi elaka ndyoka ya yama.

Odhoshili kutya onda li nda ningi iinima tayi sitha ohoni. Pashiholelwa, oshikando shimwe onda li nda hala okupula omukonakonimbiimbeli gwandje, ngoka ha popi Oshisaramaccan kutya oku uvite ngiini, molwaashoka okwa li e na uuvu womepunda. Ihe onde mu pula owala ngele okwi ihumbata! Eeno epulo ndyono olya li lye mu sitha ohoni. Ihe nonando onda ninga omapuko ngaashi ndyoka, onda kala aluhe handi kambadhala okupopya elaka ndyoka hali popiwa moshitopolwa moka nda li tandi longele.

Mo 1970, onda langekwa ndi li omutonatelishikandjo. Omumvo ngono, onda li nda ulukile uungundu owundji waamwatate naamwameme mboka ye li mokuti kwaAmazon opolohalama yi na oshipalanyolo “Taya talele po oombelewa dhetu oonene muuyuni dhOonzapo dhaJehova.” Ngame naamwatate yamwe otwa li hatu longitha uumbautu tu ye molweendo tu ka talele po aamwatate naamwameme mboka. Mokambautu ketu otwa li hatu tula mo okashina kolusheno, endini lyomahooli, oolamba nosho wo eshina lyokuulika omathano. Uuna twa thiki, otwa li hatu humbata iilongitho ayihe mbyoka tayi ka longithwa popolohalama ndjoka tatu yi fala mokuti. Shoka tandi dhimbulukwa unene kombinga yomalweendo ngoka, osho kutya aantu mboka ya li komahala ge li kokule oya li ye hole oopolohalama ndhoka. Onda li nda nyanyukwa okukwathela yalwe yi ilonge kombinga yaJehova nosho wo kombinga yoshitopolwa  shehangano lye shokombanda yevi. Okumona nkene yalwe taya hedha popepi naJehova, osha ningitha ndje ndi kale nda nyanyukwa sho nda longo iilonga mbyoka iidhigu. Omayambeko ngoka nda mona oge vule kokule omaiyambo ngoka nda ninga, sho tandi longo iilonga yaJehova.

Nonando onda li ndi shi kutya okukala inaandi ya mondjokana oshi na uuwanawa miilonga yandje, onda li natango nda hala okuhokana. Onkee onda galikana kondandalunde ndi mone omukulukadhi ngoka tatu ka longa naye nenyanyu miilonga iidhigu yethimbo lyu udha yokuuvitha momuthitu gwaAmazon. Konima yomumvo lwaampono, onda tameke okweendelathana naEthel omumwameme omukokolindjila i ikalekelwa ngoka e na ombepo yeiyambo. Sho a li omushona, Ethel okwa li e hole noonkondo omuyapostoli Paulus nokwa li a hala a ninge ngaashi ta vulu miilonga yokuuvitha ngaashi ye. Otwa hokana muSeptemba 1971, notwa tameke iilonga yuutonatelishikandjo tu li aaihokani.

MaandjaEthel, yaandjawo kaya li ye na iiniwe oyindji sho ta putuka, onkee okwa li a vulu okwiigilila nuupu iilonga yuuyendi momuthitu gwaAmazon. Pashiholelwa, uuna tatu ilongekidhile okutalela po omagongalo momuthitu ngoka, katwa li hatu yi niinima oyindji. Otwa li hatu yogo oonguwo dhetu nokwiiyoga momilonga. Otwa li wo twa igilile okulya kehe shoka tatu pewa kaamwatate, ngaashi omakakala, oohi dhimwe dha fa omakende, nenge kehe ngaa okanamwenyo hoka ya mona momuthitu nenge oohi dhilwe ndhoka ya kwata. Uuna kaapu na iiyaha, otwa li hatu lile pomafo gomabanana. Uuna kaapu na uusindo, otwa li hatu li noonyala. Ngame naEthel otu uvite kutya sho twa ningi omaiyambo atuhe sho tatu longele Jehova, oshe tu hedhitha popepi notwa ninga twa fa ongodhi ya yogohwa oondali ndatu. (Omuuv. 4:12) Iimoniwa mbyoka itatu, ita tu yi yeleke nando onasha!

Esiku limwe, manga twa li mondjila tatu galuka sho twa li twa ka talela po aamwatate mokuti, opwa li pwa ningwa oshiningwanima shimwe shoka nda popi petameko lyehokololo lyandje. Mokambautu moka twa li oka li ka ningine kohi yomeya, ihe oka li ka anduka ko nziya. Lago enene, otwa adhika twa zala  uundjatha wokuhupitha oomwenyo, naashono oshe tu kwathele kaatu gwe mo mokambautu. Ihe oka li ku udha omeya. Oombiga dhetu ndhoka dha li dhi na iikulya, iikulya otwe yi umbile momulonga e tatu dhi longitha tu kuthe mo omeya mokambautu.

Molwaashoka katwa li we tu na iikulya, otwa tameke okukwata oohi momulonga. Ihe inatu kwata mo nando osha. Onkee otwa galikana kuJehova tatu mu pula e tu pe iikulya yesiku ndyoka. Konima owala sho twa mana okugalikana, omumwatate gumwe oku umbile mo onete yokukwata oohi notwa kwata ohi onene ye tu gwana atuhe yatano tu lye ongulohi ndjoka.

Konima yomimvo ntano miilonga yuutonateli, ngame naEthel otwa mono po omayambeko inaatu ga tegelela, Ethel okwa li a ningi etegelelo. Onda li nda nyanyukwa okuuva onkundana ndjoka, nonando kanda li ndi shi kutya onakuyiwa yetu otayi ka kala naanaa yi li ngiini. Ngame naEthel otwa li twa halelela okukala miilonga yethimbo lyu udha ngele otashi wapa. Mo 1976 omwanamati gwetu Ethniël okwa valwa. Omwanamati gwetu gwonkelo, Giovanni, okwa ka valwa konima yomimvo mbali netata.

Molwaashoka moSuriname omwa li mu na ompumbwe pethimbo ndyoka, oshitayimbelewa osha li sha pitike ndje ndi tsikile okukala omutonatelishikandjo sho tandi tekula aanona yetu. Sho aanona yetu ya li natango aashona, onda li nda pewa oshinakugwanithwa shokutonatela iikandjo mbyoka yi na omagongalo omashona. Oshinima shono osha li sha pitike ndje ndi longe ndi li omutonateli omweendi iiwike yontumba momwedhi kehe, nomasiku ga hupa ko onda li handi longo ndi li omukokolindjila megongalo moka twa li twa tulwa. Ethel noyanamati yetu oya li haya wayimine ndje sho tandi ka talela po omagongalo ngoka ga li popepi negumbo lyetu. Ihe onda li handi yi ongame awike, uuna tandi ka talela po omagongalo, nuuna tandi yi kiigongi mbyoka yi li momuthitu gwaAmazon.

Onda li handi ilongekidha nawa, opo ndi gwanithe po iinakugwanithwa yandje ayihe. Onda li handi shilipaleke kutya otwa ninga elongelokalunga lyuukwanegumbo oshiwike kehe. Uuna nda ka talela po omagongalo momuthitu, Ethel oye a li ha ningi elongelokalunga lyuukwanegumbo naamati yetu megumbo. Ihe otwa li hatu ningi iinima oyindji pamwe tu li uukwanegumbo iikando oyindji ngaashi tashi vulika. Ngame naEthel otwa li hatu kutha ombinga momainyanyudho pamwe naamati yetu, ngaashi okudhana nayo, nenge oku ka talela po omahala omahokithi ngoka ge li popepi negumbo lyetu. Olundji onda li handi tokelwa sigo omokati kuusiku tandi longekidha iitopolwa yomegongalo. Omanga Ethel ngoka a fa  omukulukadhi a popiwa mOmayeletumbulo 31:15, a li ha meneka a shilipaleke kutya otwa lesha omushangwa gwesiku tu li uukwanegumbo, notwa lya oshuumbululwa noyanamati yetu manga inaaya ya kosikola. Inandi pandula tuu sho ndi na omukulukadhi e na ombepo yeiyambo, ngono a kala aluhe nokukwathela ndje ndi gwanithe po iinakugwanithwa yandje mbyoka nda pewa kuJehova!

Tu li aavali, otwa longa nuudhiginini tu kwathele oyanamati yetu ya kale ye hole Jehova nosho wo iilonga yokuuvitha. Otwa li twa hala oyanamati yetu ya hogolole iilonga yethimbo lyu udha oyo yi kale eithano lyawo, hamolwaashoka twa hala osho ya ninge, ihe omolwaashoka olyo lya li ehogololo lyawo. Otwa li aluhe hatu ya lombwele nkene iilonga yethimbo lyu udha tayi vulu oku ya etela enyanyu. Kakele owala kokupopya kombinga yomaupyakadhi, otwa li hatu tsu omuthindo kombinga yankene Jehova e tu kwathela nokwe tu laleka nuuyamba muukwanegumbo wetu. Otwa li hatu shilipaleke wo kutya oyanamati yetu ohaya endathana nOonzapo, ndhoka dha pititha komeho okulongela Jehova monkalamwenyo yadho.

Jehova okwa kala noku tu pa shoka twa pumbwa, sho tatu putudha oyana yetu. Odhoshili kutya onda li nda ningi ashihe shoka tandi vulu, opo ndi sile oshimpwiyu uukwanegumbo wandje. Onkalo ndjoka nda pita muyo sho nda li tandi longo momuthitu ndi li omukokolindjila inaa hokana i ikalekelwa oya longa ndje okupungula oshimaliwa, opo ndi vule okulanda iinima mbyoka nda pumbwa. Ihe omathimbo gamwe, nonando otwa li twa ningi ngaashi tatu vulu, katwa li tu na ashihe shoka twa pumbwa. Poompito ndhono, onda li ndi wete kutya Jehova okwa li e tu kwathele. Pashiholelwa, pehulilo lyo 1980 nasha nosho wo petameko lyo 1990 moSuriname omwa li mu na omakuyunguto. Momimvo ndhono, osha li oshidhigu okumona iipumbiwa ya kehe esiku. Nonando ongawo, Jehova okwa li e yi tu pe. — Mat. 6:32.

Mokukalamwenyo kwandje akuhe, Jehova okwa kala aluhe noku tu sila oshimpwiyu nokwe tu kwathela tu kale twa nyanyukwa notwa gwanenwa. Aanona yetu oye li lela eyambeko enene kutse, naasho twa kala tatu ya putudha ya longele Jehova, oshi li uuthembahenda. Otwa nyanyukwa wo sho ya hogolola iilonga yethimbo lyu udha mokukalamwenyo kwawo. Ethniël naGiovanni ayehe oya pita moosikola dhopakalunga nongashingeyi otaya longo koshitayimbelewa shaSuriname pamwe naakulukadhi yawo.

Tse naEthel ngashingeyi otwa kulupa lela, ihe ohatu kala twi ipyakidhila nokulongela Jehova tu li aakokolindjila yi ikalekelwa. Nonando ohatu kala twi ipyakidhila, ondi na natango okukonga ethimbo lyokwiilonga okuyoga. Ihe, ihandi ipe nando oombedhi. Okutala konakuziwa yandje, ondi uvite shili kutya etokolo ndyoka nda ninga, sho nda li omugundjuka lyokuya miilonga yethimbo lyu udha, etokolo lya dhenga mbanda lyomomatokolo ngoka nda ninga.