Paul: MuNovomba 1985, otwa li twa nyanyukwa noonkondo sho tatu yi koLiberia, oshilongo shi li muAfrika lyokUuninginino, koshinakugwanithwa shetu shotango tu li aatumwa. Ondhila yetu oya li ya lambele moSenegal. Omumwameme Anne okwa ti: “Konima owala yowili yimwe, otatu ka kala tu li moLiberia.” Opo ihe otwa li tu uvu etseyitho tali ti: “Mboka ya uka koLiberia, naya ze mo mondhila, oshoka itayi vulu we oku ka thika koLiberia, omolwaantu mboka ya hala okuumba ko epangelo koshipundi.” Otwa kala pamwe naatumwa moSenegal, uule womasiku omulongo. Otwa li twa uvu oonkundana dhokoLiberia, dhi na ko nasha nomidhimba tadhi tutwa noololi nosho wo omangambeko ngoka ga tulwa po kepangelo, naamboka itaa ya vulika kugo, ohaya dhipagwa.

Anne: Otwa li aluhe hatu kala twa kotoka. Odhoshili kutya okuza kuunona, onda li nda tseyika nawa kutya ngame omumbanda. Onda li handi kala nokuli nda tila okutaaguluka opate. Ihe otwa li twa tokola tu ye koshinakugwanithwa shetu.

Paul: Ngame naAnne, otwa valelwa kuuninginino waIngilanda nopokati kiitopolwa mbyoka hatu zi, opwa li pu na owala ookilometa hetatu. Aavali yandje, nameme gwaAnne, oya li ye tu tsu omukumo notwa tameke okukokola ondjila, konima sho twa mana osikola. Oya ambidhidha etokolo lyetu lyokukala miilonga yethimbo lya udha. Sho ndi na omimvo 19, onda li nda hiywa ndi ye koBetel, na Anne okwa li a wayimine ndje konima sho twa hokana mo 1982.

Anne: Otwa li tu hole moBetel, ihe elalakano lyetu olya li aluhe oku ka uvithila kiitopolwa hoka ku na ompumbwe onene. Okulonga pamwe moBetel naamboka ya li nale aatumwa, osha koleke ehalo ndyoka. Otwa kala hatu galikana kondandalunde kombinga yasho, ongulohi kehe, uule womimvo ndatu. Onkee otwa li twa nyanyukwa noonkondo sho twa hiywa tu ka hite ongundu onti-79 yosikola yaGilead. Okuza hono, otwa tuminwa koLiberia, kUuninginino waAfrika.

Paul: Otwa yi nondhila yotango, ndjoka ya uka koLiberia. Aantu oya li ya tila noonkondo nomoshilongo omwa li okangendjo kuusiku. Aantu oya li haya kala ya mbandapala, nuuna ya uvu ohauto tayi uma mokule,  oya li haya kugu nokufadhuka po. Opo tu kale twa ngungumana, otwa li hatu lesha oohapu dhOmapisalomi ongulohi kehe. Ihe otwa li tu hole lela oshinakugwanithwa shetu. Anne okwa li omutumwa omanga ngame nda li handi longo kObetel pamwe naJohn Charuk. a Molwaashoka omumwatate John okwa kala moLiberia ethimbo nuule, onda li nda ilongo oshindji koshiholelwa she, oshoka okwa li e shi nawa omashongo noonkalo ndhoka aamwatate ya taalela.

Anne: Oshike she tu ningitha tu igilile moLiberia nziya? Aamwatate naamwameme. Oye tu ulukile ohole noya li aadhiginini. Otwa igililathana nayo notwa li twa fa aantu yegumbo limwe. Oohapu dhawo dhetsomukumo odha li dhe tu nkondopaleke. Otwa li lela tu hole iilonga yokuuvitha. Aanegumbo ohaya kala ya yemata, uuna we ya talele po, ihe ino kala po ethimbo. Aantu oya li haya kala taya kundathana omapulo gopaMbiimbeli, esiku kehe momapandaanda. Shono osha li hashi tu egululile ompito tu popye nayo. Otwa li tu na aakonakonimbiimbeli oyendji nosha li hashi kala oshidhigu okumona ethimbo lyokukonakona nayo ayehe. Otwa li lela hatu shi tyapula.

Paul: Konima yomimvo ne, okuza sho moshilongo mwa li mu na ombili, omwa ningwa elunduluko tali halutha, sho mo 1989, mwa tukuka iita yopashigwana. Momasiku 2 Juli 1990, omatanga gaatsindumbo nepangelo, oga li ga kwata ko ehala ndyoka lya li popepi noBetel. Uule woomwedhi ndatu, katwa li tatu vulu okukwatathana naantu mboka ye li kondje yoshilongo, mwa kwatelwa yaandjetu nosho wo aamwatate koombelewa oonene. Opwa li omakuyunguto, kapwa li iikulya ya gwana, naantu oyendji oya li taya kwatwa koonkondo. Omaupyakadhi ngoka oga tsikile uule womimvo 14, noga taandele noshilongo ashihe.

Anne: Aantu yomihoko dhimwe, oya li haya kondjo nokudhipaga mboka yomihoko dhilwe. Aakwiita ya homata nokomayego, noya zala omizalo tadhi limbilike, oya li haya ende momapandaanda taya yugu aantu iinima momagumbo. Yamwe okudhipaga omuntu kuyo, okwa fa owala “omuntu ta dhipaga ondjuhwa.” Omidhimba odha li dha tulwa poomboloka dhimwe, ndhoka dha li popepi noshitayimbelewa. Aamwatate naamwameme aadhiginini oya li ya dhipagwa, mwa kwatelwa naatumwa yaali.

Aamwatate oya tula oomwenyo dhawo moshiponga, sho ya li taya holeke aamwahe yomihoko ndhoka dha li tadhi kongwa dhi dhipagwe. Aatumwa nAabetel oya li ya ningi sha faathana. KoBetel, aamwatate yamwe oya li haya lala pela lyopevi, omanga  yalwe twa li hatu zi nayo moondunda dhetu dhopombanda. Mondunda yetu otwa li mo omugoyi.

Esiku kehe, aakwiita oya li haye ya mobetel ya tale ngele otwa holeka mo aantu. Opwa li aantu yane mboka haya tonatele oBetel; yaali oya li haya kala pomakende omanga yaali ye li komweelo gwokondje. Ngele mboka ye li komweelo oya tula oonyala dhawo komeho, shono otashi ti kutya, ayihe oyi li nawa. Ihe ngele oye dhi tula konima, osha hala okutya, osha nika oshiponga naakwiita otaye ya okuhadha meni, onkene mboka ye li pomakende ohaya holeke nziya okuume ketu.

Anne: Konima yiiwike oyindji, ongundu yaakwiita ya geya oye ya moBetel koonkondo. Onda li nda iyedhilile mokandjugo nomumwameme gumwe, moka twa mono okahala okashona kokuholama, ke li meni lyokasikopa. Omumwameme okwa li a ithininike mo. Aakwiita oya landula ndje pombanda, ya homata oondjembo. Oya li ya dhenge pomweelo ya geya. Paul okwe ya lombwele a ti: “Omukulukadhi gwandje ota longitha okandjugo.” Sho nda edhilile omumwameme mokasikopa, oka ningi omakudhilo nonda li ndi na okushuna mo iinima ayihe, naashoka osha li sha pula ethimbo. Aakwiita oya li taya ipula kutya ote ningi shike, onkene onda li nda tila nonda tameke okukakama. Kanda li ndi shi kutya omweelo ngoka nandi gu egulule ngiini. Onda li nda galikana momutima, tandi indile Jehova ekwatho. Opo nduno onda egulula omweelo, e tandi ya popitha nda ngungumana. Gumwe okwa piti e ta undula ndje, e ta yi a ukilila kokasikopa, e te ka egulula, e ta kutha mo iinima ayihe. Ka li e shi itaale sho inaa adha mo sha. Ye naakwiita yalwe oya hadha moondunda dhilwe nomoombuli, ihe natango inaya mona mo sha.

Paul: Uule woomwedhi, otwa kala kaatu na iikulya ya gwana. Ihe otwa li tu na iikulya yopambepo ya gwana. Okulesha enyolo lyesiku ongulonene moBetel okwa li kwa fa “oshuumbululwa” shetu, naashono osha li hashi tu pe oonkondo tu idhidhimike.

Otwa li tu shi kutya ngele otwa yi tu ka konge iikulya nomeya, mboka ya holama moshitayimbelewa otaya vulu okudhipagwa. Omathimbo gamwe Jehova okwa li he tu ambidhidha momukalo ngoka inaatu tegelela. Okwa li e tu pe shoka twa pumbwa nokwe tu kwathele tu sinde uumbanda.

Onkalo muuyuni oya li tayi ende tayi nayipala, ihe oshili oye tu pe etegameno. Nonando aamwatate naamwameme oya li ya yi ontuku lwiikando ya hupithe oomwenyo dhawo, oya kala ye na eitaalo lya kola noya ngungumana. Yamwe oya ti kutya sho ya li taya idhidhimikile iita, oya fa ya li taya “ilongekidhile uudhigu uunene.” Aakuluntugongalo naamwatate aagundjuka oya li ya katuka nuulaadhi, opo ya kwathele aamwahe. Sho aamwatate naamwameme ya yi ontuku, oya imanga uukuni kumwe. Oya tameke okuuvithila miitopolwa iipe, noya longitha kehe shoka ya adha mokuti ya tote po Iinyanga yUukwaniilwa yopokathimbo. Okugongala okwa li haku ya tsu omukumo, niilonga yokuuvitha oye ya kwathele ya pule komeho. Sho twa li tatu gandja iikwatha, aamwatate yamwe oya li ya pula oondjato dhoku ka uvitha, pehala lyokupula tu ya pe oonguwo, naashoka oshe tu tsu  omukumo. Aantu oyendji mboka ya li ya yemata noya mona iihuna kiita, oya pulakene konkundana ombwanawa. Oya li ya kumwa okumona nkene Oonzapo dha nyanyukwa. Kungawo, uuyelele wadho owa li wa yela momilema. (Mat. 5:14-16) Uulaadhi waamwatate owa li wa ningitha nokuli aakwiita yamwe aakwanyanya ya ninge Oonzapo.

Omathimbo gamwe otwa li twa zi mo moshilongo, iikando itatu uule wethimbo efupi, niikando iyali, uule womumvo. Omumwameme gumwe omutumwa okwa popi nkene twa li tu uvite sho a ti: “Kosikola yaGilead, otwa longwa kutya otu na okukala tu hole aamwatate naamwameme nomutima gwetu aguhe, naashono osho twa li twa ningi. Onkene sho twa thigi aamwatate ye li moonkalo oondhigu, osha li she tu ehameke komutima.” Ihe otwa li twa nyanyukwa, sho natango twa vulu okuyambidhidha iilonga yokuuvitha moLiberia, okuziilila piishiindalongo.

Anne: MuMei 1996, otwa li twa zi po nohauto yoshitayimbelewa, tu li yane, mu na oombapila dha simana. Otwa li twa hala okuya koshitopolwa shondoolopa shoka sha gamenwa, shi li kokule uule wookilometa 16. Moshitopolwa moka twa li hatu zi osha ponokelwa. Aakwiita ya geya oya li ya umbu oondjembo mombanda, e taya thikameke ohauto yetu. Oya nana mo yatatu yomutse, noya hingi po ohauto e taya yi naPaul. Otwa li twa haluka noonkondo. Opo tu li po, Paul okwe ya kutse ta zi ombinzi mombamba yoshipala. Omolwengwangwano, otwa li tu shi okwa yahwa, ihe otwa mono kutya andola okwa li osho, ando ita vulu okweenda. Omukwiita gumwe okwa li e mu dhenge, sho te mu undula mo mohauto. Lago enene, okwa li owala e na okalalo okashona.

Putse opwa li pwa thikama ohauto yaakwiita, moka mwa li aantu ya tila. Otwa li twa ikwatelele kombanda yoshihauto, oshoka meni kamwa li ehala. Osha li tashi hingililwa, nokonyala tu gwe ko. Otwa li twa igidha omuhingi a kankame, ihe okwa li a tila okuthikama. Onkee otwa kala owala twa ikwatelela, naasho twa ka thika, otwa li twa vulwa noonkondo.

Paul: Otwa ipula kutya otwa hupu ngiini, oshoka otwa li twa kaka noonkondo, noonguwo dhetu odha tuuka. Otwa li twa lala popepi nedhagadhaga ndyoka lya yahagulwa nooholo, nolya li lye tu fala koSierra Leone esiku lya landula ko. Otwa pandula sho twa hupa, ihe otwa li tatu ipula naamwatate naamwameme.

Anne: Sho twa thiki moBetel moFreetown, moSierra Leone, otwa li megameno notatu silwa nawa oshimpwiyu. Ihe onda tameke okwiipula kombinga yiinima iiwinayi mbyoka ya li tayi ningwa moLiberia. Omutenya, onda li handi kala nda tila. Onda li handi kala ndi wete iinima ya fa ya tsima, notandi ningi omahaluhalu. Uusiku, ohandi penduka nda pusha ngame otandi kakama, nda tila kutya ota pu ningwa sha oshiwinayi. Osha li oshidhigu okufudha. Paul okwa li ha kwata ndje, e ta galikana pamwe nangaye. Otwa li hatu imbi omaimbilo guukwaniilwa, sigo nda ngungumana. Onda li tandi dhiladhila kutya otandi yi oompwengu noitandi vulu we okukala omutumwa.

Kandi na esiku ndi dhimbwe shoka sha ka ningwa po ishewe. Oshiwike osho tuu shoka, otwa li twa yakula iifo iyali. Shimwe osha li Penduka mo! Sho 8 Juni 1996. Omwa li mu na oshitopolwa “Shoka to vulu okuninga uuna wa gwililwa po kuumbanda nenge kiimpwiyu.” Osha li sha kwathele ndje ndi uve ko kutya omolwashike ndi uvite ngawo. Oshifo oshikwawo, osha li Oshungolangelo yo 15 Mei 1996, shoka sha li shi na oshitopolwa, “Openi haya adha oonkondo?” Omwa li mu na ethano lyokambilimbili ka lemana. Oshungolangelo oya yelitha kutya ngaashi owala okambilimbili haka tsikile okulya nokutuka, nonando omawawa gako oga lemana, natse kekwatho lyombepo yaJehova otatu vulu okutsikila okukwathela yalwe, nonando otwa uvithwa nayi. Mbyoka oya li iikulya yopambepo tayi koleke, ya za kuJehova pethimbo lya opala. (Mat. 24:45) Okuninga omapekapeko nokugongela iitopolwa ayihe ya fa mbyoka, oya li ya kwathele ndje. Mokweendela ko kwethimbo, omandhindhiliko gandje gokukala ndi uvite ndi na oshimpwiyu sha pitilila oga li ga kana po.

Paul: Aluhe shampa tatu shuna koLiberia, otwa li hatu kala twa nyanyukwa noonkondo. Pehulilo lyomumvo 2004, otwa li twa gwanitha omimvo 20 lwaampono moshinakugwanithwa shetu shuutumwa. Iita osho ya hulu. Opwa li pu na omalongekidho taga ningwa gokutunga koshitayimbelewa. Ihe opo ngaa tu li po, otwa pewa oshinakugwanithwa oshipe.

Ndika olya li eyeleko enene. Otwa li tu na ekwatathano lyopothingo naanegumbo yetu yopambepo, noka twa li twa hala oku ya thiga po. Sho twa li twa  thigi po yaandjetu tu ye kosikola yaGilead, otwa mono nkene okwiinekela muJehova haku eta omalaleko nuuyamba, onkee otwa taamba ko oshinakugwanithwa shoka. Otwa li twa tumwa koshishiindalongo, Ghana.

Anne: Otwa li tatu lili noonkondo, sho tatu thigi po Liberia. Otwa li twa kumwa sho Frank, omumwatate omukokele noku na owino e tu lombwele a ti: “Dhimbweni kombinga yetu!” Okwa yelitha a ti: “Otu shi kutya kamu na siku mú tu dhimbwe, ihe ngashingeyi omu na okukala mú hole oshinakugwanithwa sheni oshipe, nomutima aguhe. Osha za kuJehova, onkee sileni oshimpwiyu aamwatate naamwameme yokoGhana.” Shoka oshe tu tsu omukumo, tu ye koshilongo hoka ku na owala aantu aashona ye tu shi, naayihe oya li iipe kutse.

Paul: Nonando ongawo, kasha li sha pula ethimbo tu kale tu hole uukwanegumbo wetu uupe wopambepo womoGhana. Okwa li ku na Oonzapo odhindji. Otwa ilongo oshindji kuudhiginini nosho wo keitaalo lya kola lyookuume ketu. Ihe konima sho twa kala tatu longo moGhana uule womimvo 13, otwa li twa pewa ishewe oshinakugwanithwa shilwe. Otwa li twa pulwa tu ka longele koshitayimbelewa shi li kUuzilo waAfrika, moKenya. Nonando otwa li twa yuulukwa noonkondo okuume ketu yokoGhana, nokoLiberia, nziya otwa panga uukuume naamwatate naamwameme moKenya. Sigo onena, otatu tsikile okuuvitha moshitopolwa moka mu na ompumbwe onene.

Anne: Monkalamwenyo yandje, onda li nda iyadha moonkalo oondhigu nomathimbo gamwe onda li handi kala nda tila noonkondo. Oonkalo oondhigu notadhi yemateke, ohadhi tu ehameke palutu nopamadhiladhilo. Jehova ihe tu gamene pashikumithalonga koonkalo ndhoka. Ngele onda uvu omitopelo dhoondjembo nodhoo-artillery, ohandi tameke tandi thetwa mepunda noonyala dhandje ohadhi kala dha fa dha sa. Ihe onda ilongo okukala nda ikolelela mekwatho alihe ndyoka Jehova he tu pe, e tu nkondopaleke, ngaashi ekwatho lyaamwatate naamwameme. Onda mona wo kutya uuna hatu konakona, hatu galikana, hatu yi kokugongala nokuuvitha, Jehova ota vulu oku tu kwathela tu gwanithe po oshinakugwanithwa shetu.

Paul: Yamwe ohaye tu pula taya ti: “Omu hole ngaa oshinakugwanithwa sheni?” Iilongo otayi vulu okukala iiwanawa, ihe otayi vulu wo okukala ya nika oshiponga, noonkalo moshilongo ohadhi vulu okulunduluka. Onkene oshike tu hole unene shi vulithe oshilongo? Otu hole aamwatate naamwameme ye na ondilo, oshoka oye li uukwanegumbo wetu. Nonando otwa za momaputuko ga yoolokathana, ohatu dhiladhila notu na etaloko lya faathana kombinga yaJehova. Otwa li tu shi otwa tumwa tu ke ya tse omukumo, ihe uushili owo kutya oyo ye tu tsu omukumo.

Ethimbo kehe tatu tembuka tu ka gwanithe po oshinakugwanithwa shilwe, uumwayinathana wetu womuuyuni awuhe ohawu kala elalekonuuyamba okuza kuJehova, oshoka otu na uukwanegumbo kehe pamwe. Shampa owala tu li oshitopolwa shegongalo, nena otu na ehala mpoka hatu kala tu uvite twa gamenwa. Otu na uushili kutya ngele otwa tsikile okwiinekela muJehova, ote ke tu pa oonkondo tu idhidhimikile kehe shimwe. — Fil. 4:13.