OSHITOPOLWA SHOKUKONAKONWA 44
EIMBILO 33 Uudhigu woye wu gandja kuJehova
Nkene wu na okuungaunga nokwaahenuuyuuki
“Inamu sindwa kuuwinayi, ihe sindeni uuwinayi nuuwanawa.” —ROM. 12:21.
SHOKA TATU KA ILONGA
Otatu ka tala nkene wu na okwiinyenga uuna wa ungaungiwa nangoye kaashi li pauyuki.
1-2. Omomikalo dhini tashi vulika tu ungaungiwe natse kaashi li pauyuki?
JESUS okwa longitha ethaneko kombinga yomuselekadhi ngoka a li a tsikile okupula omupanguli, opo e mu uthile pauyuki. Kapu na omalimbililo kutya aalongwa yaJesus oya li ye uvite ko thiluthilu nkene omuselekadhi ngoka a li e uvite, oshoka nayo oya li haya ungaungiwa nayo nayi. (Luk. 18:1-5) Ehokololo ndyoka otali ti sha wo nokutse kunena, molwaashoka omathimbo nomathimbo otwa li twa ungaungiwa natse kaashi li pauyuki.
2 Muuyuni kunena, aantu oyendji oye na uutondwe, kaye na ohenda noye na olwiho. Onkee ihatu kala twa kumwa, uuna tatu ungaungiwa natse kaashi li pauyuki. (Omuuv. 5:8) Ihe ohashi vulika tu kale unene twa yemata, uuna omumwatate nenge omumwameme a ungaunga natse nayi. Odhoshili kutya aamwatate naamwameme ihaya kala ya hala okuungaunga natse nayi, ihe omolwokwaagwanenena owala. Otatu vulu okwiilonga oshindji kunkene Jesus a li a inyenge kokwaahenuuyuuki hoka a li a ningilwa kaapataneki ye. Ngele ohatu vulu okwiidhidhimikila aapataneki mboka haya ungaunga natse nayi, mbela itatu vulu okwiidhidhimikila ooitaali ooyakwetu? Mbela Jehova oha kala e uvite ngiini, uuna omwiitaali omukwetu, nenge gulwe ngoka kee shi Onzapo a ungaunga natse kaashi li pauyuki? Oku na ko ngaa nasha naashoka hashi tu ningilwa?
3. Mbela Jehova oha kala ngaa e na ko nasha, uuna tatu ungaungiwa natse kaashi li pauyuki, nomolwashike tatu tile ngawo?
3 Jehova oku na ko nasha lela nankene hatu ungaungiwa natse. “Oku hole shoka shu uka.” (Eps. 37:28) Jesus okwe tu shilipaleka kutya Jehova ota “ka ningitha aahogololwa ye . . . ya uthilwe pauyuuki meendelelo,” pethimbo lya opala. (Luk. 18:7, 8) Masiku ota ka hulitha po okumona iihuna akuhe nokwaahenuuyuuki kwoludhi kehe. — Eps. 72:1, 2.
4. Jehova ohe tu pe ekwatho lini kunena?
4 Manga twa tegelela ethimbo sho okwaahenuuyuuki taku ka hulithwa po, Jehova ohe tu kwathele tu ku idhidhimikile. (2 Pet. 3:13) Ohe tu longo nkene tu na okuyanda okuninga oshinima kaashi li pandunge, uuna twa ungaungiwa natse nayi. Okupitila mOmwana, Jehova okwe tu ulikila oshiholelwa sha dhenga mbanda, nkene tatu vulu okuungaunga nokwaahenuuyuuki. Okwe tu pa wo omayele taga longo, ngoka tatu vulu okutula miilonga, uuna twa ungaungiwa natse kaashi li pauyuki.
KOTOKELA OMUKALO NKENE HO INYENGE KOKWAAHENUUYUUKI
5. Omolwashike tu na okukala twa kotokela omukalo moka hatu inyenge kokwaahenuuyuuki?
5 Otashi vulika tu kale tu uvite nayi noonkondo notwa gwililwa po omolwokwaahenuuyuuki. (Omuuv. 7:7) Aapiya yaJehova aadhiginini, ngaashi Job naHabakuk, nayo osho ya li ye uvite ngaaka. (Job 6:2, 3; Hab. 1:1-3) Nonando omaiyuvo ngoka oge li paunshitwe, otu na okukala twa kotokela omukalo moka hatu inyenge, opo kaatu katuke momukalo gwa puka.
6. Oshiholelwa shaAbsalom otashi tu longo shike? (Tala wo ethano.)
6 Uuna gumwe a ungaunga natse kaashi li pauyuki, otashi vulika tu kale twa hala oku mu galulila uuwinayi. Ihe okuninga ngawo, otaku vulu okunayipaleka onkalo. Natu taleni koshiholelwa shaAbsalom, omwanamati gwomukwaniilwa David. Okwa li a geya noonkondo sho omumwayinakadhona, Tamar, a kwatwa onkonga komumwahe, Amnon. Pampango yaMoses, Amnon okwa li e na okudhipagwa omolwoshinima shoka. (Lev. 20:17) Nonando osha li shi shi okuuviwa ko sho Absalom a geya, ka li e na uuthemba wokudhipaga Amnon. — 2 Sam. 13:20-23, 28, 29.
Absalom ina pangela ongeyo ye, sho omumwayinakadhona Tamar, a ningilwa okwaahenuuyuuki (Tala okatendo 6)
7. Petameko omupisalomi okwa li a inyenge ngiini kokwaahenuuyuuki?
7 Uuna mboka haya longo okwaahenuuyuuki inaaya pewa egeelo lyasha, otashi vulika tu ipule ngele okulonga shoka shi li mondjila oku na ngaa uuwanawa washa. Natu taleni komupisalomi gumwe, ngoka a li a mono nkene aakolokoshi taya monika ya fa taye shi enditha nawa, nonando oya li taya ungaunga nayi naayuuki. Okwa ti: “Aakaanakalunga osho naanaa ye li ngaaka; aluhe oye na uupu.” (Eps. 73:12) Okwa li wo e uvite nayi noonkondo omolwokwaahenuuyuuki hoka a li a mono, nokonyala a kanithe einekelo lye muuwanawa mboka hawu zi mokulongela Jehova. Okwa ti: “Sho nda kambadhala okudhiladhila oshinima shino, oshe etele ndje uudhigu.” (Eps. 73:14, 16) Okwe shi holola nokuli a ti: “Ihe ngame ando nda kanitha einekelo; okonyala ndaa na we eitaalo.” (Eps. 73:2) Oshinima sha fa shoka osha li sha ningilwa omumwatate Alberto.
8. Omumwatate gumwe okwa li a gumwa ngiini kokwaahenuuyuuki?
8 Omumwatate Alberto okwa li a lundilwa kutya okwa yaka po iimaliwa yegongalo. Oshizemo, okwa li a kanitha iinakugwanithwa ye noyendji megongalo sho ye shi uvu, kaya li we ye mu simaneka. Okwa ti: “Onda li nda geya noonkondo nonda yemata.” Okwa li a etha omaiyuvo ge ga nkundipaleke ekwatathano lye naJehova, nokwa li nokuli a kala inaa ipyakidhila we uule womimvo ntano. Oshimoniwa shika, otashi ulike shoka tashi vulu okuningwa po, ngele otwa etha ongeyo yi tu pangele, uuna twa ungaungiwa natse kaashi li pauyuki.
HOLELA NKENE JESUS A LI A UNGAUNGA NOKWAAHENUUYUUKI
9. Okwaahenuuyuuki kuni Jesus a li a idhidhimikile? (Tala wo ethano.)
9 Jesus okwe tu tulila po oshiholelwa sha dhenga mbanda nkene tu na okuungaunga nokwaahenuuyuuki. Natu taleni kokwaahenuuyuuki hoka a li a ningilwa koyendji, mwa kwatelwa nokuli yaandjawo. Aakwanezimo ye oya li ye mu ula kutya ota yi oonkwengu, aawiliki yomalongelokalunga oya li ye mu lundile kutya oha longele kumwe noondemoni, omanga aakwiita Aaroma ya li ye mu sheke, ye mu dhenge nolwanima oye ke mu dhipaga. (Mark. 3:21, 22; 14:55; 15:16-20, 35-37) Ihe nonando ongawo, Jesus okwa idhidhimikile okwaahenuuyuuki akuhe hoka, nopwaa na okushunithila yalwe uuwinayi. Oshike tatu ilongo koshiholelwa she?
Jesus okwe tu tulila po oshiholelwa sha dhenga mbanda, nkene tu na okuungaunga nokwaahenuuyuuki (Tala okatendo 9-10)
10. Jesus okwa li a idhidhimikile ngiini okwaahenuuyuuki? (1 Petrus 2:21-23)
10 Lesha 1 Petrus 2:21-23. a Jesus okwe tu tulila po oshiholelwa sha dhenga mbanda, shoka tatu vulu okulandula, uuna tatu ungaunga nokwaahenuuyuuki. Okwa li e shi ethimbo lyokumwena nethimbo e na okupopya. (Mat. 26:62-64) Ka li a yamukula elundilo kehe. (Mat. 11:19) Uuna a hogolola okupopya, ka li a tuku aapataneki ye nenge e ya ningile omatilitho. Jesus okwa li a ulike eipangelo, molwaashoka okwa “inekele Kalunga, omupanguli omuyuuki.” Jesus okwa li e shi kutya Jehova oku mu wete sho a li ta ungaungiwa naye nayi. Okwa li e na einekelo kutya Jehova ota ka kutha po okwaahenuuyuuki pethimbo lya opala.
11. Omomikalo dhimwe dhini tatu vulu okupangela elaka lyetu? (Tala wo ethano.)
11 Otatu vulu okuholela Jesus mokupangela shoka tatu popi, uuna tatu ungaungiwa natse kaashi li pauyuki. Okwaahenuuyuuki kumwe inaku kwata naanaa miiti, onkee otatu vulu kaatu ninge po sha. Nenge otatu vulu owala okumwena, opo kaatu nayipaleke onkalo. (Omuuv. 3:7; Jak. 1:19, 20) Ihe omathimbo gamwe, otwa pumbwa okupopya, uuna tu wete gumwe ta ungaungiwa naye nayi, nenge tu popile oshili. (Iil. 6:1, 2) Uuna twa hogolola okupopya, otwa pumbwa oku shi ninga twa ngungumana nonesimaneko. — 1 Pet. 3:15. b
Uuna twa ungaungiwa natse kaashi li pauyuki, otatu vulu okuholela Jesus mokutokola nuukeka kutya ethimbo lini tu na okupopya nomomukalo moka tatu ke shi ninga (Tala okatendo 11-12)
12. Ongiini tatu vulu okwiinekela “Kalunga, omupanguli omuyuuki”?
12 Otatu vulu wo okuholela Jesus mokwiinekela “Kalunga, omupanguli omuyuuki.” Uuna yalwe ye tu pangula nenge ya ungaunga natse nayi, ohatu kala twa inekela kutya Jehova oku shi shoka sha ningwa po. Einekelo ndyoka ohali tu kwathele tu idhidhimike, oshoka otu shi kutya lwanima Jehova ota ka ukitha iinima. Ngele otwa ethele iinima momake gaJehova, ohatu keelele ongeyo nenge onkone kaayi mene omidhi momitima dhetu. Omaiyuvo ngono ohaga vulu oku tu ningitha tu inyenge momukalo omwiinayi, tu kanithe enyanyu lyetu nokuyona po ekwatathano lyetu naJehova. — Eps. 37:8.
13. Oshike tashi vulu oku tu kwathela tu tsikile okwiidhidhimikila okwaahenuuyuuki?
13 Odhoshili kutya katu na esiku tu landule oshiholelwa shaJesus thiluthilu. Omathimbo gamwe, otashi vulika tu popye nenge tu ninge iinima mbyoka lwanima tatu ka ipa uusama. (Jak. 3:2) Ihe omathimbo gamwe, uuna twa ungaungiwa natse nayi kuyalwe, otashi vulika shi tu ehameke palutu nopamaiyuvo onkalamwenyo yetu ayihe. Ngele shoka oshe ku ningilwa, shilipalekwa kutya Jehova oku wete onkalo ndjoka to piti muyo. Jesus ngoka a li wo a ungaungiwa naye kaashi li pauyuki, oku ku uvitile olukeno. (Heb. 4:15, 16) Kakele koshiholelwa shaJesus sha dhenga mbanda shoka Jehova e tu pa, okwe tu pa wo omayele taga longo ngoka taga vulu oku tu kwathela tu ungaunge nokwaahenuuyuuki. Natu ka taleni koovelise mbali dha za membo lyAaroma ndhoka tadhi vulu oku tu kwathela.
“ETHENI, ONDJAHI YAKALUNGA YI SHI NINGE”
14. Uutumbulilo “etheni, ondjahi yaKalunga yi shi ninge” owa hala okutya shike? (Aaroma 12:19)
14 Lesha Aaroma 12:19. Omuyapostoli Paulus okwa li a ladhipike Aakriste ya ‘ethe ondjahi yaKalunga yi shi ninge,’ mokweetha Jehova a ukithe iinima pethimbo lye nomomukalo ngoka a hala. Konima sho omumwatate John a li a ungaungiwa naye kaashi li pauyuki, okwa ti: “Onda li ndi na okukondjitha ehalo lyokuukitha iinima kungame mwene. Aaroma 12:19, oya li ya kwathele ndje ndi ethele iinima miikaha yaJehova.”
15. Omolwashike shi li pandunge okutegelela Jehova a ukithe iinima?
15 Ohashi tu etele uuwanawa, uuna twa ethele iinima momake gaJehova. Ngele twe shi ningi, ohatu yanda oku itsika omitenge nomaiyuvo omawinayi, ngoka haga zi mokukambadhala okukandula po omaupyakadhi kutse yene. Jehova okwa hala oku tu kwathela. Okwa fa te tu lombwele ta ti: “Okwaahenuuyuuki ku ethela miikaha yandje; otandi ka ungaunga nako.” Ngele otwa itaale meuvaneko lyaJehova ndyoka tali ti: “Ongame mwene tandi ka geela,” kungawo inatu pumbwa we okutsikila okukala twa geya, oshoka otu na einekelo kutya ota ka ninga shoka shi li mondjila. Shoka osho sha li sha kwathele John, ngoka a popiwa metetekelo. Okwa ti: “Ngele onda tegelela Jehova oye a ungaunge nuupyakadhi wandje, ote ke shi ninga momukalo gwa dhenga mbanda, gu vule gwandje kokule.”
TSIKILENI ‘OKUSINDA UUWINAYI NUUWANAWA’
16-17. Egalikano ohali tu kwathele ngiini tu tsikile ‘okusinda uuwinayi nuuwanawa’? (Aaroma 12:21)
16 Lesha Aaroma 12:21. Paulus okwa li wo a ladhipike Aakriste ya tsikile ‘okusinda uuwinayi nuuwanawa.’ MEuvitho lye lyokOndundu, Jesus okwa ti: “Kaleni mu hole aatondi yeni, nokugalikanena mboka taye mu hepeke.” (Mat. 5:44) Shono osho naanaa a li a ningi. Otashi vulika hatu dhiladhila kombinga yomahepeko ngoka Jesus a li a idhidhimikile sho a li a alelwa komuti gwomahepeko kaakwiita Aaroma. Ihe itatu vulu naanaa okuuva ko thiluthilu uuwehame mboka a li e uvite nomahepeko ngoka a li a idhidhimikile.
17 Jesus ka li a etha a sindike kokwaahenuuyuuki hoka a li a piti muko. Pehala lyokutuka aakwiita mboka, okwa galikana a ti: “Tate, ya dhimina po, oshoka kaye shi shoka taya ningi.” (Luk. 23:34) Uuna hatu kwatele momagalikano getu mboka haya ungaunga natse nayi, ohashi tu kwathele kaatu kale twa geya nokaatu ya kwatele onkone. Ohashi vulu wo okulundulula omukalo moka tu uvitile ngoka e tu uvitha nayi.
18. Egalikano olya li lya kwathele ngiini Alberto naJohn ya ungaunge nokwaahenuuyuuki?
18 Egalikano olya li lya kwathele aamwatate yaali mboka ya popiwa metetekelo ya vule okuungaunga nokwaahenuuyuuki hoka ya li ya ningilwa. Alberto okwa ti: “Onda li nda kwatele momagalikano gandje aamwatate mboka ya ungaunga nangame kaashi li pauyuki. Onda li nda pula Jehova lwiikando ndi dhimbwe okwaahenuuyuuki hoka.” Shi nyanyudha, Alberto ota longele ishewe Jehova nuudhiginini. John okwa ti: “Onda li handi kwatele momagalikano gandje omumwatate ngoka a ninga ndje nayi. Shoka osha kwathele ndje kaandi kale we nde mu geela nondi hulithe po oku mu pangula. Osha kwathele ndje wo ndi kale ndi na ombili yopamadhiladhilo.”
19. Oshike tu na okuninga sigo ehulilo lyuuyuni mbuka? (1 Petrus 3:8, 9)
19 Manga tu li natango muuyuni mbuka wa kolokosha, otashi vulika tu ungaungiwe natse kaashi li pauyuki. Kutya nduno oshike tashi ke tu ningilwa, inatu etha po nando okupula ekwatho kuJehova megalikano. Otwa pumbwa wo okuholela omukalo moka Jesus a inyenge sho a li ta ungaungiwa naye nayi nokutsikila okutula miilonga omakotampango gOmbiimbeli. Ngele otwa ningi ngawo, otatu vulu okukala nuushili kutya Jehova ote ke tu laleka nuuyamba. — Lesha 1 Petrus 3:8, 9.
EIMBILO 38 Ote ke ku koleka
a Montopolwa ontiyali nontitatu yontumwafo ye yotango, omuyapostoli Petrus okwa li a hokolola nkene Aakriste yamwe yomethelemumvo lyotango ya li ya ungaungiwa nayo kaashi li pauyuki kooyene yawo, nenge kaasamane yawo mboka kaaye shi ooitaali. — 1 Pet. 2:18-20; 3:1-6, 8, 9.
b Tala okavidio ke na oshipalanyolo, Nghee ohole hayi eta ombili yashili, kepandja, jw.org/kj.
