1, 2. Aapiya yaJehova oye na okukondjitha shike?

OKUZA ngaa komuntu gwotango omudhiginini, Abel, sigo okunena, aalongelikalunga aadhiginini oya kala nokukondja. Omuyapostoli Paulus okwa li a nyolele Aakriste Aahebeli a ti kutya ‘oya li ya hepekwa kiinima oyindji, ihe inaya sindika,’ sho ya li taya kongo omayambeko gaJehova nokukala ya hokiwa kuye. (Heb. 10:32-34) Paulus okwa yelekanitha ekondjo lyAakriste noonkambadhala ndhoka dha li hadhi ningwa kaakuthimbinga yomomaudhano muGreka ngaashi: mokumatuka nomokukondja. (Heb. 12:1, 4) Kunena otu li methigathano lyoku ka mona omwenyo gwaaluhe, notwa taalela aatondi mboka ya hala oku tu piyaganeka, oku tu pundukitha, oku tu shololitha, oku tu yuga enyanyu lyetu nondjambi ndjoka tatu ka mona monakuyiwa.

² Shotango, otu li mekondjo enene lyokukondjitha Satana nuuyuni we mboka wa kolokosha. (Ef. 6:12) Osha simana okukondja, opo kaatu nyatekwe ‘komapopilongulu omanene’ guuyuni. Shoka osha kwatela mo omalongo giifundja, uunongo wopantu nomikalondjigilile inaadhi yogoka, ngaashi oluhondelo, okuhila omakaya, uukolwe nokulongitha iingangamithi. Otu na wo okukala aluhe tatu kondjitha  omaunkundi getu gopanyama nosho wo etekomukumo. — 2 Kor. 10:3-6; Kol. 3:5-9.

3. Kalunga ohe tu dheula ngiini tu kondjithe aatondi yetu?

³ Mbela otatu vulu ngaa okusinda aatondi yetu mboka aanankondo? Eeno, ihe ongele tatu kondjo. Okudhiladhila koshiholelwa shoonakukondja yopethimbo lyonale, Paulus okwi ipopi a ti: “Ngame onda fa omulumentu enyakwa ihaa palutha mokudhenga noongonyo.” (1 Kor. 9:26) Ngaashi owala omudhengingonyo ha kondjitha omukondjithi gwe, natse otu na okukondjitha aatondi yetu. Jehova ohe tu dheula nohe tu kwathele molugodhi lwetu. MOohapu dhe omu na omalombwelo ngoka e tu pa, tage tu kwathele tu hupithe oomwenyo dhetu. Ohe tu kwathele wo okupitila miinyanyangidhwa yetu yopaMbiimbeli, pokugongala kwopaKriste nopiigongi. Mbela oho tula tuu miilonga shoka to ilongo? Ngele owa ndopa oku shi ninga, nena oto ka kala wa fa to “palutha mokudhenga noongonyo,” pehala lyokudhenga lela omutondi gwoye.

4. Ongiini tatu vulu okuyanda okusindika kuuwinayi?

⁴ Aatondi yetu otaya vulu oku tu ponokela pethimbo mpoka inaatu shi tegelela noku tu hepeka uuna kaatu na oonkondo. Onkee ano, otu na okukala twa tonata ethimbo kehe. Ombiimbeli otayi tu londodha tayi ti: “Inamu sindwa kuuwinayi, ihe sindeni uuwinayi nuuwanawa.” (Rom. 12:21) Etsomukumo ndyoka tali ti “inamu sindwa kuuwinayi” otali ulike kutya otatu vulu okusinda uuwinayi. Otatu vulu oku wu sinda mokukala tatu wu kondjitha. Mepingathano naashoka, otatu vulu okusindwa kuSatana nuuyuni we wa kolokosha nosho wo kokwaagwanenena kwetu, ngele otwa kala inaatu tonata e tatu etha po okukondja. Ino etha wu tilithwe kuSatana, opo ando e ku shololithe kuu vule we oku mu sinda! — 1 Pet. 5:9.

5. (a) Oshike tashi vulu oku tu kwathela tu tsikile okukondja tu mone omalaleko nuuyamba gaKalunga? (b) Iiholelwa yoolye tatu ka kundathana ya popiwa mOmbiimbeli?

⁵ Mboka taya kondjo kaye na okudhimbwa etompelo lyawo lyokukondja, opo ya sindane. Opo Jehova e tu yambeke nokukala e tu hokwa, otu na okukala twa tala keshilipaleko ndyoka li li mAahebeli 11:6, tali ti: “Ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.” Oshityalonga shOshihebeli shoka sha tolokwa “mboka taye mu kongo” otashi ti kutya okuninga oshinima wa mana mo nokugandja eitulomo li ikalekelwa kusho. (Iil. 15:17) MOmanyolo omu na iiholelwa iiwanawa yaalumentu naakiintu, mboka ya ninga oonkambadhala dha mana mo, opo ya konge omayambeko gaJehova. Jakob, Rakel, Josef naPaulus oya li ya taalela oonkalo ndhoka dha li dhe ya dhigupalela pamaiyuvo nopalutu, ihe oye shi ulike kutya uudhiginini ohawu e ta omalaleko nuuyamba. Ongiini tatu vulu oku ya holela?

6. Oshike sha li sha kwathele Jakob i idhidhimike, nokwa li a mono ngiini ondjambi ye? (Tala kethano lyopetameko.)

⁶ Tatekulululwa Jakob okwa li a kondjo nokwa kala omudhiginini, molwaashoka okwa li e hole Jehova. Okwa li wo e na olupandu lwiinima yopambepo nokwa li i inekela thiluthilu meuvaneko lyaJehova lyokuyambeka oluvalo lwe. (Gen. 28:3, 4) Shika otashi yelitha nawa kutya omolwashike sho Jakob a li e na konyala omimvo 100, a li a ningi ngaashi ta vulu, opo a mone omayambeko gaKalunga. Okwa li nokuli a kondjo nomuyengeli ngoka e li molupe lwopantu. (Lesha Genesis 32:24-28.) Mbela Jakob okwa li ngaa ta vulu okwiidhidhimika nokukondjitha omuyengeli omunakondo koonkondo dhe mwene? Aawe. Ihe okwa li a tokola okukondja nuudhiginini noku ulike kutya ite ke etha po okukondja! Okwa li lela a mono ondjambi ye omolwuudhiginini we. Okwa li a lukwa edhina ndyoka lye mu opala, Israel (ndyoka tali ti okwa “kondjo naKalunga”). Natse otwa hala okukala twa hokiwa kuJehova nokuyambekwa kuye ngaashi Jakob.

7. (a) Onkalo yini Rakel a li muyo yinikitha oluhodhi? (b) Okwa li a tsikile ngiini oku yi kondjitha, neyambeko lini a li mono?

 ⁷ Omukulukadhi gwaJakob, Rakel, okwa li a halelela okumona nkene Jehova ta ka gwanitha po euvaneko lye ndyoka a li u uvanekela omusamane gwe. Nonando ongawo, oya li ye na uupyakadhi mboka wa li wa fa itaawu vulu okukandulwa po. Rakel ka li ha mono aanona. Pethimbo lye, onkalo ndjoka oya li ya talika ko yi nikitha oluhodhi noonkondo. Rakel okwa li a mono ngiini oonkondo dhopalutu nodhopamadhiladhilo, opo a tsikile okukondjitha oonkalo ndhoka a li itaa vulu okulundulula? Ka li nando a kanitha etegameno. Pehala lyaashono, okwa tsikile okugalikana a mana mo. Jehova okwa li a pulakene komagalikano gaRakel taga zi komutima, nokonima yethimbo, okwe mu yambeke noluvalo. Oshi shi okuuviwa ko sho Rakel a li i igidha omolwesindano lye a ti: “Onda kondjo olugodhi olunene . . . ihe onda sindana.” — Gen. 30:8, 20-24.

8. Eshongo enene lini Josef a li mulyo ethimbo nuule, nokwe tu tulila po oshiholelwa shini oshiwanawa momukalo moka i inyenge?

⁸ Oshiholelwa shuudhiginini shaJakob nomukadhi Rakel, osha li lela sha nwetha mo omwana Josef, a kale e shi nkene e na okuungaunga nomamakelo geitaalo lye. Sho Josef a li e na omimvo 17, onkalamwenyo ye oya li ya lunduluka thiluthilu. Omolwondumbo, aamwayinamati oya li ye mu landitha po muupika. Konima okwa li i idhidhimikile okukala mondjedhililo yaEgipiti uule womimvo dhontumba, moka a li a tulwa kaashi li pauyuuki. (Gen. 37:23-28; 39:7-9, 20, 21) Shika kasha li sha teya Josef omukumo nenge shi mu ningithe a kale e na iikonene. Pehala lyaashono, okwa li a gandja eitulomo lye alihe kekwatathano lye naJehova. (Lev. 19:18; Rom. 12:17-21) Oshiholelwa shaJosef nashi tu kwatheleni. Pashiholelwa, nonando otwa putukila monkalo ondhigu nenge tu li ngashingeyi moonkalo ndhoka dha fa itaadhi vulu okukandulwa po, otwa pumbwa okukondja nokukala aadhiginini. Otatu vulu okukala nuushili kutya ngele otwa ningi ngaaka, Jehova ote ke tu yambeka. — Lesha Genesis 39:21-23.

9. Oonkambadhala dhini dha mana mo tu na okuninga, opo tu mone omalaleko nuuyamba gaJehova ngaashi Jakob, Rakel naJosef?

⁹ Dhiladhila konkalo ndjoka wa taalela notashi vulika yi li eshongo kungoye. Otashi vulika wa taalela okwaanuuyuuki, okayoya nenge omasheko. Nenge tashi vulika pu na gumwe te ku lundile, tashi vulika omolwondumbo. Pehala lyokutyololoka e to kala inoo kondja, dhimbulukwa shoka sha ningitha Jakob, Rakel naJosef ya tsikile okulongela Jehova nenyanyu. Kalunga okwa li e ya nkondopaleke noku ya yambeka, molwaashoka oya li ya tsikile okuulika olupandu olunene lwiinima yopambepo. Oya li ya tsikile okukondja nokukatuka metsokumwe naashoka ya li taya pula momagalikano gawo. Otu li lwopehulilo lyuuyuni mbuka, nomolwaashoka tu na lela okukala twa dhiginina ketegameno ndyoka Kalunga e tu uvanekela! Mbela owa halelela ngaa okuninga oonkambadhala nenge okukondja, opo wu hokiwe kuJehova?

10, 11. (a) Ongiini tatu vulu okukondjela omayambeko gaKalunga? (b) Oshike tashi ke tu kwathela tu ninge omatokolo gomondjila notu kondjithe nomupondo etekomukumo nomapiyaganeko?

¹⁰ Oonkalo dhimwe dhini tashi vulika dhi tu ningithe tu kondjele omayambeko gaKalunga? Onkalo yimwe ndjoka oyendji ya taalela, oyo okukondjitha omaunkundi gopanyama. Yalwe oya kala nokuninga oonkambadhala dha mana mo, opo ya kale ye na etaloko ewanawa li na ko nasha nuukalele. Nenge monkalo yoye, otashi vulika wa pumbwa okutsikila okwiidhidhimika, nonando owu na uukolele tawu nyangwanyangwa nenge wu uvite uuwike. Katu na okutala ko nayi mboka taya kambadhala okudhimina po mboka ye ya yemateka nenge ya yona kuyo. Kashi na nduno mbudhi kutya otwa longela Jehova ethimbo li thike peni, atuheni otu na okukondjitha iinima mbyoka tayi  vulu oku tu imba tu longele Jehova, ngoka ha gandja ondjambi kwaamboka aadhiginini.

¹¹ Odhoshili kutya otashi vulu okukala oshidhigu okuninga omatokolo gomondjila nokulandula ondjila yopaKriste, unene tuu ngele omitima dhetu ndhoka ominamakoto otadhi tu ningitha tu ye mondjila ya puka. (Jer. 17:9) Ngele owa mono kutya owa nwethwa mo kusha oshiwinayi, pula Jehova e ku pe ombepo ondjapuki. Egalikano nombepo ondjapuki otayi vulu oku tu pa oonkondo tu landule ondjila ndjoka tu shi kutya oyi li mondjila, na Jehova ote ke tu yambeka. Katuka metsokumwe nomagalikano goye. Kambadhala okulesha oontopolwa dhontumba mOmbiimbeli esiku kehe, nokukonga ethimbo lyokukonakona Ombiimbeli paumwene nolyokuninga Elongelokalunga lyUukwanegumbo pandjigilile. — Lesha Episalomi 119:32.

12, 13. Ongiini Aakriste yaali ya li ya kwathelwa ya pangele omahalo gawo ga puka?

¹² Opu na iiholelwa oyindji yankene Oohapu dhaKalunga, ombepo ye ondjapuki nosho wo iileshomwa yetu yopaKriste ya kwathela Aakriste ya sinde omahalo ga puka. Omugundjuka gumwe gwomimvo 17, okwa li a lesha oshitopolwa: “Ongiini to vulu okukondjitha omahalo ga puka?” (shi li moshiingilisa), mo-Awake! yo 8 Desemba 2003. Okwa li inyenge ngiini? Okwa ti: “Otandi kambadhala okupangela omadhiladhilo ga puka. Sho nda lesha oshitopolwa shika kutya ‘oyendji oya kala taya kondjo molugodhi ndoka lwa pindjala lwokusinda omahalo ga puka,’ osha ningitha ndje ndi kale lela ndu vute ndi li oshitopolwa shuumwayinathana. Onda li ndu uvite kutya hangame awike te kondjo nago.” Omugundjuka nguka okwa li natango a  mono uuwanawa moshitopolwa: “Mbela Kalunga okwa hokwa onkalamwenyo yopaali?” (shi li moshiingilisa) mo-Awake! yo 8 Kotoba 2003. Okwa li a koneka kutya omwa tumbulwa nokuli kutya kuyamwe ekondjo ndika olya fa “uuwehame uunene wopalutu.” (2 Kor. 12:7) Sho taya tsikile okukondja, opo ya kaleke po eihumbato ewanawa, otaya vulu okutala konakuyiwa, ye na omukumo. Okwa ti: “Omolwetompelo ndyoka, ondi wete kutya otandi vulu okukala omudhiginini kehe esiku. Onda pandula sho Jehova ta longitha ehangano lye e tu kwathele, opo tu vule okuhupa esiku kehe muuyuni mbuka wa kolokosha.”

¹³ Tala ishewe koshiholelwa shomumwameme gwokoAmerika. Okwa nyola a ti: “Onda hala oku mu pandula sho aluhe hamu tu palutha naashoka twa pumbwa, pethimbo lyo opala. Olundji ohandi kala ndu uvite kutya iitopolwa mbika ongame ya nyolelwa. Uule womimvo, onda kala tandi kondjitha omahalo gaashoka Jehova e tonde. Omathimbo gamwe, ohe kala nda hala okusholola, opo ndaa kondje we. Ondi shi shi kutya Jehova omunahenda noha dhimine po. Ihe molwaashono ondi na omahalo ga puka nokandi ga tonde lela meni lyandje, ondu uvite kutya itandi vulu okukwathelwa kuye. Olugodhi ndoka lwa kala nokutsikila olwa guma onkalamwenyo yandje ayihe. . . . Konima sho nda lesha oshitopolwa: Mbela owu na ngaa ‘omwenyo gwokutseya’ Jehova? mOshungolangelo yo 15 Maalitsa 2013, onda li shili ndu uvite kutya Jehova okwa hala okukwathela ndje.”

14. (a) Paulus okwa li u uvitile ngiini shoka a li ta kondjitha? (b) Ongiini tatu vulu okusindana molugodhi lwetu lwokukondjitha omaunkundi gopanyama?

¹⁴ Lesha Aaroma 7:21-25. Paulus okwa li e shi shi kutya okukondjitha omahalo ga puka nosho wo omaunkundi gonyama yetu ndjoka inaayi gwanenena, kaku shi okupu. Nonando ongawo, okwa li e na einekelo thiluthilu kutya ota vulu okusinda shoka ta kondjitha meni lye, mokukala ha galikana kuJehova nokukala e na eitaalo mekulikoyambo lyaJesus. Ongiini kombinga yetu? Ngele otwa kala tatu kondjitha kaatu igandje komaukundi gopanyama, otatu ka sindana. Ngiini mbela? Ongele tatu holele Paulus mokukala twi inekela thiluthilu muJehova pehala lyokwiinekela moonkondo dhetu nosho wo mokukala tu na eitaalo mekuliloyambo.

15. Omolwashike egalikano tali vulu oku tu kwathela tu tsikile okukala aadhiginini notu idhidhimikile omayeleko?

¹⁵ Omathimbo gamwe Kalunga otashi vulika e tu ethe twi ipule muule kombinga yoshinima shontumba. Pashiholelwa, ongiini ngele ngoye (nenge oshilyo shuukwanegumbo) omwa li mwa hepekwa kuuvu wa kwata miiti nenge mwa li mwa ningilwa iinima kaayi li pauyuuki? Otu na okuulika kutya otwi inekela thiluthilu muJehova mokukala hatu mu galikana e tu pe oonkondo, opo tu tsikile okukala aadhiginini, twa kola pambepo nokaatu kanithe enyanyu lyetu. (Fil. 4:13) Iimoniwa yoyendji kutya nduno oyo pethimbo lyaPaulus nenge oyo pethimbo lyetu, otayi ulike kutya egalikano otali vulu oku tu kwathela tu nkondopale notu kale tu na omukumo, tu tsikile okwiidhidhimika.

16, 17. Owa tokola okuninga shike wu li omukondji?

¹⁶ Ondiyapoli oya halelela oku ku mona wa teka omukumo nokuu yi kondjithe. Kala wa tokola toko ‘okudhiginina shoka oshiwanawa.’ (1 Tes. 5:21) Kala wu na einekelo kutya oto vulu okusindana molugodhi lwokukondjitha Satana, uuyuni we wa kolokosha nosho wo egamo kehe lyokuyona. Oto vulu okuninga ngawo mokukala wi inekela thiluthilu kutya Kalunga ota vulu oku ku nkondopaleka. — 2 Kor. 4:7-9; Gal. 6:9.

¹⁷ Tsikila nokukondja ngaashi to vulu. Tsikila nokukambadhala. Tsikila nokukondjitha. Tsikila okukala omudhiginini. Kala wi inekela thiluthilu kutya Jehova ote ke ku ‘lokithila eloolo lyomaliko guuyamba owindji.’ — Mal. 3:10.