1. Ohole oyi iwetikile ngiini mokati koshigwana shaKalunga?

OSHIGWANA shaKalunga osha hangana pambepo nosha tseyikila ohole mokati kasho. (1 Joh. 4:16, 21) Ohole ndjoka ihayi ulikwa owala miilonga iinene, ihe ohayi ulikwa wo miinima iishona, ngaashi moohapu dhombili nomiilonga iiwanawa. Uuna tatu ungaunga nayalwe nolukeno nonondjaalela, nena otatu ‘holele Kalunga, oshoka tse oyana aaholike.’ — Ef. 5:1.

2. Ongiini Jesus a li a ulike ohole yopakalunga?

² Jesus okwa li a holele He thiluthilu. Okwa ti: “Ileni kungame amuhe mwa vulwa nomwa humbatekwa uudhigu, ongame notandi mu pe evululuko.  . . . Oshoka ongame omunambili nomomutima ondi ishonopeka.” (Mat. 11:28, 29) Ngele otatu landula oshiholelwa shaKristus mokukala tu na “oshimpwiyu noohepele,” otatu ka kala twa hokiwa kuTate yetu gwomegulu notatu ka kala wo tu na enyanyu enene. (Eps. 41:1) Natu taleni nkene tatu vulu okuyaalela yalwe megumbo, megongalo nomuukalele.

3. Omomikalo dhini omusamane e na okuulika ombili nosho wo ondjaalela? (Tala kethano lyopetameko.)

³ Aasamane oye na okutula po oshiholelwa oshiwanawa shokuyaalela yalwe megumbo. (Ef. 5:25; 6:4) Pashiholelwa, otaya kumagidhwa kOmbiimbeli ya ‘kale ye na oondunge’ mokuungaunga naakulukadhi yawo. (1 Pet. 3:7, yelekanitha OB-1954.) Ombili nosho wo ondjaalela ekuvu nela. Omusamane omunambili oku shi kutya okwa yooloka ko komukulukadhi gwe momikalo odhindji, ihe nonando ongaaka, oku shi kutya oku li omukwathi gwe noiha kala e mu dhina. (Gen. 2:18) Omusamane oha kala e na ko nasha nomaiyuvo gomukadhi, nohe mu tumbaleke noku mu simaneka. Omukulukadhi gumwe moKanada, okwa popi omusamane gwe a ti: “Iha kala nando a dhina nkene ndi uvite nenge a tye: ‘Ku na okukala wu uvite ngawo.’ Ye omupulakeni omwaanawa. Uuna ta kwathele ndje ndi lundulule etaloko lyandje moshinima shontumba, ohe shi ningi nombili.”

4. Uuna omusamane e li naakiintu yalwe, oha ulike ngiini kutya oku na ondjaalela nomukadhi?

⁴ Omusamane omunambili oha yaalele wo omaiyuvo gomukadhi, uuna e li naakiintu yalwe. Iha kala ti igogagoga muyo nenge e ya ihumbatele momukalo tagu limbilike, ye ihe shi ningi wo okupitila momakwatathano gopaintaneta. (Job 31:1) Oha kala aluhe omudhiginini kuye, hamolwaashoka owala e hole omukulukadhi gwe, ihe omolwohole ye yokuhola Kalunga nokutonda shoka oshiwinayi. — Lesha Episalomi 19:14; 97:10.

5. Omukulukadhi ota vulu ngiini okuyaalela omusamane gwe?

⁵ Uuna omusamane ta holele Jesus Kristus, e li omutse gwe, ohashi kwathele omukulukadhi gwe a kale e mu ‘simaneka’ noonkondo. (Ef. 5:22-25, 33) Ngele omukulukadhi okwa simaneka omusamane gwe, shoka ohashi mu inyengitha a yaalele omusamane gwe, tashi vulika uuna i ipyakidhila niinakugwanithwa yegongalo nenge uuna a gwililwa po komaupyakadhi. Omusamane gumwe moBritania, ota ti: “Omathimbo gamwe omukulukadhi gwandje ohe shi mono kutya opu na sha tashi piyaganeke ndje, okupitila meihumbato lyandje. Opo nduno, oha ningi ngaashi sha popiwa mOmayeletumbulo 20:5, nokuli nando otashi pula a tegelele ethimbo lyo opala a ‘teke mo’ omadhiladhilo ngoka ge li momutima gwandje, ngele oshinima shoka onda manguluka oku shi kundathana naye.”

6. Ongiini atuheni tatu vulu okuladhipika aanona ya yaalele yalwe, nohaya mono mo uuwanawa wuni?

⁶ Aavali ohaya tulile po oyana oshiholelwa oshiwanawa, ngele ohaya yaalelathana. Odhoshili kutya aavali oyo ye na oshinakugwanithwa shokulonga oyana ya kale haya yaalele yalwe. Pashiholelwa, aavali otaya vulu okulonga oyana ya kale ihaaya tondoka mOshinyanga shUukwaniilwa. Uuna taya nyanyukilwa pamwe nooitaali ooyakwawo, otaya vulu wo okulombwela oyana ye ethe aakuluntu oyo ya kuthe tango iikulya. Ihe kehe gumwe megongalo ota vulu okwaambidhidha aavali. Pashiholelwa, ngele okanona oke tu ningile sha oshiwanawa, tashi vulika ke tu egululila omweelo tu pite po, otu na oku ka pandula. Oku shi ninga, ohaku ka nwetha mo nawa, nohaka kala ku uvite kutya “okugandja oku na elago ku vule okutaamba.” — Iil. 20:35.

7. Jesus oku ulike ngiini kutya okwa li a yaalela omulumentu ombolo ngoka a aludha, noshike tatu vulu okwiilonga moshiholelwa she?

⁷ Oshikando shimwe sho Jesus a li moshitopolwa shaDekapolis, aantu oye “eta kuye omulumentu ombolo ye iha popi.” (Mark. 7:31-35) Pehala lyoku mu aludhila montaneho yaantu, Jesus okwe mu kutha po “ye ki ikalele yo naye,” e te mu aludha. Okwe shi ningile shike? Otashi vulika omulumentu ngoka a li inaa manguluka okukala mokati kaantu oyendji. Otashi vulika Jesus e shi dhimbulula, nomolwaashono e mu aludha ye li po oyo ayeke. Otu shi shi kutya tse ihatu longo iikumithalonga. Ihe otatu  vulu notu na okuulukila ooitaali ooyakwetu kutya otu na ko nasha noompumbwe dhawo nosho wo nomaiyuvo gawo. Omuyapostoli Paulus okwa nyola a ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa.” (Heb. 10:24) Jesus okwa li u uvite ko nkene omulumentu ombolo u uvite, e te mu aludha ye li oyo ayeke. Okwe tu tulila po oshiholelwa oshiwanawa lela.

8, 9. Omomikalo dhini tatu vulu okuyaalela aakokele naamboka kaaye na uukolele? (Gandja iiholelwa.)

⁸ Yaalela aakokele nosho wo mboka kaaye na uukolele. Shoka tashi ndhindhilikitha mo egongalo lyopaKriste, ohole, ihe hailonga mbyoka tali pondola. (Joh. 13:34, 35) Ohole ohayi tu inyengitha tu kwathele aakokele nosho wo iilema, opo ya thike pokugongala kehe noye ku uvithe onkundana ombwanawa. Shoka ohatu shi ningi, nonando okuvula kwawo okwa ngambekwa. (Mat. 13:23) Omumwatate Michael, ngoka he ende mokatemba, oha pandula noonkondo ekwatho ndyoka ha pewa kuyaandjawo nosho wo kaamwahe mboka ye li mongundu yawo yiilonga yomomapya. Ota ti: “Omolwekwatho ndyoka ayehe haya pe ndje, ohandi kala olundji pokugongala nohandi kutha ombinga muukalele pandjigilile. Ondi hole unene okugandja uunzapo womontaneho.”

⁹ Momagumbo ogendji gaBetel, omu na aakulupe naamboka kaaye na uukolele. Aatonateli moBetel ohaya ulike kutya oye na ko nasha nayo, sho haya ningi omalongekidho, opo ya kuthe ombinga mokugandja uunzapo okupitila moontumwafo nomokudhenga oongodhi. Omumwatate Bill, ngoka e na omimvo 86 noha nyolele aantu mboka ye li kiitopolwa yokokule, okwa ti: “Ohatu pandula uuthembahenda mboka tu na wokunyola oontumwafo.” Omumwameme Nancy, ngoka e li pokugwanitha omimvo 90, okwa ti: “Okunyola oontumwafo osha kwatela mo oshindji, kaashi shi owala okutuma omakutu. Oku shi ninga, oshi li iilonga yomomapya. Aantu oya pumbwa okutseya oshili!” Omumwameme Ethel, ngoka a valwa mo 1921, okwa ti: “Ngame ihandi pu pombanza. Omasiku gamwe ohandi kala nokuli nda nyengwa okwiizaleka.” Nonando ongawo, oku hole okuuvitha okupitila mongodhi noku na omaishunoko omawanawa. Omumwameme Barbara, ngoka e na omimvo 85, ota ti: “Shaashi kandi na uukolele, oshidhigu kungame okuya momapya pandjigilile. Ihe ohandi vulu okuuvithila yalwe okupitila mongodhi. Otandi pandula Jehova!” Aakokele yetu mboka oya longa oowili 1 228 meni lyomumvo gumwe lwaampo, oya nyola oontumwafo 6 265, oya gandja uunzapo okupitila moongodhi kaantu ya konda po 2 000 noya gandja iileshomwa 6 315. Iilonga yawo mbyono oya nyanyudha noonkondo omutima gwaJehova. — Omayel. 27:11.

10. Ongiini tatu vulu okukwathela aamwatate ya mone uuwanawa pokugongala kehe kwopaKriste?

¹⁰ Yaalela yalwe pokugongala kwopaKriste. Otwa hala ooitaali ooyakwetu ya mone po uuwanawa thiluthilu. Ngele otwa kala twe ya yaalela, otashi ke ya kwathela ya mone uuwanawa mokugongala. Ngiini mbela? Omukalo gumwe omokuthika kuyele, opo kaatu ya piyaganeke. Odhoshili kutya ohashi vulika pu holoke iinima mbyoka tayi tu imbi tu thike pethimbo. Ihe ngele otu na ondjigilile yokuya aantu ya tameka nale, otwa pumbwa okutala kutya oshike tu na okuninga po tu yaalele ooyakwetu. Otu na okukaleka momadhiladhilo kutya Jehova naJesus oyo ye tu hiya kokugongala. (Mat. 18:20) Onkee otwa pumbwa lela oku ya simaneka mokuthika pethimbo.

11. Omolwashike mboka ye na iitopolwa pokugongala, ye na okutula miilonga shoka sha popiwa mAakorinto yotango 14:40?

¹¹ Okuyaalela ooitaali ooyakwetu, otashi ti wo kutya okuvulika kelombwelo ndyoka tali ti: “Kehe shimwe nashi ningwe palandulathano nopamukalo omwaanawa.” (1 Kor. 14:40) Aamwatate mboka ye na iitopolwa pokugongala, ohaya vulika kelombwelo ndyoka, sho haya mana pethimbo. Sho haya ningi ngawo, ihaya  yaalele owala omupopi a landula ko, ihe egongalo alihe. Aamwatate yamwe otashi vulika ye na okuhinga iinano iile, opo ya ka thike komagumbo. Yalwe otashi vulika haya ka konga oolefa. Omanga yamwe tashi vulika ye na ookuume kopandjokana kaaye shi ooitaali, mboka haya kala ye ya tegelela.

12. Omolwashike twa pumbwa ‘okusimaneka nokukala tu hole’ aakuluntugongalo, omolwiilonga yawo yuudhiginini? (Tala oshimpungu “ Yaalela mboka taya kwatele komeho.”)

¹² Aakuluntugongalo ohaya longo nuudhiginini megongalo nokukwatela komeho iilonga yokuuvitha. Onkee otwa pumbwa oku ya simaneka nokukala tu ya hole. (Lesha 1 Aatessalonika 5:12, 13.) Otu shi shi kutya oho pandula lela oonkambadhala ndhoka aakuluntugongalo haya ningi, omolwuuwanawa woye. Opo wu shi ulike nawa, kala ho longele kumwe nayo noku ya ambidhidha nehalo ewanawa. Shimwe ishewe, “ohaa tonatele oomwenyo dheni yaa na evululuko, oshoka otaa ke dhi pulwa kuKalunga.” — Heb. 13:7, 17.

13. Omukalo ngono Jesus a li ha ungaunga naantu, otatu vulu okwiilonga mo shike?

¹³ Jesaja okwa hunganeke kombinga yaJesus a ti: “Oshihenguti sha tanduka ite shi nyanyagula nonyeka tayi tsina ite yi dhimi po.” (Jes. 42:3) Omolwohole ye yokuhola aantu, Jesus okwa li e na ondjaalela. Okwa li e na ko nasha naantu mboka pathaneko ya fa oshihenguti sha tanduka nenge onyeka tayi tsina olwithi. Shono oshe mu ningitha a kale e na ondjaalela, ohenda neidhidhimiko. Osha li oshipu nokuli nokaanona ye ye kuye. (Mark. 10:14) Eeno, tse katu na uunongo wa fa waJesus nosho wo uunkulungu wokulonga aantu wa fa we. Ihe otatu vulu notu na okuyaalela aantu moshitopolwa shetu. Shono  osha kwatela mo nkene hatu popi nayo, opethimbo lini nosho wo uule wethimbo ndyoka hatu popi nayo.

14. Omolwashike tu na okukotokela lela omukalo gwetu gwokupopya naantu?

¹⁴ Otu na okupopya naantu ngiini? Aantu oyendji kunena oya ‘hepekwa noya lolodhwa’ kaanangeshefa mboka ye na uulingilingi nokaye na ohenda, kaawiliki yopolotika noyomalongelokalunga. (Mat. 9:36) Omolwoshinima shono, oyendji oya kanitha einekelo netegameno. Onkee ano, osha simana opo oohapu dhetu nosho wo omutono gwewi lyetu yi ulike kutya otu na ohenda nondjaalela. Odhoshili kutya aantu oyendji ohaya pulakene ketumwalaka lyetu. Ihaye shi ningi owala molwontseyo yOmbiimbeli ndjoka tu na nenge molwoku ya tompa, ihe ohaya pulakene molwaashoka tu na ko nasha nayo notwe ya simaneka.

15. Omomikalo dhini tatu vulu okuyaalela aantu mboka hatu uvithile?

¹⁵ Opu na omikalo odhindji nkene tatu vulu okuyaalela aantu mboka hatu uvithile. Pashiholelwa, otatu vulu okulongitha omapulo, uuna tatu ya longo. Omapulo getu naga kale momukalo gwohenda nogwesimaneko. Omumwatate omukokolindjila, ngoka ha longo moshitopolwa moka mu na aantu oyendji kaaye shi aapopyapopi noye na oohoni, okwi ilonga okukala ihaa pula omapulo ngoka taga sitha ohoni. Shika osha kwatela mo omapulo ngoka omuntu itaa vulu okuyamukula nenge tashi vulika kee ga yamukule mondjila. Oha yanda omapulo ngaashi: ‘Edhina lyaKalunga owu li shi?’ nenge, ‘Owu shi kutya Uukwaniilwa waKalunga oshike?’ Pehala lyaashono, oha vulu a tye: “Ondi ilonga mOmbiimbeli kutya Kalunga oku na edhina. Ongiini ngele onde ku ulukile kutya edhina ndyoka olini?” Inatu pumbwa oompango moshinima shika, oshoka aantu oya yoolokathana noya za momaputuko gi ili nogi ili. Ihe otu na aluhe okuyaalela aantu yomoshitopolwa shetu noku ya simaneka, shoka sha kwatela mo oku ya tseya nawa.

16, 17. Ngele otu na ondjaalela naantu ooyakwetu oshi na okunwetha mo ngiini (a) ethimbo lyoku ke ya talela po? (b) ethimbo ndyoka tatu popi nayo?

¹⁶ Ethimbo lini tu na okutalela po aantu moshitopolwa shetu? Uuna tatu uvitha egumbo negumbo, aantu ihaya kala ye shi ngele otatu ya ko. Onkee osha simana, opo tu ye kuyo pethimbo ndyoka tu wete kutya oya manguluka lela okupopya natse. (Mat. 7:12) Pashiholelwa, mbela aantu moshitopolwa sheni ihaya penduka mbala momahuliloshiwike? Ngele osho, oto vulu okutameka okuuvitha mepandaanda, okugandja uunzapo womontaneho nenge wu shune kaantu mboka wu shi kutya oto adha ya penduka nenge ye li pokupenduka.

¹⁷ Otu na okupopya nayo ethimbo li thike peni? Aantu oyendji oyi ipyakidhila, onkee oshi li nawa tu popye nayo paufupi, unene tuu oshikando shotango. Onawa tu mane oonkundathana dhetu nziya, pehala lyokukala po ethimbo ele noonkondo. (1 Kor. 9:20-23) Ngele aantu oye shi mono kutya otu shi oonkalo dhawo nenge omaipyakidhilo gawo, otashi vulika ya ka kale ya hala okupulakena kutse oshikando tashi landula. Osha yela kutya otu na okwiimika oshiyimati shombepo yaKalunga muukalele wetu. Uuna tatu shi ningi, nena otatu ka kala lela “aalongi pamwe naKalunga.” Otashi vulika wo Jehova e tu longithe nokuli tu kwathele gumwe e ye moshili. — 1 Kor. 3:6, 7, 9.

18. Ngele ohatu yaalele yalwe, omayambeko geni tashi vulika tu kale twa tegelela tu mone?

¹⁸ Natu ningeni ngaashi tatu vulu, tu yaalele yalwe megumbo, megongalo nomuukalele. Ngele otwe shi ningi, otatu mono omayambeko ogendji ngashingeyi nosho wo monakuyiwa. Episalomi 41:1, 2 otadhi ti: “Aanelago oomboka ye na oshimpwiyu noohepele; Omuwa ote ya kwatha, uuna ye li muudhigu. . . . Ote ya kaleke nawa moshilongo.”