1. Omolwashike Oonzapo dhaJehova dhi li aantu ya nyanyukwa? (Tala kethano lyopetameko.)

OONZAPO DHAJEHOVA odho aantu mboka ya nyanyukwa shili. Uuna dhi li pokugongala kwadho kehe, piigongi nongele tadhi nyanyukilwa pamwe, ohadhi kala tadhi yolo notadhi popi nombili. Omolwashike hadhi kala dha nyanyukwa? Etompelo enene olyo kutya odha tseya Jehova, ngoka e li ‘Kalunga omunyanyukwi,’ ohadhi mu longele nohadhi kambadhala oku mu holela. (1 Tim. 1:11, yelekanitha NW; Eps. 16:11) Kalunga okwa hala tu kale twa nyanyukwa, oshoka oye Onzo yenyanyu. Ohe tu pe iinima oyindji mbyoka tayi tu nyanyudha. — Deut. 12:7; Omuuv. 3:12, 13.

2, 3. (a) Enyanyu oshike? (b) Oshike tashi vulu oku shi ningitha oshidhigu tu kale twa nyanyukwa?

² Ongiini kombinga yoye? Owa nyanyukwa ngaa? Mbela ito vulu okugwedha ko kenyanyu lyoye? Enyanyu olyo “okukala wu uvite nawa mokukala wu na ombili tayi tsikile, wa gwanenwa kwaashoka wu na monkalamwenyo nokutsikila okukala wa nyanyukwa lela.” Ombiimbeli oya ulika kutya mboka ye na ekwatathano ewanawa naJehova, oyo owala taya vulu okukala ya nyanyukwa shili. Muuyuni  mbuka otashi vulika shi kale oshidhigu okukala twa nyanyukwa. Omolwashike mbela?

³ Iinima iiwinayi ngaashi okusilwa gumwe ngoka tu hole nenge a kondwa nenge uuna ondjokana yetu yi li pokuteka nenge twa kanitha iilonga, otayi vulu oku tu yuga enyanyu lyetu. Uupyakadhi womomagumbo nosho wo okwaauvathana otayi vulu wo okuyona po uukolele wetu. Okushekwa kaaniilonga nenge kaanasikola ooyakwetu nosho wo okuhepekwa nenge okutulwa moondholongo omolweitaalo lyetu, otaku vulu natango oku tu yuga enyanyu lyetu. Iinima ngaashi uukolele tawu nyengathana, uuvu woshinamenena nepolimano, nayo otayi vulu okukutha po enyanyu lyetu. Ihe Jesus Kristus ngoka ‘omunyanyukwi nOmupangeli awike,’ okwa li e hole okuhekeleka aantu noku ya kwathela ya kale ya nyanyukwa. (1 Tim. 6:15; Mat. 11:28-30) Okwa li a popi omaukwatya gontumba mEuvitho lye lyokOndundu, ngoka taga vulu oku tu kwathela tu kale twa nyanyukwa, nonando muuyuni mbuka waSatana omu na oonkalo oondhigu.

4, 5. Ongiini tatu vulu okumona enyanyu nokutsikila okukala tu li na?

⁴ Jesus okwa popi tango oshinima shoka sha simana unene, a ti: “Aanelago oomboka [ye shi ompumbwe yawo yopambepo, NW], oshoka Oshilongo shegulu oshawo.” (Mat. 5:3) Ohatu shi ulike ngiini kutya otu shi ompumbwe yetu yopambepo? Omokwiipalutha niikulya yopambepo, omokuvulika komithikampango dhopakalunga nomokupititha komeho okulongela Kalunga ngoka omunyanyukwi. Ngele otatu shi ningi, nena otatu ka kala twa nyanyukwa noonkondo. Otatu ka koleka wo eitaalo lyetu momauvaneko ngoka Kalunga te ke tu gwanithila po konahiya. Shimwe ishewe, otatu ka kala twa nyatipala, sho twa “tegamena esiku lyelago” nenge lyenyanyu, ndyoka lyu uvanekelwa aalongelikalunga yashili mOmbiimbeli. — Tit. 2:13.

⁵ Opo tu kale nenyanyu tali tsikile, osha simanenena tu kale tu na ekwatathano lya kola naJehova. Omuyapostoli Paulus okwa wilikwa kuKalunga a nyole ta ti: “Kaleni aluhe mwa nyanyukwa mokukala mOmuwa [Jehova]. Otandi shi tumbula natango: nyanyukweni!” (Fil. 4:4) Opo tu kale tu na ekwatathano lyopothingo naKalunga, otwa pumbwa oku mu pula e tu pe uunongo. Ombiimbeli otayi ti: “Omunelago omuntu ngoka a likola owino, nomuntu ngoka a pewa oondunge. Oyo omuti gwomwenyo gwaamboka taye yi kwata, naanelago oomboka taye yi dhiginine.” — Omayel. 3:13, 18.

6. Oshike tu na okuninga, opo tu tsikile okukala twa nyanyukwa?

⁶ Opo tu tsikile okukala twa nyanyukwa, osha simanenena tu kale hatu lesha Ombiimbeli nokutula miilonga shoka tayi ti. Jesus okwa tsu omuthindo esimano lyokutula miilonga shoka tatu lesha, a ti: “Ngashingeyi omu shi [uvite] ko. One aanelago, ngele tamu shi ningi.” (Joh. 13:17; lesha Jakob 1:25.) Shoka osho tashi tu kwathele tu gwanithe po ompumbwe yetu yopambepo notu kale nenyanyu tali kalelele. Ongiini nduno tatu vulu okukala twa nyanyukwa, ngele opu na iinima oyindji mbyoka tayi vulu oku tu yuga enyanyu lyetu? Opo tu mone eyamukulo, natu taleni shoka Jesus a landulitha ko mEuvitho lyokOndundu.

7. Mboka ya nika uuthigwa pambepo, otaya vulu ngiini okukala ya nyanyukwa?

⁷ “Aanelago oomboka ya nika uuthigwa, oshoka oyo taa ka talalekwa.” (Mat. 5:4) Yamwe otashi vulika yi ipule taya ti: ‘Omuntu a nika uuthigwa ota vulu ngiini okukala a nyanyukwa?’ Jesus ka li ta popi omuntu ngoka a nika uuthigwa, omolwetompelo kehe. Aakolokoshi  nayo ohaya vulu okukala ya lulilwa kuupyakadhi mboka tawu dhana onkandangala ‘momathimbo omadhigu’ ngaka tu li mugo. (2 Tim. 3:1) Ihe okunika uuthigwa kwawo, ihaku ya hedhitha popepi naJehova, oshoka oyi ihole yo yene. Onkee ano, shoka ihashi ya etele enyanyu. Osha yela kutya Jesus okwa li ta popi aantu mboka ye na ompumbwe yopambepo. Ohaya kala ya nika uuthigwa, sho ye wete aantu oyendji kaaye na ko nasha naKalunga. Oye shi wo kutya yo aalunde noye wete oonkalo oombwinayi ndhoka dhi li muuyuni, omolwuulunde mboka twa thigulula. Jehova oku na ko nasha naantu mboka ya nika uuthigwa pambepo. Ohe ya hekeleke nOohapu dhe, Ombiimbeli, nohe ya kwathele ya kale ya nyanyukwa monkalamwenyo yawo. — Lesha Hesekiel 5:11; 9:4.

8. Yelitha nkene eifupipiko hali kwathele omuntu a kale a nyanyukwa.

⁸ “Aanelago oomboka aayifupipiki, oshoka oyo taa ka thigulula evi.” (Mat. 5:5) Eifupipiko ohali kwathele ngiini omuntu a kale a nyanyukwa? Konima ngele a tseya oshili yOmbiimbeli, oha ningi omalunduluko. Yamwe otashi vulika ya li ye na onyanya, aageyentu noye hole oontamanana. Ihe ngashingeyi oya zala “omuntu omupe” noye na omaukwatya ngaashi “olukeno, ohenda, eifupipiko, ombili neidhidhimiko.” (Kol. 3:9-12) Shono oshe ya etela ombili, ohole nosho wo enyanyu monkalamwenyo. Shimwe ishewe, Ombiimbeli oya uvaneka kutya aantu mbono otaya ka “thigulula evi.” — Eps. 37:8-10, 29.

9. (a) Omeityo lini aaifupipiki taya ka “thigulula evi”? (b) Ongiini mboka “ya sa ondjala noya sa enota lyuuyuuki” taya vulu okukala ya nyanyukwa?

⁹ Omeityo lini aayifupipiki “taa ka thigulula evi”? Aagwayekwa otaya ka thigulula evi, sho taya ka pangela kombanda yevi ye li aakwaniilwa naayambi. (Eh. 20:6) Aantu omamiliyona mboka kaaye na etegameno lyokuya megulu, otaya ka thigulula evi, sho taya ka kala ko sigo aluhe ya gwanenena, ye na ombili noya nyanyukwa. Aantu mboka oya nyanyukwa, oshoka oye li “ya sa ondjala noya sa enota lyuuyuuki.” (Mat. 5:6) Ondjala nenota lyawo lyuuyuuki, otayi ka kuthwa po thiluthilu muuyuni uupe. (2 Pet. 3:13) Uuna Kalunga a hulitha po uukolokoshi awuhe, enyanyu lyaayuuki itali ka yiwa we moshipala kokwaanompango nosho wo kokwaanuuyuuki hoka kwa lunda kunena. — Eps. 37:17.

10. Okukala tu na ohenda otashi ti shike?

¹⁰ “Aanelago aanamutimahenda, oshoka oyo taa ka silwa ohenda.” (Mat. 5:7) Oshityalonga ohenda, mOshihebeli otashi ti wo “okukoka mohole, okukenukila; . . . nokukala wu uvite uukwawo wanankali.” Oshityalonga ohenda, mOshigreka otashi gandja eityo lyokuyaalela gumwe. Ihe oshitya ohenda inashi kwatela mo owala omaiyuvo guukwawo wanankali. Osha kwatela mo wo okuulukila gumwe olukeno okupitila miilonga.

11. Meyele lyaJesus li na ko nasha nOmusamaria omunamutimahenda, otatu ilongo mo shike kombinga yokukala tu na ohenda?

¹¹ Lesha Lukas 10:30-37. Eyele lyaJesus li na ko nasha nOmusamaria omunamutimahenda, otali tu kwathele tu mone kutya okuulukila omuntu ohenda osha hala okutya ngiini. Omusamaria okwa li u uvitile ohenda nosho wo uukwawo wanankali omulumentu ngoka a li a monithwa oshiponga, e te mu kwathele. Konima sho Jesus a gandja eyele ndyoka, okwa ti: “Nangoye wo inda, u ka ninge ngaaka.” Onkee ano, otashi vulika tu ipule tatu ti: ‘Mbela ngaye otandi ningi ngaa sha faathana? Otandi ningi ngaa shoka Omusamaria omunamutimahenda a ningi? Mbela itandi vulu okuulukila ohenda mboka taya mono iihuna noku ya longela sha oshiwanawa? Pashiholelwa, mbela itandi vulu okukwathela ooitaali ooyakwetu mboka aakokele, aaselekadhi nosho wo aanona mboka ye na aavali kaaye li moshili? Mbela itandi vulu “okupopya nehekeleko  naamboka ya polimana”?’ — 1 Tes. 5:14, yelekanitha NW; Jak. 1:27.

12. Ongiini okusila yalwe ohenda taku vulu oku tu etela enyanyu?

¹² Ohenda otayi vulu ngiini okweetela omuntu enyanyu? Uuna tatu ulukile yalwe ohenda, ohatu mono enyanyu ndyoka hali zi mokugandja. Shimwe ishewe, otu shi kutya otatu nyanyudha Jehova. (Iil. 20:35; lesha Aahebeli 13:16.) Kombinga yaamboka ye na ko nasha nayakwawo, omukwaniilwa David okwa ti: “Omuwa [Jehova] ote ya gamene e te ya shigi kiiponga; ote ya kaleke nawa moshilongo.” (Eps. 41:1, 2) Ngele otwa kala hatu sile yalwe ohenda noku ya ulukila olukeno, Jehova naye ote ke tu sila ohenda notatu ka kala twa nyanyukwa sigo aluhe. — Jak. 2:13.

13, 14. Omolwashike mboka ya yela moomwenyo ya nyanyukwa?

¹³ “Aanelago oomboka ya yela moomwenyo dhawo, oshoka oyo taa ka mona Kalunga.” (Mat. 5:8) Opo tu kale twa yela moomwenyo, otwa pumbwa okukaleka omadhiladhilo nomaiyuvo getu ga yela. Otu na oku shi ninga, opo tu kale twa hokiwa kuJehova. — Lesha 2 Aakorinto 4:2; 1 Tim. 1:5.

¹⁴ Mboka ya yela moomwenyo, ohaya nyanyukilwa ekwatathano ewanawa naJehova ngoka a ti: “Aanelago oomboka taa yogo oonguwo dhawo.” (Eh. 22:14) Omeityo lini taya “yogo oonguwo dhawo”? KAakriste aagwayekwa, ‘okuyoga oonguwo dhawo,’ otashi ti kutya Jehova okwe ya tala ko ya yela, ote ke ya pa ondjambi yomwenyo ihaagu si megulu nokukala ya nyanyukwa sigo aluhe. Omanga kongundu onene yaantu mboka ye na etegameno lyoku ka kala kombanda yevi, otashi ti kutya otaya vulu okukala nekwatathano ewanawa naJehova, oshoka okwe ya tala ko ye li aayuuki. Oye li ngashingeyi taya ‘yogo oonguwo dhawo noku dhi yelitha nombinzi yOnzigona.’ — Eh. 7:9, 13, 14.

15, 16. Ongiini mboka ya yela moomwenyo taya ka “mona Kalunga”?

¹⁵ Mboka ya yela moomwenyo otaya ka “mona Kalunga” ngiini, ngele “kaku na ngoka ta tala [Kalunga] e ta kala e na omwenyo”? (Eks. 33:20) Oshitya shOshigreka “mona” otashi ti wo kutya “okumona oshinima nomadhiladhilo, okuuva nenge okutseya.” Mboka ya mona Kalunga ‘nomeho gawo gokomwenyo,’ oyo mboka ye mu tseya noya pandula omaukwatya ge. (Ef. 1:18, yelekanitha OB-1954.) Jesus okwa li a ulike omaukwatya gaKalunga thiluthilu. Onkee okwa popi a ti: “Kehe ngoka a mono ndje, okwa mona wo Tate.” — Joh. 14:7-9.

¹⁶ Kakele kokutseya omaukwatya gaKalunga, aalongelikalunga yashili otaya vulu ‘okumona Kalunga,’ mokutala nkene he ya kwathele. (Job 42:5) ‘Omeho gawo gokomwenyo,’ ohaga gandja wo eitulomo komayambeko ngoka Kalunga a uvanekela mboka taya tsikile okukala ya yogoka noku mu longela nuudhiginini.  Aagwayekwa otaya ka mona Jehova nomeho gawo gokomutse, uuna taya pewa ondjambi yawo yomegulu. — 1 Joh. 3:2.

17. Ekwatathano lini li li pokati kombili nenyanyu?

¹⁷ Jesus okwa tsikile ko a ti: “Aanelago aakondjeli yombili.” (Mat. 5:9) Mboka haya ningi oonkambadhala ya pange ombili, ohashi ya etele enyanyu. Omulongwa Jakob okwa nyola a ti: “Uuwanawa owo eteyo ndyoka lya imi koombuto ndhoka aatungimbili ye dhi kunu mombili.” (Jak. 3:18) Ngele katu na ekwatathano ewanawa nagumwe megongalo nenge megumbo, otu na okupula Kalunga e tu kwathele tu pange ombili naye. Uuna twe shi ningi, Jehova ote ke tu pa ombepo ondjapuki yi tu kwathele tu kale tu na eihumbato ewanawa nosho wo enyanyu. Jesus okwa li a tsu omuthindo esimano lyokupanga ombili, sho a ti: “Ngele to fala omagano goye koshiyambelo, ihe ohaluka wa dhimbulukwa hoka kutya ou na omuntu e ku ninga nayi, nena omagano goye ga thiga ko, u ye manga, mu paathane ombili namukweni, opo u galuke ihe, u gandje omagano goye kuKalunga.” — Mat. 5:23, 24.

18, 19. Omolwashike Aakriste haya vulu okukala ya nyanyukwa, nonando otaya hepekwa?

¹⁸ “One aanelago, aantu ngele taye mu sheke, taye mu tidhagana, taye mu popile muuwinayi auhe nokufundja omolwandje.” Oohapu dhaJesus ndhono otadhi ti shike? Okwa tsikile ko a ti: “Nyanyukweni, ligoleni pombanda, oshoka ondjambi yeni onene yi li megulu. Oshoka osho ngeyi wo ya tidhaganene aahunganeki ye mu tetekela.” (Mat. 5:11, 12) Sho aayapostoli ya li ya dhengwa noya lombwelwa kaaya uvithe we medhina lyaJesus, “oya zi mo moshigongi shaatokoli ya nyanyukwa noonkondo.” Osha yela kutya kaya li ya nyanyukwa sho ya dhengwa noongola, ihe oya li ya nyanyukwa, “sho Kalunga e ya tala ya gwana okuhepekelwa edhina lyaJesus.” — Iil. 5:41.

¹⁹ Oshigwana shaKalunga kunena, ohashi idhidhimike wo nenyanyu, sho tashi hepekwa medhina lyaJesus nenge uuna shi li momayeleko omadhigu. (Lesha Jakob 1:2-4.) Ngaashi owala aayapostoli, natse ihatu kala twa nyanyukwa ngele tatu hepekwa momukalo kehe. Jehova ote ke tu kwathela tu idhidhimike nomukumo, ngele otwa kala aadhiginini kuye, sho tatu makelwa. Pashiholelwa, muAuguste 1944, mboka ye na oonkondopangelo mepangelo lyuukayamukulwa oya li ya tumine omumwatate Henryk Dornik nomumwayinamati kokamba yoonkwatwa. Aahepeki yawo oye shi zimine ya ti: “Oshidhigu oku ya tompa ya ninge sha shoka sha puka. Okuhepekelwa eitaalo lyawo, ohaku ya etele enyanyu.” Omumwatate Dornik okwa ti: “Nonando kanda li ndi na ehalo lyokuhepekelwa eitaalo lyandje, okumona iihuna nda zala omukumo nonyati omolwuudhiginini kuJehova, oshe etela ndje enyanyu. . . . Okugalikana nda mana mo osha hedhitha ndje popepi naJehova, nokwe shi ulika kutya ye Omukwathi e shi okwiinekelwa.”

20. Omolwashike twa nyanyukwa, sho tatu longele ‘Kalunga omunyanyukwi’?

²⁰ Ngele otwa hokiwa “kuKalunga omunyanyukwi,” otatu vulu okukala twa nyanyukwa, nonando otwa kulupa, tatu hepekwa omolweitaalo lyetu, tatu patanekwa kuyaandjetu nenge tatu ehama. (1 Tim. 1:11, yelekanitha NW.) Otatu vulu wo okukala twa nyanyukwa, molwaashoka Kalunga “ngoka ihaa fundju,” okwe tu uvanekela Oparadisa. (Tit. 1:2) Uuna euvaneko ndyoka lya gwanithwa, nena omaudhigu nomayeleko ngoka hatu iyadha mugo kunena, otaga ka fulilwa okalambo. Itatu ka kala tu na iitya nomatumbulo yokuhokolola omayambeko gaJehova ngoka tatu ka mona mOparadisa. Otatu ka kala mo twa nyanyukwa shimwe to nyengwa. Eeno, otatu “ka mona uulinawa nombili.” — Eps. 37:11.