1. Jesus okwa li a popi shike sha simanenena naalongwa ye ongulohi ye yahugunina?

JESUS okwa li a tumbula ohole lwiikando 30 lwaampono, sho a li pamwe naalongwa ye ongulohi ye yahugunina. Okwe ya lombwele sha yela a ti: “Holathaneni.” (Joh. 15:12, 17) Ohole yawo yokuholathana oya li tayi ka kala yi iwetikile lela, naantu oya li taye ke ya dhimbulula mo kutya yo aalanduli ye yashili. (Joh. 13:34, 35) Ohole ndjika, ohole yashili. Jesus okwa li ta popi uukwatya wa simanenena, ano ohole yokwiiyamba. Okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe molwawo. One ookuume kandje, ngele tamu ningi shoka tandi mu lombwele.” — Joh. 15:13, 14.

2. (a) Oshike tatu adha mokati koshigwana shaKalunga? (b) Omapulo geni tatu ka yamukula moshitopolwa shika?

² Iinima mbyoka tayi ndhindhilikitha mo oshigwana shaJehova kunena ongaashi ohole yashili, ohole yokwiiyamba nosho wo uukumwe washo wa kola. (1 Joh. 3:10, 11) Otwa pandula sho ohole ya fa yaKristus tayi dhana onkandangala mokati kaapiya yaJehova, nopwaa na okutala kutya oya za moshigwana shini, momuhoko guni, meputuko lini nohaya popi elaka lini. Otashi vulika tu ipule kutya: ‘Omolwashike ohole ya simanenena pethimbo lyetu?  Jehova naJesus ohaye tu tungu ngiini pahole? Ongiini pauhandimwe tatu vulu okuulika ohole “tayi tungu” ya fa ndjoka yaKristus?’ — 1 Kor. 8:1.

3. “Omathimbo omadhigu” ngaka tu li mugo, oga guma ngiini aantu?

³ Molwaashoka onkalamwenyo oyu udha “uudhigu noluhodhi,” aantu oyendji ‘momathimbo ngaka omadhigu’ oya gwililwa po pamaiyuvo. (Eps. 90:10; 2 Tim. 3:1-5) Aantu oyendji oya teka omukumo. Otaku tengenekwa kutya aantu ya konda po 800 000, ohayi idhipaga omumvo kehe. Konyala moosekonde 40 kehe, omuntu gumwe ohi idhipaga. Shiyemateka, Aakriste yamwe ohaya kala ya gwililwa noonkondo komaupyakadhi, e tayi idhipaga.

4. Aantu yeni ya tumbulwa mOmbiimbeli ya li ya hala okusa?

⁴ Pethimbo lyOmbiimbeli, aapiya yaKalunga yamwe aadhiginini nayo oya li ya gwililwa po komaudhigu, noya li ya hala okusa. Pashiholelwa, sho Job a li a gwililwa po kuudhigu, okwa popi a ti: “Onda vulwa okukala nomwenyo; itandi kala nagwo sigo aluhe.” (Job 7:16; 14:13) Jona naye okwa li a yemata, sho iinima inayi mu endela nawa moshilonga shoka a li a pewa. Okwa ti: “Ngashingeyi, Omuwa, etha ndi se. Okusa oku vulile ndje okukala nomwenyo.” (Jona 4:3) Natango, omuhunganeki omudhiginini, Elia, okwa li a gwililwa po kuupyakadhi we oshikando shimwe, e ta pula a se. Okwa ti: “Sha gwana, Omuwa, kutha ndje omwenyo gwandje.” (1 Aak. 19:4) Nonando ongawo, Jehova okwa li a lenga aapiya ye mboka aadhiginini nokwa li a hala ya kale nomwenyo. Pehala lyoku ya sa uunye, okwe ya kwathele ya sinde ehalo lyawo lyokusa, ndyoka ya li ye na. Okwe ya tungu pahole, opo ya vule okutsikila oku mu longela nuudhiginini.

5. Omolwashike twa pumbwa okuulukila aamwatate naamwameme ohole, unene tuu pethimbo ndika?

⁵ Nonando aamwatate naamwameme inaya teka naanaa omukumo, oyendji otaya ungaunga noonkalo oondhigu noya pumbwa okutungwa pahole. Yamwe otaya idhidhimikile omahepeko nosho wo omasheko. Yalwe oya ninga iihakanwa yokuningwa nayi nenge yokupopilwa muuwinayi kiilonga. Opu na yalwe ya vulwa, omolwokulonga omalutayima nenge iilonga mbyoka yi na esiku moka yi na okupwa. Yalwe otaya hepekwa nayi momagumbo, tashi vulika haya ulwa omalaka kookuume kopandjokana mboka kaaye shi ooitaali. Omolwiinima mbyono nosho wo omathiminiko galwe, oyendji momagongalo oya loloka palutu nopamaiyuvo. Olye ta vulu okukwathela mboka ya teka omukumo ya pule komeho?

6. Ohole yaJehova ohayi tungu ngiini aapiya ye?

⁶ Jehova oha tungu aapiya ye moku ya shilipaleka kutya oku ya hole sigo aluhe. Aaisraeli aadhiginini oya li ya tsuwa omukumo, sho ya uvu oohapu dhaJehova ndhoka tadhi ti: “Ou na ondilo momeho gandje, molwashoka owa simana nondi ku hole. . . . Ino tila — ondi li pamwe nangoye!” (Jes. 43:4, 5) Wu li omupiya gwaJehova, kala wu na uushili kutya oku ku hole noonkondo. * Ombiimbeli oya uvanekela mboka ye li melongelokalunga lyashili tayi ti: “Oonkondo dhe otadhi ku pe esindano. Omuwa okwe ku hokwa, nomohole ye ote ku pe omwenyo omupe.” — Sef. 3:16, 17.

7. Omeityo lini ohole yaJehova tayi faathanithwa naandjoka yomuvalakadhi? (Tala kethano lyopetameko.)

⁷ Jehova oku uvanekela aapiya ye kutya ote ke ya koleka noku ya hekeleka kutya nduno oya kale momamakelo ge thike peni.  Ombiimbeli otayi ti: “Otamu ka fa omunona ta yamu komagundji gayina, ta kwiininwa nokuukatwa nohole. Otandi ke mu hepuluthila . . . ngaashi yina ta hepulutha omwana.” (Jes. 66:12, 13) Oohapu ndhoka otadhi hekeleke noonkondo, oshoka meme omunahole oha kwiinine okanona ke noku ka ukata nohole. Oshiholelwa shino otashi tu kwathele tu mone kutya Jehova oku hole noonkondo aapiya ye mboka taye mu longele moshili noku na ko nasha nawo. Onkee ano, kala wu na uushili kutya ngoye owu na ondilo nongushu momeho ge. — Jer. 31:3.

8, 9. Ohole yaJesus ohayi tu koleke ngiini?

⁸ Opu na ishewe omukalo gulwe ngoka tagu ulike kutya Kalunga oku hole Aakriste yashili. Ombiimbeli otayi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Joh. 3:16) Sho Jesus e tu sile, naye oku ulike lela kutya oku tu hole noonkondo. Ombiimbeli otayi ti: “Olye ano te tu topola ko kohole yaKristus? Uudhigu ando tau shi ningi, nenge oothina?” Osha yela kutya iinima mbyoka itayi vulu oku tu topola ko kohole yaKristus. — Rom. 8:35, 38, 39.

⁹ Uuna tatu kondjo nomaupyakadhi kutya nduno ogopalutu, ogopamaiyuvo nenge tatu ende tatu nkundipala pambepo, ohole yaKristus otayi ke tu pa oonkondo tu idhidhimike. (Lesha 2 Aakorinto 5:14, 15.) Ohole yaJesus oyi na oonkondo oku tu koleka noku tu kwathela kaatu teke omukumo, uuna twa dhengwa kiiponga yopaunshitwe, tatu hepekwa, twi iyala nenge twa gwililwa po kiimpwiyu.

10, 11. Oolye ye na oshinakugwanithwa shokutunga aamwatate mboka ya teka omukumo? Shi yelitha.

¹⁰ Jehova ohe tu tungu ishewe pahole okupitila megongalo lyopaKriste. Otatu vulu okuulukilathana ohole ye mokutungathana pambepo tu li aamwatate naamwameme nosho wo pamaiyuvo. (1 Joh. 4:19-21) Omuyapostoli Paulus okwa ladhipike Aakriste a ti: “Kumagidhathaneni ne mu kwathathane, ngaashi hamu shi ningi nokuli.” (1 Tes. 5:11) Odhoshili kutya ayehe megongalo oye na oshinakugwanithwa shokuholela Jehova naJesus mokuhekeleka nomokutunga aamwatate naamwameme, ihe haakuluntugongalo owala. — Lesha Aaroma 15:1, 2.

¹¹ Yamwe megongalo mboka ye na uupyakadhi wopamadhiladhilo, otashi vulika ya kale  ya pumbwa ekwatho lyopaunamiti koondohotola. (Luk. 5:31) Otu shi kutya aakuluntugongalo nosho wo yalwe megongalo kaye shi oondohotola dhokupanga mboka taye ehama pamadhiladhilo. Nonando ongawo, otaya vulu okuninga po sha, sha simanenena. Ombiimbeli otayi ti: “[Popyeni nehekeleko noomwenyo dha polimana, NW], ambidhidheni aankundi ne mu idhidhimikile ayehe.” (1 Tes. 5:14) Aakriste ayehe oye na okuulika uukwawo wanankali nosho wo olukeno, mokupopya nehekeleko, opo ya tunge mboka ya teka omukumo. Mbela ngoye oho hekeleke nokuladhipika yalwe? Oshike to vulu okuninga, opo wu kale to shi ningi shi vulithe pwaashoka to ningi ngashingeyi?

12. Gandja oshiholelwa shagumwe ngoka a li a tungwa pahole kegongalo.

¹² Ongiini tatu vulu okutunga pahole mboka ya gwililwa po pamadhiladhilo? Omumwameme gumwe muEuropa, okwa ti: ‘Omathimbo gamwe mungame ohamu ya omadhiladhilo gokwiikutha omwenyo. Ihe egongalo ohali ambidhidha ndje. Egongalo moka ndi li, olya hupitha omwenyo gwandje. Aamwatate naamwameme ohaya tsu ndje aluhe omukumo, yo aanahole. Nonando aashona owala ye shi kutya onda kwatwa kepolimano, egongalo ohali ambidhidha ndje aluhe. Megongalo omu na omumwatate nomukulukadhi gwe mboka ya fa aavali yandje yopambepo. Ohaya sile ndje oshimpwiyu nohaya kwathele ndje uusiku nomutenya.’ Odhoshili kutya hakehe gumwe ta vulu okukwathela momukalo ngoka. Ihe ekwatho lyetu ndyoka tali zi komutima, otali vulu lela okuhekeleka mboka taye ehama pamadhiladhilo. *

13. Oshike sha simanenena ngele otwa hala okutunga yalwe?

¹³ Kala omupulakeni omwaanawa. (Jak. 1:19) Okupulakena nolukeno oku li omukalo gwokuulika ohole. Oto vulu okupula omapulo nuukeka nosho wo nuukwawo wanankali, nelalakano wu uve ko nkene omuntu u uvite. Opo ihe oto vulu okukenukila nokutunga omumwaho. Omainyengo goye gokoshipala naga ulike kutya owu na ko nasha naye nowu mu hole. Uuna te ku yelithile uuyelele wa gwedhwa po, pulakena neidhidhimiko, e to yanda oku mu kwata melaka. Ngele owe mu pulakene neidhidhimiko, oto ka uva ko nawa nkene u uvite. Otashi ka kwathela omumwatate nenge omumwameme ngoka a polimana a kale e na einekelo mungoye. Otashi ka kala wo oshipu kuye a pulakene kungoye, sho to popi oohapu tadhi mu tungu. Uuna to ulike kutya owu na ko nasha naye lela, olukeno lwoye otalu ke mu hekeleka.

14. Omolwashike twa hala okuyanda okutamanana naamboka ya polimana?

¹⁴ Yanda oontamanana. Ngele otwa tamanana nomuntu ngoka a polimana, shoka otashi ka gwedha ko owala kuuwehame we, noonkambadhala ndhoka tatu ningi tu mu tunge pahole, itadhi ka pondola. Ombiimbeli otayi ti: “Aanamalaka omadhigu otayu ulula ngegongamwele, ihe elaka lyaanawino olyo ealudho.” (Omayel. 12:18) Kapu na ngoka ha kala a hala ‘okuulula’ owina nomalaka omuntu ngoka a polimana. Ihe nonando omuntu inu ‘ululilwa’ owina, ohashi mu ehameke. Opo tu tunge yalwe pahole moku ya tsa omukumo, otu na okukala nolukeno nokwiitula monkalo yawo. — Mat. 7:12.

15. Iinima yini tayi ke tu kwathela, opo tu tunge yalwe pahole?

¹⁵ Hekeleka yalwe nOohapu dhaKalunga.  (Lesha Aaroma 15:4, 5.) Oshike tatu vulu okulongitha tu ya hekeleke noku ya tsa omukumo? Ombiimbeli. Omolwashike mbela? Omolwaashono “Kalunga, ngoka oluthithiya lweidhidhimiko nolwomukumo,” oye e yi nyolitha. Otatu vulu natango okulongitha iileshomwa mbyoka ya kankamena kOmbiimbeli ngaashi: O-Watch Tower Publications Index nosho wo Embo lyokukonga uuyelele lyOonzapo dhaJehova. Omambo ngoka otaga vulu oku tu kwathela tu mone Omanyolo ngoka taga tungu mboka ye na omaupyakadhi gi ili nogi ili. Otaga vulu wo oku tu pa oondunge tu kale nomadhiladhilo golukeno, ngoka tage ke tu kwathela tu pondole, sho tatu hekeleke yalwe.

16. Otwa pumbwa okukala tu na omaukwatya geni, sho tatu tsu omukumo Omukriste ngoka a polimana?

¹⁶ Kala omunahenda nosho wo omunambili. Omaukwatya ngaka ogo dhingi nohaga ulike kutya katu ihole tse yene, uuna tatu tsu omukumo nokutunga gulwe. Jehova oye “Tate omunahenda, Kalunga, ngoka kuye haku zi ekwatho alihe.” Ye oha ulukile wo aapiya ye “olukeno nesilohenda.” (Lesha 2 Aakorinto 1:3-6; Luk. 1:78; Rom. 15:13) Omuyapostoli Paulus okwe tu tulila po oshiholelwa oshiwanawa moshinima shika. Okwa nyola a ti: “Otwa li twa gwana ando oku mu thiminika, ihe otwa kala mokati keni nombili, ngaashi yina ta sile oyana oshimpwiyu. Omolwohole yetu yoku mu hola inatu ya kune owala nelaka etoye lya za kuKalunga, ihe otwa hupula wo oomwenyo dhetu molweni. Ne aaholike yetu.” (1 Tes. 2:7, 8) Uuna tatu ulike olukeno lwopakalunga, nena otatu ka vula okukwathela omuntu ngoka a polimana.

17. Etaloko lini li li pandjele li na ko nasha naamwatate, tali vulu oku tu kwathela tu ya tunge pahole?

¹⁷ Ino tegelela aamwaho ya kale ya gwanenena. Kala wu na etaloko li li pandjele kombinga yaamwatate naamwameme. Ngele owa tegelela ya kale ya yela ya fa eyi, nena oto ifundju notashi ke ku yemateka. (Omuuv. 7:21, 22) Dhimbulukwa kutya Jehova iha pula aapiya ye ya ninge oshinima shoka itaaya vulu. Ngele otwa landula oshiholelwa she, otatu ka vula okwiidhidhimikila okwaagwanenena kwawo. (Ef. 4:2, 32) Pehala lyokukala to ya pe oombedhi kutya itaya longo sha, ya pandulila iilonga mbyoka taya ningi. Shono otashi ke ya tsa omukumo. Okupandula yalwe tashi zi komutima, ohaku ya tungu pahole nohaku ya kwathele ya vule “okwiitangela” iilonga yawo yene iiyapuki. Oshi li nawa okuninga ngawo, pehala lyokuyelekanitha aantu, oshinima shoka hashi yemateke. — Gal. 6:4.

18. Omolwashike tu na okutunga yalwe pahole?

¹⁸ Jehova nosho wo Jesus ngoka a gandja ekuliloyambo, oya lenga noonkondo onzi yawo kehe. (Gal. 2:20) Natse otu hole wo aamwatate naamwameme noonkondo. Otwa hala oku ya kenukila aluhe nokukala tu ya hole. Opo tu ya talaleke, “otu na okulalakanena aluhe mbyoka tayi tu kaleke tu na ombili nooyakwetu, naambyoka tayi tungu okukalathana kwetu.” (Rom. 14:19) Atuhe otwa tegelela nondjuulukwe Oparadisa, moka itaamu ka kala nando osha shoka tashi tu teya omukumo. Omikithi, iita, eso, okumona iihuna, omaupyakadhi gomomagumbo nosho wo okuyematekwa, ayihe otayi ka hulithwa po. Uuna omimvo eyuvi limwe dha piti, aantu ayehe otaya ka kala ya gwanenena. Ayehe mboka taya ka pita meyeleko lyahugunina, otaya ka ninga oyana yaJehova Kalunga yokombanda yevi. Opo ihe otaya ka ya “memanguluko nomeadhimo lyaana yaKalunga.” (Rom. 8:21) Onkee ano, atuheni natu ulukilathane ohole ndjoka tayi tungu nokukwathelathana, opo tu ka mone enyanyu nosho wo ondjambi ndjoka onene.