1-2. (a) Omolwashike Armagedon e li onkundana ombwanawa kaantu? (b) Oshike tatu ka kundathana moshitopolwa shika?

MBELA owa uva nale aantu taya tumbula oshitya “Armagedon” ya ukitha kiita yopalute nenge koshiponga shopaunshitwe? Mepingathano naashono, shoka Ombiimbeli tayi popi kombinga yaArmagedon osha kwatela mo onkundana ombwanawa, ndjoka tayi tu nyanyudha. (Eh. 1:3) Iita yaArmagedon itayi ka hanagula po aantu, ihe otayi ke ya hupitha. Ngiini mbela?

² Ombiimbeli oya ulika kutya iita yaArmagedon otayi ka hupitha aantu, mokuhulitha po omapangelo gopantu. Iita mbyoka otayi ka hupitha aantu, mokuhanagula po aakolokoshi nokuhupitha aayuuki. Otayi ke ya hupitha mokugamena evi kaali yonagulwe. (Eh. 11:18) Opo tu uve ko nawa iitsa mbika, natu ka kundathaneni omapulo gane: Armagedon oshike? Iiningwanima yini tayi ka tetekela Armagedon? Ongiini tatu vulu okukala yamwe yomwaamboka taya ka hupithwa puArmagedon? Ongiini tatu vulu okutsikila okukala aadhiginini, sho Armagedon ta hedha popepi?

3. (a) Oshitya “Armagedon” otashi ti shike? (b) Shi ikolelela kEhololo 16:14, 16, omolwashike tatu vulu okutya Armagedon ke shi ehala lyo lyenelyene?

³ Lesha Ehololo 16:14, 16. Oshitya “Armagedon” osha holoka mo owala lumwe mOmanyolo, nosha za kuutumbulilo wOshihebeli mboka tawu ti “Ondundu yaMegiddo.” (Eh. 16:16) Megiddo oshilando sha li muIsraeli shonale. (Jos. 17:11) Ihe Armagedon ina ukitha kehala lyo lyenelyene kombanda yevi. Paushili wo wene, okwa ukitha konkalo moka ‘aakwaniilwa yokombanda yevi alihe’ taya ka gongelwa ya kondjithe Jehova. (Eh. 16:14) Nonando ongawo, moshitopolwa shika oshitya “Armagedon,” otashi ka longithwa wo sha ukitha kiita mbyoka tayi ka landula ko nziya konima  yokugongelwa kwaakwaniilwa yokombanda yevi. Otu shi shi ngiini kutya Armagedon ehala lyopathaneko? Shotango, kapu na ondundu hayi ithanwa Megiddo. Oshitiyali, ehala ndyoka lya dhingoloka Megiddo eshona unene nokukalwa “kaakwaniilwa yokombanda yevi alihe” pamwe nomatangakwiita gawo niikondjitho yawo. Oshititatu, ngaashi tatu ke shi mona moshitopolwa shika, iita yaArmagedon otayi ka tameka uuna ‘aakwaniilwa’ yomuuyuni taya ka ponokela aapiya yaKalunga, mboka yi ihanena evi alihe.

4. Omolwashike Kalunga a kwatakanitha iita ye iinene yahugunina naMegiddo?

⁴ Omolwashike Jehova a kwatakanitha iita ye iinene naMegiddo? Nale omalugodhi ogendji oga li haga ningilwa muMegiddo nomolusilu lwaJesreel. Poompito dhimwe, Jehova okwa li ha yi mo olunyala a kwathele oshigwana she shi sindane. Pashiholelwa, “pomulonga gwaMegiddo” Kalunga okwa li a kwathele omutokolihapu Omuisraeli, Barak, a sinde etangakwiita lyAakaanana, ndyoka lya li tali kwatelwa komeho kondjayi yedhina Sisera. Barak nomuhunganeki omukiintu, Debora, oya li ya pandula Jehova, sho e ya kwathele ya sindane pashikumithalonga. Oya imbi taya ti: “Oonyothi odha kondjo okuza kealelo . . . odha kondjitha Sisera. Efundja lyomuKishon olye ya kungulula po.” — Aatok. 5:19-21.

5. Eyooloko enene lini li li pokati kiita yaArmagedon nolugodhi ndoka lwa li lwa kondjwa kuBarak?

⁵ Barak naDebora oya hulitha eimbilo lyawo taya ti: “Omuwa, aatondi yoye ayehe naa se ngaaka, ihe aaholike yoye naa yele ongetango tali piti.” (Aatok. 5:31) Sha faathana, puArmagedon, aatondi yaKalunga otaya ka hanagulwa po, omanga mboka ye hole Kalunga taya ka hupithwa. Ihe pokati komalugodhi ngoka, opu na eyooloko enene. PuArmagedon, aapiya yaKalunga itaya ka kondja. Itaya ka kala nokuli ya homata! Otaya ka kala ye mu ‘inekela meimweneneno noye na oonkondo,’ noyi inekela wo metangakwiita lye lyomegulu. — Jes. 30:15; Eh. 19:11-15.

6. Jehova otashi vulika a ka sinde ngiini aatondi ye puArmagedon?

⁶ Kalunga ota ka sinda ngiini aatondi ye puArmagedon? Otashi vulika e ke shi ninge momikalo odhindji. Pashiholelwa, otashi vulika a ka longithe ekakamo lyevi, oompawe noombadhi. (Job 38:22, 23; Hes. 38:19-22) Otashi vulika a ningithe aatondi ye ya pilukilathane. (2 Ondjal. 20:17, 22, 23) Otashi vulika wo a longithe aayengeli ya dhipage aakolokoshi. (Jes. 37:36) Kutya nduno Kalunga ota ka longitha shike, ota ka sindana. Aatondi ye ayehe otaya ka hanagulwa po, omanga aayuuki taya ka hupithwa. — Omayel. 3:25, 26.

7-8. (a) Shi ikolelela kAatessalonika yotango 5:1-6, eigidho lini inaali uvika nale tali ka igidhwa kaakwanepangelo? (b) Omolwashike shoka tashi ka kala iifundja ya nika oshiponga?

⁷ “Esiku lyOmuwa” otali ka tetekelwa keigidho ‘lyombili negameno.’ (Lesha 1 Aatessalonika 5:1-6.) “Esiku lyOmuwa” ndyoka lya popiwa mAatessalonika yotango 5:2, otali ulike ‘komahepeko omanene’ nenge tu tye kuudhigu uunene. (Eh. 7:14) Otatu ke shi tseya ngiini kutya uudhigu uunene owu li pokutameka? Ombiimbeli otayi tu lombwele kutya otapu ka ningwa eigidho inaali uvika nale. Otali ka kala endhindhiliko ndyoka tali ulike kutya uudhigu uunene owu li pokutameka.

⁸ Endhindhiliko ndyoka otali ka kala eigidho ‘lyombili negameno,’ ndyoka lya hunganekwa. Omolwashike aakwanepangelo taya ka igidha ngawo? Mbela aawiliki yomalongelokalunga otaya ka kutha ombinga? Otashi vulika. Nonando ongawo, eigidho ndyoka otali ka kala owala iifundja ya nwethwa mo koompwidhuli. Iifundja mbyoka otayi ka kala lela ya nika oshiponga, molwaashoka aantu otaya ka kala ye uvite ya gamenwa, nonando paushili wo wene uudhigu uunene mboka inaawu kala ko nando onale, owu li  pokutameka. “Nena ohaluka ehanagulo otali ya adha. . . . Otashi ka kala ngaashi omusimba ta adhika koshitheta.” Ongiini kombinga yaapiya yaJehova aadhiginini? Otashi vulika ya ka kuminwe etameko lyesiku lyaJehova, ihe otaya ka adhika ye li ilongekidhila.

9. Mbela Kalunga ota ka hanagula po uuyuni waSatana palumwe? Shi yelitha.

⁹ Jehova ita ka hanagula po uuyuni waSatana palumwe, ngaashi a ningile pethimbo lyaNoa. Pehala lyaashono, tango ota ka hanagula po oshitopolwa shimwe shuuyuni waSatana, noshikwawo ote ke shi hanagula po lwanima. Ota ka hanagula po tango Babiloni Oshinene, ano omalongelokalunga giifundja. Opo ihe puArmagedon, ota ka hanagula po uuyuni waSatana mboka wa thigala po, mwa kwatelwa omahangano gopapolitika, omatangakwiita nosho wo omahangano gopangeshefa. Natu ka konakoneni iiningwanima mbika iyali muule.

10. Shi ikolelela kEhololo 17:1, 6 nosho wo 18:24, omolwashike Jehova ta ka hanagula po Babiloni Oshinene?

¹⁰ ‘Ohonda kamana otayi ka geelwa.’ (Lesha Ehololo 17:1, 6; 18:24.) Babiloni Oshinene osha nyatekitha edhina lyaKalunga. Osha kala nokulonga aantu iifundja kombinga yaKalunga. Inashi kala oshidhiginini kuJehova, molwaashono ohashi ambidhidha omapangelo gopantu. Osha kala nokuthiminika aantu noku ya yuga iimaliwa yawo. Osha dhipagitha aantu oyendji, mwa kwatelwa aapiya yaKalunga. (Eh. 19:2) Jehova ota ka hanagula po ngiini Babiloni Oshinene?

11. “Oshilikama oshitiligane” oshike, na Jehova ote ke shi longitha ngiini a hanagule po Babiloni Oshinene?

¹¹ Jehova ota ka hanagula po “ohonda kamana,” mokulongitha “ooniga omulongo” ‘dhoshilikama oshitiligane.’ Oshilikama shoka shopathaneko, otashi ulike kIigwana ya Hangana. Ooniga omulongo otadhi thaneke omapangelo gopapolitika omanankondo gokunena, ngoka taga ambidhidha ehangano ndyoka. Peuthwathimbo lyaKalunga, omapangelo gopapolitika omanankondo ngoka otaga ka pilukila po Babiloni shopathaneko. Ohonda ndjoka otage “ke yi hula ashihe shoka yi na notaye ke yi thiga yi li olutu lwowala,” mokuyuga ko eliko lyasho nokwaaneka pomutenya iilonga yasho iiwinayi. (Eh. 17:3,  16) Ehanagulo ndyoka otali ka ningwa meendelelo, naamboka haya ambidhidha ohonda ndjoka, otaye ke shi kuminwa. Omolwashike? Omolwaashono osha kala nokwiinoma tashi ti: “Ongame otandi kuutumba mpaka, omukwaniilwa omukuluntu. Kandi shi omuselekadhi noitandi ka adhika nando koluhodhi!” — Eh. 18:7, 8.

12. Jehova ita ka pitika iigwana yi ninge shike, nomolwashike?

¹² Kalunga ita ka pitika nando iigwana yi hanagule po aapiya ye. Aapiya ye oya humbata edhina lye, noya vulika kelombwelo lye ndyoka tali ti kutya naya ze mo muBabiloni Oshinene. (Iil. 15:16, 17; Eh. 18:4) Oya kambadhala nuudhiginini ya kwathele yalwe ya ze mo musho. Onkee ano, aapiya yaJehova itaye ki ‘ihilila omageelo gasho!’ Nonando ongawo, eitaalo lyawo otali ka makelwa.

13. (a) Gog oshike? (b) Shi ikolelela kuHesekiel 38:2, 8, 9, oshike tashi ka ningitha Gog a ponokele aapiya yaKalunga?

¹³ Eponokelo lyaGog. (Lesha Hesekiel 38:2, 8, 9.) Konima yehanagulo lyomahangano gomalongelokalunga giifundja, kombanda yevi otaku ka kala owala elongelokalunga limwe. Aapiya yaJehova oyo ayeke taya ka kala ko, ya fa omuti gwa hupa moshikungulu oshinenenene. Satana ita ka kala e shi nyanyukilwa. Ota ka ninga ngaashi ta vulu a longithe omitotolombo dhoompwidhuli, ano “oombepo ndatu dha nyata,” dhi ningithe ongundu yiigwana yi ponokele aapiya yaJehova. (Eh. 16:13, 14) Ongundu ndjoka ohayi ithanwa ‘Gog gwomevi lyaMagog.’ Ngele iigwana oya ponokele aapiya yaJehova, kungawo iita yaArmagedon oya tameka. — Eh. 16:16.

14. Gog ota ka ndhindhilika shike?

¹⁴ Gog ota ka kala i inekela “oonkondo dhopantu,” ano omatangakwiita ge. (2 Ondjal. 32:8) Tse otatu ka kala twi inekela muJehova, Kalunga ketu, shoka tashi ka talika ko kiigwana sha nika uugoya. Oshikwawo, iikalunga yaBabiloni Oshinene kaya li ye shi gamene ‘koshilikama’ pamwe ‘nooniga dhasho omulongo.’ (Eh. 17:16) Onkee ano, Gog ota ka dhiladhila kutya otashi ka kala oshipu kuye a sindane. Ota ka ponokela oshigwana shaJehova a “fa oshikungulu tashi taakana oshilongo.” (Hes. 38:16) Ihe masiku ota ka  mona kutya ita ka vula okuya ontuku. Ngaashi Farao pEfuta Etiligane, naye ote ke shi mona kutya ota kondjitha Jehova. — Eks. 14:1-4; Hes. 38:3, 4, 18, 21-23.

15. Omomikalo dhini Kristus ta ka sindana molugodhi?

¹⁵ Kristus netangakwiita lye lyomegulu, otaya ka gamena oshigwana shaKalunga notaya ka hanagula po Gog nomatangakwiita ge. (Eh. 19:11, 14, 15) Ihe oshike tashi ka ningilwa omutondi omunene gwaJehova, Satana, ngoka iifundja ye tayi ka ningitha iigwana yi ponokele oshigwana shaKalunga puArmagedon? Jesus ota ka umbila Satana noompwidhuli dhe molumbogo lwomuule, moka taya ka patelwa mo noshipatitho, ya kale mo oomvula eyovi limwe. — Eh. 20:1-3.

16. (a) Ongiini tatu vulu okuulika kutya otwa “tseya Kalunga”? (b) Omolwashike okutseya kwetu Jehova taku ka kala eyambeko kutse puArmagedon?

¹⁶ Kutya nduno otwa menekela mo moshili nenge hasho, opo tu ka hupithwe puArmagedon, otu na okuulika kutya otwa “tseya Kalunga” nonokutya ohatu “vulika kelaka etoye tali popi Omuwa gwetu Jesus.” (2 Tes. 1:7-9) Ohatu ulike kutya otwa “tseya Kalunga,” uuna tu shi shoka e hole, shoka kee hole nosho wo omithikampango dhe. Ohatu ulike wo kutya otwe mu tseya, uuna tu mu hole, hatu vulika kuye noku mu longela oye awike. (1 Joh. 2:3-5; 5:3) Otatu ka kala tu na uuthembahenda wokukala twa “tseyika . . . kuKalunga,” uuna tatu ulike wo kutya otu mu shi, shoka tashi ka tya ehupitho kutse puArmagedon. (1 Kor. 8:3) Ngiini mbela? Ngele otwa “tseyika wo kuKalunga,” otashi ti kutya otwa hokiwa kuye.

17. ‘Okuvulika kelaka etoye tali popi Omuwa gwetu Jesus,’ otaku ti shike?

¹⁷ ‘Okuvulika kelaka etoye tali popi Omuwa gwetu Jesus,’ okwa kwatela mo oshili ayihe ndjoka Jesus e tu longa, ndjoka tayi adhika mOohapu dhaKalunga. Ohatu vulika konkundana ombwanawa, uuna tatu yi tula miilonga monkalamwenyo yetu. Okuvulika hoka okwa kwatela mo okupititha komeho Uukwaniilwa waKalunga, okukala metsokumwe nomithikampango dhe dhopauyuuki nosho wo okuuvitha kombinga yUukwaniilwa waKalunga. (Mat. 6:33; 24:14)  Okwa kwatela mo wo okwaambidhidha aamwahe yaKristus aagwayekwa, sho taya gwanitha po iinakugwanithwa yawo ya simana. — Mat. 25:31-40.

18. Omomukalo guni aamwahe yaKristus aagwayekwa taya ka ulika uuwanawa mboka ya li ya ulukilwa?

¹⁸ Aapiya yaKalunga aagwayekwa masiku otaya ka ulukila ‘oonzi dhilwe’ uuwanawa mboka dha li wo dhe ya ulukile. (Joh. 10:16) Ngiini mbela? Manga iita yaArmagedon inaayi tameka, aagwayekwa 144 000 otaya ka adhika nale ayehe ya ya megulu, ye li iishitwa yopambepo ihaayi si. Otaya ka kala ye li oshitopolwa shetangakwiita lyaJehova lyomegulu, ndyoka tali ka nyanyagula po Gog notali ka gamena “engathithi lyaantu,” ano oshigwana shaJehova. (Eh. 2:26, 27; 7:9, 10) Odhoshili kutya ongundu onene otayi ka kala ya nyanyukwa noonkondo, sho ya kwathele aapiya yaJehova aagwayekwa, manga ya li kombanda yevi.

19-20. Nonando otu li momaupyakadhi, ongiini tatu vulu okutsikila okukala aadhiginini, sho Armagedon ta hedha popepi?

¹⁹ Momasiku gahugunina omadhigu ngaka tu li mugo, aapiya yaKalunga oyendji ohaya adhika komaupyakadhi. Nonando ongawo, otatu vulu oku ga idhidhimikila twa nyanyukwa. (Jak. 1:2-4) Shoka sha simanenena tashi vulu oku tu kwathela, okukala aluhe tatu galikana tashi zi komutima. (Luk. 21:36) Otu na wo okukala metsokumwe nomagalikano getu, mokukonakona Oohapu dhaKalunga esiku kehe nokutedhatedha kudho, mwa kwatelwa omahunganeko kombinga yomathimbo ngaka tu li mugo. (Eps. 77:12) Okuninga ngawo nosho wo okukutha ombinga pakuudha miilonga yokuuvitha, otayi ka koleka eitaalo lyetu netegameno lyetu!

²⁰ Dhiladhila kunkene to ka kala wa nyanyukwa noonkondo, uuna Babiloni Oshinene sha hanagulwa po, nuuna iita yaArmagedon ya hula po! Sha simanenena, dhiladhila nkene to ka kala wa nyanyukwa noonkondo, uuna edhina lyaKalunga nuunamapangelo we ya yukipalithwa thiluthilu! (Hes. 38:23) Odhoshili kutya Armagedon onkundana ombwanawa kwaamboka ye shi Kalunga, haya vulika kOmwana notayi idhidhimike sigo ehulilo. — Mat. 24:13.