1. Omuyapostoli Johannes okwa li monkalo yini momumvo 95 E.N. lwaampono?

MOMUMVO 95 E.N. lwaampono, omuyapostoli Johannes okwa li monkalo ondhigu noonkondo. Okwa li omukokele, a falwa kontuntu yaPatmos notashi vulika oye owala omuyapostoli a li momwenyo. (Eh. 1:9) Okwa li e shi kutya aapataneki oya li taya pukitha omagongalo nokweeta omatopoko. Otashi vulika sha li tashi monika kutya masiku itapu ka kala we Aakriste yashili. — Jud. 4; Eh. 2:15, 20; 3:1, 17.

2. Okutala kEhololo 7:9-14, emoniko linyanyudha lini Johannes a li a mono? (Tala ethano lyokombanda.)

² Manga Johannes a li monkalo ondhigu, okwa li a mono emoniko linyanyudha. Memoniko ndjoka, okwa li a mono omuyengeli ta lombwele aayengeli yalwe yane kaaya ethe uudhigu uunene wu tameke, sigo aapiya ya tulwa iihako miipala yawo. (Eh. 7:1-3) Ongundu ndjoka oya thikama po maagwayekwa 144 000, mboka taya ka pangela pamwe naJesus megulu. (Luk. 12:32; Eh. 7:4) Opo nduno Johannes okwa popi ongundu yilwe a ti: “Onda mono.” Okwa mono shike? “Engathithi lyaantu ya nyengana okuyalula. Oyo oya zi maantu yomomihoko adhihe, momaludhi agehe, miigwana ayihe nomomalaka agehe. Oyo oya thikama ya taalela oshipangelapundi nOnzigona.” (Lesha Ehololo 7:9-14.) Johannes oku na okukala a li a nyanyukwa, sho a tseya kutya monakuyiwa otaku ka kala aalongelikalunga yashili omayuvi omilongo.

3. (a) Omolwashike emoniko lyaJohannes li na okukoleka eitaalo lyetu? (b) Oshike tatu ka kundathana moshitopolwa shika?

³ Kapu na omalimbililo kutya emoniko ndyoka olya li lya koleke eitaalo lyaJohannes. Emoniko ndyoka oli na wo okukoleka lela eitaalo lyetu, molwaashono otu li methimbo moka tali gwanithwa. Ohatu mono aantu omamiliyona taye tu wayimine mokulongela Jehova, noye na etegameno lyoku ka hupa puudhigu uunene  noku ka kala nomwenyo sigo aluhe kombanda yevi. Moshitopolwa shika, otatu ki ilonga nkene Jehova a li a hololele oshigwana she kombinga yongundu onene, omimvo dhi vulithe omilongo hetatu dha ka pita. Opo nduno, otatu ka kundathana iinima iyali kombinga yongundu ndjoka: (1) uunene wayo, (2) oya thikama po maantu ya za muuyuni awuhe. Iitsa ayihe mbyoka, oyi na okukoleka eitaalo lyaayehe mboka ye na etegameno lyokukala oshitopolwa shongundu ndjoka ya yambekwa.

4. Oshili yini yOmbiimbeli oongeleka dhUukwakriste kaadhi yi uvite ko, nongiini sha yooloka ko kwaashoka sha kala hashi longwa kAakonakoni yOmbiimbeli?

⁴ Oongeleka dhUukwakriste ihadhi longo aantu oshili ya kankamena kOmanyolo, ndjoka kutya esiku limwe aantu mboka haya vulika, otaya ka kala nomwenyo sigo aluhe kombanda yevi. (2 Kor. 4:3, 4) Kunena, omalongelokalunga ogendji gUukwakriste ohaga longo aantu kutya aantu ayehe mboka aawanawa, ohaya yi megulu konima ngele ya si. Mepingathano naashono, shoka hasho sha kala hashi longwa kokangundu okashona kAakonakoni yOmbiimbeli, mboka ya kala nokunyanyangidha Oshungolangelo okuza mo 1879. Oya li ye uvite ko kutya Kalunga ota ka ninga evi Oparadisa ishewe nonokutya aantu omamiliyona mboka haya vulika otaya ka kala huka kombanda yevi, ihe hamegulu. Nonando ongawo, Aakonakoni mboka osha li she ya pula ethimbo ya mone lela kutya aantu mboka haya vulika oolye. — Mat. 6:10.

5. Aakonakoni yOmbiimbeli oya li yi itaala shike kombinga yAakriste 144 000?

⁵ Aakonakoni yOmbiimbeli, oya li wo ya kwathelwa kOmanyolo ya mone kutya aantu yamwe otaya ka “kulilwa ko kevi,” ya ka pangele pamwe naJesus megulu. (Eh. 14:3) Okangundu hoka oka li taka ka thikama po mAakriste 144 000 aalaadhi noyi iyapulila Jehova, mboka ya kala noku mu longela nuudhiginini kombanda yevi. Ongiini kombinga yongundu onene?

6. Aakonakoni yOmbiimbeli oya li yi itaala shike kombinga yongundu onene?

⁶ Memoniko lye, Johannes okwa mono ongundu yaantu ya “thikama ya taalela oshipangelapundi nOnzigona.” (Eh. 7:9) Enyolo ndyoka olya li lya ningitha Aakonakoni yOmbiimbeli ya thike pehulithodhiladhilo kutya ngaashi aagwayekwa 144 000, ongundu onene nayo otayi ka kala megulu. Ngele okangundu kaagwayekwa 144 000 nosho wo ongundu onene oya li ayehe taya ka kala megulu, ongiini pwa li tapu ka kala eyooloko? Aakonakoni yOmbiimbeli oya li taya dhiladhila kutya ongundu onene oya thikama po mAakriste mboka kaaya li naanaa aadhiginini kuKalunga, sho ya li kombanda yevi. Nonando Aakriste mboka oya li ye na omikalo omiwanawa, yamwe yomuyo otashi vulika kaaya li ya za mo moongeleka dhUukwakriste. Aakonakoni yOmbiimbeli oya li ya thiki pehulithodhiladhilo kutya aantu mboka, oya li ngaa ye hole Kalunga, ihe kaya li ya gwana oku ka pangela pamwe naJesus. Molwaashoka ohole yawo yokuhola Kalunga kaya li yomuule, ongundu onene oya li tayi ka ya megulu, yi ka thikame owala komeho yoshipangelapundi, ihe haku kuutumba kiipangelapundi.

7. Shi ikolelela keuvoko lyAakonakoni yOmbiimbeli, oolye ya li taya ka kala kombanda yevi momukokomoko gwOomvula Eyuvi, noya li yi itaala shike kombinga yaalumentu aadhiginini yonale?

⁷ Oolye ano ya li taya ka kala kombanda yevi? Aakonakoni yOmbiimbeli oya li yi itaala kutya konima ngele okangundu kaagwayekwa 144 000 nosho wo ongundu onene ya yi megulu, aantu yalwe omamiliyona oya li taya ka kala nomwenyo kombanda yevi, nokunyanyukilwa uuwanawa wElelo lyaKristus lyOomvula Eyuvi. Aakonakoni yOmbiimbeli kaya li ya tegelela aantu mboka omamiliyona ya longele Jehova, manga Elelo lyaKristus inaali tameka. Pehala lyaashono, oya li ye uvite ko kutya aantu mboka otaya  ka longwa kombinga yaJehova, momukokomoko gwomimvo ndhoka. Okuza mpono, mboka ya li metsokumwe nomithikampango dhaJehova, oya li taya ka kala ye na uuthembahenda wokukala nomwenyo sigo aluhe kombanda yevi, omanga mboka ihaaya vulika ya li taya ka hanagulwa po. Aakonakoni yOmbiimbeli oya li wo taya dhiladhila kutya otashi vulika yamwe mboka ya li taya ka kala “omalenga” (NW) kombanda yevi pethimbo lyOomvula Eyuvi, taya ka mona ondjambi yokukala nomwenyo megulu, ngele dha pu ko. Oya li natango yi itaala kutya “omalenga” ngoka oga kwatela mo “ootatekulululwa” yamwe (aalumentu aadhiginini mboka ya si manga Kristus inee ya) mboka taya ka yumudhwa momukokomoko gwOomvula Eyuvi. — Eps. 45:16.

8. Oongundu ndatu dhini dha li dha talika ko dha kwatelwa mo mokugwanithwa po kwelalakano lyaKalunga?

⁸ Aakonakoni yOmbiimbeli oya li ye wete kutya opu na oongundu ndatu: (1) okangundu 144 000, hoka taka ka pangela pamwe naJesus megulu; (2) ongundu onene yAakriste mboka kaaye shi naanaa aadhiginini, mboka taya ka thikama komeho yoshipangelapundi shaJesus megulu nosho wo (3) aantu omamiliyona mboka taya ka longwa kombanda yevi kombinga yaJehova, momukokomoko gwElelo lyaKristus lyOomvula Eyuvi. * Jehova okwe ya kwathele ya uve ko uuyelele mboka nawa peuthwathimbo lye. — Omayel. 4:18.

9. (a) Omomukalo guni ongundu onene kombanda yevi, tayi vulu okuthikama “ya taalela oshipangelapundi nOnzigona”? (b) Omolwashike euvoko kombinga yuuyelele mboka wu li mEhololo 7:9, li shi okuuviwa ko?

⁹ Mo 1935, emoniko lyaJohannes kombinga yongundu onene, olya li lya yelithwa. Oonzapo dhaJehova odhe ke shi mona mo kutya ongundu onene itayi ka ya megulu yi ka thikame “ya taalela oshipangelapundi nOnzigona.” Shoka oshi li owala pathaneko. Nonando ongundu onene otayi ka kala kombanda yevi, otayi vulu okuthikama “ya taalela oshipangelapundi,” mokutaamba ko kutya Jehova oye omupangeli gweshito alihe nomokuvulika kuunamapangelo we. (Jes. 66:1) Otayi vulu wo okuthikama ‘ya taalela Onzigona,’ mokukala yi na eitaalo mekuliloyambo lyaJesus. Sha faathana, muMateus 25:31, 32, “aantu ayehe yokombanda yevi” mwa kwatelwa aakolokoshi, oya popiwa taya ka “gongelwa ihe koshipala” shaJesus e li koshipangelapundi she sheadhimo. Osha yela kutya aantu ayehe mboka kaye li megulu, ihe okombanda yevi. Uuyelele mboka wa yelithululwa, owu shi okuuviwa ko. Otawu yelitha kutya omolwashike Ombiimbeli inaayi popya ongundu onene tayi yi megulu. Ongundu owala yimwe ya uvanekelwa oku ka kala nomwenyo sigo aluhe megulu, ano okangundu kaantu 144 000, mboka taya ka “pangela kombanda yevi,” ye li aakwaniilwa pamwe naJesus. — Eh. 5:10.

10. Omolwashike ongundu onene ya pumbwa okulongwa kombinga yaJehova, manga Eyuvimumvo inaali tameka?

¹⁰ Okuza 1935, Oonzapo dhaJehova odha li dhe shi uva ko kutya ongundu onene yomemoniko lyaJohannes, oya thikama po mongundu yAakriste aadhiginini, mboka ye na etegameno lyoku ka kala nomwenyo sigo aluhe kombanda yevi. Opo ongundu ndjoka yi ka hupe puudhigu uunene, oyi na okulongwa kombinga yaJehova, omanga Oomvula Eyuvi inaadhi tameka. Otaya ka pumbwa okuulika eitaalo lya kola, opo ya ‘mone oonkondo dhoku ya pititha mumbyoka ayihe tayi ka ningwa,’ omanga Elelo lyaKristus lyOomvula Eyuvi inaali tameka. — Luk. 21:34-36.

11. Omolwashike Aakonakoni yOmbiimbeli yamwe ya li taya dhiladhila kutya yamwe otashi vulika ya ka ye megulu konima yOomvula Eyuvi?

¹¹ Ongiini kombinga yeuvoko ndyoka tali ti kutya yamwe mboka ya li haya longo nuudhiginini,  oya li taya ka ya megulu konima yOomvula Eyuvi? Euvoko ndyoka olya li lye etwa mOshungolangelo yOshiingilisa yo 15 Febuluali 1913. Shoka otashi vulika sha li tashi ningitha omuntu i ipule ta ti: ‘Omolwashike aalumentu aadhiginini yonale ya li taya ka pewa ondjambi yokukala nomwenyo kombanda yevi, omanga mboka kaaya li naanaa aadhiginini taya ka ya megulu?’ Odhoshili kutya euvoko ndyoka olya li lya nwethwa mo komadhiladhilo gopaali ga puka: (1) olyo kutya ongundu onene oya li tayi ka ya megulu nosho wo (2) olyo kutya ongundu onene oya li tayi ka thikama po mAakriste mboka kaaye shi naanaa aadhiginini.

12-13. Aagwayekwa nosho wo ongundu onene oye shi shike kombinga yondjambi yawo?

¹² Ngaashi twe shi mona, okuza mo 1935, Oonzapo dhaJehova odha kala dhi shi uvite ko kutya ongundu onene yomemoniko lyaJohannes oyo tayi ka hupa puArmagedon. Otayi ka ‘pita momahepeko ngoka omanene’ kombanda yevi, notayi ka ‘igidha newi enene tayi ti: “Ehupitho otali tu zile kuKalunga ketu ngoka a kuutumba koshipangelapundi, notali tu zile wo kOnzigona!”’ (Eh. 7:10, 14) Shimwe ishewe, Omanyolo otaga longo kutya mboka taya ka yumudhwa ya ka kale nomwenyo megulu, otaya ka pewa etegameno nenge tu tye “edhiladhilo lilwe ewanawa” li vulithe lyaapiya aadhiginini yonale. (Heb. 11:40) Aamwatate oya li ya tameke okuhiya aantu nuulaadhi ya longele Jehova ye na etegameno lyokukala nomwenyo sigo aluhe kombanda yevi.

¹³ Mboka yomongundu onene, oya nyanyukilwa etegameno lyawo. Oye shi uvite ko kutya Jehova oye ha tokola kutya aapiya ye aadhiginini otaye ke mu longela megulu nenge okombanda yevi. Aagwayekwa nosho wo ongundu onene oye shi kutya otaya ka pewa owala ondjambi, omolwesilohenda lyaJehova okupitila mekuliloyambo lyaJesus Kristus. — Rom. 3:24.

14. Konima yo 1935, omolwashike oyendji ya li ya limbililwa kombinga yankene ehunganeko lyongundu onene lya li tali ka gwanithwa?

¹⁴ Konima sho euvoko lyoshigwana shaKalunga lya yelithwa nawa mo 1935, oyendji oya kala ya limbililwa natango kutya ongiini mboka ye na etegameno lyoku ka kala nomwenyo kombanda yevi, taya ka kala oyendji momwaalu. Pashiholelwa, omumwatate Ronald Parkin okwa li owala e na omimvo 12, sho kwa yelithwa nawa kombinga yongundu onene. Okwa ti: “Pethimbo ndyoka, aauvithi muuyuni awuhe, oya li 56 000 lwaampoka, notashi vulika oyendji yomuyo ya li aagwayekwa. Onkene ongundu onene kaya li tayi monika ya fa onenenene.”

15. Okugongelwa kwongundu onene, okwa tsikile ngiini okuhuma komeho?

¹⁵ Muule womimvo omilongo dha ka landula ko, aatumwa oya li ya tumwa kiilongo oyindji,  nomwaalu gwOonzapo dhaJehova ogwa li gwa indjipala. Opo nduno mo 1968, elongekidho lyokukonakona Ombiimbeli olya tamekele taku longithwa embo Oshili Ndjoka Tayi Fala kOmwenyo Gwaaluhe. Okuyelitha kwalyo oshili yOmbiimbeli momukalo omupu, okwa li kwa hilile aaifupipiki oyendji kuJehova inaashi monika nando onale. Muule womimvo ne, aalongwa aape ye vulithe petata lyomiliyona oya li ya ninginithwa. Sho ongeleka yaKatoolika ya tameke okukala itaayi dhana we onkandangala muAmerika lyokUumbugantu nomiilongo yilwe, naasho iilonga yetu ya kala itaayi indikwa we muEuropa lyokUuzilo nomiitopolwa yomuAfrika, aantu omamiliyona ogendji oya ninginithwa. (Jes. 60:22) Momimvo opo dha piti, ehangano lyaJehova olya nyanyangidha po iilongitho yilwe oyindji hayi pondola, mokukwathela aantu yi ilonge shoka Ombiimbeli tayi longo. Osha yela kutya ngashingeyi ongundu onene oyi vulithe pomamiliyona gahetatu.

16. Ongundu onene oya za peni?

¹⁶ Sho Johannes a li ta nyola kombinga yemoniko lye, okwa popi kutya ongundu onene oya li tayi ka za “maantu yomomihoko adhihe, momaludhi agehe, miigwana ayihe nomomalaka agehe.” Omuhunganeki Sakaria okwa adhika nale a hunganeka oshinima sha faathana. Okwa nyola a ti: “Momasiku ngeyaka aakwiilongo omulongo  otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya Omuwa oku li nane.’” — Sak. 8:23.

17. Oshike sha kala tashi ningwa po, opo aantu yomiigwana nomomihoko adhihe ya kwathelwe?

¹⁷ Oonzapo dhaJehova odhi shi kutya opo aantu yomomalaka agehe ye ye moshili, onkundana ombwanawa oyi na okuuvithwa momalaka ogendji. Otwa toloka iileshomwa yokukonakonwa yopaMbiimbeli muule womimvo dhi vulithe 130, ihe ngashingeyi ohatu toloka momalaka ogendji inaashi monika nando onale mondjokonona. Osha yela kutya sigo okunena, Jehova ota longo oshikumithalonga, sho ta gongele ongundu onene okuza miigwana ayihe. Ongundu ndjika ya za momihoko dhi ili nodhi ili, otayi longele Jehova ya hangana, omolwiikulya yopambepo mbyoka tayi monika momalaka ogendjigendji. Oonzapo odha tseyika nawa kutya ohadhi uvitha nuulaadhi nodhi holathane. Shika itashi koleke tuu eitaalo lyetu! — Mat. 24:14; Joh. 13:35.

18. (a) Metsokumwe naJesaja 46:10, 11, omolwashike itaashi tu kumitha, sho Jehova a gwanitha ehunganeko li na ko nasha nongundu onene? (b) Omolwashike mboka ye na etegameno lyoku ka kala nomwenyo kombanda yevi kaaye uvite kaaye niwe nayo?

¹⁸ Otwa nyanyukilwa noonkondo ehunganeko ndyoka tali popi kombinga yongundu onene. Itashi tu kumitha sho Jehova a gwanitha ehunganeko ndyoka momukalo omukumithi. (Lesha Jesaja 46:10, 11.) Mboka yomongundu onene, oya nyanyukilwa etegameno ndyoka Jehova e ya pa. Kaye uvite kaaye niwe nayo, molwaashoka inaaya gwayekwa nombepo yaKalunga ya ka longe pamwe naJesus megulu. MOmanyolo omu na iiholelwa yaalumentu naakiintu aadhiginini, mboka ya li ya nwethwa mo kombepo ondjapuki, ihe kaye li oshitopolwa shaagwayekwa 144 000. Johannes Omuninginithi oye gumwe gwomuyo. (Mat. 11:11) Gulwe ishewe, oDavid. (Iil. 2:34) Yo nosho wo yalwe oyendjiyendji, otaya ka yumudhwa ya kale nomwenyo kombanda yevi. Ayehe pamwe nongundu onene, otaya ka ulika uudhiginini wawo kuJehova nokuunamapangelo we.

19. Ngele otu uvite ko eityo lyemoniko lyaJohannes kombinga yongundu onene, oshike tatu ka ninga?

¹⁹ Shika osho oshikando shotango mondjokonona Kalunga ta hanganitha aantu omamiliyona okuza miigwana ayihe. Kutya nduno etegameno lyetu olyoku ka kala nomwenyo megulu nenge okombanda yevi, otwa pumbwa okukwathela oyendji ngaashi tashi vulika, ya kale oshitopolwa shongundu onene ‘yoonzi dhilwe.’ (Joh. 10:16) Masiku, Jehova ota ka eta uudhigu uunene mboka a hunganeka, wu hanagule po omapangelo nomalongelokalunga ngoka ga kala nokuhepeka aantu. Oshi li uuthembahenda uunene kiilyo ayihe yongundu onene, sho tayi ka longela Jehova sigo aluhe kombanda yevi. — Eh. 7:14.