OSHITOPOLWA SHOKUKONAKONWA 38
“Ileni kungame . . . notandi mu pe evululuko”
“Ileni kungame amuhe mwa vulwa nomwa humbatekwa uudhigu, ongame notandi mu pe evululuko.” — MAT. 11:28.
EIMBILO 17 “Onda hala”
ELALAKANO LYOSHITOPOLWA *
1. Okutala kuMateus 11:28-30, euvaneko lini Jesus a li a ningi?
JESUS okwa li a uvanekele ongundu yaantu mboka ya li taye mu pulakene, a ti: “Ileni kungame . . . notandi mu pe evululuko.” (Lesha Mateus 11:28-30.) Euvaneko ndyoka olya li lya gwanithwa. Pashiholelwa, dhiladhila kwaashoka a ningila omukiintu ngoka a li e na uuvu wa kwata miiti.
2. Jesus okwa li a ningile shike omukiintu ngoka a li ta alukwa?
2 Omukiintu ngoka okwa li a pumbwa lela ekwatho. Okwa li a yi koondohotola odhindji netegameno a ka aludhwe. Uuvu mboka okwa kala nawo uule womimvo 12, nokapwa li ngoka a vula oku mu aludha. PaMpango, okwa li a nika oshidhila. (Lev. 15:25) Opo ihe, okwa uvu kutya Jesus oha vulu okwaaludha mboka taya alukwa, e ta yi e ke mu konge. Sho e mu mono, okwa gumu koongenge dhonguwo ye yokombanda, nokwa aluka nziya. Jesus ine mu aludha owala, ihe okwe mu ulukile wo ohole nesimaneko. Pashiholelwa, shoka okwe shi ulike sho e mu ithana “mumwandje.” Omukiintu ngoka ka li tuu a pepelelwa nokwa nkondopalekwa! — Luk. 8:43-48.
3. Omapulo geni tatu ka yamukula?
3 Ndhindhilika kutya omukiintu ngoka oye a yi kuJesus. Oye a katuka onkatu. Sha faathana, nokunena otse tu na okuninga oonkambadhala tu ‘ye’ kuJesus. Kunena, Jesus ita ka aludha pashikumithalonga mboka taye ‘ya’ kuye. Nonando ongawo, onkee ngaa te tu hiya ta ti: “Ileni kungame . . . notandi mu pe evululuko.” Moshitopolwa shika, otatu ka yamukula omapulo ngaka gatano: Ongiini tatu vulu ‘okuya’ kuJesus? Jesus okwa li ta ti shike,
sho a ti: “Itsikeni ondjoko yandje”? Oshike tatu vulu okwiilonga kuJesus? Omolwashike iilonga mbyoka e tu pa hayi tu talaleke? Ongiini tatu vulu okutsikila okumona evululuko kohi yondjoko yaJesus?“ILENI KUNGAME”
4-5. Omomikalo dhimwe dhini tatu vulu ‘okuya’ kuJesus?
4 Omukalo gumwe tatu vulu ‘okuya’ kuJesus, omokwiilonga oshindji ngaashi tatu vulu kombinga yiinima mbyoka a popi nokwa ningi. (Luk. 1:1-4) Kapu na ngoka ta vulu oku shi tu ningila, ihe otse yene tu na oku yi konakona. Ohatu ‘ya’ wo kuJesus Kristus, mokutokola tu ninginithwe nokuninga aalongwa ye.
5 Omukalo gulwe ‘gwokuya’ kuJesus, okuya kaakuluntugongalo, uuna twa pumbwa ekwatho. Jesus ohe ya longitha ye li “omagano” ya lithe oonzi dhe. (Ef. 4:7, 8, 11; Joh. 21:16; 1 Pet. 5:1-3) Otse tu na okuninga oonkambadhala tu ke ya pule ekwatho. Katu na okukala twa tegelela aakuluntugongalo ya thimbule kutya otatu dhiladhila shike nokutseya shoka twa pumbwa. Natu taleni kwaashoka omumwatate Julian a ti. Okwa ti: “Kuume kandje okwa li a ladhipike ndje ndi pule aakuluntugongalo ya talele ndje po, sho nda zi mo moBetel, omolwuukolele. Petameko onda li ndi wete inaashi pumbiwa. Ihe konima yethimbo, onda ka pula ekwatho, netalelopo lyuusita ndyoka olimwe lyomomagano ga dhenga mbanda ngoka nda pewa.” Aakuluntugongalo aadhiginini, ngaashi yaali mboka ya li ya talele po Julian, otaya vulu oku tu kwathela tu tseye “omadhiladhilo gaKristus,” ano okuuva ko nokuholela okudhiladhila kwe niikala ye. (1 Kor. 2:16; 1 Pet. 2:21) Ngoka ogo lela gamwe gomomagano dhingi taya vulu oku tu pa.
“ITSIKENI ONDJOKO YANDJE”
6. Jesus okwa li ta ti shike, sho a ti: “Itsikeni ondjoko yandje”?
6 Sho Jesus a ti kutya “itsikeni ondjoko yandje,” otashi vulika a li ta ti kutya “taambii ko oonkondopangelo dhandje.” Otashi vulika wo a li ta ti kutya “itsikeni ondjoko pamwe nangame, tu longeleni Jehova.” Kutya nduno okwa li ta ti shike, ondjoko ye otayi thaneke iilonga.
7. Shi ikolelela kuMateus 28:18-20, iilonga yini twa pewa tu longe, nuushili wuni tatu vulu okukala tu na?
7 Ohatu taamba ko ehiyo lyaJesus, uuna twi iyapulile Jehova nokuninginithwa. Ehiyo ndyono olya egulukila kehe gumwe, na Jesus iha tidha po nando ngoka a hala shili okulongela Kalunga. (Joh. 6:37, 38) Aalanduli yaKristus ayehe oya pewa uuthembahenda wokukutha ombinga miilonga mbyoka Jehova a li a lombwele Jesus a longe. Otatu vulu okukala nuushili kutya Jesus ota ka kala aluhe pamwe natse e tu kwathele tu yi longe. — Lesha Mateus 28:18-20.
‘TSEYII NDJE’ NENGE ILONGENI KUNGAME
Talaleka yalwe ngaashi Jesus (Tala okatendo 8-11) *
8-9. Omolwashike aaifupipiki ya li ya hedha kuJesus, nomapulo geni tu na okwiipula?
8 Aantu mboka aaifupipiki oya li ya hedha kuJesus. (Mat. 19:13, 14; Luk. 7:37, 38) Omolwashike mbela? Natu taleni keyooloko ndyoka li li pokati kaJesus nAafarisayi. Aawiliki yomalongelokalunga oya li aainenepeki nokaya li aanahole. (Mat. 12:9-14) Jesus okwa li omunahole nomwiifupipiki. Aafarisayi oya li ye hole okusimanekwa noye na uuntsa, omolwoondondo dhawo dhopombanda. Shoka Jesus ka li e shi popile. Okwa li a longo aalongwa ye ya kale aaishonopeki. (Mat. 23:2, 6-11) Aafarisayi oya li haya pangele yalwe, moku ya mbandapaleka noku ya ningila omatilitho. (Joh. 9:13, 22) Jesus okwa li ha talaleke yalwe noohapu dhopahole noniilonga iiwanawa.
9 Mbela kuJesus owi ilonga ko ngaa omaukwatya ngoka? Ipula to ti: ‘Mbela yalwe oya tala ndje ko ndi li omunambili nomwiifupipiki? Mbela ondi na ngaa ehalo lyokulongela yalwe iilonga yidhinitha? Mbela yalwe oya tala ndje ko ngaa omunambili?’
10. Jesus okwa li ha shilipaleke shike kombinga yaalongi pamwe naye?
Luk. 10:1, 19-21) Okwa li a ladhipike aalongwa ye ya pule omapulo, nokwa li e na ehalo lyokupulakena komaetopo gawo. (Mat. 16:13-16) Ngaashi naanaa iimeno yi li metala hayi kala ya ziza nawa, aalongwa yaJesus oya li haye shi enditha nawa. Oya li ya gandja eitulomo kwaashoka ya longwa kuJesus nokwiimika iiyimati mokulonga iilonga iiwanawa.
10 Jesus okwa li ha shilipaleke kutya aalongi pamwe naye oye li megameno, nokwa li ha nyanyukilwa oku ya dheula. (Kala omupu okupopiwa nangoye nomunambili
Kala wi ipyakidhila nomulaadhi
Kala omwiifupipiki noho longo nuudhiginini *
11. Omapulo geni tu na okwiipula?
11 Mbela owu na oonkondopangelo dhontumba? Ngele osho, ipula to ti: ‘Ohandi ungaunga ngiini nayalwe kiilonga nenge megumbo? Mbela ohandi humitha ngaa komeho ombili? Mbela ohandi ladhipike yalwe ya pule omapulo? Mbela ondi na ehalo lyokupulakena komaetopo gawo?’ Inatu kala nando twa fa Aafarisayi mboka ya li haya uvile nayi nokuhepeka mboka ya li haya popi sha shi li ompinge nomadhiladhilo gawo. — Mark. 3:1-6; Joh. 9:29-34.
‘OTAMU IMONENE EVULULUKO’
12-14. Omolwashike iilonga mbyoka Jesus e tu pa, hayi tu talaleke?
12 Omolwashike shi li evululuko nenge tu tye etalaleko kutse okulonga iilonga mbyoka Jesus e tu pa? Opu na omatompelo ogendji, ihe natu taleni owala gamwepo.
13 Otu na aakuluntugongalo aanahole. Jehova, Omutonateli gwetu Omunene, oha pandula noke shi omukwanyanya. Oha pandula iilonga mbyoka hatu longo. (Heb. 6:10) Ohe tu pe wo oonkondo ndhoka twa pumbwa, opo tu gwanithe po iinakugwanithwa yetu. (2 Kor. 4:7; Gal. 6:5) Jesus, Omukwaniilwa gwetu, okwe tu tulila po oshiholelwa oshiwanawa shankene tu na okuungaunga nayalwe. (Joh. 13:15) Aakuluntugongalo mboka haye tu tonatele, ohaya kambadhala okuholela Jesus, “Omusita omukuluntu.” (Heb. 13:20; 1 Pet. 5:2) Ohaya kambadhala okukala aanambili, oku tu ladhipika noku tu tsa omukumo, sho taye tu tonatele noku tu gamena.
14 Otu na ookuume ya dhenga mbanda. Kapu na aantu yalwe ye na onkalamwenyo yi na elalakano nenge ye na ekwatathano lyopahole, ngaashi tse. Dhiladhila kwaashika: Otu na uuthembahenda wokulonga pamwe naamboka ye na omithikampango dhopamikalo dha dhenga mbanda nokayi ishi uuyuuki. Oye na uunkulungu owundji, ihe ihayi itala ko ye vule yalwe. Ihaye tu tala ko owala tu li aalongi pamwe nayo, ihe otu li wo ookuume kawo. Ekwatathano lyetu nayo lyopothingo, olye ya ningitha ya kale ye na ehalo lyoku tu sila.
15. Otu na okukala tu uvitile ngiini iilonga mbyoka tatu longo?
15 Otu na iilonga ya dhenga mbanda. Ohatu longo aantu oshili kombinga yaJehova nohatu aneke pomutenya iifundja mbyoka ya popiwa kOmuhindadhi. (Joh. 8:44) Satana okwa tsika aantu omitenge omidhigu ndhoka itaaya vulu okuhumbata. Pashiholelwa, okwa hala tu itaale kutya Jehova ite ke tu dhimina po oondjo dhetu nonokutya ke tu hole. Shoka kashi shi tuu omutenge omudhigudhigu niifundja yinyanyalitha! Uuna tatu ‘ya’ kuKristus, oondjo dhetu ohadhi dhimwa po. Odhoshili kutya Jehova atuheni oku tu hole noonkondo. (Rom. 8:32, 38, 39) Ohashi nyanyudha noonkondo okukwathela aantu yi ilonge okukala yi inekela Jehova nokumona nkene taya hwepopaleke onkalamwenyo yawo.
TSIKILENI OKUMONA EVULULUKO KOHI YONDJOKO YAJESUS
16. Omutenge ngoka Jesus te tu lombwele tu itsike, ogwa yooloka ko ngiini komitenge dhilwe ndhoka tu na okuhumbata?
16 Omutenge ngoka Jesus te tu pula tu humbate, ogwa yooloka ko komitenge dhilwe ndhoka tu na okuhumbata. Pashiholelwa, pehulilo lyesiku lyiilonga yokwiikongela omboloto, oyendji
ihaya kala owala ya vulwa, ihe ohaya kala wo inaaya nyanyukwa. Mepingathano naashoka, ohatu kala twa nyanyukwa noonkondo, uuna twa zimbuka miilonga yokulongela Jehova naKristus. Otashi vulika tu kale twa vulwa pehulilo lyiilonga yetu yesiku. Nonando ongawo, kongulohi ohatu kambadhala okuya kokugongala. Olundji ohatu galukile kegumbo twa pepelelwa notu na oonkondo. Ohatu kala wo tu uvite ngawo, uuna twa ningi oonkambadhala tu uvithe notu ninge ekonakonombiimbeli lyopaumwene. Ondjambi ndjoka hatu mono, oyi vule kokulekule oonkondo ndhoka hatu longitha!17. Omolwashike twa pumbwa okukala twa kotokela shoka tatu ningi?
17 Otu na okundhindhilika kutya kehe gumwe gwomutse oonkondo dhe odha ngambekwa. Onkee ano, natu kale twa kotokela shoka tatu kambadhala okuninga. Pashiholelwa, otashi vulika tu hepithe oonkondo dhetu mokwiikongela iinima yopamaliko. Ndhindhilika shoka Jesus a lombwele omulumentu omuyamba ngoka a li e mu pula a ti: “Nandi longe shike, ndi mone omwenyo gwaaluhe?” Omulumentu ngoka omugundjuka okwa adhika nale ha vulika kOmpango. Oku na okukala a li omulumentu omwaanawa, molwaashoka ehokololo lyomEvaangeli lyaLukas olya popya kondandalunde kutya Jesus “okwe mu tala nohole.” Jesus okwa li a hiya omulumentu ngoka. Okwa ti: “Inda, u ka landithe po iinima yoye ayihe. . . . Ila ihe, u landule ndje.” Omulumentu ngoka okwa li a hala okulandula Jesus, ihe ka li a hala okulanditha po “eliko olindji” ndyoka a li e na. (Mark. 10:17-22) Oshizemo, okwa tindi ondjoko ndjoka a li ta pewa kuJesus, e ta tsikile okulongela ‘emona.’ (Mat. 6:24) Andola ongoye, ando owa ningi po shike?
18. Omathimbo nomathimbo, otu na okuninga shike, nomolwashike?
18 Omathimbo nomathimbo, oshi li nawa tu kale hatu talulula shoka twa pititha komeho monkalamwenyo. Omolwashike? Opo tu shilipaleke kutya otatu longitha oonkondo dhetu pandunge. Natu tale kwaashoka sha popiwa komulumentu omugundjuka gwedhina Mark. Okwa ti: “Uule womimvo odhindji, onda kala tandi dhiladhila kutya ondi na onkalamwenyo yanathangwa. Onda li tandi kokola ondjila, ihe onda kala aluhe handi dhiladhila kombinga yiimaliwa nokukala ndi na onkalamwenyo yuuzeko. Onda li nda limbililwa kutya omolwashike onkalamwenyo yandje ya dhigupala. Opo nduno, onda ndhindhilike kutya onda pititha unene uuwanawa wandje komeho, nohandi longitha ethimbo eshona nosho wo oonkondo oonshona mokulongela Jehova.” Mark okwa lundulula okudhiladhila kwe nonkalamwenyo ye, opo a ninge oshindji miilonga yaJehova. Okwa ti: “Omathimbo gamwe ohandi ipula kombinga yiimaliwa, ihe kekwatho lyaJehova nolyaJesus, onda vulu okusinda omashongo ngoka nda li nda taalela.”
19. Omolwashike sha simana tu kale tu na etaloko ewanawa?
19 Otatu ka tsikila okumona evululuko kohi yondjoko yaJesus, ngele otwa ningi iinima itatu. Shotango, tsikila okukala wu na etaloko ewanawa. Ohatu longo iilonga yaJehova, notu na oku yi longa momukalo ngoka Jehova a hokwa. Tse aalongi, omanga Jehova oye Mwene gwepya. (Luk. 17:10) Ngele otwa kambadhala okulonga iilonga ye momukalo ngoka twa hala, otatu ki iyadha tatu kondjithathana nondjoko. Nokuli nontsezi ndjoka yi na oonkondo, ohashi vulika yi imonithe oshiponga nokukala ya vulwa, ngele oya kambadhala okutsa mo dhayo nokukala ompinge nondjoko yamwene gwayo. Mepingathano naashono, otatu vulu okulonga oshindji lela nokusinda eshongo kehe, ngele otwa landula ewiliko lyaJehova. Dhimbulukwa kutya kapu na ngoka ta vulu okukeelela ehalo Lye li gwanithwe! — Rom. 8:31; 1 Joh. 4:4.
20. Otu na okukala tu na einyengotompelo lini, sho tatu itsike ondjoko yaJesus?
Joh. 6:25-27, 51, 60, 66; Fil. 3:18, 19) Mepingathano naashono, mboka ya li yi inyengithwa kohole yashili yokuhola Kalunga noyokuhola aantu ooyakwawo, oyi itsike ondjoko yaJesus onkalamwenyo yawo ayihe kombanda yevi ya nyanyukwa, noya li ye na etegameno lyoku ka kala pamwe naJesus megulu. Ngaashi yo, natse otatu ka tsikila okukala twa nyanyukwa, sho twa humbata ondjoko yaJesus tu na einyengotompelo ewanawa.
20 Oshitiyali, katuka wu na einyengotompelo ewanawa. Elalakano lyetu okusimanekitha Tate yetu omunahole, Jehova. Yamwe mboka ya li ko methelemimvo lyotango, mboka ya li yi inyengithwa kolwiho nenge ya pititha komeho uuwanawa wawo yene, konima yokathimbo oya kala inaaya nyanyukwa noya thigi po ondjoko yaJesus. (21. Okutala kuMateus 6:31-33, otu na okukala tu na einekelo kutya Jehova ota ka ninga shike?
21 Oshititatu, kala wu na einekelo lya uka. Otwa hogolola onkalamwenyo yokwiiyamba noyokulonga nuudhiginini. Jesus okwe tu londodha kutya otatu ka hepekwa. Ihe otatu vulu okukala neinekelo kutya Jehova ote ke tu pa oonkondo, tu idhidhimikile eshongo kehe tali tu adha. Otatu ka kala twa nkondopala lela, ngele otwa tsikile okwiidhidhimika. (Jak. 1:2-4) Otatu vulu wo okukala neinekelo kutya Jehova ote ke tu pa ashihe shoka twa pumbwa, Jesus ote ke tu tonatela nosho wo kutya aamwatate naamwameme otaye ke tu tsa omukumo. (Lesha Mateus 6:31-33; Joh. 10:14; 1 Tes. 5:11) Ano otu na kehe shoka twa pumbwa tu idhidhimikile omashongo!
22. Oshike tatu vulu okupandula?
22 Omukiintu ngoka a li a aludhwa kuJesus, okwa li a talalelwa mesiku ndyoka a aludhwa. Ihe okwa li owala ta ka talalelwa sigo aluhe, ngele a ningi omulongwa gwaKristus omudhiginini. Mbela owu shi kutya okwa ningi po shike? Dhiladhila owala kondjambi ndjoka a li ta ka mona, ando okwa taambele ko ondjoko yaJesus, ano ondjambi yoku ka pangela pamwe naJesus megulu! Kehe shoka ando a ka yamba po a landule Kristus, ando inashi yelekwa neyambeko ndyoka. Kutya nduno otu na etegameno lyoku ka kala megulu nenge okombanda yevi, otatu vulu okukala twa pandula, sho twa taamba ko ehiyo lyaJesus ndyoka tali ti: “Ileni kungame!”
EIMBILO 13 Kristus, oshiholelwa shetu
^ okat. 5 Jesus ote tu hiya tu ye kuye. Okutaamba ko ehiyo lye okwa kwatela mo shike? Oshitopolwa shika, otashi ka yamukula epulo ndyoka notashi ke tu dhimbulukitha wo nkene okulonga pamwe naKristus, haku tu etele evululuko.
^ okat. 60 OMATHANO: Jesus okwa li ha talaleke yalwe momikalo odhindji.
^ okat. 66 OMATHANO: Omumwatate ta talaleke yalwe momikalo dha yoolokathana, ngaashi Jesus.