1. Omolwashike tu na okuvulika kuJehova?

OTU na okuvulika * kuJehova, molwaashoka oye Omushiti gwetu. Oye e na uuthemba woku tu tulila po omithikampango. (Eh. 4:11) Ohatu vulika wo kuye omolwetompelo lilwe lya simana, ano molwomukalo gwe omwaanawa gwokupangela. Mondjokonona ayihe, aapangeli oyendji oya kala ye na oonkondo dhokupangela yalwe. Ihe okupangela kwawo itaku vulu okuyelekanithwa nokwaJehova, oshoka ye Omupangeli omunandunge a shiga ko, omunahole, omunamutimahenda nomunalukeno. — Eks. 34:6; Rom. 16:27; 1 Joh. 4:8.

2. Omatompelo geni gokuvulika kuJehova twa pewa mAahebeli 12:9-11?

² Jehova okwa hala tu kale hatu vulika kuye, molwaashoka tu mu hole notwe mu tala ko e li Tate yetu omunahole, ihe hamolwaashono owala hatu mu tila. Montumwafo ye kAahebeli, Paulus okwa yelitha kutya “otu na okuvulika kuTate gwomegulu,” oshoka ote tu dheula “omoluuwanawa wetu yene.” — Lesha Aahebeli 12:9-11.

3. (a) Ongiini tatu vulu okuulika kutya ohatu vulika kuJehova? (b) Omapulo geni tatu ka yamukula?

³ Ohatu vulika kuJehova mokuninga ngaashi tatu vulu, tu vulike kuye miinima ayihe nomokukondjitha egamo lyokwiinekela moondunge dhetu yene. (Omayel. 3:5) Ohashi kala oshipu kutse okuvulika kuJehova, uuna twi ilongo kombinga yomaukwatya ge omawanawa. Omolwashike? Omolwaashoka omaukwatya ngoka ohagi imonikila mwaashihe shoka ha ningi. (Eps. 145:9)  Ngele otwi ilongo oshindji kombinga yaJehova, otatu ka kala tu mu hole noonkondo. Ngele otu hole Jehova, itatu ka kala twa pumbwa omusholondondo gwoompango dhaashoka tu na okuninga naashoka kaatu na okuninga. Ohatu kambadhala okukaleka omadhiladhilo nomaiyuvo getu metsokumwe naashoka oshiwanawa nokuyanda shoka oshiwinayi. (Eps. 97:10) Ihe omathimbo gamwe, ihashi kala oshipu okuvulika kuJehova. Omolwashike? Aakuluntugongalo, ootate noomeme otaya vulu okwiilonga shike koshiholelwa shomunashikandjo Nehemia, omukwaniilwa David nokuMaria, yina yaJesus? Oshitopolwa shika otashi ka yamukula omapulo ngoka.

4-5. Shi ikolelela kAaroma 7:21-23, omolwashike tashi vulu okukala eshongo okuvulika kuJehova?

⁴ Etompelo limwe kutya omolwashike tashi vulu shi kale eshongo kutse okuvulika kuJehova, olyo kutya atuheni otwa thigulula uulunde nokwaagwanenena. Onkee ano, otu na egamo lyokwaavulika. Sho Adam naEva ya tukululile Kalunga oshipotha noya li oshiyimati shi indikwa, kungawo oyi itulile po omithikampango dhawo yene. (Gen. 3:22) Kunena aantu oyendji oye hole okwiipwililikila shoka Jehova ta ti nokutokola kuyo yene shoka oshiwanawa naashoka sha puka.

⁵ Nokuli naamboka ye shi Jehova noye mu hole, ohashi vulu okukala oshidhigu okuvulika aluhe kuye. Omuyapostoli Paulus naye okwa li a taalela eshongo ndyoka. (Lesha Aaroma 7:21-23.) Ngaashi Paulus, natse otwa hala okuninga shoka sha uka momeho gaJehova. Ihe otu na okukala hatu kondjitha egamo lyokuninga shoka sha puka.

6-7. Omolwetompelo lilwe lini hashi vulu okukala eshongo okuvulika kuJehova? Gandja oshiholelwa.

⁶ Etompelo lilwe kutya omolwashike tashi vulu okukala oshidhigu okuvulika kuJehova, olyo kutya otwa nwethwa mo keputuko lyetu. Omadhiladhilo gopantu ogendji otaga kondjithathana nehalo lyaJehova, naashoka otashi vulu okukala ekondjo tali tsikile kutse, opo tu manguluke ko kugo. Natu tale koshiholelwa shimwe.

⁷ Momahala ogendji, oshi li omukalondjigilile okuthiminika aagundjuka ya longe ya mana mo, opo ya mone iimaliwa oyindji. Omumwameme gwedhina Mary * okwa li a taalela eshongo ndyoka. Manga ini ilonga kombinga yaJehova, okwa li a hiti yimwe yomoosikola dha dhenga mbanda moshilongo shawo. Mary okwa kala ha thiminikwa kuyaandjawo a mone iilonga hayi futu iimaliwa oyindji, opo a kale a simanekwa. Shoka naye okwa li wo e shi hala. Ihe sho i ilongo kombinga yaJehova, e ta kala e mu hole, okwa lundulula omalalakano ge. Nonando ongawo, okwa ti: “Omathimbo gamwe ohandi mono oompito dhiilonga moongeshefa moka tandi vulu okufutwa iimaliwa oyindji, ihe onda mono kutya otayi ka nkundipaleka uupambepo wandje. Omolwomukalo moka nda putudhwa, natango ohashi kala oshidhigu kungame oku yi tinda. Ondi na okwiindila Jehova a kwathele ndje ndi kondjithe emakelo lyokutaamba ko iilonga mbyoka tayi vulu okunkundipaleka uupambepo wandje.” — Mat. 6:24.

8. Oshike tatu ka kundathana ngashingeyi?

⁸ Ohatu vulika kuJehova omolwuuwanawa wetu yene. Ihe mboka ye na oonkondopangelo, ngaashi aakuluntugongalo, ootate noomeme oye na etompelo lya gwedhwa po lyokulandula ewiliko lyaJehova. Olini? Olyokukwathela yalwe. Natu taleni iiholelwa yimwepo mOmbiimbeli, mbyoka tayi tu longo nkene tu na okulongitha oonkondopangelo dhetu momukalo ngoka tagu nyanyudha Jehova.

9. Omashongo geni Nehemia a li a taalele?

⁹ Jehova okwi inekelela aakuluntugongalo oshinakugwanithwa sha simana shokutonatela oshigwana she. (1 Pet. 5:2) Aakuluntugongalo otaya vulu okwiilonga oshindji mokukonakona nkene Nehemia a li a ungaunga noshigwana shaJehova. E li omunashikandjo shaJuda, okwa li e na oonkondopangelo odhindji. (Neh. 1:11; 2:7, 8; 5:14) Dhiladhila owala komashongo gamwe ngoka Nehemia a li a taalele. Okwa li a mono kutya aantu oya nyateka otempeli nokaya li taya ambidhidha Aalevi pashimaliwa, ngaashi sha tegelelwa paMpango. Aajuda oya li ya taaguluka ompango yEsabati, naalumentu yamwe oya li ya hokana aakiintu aakwiilongo. Omunashikandjo Nehemia okwa li e na okuungaunga nonkalo ndjoka ondhigu. — Neh. 13:4-30.

10. Nehemia okwa li i inyenge ngiini komashongo ngoka a li a tsakaneke?

¹⁰ Nehemia ka li a longitha nayi oonkondopangelo dhe, a thiminikile oshigwana shaKalunga omithikampango dhe mwene. Pehala lyaashono, okwa li a kongo ewiliko lyaJehova mokugalikana a mana mo, nokwa longo aantu Ompango yaJehova. (Neh. 1:4-10; 13:1-3) Nehemia okwa li wo a longo pamwe naamwahe neifupipiko, nokwe ya kwathele nokuli ya tungulule ekuma lyaJerusalem. — Neh. 4:15.

11. Shi ikolelela kAatessalonika yotango 2:7, 8, aakuluntugongalo oye na okuungaunga ngiini negongalo?

¹¹ Aakuluntugongalo otashi vulika kaaya tsakaneke omashongo ga fa gaNehemia, ihe otaya vulu oku mu holela momikalo odhindji. Pashiholelwa, ohaya longo nuudhiginini, omolwuuwanawa waamwatate naamwameme. Ihaya etha oonkondopangelo dhawo dhi ya ningithe ya kale ye na uuntsa. Pehala lyaashono, ohaya ungaunga negongalo nohenda nonombili. (Lesha 1 Aatessalonika 2:7, 8.) Ohole yawo yomuule neifupipiko lyawo, ohayi nwetha mo omukalo moka haya popi nayalwe. Omukuluntugongalo gwedhina Andrew ota ti: “Onda mona kutya aamwatate naamwameme ohayi inyenge nawa, uuna omukuluntugongalo omunahenda  nomunahole. Omaukwatya ngoka ohagi inyengitha egongalo li longele kumwe naakuluntugongalo.” Omumwatate gulwe gwedhina Tony, ngoka a kala omukuluntugongalo ethimbo ele, ota ti: “Ohandi kambadhala okutula miilonga omayele ngoka ge li mAafilippi 2:3, mokukala nda tala ko yalwe ye vule ndje. Shoka ohashi kwathele ndje kaandi kale kayamukulwa.”

12. Omolwashike sha simana aakuluntugongalo ya kale aaifupipiki?

¹² Ngaashi Jehova, aakuluntugongalo oye na okukala aaifupipiki. Nonando Jehova oku li Omunamapangeloagehe, oha “nyongama” a kuthe mo “ohepele montsi yevi.” (Eps. 18:35; 113:6, 7) Oku tonde aantu mboka aanuuntsa naainenepeki. — Omayel. 16:5.

13. Omolwashike omukuluntugongalo e na okukala ha “pangele okupopya kwe”?

¹³ Omukuluntugongalo ngoka ha vulika kuJehova, oku na okukala ha “pangele okupopya kwe.” Ngele hasho, otashi vulika a popye nayi naangoka inee mu simaneka. (Jak. 1:26; Gal. 5:14, 15) Omumwatate Andrew ngoka a popiwa metetekelo, okwa ti: “Omathimbo gamwe onda li handi kala nda hala okupopya nayi nomumwatate nenge nomumwameme ngoka ndi wete a fa inaa simaneka ndje. Nonando ongawo, onda tedhatedha kiiholelwa yomOmbiimbeli yaalumentu aadhiginini, noya kwathele ndje ndi mone kutya omolwashike sha simana okukala omwiifupipiki.” Aakuluntugongalo ohaya ulike kutya ohaya vulika kuJehova, mokukala aanahole naanambili, uuna taya popi naakwanegongalo, mwa kwatelwa aakuluntugongalo ooyakwawo. — Kol. 4:6.

14. Oshinakugwanithwa shini Jehova a pa ootate, nokwa tegelela ya ninge shike?

¹⁴ Jehova okwa pa ootate oshinakugwanithwa shokukala omitse dhomagumbo, nokwa tegelela ya dheule nokuputudha nawa oyana. (1 Kor. 11:3; Ef. 6:4) Ihe oonkondopangelo dhawo odha ngambekwa noye na oku ki ihokolola kuJehova, ngoka kuye kwa za edhina lyezimo kehe. (Ef. 3:14, 15) Ootate ohaya vulika kuJehova, mokulongitha oonkondopangelo dhawo momukalo ngoka a hokwa. Otaya vulu okwiilonga oshindji, mokukonakona onkalamwenyo yomukwaniilwa David.

15. Omolwashike omukwaniilwa David e li oshiholelwa oshiwanawa shokukonakonwa kootate?

¹⁵ Jehova ka li owala a tula po David a kale omutse gwegumbo lye mwene, ihe nogwoshigwana ashihe shaIsraeli. E li omukwaniilwa, David okwa li e na oonkondopangelo odhindji. Omathimbo gamwe, okwa li a longitha nayi oonkondopangelo ndhoka, e ta ningi omapuko ga kwata miiti. (2 Sam. 11:14, 15) Ihe okwa li a vulika kuJehova, mokutaamba ko epukululo lye.  Okwa li a mbumbulile Jehova omutima gwe megalikano. Okwa ningi ngaashi ta vulu a vulike komayele gaJehova. (Eps. 51:1-4) Shimwe ishewe, ka li owala i ifupipike a taambe ko omayele omawanawa gaalumentu, ihe nogaakiintu wo. (1 Sam. 19:11, 12; 25:32, 33) David okwa li i ilongo komapuko ge, nokwa ningi okulongela kwe Jehova oshinima sha simanenena monkalamwenyo ye.

16. Ootate otaya vulu okwiilonga shike kuDavid?

¹⁶ Natu taleni iinima yimwepo mbyoka ootate taya vulu okwiilonga komukwaniilwa David: Inamu longitha nayi oonkondopangelo ndhoka Jehova e mu pa. Kaleni hamu zimine omapuko geni nokutaamba ko omayele gopaMbiimbeli ngoka tamu pewa kuyalwe. Ngele omwe shi ningi, yaandjeni otaye ke mu simaneka, omolweifupipiko lyeni. Uuna tamu galikana pamwe naanegumbo lyeni, mbumbulileni Jehova omitima dheni, opo ya mone kutya omwe mu inekela shi thike peni. Shoka sha simanenena, kaleni mwa pititha komeho okulongela kweni Jehova monkalamwenyo yeni. (Deut. 6:6-9) Oshiholelwa sheni oshiwanawa, osho shimwe shomomagano ga dhenga mbanda tamu vulu okupa aanegumbo lyeni.

17. Oshinakugwanithwa shini Jehova a pa oomeme?

¹⁷ Jehova okwa pa oomeme oshinakugwanithwa sha simana muukwanegumbo, nokwe ya pa wo oonkondopangelo dhontumba, ya pangele oyana. (Omayel. 6:20) Odhoshili kutya shoka meme ha ningi noha popi, ohashi vulu okunwetha mo lela oyana monkalamwenyo yawo ayihe. (Omayel. 22:6) Ndhindhilika shoka oomeme taya vulu okwiilonga kuMaria, yina yaJesus.

18-19. Oomeme otaya vulu okwiilonga shike koshiholelwa shaMaria?

¹⁸ Maria okwa li e shi nawa Omanyolo. Okwa li a simaneka Jehova noonkondo nokwa li e na uukuume wopothingo naye. Okwa li e na ehalo lyokuvulika kewiliko lyaJehova, nokuli nonando osha li sha kwatela mo okulunduluka kwonkalamwenyo ye ayihe. — Luk. 1:35-38, 46-55.

¹⁹ Oomeme otamu vulu okulandula oshiholelwa shaMaria momikalo odhindji. Odhini? Gwotango, omokukaleka po ekwatathano lyeni lyopothingo naJehova, okupitila mokukonakona pandjigilile Ombiimbeli paumwene nokugalikana. Omutiyali, omokukala mu na ehalo lyokuninga omalunduluko monkalamwenyo yeni, opo mu nyanyudhe Jehova. Pashiholelwa, otashi vulika wa putudhwa kaavali mboka haya geye mbala nohaya haula oyana. Onkee ano, shoka otashi vulika shi ku dhiladhilithe kutya oshi li nawa okuungaunga naamwoye momukalo ngoka. Nokuli nokonima sho wi ilonga omithikampango dhaJehova, otashi vulika wu mone shi li eshongo okukala naamwoye nombili noku ya idhidhimikila, unene tuu ngele tayi ihumbata nayi, uuna wa vulwa. (Ef. 4:31) Pomathimbo  ga tya ngaaka, owa pumbwa okugalikana Jehova shi vulithe nale. Omuvali gumwe gwedhina Lydia ota ti: “Omathimbo gamwe, onda li handi galikana nda mana mo, opo kaandi popye nda geya, uuna omumwandjemati inaa vulika kungame. Onda li handi ikeelele okupopya sha oshiwinayi, e tandi galikana meimweneneno Jehova a kwathele ndje. Egalikano olya kwathela ndje ndi kale nda ngungumana.” — Eps. 37:5.

20. Eshongo lini oomeme yamwe haya taalele, nongiini taya vulu oku li sinda?

²⁰ Oomeme yamwe otashi vulika ya taalele eshongo lyokukala ye wete oshidhigu okuulukila oyana ohole. (Tit. 2:3, 4) Yamwe oya putudhwa momaukwanegumbo moka aavali kaaye na ekwatathano lyopahole noyana. Ngele nangoye osho wa putudhwa ngawo, ino endulula epuko ndyoka lya ningwa kaavali yoye. Meme ngoka ha vulika kuJehova, ota vulu okwiilonga nkene e na okuulukila oyana ohole. Otashi vulika shi kale oshidhigu kuye okulundulula omukalo gwe gwokudhiladhila, gwokuninga iinima nosho wo omaiyuvo ge. Nonando ongawo, ota vulu oku shi ninga, nomalunduluko ngoka otage ke mu etela uuwanawa nosho wo uukwanegumbo we.

21-22. Shi ikolelela kuJesaja 65:13, 14, okuvulika kuJehova otaku tu etele uuwanawa wuni?

²¹ Omukwaniilwa David okwa li a tseya uuwanawa mboka hawu zi mokuvulika kuJehova. Okwa nyola a ti: “Iipango yOmuwa oyi li mondjila; naamboka haa vulika kuyo, otaa kala aanelago. Omalombwelo gOmuwa ogu uka notaga uvitha ko omadhiladhilo. Ngame, omuntu gwoye, otaga longo ndje oondunge; okuvulika kugo oku na ondjambi.” (Eps. 19:8, 11) Kunena, otatu vulu okumona eyooloko ndyoka li li pokati kaamboka haya vulika kuJehova naamboka kaaye hole omayele ge gopahole. Mboka haya vulika kuye, ohaya ‘imbi omahambelelo.’ — Lesha Jesaja 65:13, 14.

²² Uuna aakuluntugongalo, ootate nosho wo oomeme haya vulika kuJehova, onkalamwenyo yawo ohayi hwepopala, omaukwanegumbo gawo ohaga kala ga nyanyukwa noonkondo negongalo alihe ohali kala lya hangana lela. Shoka sha simanenena, ohaya nyanyudha omutima gwaJehova. (Omayel. 27:11) Enyanyu oli thike peni!