1. Elalakano lini tatu vulu okwiitulila po sho tatu ende tu uka muukokele?

SHO tatu ende tu uka muukokele, otashi vulika tu kale tu uvite kutya itatu ka kala we tu na oshilonga kuJehova ngaashi nale. Nonando odhoshili kutya katu na we oonkondo ngaashi nale, otatu vulu okulongitha owino nontseyo ndjoka twa mona sho twa kala tatu longele Jehova uule womimvo, tu kwathele aamwatate naamwameme aagundjuka ya longele Jehova noya taambe ko iinakugwanithwa ya gwedhwa po. Omumwatate gumwe ngoka a kala omukuluntugongalo ethimbo ele, okwa ti: “Pompito yimwe onda li nda ndhindhilike kutya itandi vulu we okulonga iilonga mbyoka nda li handi longo nale omolwuukokele, nonda li nda nyanyukwa okumona kutya opu na aamwatate aagundjuka mboka ya gwana okulangekwa po oyo ye yi longe po.”

2. Oshike tatu ka kundathana moshitopolwa shika?

² Moshitopolwa sha tetekele otwa kundathana kombinga yankene aagundjuka taya vulu okumona mo uuwanwa mokupanga uukuume naamwatate naamwameme aakokele. Moshitopolwa shika, otatu ka tala nkene omaukwatya ngaashi eifupipiko, ondjele, olupandu nosho wo okugandja taga vulu okukwathela aakokele ya longele kumwe naagundjuka, shoka tashi ka etela egongalo alihe uuwanawa.

3. Shi ikolelela kAafilippi 2:3, 4, eifupipiko oshike, nongiini tali vulu okukwathela Aakriste?

³ Aakokele oya pumbwa okukala aaifupipiki, opo ya vule okukwathela aagundjuka. Omuntu omwiifupipiki oha kala a tala ko yalwe ye mu vule. (Lesha Aafilippi 2:3, 4.) Aakokele mboka ye na uukwatya mboka ohaya kala ye shi kutya oshilonga kehe ohashi vulu okulongwa momikalo odhindji dha yoolokathana.  Onkee ano, ihaya kala ya tegelela kehe gumwe a kale ha ningi iinima momukalo moka yo haye yi ningi. (Omuuv. 7:10) Aakokele otaya vulu okukwathela aagundjuka moku ya lombwela iinima mbyoka yi ilonga sho ya kala taya longele Jehova uule womimvo. Ihe oye na okukala ye shi kutya “uuyuni mbuka otawu ende tawu lunduluka” (NW) notashi vulika ya kale ya pumbwa okwiilonga okuninga iinima momikalo omipe. — 1 Kor. 7:31.

4. Aatonatelishikandjo ohaya ulike ngiini iikala ya fa yAalevi yopethimbo lyonale?

⁴ Ooitaali aaifupipiki ohaya kala ye shi kutya sho ngashingeyi yu uka muukokele, itaya vulu we okulonga oshindji ngaashi nale. Pashiholelwa, natu taleni kaatonatelishikandjo yetu. Uuna ya gwanitha omimvo 70, ohaya pewa oshinakugwanithwa shilwe. Shoka otashi vulika shi kale oshidhigu kuyo, oshoka oya kala ye hole oshinakugwanithwa shawo oshikulu, moka ya kala taya kwathele aamwahe nohaya kala ya hala okutsikila nasho. Nonando ongawo, oye shi kutya oshinakugwanithwa shoka oshi na okulongwa kaamwatate mboka aagundjuka kuyo. Kungawo ohaya ulike iikala ya fa yAalevi yomuIsraeli shonale, mboka ya li ye na okweetha po okulonga metsalihangano uuna ya gwanitha omimvo 50. Enyanyu lyAalevi mboka kalya li li ikolelela kuuthembahenda wontumba. Oya li haya longo nuudhiginini moshinakugwanithwa kehe taya pewa, noya li haya kwathele mboka aagundjuka kuyo ya tseye nkene ye na okugwanitha po iinakugwanithwa yawo. (Num. 8:25, 26) Nonando kunena  mboka ya li nale aatonatelishikandjo ihaya talele po we omagongalo, oye li etsomukumo nekwatho enene komagongalo moka ye li.

5. Oshike to ilongo koshiholelwa shaDan naKatie?

⁵ Natu taleni koshiholelwa shomumwatate Dan, ngoka a kala omutonatelishikandjo uule womimvo 23. Sho Dan a gwanitha omimvo 70, ye nomukadhi, Katie, oya ningi aakokolindjila yi ikalekelwa. Mbela oya kala taye shi enditha ngiini moshinakugwanithwa shawo shoka oshipe? Dan okwa ti kutya ngashingeyi okwi ipyakidhila noonkondo shi vulithe nale. Oha gwanitha po iinakugwanithwa ye megongalo, oha kwathele aamwatate ya kale ya gwana okulangekwa po ye li aayakuligongalo noha dheula wo yalwe ya kale haya uvitha montaneho nosho wo koondholongo. Aakokele, kutya nduno omu li miilonga yethimbo lyu udha nenge hasho, otamu vulu okukwathela yalwe momikalo odhindji. Ongiini mbela tamu vulu oku shi ninga? Omokwiigilila iinakugwanithwa yeni iipe, mokwiitulila po omalalakano omape nokukala tamu gandja eitulomo kwaashoka tamu vulu okuninga.

6. Omolwashike okukala wu shi omangambeko goye ku li pandunge? Shi thaneka.

⁶ Omuntu ngoka omwiifupipiki oha kala e shi omangambeko ge. (Omayel. 11:2, NW) Ngele omuntu oku shi omangambeko ge, oha kala e shi kutya opu na iinima mbyoka itaa vulu okuninga, shoka hashi mu kwathele a kale a nyanyukwa noku tsikile okulonga nuudhiginini. Otatu vulu oku mu yelekanitha nomuntu ngoka ta hingi ohauto pomulondo. Omuhingi okwa pumbwa okutula ohauto mongela onshona, opo a vule okupita po pugo. Odhoshili kutya ohauto otayi ka enda kashona, ihe otayi ka pula komeho. Sha faathana, omuntu ngoka e shi omangambeko ge oha kala e shi kutya uunake a pumbwa “okushuna mongela yopevi,” opo a tsikile okulongela Jehova noku kwathele yalwe. — Fil. 4:5.

7. Barsillai okwa li a ulike ngiini kutya oku shi omangambeko ge?

⁷ Dhiladhila koshiholelwa shaBarsillai, ngoka a li e na omimvo 80 sho omukwaniilwa David e mu hiya a ka kale ha zi mombala. Molwaashoka Barsillai okwa li e shi omangambeko ge, ka li a taamba ko ehiyo lyaDavid. Barsillai okwa li e shi kutya ita vulu we okulonga oshindji molwaashoka omukokele, onkene okwa ti kutya Kimham ngoka a li omulumentu omugundjuka oye na ye pehala lye. (2 Sam. 19:35-37) Ngaashi Barsillai, aamwatate aakokele ohaya kala ya nyanyukwa okugandja po iinakugwanithwa yawo kaamwatate aagundjuka.

8. Omukwaniilwa David okwa li a ulike ngiini kutya oku shi omangambeko ge sho a li a hala okutungila Jehova otempeli?

⁸ Omukwaniilwa David naye okwe tu tulila po oshiholelwa oshiwanawa shokukala tu shi omangambeko getu. Okwa li a halelela okutungila Jehova otempeli. Ihe sho Jehova e mu lombwele kutya uuthembahenda mboka otawu ka pewa omugundjuka Salomo, David okwe shi taamba ko, nokwa ningi ashihe shoka ta vulu a ambidhidhe okutungwa kwotempeli ndjoka. (1 Ondjal. 17:4; 22:5) David ka li a dhiladhila kutya oye a gwana okutunga otempeli ndjoka, molwaashoka Salomo okwa li “omunona natango noke na ontseyo.” (1 Ondjal. 29:1) David okwa li e shi kutya nonando iilonga yokutunga otempeli ndjoka oya li tayi ka kwatelwa komeho kwomuntu omugundjuka noke na ontseyo yasha, kekwatho lyaJehova otayi ka pwa okutungwa. Ngaashi David, aakokele oyendji ohaya tsikile okukala yi ipyakidhila niilonga yaJehova, nonando ngashingeyi iinakugwanithwa yawo oya lunduluka. Oye shi wo kutya Jehova ota ka yambeka iilonga yaamwatate aagundjuka mboka taya longo po iilonga mbyoka ya li haya longo.

9. Omumwatate gumwe ngoka e li oshilyo shOkomitiye yOshitayimbelewa oku ulike ngiini kutya oku shi omangambeko ge?

 ⁹ Pethimbo lyetu, omumwatate gwedhina Shigeo oku li oshiholelwa oshiwanawa shokukala tu shi omangambeko getu. Mo 1976 sho e na omimvo 30, okwa ningi oshilyo shOkomitiye yOshitayimbelewa. Mo 2004 okwa ningi omuunganeki gwOkomitiye yOshitayimbelewa. Konima yethimbo okwe ke shi mona kutya ke na we oonkondo, noita vulu we okugwanitha po oshinakugwanithwa she ngaashi nale. Okwa galikana kombinga yasho, nokwi ipula muule kutya omolwashike shi li pandunge oshinakugwanithwa she shi pewe po omumwatate omugundjuka. Nonando haye we a li omuunganeki, omumwatate Shigeo okwa tsikile okulongela kumwe niilyo yOkomitiye yOshitayimbelewa. Ngaashi twe shi mona moshiholelwa shaBarsillai, shomukwaniilwa David nosho wo shomumwatate Shigeo, omuntu ngoka omwiifupipiki noku shi omangambeko ge okwa pumbwa okukala ha tala kwaashoka aamwatate aagundjuka ye shi, ihe hakwaashoka ye na okwiilonga natango. Ite ke ya tala ko ya fa ya hala okuninga ethigathanopo naye, ihe ote ke ya tala ko ye li aalongi pamwe naye. — Omayel. 20:29.

10. Aakokele oye na okukala haya tala ko ngiini aagundjuka megongalo?

¹⁰ Aakokele oya tala ko aagundjuka ye li omagano ga za kuJehova, ngoka ye na okupandula. Sho oonkondo dhawo tadhi ende tadhi shonopala, ohaya kala ye shi pandula uuna aagundjuka mboka ye na oonkondo haya kala ye na ehalo okulonga po iilonga mbyoka ya li haya longo megongalo.

11. Rut 4:13-16 otu ulike ngiini kutya aakokele otaya vulu okumona mo uuwanwa ngele oya kala haya taamba ko ekwatho lyaagundjuka?

¹¹ Naemi oku li oshiholelwa shopaMbiimbeli oshiwanawa shaangoka a li a taamba ko  ekwatho lyomugundjuka. Petameko Naemi okwa li a ladhipike oshitenya she, Rut, ngoka a li omuselekadhi, a shune kaandjawo. Ihe Rut okwa kala te mu kondjitha a ye pamwe naye kuBetlehem, na Naemi okwa ka kala a nyanyukwa sho Rut e ya pamwe naye nokwa li a pandula ekwatho lye. (Rut 1:7, 8, 18) Etokolo ndyoka kalya li tuu lye etele aakiintu mboka yaali uuwanawa! (Lesha Rut 4:13-16.) Aakokele mboka aaifupipiki otaya ka landula oshiholelwa shaNaemi.

12. Omuyapostoli Paulus okwa li u ulike ngiini olupandu?

¹² Omuyapostoli Paulus okwa li a pandula ekwatho ndyoka a li a pewa. Pashiholelwa, okwa li e shi pandula sho Aakriste yokuFilippi ye mu tumine shoka a li a pumbwa. (Fil. 4:16) Okwa li wo u ulike olupandu omolwekwatho ndyoka a kala ta pewa kuTimoteus. (Fil. 2:19-22) Pompito yimwe sho Paulus a li ta falwa kuRoma e li onkwatwa, okwa pandula Kalunga omolwaamwahe mboka ya li ye ya oku mu tsa omukumo. (Iil. 28:15) Paulus okwa li omulumentu e na ondjungu nokwa li ha ende iinano iile e ku uvithe noku tse omagongalo omukumo. Nonando ongawo, okwa li omwiifupipiki nokwa li ha taamba ko ekwatho ndyoka ta pewa kaamwahe.

13. Aakokele otaya vulu ngiini okuulika kutya oya pandula ekwatho ndyoka haya pewa kaagundjuka?

¹³ Aakokele, opu na omikalo odhindji moka tamu vulu okuulukila aagundjuka kutya omwe ya pandula. Ngele oya hala oku ku kwathela moku ku pa olefa, oku ke ku landela iinima yoye nenge oku ku ningila iinima yilwe, taamba ko ekwatho lyawo. Kala ho tala ko ekwatho lyawo li li euliko kutya Jehova oku ku hole. Otashi vulika nokuli wu pange uukuume wopothingo nayo. Kala aluhe ho ulike kutya owu na ko nasha nehumokomeho lyawo, mokukala ho ya lombwele kutya otaya ningi nawa sho taya lalakanene okukala haya kwathele egongalo. Kala ho nyanyukilwa pamwe nayo noku ya hokololela iimoniwa yoye. Ngele owa kala ho shi ningi, kungawo oto ulike kutya “owa pandula” Jehova sho a nanena aagundjuka mboka mehangano lye. — Kol. 3:15; Joh. 6:44; 1 Tes. 5:18.

14. Omukwaniilwa David okwa li a ulike ngiini kutya oha gandja?

¹⁴ Omukwaniilwa David okwa tulila po wo aakokele oshiholelwa oshiwanawa kombinga yokugandja. Okwa li a gandja omayambidhidho giimaliwa oyindji nosho wo iinima yilwe yondilo a kutha meliko lye, opo yi ka longithwe mokutunga otempeli. (1 Ondjal. 22:11-16; 29:3, 4) Shoka okwe shi ningi, nonando Salomo oye a li ta ka tungitha otempeli ndjoka. Onkee ano, uuna kaatu na we oonkondo dhokukwathela mooproyeka dhokutunga, otatu vulu okwaambidhidha ooproyeka ndhoka mokugandja omayambidhidho gopashimaliwa ngaashi tatu vulu. Otatu vulu wo okukwathela aagundjuka ya mone mo uuwanawa mowino ndjoka tu na.

15. Omuyapostoli Paulus okwa li a longo shike Timoteus?

¹⁵ Natu taleni wo koshiholelwa shomuyapostoli Paulus kombinga yokugandja. Paulus okwa li a hiya Timoteus e mu wayimine miilonga yuuyendi nokwe mu longo omikalo dhe dhokuuvitha nokulonga aantu. (Iil. 16:1-3) Edheulo ndyoka olya kwathele Timoteus a kale omuuvithi gwonkundana ombwanawa a pyokoka. (1 Kor. 4:17) Mokweendela ko kwethimbo Timoteus okwa ka longitha edheulo ndyoka a pewa kuPaulus a dheule wo yalwe.

16. Omolwashike omumwatate Shigeo a kala ha dheula yalwe?

¹⁶ Aakokele kaye na okukala ya tila kutya itaya ka kala we ye na oshilonga ngele oya dheulile aagundjuka iinakugwanithwa mbyoka ye na megongalo. Pashiholelwa, omumwatate Shigeo ngoka a popiwa metetekelo okwa kala uule womimvo  ha dheula aamwatate aagundjuka kuye mboka nayo ye li iilyo yOkomitiye yOshitayimbelewa. Shoka okwa kala he shi ningi, opo iilonga yokuuvitha moshilongo moka yi pule komeho. Sho ethimbo lyokugandja po oshinakugwanithwa shokukala omuunganeki gwOkomitiye yOshitayimbelewa lya thiki, opwa adhika nale pu na omumwatate ngoka ta vulu oku mu pingena po. Omumwatate Shigeo okwa kala e li oshilyo yOkomitiye yOshitayimbelewa uule womimvo dhi vulithe 45, nota tsikile okulongitha ontseyo ye a kwathele aamwatate aagundjuka. Ooitaali mboka ya fa omumwatate Shigeo oye li lela elalekonuuyamba kaapiya yaJehova.

17. Metsokumwe naLukas 6:38, oshike shoka aakokele taya vulu okupa yalwe?

¹⁷ Aamwatate naamwameme aakokele oshiholelwa sheni oshiwanawa otashi ulike kutya okulongela Jehova nuudhiginini noneitaalo oko okukalamwenyo kwa dhenga mbanda. Oshiholelwa sheni otashi ulike wo kutya okukala hatu ilongo omakotampango gOmbiimbeli noku ga tula miilonga monkalamwenyo yetu oku li pandunge. Omu na ontseyo yankene iinima ya kala hayi ningwa monakuziwa, ihe otashi vulika wo mu kale mwa pumbwa okwiigilila okuninga iinima momikalo omipe. Ne aakokele mboka opo mwa ninginithwa, nane otamu vulu okukwathela yalwe momikalo odhindji, ngaashi moku ya hokololela kombinga yenyanyu ndyoka mwa mona sho mwa tseya Jehova muukokele. Aagundjuka otaya ka pandula okuuva iimoniwa yeni niiyilongomwa mbyoka mwi ilonga. Ngele omwa kala hamu ‘gandja’ ontseyo yeni kuyalwe, Jehova ote ke mu laleka nuuyamba. — Lesha Lukas 6:38.

18. Aakokele naagundjuka otaya vulu ngiini okukwathelathana?

¹⁸ Ngele aakokele oya panga uukuume naagundjuka, kungawo otashi ka kala oshipu ya kwathelathane. (Rom. 1:12) Kehe gumwe oku na shoka mukwawo kee na. Aakokele oye na owino nontseyo ndjoka ya mona sho ya kala taya longele Jehova uule womimvo. Aagundjuka oye na ondjungu nosho wo oonkondo. Uuna aagundjuka naakokele haya longele kumwe ye li ookuume, ohaya simanekitha Tate yetu gwomegulu nohashi etele egongalo alihe uuwanawa.