1. Jehova otatu vulu oku mu ithana ngiini?

UUKWANEGUMBO waalongeli yaJehova owa kwatela mo Jesus, ngoka e li “omutango gwiishitwa ayihe” nosho wo aayengeli oyendjiyendji. (Kol. 1:15; Eps. 103:20) Sho Jesus a li kombanda yevi, okwa kwathele aantu ya uve ko kutya otaya vulu okwiithana Jehova Tate gwawo. Pompito yimwe sho Jesus a li ta popi naalongwa ye, okwe ya lombwele kutya Jehova ‘oTate gwe nosho wo gwawo.’ (Joh. 20:17) Uuna twi iyapulile Jehova e tatu ninginithwa, ohatu ningi oshitopolwa shuukwanegumbo wopahole tu li aamwatate naamwameme. — Mark. 10:29, 30.

2. Oshike tatu ka kundathana moshitopolwa shika?

² Yamwe ohaye shi mono oshidhigu okutala ko Jehova e li Tate omunahole. Yo yalwe otashi vulika kaaye shi nkene ye na okuulukila ooitaali ooyakwawo ohole. Moshitopolwa shika, otatu ka tala kunkene Jesus te tu kwathele tu kale twa tala ko Jehova e li Tate yetu omunahole ngoka tatu vulu okukala tu na ekwatathano lyopothingo naye. Otatu ki ilonga wo omikalo dhontumba moka tatu vulu okuholela Jehova kombinga yankene tu na okuungaunga nooitaali ooyakwetu.

3. Oshiholelwa shegalikano otashi vulu ngiini oku tu kwathela tu hedhe popepyeelela naJehova?

³ Jehova oku li Tate omunahole. Jesus okwa hala tu kale twa tala ko Jehova ngaashi ye, ano kutya omunahole, oha popiwa naye nuupu noke shi omukwanyanya. Shoka oshi iwetikile momukalo moka Jesus a longo aalongwa ye nkene ye na okugalikana. Sho a li te ya longo okugalikana okwa tameke niitya: “Tate yetu.” (Mat. 6:9) Jesus okwa li ta vulu oku tu lombwela tu kale hatu ithana  Jehova “Omunankondoawike,” ‘Omushiti,’ nenge “Omukwaniilwa gwaaluhe,” ngoka ge li omadhinasimaneko ge. (Gen. 49:25; Jes. 40:28; 1 Tim. 1:17) Ihe pehala lyaashono, Jesus okwe tu lombwela tu ithane Jehova “Tate.”

4. Otu shi shi ngiini kutya Jehova okwa hala okukala e na ekwatathano lyopothingo natse?

⁴ Mbela oho shi mono oshidhigu okutala ko Jehova e li Tate omunahole? Yamwe yomutse osho tu li. Otashi vulika shi kale oshidhigu kutse okwiitaala kutya Jehova oku li Tate omunahole, molwaashoka owala ootate yetu kaaya li haya ungaunga natse pahole. Otashi hekeleke lela okutseya kutya Jehova oha kala e uvite ko nkene tu uvite. Okwa hala okukala e na ekwatathano lyopothingo natse. Nomolwaashono Oohapu dhe tadhi tu ladhipike tadhi ti: “Hedheni kuKalunga, ye nota hedha kune.” (Jak. 4:8) Jehova oku tu hole noku uvaneka kutya ota ka kala Tate yetu omunahole kaaku na we.

5. Shi ikolelela kuLukas 10:22, Jesus ota vulu ngiini oku tu kwathela tu hedhe popepyeelela naJehova?

⁵ Jesus ota vulu oku tu kwathela tu hedhe popepyeelela naJehova. Jesus oku shi Jehova nawa noha holele omaukwatya ge. Nomolwaashono a li a vulu okutya: “Kehe ngoka a mono ndje, okwa mona wo Tate.” (Joh. 14:9) Ngaashi omumwayinamati omukuluntu, Jesus ohe tu longo nkene tu na okusimaneka tate yetu, nkene tu na okuyanda oku mu yemateka nankene tatu vulu okukala twa hokiwa kuye. Ihe okutala konkalamwenyo yaJesus sho a li kombanda yevi otaku vulu oku tu longa oshindji kombinga yankene Jehova e li Tate omunahole nomunalukeno. (Lesha Lukas 10:22.) Natu ka taleni kiiholelwa yimwepo.

6. Gandja iiholelwa yankene Jehova a li a pulakene komagalikano gaJesus.

⁶Jehova oha pulakene koyana. Natu taleni kunkene Jehova a li a pulakene kOmwana gwe gwotango. Kapu na omalimbililo kutya Jehova okwa li hu uvu omagalikano gOmwana sho a li kombanda yevi. (Luk. 5:16) Okwa li hu uvu omagalikano gaJesus kombinga yomatokolo ga simana ngoka e na okuninga, ngaashi sho a li a hala okuhogolola aayapostoli ye 12. (Luk. 6:12, 13) Jehova okwa li wo a uvu omagalikano gaJesus uuna e li muudhigu. Manga inaa gwaalekwa, Jesus okwa li a galikana a mana mo kombinga yaashoka a li e li poku ka ningilwa.  Jehova ka li owala a uvu egalikano lyaJesus, ihe okwa li wo e mu tumine omuyengeli e mu nkondopaleke. — Luk. 22:41-44.

7. Ohashi ku ningitha wu kale wu uvite ngiini sho wu shi kutya Jehova oha pulakene komagalikano getu?

⁷ Nokunena Jehova oha pulakene komagalikano gaapiya ye, nohe ga yamukula pethimbo lyo opala nomomukalo moka ihaaya kala ye shi tegelela. (Eps. 116:1, 2) Ndhindhilika nkene Jehova a li a yamukula omagalikano gomumwameme gumwe gwokoIndia. Omumwameme ngoka okwa kala tu ungaunga nuupyakadhi wopamadhiladhilo, nokwa kala ha galikana kuJehova kombinga yasho. Okwa nyola a ti: “Opolohalama yotiivii JW yaMei 2019, ndjoka ya li tayi popi kombinga yankene tu na okuungaunga nokukala twa limbililwa nenge tu na iimpwiyu oyindji, oya li lela pethimbo noya kwathela ndje noonkondo. Onda li ndi uvite kutya Jehova okwa yamukula omagalikano gandje.”

8. Omomikalo dhini Jehova a li a ulukile Jesus kutya oku mu hole?

⁸ Jehova oku tu hole nohe tu sile oshimpwiyu, ngaashi owala a li a ningile Jesus sho a li kombanda yevi. (Joh. 5:20) Okwa li a sile oshimpwiyu Jesus pambepo, pamadhiladhilo nosho wo palutu. Jehova okwa li wo he mu lombwele kutya oku mu hole nokwe mu hokwa. (Mat. 3:16, 17) Jesus okwa li aluhe ha kala e shi kutya He oku li pamwe naye note ke mu ambidhidha, naashoka oshe mu kwathele kaa kale e uvite e li oye awike. — Joh. 8:16.

9. Uumbangi wuni tawu ulike kutya Jehova oku tu hole?

⁹ Ngaashi Jesus, atuheni Jehova ohe tu ulukile ohole ye momikalo odhindji. Dhiladhila owala kwaashika: Jehova okwe tu pitika tu kale ookuume ke nokwe tu pa aamwatate naamwameme aanahole mboka haye tu kwathele tu kale twa nyanyukwa nohaye tu tsu omukumo uuna twa teka omukumo. (Joh. 6:44) Jehova ohe tu pe wo aluhe iikulya yopambepo, opo tu kaleke eitaalo lyetu lya kola. Ohe tu kwathele nokuli tu mone iipumbiwa yakehe esiku. (Mat. 6:31, 32) Ngele otwa kala hatu tedhatedha kohole ndjoka Jehova e tu nine, ohole yetu yoku mu hola otayi ka kola.

10. Oshike tatu vulu okwiilonga komukalo moka Jehova ha ungaunga naamwatate naamwameme?

¹⁰ Jehova oku hole aamwatate naamwameme. Ihe otashi vulika hatu shi mono oshidhigu okuulukila ooitaali ooyakwetu ohole, unene tuu molwaashoka otu na omithigululwakalo dhi ili nenge twa za momaputuko ga yoolokathana. Ohatu ningi wo omapuko ngoka haga uvitha yalwe nayi. Nonando ongawo, atuheni otatu vulu okulonga nuudhiginini tu koleke ohole yetu yokuhola ooitaali ooyakwetu. Ongiini tatu vulu oku shi ninga? Omokuholela Tate yetu sho hu ulukile aamwatate naamwameme ohole. (Ef. 5:1, 2; 1 Joh. 4:19) Natu ka taleni kwaashoka tatu vulu okwiilonga koshiholelwa shaJehova.

11. Jesus okwa li a holele ngiini ‘olukeno nohenda’ yaJehova?

¹¹Jehova ohe tu ulukile “olukeno nesilohenda.” (Luk. 1:78) Omuntu ngoka e na olukeno nohenda oha kala e na ko nasha nayalwe, oha kala e shi wete uuna taya mono iihuna, noha tala nkene e na oku ya kwathela noku ya hekeleka. Okupitila momukalo moka a li hu ungaunga naantu, Jesus okwa li u ulike nkene Jehova e na ko nasha nayo. (Joh. 5:19) Oshikando shimwe sho Jesus a li a mono ongundu yaantu, “okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.” (Mat. 9:36) Jesus ka li owala e ya uvitile ohenda. Okwa li wo a aludha aavu nokwa gandja epepelelo kwaamboka ya li ya “humbatekwa uudhigu.” — Mat. 11:28-30; 14:14.

12. Gandja iiholelwa yankene tatu vulu okuulikila yalwe olukeno.

¹² Opo tu ulukile ooitaali ooyakwetu olukeno, tango otwa pumbwa okuuva ko uupyakadhi mboka ya taalela. Pashiholelwa, omumwameme  gumwe otashi vulika a kale e na uuvu wa kwata miiti. Iha ngongota kombinga yawo, ihe otashi vulika a kale a pumbwa ekwatho. Mbela oha gwanitha po ngiini oompumbwe dhuukwanegumbo we? Mbela itashi ka kala oshiwanawa ngele otwe mu kwathele nokuteleka nenge nokwoopaleka egumbo lye? Omumwatate otashi vulika a kanitha iilonga. Mbela ite ke shi pandula ngele otwe mu pe okamaliwa kontumba, kaapu na okupopya kutya otse twe ke mu pa, manga ta kongo po iilonga yilwe?

13-14. Ongiini tatu vulu okukala hatu gandja ngaashi Jehova?

¹³Jehova oha gandja. (Mat. 5:45) Katu na okutegelela aamwatate naamwameme ye tu pule ekwatho, opo nawa tu ya kwathele. Ngaashi Jehova, otatu vulu oku ya longela uuwanawa nonando inaye tu pula. Ohe tu pitithile etango kehe esiku, kaapu na oku mu pula e shi ninge. Kehe gumwe oha mono mo uuwanawa metango nokuli naamboka ihaaye mu pandula. Mbela ito tsu kumwe kutya sho Jehova he tu gwanithile po oompumbwe dhetu oshi li euliko kutya oku tu hole? Otu hole Jehova noonkondo, molwaashoka omunalukeno noha gandja.

¹⁴ Aamwatate naamwameme oyendji ohaya holele Tate yetu gwomegulu, mokukala haya gandja. Pashiholelwa, mo 2013 moFilipine omwa li mwa holoka oshikungulu oshinene. Aamwatate naamwameme oyendji oya li ya kanitha omagumbo gawo nosho wo iinima yawo yilwe. Ihe ooitaali ooyakwawo muuyuni awuhe oye ya kwathele naashoka ya pumbwa. Oyendji oya gandja omayambidhidho gopashimaliwa nenge ya yi ya ka kwathele miilonga yokutunga, shoka sha li sha kwatela mo okutunga omagumbo 750 muule owala womvula yimwe. Pethimbo lyoshivu sho-COVID-19, Oonzapo odha kala tadhi longo nuudhiginini dhi kwathele ooitaali ooyakwawo. Ngele otwa kala hatu katuka nziya tu ambidhidhe ooitaali ooyakwetu, kungawo otatu ku ulika kutya otu ya hole.

15-16. Shi ikolelela kuLukas 6:36, omomukalo guni gwa simana tatu vulu okuholela Tate yetu gwomegulu?

¹⁵Jehova oku na ohenda noha dhimine po. (Lesha Lukas 6:36.) Kehe esiku Tate yetu gwomegulu ohe tu ulukile ohenda. (Eps. 103:10-14) Aalanduli yaJesus kaya li ya gwanenena, ihe nando ongawo, okwa li e yu ulukile ohenda noku ya dhimina po. Okwa yamba po nokuli omwenyo  gwe, opo omayono getu ga vule okudhimwa po. (1 Joh. 2:1, 2) Okudhimina po nosho wo ohenda ndjoka Jehova naJesus ye na ohayi tu hedhitha popepi nayo.

¹⁶ Ohole yetu yokuhola ooitaali ooyakwetu ohayi kolo uuna hatu ‘dhiminathana po.’ (Ef. 4:32) Odhoshili kutya okudhimina po yalwe ihaku kala aluhe okupu, nomolwaashono twa pumbwa okulonga nuudhiginini tu kale hatu shi ningi. Omumwameme gumwe okwa li e uvite kutya oshitopolwa shOshungolangelo shi na oshipalanyolo “Dhiminathanii po ethimbo kehe,” oshe mu kwathela a kale ha dhimine po yalwe. * Okwa nyola a ti: “Oshitopolwa shoka osha kwathele ndje ndi uve ko ashihe shoka sha kwatela mokudhimina po yalwe. Osha yelitha wo kutya okudhimina po yalwe itaku ti kutya shoka omuntu e ku ningila inashi puka nenge kutya inashi kwata miiti. Pehala lyaashono okudhimina po otaku ti okwaakala wu nine omuntu onkone nokukala wu na ombili.” Ngele otwa kala hatu dhimine po aluhe ooitaali ooyakwetu, kungawo otatu ulike kutya otu ya hole notatu holele Tate yetu, Jehova.

17. Shi ikolelela kuMateus 5:16, ongiini tatu vulu okusimanekitha Tate yetu gwomegulu?

¹⁷ Oshi li uuthembahenda uunene okukala oshitopolwa shuukwanegumbo waJehova womuuyuni awuhe. Otwa hala aantu oyendji ngaashi tashi vulika ye tu wayimine mokulongela Jehova. Tu na shoka momadhiladhilo, otwa pumbwa okukala twa kotoka kaatu ninge sha shoka tashi ka ningitha aantu ya popile muuwinayi Tate yetu gwomegulu nenge oshigwana she. Natu kale aluhe hatu longo nuudhiginini tu ihumbate momukalo ngoka tagu ningitha aantu ya kale ya hala okupulakena konkundana ombwanawa. — Lesha Mateus 5:16.

18. Oshike tashi vulu oku tu kwathela kaatu kale twa tila uuna tatu gandja uunzapo?

¹⁸ Omathimbo gamwe yamwe otashi vulika ya kale ye tu dhina nenge nokuli ye tu pataneke molwaashoka owala hatu vulika kuJehova. Ongiini ngele ohatu kala twa tila uuna tatu popi naantu kombinga yeitaalo lyetu? Otatu vulu okukala nuushili kutya Jehova nOmwana otaye ke tu kwathela. Jesus okwa li a shilipaleke aalongwa ye  kutya inaya pumbwa okukala ye na oshimpwiyu kombinga yankene taya ka popya nenge shoka taya ka popya. Omolwashike mbela? Jesus okwe ya yelithile a ti: ‘Otamu pewa pethimbo tuu ndyoka shoka mu na oku shi popya. Oshoka hane tamu popi, ihe ombepo yaHo oyo tayi popi mune.’ — Mat. 10:19, 20.

19. Gandja oshiholelwa shagumwe ngoka a li a gandja uunzapo nuulaadhi.

¹⁹ Natu taleni koshiholelwa shaRobert. Pompito yimwe sho opo a ninginithwa noka li e na ontseyo oyindji yOmbiimbeli, okwa pulwa a ye kompangu moSouth Afrika, opo a ka yelithe kutya omolwashike inaa hala okuya muukwiita. Sho a li komeho yompangu okwa popi nuulaadhi kutya ina hala okuninga omukwiita, molwaashoka oku hole aamwahe Aakriste nosho wo kutya okwa lenga okukala e li oshitopolwa shuumwayinathana wetu womuuyuni awuhe. Shoka osha ningitha omupanguli e mu pule ta ti: “Aamwaho oolye?” Robert ka li a tegelela a pulwe epulo ndyoka, ihe okwa dhimbulukwa nziya enyolo lyesiku ndyoka, ndyoka li li muMateus 12:50, tali ti: “Kehe tuu ngoka ta gwanitha ehalo lyaTate yomegulu, oye omumwameme omulumentu nomumwameme omukiintu nameme.” Nonando Robert opo owala a adhika a ninginithwa, ombepo ondjapuki oye mu kwathele a yamukule epulo ndyono nosho wo omapulo galwe ngoka kaa li a tegelela a pulwe. Jehova oku na okukala a li e uvitile Robert etumba! Jehovah oha kala wo e tu uvitile etumba uuna twi ikolelela muye e tu kwathele tu gandje uunzapo nuulaadhi moonkalo oondhigu.

20. Oshike twa pumbwa okukala twa tokola toko okuninga? (Johannes 17:11, 15)

²⁰ Natu tsikile okukala twa lenga okukala oshitopolwa shuumwayinathana wetu wopahole. Otu na Tate omunahole kaaku na we nosho wo ooitaali ooyakwetu aadhiginini. Natu kale aluhe tu na olupandu omolwuuthembahenda mboka. Satana naalanduli ye ohaya kambadhala oku tu ningitha tu kale twa limbililwa ngele Tate yetu gwomegulu oku tu hole ngaa shili, nohaya kambadhala wo okuteya po uukumwe wetu nooitaali ooyakwetu. Nonando ongawo, Jesus okwa li a galikana pehala lyetu, nokwa pula Tate yetu e tu tonatele, opo tu tsikile okukala twa hangana tu li aamwayinathana. (Lesha Johannes 17:11, 15.) Jehova egalikano ndyoka ota tsikile oku li yamukula. Ngaashi Jesus, natu kale twa tompwa thiluthilu kutya Tate yetu gwomegulu oku tu hole nosho wo kutya ote ke tu ambidhidha. Natu kale twa tokola toko tu tsikile okukala tu na ekwatathano lya kola naJehova nosho wo nooitaali ooyakwetu.